👆👆👆👆

قصائد للسبي 🖤



آه يازينب آه 😭💔

محرم 🔻

اربعينه الأمـام الـحـــســيــ ع ـــن 💔

ـــــــــــــــــ ❁ ❁ ❁ ــــــــــــــــــ


يلي تسمع صوتـي .. خـله يگـرب موتي

هذا عهدي ودينـي .. اعشگ انه حسيني

كلنه مــــاشيـــن .. بجاه الحسيــــن

مشايــــــــه .... مشايــــــــه

ـــــــــــــــــ ❁ ❁ ❁ ــــــــــــــــــ

بأربعينك كلنه نگصد عالجدم مشايــه
والنواصب خلها تحقد ماتهمنه بهايــه
عدنه غايه بهالمسيره حبك انته الغايه
انه متعني اجيتك شوگي جبته ويايـه

الك دمعة عينـــي
مراد من تنطينــي

دمعت العيـــــــن
بجاه الحسيـــــن

مشايــــــــه .... مشايــــــــه

ـــــــــــــــــ ❁ ❁ ❁ ــــــــــــــــــ

اعتنيلك يـا امامي انـت تعرف حاجتــي
انـه كل همـي ازورك يـمك اذرف دمعتي
عندي ايمـان وعقيـده مـا تردهـا زيارتـي
ربك انطاك المكانه بجاهك اطلب طلبتي

حاجتي من احچيها
دعوه انه ادعيهــا

وشلت چفيـــــــن
بجاه الحسيــــــن

مشايــــــــه .... مشايــــــــه

ـــــــــــــــــ ❁ ❁ ❁ ــــــــــــــــــ


من اشوفن هالمواكب تخدم وتنصب عزاء
اشعر بـقوه وشجاعه ويگـثر بگـلبي الاباء
گاصده شيوخ وشباب ويه اطفال ونساء
بالأرض چن جنه الله اليوم صارت كربلاء

ماتهم كل الجروح
اليوم للجنه نروح

ونرد طيبيــــــــن
بجاه الحسيـــــن

مشايــــــــه .... مشايــــــــه

ـــــــــــــــــ ❁ ❁ ❁ ــــــــــــــــــ

كرم خدامك شوصفه ماشفت مثله كرم
زايرك لوطلب منه ينطي روحه ومايهم
هاي تربات ابو اليمه والله منهم والنعم
خادمك يعله مقامه ويرتفع بين الخدم

انت ترفع شانـــي
وادري ماتنسانـي

ونبقه عاليـــــــن
بجاه الحسيــــن

مشايــــــه .... مشايــــــه

ـــــــــــــــــ ❁ ❁ ❁ ــــــــــــــــــ

لون ما اگصد ازورك خل اگص اجدامي
وانت گايلها يشيعه اليوم اذكرو ايتامي
نلطم بهاي المصيبه وانت جسمك دامي
والكفل زينب عظيدك عالنهر ظل ضامي

عهدي ويه الزهره
اليوم نگصد گبره

والعهد ديــــــن
بجاه الحسيــن

مشايـــــه .... مشايــــــه

ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري

يللي تسمع صوتي
خلي يكرب موتي



عباس فاضل الشمري

يلي تسمع صوتـــي
خله يگرب موتــــي
هذا عهدي ودينـــي
اعشگ انه حسينــي
كلنا مــــاشيــــــــن

🔻أستشهاد مولاتي الزهراء
﮼عليها ﮼الصلاة ﮼السلام

زهرة دينهم 💔

ـــــــــــــــــ ❁ ❁ ❁ ــــــــــــــــــ


انتي زهرة دينهم
ماوگفتي بعينهم

عالوصي الكرار من تأمـــروا
الحرمة المختار ابداً مارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


ماينحسب زلمه من اعد
والشوك مـــا يصبح ورد
وافعاله تشهـــد
بضلعچ اذا يكسر عظم
عالزهره يتجاسر ظلــم
يسطرها عالخد
وحيدر يجتفونه بحبل
مـــن الصبر گلبه جبل
يشكي المحمد
لــو قارنت هذا الامـــر
ماتعجب بفعل الشمر
عالحره من هد

حال يشبه حالـچ
تنرعب اطفالـــچ

والخيم بالنار شبوا واحرگوا
الحرمة المختار ابداً ما رعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


اخذوها مغصوبه فــدك
بقول النبي منهو اليشك
وصه الوصيه
گلتله بعـدك من رحـت
اعلينه الجماعه تأمـرت
ودارو عليــه
حرمــه وحيده بلاولـــي
ومچتف اگبالــي علــي
وينظر اليـــه
يـابويه راح ادعي بقهـــر
واتلمس تــــراب الگبـــر
بثنين اديـــه

بنتك وحاچيتـــك
بويه حرگوا بيتـك

يطلبونه بثار وعلينه هجموا
الحرمة المختار ابداً ما رعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


گصدتلك الزهره بــحزن
تشكيلك هموم الزمــــن
من انته غايب
يذبل جفنها امن الدمع
ذاب الگلب مثل الشمع
من المصايب
ترحل حزينه فاطمـــــه
والدنيه تصبح مظلمه
بفگد الحبايب
يم الحسن محسن وگع
يــاوسفــه بابچ يندفــع
بچف النواصب

صار حاكم ظالــم
بحگچ الله العالم

والضلع ينصاب وعظام اكسروا
الحرمة المختار ابــداً مـــارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


وحدك يحيدر من تظل
من ترحل يموت الامل
والدنيه ظلمه
عاش بمصايب وبمحــــن
بفگد الحبيبه ام الحسـن
وعيونه تعمه
يظلم بعـد عينچ ضــــوه
لــو غابت يموت الهـــوه
مخنوگه نسمه
والذكره نيران وتشــــب
يتخيل الموقف صعـــب
فگدج يألمه

شلون يذكر موتــچ
بأذنه يسمع صوتچ

من يطب للدار يذكر من اجوا
الحرمة المختار ابــداً مارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ


يالزهره زينب من بچت
ابلوعه والم لمن حچت
يايمه وينـــچ
طفله ويتيمه وبالزغــر
يــايمه ظهري الينكسر
واذكر ونينچ
محتاجه نظرة والــــده
بعدج اصيــر الفاكـــده
افگد حنينچ
يايمه بعيونـــي حچـي
لمن اسولــف بالبچــي
وبعيني عينچ

بعدچ ايضربوني
يمه ماراعــــوني

يمه واحنه زغار يتمونه ومشوا
الحرمة المختار ابــداً مــارعوا
مو زلم تدرينهم

ـــــــــــــــــ ❁ ❁ ❁ ــــــــــــــــــ

✍️عباس فاضل الشمري

إنتي زهرة دينهم



عباس فاضل الشمري

🔻أستشهاد مولاتي الزهراء عليها السلام
لسان حال الحوراء زينب عليها السلام

ــــــــــــــــــ ❁ ❁ ❁ ــــــــــــــــــ

تموت امنياتي .. بفگد الزچيـــه
يــمه وحــياتي .. تصعب عليـــه

انه العقيله . انه العقيله . انه العقيله

ـــــــــــــــــ ❁ ❁ ❁ ــــــــــــــــــ

يــمه بغيابچ بچينه ونزلت دموع شكثـــر كون مــن بعدچ ييمه لاطول هـــذ العمـر
طفله وبأول حياتي من نويتي اعله السفر
ماشفت راح برحيلچ گلبي مايحمل هجــر

گلبي بوداعه . من ودع امنه
مو هذا ظني . يطول هجرنه

انــه العقيلــه انـه العقيلــه

ـــــــــــــــــ ❁ ❁ ❁ ــــــــــــــــــ

يمه عفتيني ومشيتي وتنهظم روحي هظم
وانه شاهدت بعيوني وسمعة كسر العظـم
وطيحت المحسن شفتها وزادت بگلبي الم
مــن دفع بابچ بدينه شاهدت صورة خيــم

ناري اعله نارچ . حرگن گلبنه
وشبت عباتي . وهم انظربنـه

انــه العقيلــه انــه العقيلــه

ـــــــــــــــــ ❁ ❁ ❁ ــــــــــــــــــ

تنطفي شمعة حياتي وعيني مـابيها ضوه
واختنگ من ذكرياتي وينشف بريتي الهوه
يـمه من ساعة غيابچ خدي بالدمعه ارتوه
وبـالنفس دخان اشمن يــمه دلالي انچوه

الباب وعصرته . وظــالم سطرنه
وعصرت دليلي . بسوطه ويسبنه

انـــه العقيلــه انــه العقيلــــه

ـــــــــــــــــ ❁ ❁ ❁ ــــــــــــــــــ

وردة احلامي ازرعتها وترست ايامي ورد
منجل الفـرگه گطعها والحلم منـي ابتعـد
وراحت ايامي العشتها بفيچ ومااظن ترد
طفله من تفارگ امها مايظل عدها سنــد

ورده اعله ورده . لمن ذبلـنه
بچف الاعادي . مـن اندفعنه

انــه العقيلــه انـه العقيلــه

ـــــــــــــــــ ❁ ❁ ❁ ــــــــــــــــــ

بويه شاهدتك تعاني وهذا گلبك ينفجع
برجعتك مــن غسلتها بونتك زاد الوجع
گتلي مر چفي عليها ولزمت كسر الضلع
راسمه السطره اصابع ولاثر طابع طبــع

چف اعله خدها . مرسومه شفنه
هــدتلي حيلـي . وبيها انفجعنـه

انـــه العقيلــه انــه العقيلــــه

ـــــــــــــــــ ❁ ❁ ❁ ــــــــــــــــــ

انتي يايمه الحنينه وللصبر صرتي جبـل
مـــن تروحين شبدينه يندفن بينه الامل
واليتيم دموع عينه تجري لو واحد سال
چـم سؤال يمر علينه وشكثر دمع النزل

دمعه اعله دمعه . ويغرگ جفنه
اسچب يدمعي. . اليوم انسألنـه

انـــه العقيلــه انــه العقيلــــه

ـــــــــــــــــ ❁ ❁ ❁ ــــــــــــــــــ

يـمه لو رحتي مصايب ينترس بيها الگـلب
والحسن چبده يتگطع والخدر يمه انسلب
بــــعدچ بعيني اشاهد كربله وبيها العجب
وخيمه محتركه وأدينه تنچوي بـنار ولهب

وفوگ الشريعه يوگع گمرنه
وبظيم اليالــي يايمه حرنــه

انــه العقيلــه انــه العقيلـــه

ـــــــــــــــــ ❁ ❁ ❁ ــــــــــــــــــ

🖊️عباس فاضل الشمري

تموت امنياتي
للشاعر عباس فاضل الشمري
بصوت الرادود فارس الكربلائي