#قصائد_شهادة_الرسول_الاكرم_صلى_الله_عليه_وآله_١٤٤٢_هجريه

ــــــــــــــــــــــــــــــــــــــــــــــــــــــــ



المخلوقه لجله الأكوان هالیوم غابت روحه
،،،،،،،،،
سر والوجود وسرحیاة الاكوان
أشرف خلایق ربنه وأشرف أنسان
نورویسبح واحد اواحد جان
شمس وهوه.     وماي وضوه
والغیم من گصته ارتوه
منبعهه نفس المختار والیوم كلهه تنوحه
 ،،،،،،،،،،
سید الناحوا عالرسول الزهره
تب ّچي المدینه والسماء ابحسره
 من افراگ ابوهه ذابله ومصفره
هي ام أله.    وبنت العله
وجانت ابجاله مدالله
هالیوم حست بالخوف. والهادي بعده بلوحه
 ،،،،،،،،،،،،،،
والمرتضى محني الأخیه ومكسور
 والتمت الشماته واصحاب الجور
 وبانت حقایق زورهم والمستور
كالواعذر.   عنه یهجر
والأمه فرقوهه الكفر
من جحره مد راسه بلیس بیوت السقایف سوحه
 ،،،،،،،،،،،،
ماشایف أّمه تعوف سیدهه البار
ذاك النقذهم من شفا حفرة نار
ومن الشرف تتحدر الصوب العار
تترك عدل.    نهج وفضل
وتتبع الماعدهم أصل
والشید اصروح الدین أنوت تهدم اصروحه
 ،،،،،،،،،،،،،،
گلب الصمیده من القهر ینگط دم
جرح النبي هم وخیانتهم غم
وبدین طه وصبره اصبح ُملَزم
لو بیده سّل.   سیفه ونزّلَ
دین النبي یصبح ًهزل
وعینه على بابه وزهرا مترقبه ومشبوحه 
،،،،،،،،،،،،
الدنیه وشمابیهه عگبك ضلمه
واهل السماوات بحذر ملتمه
تنطر قدوم الرحمه یم الرحمه
 وحمزه ظهر.  جعفرحظر
ینادون عجل یافخر
اوالد علي وكل مرسول وحبك خدیجه تبوحه 
،،،،،،،،،،،،
عنه انگطع وحي السماء بموتك
 ومشتاكه اصحاب العباء الصوتك
مات الفرح یالمصطفى وي موتك
 وغیم الفتن     غطه الزمن
وعالعتره سنوهه المحن
نتنطر المهدي بیوم یظهر یطیب أجروحه 
،،،،،،،،،،،،،،

للشاعر والرادود ثامر العارضي

الاداء ملا محمد الحسيني

للرسول الاكرم ( ص )


المن ابجي  واهل دمعي الياعزاء
للمدينه  لو  انوح   الكربلاء

ابجي لمصاب النبي
لو انوح اعله السبي

ارزقني دمعه وصبر يارب السماء
.......

مو سهل فكدك علينه بجت ليك ارض وسمه
والعرش ناصب عزائك والاملاك امحزمه
احنه وادم جي نحبك نبجي لمصابك دمه
الله يدري بهل مسيه شحال بنتك فاطمه

تدري عكبك تنعصر
وضلع منهه ينكسر

تحزمت من هسه بنتك للبكاء
ارزقني دمعه وصبر يارب السماء
.......

جنت رحمه من الله عدنه ماتمر بينه الشدد
مذنب وكثرت ذنوبي بيمن اتوسل بعد
جنت خير الكاع كلهه الخير وي روحك صعد
بكلبك الينكط محنه ما  الك  كفوآ  احد

شالو الرحمه بنعش
الرحمتك ذنبي عطش

الله يخجل مايرد بسمك  دعاء
ارزقني دمعه وصبر يارب السماء
.........

خافن ايخلص دمعنه وعيني تنشف ماتهل
جنه مشايه ويه زينب ردت بدون الشمل
فاتحه اعله حسين سوت عمت عيني اعله الهزل
مارضو تبجي اعله اخيهه والحده الهزل نذل

عيوني حكهن وشلن
وزين منهن ما عمن

حسين ظل اعله الترب مامش رداء
ارزقني دمعه وصبر يارب السماء
.......

فاتحه الروحك نصبنه اعيون التحبك بجن
وكمنه نقرالك عزيه ع العلاوي الي انسبن
من سمعت بطاري زينب صحت كومو اكليبي حن
امشونه نتلكه السبايه بلا زلم رد الضعن

للمدينه ابنيتي اجت
وادري بيهه اتغيرت

راجعه بضيم الارامل والنساء
ارزقني دمعه وصبر يارب السماء

......

انت كايلهه وسمعنه جلمه مضمونه السند
حسين يوليدي اليحبك كلبه مايبرد ابد
حكنه لو وشل دمعنه الصار بأبنك ماله حد
عدل والخياله غارت سحكته وصدره انمرد

الخيل وصلت للخيم
بيهه من اضلوعه دم

تخيل بنص الخيم شنهي العزاء
ارزقني دمعه وحركه يارب السماء
.......

الخادم موسى البطلي

الاداء ملا محمد الحسيني

•«﷽»

يارسول الله الحبيب
ياجرح ماضن يطيب
ياجـواب لكل غريب
محمد
محمد

ياحبيب الله وحبيب الــناس كلها
الدنيه ضلمه وانته هاديها واملها
روحك الخضره ابد مــا صار منها

ياحبيب لـــــــكل حبيب وياضوه
مسحة جفوفك عله اليمرض دوه
انته وجــــه الله الكريم لكله خير
الهوه يمــك يختلف عن كل هوه

يارسول الله محمد
"""""""""""""""""
نورك الما مثله نور
ع الارض كـله يدور
يا مــثال لكل وقور
محمد
محمد

انتَ يا اول رســـــــاله بلايه ساعي
احنه كـــــل احنه رعيه وانته راعي
الفهم قولك هذا بس يعُتبر واعي

كلها هاي الدنيه من دونك عدم
بلايه وجهك ديــن ربك ما سلم
انته تممت الــــــرساله وبلغت
الــــخلافه لحيدر وهذه المهم

يارسول الله محمد
"""""""""""""""""""
بحب عـلي اول شهيد
مشه سمك بـــالوريد
عشت مضلوم ووحيد
محمد
محمد

انته مفتاح الجــــروح اعله البريه
لعن الله كل مــــــن ابكى الزچيه
ليش هيج وانته رحــمه ومو اذيه

جرحك الما طاب بين اهل العشگ
اليحب اهلك هذا اليحبك صـدگ
اكــــــو ناس من البشر فرحو اكيد
لــــــمن سمعو بيت بنتك يحترگ

يارسول الله محمد
""""""""""""""""""
دمع بيتك بــس يهل
خلافك يضيع الشمل
فراگ وجهك مو سهل
محمد
محمد

عتزل حـــــيدر عگبك الدنيه واهلها
مبينه اعله الــــــكاع دمعاته اليهلها
حموله ثگلن وانته شايل نـص حملها

دفـــن طولك من رجع طوله انكسر
قــــــــالع البيبان رد محني الضهر
الحسن ويـــه حسين والزهره تنوح
وين ابوها الچنه ضي شمس العصر

يارسول الله محمد
""""""""""""""""
خادم القصيده
عزيز المياحي

ستشهاد الرسول
((شور))

#قصائد_شهادة_الرسول_الاكرم_صلى_الله_عليه_وآله_١٤٤٢_هجريه


ــــــــــــــــــــــــــــــــــــــــــــــــــــــــ

إشهد يامحمد هاي الاصدور
بعد اثار بيهه اللطم عاشور
وننعاك بصفر
ياسيد البشر
................

بصفر بثمانيه وعشرين ايامه
يبچي الدين الك يمنصب اسلامه
وحيدر يبو الزهره ذب العمامه
حزين وعلى فراكك شاد الثامه

من طبع العرش مايبجي عالمات
ونته بموتك مبچي السماوات
مفجع هالخبر
ياسيد البشر
................

الزهره تصيح بويه تعوفني وترحل
هواي جروح بعدك اني شتحمل
جوابي الك عني لو ردت تسال
أصحابك يبويه حضرو مقتل

من هسه واشم بالباب دخان
والم بضلوعي احس وبخدي نيشان
وگليبي انعصر
ياسيد البشر
................

ابن عمك وبنتك هايه حالتهم
واحنه اعليك نقسم وبمحبتهم
لاتحرمنه طول الدهر خدمتهم
وتحشرنه يطاهه ويه زمرتهم

الخادم من يموت وتغمض العين
كون اهناك يصبح جار الحسين
هالموته فخر
ياسيد البشر
...............

خدام الحسين الناس سمتنه
عزيزك والعزيزك هايه لطمتنه
الك من الكلب نحجيهه كلمتنه
دنيه واخره احنه حسين غايتنه

موبس بالاسم نتسمه خدام
وفقنه العزائه بكل الايام
هنياله الحضر
ياسيد البشر
................

النحر ذاك التشمه وتدمع اعيونك
من اتشوفه بالطف ينخطف لونك
ولاجن انته جده ولا يعرفونك
من ذبحوه نيتهم يذبحونك

التضمه اعله الصدر وتبوسه بشفاه
صدره الحافر بكل حيله رضاه
جسمه اصبح وذر
ياسيد البشر
................

نعزيك بمصابك يا ابو العتره
گلوب الخدم كلهه اعليك منكسره
الكم ثار ندعي بالعجل لمره
طول العمر نبقه المهدي ننتظره

خدام احنه ربتنه العزائات
ماننسا الضلع وحسين هيهات
انته المستقر
ياسيد البشر


محمد هادي العقابي

#قصائد_شهادة_الرسول_الاكرم_صلى_الله_عليه_وآله_١٤٤٢_هجريه
ــــــــــــــــــــــــــــــــــــــــــــــــــــــــ


للرسول الكريم

الرسول لفاطمه وحيدر يحاچي
كافي من الـدمـع كافي البواچي
وراكم باچر ونين .. وعينه بعين الحسين
كافي من الـدمـع كافي البواچي
**
الرسول لفاطمه يعاين وبساعة منيه
وراچ من الونين هواي كافي يالزچيه
ضمّيهن دموع العين لحسين ورقيه
للطايح بصف الماي للتمشي سبيه
.....................
مده ايده لدمعها وبيده نشّف
ماحاچي بعدني وياچ عالطف
راح هواي تبچين .. وعينه بعين الحسين
كافي من الـدمـع كافي البواچي
**
يحيدر بالصبر اوصيك من تاخذ قرارك
اذا شفت الزچيه تطيح لا تلزم فقارك
ولو صعبه عليك تشوف نار اباب دارك
بعدين اليجي ياخوي والياخذ بثارك
...................
مو هينه عليك تشوفهه تطيح
ظهرك ينكسر من تسمع تصيح
تشوف السطره بالعين .. وعينه بعين الحسين
كافي من الـدمـع كافي البواچي
**
الزچيه تگله بويه شلون ماتسمع ونيني
هينات الدموع انطيك فدوه تروح عيني
مو بيدي البواچي عليك غصباً تعتنيني
اشوفنك تريد تموت وبحضنك بنيني
....................
اشوفك بالثغر للحسن تلثم
ترجع بالنحر لحسين وتشم
احبهم حيل تدرين .. وعينه بعين الحسين
كافي من الـدمـع كافي البواچي
**
المصايب جايات هواي الهن رايد الحيل
اجتكم كربله تشبعون آه وصوت ياويل
هناك حسينكم طايح وعليه داست الخيل
وزينب بالخرابه تبات وي ايتام بالليل
...................
اشبعوا من البواچي بكربلا هواي
ابـنـكم يـنـذبـح وبـحـسـرة الماي
نتشب نار الصواوين .. وعينه بعين الحسين
كافي من الـدمـع كافي البواچي
**
يصير ام الحزن اسمچ تحبين الينوحون
تحبين العزه عله حسين والناس اليلطمون
يگل الهه شنو النتطين لحسين اليزورن
اوگف عالسراط الهم واخليهم يعبرون
...................
آنه ام الحسين المات عطشان
وادور عن عزه ابني وين ماچان
انتي وام البنين .. وعينه بعين الحسين
كافي من الـدمـع كافي البواچي
**

سيد علي المدني.

الاداء ملا محمد الحسيني

فزاعيه للرسول ص

الساده اليوم نصبتلك عراضات
تبجيله الارض واهل السموات
........ ......
الساده اليوم ذبوها العمايم
الزهره تشوف من بعده الهظايم
عليه فكر الزجيه اليوم هايم
المهظومه// تون واتريده

ام حسين العسكري ناصريه
................
نصبتلك  چوادر  فوك   الحدود
ودمع ام الحسن يجري بالخدود
كل عام  وسنه  والتعزيه  اتزود

(وحزنانه /لمصاب الوالي)

✍️ام زهراءالفاطميه
.............
صعب فركه الابو وايهدم الحيل
تنوح الزاجيه والمدمع ايسيل
تريد اويه الحنين تروح واتشيل

محزونه / لشال وغرب
✍️ام نور الزهراء الزينبيه
...........
تون ام الحسن تجذب الونـــــــــه
تصبح بصوت یبويه وسندنه
مافلن ابد للدوم حزنــه

( لواليها.. تون الزهره
✍️الشاعره ام روكان الشمري
............

حركو دارهه َمن نامت العين

تنادي ام الحسن يابويه يحنين

يا وسفه النذل طكاني عالعين

هظموهه الزهره اخلافك))

ام رافد العسكري
..................

نصبو ا فاتحه ولطموا على الهام
راح الچان هيبه وسور الاسلام
ركن الدين  ماظن بعد يلتام

منكوبه/ الشيعه اخلافه

✍️ام حسين الفريداوي
..................
تنشال ابنعش  يابويه   وسفه
اظلن بالحزن. وابروحي لهفه
بعد هيهات ماضن جرحي يشفه    

(وبضلوعي /الكسره التوجع)

✍️الشاعره ام ريحانه الفاطميه
....................
تمت بحمد الله وتوفيقه بأقلام شاعرات ملتقى ناعيات الطف تحت اشراف وتدقيق الشاعره ام حسين العسكري ناصريه يحرم الحذف والتلاعب ونسألكم الدعاء الفاتحه لامواتنا وامواتكم مع الصلوات
تمت بتاريخ ٢٠٢٤/٨/٣٠