تموت أمنياتي

كلمات الشاعر
عباس فاضل الشمري
1

🔻استشهاد الزهراء عليها السلام
لسان حال الامام علي عليه السلام

ـــــــــــــــــ ❁ ❁ ❁ ــــــــــــــــــ

يا بعد العيون الطفن
يالزهره يا ام الحسن

هديتي حيلي .. هديتي حيلي

ـــــــــــــــــ ❁ ❁ ❁ ــــــــــــــــــ

يـابلـسـم جـروح الگلب
بعدچ عليه شكد صعب
لمن مشيتي

عمرچ زغير اعله النعش
من بعدچ يشيب الرمش
مو بس لحيتي

يا اول خيوط الضوه
شمعه ويهدولچ هوه
ذبتي وطفيتي

يابسمة اوراق الشجر
يافـرحة الگـاع بمطر
ردي اعله بيتي

يعوض حنانچ ياحظن
يالزهره يـا ام الحسن
هديتي حيلي

ـــــــــــــــــ ❁ ❁ ❁ ــــــــــــــــــ

ياخنـگه انفاس الغرگ
يوميه بيها انه اختنگ
واحساسه عشته

لمـن اطبـن غـرفتچ
وبيها اشمن ريحتچ
جن روحي ميته

بُعـدچ تـرك بـيـه جــرح
من رحتي شيعت الفرح
بيدي ودفنته

بفگدچ يون گلبي وبچه
مـن ظيمه بغيابچ حچه
وسمعتي ونته

ظل ينحب گليبي ويون
يـالزهـره يـا ام الحـسن
هديتي حيلي

ـــــــــــــــــ ❁ ❁ ❁ ــــــــــــــــــ

بالدنيه ماتت لهفتي
وياچ اشيل اجنازتي
وادفن بديه

بلا مايچ يموت الورد
چم ورده بغيابچ اعد
ذبلانه بيه

وبروحي چم شوغه بقت
صبـت دمـع عيني وبچت
والله خطيه

شيفيـد اناطـر عالدرب
وانه الهلت بيدي لترب
ما بيها جيه

هـو شـيرده اليندفن
يالزهره يا ام الحسن
هديتي حيلي

ـــــــــــــــــ ❁ ❁ ❁ ــــــــــــــــــ

بالگـوه انگـل بالجـدم
بعدچ ثگل حتى الهدم
مابيه حيله

بعيـوني ودعـت النـظر
ومن دنيتي غاب الگمر
وماشفته ليله

بعيوني ظلت حسرتچ
وطالت عليه سفترتچ
صارت طوليه

مـن دونـچ يعـدي العمر
كل يومي يخلص بالقهر
ودمعي الاسيله

وعيوني دم لمن بچن
يالزهره يـا ام الحسن
هديتي حيلي

ـــــــــــــــــ ❁ ❁ ❁ ــــــــــــــــــ

يـا ليلـي بطـل لا تـمـر
مو حدبت حتى الظهر
وحنيته ظهري

مشتاگه روحي الشوفتچ
مـا تـهـده بـس بنظـرتـچ
وتطفي جمري

يا وسفه ويضمچ لحد
يـوميـه گلبي اليـنمـرد
ارحم يدهري

ياربي فوضـت الامـر
وافگدها كاتبلي القدر
بس زيده صبري

كل عمري صابر بالمحن
يـالزهـره يـا ام الحسن
هديتي حيلي

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

الحان ناجي.....

يابعد العيون الطفن
يالزهره يا ام الحسن
هديتي حيلي. هديتي حيلي

بقلم ....عباس فاضل الشمري

🔻 الزهراء عليها السلام قبل استشهادها. مخاطبتاَ ابيها بما جرى من بعده عليها💔


ـــــــــــــــــ ❁ ❁ ❁ ــــــــــــــــــ

ظلم .. بعدك يبويه بكل حقد داري يحركون
ظلم .. ما تطفه ناري بغيبتك وتصب العيون

واطفيها ناري بدمعتي
واشكيلك انه بحسرتي
بعـدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يابويه فگدك من رحت شمسوي بيه
مـن غمضت عيـنك تـره دارو عليه
بابي احترگ والنار اجت حرگة اديه
ما رف ابـد الهـم گلب وگالـو خطيه

حچي.. يابويه شحجيلك بعد بعيوني دمعي
حچي.. حرمه ويتيمه بلا ابو وما اكدر ادعي

ريتـك تشـاهـد حالـتي
واشكيلك انه بحسرتي
بعـدك شـفت يا خـمتي
ظلم ..

ـــــــــــــــــ ❁ ❁ ❁ ــــــــــــــــــ

لمـن وگع مـني الطفل وبخـدي سطره
ماعايـش ايامه وخـلص بالعتـبه عمره
كلما يجي ابالي اختنگ تخنگني عبره
ذبلنـي يـابويه الـوكت عايـفـني زهـره

متت.. ذبـلانه ابقـه بروحتك ظل عودي محني
متت..يابويه اجوني بكل حقد كسرولي غصني

بفگدك متـت ياشجرتي
واشكيلك انه بحسرتي
بعدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يالكاسر جناح الگلب كسـره شيضمده
ذابحني يـا بويه البعد چـي ماكو رده
مجبـوره ظـميـت الدمـع عـالخـد تبده
مثل الحمامه بچف طفل ما منه شرده

خنگ.. بجفـوفه يكسرلي ضـلع لمن خنگني
خنگ.. خلاني اطيحن عالارض لمن سطرني

انه طحت مـن سطرتي
واشكيلك انه بحسرتي
بعدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

هـم شايف بنية نبـي وكسـرو ضلها
وتنـادي يافـضه بقهـر مـحد سمـعها
معقوله ما كسرة كلب جف الصفعها
مقهوره ويظل عالوجن ينزل دمعها

تهل .. دمعاتي مـن بعـدك نهر مايهده يجري
تهل .. يابويه بس نوح ودمع خلصته عمري

ودموعي حفرت وجنتي
واشكيـلك انـه بحسرتي
بعـدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

ابشع جريـمه تسجلت يوكع جنيني
كلـما امـر بالباب احس يكثر ونيني
ما اريد اشوفن عتبته اعميها عيني
يابويه ردتك بالحلم اغـفه وتجيني

حلم .. يالشوفتك صارت حلم اغفه واشوفك
حلم .. يا ريته ما يخلص ابد ما اريد اعوفـك

ما اريد افز مـن نومتي
واشكيلك انه بحسرتي
بعدك شفـت يا خيمتي
ظلم..

ـــــــــــــــــ ❁ ❁ ❁ ــــــــــــــــــ

خلينـي اشمك ياهـوه واترسها ريتي
يا نسمه مـن صوب الكبر لمن اجيتي
حملتي ريحة والـدي وبيـها اعتنيتي
يا نسمه بنفاسي اختنگ لمن مشيتي

هوه .. ما اريد اشم نسمة هوه ما بيها عطرك
هوه .. لمـن يجي ردته يمـر بويه اعلـه كـبرك

عطرك اريـده بشهگتي
واشكيلك انه بحسرتي
بعدك شـفت يا خيمتي
ظلم..
ـــــــــــــــــ ❁ ❁ ❁ ــــــــــــــــــ

كلمات 🖊️

عباس فاضل الشمري

🎤عصام المحمداوي
🖊️عباس فاضل الشمري

أستشهاد الامام الكاظم
عليه السلام
°طور يخيمات °

ـــــــــــــــــ ❁ ❁ ❁ ــــــــــــــــــ

يسجدات
بس اثارچن ظلت يسجدات
وبسم الغدر وسفه الولي مات
صبـن عالوجن بعده يدمعات

ـــــــــــــــــ ❁ ❁ ❁ ــــــــــــــــــ

الكاظم بسجــن الظلــم گضاها كـــل حياته
موسى امــام الرافضه چـــن حيدر بصفاته
عـــاش بظلــم كــل دنيته وتعـــذب بمماته
امگيد ابنــص السجن ويـــرهبهم ابصلاته

يمسموم .. صبرك حير الطاغي .. يمسموم
وعزمك ماگدر يثني ولا يوم
گلبك سيــدي مملي بالهموم

ـــــــــــــــــ ❁ ❁ ❁ ــــــــــــــــــ

بشرهــم الجمعه الفـــرج يخلص سجـــن ظلمهم
والشيعه اجت فوگ الجسر بس شوفتك حلمهم
تاليهــا مشيــول بنعـــش مصابــك تــره هضمهم
ســـم الغدر فـــت الچبــد مـــن شوفتك حرمهم

يخلون .. جثتك عالسجر باچر .. يخلون
مـــو دمعه دمــه صبــن يالعيون
امام الرافضه كل عمره مسجون

ـــــــــــــــــ ❁ ❁ ❁ ــــــــــــــــــ

جثــة الحسين بگربله بحـــر الشمـــس خلوها
خيل العده ادوس الصدر وعظامك يسحگوها
وجثة الغريب اعـــله الجسر عــدوانك يذبوها
مثل الصدر بگيــد الأم ســـاق الولـــي رضوها

يالگيود .. بيچ انرضت اعظامه .. يالگيود
شالو عالجتف جسمك الجنود
انهض وطلب بثـــاره يموعود

ـــــــــــــــــ ❁ ❁ ❁ ــــــــــــــــــ

چفوف الگمر عالمشرعه عدوانه يگطعوها
وچفوف ابن جعفر غداً بالسلسله يدموها
وعين الكفيل اعله النهـــر بالنبله ايطفوها
وعيونك بظلمة سجن من الضوه حرموها

الچفوف .. من گيد الظلم تنزف .. الچفوف
چفين الگمر طاحت بالطفوف
تطفه عينه وعيونك ولاتشوف

ـــــــــــــــــ ❁ ❁ ❁ ــــــــــــــــــ

امصابك ايذكرني بحسين وحــرگ خيامه
ومعصومه من تبچي تره تذكرني باليتامه
چني شفت جثـــة الولي ومسلبه العمـامه
بأرض الغرب محد حضر لا اهلــه لاعمامه

يدفان .. من تدفن جسم موسى .. يدفان
خبر كل بني هاشم والاخوان
خلص بالغرب عمره ولأحزان

ـــــــــــــــــ ❁ ❁ ❁ ــــــــــــــــــ
كلمات عباس فاضل الشمري

يسجدات
بس اثارجن ظلت يسجدات
وبسم الغدر وسفه الولي مات