محرم 🔻

وفاء الاصحاب 💔

نزله للأنصار

ـــــــــــــــــ ❁ ❁ ❁ ــــــــــــــــــ

اليوم ابن ظاهر اجانه..اليوم يكتب ملحمه
جمّع اصحابه ويكلهم..خــل نواسي فاطمه

ـــــــــــــــــ ❁ ❁ ❁ ــــــــــــــــــ

من حبيب ابن مظاهر جمع اصحابه بعزم
والله منعوف الحسين صاح ونشدة حـزم
تحزمو لرض المعاره هجمو الجيش نهـزم
كـل فرد عادل كتيبه سيف وبچـف انلــزم

اليوم جرد صارمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

هـدو بظهر ابـو فاضل بيهم الگـاع انطوت
غصت بروس العساكر بالدمه اليوم ارتوت
ركض ركضو عالمنايه عالارض لمــن هـوت
ذوله عشاگ الشهاده گلوبهم بالحــب قوت

گلوب عدهم هايمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

صدح صوتك ياحبيب اليوم من ارض الطفوف
مـن هجـم وبكبر سنـه شردت اگبالـه الصفوف
يـا أسد بـرض المعاره والگلب ما مره خـــوف
ماتركت حسين وحده والعده عيونك تشــوف

عالارض سال الدمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

والنعم گلهم يخوتي انتم انصار الحسين
مـاتهم بيكـم شدايد بزود انتــم واگـفـين
عابس وجـون الغيـاره عالمنايـه معلمــين
ياوهب وياهم افزع عله اليسره وعاليمين

الگاع رجفت والسمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

كــل فــرد لمـن يقاتل اســد ويطب الحرب
مـن يهــد بيــن العساكر المثل بيـه انظرب
يصرخ بحب ابوليمه والعشگ وسط الگلب
صاحو انصار العقيده وياك نمشي بهالدرب

الجيش كله نهزمه..خل نواسي فاطمه

ـــــــــــــــــ ❁ ❁ ❁ ــــــــــــــــــ

من حبيب ينادي بيهم يلا حي اعله الجهاد
خسفو الگاع بمشيهم صار چـن يوم المعاد
العطـش نـار بگلبهــم والجمر يچوي الفؤاد
والنعم منكم ينــادي انتــم ابطـال الشداد

مايهم بيكم ظمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

محرم 🔻

طبهم العباس 💔

للأمام العباس عليه السلام

ــــــــــ ❁ ❁ ❁ ـــــــــــ


لمن طبهم العباس ... تشهد كربله بيومه

**
يـوم السابـع المشهود
من شال العلم والجود

ذب اعـله النهر لـزنـود
خلاهـا الجثـث نـومـه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

گـالو حيدر الكـرار
ويـاه الـزلـم تحـتار
خـلـه بكـربلـه اثــار
ظلت مـنه ملچومه

لمن طبـهم العبـاس ..

ـــــــــــــ ❁ ❁ ❁ ــــــــــــــ

هــذا الكـافـل المعـروف
مايعـرف تعـب لا خـوف
من زغره ولعب بسيوف
ســوه الملعـب الحـومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

راعي الخوه والغيره
حيرهم صـدك حـيره
حـارو ويـه تـفسيـره
محـد يعـرف اعلومه

لمـن طبـهم العبـاس ..

ـــــــــــــ ❁ ❁ ❁ ــــــــــــــ

تاه اعليهم المشراد
متهـم الگنمر اعداد
صفين وبـدر وتنعاد
فزعهـا الشـمر گومه

لمـن طبـهم العبـاس ..

ـــــــــــــ ❁ ❁ ❁ ــــــــــــــ

لمـن طاحـت الفرسان
يخسف بيهم الميدان
صـار بـكربله العنـوان
سيف وجربه مرسومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

گطعها الركب والروس
عيشهم رعـب كابـوس
علمـهـم وفــه ودروس
بأسمه الخوه موسومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

ماعرفو شنو الجاهم
ريـح وزلـزل اسماهم
مثله الريشه سواهم
طيـرهم عله اغيومه

لمـن طبـهم العبـاس ..

ـــــــــــــ ❁ ❁ ❁ ــــــــــــــ

✍️كلمات

عباس فاضل الشمري

محرم 🔻

ترافة نحر 💔

لحن يخيمات
الرباب عليها السلام

ـــــــــــــــــ ❁ ❁ ❁ ــــــــــــــــــ

يالسهام عوفن رگبة وليدي يالسهام
ولا نام فز من العطش يبچي ولانام
ريـت بـحضـني ضـمـيتـه بـالخـيـام

ـــــــــــــــــ ❁ ❁ ❁ ــــــــــــــــــ

عبد الله يالنحرك ترف اشلون السهم يصيبك
ترفس مثل طير انذبح وانت بحضن حبيبك
ضيعتك امـن ايدي وبعد يا يـمه مـن يجيبك
كلمـن نصـيبه بدنيـتـه وانـت الذبـح نصبيك

يمذبوح..
ردتك مـاي تـتروه يمذبـوح
تالــيهـا تـرد لأمـك بـلا روح
بعدك ينترس گلبي بالجروح

ـــــــــــــــــ ❁ ❁ ❁ ــــــــــــــــــ

كلشي بحـياتي توقعـت بـس تنـذبح ماضنيت
لمن خبر موتك وصل من دم دمع يمه ابچيت
لمـن تصد عينـي المـهد نايـم اشـوفك ياريـت
من طلعتك مـن الخيم ما تدري بـيه شسويت

ولا اشوف ..
بعدك يعمن عيونـي ولااشوف
مذبوح بسهم نحرك بالطفوف
مـا يحتـاج ذباحـك للسـيوف

ـــــــــــــــــ ❁ ❁ ❁ ــــــــــــــــــ

لمن صرت يمه افرحت والفرحه بس ست شهور
كل ظني من تكبر ردت بس عينك اتشوف النور
تصبـح سنـد وكـت الكبـر والأمـك اتصير السور
مستعجل الـمن عالهجر گلب امك يظل مكسور

الگـلوب ..
مـايجـبر كـسر بيها الگـلوب
لـمـن تبتـعد منـها يمـحبوب
تنطر جيتك وتگعد بالدروب

ـــــــــــــــــ ❁ ❁ ❁ ــــــــــــــــــ

الورده تـوگع والغص مـن تنگطع هـم يطيح
يا ورده يالدمك عطر مـن تنگطع منها يسيح
هـو الورد مـن ينذبح مـو بالسهم كون بريـح
ومن الترافه يشع ضوه من رگبتك من تصيح

يشفاف ..
وجهك بالشمس يضوي يشفاف
من گتد الضوه بوجهك متنشاف
من عـمك گمر هاشم الاوصفاف

ـــــــــــــــــ ❁ ❁ ❁ ــــــــــــــــــ

من السهم جـاس النحـر معقوله ما تندم
الله اليساعد والدك من رگبتك شال الدم
من شافك بحضنـه متت گلبه شكثر تألم
حيرنـي هالموقف تـره منـه الصـبر تعلم

يمولاي ..
صبـرك حــير العـالـم يمـولاي
ظيم المر عله گلبك تره هواي
عبد الله انذبح بيـدك بلا ماي

ـــــــــــــــــ ❁ ❁ ❁ ــــــــــــــــــ

لمـن مشينـه لليـسر رحـله شكثـر بعيـده
مايرهـم الراس برمـح مـن ينگطع وريده
كلش جبيره اعله النحر ماترهم الحديده
خافن يگـع حتى الهـوه لا مـا يهب اريده

تره يطيح..
من راس الرمح راسك تـره يطيح
الـزم گـلـبـي كــل مـره تـهـب ريـح
روحي عليك كل خطوه تره تصيح

ـــــــــــــــــ ❁ ❁ ❁ ــــــــــــــــــ

✍️كلمات

عباس فاضل الشمري

يالسهام عوفن ركبة وليدي يالسهام

بصوت خادمكم بهاء الحلي

يالسهام
المتألق خادم اهل البيت ع الأستاذ عباس فاضل
الملا حسن الشمري

محرم 🔻

لبوة علي 💔

تقرأ ثگيل. نزله. شور

الحوراء زينب عليها السلام
تخاطب الكفيل عليه السلام

ـــــــــــــــــ ❁ ❁ ❁ ــــــــــــــــــ



وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

عباس من سوط الشمر ياخويه زرگه متوني
خاف اصرخ وهاي العده من اصرخ يسمعوني
ارد اگصـد الصـوب النهر يـاخويه مـا خلونـي
من سمعو بأسمك صحت يا بو الفضل ضربوني

لمن صحت الحگلي يـا عباس
اعله المتن ضربوني هالارجاس

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

انـه العزيزه ام الخدر ترضاها يا خويه انشتم
النسوه بيمن تنطلب نـدري الحرب بين الزلم
انـه بنـت حيدر علي يـاخـويه بعـدك انظلم
لا والي عندي ولاخيم بـس العليل ويه الحرم

فوك الهزل خويه شكثر تعبانه
طول الدرب راسك يظل ويانه

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه وانته اعله النهر من شوفتك منعونه
صاحـو سبيات اسمعت بعـدك تـره يسمونه
شدونه ياخويه بحبل ترضه العـده يجتفونه
عينك يشع منها الضوه شفنه الغضب بعيونه

بالنظره چن تگلي ها يازينب
يمچ كفيلچ منهـو الـچ يتگرب

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه تعرج ناگتي جابولي وين الهزله
تبلل ظهرها من الدمع عيني العليك تهله
گدامي خويه تشاورو. واحـد للاخر گـله
تعرفها هاي اخت الگمر. هيبتها هيبة دله

يدروني انـه بـكل وكـت مهيـوبه
يا خويه من بعدك صرت متعبوبه

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

لمن دخلنه اعله القصر شفت الحرم مرتعبه
اوگف يخويه بنص زلـم تدريه كلش صعبه
ادري اليسيـر بهـالـدرب لازم يـكـمل يـدربه
والثوره خاطر تكتمل معناها القـي الخطبه

من سولفت گامو علي يشوفوني
زينب أَنـه واخت الگـمر يدروني

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه ما شوفك بـعد تدري شكثر مشتاگه
تـدرينـي مـا احمل بُعـد نـار الگلـب حـراگه
مثل الغصن من ينجبر ويترك غصب اوراگه
مجبوره مـن عفتك انه گلي شوكت نتلاگه

بس ارد اشوفك مره آ يهلالي
يموت الگلب لمن يفارگ غالي

وا كفيلاه .. وا كفيلاه .. وا كفيلاه


ـــــــــــــــــ ❁ ❁ ❁ ــــــــــــــــــ



كلمات ✍️

عباس فاضل الشمري