محرم 🔻

اول عشگ 💔

للأمام الحسين عليه السلام

ـــــــــــــــــ ❁ ❁ ❁ ــــــــــــــــــ


يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

انت اول عشگ . مرني وكبـر وياي
وانت اول شمس.بس لليحبه فياي
كلها تگلي رايح وانـه اشوفك جاي
انـت اول ورد يعطش عليـك الماي

يالوجهك نده شجاب التراب عليك
تغفه اعلـه الورد مـن الترافه البيك
محبـوب الگـلب هـو الله المسميك

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

يالچـان الگـمر يخجـل اذا مـريت
يا اول شمع وسط لضوه وضويت
مـن گد العشگ نحري نذبح ياريت
وبنص الگلب سهمك اجـه اتمنيت

مولاي واحس بعشگي بي تقصير
شگد يمي ربع وانت الوحيد تحير
ما يوفـي الطـم لا دمعي لا تطبير

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

يانسمـة هوه تخفـف لهيـب الصيف
و بحر الشمس مرمي وچواك لسيف
ولا غيمـه استحـت وتظللك ياحيـف
ماتـت كل هلا واصبـح ذبيح الضيف

منك ماخجل چان استحه الدخان
يفتـر بالهوه ويعـمي بنظـر نسوان
ولهسه النهر ظل يجـري ماخجلان

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

يا اول حـزن يـخنـگنـي وتعــنـاه
وانسه الدنيه كلها وهـو ما انساه
طـاريه يمـر واصـفن سـنه بمعناه
اسمك موشعر بس اني اكول الله

انت اول تـرف تصعـد عليـه الخيل
ومـن شح الضـوه يدور عليك الليل
متعوب شكثر بس تنطي ناسك حيل

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

انـت اول عطـر مـا ينشهگ ينشاف
اقوه من الحجر بس الشكل شفاف
العافك مـو بشر هو انت هم تنعاف
يابذرة ضحك مشتوله فوگ شفاف

خضر كل فرح من شفه متفطره
هنيالي عشكته وعشكه بالفطره
الله يحب اليـحبه شعظـم قدره
يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

قاموس العشگ صافن يظل محتار
ماشايـف عشگ يتصلى ليـل انـهار
يا ركعـة وتـر وانـت اجمـل الاوتـار
يا وارث نبـي مـن الله اسمـك صار

اشهـدلك تـره حبـك دعائـم ديـن
شله بدنيته الما يعشگك يحسين
هو انـه منـو واشهدلك بكل حين

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

يالچنك وطن غربه ليعوفك عاش
نحـرك لـو ورد ظل صافن الفراش
الجذب بالعشگ مـا تقبله الغشاش
انـت اول نده وجـاك الذبح غباش

شجابـك ياذبـح مـن يـمتـه تندله
شيبقه مـن الكرم لـو ماتـت الدله
الـموگد ينطفي والخيمه مشتعله

يا ابا عبد الله ..... يا ابا عبد الله

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

انت اول عشگ
✍️عباس فاضل الشمري

الرادود الحسيني ميثم التميمي

محرم 🔻

عزاء القلوب 💔

للخدام🖤

خدمة الحسين شرف لنا

ـــــــــــــــــ ❁ ❁ ❁ ــــــــــــــــــ

يحسين حبك بالگلب وتمـر الاعـوام
خلهم يضدون بحقد عدوان الاسلام

بدمانـه خطينـه العهد
خـدام نــبقــه لـلابــد

الفخر صار بخدمتك وتـرف الاعلام

ـــــــــــــــــ ❁ ❁ ❁ ــــــــــــــــــ

مـولاي وبگلبي انـصب موكب عزائك
خدامك احنه بكل فخر نـرفع لـوائك
عشگك يبواليمه الهوه ونشتم هوائك

ابدونك يضيگ النفس تخنگنه الايام
الفخر صار بخدمتك وتـرف الاعـلام

ـــــــــــــــــ ❁ ❁ ❁ ــــــــــــــــــ

كل يوم جرحك يلچم بگلوب الاحباب
بـدنيه مـاشفنه مثـل امصابك امصاب
مذبوح ويتامـك تظل تـوليها الاجناب

ياوالي بعدك هالحرم يـاوسفه تنضام
الفخر صـار بخدمتك وتـرف الاعـلام

ـــــــــــــــــ ❁ ❁ ❁ ــــــــــــــــــ

بَچَتنه دم امصيبتك عالغبـره مذبوح
حسرات ضلينه نجر وختنگت الروح
لـمن يگولون الجسد تـرسنه الجروح

نـلطم نظـل وننتحب ونـطبّــر الهـام
الفخر صار بخدمتك وتـرف الاعـلام

ـــــــــــــــــ ❁ ❁ ❁ ــــــــــــــــــ

يـبقه عـزائي ويـستمر يـوم القيامه
إنواسي بالزهره وعلي وكل اليتامه
شيعتهم احنه ومانهم هـاي الملامه

خلهـم يلوموني بعـد عبـاد الاصنام
الفخر صار بخدمتك وترف الاعلام

ـــــــــــــــــ ❁ ❁ ❁ ــــــــــــــــــ

اسلامي عالفطره اعتمد مـايكره الدين
عدنه عقيده ومعتقد ونحب الحسين
ونعشگ اهل بيت النبي والهـم موالين

بـاقين والگطـع النفــس نـسمـه خدام
الفخـر صـار بخدمتـك وتـرف الاعلام

ـــــــــــــــــ ❁ ❁ ❁ ــــــــــــــــــ

عندي عقيده ومعتقد وحسين امامي
ادري عليه لـو سلمت يـسمـع سلامي
عـالي اظـل بخدمتي ويـرفع مقامي

شفناها كلمن يخدمـك خـليته گـدام
الفخر صـار بخدمتك وتـرف الاعلام

ـــــــــــــــــ ❁ ❁ ❁ ــــــــــــــــــ



✍️كلمات

عباس فاضل الشمري

يحسين حبك بالقلب وتمر الاعوام




عباس فاضل الشمري

محرم 🔻

معنى الشوگ💔

لحن مسلم الوائلي
ياهو يشيع زينب 🖤

للعليله عليها السلام

ـــــــــــــــــ ❁ ❁ ❁ ــــــــــــــــــ

أَنــه البدار عافوني هلي وراحـوا
نطرت هواي صيحتهم ولاصاحوا

دنياي ويــاهم تحله
فرگاهم شيب طفله

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

انـه العليلــه البالبيت ظليت اون بالغربه
هو البشر من يشتاگ دنياته تصبح صعبه
شحـال العزيز وينعاف ومـحد يمر بدربه
مايفتهـم معنى الشوگ الا البشر ليجربه

واليفارگ غالي من احبابه
ويگعد يناطر عمر يم بابه

ويناطر منه الرجعه
مايملك غير الدمعه

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

هــو الورد مـن يموت مــو لازم يگطعونه
يموت بعطش من الماي عنـه تره يمنعونه
ياماي اليه ومنعوه چنت ارتوي من عيونه
الخاطره انطي روح فـدوه اليگلي شلونه


وين اليسولفلي عله حجاياته
مــن يگعــد يـدللهـن ابنيــاته

لو خافن مــن الظلمه
يــرتاحن منــه بكلمه

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

بْعـــد المسافــات هــواي مــا اگــدر اتعنــاهم
صح الجسد ظل ماراح بس روحي والله وياهم
اعرف الــي ماينسـون ولحضه انـــه مــا انساهم
مــن الفجر حـد الليــل ابچــي بحـزن وانعـاهم

ماكو داعي عليهم تنشدوني
مبين افراگ الاهل بعيوني

بعيوني مبــين دمـعي
ذبلانه وتشرح وضعي

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

خــوانه يوســف بعــدوه وظــل والــده ينتظــره
صــار الوكت چــن خوان يـوسف عليــه العشره
يبعــد هــلي مــو يــم بيـر يــم الــفــرات ونــهره
ومن البچي عيوني تصير موبيضه تصبح حمره

وانطر يردلي الطارش بريحتهم
تتفتــح عيوني انــه بشوفتهم

والمــات بـروحي يــعدل
بس طيف يمرني ويسأل

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

اعـرف بعــد ميردون بـس اقنــع انــه ابــالي
وارسم صور ع الحيطان جيت اهــل بخيالي
شحال اليفارگ وشحال اليفگد عزيز وغالي
مــن فارگت انـه احباب منهو اليفسر حالي

اتوسـل تمرني بعجــل يـاموتي
ناديتك وحالي اشرحه بصوتي

واسمعها بصوتي الخنگه
محتاجه هــواي الملـــگه

هلي راحوا .. هلي راحوا


ـــــــــــــــــ ❁ ❁ ❁ ــــــــــــــــــ

ياكربلــه يمـرني العطش لمـن يذكرون اسمچ
صح انه ماشفتچ لچن بخيالي عايش رسمچ
متوجر بگلبي الجــمر مــن نارچ ومن سهمچ
مـن اصعب سهام الگلب سهم البعد من يمــچ

من فارگيت اهلي سهم صاباني
لمن بقيت الوحدي ويه احزاني

وسهام الفرگه جروحي
ونصابت طفـلة روحي

هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

يادنيتي حيـلي گضه امشي بعــد مابيه
من يمي من اهلي مشو مات الامل بالجيه
هـم شفتي طفله بهالعمر تحلم ترد مسبيه
يادنيه بس ريحت هلي رادت تشمها الريه

اقـبلها چنـت ويـاكم ايـسروني
بس ماردت من عدكم يحرموني


اتيسر اعرف صعبه
محبوب اتعنه الحبه



هلي راحوا .. هلي راحوا

ـــــــــــــــــ ❁ ❁ ❁ ــــــــــــــــــ

✍️كلمات

عباس فاضل الشمري

محرم 🔻

أنين العاشقين 💔

لمولاي صاحب الزمان روحي له الفداء


ـــــــــــــــــ ❁ ❁ ❁ ــــــــــــــــــ

هـــاك استمع ونيني
تعرف حجم حنيني

من وَنتي عليك

ـــــــــــــــــ ❁ ❁ ❁ ــــــــــــــــــ

وناتي اونها سكته .. رغم البعد عشگته
ميهمني لـو طـال

بُعدك يزيده صبري ..وافدي الك كل عمري
وانت ادره بالحال

يالفرگتـك طويـله .. وادري الحمـل تشيلـه
من عندي لو مـال

احسب ثواني الطلعتك واهتـم بالحساب
واعرف تراها المنعتك من عندي الاسباب
عندك جرح من كربله لحد هسه مـا طاب

جروحك .. ويه روحك

همك تنصره ديني
هاك استمع ونيني

ـــــــــــــــــ ❁ ❁ ❁ ــــــــــــــــــ

يالغايـب بغـيابـك .. راح اگعد اعله بابك
وانطر بالـدروب

لـمن يمنرنـي ليلي .. مـابـطلـت عـويلـي
فـاگدلي محبـوب

ماشافتك عيوني .. عشگك سبب جنوني
ظل عقلي مسلوب

ماينسه گلبي محبتك لو مرت سنين
مـوشرط الانحبه تـره اتشوفه العين
ماشفتك وبيك انتظر ماادري چاوين

انتظاري .. اعله ناري

افـدي الـك سنيني
هاك استمع ونيني

ـــــــــــــــــ ❁ ❁ ❁ ــــــــــــــــــ

عمري الگضيته اناطر .. باچر يودعه باچر
مـا لحظه مليت

تـمـر بسنـه الثـواني .. والـجَيتـك اتـانـي
يالغالي ماجيت

ادري بسبب ذنوبي .. مـاتوصـل لدروبي
لـو يمها مـريت

مشتاكه روحي لشوفتك يالمهدي مولاي
يـاريتك تـمرني بحلم وانـظـر الـك جـاي
مـو يبس ايامي العطش يالشوفتك ماي

حسرتي .. ولهفتي

گلي شوكت تجيني
هــاك استمع ونيني

ـــــــــــــــــ ❁ ❁ ❁ ــــــــــــــــــ

خنگة خيام احسها .. ريتي انگطع نفسها
متروسه دخـان

لـو شاهـدت يتيمه .. تمـر بخيالي خيمـه
واغرگ بالاحـزان

ياسيـدي وحسرتي .. يالغربتـك غـربتـي
ضاگت هاالاوطان

شما توسع گبالي الارض بس انـه مسجون
مـاعندي بـس دمعي تره اليسچب بالعيون
وبس دعوتي بطاري الفرج ادعيها محزون

دعائي .. ورجائي

تكحل نظرها عيني
هـاك استمع ونيني

ـــــــــــــــــ ❁ ❁ ❁ ــــــــــــــــــ

راح ارسم ابخيالي .. صورة ضوه الليالي
من وجهك النور

انت التضوي دربي .. بالكن تشوفه گلبي
ظل وحده مكسور

بُعد النحبـه بـلوه .. تصبح دمعتي سلوه
وايـامـي عـاشور

لـو مـر علـي ليلـي بحـزن اتسلـه بالنـوح
مـايشفه بگليبي الجرج تدرينـي مجروح
شلون اصفن انه وصفنتي تارسها مذبوح

الليالي .. اعله حالي

بـدمعتـها تعتنيني
هاك استمع ونيني

ـــــــــــــــــ ❁ ❁ ❁ ــــــــــــــــــ

فاگد انـه حبيبي .. وصار البعد نصيبي
من دنيتي هاي
شابح نظرها عيني.. عندي امل تجيني
وتخيلك جـاي
الله اليعينه گلبك .. شگد الصبر يتعبك
ويقهرك هـواي

صبرك فلا مثله صبر من عنده موجود
عمرك گضيته بكل زمن تتسمه موعود
طبـره وضلع وبكربله عبدالله والجـود

سبايه .. وعبايه

باجـر تردلـي دَيني
هـاك استمع ونيني

ـــــــــــــــــ ❁ ❁ ❁ ــــــــــــــــــ

✍️كلمات

عباس فاضل الشمري

هاك استمع ونيني

ملا هيثم العبار
#الشاعر_عباس_فاضل_الشمري