للقاسم عليه السلام

جاسم طالِـع مِن اِخيامه .. لو فِلْقَتْ قَمَر
هذا مَلَاك وْفوگه اِعمامه .. لو فِلقَت قمر

سُبحـان الله وَجهه اشمحلاه
هذا مَلَاك وْفوگه اِعمامه .. لو فِلقَت قمر
___________________________________

لابس هندامه ويتبختر وِمن اِلثامــه ايشع النور
طالع ينصر عمَّه الغالي وِالغِـيره بشـريانه اتفـور
شاب وخلَّه الدنيا بظهره من نادى حسين بعاشور
گام ولـبَّه الدعوه بروحه حَل وكته ليومه المذخور

فك صدره لموتَه وماخايف .. عمره اَثلثطعش
فدوه لطوله وريجه الناشِف ..عمره اَثلثطعش

تـارك دنيـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
_______________________

يافـارس يوگـف جـدَّامه وهاجت نخوة هاشم بِيهْ
وصعدت نار الغِيره براسه وكل ماي الشط مايطفِيهْ
صاح اِبشر عونك ياعمي حِملِ اليكلَف ذبني اعلِيهْ
موقف عندي يگر عيونك بس لَوليدك رخصه اِنطِيهْ

ياسبـعـين اتكـفِّي لســيـفي .. وآنه اِبن الحسن
اليوم اَحكم والحومه بكيفي ..وآنه اِبن الحسن

يزهر لاگـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
_________________________

شكــراً ياجاسـم يولـيـدي باسه براسه وشمَّه حسين
بعدك گله ازغير اعله الطف وين اِنته وهَل وادِم وين
مو قصدي اَستنقص من قدرك بس خوفي اعليك امن البِين
اوشِيصبِّـر أمك بفـراگك وِلْـطولك مشبوحه العين

گـلَّه أمي الشدتلي اِحزامي .. وحطَّت لامتي
گالت دمّك يضوي اَحلامي .. وحطَّت لامتي

ودِمعَتْ عينـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________

للحومه اِسترخَص من عمَّه والموت ايصدلَه وخجلان
اِزغير وبس عد الله اشكبره چَـن آيــه بقـلب القــرآن
مابالِـغ حِلمــه امن اسـنينه بس بالـغ ضَربِ الفرسان
لاگـه الموت املاگه الطِفْلِ لْـصدر أمَّه لو حَس عطشان

فرحان بمـوته ومستبـشِر .. بي هيبة علي
ومن عين الحاسد متنكِّـر .. بي هيبة علي

يخسه العـاداه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________

سوَّه اَفعال اَكبر من عمره طب وداس اعله الممنوع
وبنص عـدوانه الغـــداره دنّـگ شَد نَعـلَـه المگطوع
ومن عرفوا يستهـزء بيهم وَاصبَح بي ذلَّه الموضوع
گالوا هذا الشاب انـغدره وْگلب أمَّه انخلِّيهْ مفجوع

او رَد لخيامه ودمّه بطوله .. والشمعه انطفت
وماتت من بعده الـهلـهوله ..والشمعه انطفت

مـيِّت جابـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________


خادم الحسين ع
مرتجى الحسَّاني
https://www.tg-me.com/MM_lt5

للعباس "ع

يابو الفضـل يشـهدلك السـابِـع
چفَّـك لِـگـــوهِ اِبـرايـتَـك طابِـع
_____________________


سِر الأعظم بيهـا لو شَمرَتْ حرب
يل يمِـينـك خلَّت بخصمك رعُـب
وسَطْرِتك چانت تِـرَجِّف كل گلب
ريح صرصر بالحـرب لمَّـن تطب

ياغِيره من صَدرِ الشرف راضِع
جـفك لگــــــوه ابرايـتك طابع
______________

رَفرِفَـت فــوگ الظـعــن لـمَّـن طـلَــع
وشرف عهـدِ الخـوّه عالـرايـه انطـبع
أخــذ صِـيته العلگـمي منهـا او قِـنـع
وإنته صِـيتك للسـمه السبـعه اِرتـفع

تخـدِم أخوك او إنته مِتواضع
جفـك لگــــــوه ابرايتك طابع
_____________

ويوم سابع من محــرم من تـرِف
يبدي نفخ الصُور عل سبعين ألِف
رايـه كلفه اوشـــالها فـارس كلِـف
آيـه قُدسيـة او شمس ماتـنكسِف

مو رايه ( آيـه ) ابيمنـتك رافِع
جفـك لگـــــوه ابرايتك طابع
_____________

عن وَفـائـك بيـها ظـل طابـع أثـر
وخدر زينب مايشم نســمة خطر
من ترف چانت علامه اعله النـهر
اتگـول بعـده بخـير عبـاس الگمر

وي رايتك شِفتك نجم ساطِع
جـفك لگــــــوه ابرايتك طابع
_____________

رايتـك وكت العطش تِـنـزل نِـده
عل خيـــم واَعظم لـهيب اتبـرِّده
اوياك تِـنـهـيـهـا بنـصر متعـاهده
بـزود عل رايــات صارت سَـيِّـده

والفخـر كِـلَّـه لموقفـك راجع
جفك لگــــوه ابرايتـك طابع
_____________

حسين چانت عنده أعز امنِ الهَوَه
نبـض گلبـــه ورايـتـك رفَّـن سـوَه
ظامي، بس بجربـة اوجـودك رِوَه
العطش عِلَّه وشوفتك بالطف دِوَه

واِنتـه النهـر يـم خـوِّتك راكـع
جفـك لگــــــوه ابرايتك طابع
_____________

إلـها حـتى اِعـداك ظـلَّت ترتجِـل
من طحت واتبدَّد بغربـــه الشمِل
جابوا الرايــه اوصفن بيها النـذِل
صاح ( أَبَيْتَ اللَّعنَ ) يا أبا الفضِل

لآخر نَـفَس عن دينك اتدافع
جفك لگـــــوه ابرايتك طابع
_____________

خادم الحسين ع
مرتجى الحسَّاني
https://www.tg-me.com/MM_lt5

للحسين عليه السلام

وَيْ ذكـرى عاشـورك ألـم تتـفَـتَّــح اجروحي
لو نفرض انسَد مأتمَـــك أنصب عزه بروحي

وابچيلك شْعِندي دمِع
حدما خِيَامَك تقـتـنِـع
حسيناه حسيناه
________________________________

أوِنْ وادري الدمــع مايطـفِي نِيـرانك
وَلا يگـــدر يِبــرِّد جمــــرة احــزانك
النهـر ياوسفه ماحَـنْ اعله رِضعانك
يِروي اخيـول أُمـيَّه اويابس إلسانك

رادَك تِـمُــوت امن الظِّمَـه وْينسونك احبابك
مايدري ظل حتى الذهب ساجِد علَه اعتابك

وأُمنيته يِتحوَّل شمِـع حدما خِيَامَك تقـتـنِع
حسيناه حسيناه
__

أسـافِـر وَي هَـوَاك بعــــالَـم الخدمه
واشـمَّـك ياعطر من بين ألـف نَسـمه
حِـلِم لو خنصرك للچف يِـعود إسـمه
وارسمك مو ذبيـح وراسك بجسمه

أُمنيتي أَعيش بـعـالَـمَك ماشُـوفَك امسَلَّبْ
وْما أسـمع بطاري السَّبي بس بإسـم زينبْ

وْللشام إسم ماينسمِع حدما خِيَامَك تقـتـنِع
حسيناه حسيناه
__

يِمُـر اسـمك جرح واتـذكـر اخيـامك
مِشتعله اوتِـفُـر من خوفـها أيتـامك
اوياخذني الخَـيـال لســـاحـة آلامك
حدر الخيل واسمع كسرَتْ اعظامك

مِتـزاحِم اعليك النَبِل وِعله الألم صابِر
مَدِّيت سفرة كربلـــه ومارجَّعِت حـافِر

وِتشوفه يسحگ عالضلع حدما خِيَامَك تقـتـنِع
حسيناه حسيناه
__

جُرُوح الدنيا تسجد يم جـرح فـگـــدك
وأظـل أبچـيلك ابگد ماعِطَش چـبــدك
أشــوفـك تِـلـتـفِـت وأنصـار ماعِـنـدك
هضيمه ايطيح أبو الغِيره وتظل وَحدك

مِتحـاصِر وعــينك بُـقـت مشــبوحه لَـعـيالك
وانته عله روحك ماخِفِت خايف على اطفالك

گلبي اعله حالك مِنفجع حدما خِيَامَك تقـتـنِع
حسيناه حسيناه
__

يحسين اليحب من گلبه .. مـا ينـسه !
او رِمَاح افراگك بنص گلـبي مِنْـغَـرسَه
الْگِضَه عمـره بخِـدِمْـتَك شِـلَّـه بالوِنسَه
الْحَوَاس الخمسه ٱلَك ياخامس الخَمسه

حگها المنـــابـر بالحـزن تُـرفَـع شـعـــايرها
لَن الذبيــــح إبن النـبي كاســر خواطـرها

مَـد حِزنَك ايظل يِتِّـسِع حدما خِيَامَك تقـتـنِع
حسيناه حسيناه
__

أويلي اشْگد حِمَـل گلبك جُروح او هَـمْ
سلام الله اعله جسمك وانته تنزف دم
يلِ مْـگـطـع وِذَر يشفِـيـك يـا بَـلـسَـم
ابوكت چـان اليموت اويـاك ماينـــدَم

جيت بوكت چان الظلُم مِستـعـبِد الوادِم
كل الفضِل يرجــــع إلك إنته وگمر هاشم

يل واگف لدِينك درِع حدما خِيَامَك تقـتـنِع
حسيناه حسيناه
____

خادم الحسين ع
مرتجى الحسَّاني
https://www.tg-me.com/MM_lt5

لـ علي الأكبر "عليه السلام


من غَـيِّمَت دنياها طبها علي وصفَّاها

____________________________


أَرخَصلَه أبـوه او گلّه روح إكسر عزمها
وخلها تِـشـوف الهاشــمـيين وزلمــها
إگـلُبــها ليـل اوطيِّــح ابچفك نجــمها
ضَيِّع ذكرها امن الاَرض وامسح اِسمها

وصدرِ بصدر لاگاها طبها علي وصفاها

____


تبدي القيامه بسيف چفك من تطبهم
لِمهُم حطب خل نارك اتشب بحطبهم
كِضهُم ومن اصــدورهم طلّـــع گلبهم
گطْعِ الرؤوس وخل يرجعـــون برگبهم

نار الحرب شبَّاها طبها علي وصفاها

____


هز رمحك وصب الغضب فوگ آل اميه
واخنگــها من اَربع جهــــات الغـاضريه
چف الله چفك وانته ابن حامي الحميه
جـيب ابيمـــينك راس ابن غانـم هديه


وجيب النصر ويّاها طبها علي وصفاها

____


صيت الحرب يم سيفك اتواضَع قدرها
وِمأَمنَّـه احــــدودك ولافــارس عُـبرها
هاشم تِريدك تعلِن اعله الشط نصرها
كض الشِريعه ابيمنتك واكسـر ظهرها

والزلمه خل يدناها طبها علي وصفاها

____


گِـلهم يالاَكبر ماكو شرده اليـوم مني
وينه اليسد ماي النهر وِيمنعَـه عني
سـبعين ألف عدكم بعد لو هِنّه ذني
خل الكتـايب بالحــرب كلـهن يِجَّـنِي

يمناها مِن يسراها طبها علي وصفاها

____

خادم الحسين "ع
مرتجى الحسَّاني

خادم الزهراء مرتجى الحسَّاني

https://www.tg-me.com/MM_lt5

"مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ.."
لسان حال الأنصار يخاطبون الحسين "ع
---------------------------------


كربلـه نادتنـه واِحنه اِرجالها
گبل لاتـنـخـانـه نتـعـــنَّـالها

**

گبل لاتنخانه وبـ(حيهم )تصيح
وَهَب بالميدان گبل الحر يطيح
بكربله مِتخاويـه اِسلام ومسيح
حسين عدنه الدنيا موش بحالها

***

فتَّحت بـيـبانها الجنّه اوتگول
ياهلا بأنصـار حيـدر والرسول
اشما تطول الحرب خلگ الدم يطول
الگاع تترس من كرَمنه اسلالها

***

واحد وسبعين فارس بين اِديك
ننطي دم واَرواح مانبخل عَـليك
شفنه بيك القبله وِتوَجَّهنه ليك
بلا رضاك الناس مـيته اعمالها

***

إنتـه زمـزم خل يســدُّون الفرات
لو عطشنه بعينك انشوف الحياة
المات لجلك هذا مايتسمَّه مات
صيته رايـه وچف محـــرَّم شالها

***

دمنه للحـگ مثل بركان او يفور
وللشهاده اوياك مبتشره النحور
ثايـه مِنّ امخيّمك تسوه القصور
والمـلائـك ماسكـين اِحبـــالها

***

خَـيَّـرِتنه، وماقِبلنه اِتـظل وَحيد
إلّا نخــــلط دم وريد بدم وريد
نيَّـه وحده والهدف واحد أكيد
والتـخــــذلك الله مايـبرالـها

***
اليوم نـثبت عل عهد والإلـتزام
اوياك عالصعبه وسِلِم وكت السلام
إحنه نِنـزل عاليضد شـرِّ انتـقام
وندحـر اعداك او نِگطْعِ اَوصالها

***

اِنطينه كلمه او لازم انوفّي الوعود
وإحنه من انگول ماحاجه لشهود
بيك منتـصــرين للجــنَّه نعـــود
هاي غـايتنه او نعيش لـجـالها

***

خادم الحسين "ع
مرتجى الحسَّاني
https://www.tg-me.com/MM_lt5

كان الامام الحسن "حاضراً روحاً في كربلاء مع أخيه الحسين "عليهم السلام


يل تگول الحسن غايب واهِم
سيف چان ايلوح بيد القاسم

***

غِـيرته بجاسم زرعها اوطگّت افياي
عل حُسَين بيوم منعوا يوصَلَه الماي
چان صح ازغير والطف أكبر اهواي
زوده أكبر من عمرهم واَثـبَت بهاي

عمـره وي ارگابـهــم متوالِـم
سيف چان ايلوح بيد القاسم

***

تَعَـب عل دِين بكثر ماتاعِب اعليهْ
كبَّـر إبنـه او راد بالطف يفتخر بيهْ
وجاسم ايگلّه بمحرّم تعبك أُوفِيهْ
مايظل ظامي الزرعته بدمي أرويهْ

گـلَّه ماترجـــع أريدك سالِم
سيف جان ايلوح بيد القاسم

***

الحسن ما غايب أبد عن نصرة حسين
روحه چانت حاضره وماشافته العين
وجاسم امن اَفعاله ماخذ چان ثلثين
ومن تصدهم بالحرب ماچنهم اِثنين

الحسن چم ثلمه بركنهم ثالِم
سيف جان ايلوح بيد القاسم


***

فضل عالثوره او نصرها چانت اِدماه
وروحه خطوه بخطوه تحدي لكربله اوياه
وخاف مايبقه لمحـرَّم إبنـه ضمّاه
لجل أبو السجاد يفدي بنحره وصَّاه

وي عمامه ايشن حرب وِيهاجم
سيف جان ايلوح بيد القاسم

***

اشلون أخوهْ بالغربه وَحده وگلبه يرتاح
بوجهه چف الموت بالطف شاهر اسلاح
نبضت الغيره ابـوريده والكــرم فـاح
اعقول چانت قافله وسيف إبنـه مفتاح

الدِين باقي بفضل هذا الصارِم
سيف جان ايلوح بيد القاسم

***

هدَف واحد چان هَمهُم حفظ الاِسلام
وحتى إسمه ايظل علَم واِتطيح الاصنام
الحسن لَحسين بمحـرّم تچوَه واِحزام
رافع اجفوفه ابدعائه اويشگف اِسهام


ولازم الحگ ينتـصر عالظالم
سيف جان ايلوح بيد القاسم

***


خادم الحسين "ع
مرتجى الحسَّاني

https://www.tg-me.com/MM_lt5

مسلم طِوَه الكوفه حيل الله بِچفوفه
____________________________

سلّ الغضب وي سيفه والغِيره جدحت نـار
وبيهم فـتح ميـــدانه حيّ اِبن أخو الكـرار
ماسِك زِمـام الكــوفه چن مَسكَت البتــار
گص بيده خيط الرحمه سبحه وصفوا طشَّار


تنبض وِفه احروفه حيل الله بجفوفه
_______________________

هـيبـــة علي بعــيـونه وِبروحه صبر حسين
وزود الگـمـــر بِزنـوده يـطبگ اِثنين اِثنين
هذا الوگــع من خـوفه وذاكه الشرد لاوين
ظل كوفي يسأل كوفي هذا الشجاع امنين


بيـهم تـرك خوفه حيل الله بجفوفه
______________________

طوعه بشغف تربـيله واِتشَجِّعه اعله اعداه
حرمه وخذتها الغِيره رادت تطـب اِويـــاه
بس هيه عكس الوادم ماطِعـنَت بمگفــــاه
صارتله سيف او رايه عن يمنته ويســراه


بالشـده مَـتـعوفه حيل الله بجفوفه
______________________

صاحب رساله وزوده گــدها وثلث تنـعـام
طاع الحُسَين وشوره وشد للمهمَّـه اِحزام
عن حُـبَّـه مايثـنـــونه مسلم أسـد ضرغام
يشبه علي بصـــولاته ضرباته فوگ الهـام


ضرباته معـروفه حيل الله بجفوفه
______________________

وَحـده ومِئات اگبـاله ياعــازت العـبــاس
لو ينتخي بريشــاته چا طگها راس براس
وِيطب قَصرهم گوه وِيـفــرِّق الحـراس
عالحگ يگطْعِ اجفوفه والرايـه ماتنجاس


بالمعركه اتـشوفه حيل الله بجفوفه
_______________________

خادم الحسين ع
مرتجى الحسَّاني

https://www.tg-me.com/MM_lt5

قام العباس بتحريك خيل الثورة بأمر أخيه الحسين ابن علي دفاعاً عن الاسلام.
---------------------------------

راعيها ساگ الخَيل راعيها

خل تستعِد كربله والْبِـيها

______________________


شَـد العهــد تعويذه بِزنوده

والرايه رفَّت واِبتـسَم جوده

ماينعـبر خط أحمـر احدوه

تحسبله مِيْةِ اِحساب خليها

***

خل تحسب او تجمع كتايبها

يوصـلها عبـاس او يحـاسبها

بالسـيف لـو عـالَـت يـأدِّبــها

ومن ألَـم علَّـتـــــها يـداويها

***

حط إخته بالهودج على الناگه

او يسگيها ماي ويابسه ارياگه

ترتــــاح مِن وَيَّــاه تـتــــلاگه

وكل خوف مايوصل بعَد ليها

***

للطف طلَـع غاضب لجل دينه

من شاهــدَه اِختـلَّـت مَـوَازينه

ودِين الله لاذ بســــاعد اِيـمينه

ويدري بو الغيره بدمَّه يگضيها

***

لجل القِـيَم والمبدأ السامي

چان اِندفـاعه بدافع اِسلامي

إلجـود بيـده والعدِل ظامي !!

والأمَّــه رادت مــاي يرويـها

***

طب كربلـه واِخيـــامه دگّـاها

وشيخ العشيره حسين حياها

دنّـگ وأخــذ تُـربتـها شمَّـاها

وصاح الشهاده بدمّـي شاريها

***

وزّع القـــــــادَّه كلمـن او دوره

واتحدَّه بيهم خصمه واِقصوره

چانت امفَرعَه او ردها مستوره

إلدنيا ، من ذب صـايته اعليها

***

هاي الحـرب مـاهِيْ إعتبـاطيه

عن مصلحه أَو رغبه شخصيه

چانت حرب ضد ( العبوديه )

وحسين بَـيَّـن كـل معــــانيها

***

گاللـهم الحگ هذا والباطل

من قَبِـل لاينــزل أبو فـاضل

اعله احساب دِينه والله مَيجامل

والمارضت بالسيف يرضيها

***

مو خـوف راد ايبـيِّـن الحجَّه

خاف اِلها راي اتردله محتجّه

كلما يحــذرهم تِهِـب ضجّه

عن لاتسمعه وصوته يهديها

***

كتبوا نصرهم بالدِمَه الغالي

وماخلّوا افراش المجد خالي

ماتــوا عَليهْ بالموقف العالي

والحگ شُكرها او قبَّـل ايديها


***

خادم الحسين "ع
مرتجى الحسَّاني

https://www.tg-me.com/MM_lt5

وصية أم البنين لأبي الفضل "ع


ياگـد الِحچايه عينك على الرايه
لو طاحت ايطيح الخدر وِيـوَدِّع افيايه

***

عباس رَخُّص رگبِتَك غالي الهدف
ترضيني مِن يتبدّه دمك عالشرف
خل تفتخر بيك أمّك وكل السلَف
ماريد ينظـرلي علي بعين الوسَف

خل فاطمه اتشوفك دمّك على اچفوفك

والموقف ايخظّر نصر عينك على الرايه
لو طاحت ايطيح الخدر وِيـوَدِّع افيايه

***

إطـلِـق جَـوَاد أفعـالك بهذا السفر
او مِن ماي جودك بلّل ارياگ النهر
إسبگ الريح او كسَّر اَصنام الخطر
للخـوّه ركّـز رمحـــك بصدر الدهر

ضُم زينب بعينك وِاتباها بِحسينك

صون الوِفَه ولا تعتـذر عينك على الرايه
لو طاحت ايطيح الخدر وِيـوَدِّع افيايه

***

يل راضع الدُّر من لِبن صدري الوفي
وَيّ الحُـسَين ابنصـــرتك لاتـكـتفي
شِب نــار بعيـون العدو او لاتنطفي
او بچفوف زينب بالخيم ماي انچفي

لا تِضْمَه بِـوجودك ذِب عالْعطش جودك

وشِد عمرك لوَعدَك نذر عينك على الرايه
لو طاحت ايطيح الخدر وِيـوَدِّع افيايه

***

يُـمه اليـبِـعدَك عن أخوك اتجاوِزَه
لا تِـلـتـفِتـله او لا يغــرَّك مركــــزه
سِـل سـيف زودك وبِـثبــاتك فـزِّزه
عن خُـوِّتك راويهـم أكبـر معجـزه

راويهم اِصرارك عالخوّه وإيثـارك

يـاماي يل ماتنـكسر عينك على الرايه
لو طاحت ايطيح الخدر وِيـوَدِّع افيايه

***

من توصلِ الطف إنصب بگاعه العلَم
وخل يـنفجــر من تحتـه ينبوع القيم
غَطِّي الشمس واِكسر اِفياي اعله الخيم
بَلسَـم أريدك تخـنگ أنفـــاس الألـم

وِبساعـة الشدَّه جيش العطش رِدَّه

جودك يسر وكت العسر عينك على الرايه
لو طاحت ايطيح الخدر وِيـوَدِّع افيايه

***

خادم الحسين "ع
مرتجى الحسَّاني

https://www.tg-me.com/MM_lt5

لمسلم ابن عقيل "ع


هلا بمـسلم لِفـاها   خِنگها وسَـد هواها
             هلا بمسلم
_____________________________


طلَع مثل الأســـــــد نار  دِوَت عينه
خزرها ودنّگـت خــوف  وره ايمــينه
تِمَـنَـه يمـــه عبــاس يجي ايعِـــينه
تَرسها الكوفه بس روس يبو اسكينه

تَرَس حَدها وچِفاها    خنكها وسد هواها
_________________


خِنگها خَنگت المــوت بل احــرُورَه
تِكــتر عنه عزريـــل واخــــــذ دوره
عَدِل مشّـاها والجيـش مِشه بشوره
عطَش سيفه ولگه الماي دِمَه انْحُوره

شَرَب دمـها ورماها    خنكها وسد هواها
_________________


ســمـع بالذِمَّـــه تنبــاع بلا ذِمَّــه
نِـزَل گال انه شـــراي دِفــع دمــه
قَلـِــع يقلــعكــم ابـزود ابو اليمه
مثل مايِقــلَـع البــاب علي عمَّــه

دِفع دمّـه وشَـراها     خنكها وسد هواها
_________________


بطل عل مَيمنه چان علي ايوگفه
فرد خط اويه الحسين ابو الكلفه
شجاع وخاض الحروب عزم چفه
يصـــــير بكفّه  والكون تره  بكفّه

طعِن رمحه دواها     خنكها وسد هواها
_________________


نسِــل حمزه وعلي ايصول ولايتعب
حصرها وسـد الـدروب عَنِ الْمهرب
وصل يم شفّـته المــاي ولا يشــرب
يعرفك گـدها الحسـين يل امجـرب

يِرف بيـدك لـواها     خنكها وسد هواها
_________________


ســـمع طوعه على الدار تِهـلــهلّه
رســـاله وبيها تشــــجـيع توصِلّه
يگلهـــا هاشــــميين، كفو اتگـــلّه
ألف موتــــه اويه الحسـين ولاذله

إجه حسين وقراها    خنكها وسد هواها
________________

خادم الحسين "ع
مرتجى الحسَّاني
https://www.tg-me.com/MM_lt5

تحية إجلال وإكبار لذلك البطل الملحمي والسفير الهاشمي مسلم ابن عقيل "ع


حيَّ الله اَبو حميده .. سيف ورساله بيده

***


أوّل فـدائي او أوّل الوفّــــــايه
مِن قلَّت بوكت الوفـه الشرَّايه
مسلم (رسول) وحامل أعظم آيه
رايــح يبــلِّـــغ وِبيـمينه الـرايه


تبليغه عن عقيده حي الله ابو حميده

***


احسين إنتخاه اورشحَّه امن ارجاله
وْشـدّ اعله گلبه چَـن حِـرز مرساله
مسلم ثِقَـه ومن يحچي تحچي اَفعاله
خَـيَّــال اِبن خَـيَّــال اِبن خَـيَّــــاله


يتـناوش البعيده حي الله ابو حميده

***


مِن حشّمَه حسين إنتفض يگضيها
وِيگـلّه وين الصعبه ذبني اعليها
اشما بِعدت الكوفه بـعزم أطويها
أوّل شــراره لـثــورتك أبـديها


ويسگيها من وريده حي الله ابو حميده


***


بالدم لَـبن عمّه انفجــر بركـانه
وِبراسه صعدت غيرِته او إيمانه
گـلّه آنـه حاضر عل عهد مولانه
درب الصَعُب مُهري اِوبديَّه اعنانه


بالدم عزَف نشيده حي الله ابو حميده

***


حيَّ الله اِبن هاشم وريث الغِيره
دور السفاره بكل شجاعه ايديره
ماواصل الكوفه او عدوّه بحيره
يفرض عليـهـم لو نزل تقــديره


وأفعاله مو جديده حي الله ابو حميده

***


عالكوفه سيطر چن أسـد بالغابه
عمّه علي او غصبن عليها اتهابه
شاف الوضع كلش خطر بحسابه
تصهل إجت خيل وزلم يم بابه

موقف علي يعيده حي الله ابو حميده


***

صكَّـت عساكرها او طلَع لاگاها
تستنجـد اخيول او زلـم خلّاها
كلما تغـيِّـم للحــــرب صفَّـاها
سيف او رمح ظل واگف بعيناها


فدوه لعمُر عضيده حي الله ابو حميده

*** * ***

خادم الحسين "ع
مرتجى الحسَّاني
https://www.tg-me.com/MM_lt5

لحن..(هاي الخيل شد واشتد يميمرها)

لسان حال "التاريخ" يخاطب أبو الفضل
---------------------------------

ياعبـاس گَـصِّـر خـلگك اوياها

ريح إِعصار هِبْ واِكسِر رواياها


* * * *


عالَت ، واِنته ماواحد يعيل اوياك
يفصل بالمعــارك مِن يرف إلواك
نبض الخـوّه يوگف بالدهر لولاك
والاَحكـــام لومـا دمَّـك اَحيــاها

***

إركب مُهـرتك واتوسط الميـــدان
خلّي الدم يصير اعله النهر طوفان
واِختمها اعله اِيدك ختمت القرآن
إختـم، من جديد او إرجــع إقراها

***

الْما مِعتَـبره خلها اليوم عِبره اتصير
للأجيــال ، وبـدرس الأخـــوّه اتـحير
عشره اِخوان يوسف بس رموه بالبير
واِنتـه بخِــوِّتـك عرش الله يـتــبـاها

***

روس اِعداك مِن تِخطف عَليها اتگول
مَـلْك المــوت نـازل عالفرات ايصول
گصِّرها اعله خصمك لاتخلها اتطول
هاي الناس مرضى او سيفك اِدواها

***

خل روس الجثث تتطاير اويه الريح
وإسم حسين بلســانك ذِكِر تسبيح
اچفوفك لازمات الگاع خاف اتطيح
ياهـو الگـال هاشــــم طايح اِلواها

***

أوگف عل نهر واسحگ ثنايا الماي
واِبطي ابوگفِتَك حدما يحـير الراي
حان السَـوم وإنته بكربلـه الشرّاي
دون حسين سهله الموته شَروَاها

***

ماي المشرعه اشما عَـز عليك ايهون
واِمـلِي الجود بيدك وافرض القانون
لاكن لاتـمنـعـــه خلهـــــم ايشربون
موش اَخلاق دينك هيجي ترضاها

***

كلشي ايريد أخوك بلا احساب اِنطيهْ
واِخـسر دِنْـيتك بس المهم ترضيهْ
عـوف المــاي بالطف لاتـفكِّـر بِـيهْ
والله الخــوَّه أعـذب منَّـه تِـلگـاها

***

بالطف رادوا ايبعدونك امن حسين
وماهزّوا شعورك والله طرفة عين
وَجـه الخوَّه عندك مايصير اثنين
واحـــد چـان والموقف تِـبـنَّـاها

***

سرَّك صعب يل بالغيره راسك حار
إنته الحل چنت لحسين من يحتار
مثـلك يابو فاضل يصعـب التـكرار
گـــرَّة بـت محمَّـد بيـك عيــنـاها

***


خادم الحسين "ع
مرتجى الحسَّاني

https://www.tg-me.com/MM_lt5

فاطمة العليلة " تستنجد بنبي الله سليمان بأن يأخذها لكربلاء على بساط الريح لترى والدها الحسين وباقي أهلها ..

يا سُلَيمان بعَجَـل إرحـم نحيبي
على ابساط الريح وديني لحبيبي

والدي بطف كربله وْگلبي حيل اشتاگ إله
على ابساط الريح وديني لحبيبي
_________________________________

يلِّي طوع أمرك الريح وقَدِر عندك عالي
وجبت بلقيس وعرشها ما تجيب الغالي
أدري مِن اتشوف حالي ما يسرَّك حالي
وتگـدر انتــه بعون الله اتعيد راحتْ بالي


وين الله اوبختك ألگاهم
ونور بنور اتلاگـه اوياهم
أغفه وطاريهم بلساني واگعد تالي الليل انعاهم

اعليك ما تِبعد سَـبأْ والغاضريه
يل جبت بلقيس جيب الغالي اليه

أَخذ كل العايله وگلبي حيل اشتاگ إله
على ابساط الريح وديني لحبيبي
_____

الله سَخَّر كلشي لجلك مِن فيوض أسراره
چِنِت تعرف حچي النمله وشِنِي الطير أفكاره
بس تفر خاتَم إصبعك ما أظل محتاره
وْهُدهُدك چاليش غايب مِشتهين أخباره

* وينه اليفـــزع وِيبشّرني
وِشصار اعله اهلي ايخبِّرني
لو صبروا هُمّه اعله غيابي آنه اعليهم شِيصبرني

گلبي ظل يم والدي الحكمت ظروفه !
وْرَسِم وَجهه امن أفتح القرآن أشوفه

آنه عنده مدللـه وگلبي حيل اشتاگ إله
على ابساط الريح وديني لحبيبي
_____

عندي چان الموت أَهوَن مِن ليالي افراگه
ومثل حيدر وي صلاته هيج إله مشتاگه
إنته فوگ الريح تمشي وأهلي فوگ الناگه
واسأل الله بمعجزاتك آنه وأهلي اتلاگه

* بالطف جم غالي امضيعتَه
وعبد الله اشگد ماشايفته
مشتاگه لصوته وضحكاته صار اهواي امفارگ إخته

حلم عمري اتشيلني وتاخذني ليهم
أرد أشم أنفاسهم واغفه اعله اديهم

هسه أخوي بيا فَلَه وگلبي حيل اشتاگ إله
على ابساط الريح وديني لحبيبي
_____

خِذْني خل يبرد لهيبي وگلبي تِشفه اجروحه
طفله وجفوفي گصيره او والدي مالِوحه
شُبه طيره وبالصحاري امن الهجر مذبوحه
تره اليفگد أعز ناسه هيجي تِطلع روحه

* شِلَّه ابروحه اليفگد روحه
عينه لْطَيفه اتظل مشبوحه
ياهو ايمد ايده اعله أوجاعي وِيطيِّب روحي المجروحه

راح اموت بعلِّتي اوتخلص حياتي
ماكو عيسى بهالزمن يحييْ امنياتي!

ودمع شوگي ايوصلّه وگلبي حيل اشتاگ إله
على ابساط الريح وديني لحبيبي
_____

يا منازلهم الظلَّت بس صور جدّامي
وِبسِمَاهم چنت نجمه اوطيِّحتني أيامي
غيمه وِتبدَّت وراهم بالوِداع أحلامي
اگبالي كل الماي يجري وگلبي أحس بي ضامي

* عطشانه لعشرتنه الحلوه
وِلذيچ اسوالفنه الْتســوه
صح الماي ابّين چفوفي بس حار إلساني ومايِروَه

لو شفتهم وألتقي بوادي الخذاهم
نجمة احلامي ترد تضوي بسِماهم

امن أهلي بيت أهلي خِلَه وگلبي حيل اشتاگ إله
على ابساط الريح وديني لحبيبي

_____

خادم الحسين ع
مرتجى الحسَّاني
07819457321

https://www.tg-me.com/MM_lt5

ياشَمْس الطف .. يا وِضُوحك
مهمــا نوصـف .. ما نِلـوحك
قَطْره العـــالَمْ .. يم جُروحك ..ياحسين ياحسين
_________________________________

وَحگ دم الصبـغ شـيبك   والغارَنْ عطـش بالطف
لَوَن تنـشَف بُحور الكون    بحـر دموعي ماينشـف

ماشِفت وجهك وهيچي اتجـنّنت
والله لـو شـايف عيونك چا هِمِت
من حبيب او درِس حُبَّه" اتعلَّمت
وبالعشگ ، لوما وِصالك چا مِتِت !

قصـــة حُـبي ......تنعه حُــبَّه
مات او رَد حيْ .. يحچي گلبه
ساجد لـ الله .... سجده قُربه /ياحسين  ياحسين
_____________

متت عطشان وانته الماي    عجيبه امفطره اشفافك
ونمدِّيت سفرت خير لحَد ماخِلْصن اچتافك

كلشي مِنْ المــاي حَـيْ بس انته لا
باقي حَـي من دون ماي بكـــربلاء
الگاع نزفتْ ، والسمه مطرت دماء
ونزلت أملاك السمه ونصبت عزاء

أَحيَتْ مجـلـس .. يم دِمائك
والزهــــره اتون .. في عزائك
سُـــبـحـان الله .. ياعــطائك//ياحسين  ياحسين
_____________

يبو مصاب اليهد الحيل فگدك حيل ماخلّه
أَبي وماتسكت اعله الضيم ترفض ريحة الذلّه

المثلي گلْت اشلون وِيبايع يزيد
ما أقـرّ لسلطته إقــرار العبيد
لغير ربك يجـري دمك ماتريد
ويبقه درب اعداك عن دِينك بعيد

نحرك يشهد .... للبطوله
موقف واضح .. للرجوله
كل العالَم ....... ينتموله //ياحسين ياحسين
_____________

يلِ معلمنه نِأْبَى الضيم بالروح الحُسَينيه
او نوگف لليضد الدِين وگفَتْ حر بطوليه

ياحسين الما يحبك .. بالضلال !!
حاله حال الشال سوط اعله العِيال
إنته دمَّك حط جواب لكل سؤال?
وبي ضَرَبْت لكل غيور أعظم مثال

درس الأول ...... للأُخوَّه
ودرس الثاني .... للمُروَّه
أمَّا الثالث ...... دم تِروَّه //ياحسين ياحسين
_____________

الخيمه البيها أبو فاضل عند حسين تسوه اقصور
لِذلك من وگع عباس طَيَّحها بشهر عاشور

طيحت العباس كسرتله الظهر
وامْتِله گلبه الشريف امن القهر
اوياه طول بطول ممتَد عل نهر
وحــاير لزينب يـرد بيـا خبر

رد وِبظهره .... خلَّه چفه
مِن اتشوفه .... ماتعرفه
يوم العاشر ...شدَّه كلفه //ياحسين ياحسين
_____________


خادم الحسين ع
مرتجى الحسَّاني

https://www.tg-me.com/MM_lt5

الامام الحسين"ع" لأخته العقيلة زينب قائلاً : "أما تعلمين إن خدركِ أعز عندي من ولدي علي الأكبر"


يزينب خدرچ الغالي أعزّ اعليّه من اِبني

========================

يـ أغلـه من علي الأكـبر عليه

او يقدوه بخـدرچ لكل زينبيه

أثر جدمچ چنت أخـفيهْ بديه

ولا أقـبل تشوفـه اعيون أميه


العدو لو ينظر اخيالچ وحگ عينج يعذّبني
يزينب خدرچ الغالي أعزّ اعليّه من اِبني
========================

عزيزه اعله الهواشم كلّش اهواي

ولجل خدرچ عطاشه انظل بلا ماي

بعدنــه فوگ راسـچ رايــه واِفياي

العطش ماله مچان بخيمتچ هاي


اِبوجودي سهمچ الراحه وَلايهنَه اليحاربني
يزينب خدرچ الغالي أعزّ اعليّه من اِبني

========================

إنتي العَن عفافچ يشــهد الجار

يگول أعوام چنت امجاور الدار

وما أدري بِـنِت عد علي الكـرار

صوتچ ماطلَع (دعوة نبـي بغار)


لاكن لو رحت عنّـچ يظل بحزنه يندبني
يزينب خدرچ الغالي أعزّ اعليّه من اِبني
========================

إبـقي بخـيمتـچ واِحميلي الأطفال

واِنتي البَعدي مسؤوله اعله الِعيال

ومادام آنه حي أمْـنِي اعله كل حال

محّد يلمــح من اَوصافـچ اِخيال


وإذا عنّچ مشيت آنه تره الشامت يراقبني
يزينب خدرچ الغالي أعزّ اعليّه من اِبني
========================

أريدچ عالحـرم خيمه تصيرين

أمـان وعاطفه اعليهم توزعين

وَجِـه بالطف عَليّه لاتخمشين

واذكريني بصلاتـچ من تصلّين


تره بالعاشر اعيونج تشوف الكل تسلّبني
يزينب خدرچ الغالي أعزّ اعليّه من اِبني
========================

يخويه اعله الرمح لو راسي شفتيهْ

إصبري وراســـچ بكل عـزّ إرفعيهْ

اِبعــزاء الله تعــزّي والفـــرج بيهْ

وأوعدچ باليسر ظعني الله حاميهْ


وعدوِّي بحرگة اخيامي بسهم ثاني يصوّبني
يزينب خدرچ الغالي أعزّ اعليّه من اِبني
========================

خادم الحسين " ع
مرتجى الحسَّاني

https://www.tg-me.com/MM_lt5

ياحسين اِبخدمِتَك ماردت بس نظرِتَك

ماردت بس نظرِتَك
========================

ماخِدَمتك لجل غايه وشُهره واِعجاب

بس لگيـتك باب رحمـه وفاتـح الباب

البيك يلـزم مايميل اويه الهوى الهاب

مِنتـبه زين لخدمتي وحاسب احساب


خَلْني جوّه رايتك ماردت بس نظرتك

========================

مِن تشاهدني اشْعلَيه بنظرت الناس

ما امْخلي الشُهره دوم بديني مقياس

للإخـلاص أم البنين الوِضعَت الساس

وخل نشوف شلون چان اِيخدمه عباس


ايگلّه آنه بطاعتك ماردت بس نظرتك

========================

الشُهره مو مقيـاس لازم نِنـتـبه زين

أكو مغـمورين عنهم راضي الِحسين

لو ردت توصـل لـگلبه الطاهر منين

خلّي تجري المعرفه وي دمعة العين


مِن أوِن لمصيبتك ماردت بس نظرتك

========================

كون نهتــم بالقضيــه بگـد الَالحان

چان ماظل ينتـقـدنـه افـلان وافـلان

بالاَدب والمَعرِفَه اشگد عدنه نقصان

وعلى اِخيامه البعض يشمر حچي ونيران


ياحسين امروّتك ماردت بس نظرتك

========================

لو خدمت حسين وإسمك لامِع ايصير

إحــذر ايذبَّـك غُـرورك داخِـل البير

تره اهوايه صعدوا وطاحوا مشاهير

الخدمه جنحان الكرامه وبيهن اتطير


احسبني نسمه بحضرتك ماردت بس نظرتك

========================

اِتواضع اشما ترتفع بس تِغـتَر اتطيح

المو صلب إيمانه يهوَه بعاصف الريح

كن حذر من تلفظ إسم حسين واِتصيح

واِبتـعـــد عنّ القصيده البيـها تجريح


وگلّه أطلب رحمِتك ماردت بس نظرتك

=======================

اِخذوا خدمة حمزه قدوه يالتخدمون

او أي إســـاءة للشـعـائر لا تسمحون

يل ترســتوا اِسـهام گلبـه ماتشـعرون

تره بلحظه حسين عنّه ايديـر العيون


آنه ضد الجرحتك ماردت بس نظرتك

=======================

خادم الحسين "ع
مرتجى الحسَّاني

https://www.tg-me.com/MM_lt5

شكراً إلاهي بِسم اَبو اليمه
وِبمنحره ودمَّه

تقبلني خادم وأنتمي لخدّام الِحسين

=======================

ما أريـد أتفـاخـر بلـبـس الحـرير

ولا أدوِّر شُـهره حتى اَصبَح أمــير

خلني وي حسين عايش عالحصير

حتى اَخدمه بعمري لليــوم الأخير


جبريل چان أوَّل ملَك خادِم
يتباها عالـوادِم

وهذا الشرف دايم يظل مو يوم يومين
تقبلني خادم وانتمي لخدام الحسين

========================

شكـراً، اِبگد رحمِتَك ربّ السماء

طوَّلِت عمري او صحت يـاكربلاء

وابتـديت اِبخــدمـتي بلا كـبـرياء

وشاركِت بالخدمه أصحاب العزاء


اشگد حلوه لمّن تخدم احسينك
وادموعك بعينك

وتِـندفع بالمحشر نقِد وتحصّل الدَين
تقبلني خادم وانتمي لخدام الحسين

=======================

ربي لاتحــرمني من حَـر جمــرته

خلني هــايم بالجَـزَع لمصــيبته

بلكي أخفَّف من جروحه ومحنته

ومارِدت بس القبــــول بخدمته


يستاهل حسين الحزن كـلَّه
والمدمع انهـلَّه

بالدمعه لجل امصيبته ماعندي وجهين
تقبلني خادم وانتمي لخدام الحسين

========================

يم حجِم تضحيته ما إلنه إسم

إحـنـه ذرّه بـلا وزن وبـلا حجِم

واليريد بروحــه يكــبر (يلتـزِم)

يخدم حسين بعمَـل مابي إثـِم


وحسين رايد كلمن ايخدمه
يمشي بأثر جدمه

ولّي انحرف عن منهجه خل ينتبه وين
تقبلني خادم وانتمي لخدام الحسين

========================

ياحزن يوفـيلــه يادگّـت صدر

ويادمع يكفي لمحــرَّم ياكسر

بينه كسره اعليه أبـد ماتنجبر

ومو خساره ايروح لحسين العمر


مو ندمه لمّن تخلص اَيامي
أبچي على الظامي

بس ندمه لمّن ألتهي وماحاسب اثنين
تقبلني خادم وانتمي لخدام الحسين

========================

آنه لحسين أنتمي وعن معرفه

ومايهمني النكر فضله وموقفه

آنه اَحب حسين مو حب عاطفه

حب عقيده ومبدأ ودِين ووفه


دِين المبادئ والقيم دِينه
ضم شيعته بعينه


حسين بحياته وبمماته ايكحّل العين
تقبلني خادم وانتمي لخدام الحسين

=======================


خادم الحسين "ع
مرتجى الحسَّاني
https://www.tg-me.com/MM_lt5

عندما لم يجد مسلم ابن عقيل من يوصل رسالته الى الامام الحسين فقد دفعه الأمر أن كلَّف الريح بحملها إليه ويقول فيها:


ياريح گلّيـله الحچي اتبــدَّل

وحِبرِ الْرسايل خنجر اتحوَّل

گلّيله كلشي اِختلف ومسلم وگع وانچتف
ياريح گـلّيله

=======================


ماظـلّي صاحب كلهـا خانت ياريح

وماي الِوجوه البلگصص شفته ايطيح

إبليس شاهر حقــده ضدّ التسبيح

ومسلم (أما بيكم شرف) ظل ايصيح


سلمي الرساله لحضرت اجفوفه

وگلّـيله مسـلم باعـتـــه الكوفه


والشمس ضَيها انكسف ومسلم وگع وانچتف
ياريح گـلّيله
======================

گلّيـله مسلم للقصر طب مچـتوف

واِجروحه تنـزف والصبر بيها ايروف

والنـاس ذبَّـت منهـا ثوب المعروف

والنخوه ماتت والوفـه بلايه اچفوف


مو سلعه، ليش انباعت الشيمه!

والدِين عدهـم مـالـه كل قيمه


ماي الحميه نِشَف ومسلم وگع وانچتف
ياريح گـلّيله
======================

گلّيله ماكو أنصــار كلهم عدوان

غرّتهــم الدنيـا وخِداع الشيطان

تلهث وره الدينار مثل العطشان

ومحّد يســـولف بالقيم والقرآن


الظاهر شكِل، مايشبه النِـيّه

والنـاس ماتستـاهِـل الجـيّه


وانحرفوا بمنـعطَف ومسلم وگع وانچتف
ياريح گـلّيله

======================

گلّيله يرجــع لايجي ، النـاس اِذياب

عافوني وحدي وسدّوا بوجهي الباب

الغـدروا گبل عمّي عـلي بالمحـراب

عن دِينك أهل الكوفه صاروا اَجناب


گلّيلـه مامــدّوا يـد البيـعه

گالوا نذبحه ويحلم انطيعه


طعنوني والدم نزف ومسلم وگع وانچتف
ياريح گـلّيله

======================

گلّيـله كـلها اتآمـرت ضـدّه ايگــول

وعن الرسايل ماكو شارب مســؤول

الباطل يجول بطوله والحگ مشلول

انگلبت على الإسلام وادم واخيول


بالجاهليـه وچانت النخوه

عند العرب، ماتنكر الخوّه


گلّيله مات الشرف ومسلم وگع وانچتف
ياريح گـلّيله

=======================

گلّيــلـه دوَّر راد واحــــد يـوصيهْ

حتى القريب الغِيره هم ماتت بيهْ

طبـع الخفافيش، الضوه ماتِـدنيه

اتعيش بظلام الليل متعوده اعليه


گلّيلـه ماتلگــه اليـحبـونك

بس توصل اتفقوا يذبحونك


وجه الحقيقه انكشف ومسلم وگع وانچتف
ياريح گـلّيله

======================

خادم الحسين "ع
مرتجى الحسَّاني
https://www.tg-me.com/MM_lt5

يقول الامام الحسين ع"..وخيّر لي مصرع أنا لاقيه، كأني بأوصالي تقطعها عسلان الفلوات بين النواويس وكربلاء، فيملأن مني أكراشا جوفا وأجربة سغبا، لا محيص عن يوم، خط بالقلم، رضى الله رضانا أهل البيت، نصبر على بلائه ويوفينا أجور الصابرين"



مابين النَّـواويس والطف، دمِّي جاري
واِتگطّعني أَوصال عُســلانِ الصحاري

خَط قَلْمِ السِمَه حُسنِ الخاتِمَه
مابين النواويس والطف دمّي جاري
=======================

اَلله اِختـــار إلي بدنياي
مصـرع موتي يم الماي تانيته

وماخايف صحت لبِّيك
متــوكِّـل بدربي اعليك طبّيته

آنه اللي أمَـثْلِ الدين
بِخواني وعدد سبعين خطّيته

لـ اَسلافي الدليل ايلوب
شوگ اللي بگلب يعگوب حسّيته


اليلحق بالرَكِب فاز والفوز الشهاده
والمـا سـافر اوياي مايبــلـغ مراده

تمشي اويه الدمه حُسنِ الخاتمه

مابين النواويس والطف دمّي جاري
=======================

لامهـرَب أبد عن يوم
خَطَّـه الواحد القيُّوم من ذاته

وأبد ماهمني كل محذور
موقف عندي في عاشور مِيقاته

دِيني ايشوهه وسفه ايزيد
والله بإسمي يحيي ايريد آيــاته

مثِل هارون اِلي (العباس)
أخو واِعضيد رفعت راس وگفاته


جيت برايـة إصــلاح ماشاهر سِـلاَحي
بس طبع الخفافيش تهرب من صباحي

مـا متـوَلِّمه حُسنِ الخاتمه

مابين النواويس والطف دمّي جاري
========================

باجر من تصفّ الخيل
ترعــب عيـلتي بالليل عدواني

وگلب إختي عليَّه ايخاف
ظل بيها الألـم ينشـاف أذّانــي

بالطف دمّي يملي الگاع
للصوت الحقيقي اشراع ربـَّـاني

وعبد الله اعله اديه ايموت
هم اِوساده هم تابوت أحضاني


ذوله اذياب مو ناس تذبح حتى طفلي
مثل الچبده عطشان ملهوفه اعله قتلي

بالطف ملحمه حُسنِ الخاتمه

مابين النواويس والطف دمّي جاري
========================

سِوَر من نور دمّي ايسيل
عل مـنبـر يظل ترتـيـل يـوميه

وخل تتگطَّع الأوصال
باجر تـنلَـم او تنشال مَرضِيه

وخلها اخيامي تلهب نار
تصبـــح حضـره للـزوّار قُدسيه

الخنصـر للظُلامـه ايشير
وهاي اِضلوعي گبّه اتصير محنيه


خلّ اَبقه آنـه عطشان لو دِيني ايتروّه
واَدري بگطع الِچفوف تتنفّس الخوّه

وايموت الظِمَه حُسنِ الخاتمه

مابين النواويس والطف دمّي جاري
========================

مابينه اعله جور اينـام
بعيون اليضدنه اسهام چتّــاله

والرايد يطفّـي النــور
علَ اعقابه يِرد مذعور بأهواله

بظعني لـكربله طبّيت
وبالحگ راية أهل البيت تتعالى

المثلي اعله القضيه ايموت
يتخـطَّى الخطر وايفوت بأفعاله


لازم نصنع أجيــال من هاي القضيه
حتى المبدأ ايعيش وِاتموت آل أميه

وينصان الحِمه حُسنِ الخاتمه

مابين النواويس والطف دمّي جاري
========================

خادم الحسين "ع
مرتجى الحسَّاني

https://www.tg-me.com/MM_lt5

رؤية هلال محرم ..

أَسمَع الماي ...على حسين على حسين
يلطـم اوياي ...على حسين على حسين

وَحدَه الدمع سال من شفت الِـهْلال
يلطـم اوياي على حسين
ـــــــــــــــــــــــــــــــــــــــــــــــــــ

أنـا بگـلبي تعــيش أحـزان عاشـــور
وإذا ألطــم وانـوح اعليك معـــذور
أنا بطوعي هويـتـك موش مجـبـور
حزنت اعله المصيبه وغيري مسرور

آنــه حــزنـان ..على حسين على حسين
وغيري فرحان ..على حسين على حسين

وِتكــدَّر الحـال من شفت الهلال

يلطم اوياي على حسين على حسين
ـــــــــــــــــــــــــــــــــــــــــــــــــــ

أنـوح اوحـســرتي وي زينب اتـزود
شــفـتها اتعاتب الكافـل عل اوعود
طفـل مشبوحه ظلَّت عينه عالجود
ورقـيه اتصــيح عمي ليمت ايعـود

طال الغياب ...على حسين على حسين
والگلب ذاب ...على حسين على حسين

اتذكرت الأطفال من شفت الهلال

يلطم اوياي على حسين على حسين
ـــــــــــــــــــــــــــــــــــــــــــــــــــ

وســط روحي تبات اشـموع جـسّــام
اوتـفـززني امن أنـام أصـوات الأيـتام
إلبـگـلبـــه جـرح مايگــــــدر إيـنـام
چــوَت گـلبـي حـرارة نـار الخـــيـام

گلبي مجـروح ..على حسين على حسين
يبجي وينـوح ...على حسين على حسين

يبچـيله لازال من شفت الهلال

يلطم اوياي على حسين على حسين
ـــــــــــــــــــــــــــــــــــــــــــــــــــ

خـيـم محـترگه واسـمع بس الِصـياح
يبو الغـيره الخـــدر وي روحـتـك راح
تعـال حســين أخـوك امن المهر طاح
رحت يمه وشـفـت يـم راســــه ذبّـاح

لازم السـيف ....على حسين على حسين
يا ألف حيف ....على حسين على حسين

گطّعني أوصال من شفت الهلال

يلطم اوياي على حسين على حسين
ـــــــــــــــــــــــــــــــــــــــــــــــــــ

لگيت الشِــمِـر قـابـض بيـــده شيبه
ضحـك من شـافـني بهاي المصـــيبه
صحـت عـبـاس أخوي امنـين أجـيـبه
أريـده ايشـوف حـال إخـتــه الغـريبه

خويه عباس ..على حسين على حسين
دارت الناس ..على حسين على حسين

بيّـه الزمن مال من شفت الهلال
يلطم اوياي على حسين على حسين
_________________________

خادم الحسين ع
مرتجى الحسَّاني
https://www.tg-me.com/MM_lt5