نزلة عزاء للأنصار

انصار انصار.   موقف ثبات بكربله
انصار انصار.   بالموت صاحوا ياهله
==========
هز حبيب الرايه بيده وصاح لاوين المفر
كربله ضاگت عليهم لاح بجفوفه الخطر
حسين هذا اليدنه يمه والله اكسرله الظهر
سيفي عطشان اعل دمكم يشرب بدم النحر

انصار انصار.  تسمع دويهم بالفله
انصار انصار.  بالموت صاحوا ياهله
===========
يازهير يگله انزل وانت اخذها الميسره
الميمنه عليه وزلمها عالذبح تلزم سره
الا اخلي الطف دمايه والجثث متطشره
منين تشرد وين تشرد والاعادي حايره

انصار انصار.    جلماته تدوي اعل المله
انصار انصار.    بالموت صاحوا ياهله
==========
گله انزل للمعاره خل اشوفك ياوهب
موقفك ثابت اعرفه وانت اصفه من الذهب
سيفك اليحجي برگبهم خل يشوفون العجب
ازرع الطف موت بيدك صير للموته سبب

انصار انصار    ليل الحرب من انجله
انصار انصار.   بالموت صاحوا ياهله
==========
عيد الانصار الحرايب وكفوا بوگفت زلم
الواحد بمية تعده يطشر بكيفه ويلم
نصرة حسين العقيده بس الحسين المهم
من ابو فاظل عزمهم منه اخذوا هالعزم

انصار انصار   صوته حبيب من اعتله
انصار انصار.  بالموت صاحوا ياهله
==========
بالطفوف الناس موقف ينشره الموقف تره
والانصار بيوم عاشر كلمن لموقف شره
عابس المزگ قميصه ونزل قدم منحره
الفوز وي حسين والله فوز دنيا واخره

انصا انصار.  غالي ابن عقد الوله
انصار انصار. بالموت صاحوا ياهله
==========
ابن ظاهر غيض دخن رفرف بجفه العلم
الجيش ألاف ويگلهم الزلمه يگرب للخيم
اليوم اغرگها المعاره اليوم اخلي الحومه دم
الجيش اسحگه ومايهمني الجيش كله ماسلم

انصار انصار.   والطف بالادموم انمله
انصار انصار.   بالموت صاحوا ياهله
==========
الشاعر علي النائلي

الشاعر علي النائلي

بصوت ستار الصالحي

رفت راية الانصار .............والعباس رف رايه
ضهر اعله الضهر دگوه ...... هاي ازلام وفايه
....................................................................
زعلت والغضب دخان دار بروس اهاليها
ازلام التلبس الاكفان ولا واحد يمر بيها
اچفوف امعرّكه امن الضيم جيب اللي يلاويها
مترهي اليطب عرّاك ميهاب اليلاگيها
حچّايه وحچيها اثگال ...............وتعدل الحمل لو مال
اصحاب التطيب جروح .... لمن تطي الحچايه
.................................................
كل صاحب تعرفه بضيج وتعرف زينه من شينه
واحد يگطع الچفين واحد ما يرد دينه
اصحابك خلق الله من العباس فد طينه
تفزع فزعت الملهوف لونادت تره اسكينه
گالو بالمثل كل حين ............... الزين ايصاحب الزينين
واصحابك يبو السجاد وكت الضيج كفايه
.............................................................
جون ازغر عبد عدهم طب ايعارك بقامه
وسيدهم حبيب شلون شايب ذب العمامه
خلاهم عبيد الموت حر اليكشف الثامه
من أذن آذان السيف هامه التردم بهامه
طاحت والروؤس هواي ............... صارت گنطره اعله الماي
مو اسود تظل يا جون ابيض وجه المرايه
..............................................................
مجنون ويشگ الثوب صاح حسين جنني
عابس من كسر هالسيف قائدهم شرد مني
بصم چفوف اطبها بزود الخيّركم فلا ثني
يسهام التريد حسين ردي اعليه صيبني
واليرضه عليه حسين ...........................فاز بدنيته وبالدين
حومه واليريد ايبيع ..... تلگه انصاره شرايه
...............................................................



بسيف ايجندل الفرسان طب الحيد شيرده
وخله اعله الزلم شارات كلمن طينته بخده
من طبها زهير القين كلها اللي ادخلت عنده
عرگت والعصرها الخوف ماي اوجوه تتبده
شيخ اعله الزلم صيته ................... ذب ابعيد خاچيته
بموقفها الزلم تنقاس ... هاي اشيوخ عطايه
...............................................................
چن خيبر وگع بالطف وتنسه الگوم اساميها
ضاعت حرثت المشراد من عباس طب ليها
دگ ضهره اعله ضهر انصار گادر وحده يفنيها
يعطش ويتَرّوه السيف يگلبها اعله شاطيها
ريشاته اليمسها الريح ................. ثِلث الجيش يمه ايطيح
شيال العلم عباس.... ظل لحسين تچايه
..................................................................
الخادم
علي صادق المجراوي

الاداء ابو حوراء الميساني

نزلة / انصار الامام الحسين عليه السلام 2024

ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
انصارك احنه وعالعهد تعرفنه
لا دنيا عنك لا طمع يحرفنه
سلم وحرب واحد يضل موقفنه
موقف ولائي بحبك توالفنه

لكل فرد حبك صار نور وهويه
ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لو گطعونه بالحرب منعوفك
بهيئة مُحمّد يا حُسين نشوفك
مولانا عفنه الكعبة جينه انطوفك
مو احنه ننكر بالشدد معروفك

نشتريها ويّاك تحله المنيه
ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
انت الحُسين ونفتخر اصحابك
النه الشرف من نندفن بترابك
نتخضب احنه بدمنه گبل خضابك
نتگطع اهون من مرار غيابك

نبقه نتحدّه وياك جيش آل اميه
ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
آمنّه بيك وعفنه كلشي وجينه
انت الامام وحجة الله علينه
نرفض يزيد ومانبابع دينه
تحت امرك احنه بكل وكت تلگينه

نطيعك ونرضي بهاي الله ونبيه
ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نتبرّه من زمرة يزيد الملعون
انطينه رخصه وخل نشوف يثبتون ؟
ميهمنه خل أكثر بعد يزدادون
شباه الرجال وبالحرب ينهزمون

نحفرلهم اگبور بالغاضريه
ما نعوفك هيهات يبن الزجيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هز راية الأنصار شيخ الانصار
هوّس حبيب بكربله يريد الثار
هجموا على العسكر هجوم الاحرار
راووهم الموت وعذاب الكفار

وفّوا ولجل حسين ضحو سويه
ما نعوفك هيهات يبن الزجيه

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

الاداء ملا جواد الغرباوي

موشح (لسادتي الانصار)

هاجت اليوث الوغئ ورجبت الخيل
وكربله اتماوجت من صوت الصهيل
🏴🏴🏴🏴🏴🏴🏴🏴🏴🏴
حسين ناداهم وفزعو للحرب
وشدو اعله المعركه گلب بگلب
ذوله بالكلفات ماعدهم صعب
ذوله الانصار ومنو اعليهم يعيل
🏴🏴🏴🏴🏴🏴🏴🏴🏴🏴
صاحو ابشر يبن حماي الحمه
انته ابن حيدر وامك فاطمه
اليوم تغرگ كربله ابفيظ الدمه
ابشر ابشر ها يين حامي الدخيل
🏴🏴🏴🏴🏴🏴🏴🏴🏴🏴
طبو اعله الميمنه وعالميسره
وخلو الفرسان كلها مگنطره
اعيونهم من الغضب متحومره
وجانت انهار الحرب سووها ليل
🏴🏴🏴🏴🏴🏴🏴🏴🏴🏴
همه صح سبعين بس مو بالعدد
بينو سبعين الف وكت الشدد
ذوله ويه حسين كتبو هالعهد
ونعم منهم شالو الحمل الثجيل
🏴🏴🏴🏴🏴🏴🏴🏴🏴🏴
باوعو لحسين والمدمع يهل
گالو احنه انموت بس كونك عدل
لو الف مره نموت وننجتل
اشما نقدملك يبو اليمه قليل
🏴🏴🏴🏴🏴🏴🏴🏴🏴🏴
📝احمد علي البغدادي..

الاداء ملا مجتبى الكعبي

قصيدة لأولاد مسلم ع
****
إحنه أولاد السفير بلا حمه
واحنه ذبحتنه العصابه المجرمه
***
صوتنه من الكوفه يبقه للحشر
من دمانه اتحنت جفوف البدر
احنه اولاد السفير المنغدر
واحنه عنوان الطفوله المؤلمه
***
بياذنب ذبحونه ليش بلا رحم
اتفجرت انهار دمنه من الألم
احنه خطينه الشهاده بلا قلم
شوكه بعيون الطغاة الظالمه
**
بدمنه حررنه العبيد من الخضوع
لا رضينه بذله لاعشنه بخشوع
احنه صنعنه بطفولتنه الدروع
وتفخر الاجيال بينه القادمه
***
شيطلب ابن زياد ثار ويانه
عام كامل بالسجن خلانه
احنه نسل المصطفه وعنوانه
المايشوف انوارنه بعينه العمه
***
رادو الظلام يمحون الأثر
عاندو حكم الأله بهالقدر
باقي ذكر حسين وبطول الدهر
بالكلب والعين ذكره راسمه
**
أم علي

#محرم_الحرام_1445

ساداتي اولاد مسلم صلوات ربي عليهم

بعد ما وقع الحسين ص واصحابه واهل بيته ع هجمت الخيل واحرقو الخيام.. من شدت الخوف والهول طفلين هامو على وجه البيداء😔💔

((زغار الطف))


من كثر هاي الخيل والنار
النهبت خيمنه
وخيل ع خيل اتشَمر لزغار
خفنه وركضنه
حفــاي نركض والرمل حار
زيد عطشنه

دنيه ليل ومـا دريـــــــنه
ضعنه مــــن گدما مشينه
زغار وچبـيره المــــــدينه
اي عـــــــــرف لا ما لگينه

بويه بويه بويه
بگد مــــــــلامح ديره
بينه دارت حيــــــــره

بويه بويه بويه
اباب كــــــــلما نگعد
أهله گامــــــت تطرد

بويه مسلم بويه... بويه مسلم بويه
ــــــــــــــــــــــــــــــــــــــــ
من التعب ما ضل بعـــــد راي
حته نطيعه
طوينه الصحاري اميال حفاي
اليندل تضيعه
خوف وعطاشه والمشي هواي
گصدنه الشريعه

للنهـر لمّــــــــــن وصلنــــــــه
گمنه نعتب مـــــــــــــا شربنه
روينه مــــــــــاي الله ابدمعنه
نمـــــــــنه يم جرفه ابعطشنه

بويه بويه بويه
بحال يكسر خاطر
ذكرنه يوم العاشر

بويه بويه بويه
ياهضم بي نحچي
نشكي لله ونبچي

بويه مسلم بويه... بويه مسلم بويه
ــــــــــــــــــــــــــــــــــــــــ
بين الدروب ابساعت اغروب
لاگـتنه حره
نسكت لـَون سألتنه چـندوب
ألسكته مره
سألت والسؤال يذوب الگلوب
خافين سره

حچولي من ياديره انتم
وياهو ابوكم ياهي امكم
صحنه أحنه اولاد مُـسلم
للــــــــه ليـله انبات يمكم

بويه بويه بويه
لمَن عرفت طاحت
ودمعه بالخد لاحت

بويه بويه بويه
عمت عيني عليكم
امــــكم انه وبيتكم

بويه مسلم بويه... بويه مسلم بويه
ــــــــــــــــــــــــــــــــــــــــ
دره بينه اللأيــــــــــــم وياها بالدار
لما أله ذمه
شهر سيفه بــــــــوجهنه بدل منغار
يذبحنه همه
رايد روسنه چـــــــــــن يطلب ابثار
ماعنده رحمه

بويه مسلم مــــــــن عرفنه
لا رحــــــــــم سنه اودمعنه
نوه ونيتـــــــــه يحز رگبنه
هنـــــــا اجت عالبال اختنه

بويه بويه بويه
عفنه اختنه بالبــــــــر
ادور او تتحــــــــــسر

بويه بويه بويه
ذبـــــــح واهـــــگ بينه
مثل نحـــــــــــــر احسينه

بويه مسلم بويه.... بويه مسلم بويه
ــــــــــــــــــــــــــــــــــــــــ
تمت بفضلهم ص
✍️ياسر الزيادي

نزله (لسادتي الانصار)(ع)

هالليله للانصار راح اقره قصيده
راح احجي عن اهل الشرف واهل العقيده
وگفتهم اويه حسين مو وگفه جديده
نصهم تره وگفو گبل ويه الصميده
اليقاتل بصفين ◾️هسه اجه اويه حسين
(وگفو بالطف دگو ثايه )
🏴🏴🏴🏴🏴🏴🏴🏴🏴🏴🏴🏴
مكتوبه عند حسين كل اسماء الانصار
كل هالبشر سبعين ربك منهم اختار
كلهم زلم كلفات غيرتهم صدگ نار
والعنده هيج انصار شتضن هذا يحتار
كلهم زلم كلفات ◾️طاحو علئ الصعبات
(والملك الموت ايعزبوله)
🏴🏴🏴🏴🏴🏴🏴🏴🏴🏴🏴🏴
وگفو صدگ وگفة زلم لبن الزجيه
كل فرد بيهم فاهم ابعاد القضية
گلبوها لجل حسين گاع الغاضريه
والگرب ليهم گربت منه المنيه
صارو درع لحسين ◾️واحدهم بسبعين
(ايذبحونه اليگرب لخيامه )
🏴🏴🏴🏴🏴🏴🏴🏴🏴🏴🏴🏴
روح اسئل التاريخ واسمع منه فكره
هم بي مقاتل للسهم فاتحله صدره
هم سامع بواحد قبل عزب بنحره
عالشگ قميصه بكربله دور واقره
يهل العشگ تدرون◾️عابس صبح مجنون
(ابلاسيف امكاون بجفوفه )
🏴🏴🏴🏴🏴🏴🏴🏴🏴🏴🏴🏴
كلمة عهد للموت خطوها بضماير
هالكلمه هيه الاسست خط الشعائر
كتبو عهدهم من من حبر دم المناحر
زرعوها للاجيال ويحصدوها باجر
لا مو حجي واقوال ◾️جانو زلم افعال
(للثائر رسموها الصوره)
🏴🏴🏴🏴🏴🏴🏴🏴🏴🏴🏴🏴
📝احمد علي البغدادي .