نعي للعسكري عن لسان حال الامام الحجه
……
بلله ابهيده ياجناز والينه
انتوادع ويه ابونه الليله خلينه
شراح يگول من يمشي ويوصينه
وعلى ياجاده بعده يمشينه
بالسم گفضت وانختمت اسنينه
نحاجيه بالله خلينه ويحاجينه
شلون الفراگ مر مانجرعه شلون الفراگ
والكلبه يشتاگ المن يروح الگلبه يشتاك
نتوادع اشباگ منك ردت لحضات نتوادع اشباگ
وينادي عالوالد
… ..
حلوه گبل لمت الوليان
ريض علينه هنا يدفان
فوگ الترب نامو الشجعان
يادارنه البعدك خليه
التمت مصايب بس عليه
ياريت مرتني المنيه
ولاشلت الجنازه بديه
يادارنه البعدك حزينه
يحله الكلب بيها ونينه
بوجودكم جانت امينه
هلبت بعد مره تجينه
بويه وياك حلوه گعدتي جانت وياك
ماكدر انساك شطال العمر مااكدر انساك
………
الشاعر علي الحاج الصبيحاوي

الاداء ملا عدي الربيعي

فراكين شدهن بالي الغالي وابن الغالي
كلشي خذن من عندي فراك الحسن والمهدي
/////////////////////////
انه نرجس واشكي من فكد الحبايب
بكلبي حركه آمن الزمن خلتني اعاتب
العسكري مسموم ليش وجبده ذايب
هذا ابو بيتي انغدر ووليدي غايب
شجاب السهر لعيوني كل ظني متعوفوني
وتاليهه اظلن وحدي فراك الحسن والمهدي
/////////////////////////
ابكل شبر بالبيت عايف ذكره ليه
شفت بعيونه الي نظرت منيه
تحيرت حيره ولا مرت عليه
وبدعاءالفرج مرفوعات اديه
كلبي وكف حسيته آمن الحسن فارك بيته
وسفرت عذابي تبدي فراك الحسن والمهدي
/////////////////////////
بدمعتي ظليت يتكرر سؤالي
ليش بيتي آمن الاحبهم ظال خالي
من الحزن اسود لبست انه وخيالي
شما اشوفن بعد مايرتاح بالي
حرورت حزن بنفاسي والشيب تارس راسي
عدله اظل ماودي فراك الحسن والمهدي
/////////////////////////
الجآن من اعيوني يفهمني وافهمه
هسه يم كبره اجيت اترابه اشمه
شلون أشتم الهوه بفراكه زحمه
وعندي غايب ادعي كون الله يسلمه
دنيانه كلش خطره ذبحت ولد الزهره
بيه الحزن ظل يحدي فراك الحسن والمهدي
/////////////////////////
حالي مو حال وابد ماطابلي النوم
عمت عيني العسكري ودعته مسموم
جان مجلس عدنه هوه يقيمه كل يوم
يصيح جدي ابكربله آمن الماي محروم
وبصوته يقره المقتل عمتنه صعدت عالتل
ياروحي هذا حدي فراك الحسن والمهدي
/////////////////////////
اليهم بالثار بين اظلوعه جمره
انه امه ومايجيني وهم اعذره
عله عماته السبايه ادموعي حمره
شوكت ياخذ ثاره ظل مشغول فكره
ايكلي يمه ادعيلي للثار اشدن حيلي
وهل ازمه يمته تعدي فراك الحسن والمهدي
/////////////////////////
تمت __ علاء الزيدي

الاداء ملا عدي الربيعي

بصوت. مسلم المطيري
نعي لمولاي العسكري ع

گـالـولــي الحوائـج يــمـه منـهـية
بـس گـلـة علـيـك امـك الـعـلويـة
وذكـرة بـالمـشت لـلشام مسـبـيـة
احسب من بعيد الحاجة مگضية

يـالگاصـد المجلـسـه وعـلتك چـبـيـرة أمـد
ويـل معتني بحاجـتـك والغيره مالك أحـد
ويالصابر اعله العسر وبشخصه راسم سند
ويـل سـار بيك الدهـر وعليك جـوره حشد
أدخـل عـلـيه بـالـتي دارت عـلـيـهـه الشدد
حـلفه بـعزيـزه الحسـن والهادي گـلـه مـدد
سـامـره شـهدت تـره بجوده وشهدله بـلـد

رغم عسري وضريحك   ماشفيته
يـمـا  گـلـب أعـتـنـالـك   ماشفّيته
مــا مـــرّه الـگـصـدلـك   ماشفيته
يباب الحاجـه شـافي الـروح اليه

شلون حـالـك من شفت مطروح ابوك
هـم تـذكــرت ابــطــرحـتـه حـسـيـنـك
ويــن ادورك ســـيـدي والــگــاك ويــن
حـــرت يـامــولاي بـــيــنـي وبــيــنــك
أرد اعـــزيــك بـــفــگــــد ذاك الـهـمـام
يـبـو الـنـفـس الـكـامـلـة الله ايـعـيـنك
صرت ادورك حتى بالطيف ارد اجيك
ويـــن دلــيــنــي بـمـكـانـــك ويـــنــك
من صدگ مبخوت لو من فيض اديك
حــصــلــت لـمـسـات مـــن چـفـيـنــك



#الشاعر_الميرزا_محمد_الساعدي

في شهادة الامام الحسن العسكري عليه السلام
* * * * * *
حسراتي حسراتي .. سبكتهـا وناتــي
أحزاني وآهاتــي   .. تشرحها دمعاتي
* * * * * *
 أمصاب الامام العسكري .. جددلي أحزاني    
هز عمق وجداني   ..  مهموم خلاني
هالنايبه تسوه النعي .. ولطمي على راسي  
امصيبة اعز ناسي  .. جرحتني بحساسي
جفني بدمع عيني غرك .. من حزني عالغالي    
ملجوم دلالي .. مهموم عالوالي
 
عالعسكري نوحي  .. مجروحه أحس روحي
عبراتـــي عبراتي   ..  تشرحها دمعاتـي
* * * * * *
 أتفطر دليلي أمن الهظم .. حسره تجر حسره    
وأرد أنحب وأقره  .. وي أمه الزهره
لنها أجت لمصيبته .. أم الحسن تنعه  
بنت النبي البضعه  .. بمصابه منفجعه
بمصابه حظرت فاطمه .. حزنانه مالومه    
مهمومه مهظومه .. وتنعاه المظلومه
 
خير النسه الزهره     .. متعنيـــه سامره
وتنادي لجماتــي      .. تشرحها دمعاتي
* * * * * *
 يعين الله كلب المنتظر .. أشكد صبر عنده  
من ذوبوا جبده   .. محزن بكه بعده
مسموم شاف العسكري .. من الرجس سمه    
يبجي كعد يمه    .. ماينوصف همه
يبجي أبوصالح كعد .. يمه حنه ظلوعه    
ويكفكف أدموعه   .. من طفوا أشموعه
 
حضناه وينادي     .. يبن النبي الهادي
يابويه مأساتي     .. تشرحهـا دمعاتي
* * * * * *
هذا الامام العسكري .. أتودعه أحبابه    
وملتمه بمصابه  .. تتناحب اصحابه
شيعوا نعشه شيعته .. وكل اهله وأخوانه  
وانصاره وأعوانه  .. بتشييعه حزنانه
وحسين محد شيعه .. ظل مرمي بالحومه    
تتنازف أدمومه   .. لامامثل يومه
 
من دمه أخضابه     .. وأمسلبــه ثيابــه
وبذكــره لوعاتي     .. تشرحها دمعاتي
* * * * * *
آه يامصايب كربله .. جم جرح خليتي    
جم كلب آذيتي    .. بزينب شسويتي
آه يامصاب المنذبح .. والمنهشم صدره  
وظل عاري بالغبره   .. ينزف دمه نحره
مرفوع راسه أعلى الرمح .. وأصحابه ذبحوها  
وخيامه حركوها    .. وعياله سلبوها
 
حسين أنذبح ضامي     .. وظل بالعرى دامي
بمصابه صرخاتــي     .. تشرحهـــا دمعاتي
* * * * * *
                                     سلام المشعل

تجليبه للعسكري (ع)




على امصابك يوالينه بدمع مدرار
هالليله نعزي المهدي راعي الثار
١

بدمع يالعسكري نبچیلک وننعه
بمصابك ننوح ونسچب الدمعه
من آل النبي الليله طفت شمعه
وبگلب الموالی اللیله شبت نار
٢

نارك بالگلب شبت بهذا اليوم
والله يساعد المهدي بحزن وهموم
يشاهد والده متلوع ومسموم
وتعاين عليه متوجه الانظار

٣

مات العسكري ياهو الاجه الدفنه
كلها تنتظر ماگطعت الضنه
ابنه المهدي حاضر واقترب منه
وچان الهل حضور اسرار يابو اسرار
٤

حضر لجل الدفن والوادم انتظره
خمسه لو أقل لو اكثر بعمره
هذا منين صاحو مهجت الزهره 
صفنت كلها صفنت والفكر محتار
٥

دفن بيده ابوه والدمعه سچابه
وضل ينحب المهدي ويبچي لمصابه
واحنه الليله نبجي انوح لصوابه
ونعزي الدنيه كلها والنبي المختار
٦

انودع العسكري هالليله بالدمعات
وبهذا الخبر  تعاله هالأصوات
مات العسكري مسموم لمن مات
ونعزيها الزچيه وحيدر الكرار





لاتنسون والدي ووالدتي وابني عباس من الرحمه والمغفره
خادمكم رياض الرسل الجابري

لاستشهاد الإمام الحسن العسكري عليه السلام (موشح )

بأحر چلمات التعازي والنحيب
نعزي مولانا الحبيب بن الحبيب
★★★★★
نعزي آل البيت سادتنا الكرام
نعزي أنفسنا ومراجعنا العظام
بفگد مولانا الامام بن الإمام
والد الحجه الگضه عمره غريب
★★★★★
انعزي مولانا الإمام المنتظر
گمر من هاشم يودعله گمر
من نسل عدنان من سادة مضر
بسم خطر چتال منه مايطيب
★★★★★
يا ابو محمد يمولانا الحسن
جالت العدوان ضدك  والزمن
شگد شفت مولاي بالدنيا محن
والله راس الطفل من عدها يشيب
★★★★★
عفت للأيام من نورك بدر
النوايب حاطته من كل كتر
شاف ويلات الاعادي من صغر
وحده صابر ماله بالراحه نصيب
★★★★★
عيون حگها من يوالفها الدمع
والگلوب تذوب چن حال الشمع
كل گلب يهواك بيه مية صدع
شلون يابدر الهواشم من تغيب
★★★★★
اليوم سامره على فراگه تون
تلوع لجله ولبست ثياب الحزن
حال ابوصالح ولاغمض جفن
ياقريب العنه اصبح موقريب

الشاعر حسن لعيبي الحريشاوي

#أستشهاد_الإمام_الحسن_العسكري ع

نزله للعسكري.  

قيمو المجالس يله يا شباب
قدمو التعازي لصاحب المصاب
ـــــــــــــــــــــــــــــ
اليوم مهدينه حزن كلبه عظيم
اليوم يفگد والده ويصبح يتيم
بلا معين ولا سند موقف اليم
بهذا جرحه يدري بس الله العليم

والليله تبدي رحلة الغياب
قدمو التعازي لصاحب المصاب
ـــــــــــــــــــــــــــــ
غسّله بدمعاته لكن فكره وين
راح باله الكربله وجده الحسين
محد امغسله ويسبلّه الادين
ظل ثلث تيام دامي الودجين

صارت لحيته من الدمه خضاب
قدمو التعازي لصاحب المصاب
ـــــــــــــــــــــــــــــ
يبدي من سامره رحله غربته
سبي زينب هوّناها امصيبته
الها ثار يظل امانه برگبته
عالجمر ينطر نهاية غيبته

ادعوله والغايب دعاه مجاب
قدمو التعازي لصاحب المصاب
ـــــــــــــــــــــــــــــ
يا جرح يذكر بعد هاي السنين
جرح ضلع الزهره لو جرح الجنين
زمرة الهجمت عليها ابلايه دين
لا سند شافت وراها ولا معين

وبلا  خجل دفعو عليها باب
قدمو التعازي لصاحب المصاب
ـــــــــــــــــــــــــــ
لا اخو ايواسيه لا عم لا حبيب
يعينه الله العايش ايامه غريب
جرح ابوه يكبر ولا لحظه يطيب
عالامام العسكري زيدو النحيب

مهدينه منكم ينتظر جواب
قدمو التعازي لصاحب المصاب
ـــــــــــــــــــــــــــ
حتى ما ننسه حشدنا بالدعاء
خلي نهديله اجر هذا العزاء
والوفاء نقابله احنه بوفاء
لجل سامره شكثر ضحو دماء

راية نصرهم عبرت السحاب
قدمو التعازي لصاحب المصاب
ـــــــــــــــــــــــــــ

كلمات: احمد العكيلي

#اللهم_عجل_لوليك_الفرج