🔹🔶🔹🔶🔹🔶
🆔 @abdulla_pashew

[ 48]
ــــــــــــــــــــــ
"ژان"

بەم نیوەشەوە
هەروا پرسیارە و فڕکەی باڵی دێ.
حەجمانم نییە،
دیسان گێژ دەخۆم وەکوو گەردەلوول.

هەندێ خەم چەشنی دەریا کراوەن،
هەندێ وەک تۆمار، سەربەمۆر و لوول.
دیارە هەویری شیعرێکی تازە
هەڵاتووە بە خەم،
هەر هێندە ماوە،
بە گزرەی خەیاڵ تەندوورێک جۆشدەم!

ــــــــــــــــــــــــــــــــــــ

🗓(19\3\1998_هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[ 49 ]
ــــــــــــــــــــــ

" ئەلارم"

من:سەعاتێکی زەنگدارم
بۆ ئەوە بووم،
تا لە کات و ساتی خۆیدا
بۆ زەنگلێدان لە خەو ڕابم.

دوگمەی دەنگم هەر لای مەرگە،
تا ئەو ڕۆژەش زەنگ لێ دەدەم،
لێ دەدەم و بێدەنگ نابم!
ــــــــــــــــــــــــــــــــــــ

🗓(‌  30\3\1998 ــ هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[50]
ــــــــــــــــــــــــــــــ
"ڕواڵەت"

وا لەسەر پشت ڕاکشاوم،
بە ڕواڵەت ئاسوودە و ئارام...
گۆشەیەکی زەوی هەیە و
خۆر نایبینێ،

من لێرەڕا لێی بەئاگام
دەنگوباسی هەر پەنگرێک لە کوانوودا،
نووچەی تەرزی هەر دارمێوێک دەگاتە لام.

ساتەوەختێک دەپشکوێم
وەک کەرکووکی نەورۆزەکەی نەوەت و یەک،
چرکەساتێک
لە هەڵەبجەی شازدەی مارتیش دڵتەنگترم.

بە ڕواڵەتیش
وا لەسەر پشت ڕاکشاوم،
لە بیستۆکی تەلەفۆنێک بێدەنگترم!

ــــــــــــــــــــــــــــــــــــ

🗓( 20\3\1998_هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[51]
ــــــــــــــــــــــــــــــ
"تاسە"

پەلەقاژەمە!
بەڵکوو، تا زووە،
هەندێ گەڵای دار،
هەندێ پنجەگیا و گوڵەکێویلەی
ئەوێ دەسگیر کەم.

ناترسم ناویان لە یادم بچێ،
بەڵام دەترسم...
بۆنیان لەبیرکەم!

ــــــــــــــــــــــــــــــــــــ

🗓( 30\3\1998_هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[52]
ــــــــــــــــــــــــــــــ

"ئۆتۆنەمان"

کورد: مریشکە‌ڕەشەیەکە
بە تۆپیش ناجوڵێتەوە.
نازانم ماوە یا مردووە
دەیان ساڵە
لەسەر لوغمی ئۆتۆنۆمی...کڕکەوتووە!

ــــــــــــــــــــــــــــــــــــ

🗓(1998_هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[53]
ــــــــــــــــــــــــــــــ
"نەستەلژی"

چەند بیری ئەستێران دەکەم!
((تەنیا لەوێ هەر ئەستێرەو بۆ جێژوانێک ڕێنمایە))

چەند بە عەزرەتی ئاسمانم!
((تەنیا لەوێ ئاسمان دەریای ئاودامانی لەبەردایە))

بۆ بۆنێکی خواکرد شێت بووم!
((تەنیا لەوێ هەر کولیلکێک شووشەبۆنی سەرواڵایە))

                  **
🔸نەستەلژی:
تاسەی نیشتیمان،سۆزی غوربەت
🔸کولیلک: شکۆفە یان گوڵی گژوگیا و دارودرەخت
ــــــــــــــــــــــــــــــــــــ

🗓(1999/2/26_هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

[54]
"خەڵات"

ژینێکی ترم خەڵات کە، خوایە!
با کورت بێ، وەک هی گوڵ و پەروانە،

بە هەر بستێ عەرد من قنیات دەکەم،
بەڵام تیا نەژیم وەکوو بێگانە!

#دیوانی_بەرەو_زەردەپەڕ
#عەبدوڵڵا_پەشێو
🆔 @abdulla_pashew

🔹🔶🔹🔶🔹🔶
🆔 @abdulla_pashew

[55]
ــــــــــــــــــــــــــــــــــــــــــــــــــــــــ

"باڵا"

لەوەتی من هەم، سەرنجم داوە،
ڕێگەی گوڵگوڵیی
تەخت و بەخت و کام
بە بن کەوانەی تاقێکدا دەڕوا
کە نەویترە لە خاچی باڵام!

من قەت دەسکاریی بەژنی خۆم ناکەم
هەتا ئەو ڕۆژەی سەر دەنێمەوە،
نەمام بووم
زریان نەیچەماندمەوە،
خوایە، بە پیری ... نەچەمێمەوە!
ــــــــــــــــــــــــــــــــــــــــــــــــــــــــ

🗓(1999/4/28_هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو
🆔 @abdulla_pashew
🔹🔶🔹🔶🔹🔶

(۵٦)
"هەوێ"

با بە تاقی تەنیا بم
نە سیڕەی دەرگەم دەوێ
نە ترپەی هەنگاوی تۆ
لێم دوورکەوە،ئازیزم
من شەڵاڵی شیعرێکم
لەسەر سیحری چاوی تۆ!

📚 #دیوانی_بەرەو_زەردەپەڕ
#عەبدوڵڵا_پەشێو
🆔 @abdulla_pashew
🔶🔹

🔹🔶🔹🔶🔹🔶
🆔 @abdulla_pashew

[۵۷]
ــــــــــــــــــــــ

"پیری"

کاتێ، جاران
تەمی خەمێک،
لە سەد پێچ و کەنارەوە،
شەپۆل‌ شەپۆل،
قەف قەف دەهات،
دایدەگرتم بە ترۆپک و بنارەوە

بیرم لەوە دەکردەوە
کە سەودایەک، عیشقێکی نوێ..
سبەی بە داری عومرەوە
گۆپکە دەکا و دەپشکوێ

کەچی ئێستا،
کە دڵتەنگی قانگم دەدا،
کە دەبینم ئێجگار ماتم
بیر لە جوانێک دەکەمەوە،
کە فڵان ساڵ،
لە فیسار جێ تووشی هاتم!

**

🔸ترۆپک: قوللە، کۆپ، کمت، لووتکە، تۆقەڵە
🔸گۆپکە: پشکۆ، چرۆ؛ گۆی مەمک
🔸قانگدان: دەرپەڕاندنی گیاندار بە دووکەڵ
ــــــــــــــــــــــــــــــــــــ
🗓(۱۹۹۹/۵/۳ - هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[۵٨]
ــــــــــــــــــــــ

"شیعر و تاج"

کە سەر بەشانم دەکەی،
شای وڵاتی پەرییانم
کە گڕ دەگری و دەتۆرێی،
شاعیری خەم و ژانم

ئەگەرچی تاج و شیعر،
وەتی دنیا دنیایە،
چەشنی ڕەشەبا و مۆمن
بەڵام، دڵەگۆڕکێت خۆش،
هەردووک لە بن ڕکێفمان،
بەجووتە دەستەمۆمن!
ــــــــــــــــــــــــــــــــــــ

🗓(۱۹۹۹/۹/۹ - هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[۵۹ ]
ــــــــــــــــــــــ

   " ڕازێک"


من دوو ساڵە
سەوداسەری درەختێکم،
کە جێی پشت پەنجەرەی منە.
سەد جاریش خۆی گەڵاپۆش کا،
من بە ڕووتی ئەو دەبینم:
درەختی چی؟! شۆڕە ژنە!

بەڵام چەند دەکەم تێناگەم،
کە بەهاران
شیرینەکەم ژان دەیگرێ و
چرۆ دەکا،

کە پایزان
جگەرگۆشەی دادەوەرن
لەبەر بادا،

کە شەوگاران
کڕێوەیەک دەزریکێنێ و
هاودەنگ قاتە لە دنیادا ــ
خۆ من چرام تا بەیانی هەر دەسووتێ،
بۆچی جارێک لە پەنجەرەی ڕۆشنام نادا؟!
ــــــــــــــــــــــــــــــــــــ

🗓(‌  ۱۰؍۹؍۱۹۹۹ ــ هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[٦۰ ]
ــــــــــــــــــــــ

" شەفەق لە زەردەپەڕدا"

(۱)

بە مناڵی
شێتی کچەهاوسێیەک بووم:
ئەگەر ڕۆژێک نەمدیبایە،
کفرم دەکرد،
وام دەزانی
عەرشی ئاسمان بێ‌خودایە.

ئەگەر ڕۆژێک ناوی منی نەهێنایە،
وام دەزانی
چیدی کێشکە چینە ناکەن
لە پەساران،
پەڕەسێلکە ناسریوێنن،
خۆر هەڵنایێ لە جێی جاران.

* * *
بە مناڵی
شێتی کچەهاوسێیەک بووم..
هەرجارێکی وەڕەس دەبووین،
سەری خۆمان هەڵدەگرت و
لە شوێنێک، چەپەک و پەنا،
خانووچکەیەکمان چێ دەکرد،

ماڵیژگەیەکمان دادەنا:
هەرزاڵەیەک بۆ پێخەف و
کەندوولەیەک بۆ ئازووخە و
گۆزەڵەیەک بۆ سەر کانیاو.

هەر جارێکیش برسی دەبووین،
داردەستێکم زین دەکرد و
دەچوومە ڕاو!
تا من لەوسەر دەهاتمەوە،
قوڕ دەکرایە زمانەگا و
دەبرژێنرا لە بەر هەتاو!

* * *

بۆ ئەو کچە دەراوسێیە
سەرتاسەری دنیا گەڕام:
لە وێستگەی شەمەندەفەران،
لە فڕگەکانی هەندەران،
لە مەیخانە و پەرستگاکان،
لە هەموو دەریا و بەندەران....
چاوم گێڕا،
بێهوودە بوو!
نەمدیتەوە و نەمدیتەوە.
زۆرجار دەهات لە بیری کەم،
کەچی لەپڕ دەیترووسکاند
ژیلەمۆی بن خۆڵەکەوە.

(۲)

هەر ئەو شەوەی
بۆ یەکەم جار
ستێرێکی چاونمایی قوتبی باکوور
بۆمان بووە قیبلەنمای یەکەم دیدار،

بەچرکەیەک مەودا سووتا،
دیوار ڕمان
سەرتاپامان بوو بە نیگا،
موو بە موومان بوو بە زمان.
دیتت چ زوو
هەردوو باڵت لە من ئاڵاند؟

دیتت چ زوو
سەری سپیم
سنگی تۆی کرد بە نیشتمان؟

هەر ئەو ساتە،
هەر ئەو شەوە
گرفەی هات و گڕی هەڵسا
ژیلەمۆی بن خۆڵەکەوە.

هەر ئەو ساتە،
هەر ئەو شەوە،
تێگەیشتم
جووداییی من و هاوسێکەم
درۆیە، مۆتەیە، خەوە:
ڕوو هەمان ڕوو،
دەنگ هەمان دەنگ،
بۆنت هەمان بۆنی ئەوە!

**

📚فەرهەنگۆک:

🔸پەسار: پەنا، نوا، ئەنوا
🔸سریواندن: جریواندن، زریواندن، درەوشانەوە، شنەشنکردنی ئەستێرە وچرا و شتی تر، جریواندنی تەیروتوار

🔸چەپەک: جێی پەنا، شوێنێک هاتوچۆی بە سەرەوە نەبێ.
🔸ماڵیژگە: ماڵیکی خنجیلە و بچووک
🔸هەرزاڵە: کەپرێکی نزمە لە ماڵدا دەکرێ بۆ شت لەسەر دانان یان لەسەر نووستن

🔸زمانەگا: جۆرە کولێرەیەکی درێژکۆلەی زمانئاسایە بۆ زارۆیان دەبرژێندرێ.
🔸ترووسکاندن: بریسکانەوە، تەیسین

🔸ستێر: ئەستێرە، هەسارە، ئەختەر
🔸مۆتە: مۆتەکە، مێردەزمە، سرنجک، کابووس
ــــــــــــــــــــــــــــــــــــ
🗓(‌ ۲۸؍۴؍۱۹۹۹ ــ هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[٦۱ ]
ــــــــــــــــــــــ

"هۆنراوەیەکی ناتەواو "

هەر بە وشە
نیگارێکی ئازیزەکەی خۆم کێشاوە.
سەیری دەکەم:
دەق خۆیەتی!
هەر بۆ گوێیە تەنکەکانی
گوارە ماوە.

                       *  *  *

فەرهەنگەکان
با بە خۆیان هەر بنازن،
با بڕسکێن،
با بخەمڵێن بە هەزاران وشەی بەدەو.
بە چی دەچن،
کە پەیڤێکیان تێدا نەبێ،
        بشێ ببێ بە گوارەی ئەو!

                   *  *  *
من ئەییووبم
بەئاسانی پشتی ئومێدم ناچەمێ.
وشەیەکە و عەوداڵیمە،
زوو یا درەنگ هەر دەیگەمێ ــ
لەسەر باڵی سیمرخیش بێت،
ئاسمان بست بست دەپشکنم.

بە زەویشدا بچێتە خوار،
بنزەویگەڕ هەبێ منم.
وشەیەکە و دەیدۆزمەوە،
ئەگەر بنپێی خەیاڵیشم
          شەقشەق و پارەپارە بێ!

گەر هەر نەبوو،
دایدەتاشم!
ناهێڵم گوێی ئازیزەکەم
بێ گوارە بێ!

                      **

🔸خەمڵاندن: ڕازاندنەوە، جوانکردن
🔸بنزەویگەڕ: ئەوەی لەبن عەرد بە دوای شتێکدا دەگەڕێ
ــــــــــــــــــــــــــــــــــــ

🗓(‌  ۲۰؍۱۲؍۱۹۹۹ یوتوبوری)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

من ئەییووبم
بەئاسانی پشتی ئومێدم ناچەمێ.
وشەیەکە و عەوداڵیمە،
زوو یا درەنگ هەر دەیگەمێ ــ
لەسەر باڵی سیمرخیش بێت،
ئاسمان بست بست دەپشکنم.

بە زەویشدا بچێتە خوار،
بنزەویگەڕ هەبێ منم.
وشەیەکە و دەیدۆزمەوە،
ئەگەر بنپێی خەیاڵیشم
          شەقشەق و پارەپارە بێ!

گەر هەر نەبوو،
دایدەتاشم!
ناهێڵم گوێی ئازیزەکەم
بێ گوارە بێ!

🔹🔶🔹🔶🔹🔶
🆔 @abdulla_pashew

[ ٦۲ ]
ــــــــــــــــــــــ

" هەڵچوون"

ساردیت دەمکوژێ. دنیا پایزە و
بەدەنی منیش ڕووتترین خاکە


هاوینی تینوو لە ناخمدایە،
نمەی خوناوکە لێوم تەڕ ناکا.


دە بتریشقێنە، هەوری شاقەلشۆڕ!
دە ببرووسکێنە....ببارە....داکە.


هێڵی سنووری نێوان من و تۆ
تراویلکەیە، وەهمی تریاکە


گوارە و گەردانە فڕێدە لاوە،
بسکت بەردە، کەزیت ڕەها کە


ئەوەی گرێیە بیکەرەوە بۆم،
بە دوڕگەی ئەودیو تەمم ئاشنا کە


سنگت بەندەن و دشتی مەفتەنە،
ڕێی ڕەوەئاسکی پەنجەم واڵا کە.


لەشێک دەماری گڕی تیا نەبێ
کۆتەرەدارە ...داوەڵە....لاکە


گەمارۆی ناوێ، پەلامارم دە!
سەنگەر و قەڵام تەفروتونا کە


ڕنۆکت گیر کە لە شان و باسکم،
ئێسقان و پێستم هەلاهەلا کە.


لێوم کافرە، خوێنی حەڵاڵە،
گۆی مەمک و لێوت فێری غەزا کە.


لە ئاسوودەیی بەهەشت تۆقیوم ــ
هەناسەت گڕ دە، دۆزەخ ئاوا کە


بێدەنگی بەزمی گۆڕنشینانە،
دنیا پڕ نرکە و زیڕە و زەنا کە


هەڵبە، گڕ بگرە، نێڵە و لرفەت بێ،
تەزوو بچێنە، شۆڕش بەرپا کە


گیا بە ـــ بشنێوە، دەریا بە ــ پێل دە،
چاو لە بوولەرزە، لە ڕەشەبا کە .


پایزی لەشە و هاوینی ڕۆحە ،
لە ترسی خەزان دڵم خەمناکە.


دابارە سەرم! هەوری شاقەلشۆڕ،
نمەی خوناوکە لێوم تەڕ ناکا!

ــــــــــــــــــــــــــــــــــــ
📚 فەرهەنگۆک

🔸خوناوکە: نەرمەبارانی پشک ورد
🔸شاقەل: داوێن، دامەن، پەراوێزی خوارەوەی کراس و کەوا و شتی تر
🔸شاقەلشۆڕ: داوێنشۆڕ

🔸مەفتەن: زێد، نیشتمان
🔸کۆتەرە: کۆلکەدار، قەدی دارێکی بڕاوە
🔸داوەڵ: داهۆڵ

🔸ڕنۆک: چنگوڕک، چنگی دڕندە و باڵندە
🔸پێل: شەپۆل
ــــــــــــــــــــــــــــــــــــــــــــــــ
🗓(‌ ۸؍۱؍۲۰۰۰ هێلسنکی)
📚 #دیوانی_بەرەو_زەردەپەڕ
#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[٦۳ ]
ــــــــــــــــــــــ

    "دوو ئاوابوون "

دانی ئێواران
سەرنج دەدەمە
ئاوابوونی خۆر...
دەزانم، منیش،
زوو بێ یا درەنگ،
دەبێ ئاوا بــم.

بەڵام! مخابن،
دەمی ئاوابوون
وەکوو زەردەپەڕ
سیحراوی نابـــــــم!
ـــــــــــــــــــــــــــــــــــ

🗓(‌  ۷؍۱؍۲۰۰۰ ــ هێلسنکی )
📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[ ٦۴]
ــــــــــــــــــــــ

"هێور کردنەوە"

هێندە خەم مەخۆ،
کە پێش ناسینم
پرچی خۆت بڕی،
ئەی خەمشیرینم!

من، کە تا ئێستا
قەت دەربەست نەبووم
کورت بێ یا درێژ
تاڵەمووی ژینم،
دەپاڕێمەوە عومرم درێژ بێ،
بەڵکوو درێژیی پرچت ببینم!

ــــــــــــــــــــــــــــــــــــ
🗓(‌ ۹؍۱؍۲۰۰۰ــ هێلسنکی )
📚 #دیوانی_بەرەو_زەردەپەڕ
#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[ ٦٥]
ــــــــــــــــــــــ

"لەسەر گۆڕی عاشقێکی گەورە"

هەموو جارێ
زوو دەژاکێ لەسەر گۆڕت
هەر گوڵێکی کە دەیچێنم_
خۆ دەزانم عەشقی گوڵی کام وڵاتی،
بەڵام...چبکەم!
گوڵی ئەوێ لە کوێ بێنم؟!

ــــــــــــــــــــــــــــــــــــ
*بۆ ڕەهبەر جەلال کۆیی

🗓(‌ ٦/٤/۲۰۰۰ــ هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[ ٦٦]
ــــــــــــــــــــــ

      "کۆنتراکت"

نیازم وایە
شەو و ڕۆژێکم تەنیا هی تۆ بێ
بڕیارم داوە
سەفەرەکانی سەرم ڕاگرم،
شەپۆلان سڕ کەم.
تەنیا ورینگەی تۆی تیابێ ماڵم،
دەرگە و پەنجەرە و
بابوێر کونبڕ کەم!

خانومانەکەم!
تۆش، تەنیا جارێ،
خۆت تاقی کەوە...
با شەو و ڕۆژێک،
هەمووت هی من بێ!
هەرچی نەریتە، با دەقی بشکێ،
هەرچی یاسایە، با سەروبن بێ!

خۆت لە دەوروبەر،
لە کەس و کار و ئاشنا بدزەوە،
لە ئەستێرە و مانگ...
لە هەور و ساماڵ...
لە بێنەوبەرە و خەمیژگەی دنیا
خۆت ڕاپسکێنە،
تەماشای میلی کاتژمێر مەکە،
وەک ڕۆژانی تر،
خۆت مەخەمڵێنە:

خۆ پیرەدنیا ژێر و ژوور نابێ،
تەنیا هەر جارێک،
بۆ شەو و ڕۆژێک،
نیوەژن بکوژە و ژنێکی ژن بە!
من شەو و ڕۆژێک،
دەبم بە هی تۆ،
تۆش شەو و ڕۆژێک،
تەنیا هی من بــە!

ــــــــــــــــــــــــــــــــــــ
📚 فەرهەنگۆک

🔸کۆنتراکت: قۆنتەرات
🔸ورینگە: زەمزەمە، گۆرانیی سەبرۆکەی لەبەرخۆوە
🔸بابوێر: کونەبا، لۆنکە، بادرز، دەرزێک بای لێوە بێ

🔸کونبڕکردن: نەفەسبڕکردنی دەرودیوار، گرتنی کون و کەلەبەری جێیەک
🔸نەریت: شتێکە کە تازە داهێنرابێ کرابێ بە باو و تۆ حەزی لێ نەکەیت
🔸ساماڵ: سایەقە
🔸خەمیژگە: سووکەخەم، وردەخەم، تەنکەخەم

ــــــــــــــــــــــــــــــــــــــــــــــ
🗓(‌ ۱۸/٥/۲۰۰۰ــ هێلسنکی )

📚 #دیوانی_بەرەو_زەردەپەڕ
#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶