مولد الرسول ص

يا شمس والدنيه بيك اتلالي
****
الدنيه گبلك ظلمه چانت يالنبي
إندعت جمّلني ربي ابهل صبي
بنور وجهك گلها يالله اتحجبي
انه سويتچ لجل هل غالي

يا شمس والدنيه بيك اتلالي
****
انته لو لاك الضوه ما بي ضوه
گبل يومك چان مخنوگ الهوه
يالله بسمِ الله گلتلهن سوه
بيچن اشرگ عالارض يحلالي

يا شمس والدنيه بيك اتلالي
****
انته فوگ الگاع اجمل من نزل
بالصفات وبالكرامه وبالعمل
چان گبلك يالنبي مر العسل
تصفه گتله من تصف ابجالي

يا شمس والدنيه بيك اتلالي
****
انته عن كل الخلائق تنفرد
بورده نتعنه ونگصده الينولد
لاچن انته اليوم زينت الورد
كل عطر عايد الك بالتالي

يا شمس والدنيه بيك اتلالي
****
الليله كون الله ابجمالك ينفرش
يالنبي مهدك صبح ساگ العرش
والسماء انجوم الك ظلت تطش
عالي يابو الزهره شانك عالي

يا شمس والدنيه بيك اتلالي
****
لاربعينك امي لا ما اقتنع
ابمهده عيسى يسولف ابين الجمع
بصدرك الله طابع آيته طبع
الله گلك بيك ابث اقوالي

يا شمس والدنيه بيك اتلالي
****

الشاعر اياد الديراوي

الاداء ملا ستار الصالحي

مولد النبي الاكرم محمد (ص)

نولـد للـه حبيب
بشر لكن عجيب
من جماله  وكماله  حير الناس
©©©©©©

اهلال النبي هل والخلگ فرحانه
بيـْه ازهـــرت بيـْه انـورت دنيانه
ابنفـس المهد يَمه انولـد قــرئآنه
وترتلـــت كل السّــــور بالســـانه
يا ســـــلام الله عَلِيه
الله خالق كلشي بيْه
ابصوت عالي اليوم اصيح
عاشگ اوميّـت عَلِيه

بعذِب حـُـــبّه ارتويت
خذِت من عنده صيت
من جماله  وكماله  حير الناس
©©©©©

الجِن والإنس وأرض وسمَه مسروره
شمس العلِي وصاحب علي هل نوره
يـا آمــنه بنتَ وهــب مشـــــــــكوره
جبتي النبي الحُر النلوذ ابســـــــوره
لجله تعلِه الصلوات
هوه مفـتاح النجاة
صاح جـــبريل ابسما
اليوم ميلاد الحياة

إله انعلگ زهـور
عطر خدّه بخور
من جماله  وكماله  حير الناس
©©©©©

ارواحـــــــنه ابهذا الحفل مهتمّه
ابصـفگه واناشيد وشــعر خنتمّه
طه الضـوه وهوه الهوه النشتمّه
حضره وعلـيه كل الخلگ ملتمه
جاذبيه اشـــكثُر بيه
نيوتن اتعجب عَلِيه
يجـــذب العـــالم هــــواه
سر ألاهي ابين اديه

نرفع للحـــبه شان
ضمن صك الجنان
من جماله  وكماله  حير الناس
©©©©©

الله اوْيَه طه ايسولف ابكل ليله
يشــــتاقله وســـرعان ما يوحيله
قــرئآن طـه والكتـــــــب ترويله
ورب المــــكارم مختص بتأويله
والنعم ســــيْد الأنام
هوّه دســـتور الغرام
بالقصيده اشما حچيت
عاجز ابوصفه الكلام

حرت عنه شگول
شـغل كل العقول
من جماله  وكماله  حير الناس
©©©©

هـذا الحفل والله انصب عالفطره
وللصــــادق وجعفـر الصادق نقره
حيدر حظر بيه بصطحاب الزهره
شــــاركنه فرحتنه ولزوم انشكره
گباله نوگف بحترام
اجــلالاً انهبطله هام
انســـــــلم اعليه ويگول
وعليــــكم الســـلام

همت بيْه من صباي
طـبَع حـــبه ابدماي
من جماله  وكماله  حير الناس
©©©©©

     ✍الخادم
    كامل السعيدي

الاداء كامل السعيدي

طَلَعَ البَدْرُ عَلَيْنَا واِتَّضَحَ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
                ــــــ༺༻ــــــ

ابتهجنه بهل ولاده وموعد الفرحه ابتده
نرفـــــــع آيات التــهاني اله ابليلة مولده
ابهيبته وآية جماله منفرد بس وحــــــده
على اخـــدود الورد نوره نازل بهيئة نده

طه للخيراتِ بابٌ وانْفَتحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي

              ــــــ༺༻ــــــ

اول اصـــحاب الكســاء وســــــيد الكل البشر
صار ساق العرش مهده وخيره عالدنيه انتشر
ضايع وما عنـــــــده ذوق الما فرح بيه وبتشر
انبعـث للائـــمه رحمه اوطـــن والعافه خسـر

فيهِ مَنْ يَزدادُ حباً قَد رَبحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي

              ــــــ༺༻ــــــ

عالي شــــــانه والله زاده بالكــرامه ودللــه
وختلف لعيونه كلشي الكون اصبح بس اله
الشافه صــــــاح الله أكبــر ياخلق مااجمله
والســـماء طشت نجمها واهليــــه ابمحفله

وَجْهَهُ بالعرشِ نورٌ قدْ قَدَحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
               ــــــ༺༻ــــــ

اسمه بلسم للجراح وشوفته اتروي الضمه
ابمولده الاصــــــنام كلها اصبحت متهدمه
اتشـارك اويانه ابفرحنه نازله املاك السمه
محفله راحــة تعبــنه وبيه نجــــي ونكلمه

صدر من والا طاب ونشرحْ
وَجَبَ الشُّكْرُ عَلَيْنَا والْفَرَحُ
فرحه فرحه للنبي
سهره سهره للنبي
                  ــــــ༺༻ــــــ

كلشي بيها الدنيا فاني وحُبّه دايم للابد
حيل غـزر بينه عشگه وثابت لوِلد  لوَلَد
هوّه ابونه ودلانه وســـــور للائمه وسند
بالشداد انصيح بسْمه مــدد يا طه مــدد

طه غوثٌ باسمِهِ الصوتُ صَدَحْ
وَجَبَ الشُّكْرُ عَلَيْنَا والْفَرَحْ
فرحه فرحه للنبي
سهره سهره للنبي
               
                 ــــــ༺༻ــــــ

  ✍الخادم
كامل السعيدي

الاداء كامل السعيدي

نقدم التهاني للامام المهدي عج بمناسبة
ولادة النبي الصادق والامام جعفر الصادق ع

يابوصالح .. هذا عنوان الحفل باسمك
يابوصالح .. احضر وخل نحتفل يمك
   ابمولد الصادق ــ  والنبي الصادق
         ـ💐💐💐💐💐💐ـ

بطه اختم وبتدي ـ واقراله مولدي ـ اليوم
بي تكمل كشختي ـ وللصادق فرحتي ـ ادوم

الخـــــير هل وازهرت دنيانه
گلوبنه ابهذا الفـــــرح مليانه
الجعفر الصــــادق وطه اليله
انسـرت املاك السماء اويانه

يابوصالح .. ينجلي بهذا الحفل همك
يابوصالح .. احضر وخل نحتفل يمك
   ابمولد الصادق ــ  والنبي الصادق
       ـ💐💐💐💐💐💐ـ

هايم بيهم صدگ ـ گلبي ابحبهم يدگ ـ حيل
امنقره ابيات الشعر ـ يطلع منهن عطر ـ هيل

اســــــــعد الله ايامك انرددها
بسمك ابيات الشــــعر ننشدها
الخـــــير كله اليله صب اعلينه
اوياك فرحتنه السنه نجــددها

يابوصالح .. ياوكت لصدورنه انضمك
يابوصالح .. احضر وخل نحتفل يمك
   ابمولد الصادق ــ  والنبي الصادق
      ـ💐💐💐💐💐💐ـ

هم آيات الحــــــمد ـ منهم عطر الورد ـ ياس
بيهم ارد اختلي ـ اليعشكهم يمتلي ـ احساس

العاش وياهم صــــدگ هنياله
غيــــــــرهم بالدنيه ما يحلاله
بالحفل يالمهدي احضر شاهد
كلــــــها ولهــــانه ابمحمد وآله

يابوصالح ..  اعيوني من اتغمض اترسمك
يابوصالح .. احضر وخل نحتفل يمك
   ابمولد الصادق ــ  والنبي الصادق
       ـ💐💐💐💐💐💐ـ

بدمعاتي وبسمتي ـ وحساسي وصفنتي ـ وياي
هم ناسي وكل هلي ـ اقرب من روحي الي ـ اهواي

ابدمي عاشو وبنبض شـرياني
وچي احبهم ربي نعمه انطاني
لقب خادم الهم ايشرفني حيل
هالمحافل هيــــه رفعت شاني

يابوصالح .. من صميم اگلوبنه انكلمك
يابوصالح .. احضر وخل نحتفل يمك
   ابمولد الصادق ــ  والنبي الصادق
          ـ💐💐💐💐💐💐ـ

    الخادم
كامل السعيدي

الاداء كامل السعيدي

شافع الامه. يانبي الرحمه
صفحة للحق تبتدي. بمولدك ياسيدي
يانبي الرحمه

معبد الأصنام ساعتها تضعضع
بهلولاده كسرى ايوانه. تصدع
ونار فارس خمدت وما الها مطلع
بأرض مكه نورك المهيوب من شع
ربك اختارك. نزل انوارك
الناس بيها تهتدي. بمولدك ياسيدي
يانبي الرحمه

هاي اسفار وصحاح الكتب تشهد
عيسى بشر گال من بعدي محمد
بمولدك باب الجهل للدوم ينسد
ولاتظل دمعات للمظلوم علخد
الظالم ابحسره. ينتهي امره
خاب كل ظالم ردي. . بمولدك ياسيدي
يانبي الرحمه

بهليالي الليله ماصاير مثلها
چن الف ليلة قدر وأكثر فضلها
بالكرم رب السمه الوادم شملها
بنور طه غير الدنيا بأهلها
الساعة محلاها روحي تهواها
اليوم احس بمولدي. بمولدك ياسيدي
يانبي الرحمه

نزل ضيك شاغل الوادم جماله
رحمه انته ارسلك رب الجلاله
لاظلام ولاعبوديه. وظلاله
الأرض عگب الجور تمليها عداله
بوجهك البسمه. زاحت الظلمه
بالفرح تحدي حدي. بمولدك ياسيدي
يانبي الرحمه

ياعطوف بزود حنيه ولطافه
بعطفك المعلول من جرحه تشافه
لا بعد موئوده. بچفوف الصلافه
ولابلال بسوط. تتجرح اچتافه
الدنيا مختلفه. ابفرح وبلهفه
ثوب الابيض ترتدي. بمولدك ياسيدي
يانبي الرحمه

الشاعر حسن لعيبي الحريشاوي

نبارك لكم ولادة سيد الكائنات محمد (ص)

محمد عرج للخالق وصلى
نبينه امر من ربنه وصلى
بملاك السمه تقدم وصلى
ربنه بهاي قدمله هديه

انتَ اول نور من شع بالسماء
ربنه أول يامحمد رتلك
سئل جابر يامحمد معتنيك
راد منك هالجواب ويسئلك
بده يسئلك يارسول الله شتكول
ارد اسئلك وسؤال بحظرتك
منهو اول بالخلق ربنه بدا
گلي يانور اليشع من امتك
وبصراحه يجاوبه الهادي الرسول
آنه اول نور من شع عالفلك
نوري اول بالخليقه الله صطفاه
ونوري اول بالعرش لمن سلك
وحنه لاشك بالدليل مسلمين
حتى آدم بالعسر هم حشمك
يانبي مثلك عرش ربه يطوف
حتى جبرائيل يصبح خادمك
ياهو مثلك خلفه صلت انبياء
ونته ربك بالعرش ويكلمك
*
السيد محمد الموسوي الجابري

يهادينة  يهادينة  يرحمة ونازل علينة
======================

فرحنة بمولد الهادي  ورد وشموع ضوينة

بفرح كل شيعي الك نادة   يهادي وينشر الزينة

يمهدي مبارك انادي   والك نبعث تهانينة

الف عالخير يا شيعة  ابو صالح ينادينة

محمد طلعت انوارة  علينة ونورة يهدينة

سعيد ويا كبر حضة  يمن بسمك عناوينة

يخاتم للرسل كلها    يخاتم للعلي دينة

رحمنة الباري بالهادي   نجاة من الخطر لينة
==================
أسالكم الدعاء رائد الاسدي