مِن كل بُـقعه بالكون جِمعَت كربله الناس
اَللَّه اِشخلَّه بِـ حسين شنهو السر يعـباس
____


نِمشيلك مِـنّ البحــر إلـى النحـر
نمشيلك وانحـطِّم أَصنـام الخَطر
نمشيلك ما نتعب، اِنْـتَعبِ الدهر
نمشيلك يدفعنه حبنه بهل سَفَر .. نمشيلك


شَدِّينه الحيازيم لِلطف يابو الاَحرار
اوْنشرب بالدرب ماي بس مايبـرد الثـار
يا سِر عشگ الگلوب ياتاج العلَى الراس
الله شخلّه بحسين شنهو السر يعباس
____


بگلوبنه إنته اَوَّل او آخر عشِگ
بگلوبنه مُوته ونبض حبك يدِگ
بگلوبنه يوميـه خيمــه تحـترِگ
بگلوبنه نِسمع اضلوعك تنسحِگ.. بگلوبنه

مَشَّايه او حفظناه اوننـدَل دربك منين
طعم السَفره وَياك مثلِ الجنَّه يحسين
يمك راحت البال ياسلطان الاِحساس
الله شخلّه بحسين شنهو السر يعباس
____


راياتنه بِسم العشِگ لجلك ترِف
راياتنه حرَّه اِو أبـد ما تنچـتِف
راياتنه لو طاحت اتخظّـر ألِـف
راياتنه كلها اعله حـبك تِئـتلِف ..راياتنه

سَدِيناها الِبيوت ولگبرك حدَه الشوگ
اگلوب اولاگت اعليك وِانته اعليهن اتلوگ
نعمه امن السَّمَاوات بالطف وسفه تنداس
الله شخلّه بحسين شنهو السـر يعباس
____


خطواتنه. تَسبيحه تِخلص بالدرب
خطواتنه. مرتبطه وي نبض الگلب
خطواتنه. بحاصِل تَعـبهِن تنـظرب
خطواتنه. يلگَنْ أجرهِن من نطب ..خطواتنه

اِنعيد الماضي وِنزود نِنطي چفوف وِعيون
وننزل علْ خيم ماي مابِيـنه الْيِحـرگون
ليش اليِخْدِمَك صار من اِجدامه ينباس
الله شخلّه بحسين شنهو السر يعباس
____


شباچك. والله اِشتهينه اِنشِم عطُر
شباچك. لِلـزايـر ايظل ينتــظُر ...!!
شباچك. بي جمره من ذاك الخِدُر
شباچك. دايِـر اضلوعه اعله الگبر
..شباچك

هنياله اليجي ايزور منـك ياخـــذ امراد
عشرين بصفر صار للشوگ اَحله ميعاد
بي تتلاگه الِگلوب وي اَغله امن الاَنفاس
الله شخلّه بحسين شنهو السر يعبــاس
____

خادم الحسين ع
مرتجى الحسَّاني
https://www.tg-me.com/MM_lt5

اَحباب وِمْلاگـه احباب وِالِگــبـور ابـلا بــاب
زينب امن الشام ردَّت وِبگلبها ألْفِ اصواب
_____________________

سَلِّـمَت والدمعه نزلت جمره فوگ الخَد
هـذا زين العـابدين بظعـن اخِتـــكـم رَّد
جايب الروس لجـثثـها او عهده يتجــدَّد
ومو طَـبُـع أولاد حيــدر بابـهـــم يِـنسَّـد

گوموا لُو بس اَجساد طَيْـبُـوا جرح السجاد
الغُربه هدَّت حيل اختكم والْگلب شمعه وذاب
_____

ياخسارتنه اِبـفگـدكم بالگـلب كسره
خويه والمكسور بَعدك محَّد ايجبره
الشام آه يالشام خلَّه بگلبي ألف حسره
وإلمن ايعيش بزمـانه الفرهدوا عمره

المثلك اشلون ايروح وتبقى من بعده الروح
عافت بطفها كـواكب مالِگـت بس اتـراب
_____

فوگ گبر حسين طاحت مثل خيمـتها
تاخــذ اتراب اوتـديره فـوگ هامتـــــها
حسين مَيِّت بس سِمعها اوعرف وَنَّتها
هَـلا ابـإختي الطابت اجروحي بزيارتـها

ياهلا ابأغـله النــاس جايبـــه اوياها الراس
شگد فَرَح گلبي ابرَجِعْتِچ وإلتـأم جرحه وطاب
_____

تشتكي لـعباس أخـوها اوگـبره حاضِـنتَه
وابو فاضل من سِمعها مارِضَه اعله اخته
گَـلْـها راسـي اعليــج حـارس آنــه أمَّـنْـتَه
خاف حسبـالچ نســيتـچ ظعني ماعِـفـته

كلشي بِـيَّـه ايحـــيِّيچ إختي واتنومَس بيچ
غِيرتي امْچَلْبه بعباتِچ خاف يِنجَـرّ احجاب
_____

ياعـلي الأكـبر يعـمَّـــــه إِنفُـض اتـرابك
وفُكلي گبرك أرد أشمَّــك يذبح اغيابك
اليـوم إجيت بنـــار گلبي وحايره ابّـابك
أبچي عمّه اعليك وانحب واذكر امصابك

وجهك اليسطع نـور طُـفَـه بعشرة عاشـــور
عمّه فت گلبي غيابك يل متت بعدك شاب
_____

گابُلَـت جاســـم اوطاحت هِيه والدمعه
من جَمُر گلب المصيبه عِلگت الشـمعه
عفيه بِـبـني العاف عرسه وْكاشخ بدرعه
ازغير بس اسنين عمـرك حلوه بالفـزعه

جيت أرش گبرك ماي مـن مَدامـــع عينـاي
بلكي تِنـــزلَّك ابـروده أدري گلبــك لَـهّـاب
_____


خادم الحسين ع
مرتجى الحسَّاني
https://www.tg-me.com/MM_lt5

لسان حال السيدة سكينه عليها السلام
بعد رجوعها من السبي يقول:

روحي يمـك والگـلب لا مانسـيتك
بويه خلِّيت اِختي بالشام اوإجيتك

[ وينه گبرك وينه بنتك آنه اسكينه ]
روحي يمــك
.........................................................

يل رحت عنك غَصُب أبجي ودموعي تصب
غربه والوادم غرب ....ياهضيمه

هسه اجيتك يالأبي امحمّله بظيم السبي
حمره من دمنه العِبي .....ياهضيمه

إختي ظلت باليسر ماتت بسوط الشمر
بويه منك تعتذر ....ياهضيمه

تعتذر من حضرتك ما إجت لِـزيارتك
ماتت اومِن شبگـتك .....ياهضيمه

من گبرها أسمعها تبجي وتشتكيلي
من ابويه حسـين أمـانه اتعَذِّريلي


وانته تشــعر بِينه .. بنتك انه اسكينه
روحي يمك
.........................................................

هذا متني ازرگ صُفه منك ايريد الشفه
روحي احسها امچـتفه......من عذابي

اعيوني شوگ امحمله وجهك ارد انظر إله
وارد اصيح بكربله ..... من عذابي

طفله ليش اتعذبت من أبوي اتيتمت
ريت اموت اعله الطشِت.... من عذابي

ماحِسَبْت آنه اليتِم شوفتك صارت حلم
وجهي اَبد مايبتسم....من عذابي

بِـيّه حسره وشوگ الك من جرحي أكبر
گــلبي والله ايطر ضريحك لو تحــــسَّر


يل تخاف اعلينه.....بنتك انه اسكينه
روحي يمك
.........................................................

بويه فُك لحدك الي يابعد روحي وهلي
نوحي بالطف يعتلي .....أرد اشوفك

عيشة الغربه سجن وانظرب كلما أون
بويه كـبَّـرني الحزن......أرد اشوفك

كلشي بخيمنه انَّهب وانظلمنه بلا سبب
حيلي گاضي امن التعب ....ارد اشوفك

بنتك ابعمر الورد بويه ذبلني البُعد
ظمني يمك باللحد....ارد اشوفك

وأرد اطش جروحي ودموعي اعله گبرك
وبمصايب كربله والشــــــــــام أذَكرك


وادري ماناسينه.....بنتك انه اسكينه
روحي يمك
.........................................................

لاتظن أفرح بعد واَستلذ بالماي أبد
يلِّي گـلبك مابـرد ......تجوي ناره

نارك ونار الخيم شعلن بروحي الالم
واشعر بجبدي السهم..... تجوي ناره

بويه أتمنه عدِل تمسح دموعي التهل
يل غِـيابك مو سهِل ...تجوي ناره

يحفر بخدّي الدمع وانطفه عمري اليشِع
نوحي لتظن ينگطع ..... تجوي ناره

بويه ذبحوا فَرحِتي مابين اديه
يتمّونه امن الزغــر آنه ورقيـه


شوفتك تروينه .....بنتك انه اسكينه
روحي يمك
.........................................................

إگعد إنظر حالتي هيه تشرح غُربتي
ظلمه بعدك دنيتي ..... ياحبيبي

چِـنّه من نگعد سوه نظره من عندك دوه
يانبِـع يل ماروه ...... ياحبيبي

حلمي وياك انـذبح والحزن بابه انفتح
ذبحوا بحضني الفرح .....ياحبيبي

ليلة العاشر قهر للألم تركت أثـر
بعد ماحِب أي نهر .......ياحبيبي

عمّتي زينب مشت صوب الشـريعه
يم ابو فاضل تِگول أشكي الفجيعه

بالحزن ردّينه ...بنتك انه اسكينه
روحي يمك روحي يمك
................................................


خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

حَن گلـبي لزيــارتك     مِتلهِّـف لشـــوفتك

مخنوگ اجيتك حزن  أشتم هَوَا بحضرتك
________________________________


إنته الهــــوَا   جيتك  ولا  يمنعــــني عنك مـانع

شوف العشگ    مشـايتك خنگت انفاس الشارع

ابلا كربلـــــه    يحسـين أظل بالدنيا مثل الضايع

لزيــــارتك    من باب داري لباب دارك طالِـع


شايل عشگ كربله وكل خطوه متسجّله
يا آيــة البســـمله أمشي اعله فَـيْ رايتك


__

مشــتاگ الك   ماريد تحـرُم من ضواك عيوني

وِبشـــــوفتك    خلّيني لو كل عام اكحلِ اِجفوني

كل مُنيــــتـي     سِبحه اعله عروت بابك ايعلگوني

بلكي انگـــطع    واطـشَّــر  او زوارك ايسـحگوني


سودَّني بيك العشِگ   يابو العهد والصدِگ
مثل الخــــيم أحترِگ    من أذكر امصيبتك
___

اشما تحــتـرگ    تنبعـث بالطف من جديد اخيامك

يل گُبـِّــــــتَـك    چن خيمه محنيَّه اعله گد خدامك

رغم العـــطش    ياكـل ابگلبك بس رويت اسـلامك

ابنص الألــــم     وتـفـكِّـر بشــيعـتك مثلِ أيـتامك


من هايه وتأكـدت  ليش آنه احبك صرت
بالطف عشت مامتت   أنـفي خبـر موتتـك
____

تسوه العمر    بالصحــن مِن أوگــف اگبال الرايه

لو ما عـدِل    مــا إجت تتســــابـقـلك المشـــايه

وي دَمعِـتي     من عيني يم بابك اتطيح احچايه

مـاسولفِـت     تقـرأ اعله وجهي الحاجه المخفّايه

تفهـمـني من نظرتي    ما سـولفت حاجتي
تعرف لُغـة دمعتي      دمعاتي من حاچتك
__

يل سُـفرتك     من البصره حد باب الصحن ممدوده

طول الدرب     خيرات ابو السجاد مامحدوده

وكت العطش    يرويني ابو فاضـل الماي بجــوده

صاحب فضل    لـو عــازت الســـفـره يمِـد ازنوده


عباس اخيّـــك حلف     فارغ ولاردلي چـف
فوگ المــــناير وگف    ويرحِّـب بشـيعتك
____

خادم الحسين ع
مرتجى الحساني
https://www.tg-me.com/MM_lt5

- عن النبي (صلى الله عليه وآله): إن أعظم الناس منزلة عند الله يوم القيامة أمشاهم في أرضه بالنصيحة لخلقه "
•••••••••••••••••••••••••••••••••••


بِـ ارشِيف الذكريات باجـر نصبَح ماضي ورايح
بـ ارشيف الذكريات
ومَيظل لَك بالحياة غير الحُب والعَمَلِ الصالِح
ميظل لَك بالحيـاة

[ إلـزَم بِحسين واِتمسَّك زِين ]•• لاتِـطيح
__________________________


نصيحـه لنفسي أوّل مرَّه اَقدمها
واَصنام الغُـرور بصبري اَحطمها
وَاظل كل يوم اَحاسبها وأفهمـها
واَحطها اگبال گبره ومِنّـه اَعلمها

خل تتـعلّم إبـاء من روح حسين ومن صبره
خل تتـعلم إبـاء
للعالَـم كربـلاء مو بس لِلشيعه اِتظل حضره
للعـالَــم كربـلاء

شِوف الحگ وين واتمسك زين
لاتـطيـــح
غير الحب والعَمَل الصالح ميظل لك بالحياة
______________________


سفينه، والركبـهـا امن الخطر يسـلم
ومــادام بطـريق حســـين لا تهـــتم
إخذ طبع الرياحي وللضوه اتقـــدَّم
وإحچي بزود لو صار الحچي للـدم

مثل الحُـر من تِتـوب ربَّـك مــايطـــرِد خطـاره
مثل الحر من تتوب
ومثل الشمعه التذوب ذوب بحبه وحب أنصاره
مثل الشمعه التذوب

[ هِل دمع العين واتمسك زين ]
لاتـطيـــح
غير الحب والعَمَل الصالح ميظل لك بالحياة
______________________


إلـزَم خط إمامك واعـرف اِشـرايد
زِلَال اتصير روحـك والحقـد راكِـد
حسين ايريـد نجمع ساعد بسـاعد
ونطلع بالنتـيجه التهدي كل واحد

لا مَيريد الشَتَـات حسين ايريد ايلمنه بحبه
لا مَيريد الشتات
وِيحث اعله الصلاة كل عاشر يوگف بالغربه
ويحث اعله الصلاة

[ بالطف دربين واتمسك زين ]
لاتـطيـــح
غير الحب والعَمَل الصالح ميظل لك بالحياة
______________________


صلاتك لا تفوتك هاي أهَـم وحده
وشوف حسين أدَّاها وحرب عنده
فرصه ، وبـاب ربـك منفتـح بعـده
النَدَم ميفيد من يخلص حچي المده

حسين اِيريدك تعـال فاتحـــلك بيـبانه وصدره
حسين ايريدك تعال
هذا الحب الحَـلاَل وأحلى اِنسان ايقَدرِ العِشره
هذا الحب الحـلال

[ إتحـدَّه البين واتمسك زين ]
لاتـطيـــح
غير الحب والعَمَل الصالح ميظل لك بالحياة
______________________


يمُـر بينه الحُسين او نلتــقي بذكـرَه
اليحب والمايحب خل ياخذ العِـبره
الماخضَّر بگـلبه الطف يظل صحـره
اشما شاف الخضار اتخنگه ألف حسره

بس عشگ الطف يدوم والباقي اَوهام وتتلاشه
بس عشگ الطف يدوم
واللّايـم خـل يلــــوم هذا الحب بالدم يتماشه
واللّايـم خـل يلــــــوم

[ إخلص بِـثنين واتمسك زين ]
لاتـطيـــح
غير الحب والعَمَل الصالح ميظل لك بالحياة
______________________

خادم الحسين ع
مرتجى الحسَّاني
https://www.tg-me.com/MM_lt5

من منطلق قوله تعالى" أَفَإِنْ مَاتَ أَوْ قُتِلَ انْقَلَبْتُمْ عَلَى أَعْقَابِكُمْ " قال مولانا أمير المؤمنين (عليه السلام): " حتى إذا قبض الله رسوله، رجع قوم على الأعقاب، وغالتهم السُّبل، واتكلوا على الولائج، ووصلوا غير الرحم، وهجروا السبب الذي أمروا بمودته، ونقلوا البناء على رص أساسه، فبنوه في غير موضعه...."
________


بعـدَه الرســـول بلا دفِـن نصبـوا سقيفه !
ونكـروا ولايــــــة حيدره وحطَّوا خليفه

رجعوا علَى الأعقاب ودم فاطمه اعله البـاب
(( أوّل جريمه ))
____

رسول الله جنــــازه بعده مطروح
وعلي ايغسِّل حبيبه وگاعد اينوح
عجب نكروا وصيته بطلعت الروح
بثگل حملِ الرســاله تركوا اجروح

انجمعوا حدر سقف الغدر والنِـيَّه سوده
سـنَّــوا سنـاين ضـد علـي وادم حقوده

مـو يِدِّعون أصحاب ودم فاطمه اعله الباب
أول جريمه
____

إجوا كلهم حقد وگفوا على الدار
وبده الثاني يصيح إخرج يكـرار
إذا مَـتبـايــــع انشـب دارك بنــار
بمصير الأمَّه تحكـم وادم أشـرار

وسفه اِندفع باب النبي عالزهره وسـفه
ورادت تردهـم فاطمـه وعصروها خلفه

مو صحبه ذوله اِذياب ودم فاطمه اعله الباب
أول جريمه
_

خذوا حيدر غصب من داره مقهور
يمِـد للبيعــــه چفَّـه وهوَّه مجــبور
وطلعت فاطمــه واِحجـابهـا النـور
تگلهم رجعوا حيدر ضلعي مكسور

لا أكشف لربي السِتِر واَشكيله حالي
واَدعي عليكم بالهَلَاك اعله الجرالي

دعوه بضلع منصاب ودم فاطمه اعله الباب
أول جريمه
____

كـادت فـاطمــــه تـدعي بالاَحـزان
وبِدَت برض المدينه اتموج الاَركان
إذا مـا إلـهـا حيـــــدر ودَّه سـلمان
هسـه الدنيــا تلـگـاهــا بخـبـر كان

طاعت لَمَن سمعت علي گاللـها اِرجعي
لوما منعـهـا اَبـو الحسن عالأمَّه تدعي

بس خضعت لأسباب ودم فاطمه اعله الباب
أول جريمه
____

عاشت بعـد أبوهـا أيــام صعبـات
انغصب حگها وطفلها بلاذنب مات
إجوا رادوا رضاها او ينِسِّي الفات
رضـا فاطم رضـا رب الســـماوات

بعد الغدر ندموا وإجواْ حسبـوها تِهدَه
دارت وجهها وماحچت أي كلمه وحده

يم الله عدها اِحساب ودم فاطمه اعله الباب
أول جريمه
____

مـاتت غـاضبــه اعليهــــم أويـلاه
وخصمها بعين حمره تلتقي اوياه
تـوَگفه اگبـالهـا اوتشكِيهْ الى الله
يـرب هـذا الظـلمني او سبَّب الآه

ماراضيه اعليهم مشت لا كلِّمـتـــهم
تِشكـيـهم لـرب السـمه ماسامحتهم

دعوتـهـا بالمحراب ودم فاطمه اعله الباب
أول جريمه
____


خادم الزهراء عليها السلام
مرتجى الحسَّاني 07854824915

https://www.tg-me.com/MM_lt5

تقول الروايه: دفنها أمير المؤمنين"ع وعفّى موضع قبرها، فلما نفض يده من تراب القبر هاج به الحزن، فأرسل دموعه على خدّيه وحوّل وجهه الى قبر رسول الله "ص فقال: السلام عليك يارسول الله والسلام عليك من ابنتك وحبيبتك وقرة عينك وزائرتك والبائته في الثرى ببقيعك المختار الله لها سرعة اللحاق بك ....
________

نفض مِنَّـه الـتُراب وهاجـت أحـزانه
وكلمــة فاطمــه ظلَّـت على إلسـانه

دفنها ورجع مقهور وليليه علي ايزور
يگعد يم گبرها ويتلو قرآنه
____

چـانت تخـفي سطـرتـها لو طب حيــدر اعليها
وِتحِط چفها فوگ العين خاف ايصِد علي بيها
ولـمَّن مــاتت الزهــــراء وبِده ايغسـلها واليـها
لـن عاين زراگ الســوط غـيَّر كـل معـــانيـــها

بچـه ،وأصحابه عالموقف يسألونه
يگلهم عاينت ضربــات ملـعــــونه

وضلع من عدها مكسور وليليه علي ايزور
يگعد يم گبرها ويتلو قرآنه
____

علي من عايَن الضربات گـوَّه ايجـر بقـه بنِفسه
جسمها بي جُروح اهواي أثر سـطره وأثر رفسه
صَلَّى اعليها تـالي الليـل واَملاك السمه اتحرسه
وِليْـشيِّـع حـبـيبه شلون يجبر خاطره ويـنسه

صــار الگـبـر حاجـز بينـها وبـينه
وداره ابلايا فاطم مگبــره بعـينه

دافـن بالگـبر نـور وليليه علي ايزور
يگعد يم گبرها ويتلو قرآنه
____

حسب ماوصِّته الزهره دفنها واَخفى موضعها
سـرّ او يبـقى للتــاريخ عن مأســـاة مصـرعها
ليش أَخفَوا گبرها بليل ومحّـد راح شيـــــعها
علي بس هوَّه وأهل البيت مِن اِديـاره طــلَّــــعـها

هذا السِر سبب كـافي لـظُلامتـها
شهيده فاطمه اوظلـمـتها أمَّـتـها

اِختفت عن باقي الِگبور وليليه علي ايزور
يگعد يم گبرها ويتلو قرآنه
___

ليله امن الليالي ايزور نـام وشـــاهد البضعه
تگله اگعد يبو الحسنين واِگصـد دارك بسـرعه
زينب فزَّت امن النوم واَدري اعليَّه منفجعه
تره لوما لِگتني اتموت موتت فرگه مو دَفعه

إترك كلشي بيـدك واِرجع لـبيتك
زينب فاگـده ومحـتاجه حنِّيتك

رَدّ وگلبه مجمور وليليه علي ايزور
يگعد يم گبرها ويتلو قرآنه
____

مـا وَجَّــه عـتب للبـــاب ظل يعـتِب على الأُمَّـه
ليش بلا عـدِل واِنصـاف تغصب حگَّه واِتـظلمه
تره مابيـــها زود اِرجـال تِتـبـاهــا بقَـتِل حُـرمه
ماتت غاضبه اعله الگوم بيها امن الغدر هَضْمه

أكو نَص بالوصيه او فَرُض تطبيقه
رضا الله من رضا فاطمه الصدِّيقه

شهيده وحگها مغدور وليليه علي ايزور
يگعد يم گبرها ويتلو قرآنه
__

خادم الزهراء عليها السلام
مرتجى الحسَّاني 07854824915

https://www.tg-me.com/MM_lt5

ورد في كتاب الكافي ج1 عن الإمام الكاظم "عليه السلام (( إنّ فاطمة صدِّيقة شهيدة ))

ماچـانت مريضـه عدنه الاَسـباب
بَـل ماتت شهيده بدفعـة البـاب

اللَّه يلـعنِ القـاتل بگد حبـها لبو فاضل
شهيده .. شهيده
_________________________

بغضـاً بالنبي وحـيــدر آذوا فاطمــــه الزهــره
ومِنعوها عله أبوها اِتنوح گامـوا گصـوا الشـجره
وعن حقَّـه علي بِـعدوه ومحمَّد خالفـــوا أمره
اعله بابه شعلوا النيران وحيـــدر ياكِـل بصبره

وِتـگــول الروايـــه وبـاقي الأخـبــار
حط رجله ودفعها وطب على الدار

گلبها اعليهْ ألم شايل بگد حبها لبو فاضل
شهيده شهيده
_________________

مو صحبه اِنقـلابـيين نكــروا للنبي اِوصيته
لا حفظـوا كـتاب الله ولا راعـوا أَهَـل بِـيته
علي، بيا مِلَّـه وِبيادِين بابـه انهِتَك قُدسِيته
وللبيعه طلَع مغصوب وِمـقَـيـدِين حُـرِّيـته

گَـلْـهم والله لومَا خوفي عالدِين
ماطبيتـــوا داري يــا مَـــلاعـين

دمعي لفاطمه سايل بگد حبها لبو فاضل
________________

صاحت فاطمه اعله الگوم خَـلُّـوا عـن إبـن عمي
لا أكشــــــف ستر راسـي واَدعي اعليـكم بهمي
شلون أسكت وأرد ياناس مو حتى اِنهـــدر دمي
ظلموني وصُبَـرت اهـواي وعلي شفته انهضم يمي

حيدر من سمعـها ودَّه سلـمــان
گَـلَه اِلحگ عليـها اتكف الاَحزان

وتصبر عل بَله النازِل بگد حبها لبو فاضل
_________________

غدروا بت محمَّد ليش مـو وصَّـه النبي بيـــها
گال، وكلهـم ايسمعون لحَّـد يعـتــدي اعليها
وِانقلبت علَى الأعقاب بَـعـده الأمَّــه تـالـيــها
هاي الهجمه وصمة عار وضلع الزهره يرويـها

ضد دعوة محـمَّد رفعوا اَعـلام
ورجعـوا جاهلـيـه بعدِ الإسلام

تشكي فِعلَـةِ الجاهل بگد حبها لبو فاضل
________________

ردَّوا ليهــا نَـدمــــانين يـردون الـعـــــذر منـها
نِسوا سطرتهم اعله العين وطيحت منها محسنها
اشما دخلوا يكلـمـوها ملامحهم، تِصِـد عنـها
حِلـفت مـا أكـلمـهـــم حـد مـا ينگطــع ونـها

عـالثـــاني والأوَّل تدعي كل يوم
وحلفت ماتسامِح يـل نبـي دوم

اِتصلِّي وتدعي عالعايِل بگد حبها لبو فاضل
________________

وَصَّت تنـدفـــن بالليـل لـو شـالـوا جـنــازتها
ولايحضـرها بالتشييـع كلمن سَـنْ ظُـلامـتها
ما رادتـهــم ايصلُّــــون وِيشهـدون دفـنـتـها
ماتت غاضبه اعله الگوم تشكي لربها محـنتها

راحت تشكي همهـا وحگها مغصوب
والســـوَّه الجريمــه إلـهـا مَطلـــوب

يم الحاكِم العادِل بگد حبها لبو فاضل
_____________________

خادم الزهراء عليها السلام
مرتجى الحسَّاني

07854824915
https://www.tg-me.com/MM_lt5

فاطمة (( شهيدة الولاية ))

أمّ الحسن للعفََـه آيـه
وأوّل شَهِـيده لِلولايـه

---------------------------------


يكفيها عِزّ ومفخره وجاه
هيه أمّ أبوها ونور عيناه
مثل الگلب من ينبض اوياه
ويرعاها چان أفضل رعايه

---------------------

من مجلسه ايگومـلها إجلال
ويقَبْل اديها او ينْسَر الحال
عنها اشكثر وصّه وحچه وگال
وأكَّــد عليـها امن البـدايه

---------------------

ابعَتبتها يوگف يطرق الباب
وِلـدارها بغير إذِن ماطاب
وفاطمه اتسأله عنّ الاسباب
ايگـللها أمر رب البرايه

---------------------

خايف عليها امن اليغدرون
بگد خوفه عالدِين امن الِعيون
وسفه بمماته بي يشِـمْتون
ونكـثوا عهد ذيج الوصايه

---------------------

رغم الوصايه الچانت اهواي
بس محّد امن أصحابه وفّاي
ساس برمل ماثبــتـوا براي
لا مو بشــر چانــوا حيايه

---------------------

خلّوا على خد فاطمه اوسام
لطمه ، او بقت تتجرّع آلام
بالحرب كون اتبيْن الازلام
مو تحرگ ابيوت الهدايه

---------------------

غصبوا فدكها وصبرت اردود
كسروا ضلعها وظلَّت اتجود
بس من خذوا حيدرها مگيود
وگفت رمح ضد النوايا

----------------------

دافعت، ماسكتت على الصار
رغم الكسِر والبيت شب نار
طلعت تنـاشد وره الكرار
چانت مَـرَه او للحگ حمايه

----------------------

طلعت وراهم تلهب احزان
وماسكتت اعله افلان وافلان
لوما علي ودّه إلها سلمان
من يومها اتحين النهايه

-----------------------

(ماضاع حق) بظهره طلاّب
واللي غصبها ايرد الِحساب
ظهر النبي چم مرّه ينصاب
وِيشوف أهل بيته ضحايه

-----------------------

خادم الحسين 'ع
مرتجى الحسَّاني
https://www.tg-me.com/MM_lt5

والله حـاير ------- يل غريبه
أنـعـه يمِّـچ ------- يامصيبه

كِلـهــن ايعــزَّنْ علـيه
وِانتي عِشتيهن سِـويه
گـلبج أكــبـر من رِزيه .. يزينب
__________________

مُصـــابج رِمـــاني ابســـهم ذكرياتج
وْطِحِت مِنْ سِمَه احلامي لحظة وَفاتِج
بِـدون ٱهْـلـج اشتِـسوه زينب حـيـاتج
يلِ امْخَلْصَه عمـرج جِلــوس ابصلاتچ

اشگد بچـيتي ------- اوما رِوَيتي
چِـنتي شـمعه ------ وِنطـفـيـتي

عگب أخوتج والله هَضْمَه
دِنْـيِتـِچ عشــتـيها ظَلْمَه
حتى لو رحـتي ســـــــبيه
گلبـــــج أكــــبر من رزيه .. يزينب
______

وحيــده وغريبـه او زمـانج تِمــرَّد
عليج المصــايب فِتَحـهن بِلا حَـد
إلچ جمره بضلوعي مالحظه تـبرد
على اجروحچ وخدرچ اللي تفرهد

ســاعدَ الله ------- گلـب إخُوتِج
من وِصلهم ------- طاري مـوتج

بلَـه شـنهو حسـين حـاله
من ســـمـع مـاتت دَلالَه
والحسن فوگـــج رمـــيه
گلبـــج أكــــــبر من رزيه .. يزينب
______

أنشــدج يزينب شنو أخبـــار كفيلج
إجه ايشيعج اشلون أخوج برحيلج
يِنـــادي يزينب سَـــلامـة دليـــلج
إذا ماكو چفين عَلى الراس أشـيلج

ناده يخــــتي ------- مـا أعـــوفج
اعيوني راحن ------- بس أشــوفج

يختي صِدمَتني مِنيــتچ
جيت أشــيعج مانسيتج
والجِـــنـازه اتريـد إديـه
گلبــــج أكــــبر من رزيه .. يزينب
______

يـ مَن شِلْتي الِحمول بِديچ الشريفه
وَكت بي تصيرين جـنـازه اونَـحِيفه
يلِ امْرَبيَه عبـاس أشـــوفج ظعيفه!
تِظلـين أبِـيَّــه اوشجاعه او عـفيفه

إنتي ثوره ----------- زينبيه
تنطي قوَّه ---------- معنويه

يركع الطف يم صمودج
وماله اِسم لوما وجودج
وِبشرف صنتي الوصيه
گلبـــج أكــــبر من رزيه.. يزينب
______

ســلاماً عَـليـــج ابكــــثر ما نَحَـبتي
ســلاماً عَله اجروحج اشگد صُبرتي
تِمـنِيتي، لاكِـنْ يوســفـه انحــرمتي
ابغُرب عَنْ أُخُوتِـچ بِعــيده اندِفَنتي

ابعيده صرتي ------ ومِن يعـينج
يـاغُـــرُبـتِـج ------- يا حـــنينج

ندعي الله المهدي يطلع
رايـه فوگ الگُبـَّـه يرفع
وْياخـذ لصــبرج تَحـيه
گلبج أكـــــــبر من رزيه ... يزينب
______


خــــادم زينب ع
مرتجى الحَسَّاني

خادم الزهراء مرتجى الحسَّاني
+964 785 482 4915

مولاتي زينب عليها السلام تبعث رسالة شوق من خلال الناعي بشر ابن حذلم وتقول له:
____________________________________

يابِشِر مُـر اعله وادي اخـواني
گِلهم الموت اعله بابي امتاني

دَعوِتي ابآخِر قُـنوت
أرد اشوفنهم واموت
وين أخوي وكافلي ودفاني
__________________

كِلها غُربه او عِـرِف ماكو بديرتي
وين اِبن حَذلم وأكلفه اعله اخْوِتِي
خل يطب كربله او يشرح محنتي
بعازت الخــــوّان (ساعة دفنتي)

الْتشتعل غيرتهم اعله اخيالي
وسفه مايدرون هسه بحالي !!

خل يعجلون المَـسِير
زينب بموقف خطير

شوگ عندي ابگد صَبُر إيماني
وين أخــوي وكافـلي ودفاني
__________________

روح خَـبِّـــرهــم بحـــالي يـابِشر
گِلهم امن الشوگ طگ منها الصبر
بقت تلفظ آخر أنفاس العمر !!
خل يجي العباس يحفرلي الگبر

يابشر فگد الأحبهم قاسي
شيَّب امن الظيم گلبي وراسي

صيح وين إخْوَتها وين
أبو فاضل والحُــسَين

زينب بوادي الجروح اتعاني
وين اخوي وكافلي ودفاني
___

شيل بيدك رايه سوده بروحتك
واسرِع الْوادي الطفوف بهمِّتك
إذكر اِسمي من خــلال ازيارتك
حسين گِلّه اختك تحن لشوفتك

وگلَّه محتاجه تجي اتواسيها
بيـــدك اتشـيـعها وتـواريها

اوياها ظل بس العليل
وحانت أيـــام الرحيل

واَدري نشمي وطبعه ماينساني
وين أخوي وكافلي ودفاني
_____________

گِلهـم الماي امنَـهَـدكم كـرهِـته
اتشوفـه دَم بـعيــونها وْماشربته
گِـل لَبو فاضــل يِعجِّــلْ جَـيِّـته
للگــبر بيـــده يِـشيل اجنازته

اللـيـله رايدْتَـه يِـغَـمض عيوني
ابعين گلبه ايشوف جرح متوني

آنه بعده بلايه دار
وين ماروح ألگه نار

للبُعد، وِتهيج بيَّـه أحزاني !!
وين أخـوي وكافلي ودفاني
__________________

السـوط گِـلهـم بَـعده طابِـع بالمتِن
والدمـع هــاج اوكِـسَر ظهـر الجِفِن
ٱلْوكت ذبني بغـربه والغــربه سِجِن
او بس اشوف اوجوهم أنسه الحزِن


والله دنيــا الفرگّت بينـاتنه !!
انحشِّم امن ابعيد مو عاداتنه

روحي لرض الطف تريد
يابشِـــــر والطف بِعيد

وْكلمة الخُوَّه اعله طرف إلساني
وين إخــــوي وكافلي ودفـــاني
__________________

مِن أشـــوفـنـهم تِـرد عـافـيتي إلـي
او يرد بِـيّـه العمــر واگعـد وي هلي
گلبي طَگ شوگ اعله عبد الله وعلي
وَكِـت خـلاّني انحــــرم من كـافـلي

طشرتنـه كربلــــه اوظلّـينه
بالحِلم نتلاگه حسره اعلينه

وَكت صرت بلا كفيل
حيلي عجزان ونحِيل

سَلْـوِتي بالغـربه بس قُـرآني
وين اخوي وكافلي ودفـاني
__________________


خــــادم زينب ع
مرتجى الحَسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

مقدمة عزاء للسيدة زينب عليها السلام


بالشام الحبيبه تتـشيِّع غريبه

---------------------------


مِن على افراش المنيه زينب اِختتمت أجلها
او تلتفت للغــاضريه تـنتظر جيه امن أهلها
بس علي ايصبِّر عليها وين ابو الغيره الكفلها
للگبر ، وي ابن أخوها ياهو يتكفّـل حَمِـلها

كافلها اشيجيبه تتشيع غريبه

--------------------------


وين أهلها خل يجوها خل يشيلون الجنازه
هذا وكت العازه وانتم لليطيح بشده عازه
بغربه الي حبكم تعذّب وِعله شوفتكم تِوازه
والله ينسر گلب اختكم والگلب رايد اعزازه

سلَّـتها المصيبه تتشيع غريبه

--------------------------


ياعمر يسوه او تعيشه وكربله طفّت عمرها
تشتعل باللوعه ظلّت لسَّه خيمتها بصدرها
الموت راحه الناس گالت وبلكي ترتاح بگبرها
تندفن زينب بعيـــده وتنتظر زايـر يمرها

والعاشت كـئيبه تتشيع غريبه

--------------------------


والله دنيا، اعليها دارت وأصبحت چثّه اونَحيفه
وهيه الِي مْرَبيه بوفاضل نِحلت وصارت ضعيفه
مُـوتي واِرتـاحي يزينب من عذابچ يـل عفيفه
بلكي يسكن ألـم گلبچ والجرح يوگف نزيفه

بالمحنه العصيبه تتشيع غريبه
---------------------------

خادم الحسين"ع
مرتجى الحساني

لمولانا موسى ابن جعفر "ع

فوگ الجسر رافعها اِديه بس لاترد اِجنازه إليه
لو ترجع أترجاك لو نرحل آنه اوياك
رافعهـا اديه
__________________________

أرد اشوفك
بالحلِم وَتـلافَـت ايمـين اوشمال

شوگي يكبر
والحـنين البِـيَّه أكــبر من سـؤال

بـإعتقادي
إليمـــوت لـفرگـتك موتـه حـلال

ليله ليله
أحسب لـموعد طِـلوعك ياهلال


دمعي يبث شوگه اعله بـابك
طال ويســـألـك عن غـيـابك
ماينحمل فرگاك لو نرحل انه اوياك
رافعها اديه
_____________________

مِثِل يوسف
ذوبِلَتْ زهرت شبابك بالسِـجُـون

وانته تارك
چم گلب يعگـوب يهواك بجـنون

البِـير سِجنك
فرق، بس اِخوان ماعندك تِخون

وِعلَه أخُوته
لَوَن هان، اعلينه هجرك مايهـون


من تترك الغيبه او تجـيني
تنطي تره افـراج الحـنيني
لا والله ما انساك لو نرحل انه اوياك
رافعها اديه
_____________________

أنـدعيلك
للفرج، وي كل نِفَس واَبعث سلام

مِدلي چفك
دمعي صار ابّـاب خَدِّيني اِزدحام

ابعيني جرحي
وِلِــبعـينه الجــرح مايگــدر ينــام

بِــــيّه لهفـه
الْـشوفتك ياسيدي بحجمِ الْخِـيَام


لوجهك، عطَش عبد الله بِـيَّه
بين انتظــارك و المـــنيـه
خل أنسر بملگاك لو نرحل انه اوياك
رافعها اديه
_______________________

بيك أفـكِّـر
ٱلْملگـه بعيوني حـلم والفرگه نـار

والِـيفارگ
يبــقه عايش عل أمـل والإنتـظار

إشتياقي
أرد اشـــوفك لاتـوديـلي اِعـتـذار

يا إِمامي
لو طفَت شمسك طُفَه بعيني النهار


گالولي شو باين كســوفك
گلت أمشي وأوصلك واَشوفك
بلكت أمر والگاك لو نرحل انه اوياك
رافعها اديه
______________________

عن لقـائك
هيـه حســبت ليـل وِيطر الصبــاح

وانته تدري
لـو أشوفك من هضم گلبي اَستراح

ومن وصلتك
عل جسر وَانظر إجت سوده الرياح

واعدتني
(نلتقي بس خارج القوس) الجراح !


جيتك على جسر الرصافه
بس بيدي نعشك ياحسافه
تتركني أون وانعاك لو نرحل انه اوياك
رافعها اديه
____________________________

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

عَلَه امتوني شِلِتْ نعشك علَه امتوني
واَحس الدنيـا ضاگت كلها بعيـــوني
_____________________________

زَرَعـت ابكل جـسـر عين إلك خـظَّر حـنيني
تعب من حزنه يعگـوب ييوسف ماتجـيني
عـطش موَّتـــها فرگـاك تعال اسگيها عيني
غيــــابك والحزن سيف يحــز بِـيَّـه ونـيني

وِنين المنجـــرِح
وصل سابع جرح
دخيل الله شكثر •• دعيت امن الصبح

شجاوب سيدي العنك يسألوني
واَحس الدنيا ضاگت كلها بعيوني
......................................…….

الصبر يالكاظم شلون چبيره اللهفه بِـيَّه
وبعيده شوفتك حيل مثل بُـعد الثـريه
أنا بحسراتي مسجون نعيش الهَم سويه
بأمل واَتخــيلك جاي تفاجئني بمنيه !!

عليك امن الحزن
أحس روحي بسجن
اولقائك عل جسر •• كسر گلبي اليحن

يريت اعله الجسر گبـلك يشيعوني
واَحس الدنيـا ضاگت كلها بعيـوني
..........................………........

وِگفْت أنتظرك بشوگ كلَتْ روحي الملامه
إمامي وخايف اعليك مِن أعــداء الإمامه
شِفِت شي لاكن ابعيد فرحت ابهل عـلامه
تِبيَّـنلِي النعش جاي اوعليهْ شِفْت العِمَامه

أنا الجُمعه الظهر
نطرتك عل جسر
أراقب عن بُعد •• وإديه اعله الجمر

ركضت ابكل لَهِفْتي ومنخطف لوني
واَحس الدنيـا ضاگت كلها بعيــوني
..........................……...........

رجف گلبي وخفت حيل خذتني اجدامي ليهم
جنازه او أربـعه اوياك يحملونك بديهم
صحت ياعالَم اشصار يجاوبني بچــيهم
إمامك هذا مســـموم ولا صدِّگ حچيهم

أچذِّب بالخبر
واحلِّف بالبشر
صدگ ميِّت صدگ •• وأخذ حيفه الدهر

أمس واعدني گال الجُمعه تلگوني
واَحس الدنيـا ضاگت كلها بعيـوني
.................……...................

ضَربت ابنعشك الراس لمَن ميّت عرفـــتك !!
(رقيه الراس الِحسين) طحت شوگ اوشبگتك
بِچيت اوضجَّت الناس على ادموعي لفـرگتك
واَحس الزهـره وَياي تدگ عل راس اجتـك

فجع گلبي الزمن
مثل يوم الحسن
ولجل دين النبي •• يدفعون الثمن

عطَش دين النبي وناداهم اسگوني
واَحس الدنيـا ضاگت كلها بعيوني
……… .................................…

بعدها المِحـــنه لليوم تعيش بنص گلبنه
ورجع بأحقاده هارون وگــف عثره بدربنه
ذنبنه انحِب أبو حسين يذبحونه اعله حُبنه
نموت اونحيى ونموت وَلا نتـــــرك ذنبنه

شـرف هـذا إلـي
أموت ابحب علي
رغم كلمن يضد •• يظل هوّ الولي

فخر والله اعله حبه لو يذبحوني
واَحس الدنيا ضاگت كلها بعيوني
........................………………… ....

مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

حضروا امتــونكم يرجــال لجل الكـاظم وروحه
موعدنا اعله جسر الموت فوگه اِجنازه مطروحه
——————————————————

يوم الجمعه كلنه نروح نستقبل جنازتنه
وِنشيِّـع إمـام الكـــون هيبتنه وكرامتنه
بسم الكاظم بكل عام تتوافد مسيرتنه
اونرفـع رايـة الأحزان وِنجـدِّد مصيبتنه

من سجن لسجن ينـدار وِيكابر على اجروحه
موعدنا اعله جسر الموت فوگه اجنازه مطروحه
__________________________


من شَمّ الهوا محروم خلَّص بالسجن عمره
ظلمه ومايمَـيز الليل مِنّ اِنهــــاره ياحسره
وِنسَـمّ بأمـر هـارون وسفه ومـاحفظ قدره
وماراعى محمَّد بِـي وصوَّب گلب أبو الزهره

والْـ عنّ أهله عاش ابعيد چف الغادر ايلوحه
موعدنا اعله جسر الموت فوگه اجنازه مطروحه
__________________


يسأل ربَّـه كل اغروب يطلب هل طلب منه
ايفرغه لـطاعته وذكراه وماقصَّـر أبــد عنه
وبذكر الله والتسبيح سوَّه امن السجن جَنه
والأعمـــال بالنِـيَّـــات والله انطـاه اِشيتمنه

اعليه صافن بقه السجَّان بس اعيونه مفتوحه
موعدنا اعله جسر الموت فوگه اجنازه مطروحه
__________________


ساگه من الألم مرضوض وِمْن اجفوفه ينزف دم
متگـيد بذاك الگيــــد كلما گـام يتـــألم
يدري بشيعته اتانيــه وتريد الشمل يلتم
چا يمته الفرج مولاي كلنه بشوفتك نحلم

ياكاظم الغيظ اشلــون يكظم صاحبك نوحه
موعدنا اعله جسر الموت فوگه اجنازه مطروحه
__________________


جيناك اعله جسر الموت بس بيا وجه جينه
نسأل ياغريب الدار ماحن گلبك اعلينه
تتــلگـانـه نـتـمنـاك تالي بحسره ظلّـينه
بس نعشك بدينه ايلــوح وِبيـا ملگه ردينه

چم گلب بگلب يرثيـك وِشچم عين مشبوحه
موعدنا اعله جسر الموت فوگه اجنازه مطروحه
__________________

خادم الحسين "ع
مرتجى الحسَّاني

نسألكم الدعاء ..

خادم الزهراء مرتجى الحسَّاني
https://www.tg-me.com/MM_lt5

ميمر ..


لا تعتـقـد ياهارون بالسم يموت الكاظِم

----------------------------


كاظم الغيظ ومِن يمِس احدوده
يـهلك مثل فرعون وي اجنوده
الله خِلَق شيـعـه إلـه موجوده

واللي يضد أهل البيت ماله ذِكر ظل دايم

--------------------------


بطاموره محجوب الضوه اعله عيونه
وحتى الهَـوى مـايعــــبر ايخـــلّـونه
اشگد مختنگ ( الله يكـــون بعـونه )

اِختار السجن والآلام بس مَذهَبَه ايظل سالِم

--------------------------


تحت الأرض والسجن صاير نعشه
صعبه يمـيِّـز ليله مِنّ الغبشه
وقُـرآنـه بالظَّلمه يردّ الوحشه

ذاك السجن مسجد صار خلّصها ساجد قائِم

--------------------------


بَـلَّـغ الشيعه اعله الجسر ميعاده
وحضروا أحبابه اعله الوعد كالعاده
وانگـلبت الفرحـــه حـزن ياساده

رد اِلنه ميِّت مسموم بأمر الرشيد الظالِم

--------------------------


صاح المُنادي اعله الجسر وين أهله
خل تحضر اتشد النعش وِتحملَه
ندري الإمــام إلاّ إمــام ايغســله

حال الرضا اشلونه اليوم فگد الأبو اشگد يالِم

--------------------------


طحنه اعله نعشه امن الحزن والصدمه
وِتـلاگت المرحومـه وي الرحمه
نكروا فضل جدّه ومقامه وعلمه

بس الله يأبى لهل نور مايطفه رغم الناقِم

-------------------------

خادم الحسين ع
مرتجى الحسَّاني
https://www.tg-me.com/MM_lt5

+964 785 482 4915

مولد الامام الحسين عليه السلام


مولـود عند الزهـره نـور الليله
وجبريل يم مهده إجه ايناغيله

شمحلاته شمحلاته يشبه علي شمحلاته
وجناته وجناته ابخيت اليشم وجناته

----------------------------


من صار ضم روحه الگمـر واتكتر

والنجمه خجلت لن ضواها اتطشّر

نور الله وجهه ومنَّه يبدي المصدر

نور الحُـسين امن اليشعَّـن أكـبر


من صار هَلهَل كل صبح لعيونه
والليل كحل اسود نزل بجفونه

ضحكاته ضحكاته چنها الصبح ضحكاته
وجناته وجناته ابخيت اليشم وجناته

-------------------------

وتزيِّـنت جنــة عــدن فـرحانه

سيدها صار امن الفرح خجلانه

والحسن من هسه فتح ديوانه

يستقبل اضيوفه وهَلَه واِخوانه


لحسين عطشان النهر وجروفه
والحور مشتاگه وتريد اتشوفه


نظراته نظراته صــورة علي بنظراته
وجناته وجناته ابخيت اليشم وجناته

---------------------------

وبالرابـــع بشعبــان يوم اصياره

وجه ابو فاضل من سطع باَنواره

هذا الخـبر لحسين أحله ابشاره

كلساع يدخل يسأل اعله اَخباره


عباس حتى ابمولده بي غايه
ماراد يسبگ جِدم أخيه بهايه

مرآته مرآته هوَّه الوفه ومرآته
وجناته وجناته ابخيت اليشم وجناته

--------------------------

بدر الهواشـــم والبَخَت والغِيره

يم طوله كل الدنيا اَحسها ازغيره

والكوكب الدُرِّي بسؤال الحيره

عجبـه الگمر بالگاع طالع غَيره


معروف طلعات الگمر بِسمانه
واليوم شـع امن الأرض مولانه


آيـــاتـه آيـــاتـه يترتّــلن آيـــاتـه
وجناته وجناته ابخيت اليشم وجناته

--------------------------

والخامس بشعبان أجمل بشره

بيها انولــــد رابـــع اَنوار العتره

واِنسـر علي وانشرح گلب الزهره

مَحلَه الوجوه الضاحكه المبتشره


السجاد مولانا الإمــام الرابع
للدِين نور وعل عوالِم ساطع

سجداته سجداته طاعه وشُكُر سجداته
وجناته وجناته ابخيت اليشم وجناته

-------------------------

مرتجى الحسَّاني

https://www.tg-me.com/MM_lt5

عندما جمع الإمام الحسين أصحابه وقال لهم:
أمّا بعد فإنّي لا أعلمُ أصحاباً أولى ولا خيراً من أصحابي ولا أهل بيت أبرَّ ولا أوصل من أهل بيتي فجزاكُم الله عنّي جميعاً خيراً ، ألا وإنّي أظنُ يَومنا من هؤلاءِ الأعداء غداً إلّا وإنّي قد أذنتُ لكم ، فانطلقوا جميعاً في حلٍ ليس عليكم حَرجٌ منّي ولا ذمام ، هذا الليلُ قد غشيكم فاتّخذوه جَمَلا ..
فكأني بهم يلبـونه بنداء واحد :
________________________

هـذا يالِـيـــل اليظـنّ اِنـعــــوفك
موتـه وحده اِنمـوت بين اچفوفك

عدنه موقف يرضيك
والله مانـغـــدر بيك
موته وحده انموت بين اجفوفك
____


گـلـبـك لا يظـل اِبشَـك روح او طمِّن اِخيـامك
نوگف ساتـر اونحميك بنصرنه انزخرف اَحلامك
لَـوَن بالموزمه العباس صار لـظهرك اِحـزامك
فدوه أنصارك السبعين كِـلـها اتطيح جِـدَّامك

كلمـــة الحـگ لا تراجِــع بيـها
والمبادئ ننـطي دمنـه اعليها

[ ومِن عدوَّك نِحميك والله مانغدر بيك ]
موته وحده انموت بين اجفوفك
____

تعاهدنه اوطلعنه براي بالطف ننـذبح دونك
الحمِل إحنه النشِيله اوياك خل يرتاحن امتونك
إبشـر ، ماتظـل محـتـار يابو اليمـه وِعيونك
أنصارك حبيب اِيگول : حلـفـوا مايعوفونك

لو رفــع ليـل المنـايا أَستـاره
ماتظـل بـاَغمــادهــا البـتَّـاره

[ كلنه بالدم نفديك والله مانغدر بيك ]
موته وحده انموت بين اجفوفك
___

كل صحبه وَكت وِتزول بس للموت صحبـتنه
اوهنياله اليموت اوياك يـاثـورة عقـيـدتـنه
إذا بالطف يعـز المـاي يطفح شاطي غيرتنه
العطش يخسه العطش يحسين (مايضعف عزيمتنه)

مِن وَهَب نفرض تِـطيح الرايه
تلـگـه عـابس بأول الـرمَّــــايه

[ وَحَّــدك مَـنخليك والله مانغدر بيك ]
موته وحده انموت بين اجفوفك
__

مثل جـيَّة محمَّـد جيت زِلتِ بنـــورك الظلمه
واِكرامـــاً إلـك يحـسين ربَّـك يكشــف الغمه
واِنتـه الگايل اعله ايزيد الْمـاخلّـه إلك حُرمه
سلام الله على الإسـلام لُـو بي تِبـتلي الأمه

أُمَّـتـك مِن الظلـم تـشكـيلك
فوت واِحنه بظهرك اِنتچـيلك

[ عالمهمَّه انواسيك والله مانغدر بيك ]
موته وحده انموت بين اجفوفك
___

رغم قِـلَّة عددنه اوياك بس ثبـتت مراجـلنه
وماشاغلنه عنك موت بس مَرضَاك شاغلنه
لو متنه اونرد انعيش عنَّك ماتخــاذلنه
وَلاعدنـه أبـد وَجهـين هاي اِحنه رسايلنه

بين اِديك او عل وعـد تلـگانه
وباجـر ايـوقعـها حـبرِ ادمـانه

[ كلشي تطلب ننطيك والله مانغدر بيك ]
موته وحده انموت بين اجفوفك
____


خادم الحسين ع
مرتجى الحسَّاني

للعليله ع

حَـنِّيت الك ياوالدي وِلْحضنك اشـتاگيت
كِلما تهِب نَسمة هَـوَا تِفتَحلي باب البيت

وامشيلك ابسَكـتَه ...حسبالي اجيت انته
( نسمة هَـوَا)
____________________


يل ماخــذ اوياك النِـدَه وميـبِّــس الورده
شِيلِمَّه يل عمـــري ابدرب هجرانك اتبده
بويه اليفارگله طفل غير البجي اشــعنده
گلبي انچــوه بنــار الهجر يـل ما إلك ردّه


أحلم تجي ها ماتجي وعيوني صوب الباب
حسبالي أحظى بشوفتك ثاري الهوا چذاب

يل يِتْـمِي مو وكته ..حسبالي اجيت انته
نسمة هوا
ــــــــــــــــــــــــــــــــــــــــــــــــــــــــــــــــــــــ

بصدرك أشِم امن الزغـر بس ريحـة الملگه
والرابي بحضانك عُـمر يســتغــرب الفرگـه
يابويه والله اجفوفي الك محتامه عالشبگه
يشبه حنانك ياگلب بالدنيـــا وين ألـگه


وين الگه حنـيَّـه ودفو تشبه تفاصيلك
ونتسامر بذاك الحچي تحجيلي واحجيلك

عطرك تنفـســته ....حسبالي اجيت انته
......نسمة هوا
ــــــــــــــــــــــــــــــــــــــــــــــــــــــــــــــــــــــ

يل كلشي بيه ايحن الك مشـتاگه لحضانك
كل مغرب امصلايتك اَفرشـــــها بمــچانك
بكلشي حلـو بس الهجـر مو حلوه بلسـانك
لوما بعيــــــده كربلــه جيت آنـه واحزانك


وأگعد واراويك الألم بعيوني هاي وهاي
يابويه كبَّـرني الهجر لمّن عفتني اهواي

كلمن اِجه البِـنْـته ....حسبالي اجيت انته
.......نسمة هوا
ــــــــــــــــــــــــــــــــــــــــــــــــــــــــــــــــــــــ

أدري الدمع مابي نفع من تخلـص احروفي
راح اطبگ اَبواب العتب وافتحلك اجفوفي
ياربي رد الغــالي إلي وبجـيته رد شـوفي
نظره حقيقية ردت مو نظره بــطيوفي


شلّي بعمر مابي أبـوْ ياحسرتـه اليـشتاگ
والموت والله أهوَن إلي وْلاعِيشن اعله افراگ

بس الأثـر شفته ...حسبالي اجيت انته
......نسمة هوا
ــــــــــــــــــــــــــــــــــــــــــــــــــــــــــــــــــــــ

من اســمعـت رد الظعـن كل حيــلي رد بـيَّه
رحـت اَركض ابلايـــه وَعي ملهــــوفه رجليه
شـافاني ابن حذلم سِـكت ظل صافن اعليّه
من شوگي ليش اتفاجئت گـتله او نزل لـيه


گـلِّي لَوَن عن كربلــه جيتي تسأليني
خوفي أجرحج بالخبر لا لا تجـبريني

يحچــيلي حلَّـفته ....حسبالي اجيت انته
.......نسمة هوا
ـــــــــــــــــــــــــــــــــــــــــــــــــــــــــــــــــــــ

ظليت ألـِـح گال الخبر خاف أحجي ويكتلِچ
هسه آنه من طف كربله جايب خــبر أهلچ
كلهم ضحايه اعله الثـره وبس الظعن ردلچ
لاعمِّــچ او لاوالــــــــدچ ريت الله يوگفلچ


بعون الله ياسيِّـدتي ايخففـلج الاحزان
بهاي المصيبه الراتبه يوگفلچ الرحمٰن

يالگلبي گطعـــته ...حسبالي اجيت انته
نسمة هوا
ــــــــــــــــــــــــــــــــــــــــــــــــــــــــــــــــــــــ


خادم الحسين ع
مرتجى الحسَّاني

خادم الزهراء مرتجى الحسَّاني
https://www.tg-me.com/MM_lt5

للعليله "سلام الله عليها

شيبي لاح وصار مِصباحي اغروب
وأفـز تـالـي الليـل فَـزَّت مصيوب
_____________________________________

أفـز واَلـگـه بداركــــم بس آثــار
ذكريـــات افراگ من دون أخبار
كلشي بعدك وحشه مايملي الدار
وگطره گطره اويه الشمع عمري ايذوب
شيبي لاح وصار مصباحي اغروب
___


أحس داري بلايا صوتك تـابوت
واليحبكم بيها كل لحظه ايموت
حال يونس طايحه ابَّطنِ الحوت
مدلي چف إيدك يوارث يعگوب
شيبي لاح وصار مصباحي اغروب

--------

هذا حالي اِبفَرگـتك واِنته اِتشوف
ظلـمه دنيـاي او گمـركم مخسوف
لون وجهي بدون وجهك مخطوف
ودمع عيني بليلـكم يطوي ادروب
شيبي لاح ...
____

بويـه مـا عنـدي بِسَــاط اِسليمان
حتى اَجيلَك وين عد الله امچان
عندي بس اِثنين سِـبحه او قرآن
لـ الله بيـهـن أتِّـجِـه بـالـمـطلـوب
شيبي لاح ...
_

دعـوه منـك يل دعـائـك مقبــــول
يگضي ليل الغربه والوحشه اتزول
الصبر مفتـاح الفرج كِلهـا اتـگــول
وانه ليش بوجهي مسدوده البوب
شيبي لاح ...
_

رايح او كاسِر شكو بعمري اَغصان
مِن چِنِت زهره او وجودك بستان
نهر وَصلك من يشح عل عطشان
زهرِتَـك تذبل عطش يل محبوب
شيبي لاح ...
__

أدري بيَّه اتحس مِثِل ماحس بيك
لْـياوكت تبقــه العـليـلــه اتـَّــانـيك
مايهـون اعلـيه للـمـــــوت أنطـيك
بس رضيت لخـاطرك بـالمكـتوب
شيبي لاح ...
_

فدوه طمِّـني بخـبر خل أرتـاح
بلكي عني اهموم هجرك تنزاح
تره الحيل الچان بـِوجودك راح
مثِل حيل أمك الزهره المتعوب
شيبي لاح ...
_

بويه مادامك عدِل آنه بخـير
وِبســلامتـكـم أفـكِّــــر لا غير
صرت بَعدك أخف من جنح الطير
وحلمي بالفرگه اعله بابك مصلوب
شيبي لاح...
_

خادم الحسين ع
مرتجى الحسَّاني
https://www.tg-me.com/MM_lt5