الاداء ملا حسنين حمزه

فزاعية العسكري ع // الشاعر قاسم الساعدي المندلاوي
****
يا مسموم يالعسكري
يا مظلوم يالعسكري
******
تعزيتنه قائمة اليوم الظهور
من يهل ابرايته المهدي الغيور
نرفع الشكوه أله يم القبور
الثارك ابميعاده هوه ينتخي
يا مسموم يالعسكري
يا مظلوم يالعسكري
******
انگلّه يا مهدي الأمم ونخبّره
ابحال ابوك العسكري هذا الجره
يمته تتعناله يبن الطاهره
النوح منّه للمصيبة تعتلي
يا مسموم يالعسكري
يا مظلوم يالعسكري
****
ندري بي يحضر ويستقبل عزاء
شيعته الخلّص ابأنواع الرثاء
هالجموع الزاحفة تعلن ولاء
عن عقيدة حيدرية للولي
يا مسموم يالعسكري
يا مظلوم يالعسكري
*******
بينه جمرة حزن ما تبرد أبد
اشلون نقنع هالحصل ليكم وعد
دم ابوكم عالنهر لا ما برد
وصابكم من بعده سم الناصبي
يا مسموم يالعسكري
يا مظلوم يالعسكري
****
لكن السجاد أنطانه الدليل
عنّه ما يوجد وحگ ربنه البديل
گال كرّمنه ابشهادتنه الجليل
ودم ابوي ابكربله يشهد ألي
يا مسموم يالعسكري
يا مظلوم يالعسكري
******
نحزن ونلبس سواد اعله الإمام
چن رحيله ابشيعته مثل السِّهام
عينه غمضت لا عشيرة اولا عمام
حزنه من احبابه لا ما ينجلي
يا مسموم يالعسكري
يا مظلوم يالعسكري

( هوسات ) عن استشهاد الامام الحسن العسكري عليه السلام (تجليبه)

كلشي ينوح لجلك ظل يبومحمد
يضي الگاع نورك علارض من رد
املاگه الگاع بسماها الدمع للخد
     ( ملچومه الگاع ابسامره )

المجد والدين دمعه اتسابگ الدمعه
لبوالحجة المعارف  والعلم ينعه
مو ألها الفخر    سامره مرتفعه
     ( نورك سامره امعليها )

حگها اعليك تحزن سيدي الأملاك
وتنوح شماتنوح وتنحب الفرگاك
كل واحد اجاك ابشوگ وتعناك
    ( متعني الجنه وظامنها )

مثل أفعال جدك والد الزهره
ومثل نهج الإمام المرتضى وصبره
تدلي الفگد دربه وحاير ابامره
     ( ياهادي الناس ابن الهادي)

البلسم اعتنولك كونهم يدرون
يلثابت اساسك همه اليطيحون
وين أهل الغدر چا باچر يروحون
      ( ابنك باچر يأخذ ثارك)

الشاعر حسن لعيبي الحريشاوي

للامام الحسن العسكري

يادمعتي. من دمه صبي اعله خدي
يادمعتي. بالبجي نواسي المهدي

عظم الله اجرك يغايب
يعينك كلبك ع مصايب

يابو صالح. يابو صالح
.......

يعين كلبك يابو صالح من دمه دموعك تصب
ولو من ليلة العاشر سيدي شظل بالكلب
تشوف ابوك كبال عينك موقفك كلش صعب
تبجي وانه اعرف عليمن راح اسولفهن واطب

تبجي لحسين ..... محد ينوح اعله جثته
مرمي ع الكاع .. تنطك شما ناحت اخته

ابالك الشام ونوايب
يعين كلبك ع مصايب

***

فاتحه ابيتك واشوفك بيك لوعه الكربله
شماتجي تعازيك وادم تذكر حسين وهله
شلون ظل اعله الترايب دامي محد غسله
ولا رضو زينب تنوحه ولا تنوحه العايله

انت سويت .... فاتحه ودمعه ومصيبه
وتبجي للشيخ .. الجثته ظلت سليبه

وفوكه مالطمن حبايب
يعين كلبك ع مصايب

***

والدك غسلته بيدك وانت لفيت الچفن
كبل لا تعگد أزاره صحت وعيونك بچن
حسين ليش اعله الوطيه ماتغسل وندفن
وليش تغسيله الحوافر سحگته وصدره انطحن

والدك مات .... بس الحسين اعله بالك
كربله وياك ... سيدي حتى ابخيالك

لن شفت بيهه العجايب
يعين كلبك ع مصايب

**

والدك شيعته بيدك وانت نزلته بگبر
واللحد بيدك حفرته وجبت كافور وسدر
كمت بس من البواجي صارت عيونك حمر
تبجي لحسين وذكرته النايم بحر الظهر

من دمه تنوح ... للبقه بحر الظهاري
بلا گبر نام ... بلا فياي حسين عاري

ولا شريف الظل يطالب
يعين كلبك ع مصايب

***

الخادم موسى البطلي

نعي للامام العسكري ع
***
مسموم مسموم مات العسكري يا ناس مسموم
مالوم مالوم كلبه امن المصايب حيل مالوم

ريض يجناز كلها تصحيلك  ريض يجناز
شال ويالعزاز مو تدري الفراح شال ويالعزاز


من تكعد اوياه. يمحلات الابو من تكعد وياه
ويصيح ويلاه. يبجي المهدي ضل ويصيح ويلاه

ويدير بالماي.  يغسل ضل ببوه ويدير بالماي
متعذب اهواي.  يناس العسكري متعذب اهواي

وعيونه عالباب. مشه بنعش الابو وعيونه عالباب
كله امن الأحباب. تره ضيم الكلب كله من الأحباب

لمن يونون يكطعون الكلب لمن يونون
ماظن يردون النامو بالكبر ما ظن يردون

خربها التراب ليش اخدودهم خربها التراب
ما حاسب احساب يكطعون المشو ما حاسب احساب

دعمن يالعيون. صحت اشمالجن دعمن يالعيون
واشلون بشلون جبت العمر كله اشلون بشلون

ثجيلات حنين المهدي وجروحه ثجيلات
حرامات المثل المهدي يتعذب حرامات

الشاعر
تحسين الخفاجي

الاداء ملا ابو رقيه

قصيدة شهادة الإمام الحسن العسكري ( عليه السلام)
تعزية للإمام صاحب الأمر ( عجل الله تعالى فرجه الشريف)




عظم الله أجـــرك يمـــولاي الغـريب
مصاب أبوك إيهوِّنه مصاب السليب

_

عظم الله أجرك إمامي إبن الحسن
كثره المصايب وســـط گلبك صفن
أيام أبوك العسكري بسرعه نطُفن

وإلك سلوه بجــــدك الخــــده تريب
__

عظم الله أجرك يمن شفت المصاب
تنظُره إيمامك گظه وبدره إلي غاب
لاچن الطـــف گلبـــك إلي منها ذاب

ومنهــــا دايم حزنـــك ودام النحيب
___

شكبره صبــرك تحمل لهذا الألم
بجبل لوبعض الشفت چان انعدم
چن گلب زينــــب دليلك وأنجسم

ومن مصايبهـــا إلك حصه ونصيب
____

وسفه ابــــوك السَم مردله چيدته
وبگصيـــــر العمـــر شابَــه جدته
لاچَـــن إتشيع من أهلـــه وشيعته

ولا بقه عالغبره ويصهره اللهيب

————-

عن همومك شذكر إيطــــول الكلام
إنت ياشمس الدجى المجلي الظلام
يا بعــــد إسمـــي إلك منـــي سلام

يدوم وي حزنك على الشيب الخضيب



الشاعر : أبو زينب علي الظالمي

قصيدة رثاء لشهادة الامام الحسن العسكري عليه السلام

انتــه المعزى   يا امـــام المنتــــظر
بالحزن تنعى   ابالك اطوف الصور
لموت الامام العسكري
ويــــاك يهمل ناظـري

       انته المعزى--------------- انته المعزى


                     ¢¢¢¢¢¢


وي جرحك اليله الگلب ايلچــمه جرحه
والحزن والهم ســـيدي مـر بيـنه صبحه
من العمر راح الســــعد ضــــاعة الفرحه
خايف اگليبك ينلـــچم وجروحه تصحه

أتفــز الجــروح   حين تذكر كربله
والزينب اتنوح    يوم فرت بالفله
انته جرحك حيدري
ويـاك يهمل ناضـري

       انته المعزى ------------انته المعزى

            
                  ¢¢¢¢¢¢¢


لمصاب مولاي الحسـن تجري الدمـــعه
مفطور چبـده ومنضهد والســـم يجرعه
متـوسد افــراش الاجل ومترادي وضعه
وضمك الصدره اودعك وانتـــــه تـودعه

يعذبك مصابه   صعبه فرگة والدك
ونتـــه ابغيابه   راح تبقه الوحــدك
مكسور لجلك خاطري
ويـــاك يهمل ناظـــري

        انته المعزى---------------انته المعزى 


                     ¢¢¢¢¢¢¢


اشحال گلبك سـيدي بهــاي المسيه
بيــــدك تغسل والدك بدمـــعه جريه
بعــــدك ازغير بالعمر وصعبه الرزيه
ألجيت ابوك اتشوقو اللـه ونبيــــــه

خلصت حياته   ولقــاء ربه استــــعد
بليلـة ممــــاته   گلبــك اهـواي انمـرد
بحر المدامع ضل جري
ويــاك يهمل ناظـــــري

       انته المعزى -------------انته المعزى


                    ¢¢¢¢¢¢¢


الروح شـاطــــت والگلب هليله مالـــــوم
تلجم اجروحي امصيبتك وينزفن ادموم
يا والدي ابصوتك صحت يا بـاب العلوم
تيـــتم المنـــبر والعلـــــم والدين مهدوم

يالمهدي جرحك   تلچمه نسمات الهوه
انكســـــر ظهرك   وبــــد ماصحله دوه
لجلك تغير منضري
ويـاك يهمل ناظري

       انته المعزى ------------انته المعزى

              
                     ¢¢¢¢¢¢¢

مشـتاگ گلبي الطلعتك يمته نشــوفك
ونزور سامــره ســـــوه وتكرم ضيوفك
كل لحظه ضلت سيدي تمرني طيوفك
يالاغله من روحي صرت مگــدر اعوفك

ليليــه ادعــي     ونتضـــــــر يالطولت
يومك يمهـدي     ابگلبي احسبله گمت
عـنه ابد ما يندري
وياك يهمل ناظري

   انته المعزى. ---------------انته المعزى

                      ¢¢¢¢¢¢¢¢



تم بعون الله تعالي
بقلم ام زين العابدين اللامي
من يود يقرا القصيده يذكر هذا الاسم (زين العابدين الزبيدي)
والله ولي التوفيق
اسـالـكم الـدعاء لي والـوالديه
الفاتحه الى روح والدي ووالدتي 💔💔