محرم🔻

دموع الخيام 💔

نزله شور

الحوراء عليها السلام
تخاطب الخيمه
ـــــــــــــــــ ❁ ❁ ❁ ــــــــــــــــــ



ياخيمه وين اليوصلچ
والكـافـل يشـم الهـوه

ـــــــــــــــــ ❁ ❁ ❁ ــــــــــــــــــ

مچتـوفـه اخياته بحبـل
صـارو زلـم بـعـد الگـمـر
ياخيمـه ضـربوچ بسـهم
مـن صوبچ صـاب الستر
مـن واگـف ابـابـچ عـدل
حتى الهوه اليوصل يفر
حتى الضـوه لامـا يطب
صار الشمس هـو البـدر
لمــن اجــت ليـه العــده
گـلولـي طـايـح عـالنهـر

والحرگ چن عطره فاح
گـالـو الـعبـاس طـــاح

ـــــــــــــــــ ❁ ❁ ❁ ــــــــــــــــــ

ياخيمه مـن دگـچ تـره
گلـچ بـخيـتي اتكـفـلي
ماعدها غير الله وخيم
يستر خـدر حـيدر علي
بـاچـر تــظـل ابكـربـلـه
بس الحرم مامش ولي
ياخيمه مـن نار الحرگ
حتـى بــتـراب اتبـلـلي
والهزله مـن تعرج غدا
ياهـو اليعـدل محمـلي

والكفل ياخيمه راح
گـالو الـعباس طـاح

ـــــــــــــــــ ❁ ❁ ❁ ــــــــــــــــــ

چانـت تـرفـرف رايــته
محـد الـج عيــنه تصـد
ويسولف بجوده الطفل
يـدرونه ما يخلف وعـد
ونـعذره گـالـو مـايجـي
چي منهـشم راسه بعمد
لمـن اجـت خيـل العـده
كـل واحـد بـديـره شـرد
يـاخيـمه والبيـنـه جـره
عنـه شسـولـفـلـچ بـعـد

روس گدامي برماح
گـالو الـعبـاس طاح

ـــــــــــــــــ ❁ ❁ ❁ ــــــــــــــــــ

مـن ايـدي راح ومـارجع
وبروحي ماتطفه الخيم
مـا انسه چويات الجمر
كلما مشت رجلي انلچم
مـا ردتـه بالدنيه الضوه
كون انطفه حتى النجم
ياخيمتي ويـاچ احترگ
مـن فارگت راعي العـلم
ويبچـي حـالـي بفـرگتـه
موبس بشر حتى الصنم

والحجر لمصابي ناح
گـالـو الـعبـاس طاح

ـــــــــــــــــ ❁ ❁ ❁ ــــــــــــــــــ

ياخيمه مشوني بدرب
مـاشفتـه بعيوني ابـد
واليحدي بالناگ العدو
والكافل انصـاب بعمد
والدنيـه اذتـني شكثر
بيـامـي مـا خـلت ورد
مني انگطع حتى الهوه
مـا اريـدن اشتـمه بعـد
شلي بنفس مابي عطر
ريحـة جفـوف ولازنـد

جفه اليداوي الجراح
گـالـو الـعبـاس طـاح

ـــــــــــــــــ ❁ ❁ ❁ ــــــــــــــــــ

ودونــه لـلشـام بـضـعـن
طبـيـنـه لديـــار الـغـرب
ياخيـمـه مـن ذاك البشر
شفنه المصايب والعجب
لاغــيــره لا ذرة شــرف
لاشيـمـه لا چنـهم عـرب
حتـى بـقوانيـن السـبـي
راس بـرمح مـايـنضـرب
وتـبـاوع النـاس بحـقـد
بالنظـره شربـونه شـرب

والنـظـر النــه مبــاح
گـالـو الـعبـاس طـاح

ـــــــــــــــــ ❁ ❁ ❁ ــــــــــــــــــ

ياخيمـه شحچيـلچ بعـد
والمجلس يشيـب الطفل
طبينه وچــفوفي تصـب
دم ويـحــز بيـها الحـبل
لحضه ولون جابو طشت
كشـفـتـه ودمـوعي تـهـل
شـفـت الحسـين بنظرتـه
مبين عله ارسومه الزعل
حسيتـه يـنشـدنـي عـلـه
اخبـار اليـتـامـه والاهــل

يدري ابد ما نستراح
گـالـو الـعبـاس طاح

ـــــــــــــــــ ❁ ❁ ❁ ــــــــــــــــــ

عباس فاضل الشمري

محرم 🔻

دم وشمع 💔

گعديه


من اجل احياء التراث الحسيني
لحن .. ايام ايام هاي الدنيه ايام

ـــــــــــــــــ ❁ ❁ ❁ ــــــــــــــــــ

آلام آلام ... يبني بگلبي آلام

من العده يذبحونك
يمه بدمه يحنــونك

يبني بگلبي آلام

ـــــــــــــــــ ❁ ❁ ❁ ــــــــــــــــــ

يمه ظلت بيه حسره عرسك امنيـتي اشوفه
حته عرسه وليدي يفرق تختلف چانت ظروفه
الشموع سهام صارت وبالدمه تحنت چفوفه

المـنيته صارت الزفـه
وطشو للعطـش شـفه
ذبلـت وردتـه الــترفه
وجرحي ياهو اليروفه

احلام ..احلام بعدك ماتت احلام

يكثر ضيمي البگلبي
ما اشوفن بعد دربي

يبني بگلبي آلام

ـــــــــــــــــ ❁ ❁ ❁ ــــــــــــــــــ

يمه ياجسام اجيتك يبني اريد وياي ترجع
گلبي يايمه مردته شوف هاي العين تدمع
من تروح وتمشي عنه جم كلب يايمه تفجع

بكلبي يفجع اعتتابه
ظل يون عله احبابه
تحنه وحنته اخضابه
فوگ الكاع متگطـع

لسهام .. لسهام ترسن جسمه لسهام

ظلمه صارت ايامي
ييمه تنذبح ضامي

يبني بگلبي آلام

ـــــــــــــــــ ❁ ❁ ❁ ــــــــــــــــــ

ياحلم عمري وحياتي وفرحتي بسنين عمري
من تروح منيدي يبني ينكسر يايمه ظهري
ذبلت الروح بغيابك وبعدك يعذبني دهري

عفتني وگلبي يتمته
ظل ينشد عله جيته
ترد ليه وتجي يمتـه
مو خلص انه صبري

انضام .. انضام بفكدك انه انضام

فگدك عيني بچاها
ظلمه الدنيه سواها

يبني بگلبي آلام

ـــــــــــــــــ ❁ ❁ ❁ ــــــــــــــــــ

تنذبح يمــه بشبابـــك وانــه شيصبــرها روحــي
ماغمض جفني بغيابك عيني تسهر وي جروحي
بالكن تردلي واشبگك ارد اشوفك كل طموحي

عليك العين بس تدمع
اسهر وادري ماتنرجع
هناي الروح ماتهـجع
من بعدك عله نوحي

ما نام .. مانام بعدك جفني مانام

اگضي الليل سهرانه
يـريتـك ينمـه ويـانه

يبني بگلبي آلام

ـــــــــــــــــ ❁ ❁ ❁ ــــــــــــــــــ

والـدك وصــاك يــمه وانــت نفــذت الوصيه
قدمــت عمرك نـذرته مــاخفت مــن المــنيه
شايل السيف بيمينك ضربه تضرب هاشميه

متهاب الجيوش انته
صارت من تمر سكته
ابنــي وانـــه علــمته
وكتــله لا تــرد ليــه

جسام .. جسام صاحو هذا جسام

طب الحومه يفنيها
اريد اليـوم تمحيها

يبني بگلبي آلام

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

محرم 🔻

اموت وياك 💔

علي الأكبر عليه عليه السلام


ـــــــــــــــــ ❁ ❁ ❁ ــــــــــــــــــ

برحيلك گلبي يتفطر
بدونك تدري ما اگدر

شتظن انساك .. اموت وياك

بدونك تدري مااگدر

ـــــــــــــــــ ❁ ❁ ❁ ــــــــــــــــــ

يزهرة عمري ويامي يروحي ويانظر عيني
يحلمي واجمل احلامي وحـدي لا تخليني
بعد عينك ينورالعين اموت وانـت تدريني
يشمة كل هوه بريتي يفرحة عمري وسنيني

صعب فرگاك .. اموت وياك

بدونك تدري مااگدر

ـــــــــــــــــ ❁ ❁ ❁ ــــــــــــــــــ

احس بنـار البصدرك و دليلك يلتهب ضامي
دعيت الله ترد ليــه واشوفك انــه بحلامي
يتعبي ويا ابن روحي اجيت اشكيلك الامي
ياالاكبـر عمري ما اريـده اريدك انتـه گدامي

ردت ملگاك .. اموت وياك

بدونك تدري مااگدر

ـــــــــــــــــ ❁ ❁ ❁ ــــــــــــــــــ

فگدتك يابعد امك خذاك الموت من ايدي
تمنيت شكثر ياناس اريدن شوفت وليدي
غيابك هيج احزاني ييمه وشوفتك عيدي
اصبر روحي بالگوه اكل للروح بس هيدي

اظل انعاك .. اموت وياك

بدونك تدري مااگدر

ـــــــــــــــــ ❁ ❁ ❁ ــــــــــــــــــ

يشيخ الروح يـاهيبه يچلمات الهـلا التنكال
اسولفلك عله احزان وادموعي تسولف حال
يغالي ولاتظـن انساك يساكن بالگلب والبال
بعــدك مـا ردت كلشي لادنيـه ردت لا مــال

بعد عيناك .. اموت وياك

بدونك تدري مااگدر

ـــــــــــــــــ ❁ ❁ ❁ ــــــــــــــــــ

تريد المـاي يوليدي تريــد شفـاك ترويها
تــرد وتگلـه تــدريني اذا تروينـي افنيها
تروح شلون يايمــه وحيده امـك تخليها
يخيمه بروحي محتركه نارك من يطفيها

كمت انخاك..اموت وياك

بدونك تدري ما اگدر

ـــــــــــــــــ ❁ ❁ ❁ ــــــــــــــــــ

حزينه الروح بغيابك يتارك بالكلب حسره
يهنيال البشر لو مات عزيزة ينزله بالحفره
اريدك يمــه بچفوفك تهيـل ترابي وتنثره
خاطر بالگبــر ويــاي چفـك يندفن عطـره

واشم ذكراك .. اموت وياك

بدونك تدري ما اگدر


ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

برحيلك كلبي يتفطر





عباس فاضل الشمري

محرم 🔻

سوالف عليله 💔

العليله عليها السلام

ـــــــــــــــــ ❁ ❁ ❁ ــــــــــــــــــ

بويه شنهي القصه فدوه خبـرونـي
بويه ليش عيونك اتصد من عيوني

انـت تجمـع بالعـيال
والدمع بعيوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

بويه سولفي اعله بختك شنهي ناوين لرحيل
وچنـي احس بيها بعيـده والسفر دربـه طويل
ادري حيلي بايـد انـه وعالسفر مـا بيـه حيل
خلي اگعـد ويـه اخويـه هو هـم مثلي عليل

انتـو شديتو الرحال
والدمع بعيوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

بويـه اريد وياكم امشي روحي ماتحمل عذاب
ابچي واتوسل وانوحن والصخر من وني ذاب
شلون انام وتغفه عيني وشابگه بحضني الثياب
وراح اظلـن وي عطركم ابچـي واشتم بالتراب

واذكـر ايـام الــدلال
والدمع بعيوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

من اظلن بويه وحدي راح اظل بلايه روح
راح اشيب وانه طفله وينملي كلبي جروح
خلي وحده من خواتي تبقه يمي وماتروح
رايده تشاركني حزني ابچـي وياها وانوح


گلبي ويه اخواني شال
والدمـع بعـيـوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

راح اروح العمي بالكن ولنـه گايلي تعاي
گتـله يـاعمي اجيتـك رايده تحقق مناي
وانـه حسيت بنظرته يعتذر بالنظره هاي
خايف عليه اموت هناك يعرف ماكو ماي

هالأمـر گلـي محـال
والدمع بعيوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

عمه يـازينب اجيتچ لا تحرمينـي الحـنان
عمه لفيـني بعباتـچ محملـچ مـابـي مـكان
اغفه بحضانچ يعمه وانتي بحضانچ امان
دمعچ يبين جوابچ وانه احسن موتي حان

محـد يـرد عالسـؤال
والدمع بعيوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

بويه رديـت بـدموعي ولأمل بالروحه مات
خل ارد هدومي واگعد وحدي هاليله ابات
چانت امنيتي اروحن حال من حال البنات
ما خذوني چي عليله والمرض بعظام فات

من بعدكم حالي حال
والدمع بعيـوني سال

بويه شنهي القصه فدوه خبـرونـي

ـــــــــــــــــ ❁ ❁ ❁ ــــــــــــــــــ

كلمات
عباس فاضل الشمري