☀️دەسەڵات☀️ [30]

قەڵەمەکەم چەکوچە و
هەر پەڤێکیشم ، بزمار
ستەم لە هەر جێیەک بێ
دەیسمم وەک تەختەدار!

#عەبدوڵڵا_پەشێو
#دیوانی_بەرەو_زەردەپەڕ

  🆔 @Abdulla_Pashew

🔹🔶🔹🔶🔹🔶
🆔 @abdulla_pashew

[۳۱]
ــــــــــــــــــــــ

"مۆنۆلۆگ"

کازێوەیە
سەرینی تۆ باسکی منە،
سەری منیش لەسەر باڵی کڕێوەیە

کازێوەیه
پۆلێک پرسیار بەڕێ دەکەم،
پۆلێکی تر بەڕێوەیە

کازێوەیە
گا ئازیزێک، کە زیندووە،
لەناو تابووت ڕاکشاوە و
شەڵاڵی زەردەچێوەیە
گا هاوڕێیەک، کە نێژراوە
چاوی زەق زەق تێم بڕیوە و
بەپێوەیە!
***

هەنووکانە چاو لێک دەنێم...
ئەو دەلاقەیە دادەخەم
کە ڕابردووی لێوە دیارە،
شاباڵی ئەو بازەش دەکەم
کە لە فەزای ئایندەدا
سەرگەرمی ڕاو و شکارە
***

من تێدەگەم
ئەوەی ڕابرد، وەگیر نایێ،
ئەوەی دادێ، هەر مردنە...
هێندەم بەسە، کە تۆ... ئێستا...
سەرت لەسەر باسکی منە
***

دەڵێم،
گەر دایەحەوا گوێڕایەڵی خودا با،
بەری حەرامی دیبا و...
قەپاڵی لێ نەدابا...
کوا، کێ دەڵێ من و تۆ
لەوێش من و تۆ دەبووین؟

کێ دەڵێ گەمیەی بازووم
سەرتی لەسەر پێلی شەو ڕادەژەنی هەنووکە؟

کێ دەڵێ لەو بەهەشتا
بەهشتۆکەیەک دەبوو،
هەر من و تۆی تێدا بێ،
وەک ئەم لانە بچووکە؟!
ــــــــــــــــــــــــــــــــــــ

🗓(۱۹۹۳/۱۰/۸ - مۆسکۆ)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[32]
ــــــــــــــــــــــ
"دوودڵی"

نیوەشەوێ
لەبن ڕێژنەی
هەوای تەزوو و برووسکەدا ژوانم هەیە.

کە دەیگەمێ؛
لەپی دەستێک بۆ ناو تۆفان گەمیەم دەبێ،
بەژنێک شیعر و تریفە و بۆن تێم دەئاڵێ
کۆشێک داڵدەی هەنیەم دەبێ.

بۆ دوودڵم؟
ئەگەر نەچم،
کێ دەزانێ،
لەم عومرە کورتەی کە ماوە،
کەنگی دیسان ژوانم دەبێ؟!
کێ دەزانێ
کەی شێتی باڵم پێ دەگرێ و
جارێکی تر دەرفەتی سووتانم دەبێ؟!


ــــــــــــــــــــــــــــــــــــ

🗓(‌  13\10\1993 ــ مۆسکۆ )

📚#دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

دوو پڕۆژەی بەهێز، دوای ناتکۆین

Hamster

https://www.tg-me.com/hamster_kOmbat_bot/start?startapp=kentId249099269
___
TapSwap

https://www.tg-me.com/tapswap_bot?start=r_249099269 🎁 +2.5k Shares as a first-time gift
___
بە پەنجە لێدان دراو کۆ دەکرێتەوە!
یاسا و چۆنێتی کارکردن لە یووتیوب بەردەستن.

🔹🔶🔹🔶🔹🔶
🆔 @abdulla_pashew

[33]
ــــــــــــــــــــــ

" لێکدابڕان"


ئێوارە بێ یا کازێوە،
خۆرەتاو بێ یا شڵێوە ؛
لە هەر کوێ بیت:
لەناو کونە ئەشکەوتێکا
یا شارێکی پڕ هاتە هات؛
لە کونجێکی تاراوگەدا
یازنجێکی کاولەوڵات؛
هەرکاتێکی مەیلت لێ بێ،
من دەبمەوە با و بە چرکەیەک دەگەمە لات.

تۆ هیچ نا، هەر هێندە بکە،
بڕۆ، درختێک ڕاسپێرە
چۆلەکە دەوریان دابێ.
بڕۆ جۆگەیێک ڕاسپێرە
پەیکی پێلی بە ئاگابێ.

ـــــــــــــــــــــــــــــــــــ

🗓(‌ 13\1\1993 ــ مۆسکۆ )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[34]
ــــــــــــــــــــــ
"خەڵوەت"

خوایە، بارم سووکتر کە!
پشتم شکا، دەرنابەم...
ئەوەی هەستی پێ دەکەم
بۆ بەندەیەک زۆرە، زۆر:

لە جەرگەی تاریکیدا
گەردی ڕاستی دەبینم
وەک بەفری بەر تیشکی خۆر؛

وەکو پەڕەسێلکەیەک
تا بکرێ نزم دەفڕم
بەر لە باران و تەرزە؛

وەک هەسپێک لەسەر هەستم،
ئارامم لێ هەڵدەگرێ
پێشبینیی بوومەلەرزە.

خوایە، بارم سووکتر کە!
پشتم شکا، دەرنابەم...
یا وا بکە زمانم
لێی تێکچێ کۆدی سەرم،
یا زاتێکم وەبەر نێ،
هەر شیعرێکی کە دەیڵێم
کفنێک بێ پڕ بە بەرم.

ــــــــــــــــــــــــــــــــــــ

🗓(‌ 8\5\1994 ــ مۆسکۆ )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[35 ]
ــــــــــــــــــــــ
"پرێسکە"

ئەنگوستیلەی کامەرانیم
لەناو پرێسکەیەکدایە.

پێیان گوتووم،
تەنیا جارێک تووشی دەبم،
هەر جارێک و ئیتر تەواو.

بۆیە، بگەمە هەر جوانێک،
بەو پرێسکە ئەفسووناوییەم
دێتە بەرچاو!

🔸پرێسکە: بوخچۆکە بۆ شت تیاهەڵگرتن
ــــــــــــــــــــــــــــــــــــ

🗓(‌1\3\1995 ــ مۆسکۆ )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[36]
ــــــــــــــــــــــــــــــ

"دوگمە یا لە قاوەخانەیەکدا"

وەک گورگی باراندیدە
ئارەزووی لە شەوڕاوە نیگای دڵی چاوچنۆک-
له لانی وەدەرناوم،
بۆ جوانێکی گەردنکێل
دایر ماندووم بۆ سەر چۆک!

دوورگەیەکی نەبینراو...
گازم دەکا بۆ سەفەر،
بەڵام ڕێگەی لێ گرتووم
تەلیسمی دوگمەی بەرۆک!

                ٭ ٭ ٭

ئەو دوگمە بچووکانە
دەڵێی چاوی بازانن هێند
لاسار و نەترسن،
ناترووکێن و ناترووکێن:
کلیلداری گەنجینەن،
وەڵامی هەزار پرسن!

                             * * *

دەدوێن و حاڵی نابم
دوگمەن یا لوغمی ڕێگە؟
ڕێگرن یا ڕێنوێنم؟
هەڵمەت دەبەم ناگیرێن،
بۆڕ دەخۆم و کۆڵ دەدەم
ئەوان دەکەونە شوێنم!

چیبکەم! هێدی و ئارام بم،
یا کودەتا بەرپا کەم؟
ئاخرەکە خامۆش کەم،
یا بڵێسەی ڕەها کەم؟

چۆن لەگەڵیان بسازێم؟
چۆن گڕ نەسێنێ خوێنم؟
چۆن هۆش لەسەر نەترازێ
ئەگەر نەیان ترازێنم؟!

شەوە و دەدرەوشێنەوە،
وەکوو چرای کەوشەنان،
منیش لەوەتی دەژیم...
شەوبای کەوشەنبەزێنم!

               **

🔸گەردنکێل: گەردن بڵند، گەردن جوان و شوش
🔸دوڕگە: گراڤ، جەزیرە
🔸گازکردن: بانگ کردن

🔸بەرۆک: یەخە
🔸لوغم؛ مین
🔸بۆڕخواردن: تێشکان، بەزین، دۆڕاندن لە ململانێدا
🔸کەوشەن: سنوور، سەرحەد
ــــــــــــــــــــــــــــــــــــــــــــــــــــــــــــــــــ

🗓(1995/10/14_کۆرسۆ )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[37]
ــــــــــــــــــــــــــــــ
"ئاشتی"

تاکوو چەمێک نهێنیی خۆی
بە چەمێکی تر بسپێرێ ،
تاکوو شاخێک
لەبەر شاخێک دابێتەوە،
تەور بە دار...گرمە بە چرپە نەوێرێ پێشنیازێکم هەیە بۆ خوا...
خوایە، تۆبە!
پێشنیاز ناکەم!
لەبەرت دەپاڕێمەوە...
دەپاڕێمەوە تا مردن:
تۆ وا بکەی نێریش وەک مێ
بکەوێتە زاوزێ کردن!

ــــــــــــــــــــــــــــــــــــ

🗓( 1995/10/17_کۆرسۆ)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[۳۸]
ــــــــــــــــــــــ

"گازاندە"

سوپاست دەکەم، خوایە:
جووتێک چاوت پێ بەخشیم
لە چاوی باز بیناتر

لە سنگما دڵێکت چاند
وەکوو هەور بەخشندە،
چەشنی چیا خۆڕاگر
ڕەنگم لە نووری خۆتە،
خوێنم لە شیلەی ئاگر

سوپاست دەکەم، خوایە:
بۆ پژانی زمانم
لە هەر ژێیەکی بەهەشت
ئاوازێکت بۆم چنی

بۆ خەملی نیشتمانم
نەخشینترین نیگارت
لە بەر بەهەشت داڕنی

سوپاست دەکەم، خوایە:
شەپاڵت کرد بە زارۆم،
پەریت خستە ئامێزم
بەڵام بۆچی، خودایە،
هۆشێکی وات نەدامێ،
خەڵاتان بپارێزم؟

             ٭٭٭٭٭٭٭٭٭٭

🔸گازاندە: گلەیی،گلە، گازن
🔸ژێ: تەل، وەتەری ئامێری موزیک
🔸شەپاڵ: بەچکەشێر
ــــــــــــــــــــــــــــــــــــــــــــــــــــــــ

🗓[هاوینی ۱۹۹۵ - کۆرسۆ (فینلاند)]

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[۳۹]
ــــــــــــــــــــــ

"پایز"

پێش ئەوەی وەکوو دەنکێک زەردەلووی تەنیاجێماوی
چڵۆپکی دارێ،
بای پایز لێم دا،
لەپڕ ترپەم بێ و بکەومە خوارێ

ڕەخشی خەیاڵی مەودابەزێنم،
وەک با، تاو دەدەم،
سەر لە لانەی باز،
لە لووتکەی قیتی بەر هەتاو دەدەم،
ڕێ لە زریان و برووسکە دەگرم،
دەچمە بەر ڕێژنە و
شۆڕابەی نەوی

لێیان دەپرسم:
ئاخۆ لە کوێ بم،
کاتێ ترپەم دێ و
دەکەومە زەوی!

***
📚فەرهەنگۆک:

🔸زەردەلوو: قەیسی
🔸چڵۆپک: ترۆپک، چڵەپۆپە، بڵندترین چڵی دار
🔸ڕەخش: هەسپە بەناوبانگەکەی ڕۆستەمی زاڵ

🔸ڕێژنە: لێشاوی باران، ڕەگباری باران
🔸شۆڕابە: ئاوی باران کە لە بانی ماڵ و بەرزاییەکانەوە دەڕژێتە خوار
ــــــــــــــــــــــــــــــــــــــــــــــــــــــ

🗓(هاوینی ۱۹۹۵ - کۆرسۆ)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

[ 40]
"خوناو"
تۆ دڵۆپەخوناوێکی
لەسەر گەڵای عومری بەهار
تۆ، گیانەکەم، کچی شەوی
زۆر دەترسم نێزیکت بم،
نەوەک بتکێی بۆ سەر زەوی!
📚 #دیوانی_بەرەو_زەردەپەڕ
#عەبدوڵڵا_پەشێو
🆔 @abdulla_pashew

[ 41]
"نیشتمان"

بەهەشت و دۆزەخ بۆ من تازە نین
هاوکات و هاوجێ
ئەویشم دیوە، ئەمیشم دیوە
نیشتمانی من،
لەوەتەی هەیە،
بەهەشتە و دۆزەخ
دەوری تەنیوە!

#عەبدوڵڵا_پەشێو
🆔 @abdulla_pashew

🔹🔶🔹🔶🔹🔶
🆔 @abdulla_pashew

[۴۲]
ـــــــــــــــــــــــــــــــــــــــ

"داگەڕان"

ئێوارەوەختە،
تا چاو بڕ دەکا دەورم ڕووتە
لەم دنیایەدا
من تەنیا خەونی ژوانی تۆم ماوە...

خەونی ژوانی تۆ
بۆ من سەرابی شینکە و قۆپەنە،
گڵۆڵەتیشکی سەربەرەوخوارە،
بەری ئاوداری بڕکی تەمەنە

لێ گەڕێ، گیانە!
دەبا ئەم خەونە
هەر بجریوێنێ و بچریسکێتەوە
دەستی لێ مەدە، مەیشڵەقێنە،
با هەر درێژ بێ،
با هەر درێژ بێ و قەت نەبڕێتەوە
***

مەرگی ئەم خەونە
ڕەنگان ناهێڵێ و
دنیا پڕ لوورە و شەختە و
ڕم دەکا
خۆر لە گۆی زەوی دەشارێتەوە،
ئەستێران نوقمی تەپونم دەکا
***

ئەدرەسی خۆمت دەدەمێ
بەڵام ڕچە قەت نەشکێنیت
ڕێگەی جێژوان گوڵڕێژ دەکەم
بەڵام نەکەی بێیتە ژوانم
بەیداخی سپی هەڵدەکەم!

دڵت بەرد بێ!
گوێ نەدەیتە چۆکدادانم
گرمەم دێ و چەخماخە دەدەم
خۆت نەبان کە...
لە ڕهێڵەم...
لە زریانم
ئەگەر زۆر زۆر بیرت کردم،
جار جار وەرە بن ساباتی خەونەکانم!
ــــــــــــــــــــــــــــــــــــ

🗓(۱۴ /۱۰/ ۱۹۹٦ - هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[۴۳]
(بەشی یەکەم)
ــــــــــــــــــــــــــــــــــــــــــــــــــــــــ


"نەخێر، هەرگیز باوەڕ ناکەم"

نەخێر، هەرگیز باوەڕ ناکەم
چرکەیەک بێ تۆ ژیابم
ڕێی تێ ناچێ،
بێ کووژەکەی دلۆڤانیت،
بە دۆزەخی ئەم عومرەدا
ڕەت بووبم و هێشتا مابم!

کە منداڵ بووم،
گەر تۆ دەستت نەگرتبام،
چۆن دەمتوانی پێڕەوکە بم؟

درەنگتریش،
بۆ تۆ نەبا،
من کەپرۆکەم بۆ کێ دەکرد لە چیلکەدار؟
بۆ وەک نۆما،
بە پێی پەتی،
دەشتم تەی دەکرد سەروخوار؟

ئەگەر شیعریش
ئادگاری وەک تۆ نەبایە
وەک تۆ نەبایە کتومت،
چون ئەو هەموو باڵدارانە
دادەبارینە سەر زمان؟
چۆن یەکەم دێڕ شیعرم دەگوت؟!

نەخێر، هەرگیز باوەڕ ناکەم
چرکەیەک بێ تۆ ژیابم،

دەتناسمەوە،
لە تۆفانی شەستوسێدا
تۆ بووی... شەوێک
بەرەو شاخ بووی بە ڕێنمام...

تۆ بووی لەناو ئەڵقەی گڕدا
شیعرەکانت چەپاڵە دام
تۆ بووی خەونت بۆ زین کردم،
ڕەشمەی برووسکەت لە مست نام

دەتناسمەوە،
هەر جارێکی کەوشەنێکم پەڕاندبێ،
لەگەڵما بووی هەنگاو هەنگاو
تۆ بووی مۆتەی ترست دەکوشت،
دنەت دەدام بۆ ناو ئاگر،
بۆ ناو گەرداو

دەتناسمەوە،
لە هەر جێیەک گرماندبم،
تۆ چەخماخە و گەواڵە بووی لە سەرمدا
ئەتۆ کاڵای ئاودامانی
گوللەبەند بووی لە بەرمدا

نەخێر، هەرگیز باوەڕ ناکەم
چرکەیەک بێ تۆ ژیابم
ڕێی تێ ناچێ،
بێ کووژەکەی دلۆڤانیت،
بە دۆزەخی ئەم عومرەدا
ڕەت بووبم و هێشتا مابم!

**

🔸کووژەکه: مووروویەکی شینە بۆ چاوەزار
🔸پێڕەوکە: منداڵێک تازە پێی گرتبێ
🔸نۆما: جوانووی دووساڵە، جوانە هەسپ و ماینی دووساڵە

🔸ئادگار: سیما، چەهرە
🔸چەپاڵەدان: پەنادان، داڵدەدان
🔸ڕەشمە: هەوسار

🔸کەوشەن: سنوور
🔸مۆتە: مۆتەکە، میردەزمە، کابووس
🔸گەرداو: گەڕاڤ، گەرداڤ، ڕەشەبای دەریا
ـــــــــــــــــــــــــــــــــــــــــــــــــــــــــــــ

🗓(۲۹ /۱۰ / ۱۹۹٦ - هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew
ُ
[۴۳]
"بەشی دووەم"
ـــــــــــــــــــــــــــــــــــــــــــــــــــــــــ

"نەخێر، هەرگیز باوەڕ ناکەم"


من پێش تۆ هاتمە دنیا...
تا گیانی خۆم تەیار کەم
بۆ گۆڤەندی ژوانی تۆ

تا بێتۆیی بچێژم،
هەر ساتێکی بینینت...
بۆ من ببێتە پەرجۆ

من پێش تۆ هاتمە دنیا
تا عومری گوڵ درێژتر،
گڕی ئاگر پەتیتر،
تەمی خەم تەنکتر کەم

تا فێر بم بەئاسانی
لەسەر سنگت سەوز بم،
تۆ لە خۆمدا بزرکەم!

من پێش تۆ هاتمە دنیا
تا وا بکەم کارمامز
چیدی نەسەنگرێنەوە لە ئاوایی و دەراوان
تا وا بکەم تەیروتوار
جێی چینەیان ناولەپ بێ و
نەکەونە تەپکە و داوان

من پێش تۆ هاتمە دنیا
تا بتوانم، ئازیزم،
هەر کاتێ ئارەزوو کەی،
ئەستێران وەک مۆم پێ کەم،
لە تووکی نەرمی مەلان
جێژوانێکت بۆ چێ کەم

من پێش تۆ هاتمە دنیا
تا چاوی خۆم ڕابێنم،
لە تۆفانی ڕەنگاندا ئادگارت هاوێر بکا
تا گوێچکەی خۆم فێر بکەم،
لە باهۆزی دەنگاندا سرتەت گوڵبژێر بکا

من پێش تۆ هاتمە دنیا
تا بۆ نۆتەی لەشی تۆ
مووبەمووم هەمووی ژێ بێ
تا شایانی ئەوە بم،
کلیلی تەخت و تاجی
خۆشەویستیی تۆم پێ بێ!

            *****

📚فەرهەنگۆک:

🔸گۆڤەند: شایی
🔸پەرجۆ: موعجیزە،
🔸دەراو: ئاوی دەرەوەی ئاوایی

🔸تەپکە: دامە، جۆرە داوێکە بۆ ڕاوە مەل
🔸هاوێرکردنەوە: لێکجووداکردنەوە
ــــــــــــــــــــــــــــــــــــ

🗓(۲۹ /۱۰ / ۱۹۹٦ - هێلنسکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[44]
ــــــــــــــــــــــــــــــ
"لەوەتی هەم خەو دەبینم"

لەوەتی هەم خەو دەبینم،
خەونی مەخمەریی خاسەڕەنگ!
خەونی بڵند وەک ئەستێرە،
خەونی تیژڕەو وەک تیشک و دەنگ

لەوەتی هەم خەو دەڕوێنم،
ڕۆژ لە دوای ڕۆژ، ساڵ لە دوای ساڵ،
خەو دەڕوێنم.
کەوشەن بە کەوشەن، ماڵەوماڵ
خەو دەڕوێنم.

***

هەندێ جاران، کە دەنووسم،
پەیڤێک لێرە، یەکێک لەوێ، یاخی دەبن.
من پیادەم و ئەوان سوار
من بێباڵ و ئەوان باڵدار.
هەر چەند دەکەم نایانگەمێ
هێندە سرک و دوورەدەستن.
کە دەڕازێم_
سەرم دەکەن بە پلوورە و شانەی شیعر هەڵدەبەستن.

***

جار هەیە سمۆرەیەکی سرک و قیتەڵ،
ئەم چڵ، ئەو چڵ، لێم ڕادەکا.
هەرکە خەوم لێ دەکەوێ_
بە پێی خۆی دێ،
لەسەر لەپم سەما دەکا.

***

جار هەیە جەنگی ئەستێران،
تشێڕنۆبل، هەڵەبجەی وێران،
دەمامکەکەی مایکڵ جاکسن،
لە شووشەدا مرۆڤچاندن،
ئینتەرنێت و کونتێبوونی چینی ئۆزۆن_
ڕاوم دەنێن... دەمتۆقێنن...
کە دەڕازێم؟

گەردوون بەهەشتی سەرمۆرە:
ئەستێرەکان
یەکەم شەوە تاریکایی دەترووکێنن؛
یەکەم وەرزە ، وەکوو بەهێ،
بە پەلوپۆی ئاسمانەوە دەجریوێنن!

***

کە بێدارم _دەبینم
چەند تنۆکەئاوێکی
زەندەقچووی بەرهەتاوین.
کە دەڕازێم _دەبینم
تیشکی خۆر دەخۆینەوە،
خوڕەمان دێ ، شەتاوین.

***

لەوەتی هەم خەو دەبینم :
ساتێک ئازیزەکەی ئەوێم
(کیژە ئەسمەرەکەی هەولێر)
لە فڕگەدا چاوەڕێمە
(هەر خۆی و باقەیەک کنێر)

پێش ئەوەی ماچبارانی کەم،
یا توند لە ئامێزی بگرم،
لێم دەپرسێ،
چۆن بەسەرچوو کۆڕی شیعری دیاربەکرم!
ساتێکی تر لەو خەوەدا
لە مەهاباد نەرمەشیعر دەخوێنمەوە،
قامیشلی بۆم لە قرمژنی چەپڵە دەدا.

***

من هەر وا بووم،
ئێستاش هەر وام:
لەوەتی هەم خەو دەبینم.
لەوەتی هەم خەو دەڕوێنم:
ساتەوەختێک،
بە دەستێکم شواری کێوی حەمرین دەگرم،
دەستەکەی دیم شانەیەک،
وردە پێلی (گۆلی وان)ی پێ دادێنم.

ساتێکی تر،
پێیەکەم لە هەورامانە،
ئەوی ترم...
بەرەو عەفرین سووک هەڵدێنم،
تا دەستماڵی سیاچەمانە
لە گەردنی کێلی لاوک بئاڵێنم.

***

لەوەتی هەم خەو دەبینم
لەوەتی هەم خەو دەڕوێنم:
ساتێک ...لەوێ...
لە پۆستەخانەی بایەزید،
دەبینم ... حەزرەتی خانی
خەرمانەی نوور دەوری داوە.

لێی دەچمە پێش،
سام دەمگرێ...
سەرنج دەدەم، ئەویش وەک من شڵەژاوە.
من لە شەرمی گەورەیی ئەو،
ئەویش تا بە ئێکسپرێس کەوش و کاڵەک*
بۆ فەقێیە کۆییەکەی خۆی
ڕەوان بکا بەرەو باڵەک!

***

لەوەتی هەم خەو دەبینم.
لەوەتی هەم خەو دەڕوێنم :
نیوەشەوێک لە خەومدا
برووسکە لێی دام و مردم.
هاوڕێیانم لە سێبەری دارەبەنێک،
لەسەر تاتەشۆرێکی ئاڵ،
تەرمەکەیان درێژ کردم.

ئاوەچۆڕەی دەوروبەرم،
پەیتا پەیتا، بوو بە جۆگە،
پاشان بە چەم!
قازوقورینگ قەتاریان بەست،
ئاوێتە بوون، پڕیشکی ئاو
و تیشک و تەم!

لەو ناوەدا
بێشکەی دنیای ڕادەژەنی
شنەبایەکی یەزدانی.
یاسەمەن خوناوکەی دەکرد،
ئاسمان پڕ بوو
لە ئەستێرەی ڕەنگ قەزوانی

کە کفنیشیان کردە بەرم،
لەپڕ کفنەکەم خۆی هەڵخست،
بەرز بۆوە،
ڕەنگی گۆڕا،
بووە پەلکەزێڕینەیەک
نەرم و شلک ،ئاڵوواڵا...

زۆری نەبرد،
هەڵیکردە کزەبایەک،
بینیم ... پەلکەزێڕینەکە
شەکایەوە و بوو بە ئاڵا!

لەوەتی هەم خەو دەبینم
خەونی مەخمەریی خاسەڕەنگ.
خەونی بڵند وەک ئەستێرە،
خەونی تیژڕەو وەک تیشک و دەنگ!

****

📚فەرهەنگۆک:
🔸مەخمەری: مەخمەڵی
🔸سرک: سڵ، ڕەوەک
🔸قیتەڵ: گیانداری بچکۆلانەی قنج و وریا

🔸دەڕازێم: دەخەوم،
(ڕازان): نووستن، خەوتن
🔸پلوورە: کوورەی هەنگ، کەندووی مێشەهەنگ
🔸زەندەقچوو: ترساو، تۆقیو
🔸تاتەشۆر: ئەو بەردە پانەی مردووی لەسەر دەشۆن

*ئاماژەیە بۆ بەیتێکی شاعیر حاجی قادری کۆیی:
/وەبیرت دێ زەمانی چووینە باڵەک
بە پێخاوسی، نە کەوشم بوو نە کاڵەک/
ــــــــــــــــــــــــــــــــــــــــــــــــــــــــــــــــــــــــــــ

🗓(1997/4/30_هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

https://www.facebook.com/share/v/G2n9oDBqwhiQZJoN/?mibextid=oFDknk

بەستەری دەنگ لە فەیسبووک.

🔹🔶🔹🔶🔹🔶
🆔 @abdulla_pashew

[45]
ــــــــــــــــــــــــــــــ
"دوو مێوان"

زەرد ئەسمەرێکم لایە.
ناوێرم بڵێم زێدە،
لێ شیرینە وەک زێدێ
دەنگی فێنکایی کەپرە،
مێرگی سینگ و بەرۆکی
بۆنی کنێری لێ دێ

***

لە سووچێکی بەرامبەرم
بیرۆکەیەک هەڵکورماوە،
کەزی و بسکی دەکاتەوە و
دایدەهێنێ، چین چین ، تا تا؛
بە شێنەیی دزە دەکا و
تەمی ناخم دەترووکێنێ
وەک تیشکی پیرۆزی گاتا.
خوایە ، چیبکەم؟
نازانم چۆن
دەستەملانی دوو ئازیز بم
لە یەک کاتا؟!

ــــــــــــــــــــــــــــــــــــ

🗓( 1997/8/1_هێلسنکی)

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶

🔹🔶🔹🔶🔹🔶
🆔 @abdulla_pashew

[ 46]
ــــــــــــــــــــــ
"لێکدانەوە"

وا چرکەساتی لێکدانەوەیەـــ
هەرچی پرێسکه و
شڕەدەفتەری کەلاوەی یادە،
هەمووم هەڵخستوون وەک بازرگانێ...

پەشیمانم و پەشیمانیش نیم،
کەوا سەدەفی سەدان لەش گەڕام
بۆ دۆزینەوەی مرواریی گیانێ!

ــــــــــــــــــــــــــــــــــــ

🗓(2\8\1997_هێلسنکی )

📚 #دیوانی_بەرەو_زەردەپەڕ

#عەبدوڵڵا_پەشێو

🆔 @abdulla_pashew
🔹🔶🔹🔶🔹🔶