للحسين ع..

وَيْ ذكـرى عاشـورك ألـم تتـفَـتَّــح اجروحي
لو نفرض انسَد مأتمَـــك أنصب عزه بروحي

وابچيلك شْعِندي دمِع حدما خِيَامَك تقـتـنِع
حسيناه حسيناه
________________________________

أوِنْ وادري الدمــع مايطـفِي نِيـرانك
وَلا يگــدر يِبــرِّد جمــــرة احــزانك
النهـر ياوسفه ماحَـنْ اعله رِضعانك
يِروي اخيـول أُمـيَّه اويابس إلسانك

رادَك تِـمُــوت امن الظِّمَـه وْينسونك احبابك
مايدري ظل حتى الذهب ساجِد علَه اعتابك

وأُمنيته يِتحوَّل شمِـع حدما خِيَامَك تقـتـنِع
حسيناه حسيناه
__________________

أســـافِـر وَي هَـوَاك بعــــالَـم الخدمه
واشـمَّـك ياعطر من بين ألـف نَسـمه
حِـلِم لو خنصرك للچف يِـعود إسـمه
وارسمك مو ذبيـح وراسك بجسمه

أُمنيتي أَعيش بـعـالَـمَك ماشُـوفَك امسَلَّبْ
وْما أسـمع بطاري السَّبي بس بإسـم زينبْ

وْللشام إسم ماينسمِع حدما خِيَامَك تقـتـنِع
حسيناه حسيناه
__________________

يِمُـر اســمك جرح واتـذكـر اخيـامك
مِشتعله اوتِـفُـر من خـوفـها أيتـامك
اوياخذني الخَـيـال لســـاحـة آلامك
حدر الخيل واسمع كسرَتْ اعظامك

مِتـزاحِــــم اعلـيك النَـبِل وِعلـه الألم صابِر
مَدِّيت سفرة كربله ومارجَّعِت حـافِر

خَلِّيته يسحگ عالضلِع حدما خِيَامَك تقـتـنِع
حسيناه حسيناه
__________________

جُرُوح الدنيا تسجد يم جـرح فـگـــدك
وأظـل أبچـيلك ابگد ماعِطَش چـبــدك
أشــوفـك تِـلـتـفِـت وأنصـــار ماعِـنـدك
هضيمه ايطيح أبو الغِيره وتظل وَحدك

مِتحـاصِر وعــينك بُـقـت مشــبوحه لَـعـيالك
وانته عله روحك ماخِفِت خايف على اطفالك

گلبي اعله حالك مِنفجع حدما خِيَامَك تقـتـنِع
حسيناه حسيناه
__________________

يحسين اليحب من گلبه .. مـا ينـسه !
او رِمَاح افراگك بنص گلـبي مِنْـغَـرسَه
الْگِضَه عمـره بخِـدِمْـتَك شِـلَّـه بالوِنسَه
الْحَوَاس الخمسه ٱلَك ياخامس الخَمسه

حگها المنـــابـر بالحـزن تُـرفَـع شـعـــايرها
لَن الذبيــــح إبن النـبي كاســر خواطـرها

مَـد حِزنَك ايظل يِتِّـسِع حدما خِيَامَك تقـتـنِع
حسيناه حسيناه
__________________

أويلي اشْگد حِمَـل گلبك جُروح او هَـمْ
سلام الله اعله جسمك وانته تنزف دم
يلِ مْـگـطـع وِذَر يشـــفِـيـك يـا بَـلـسَـم
ابوكت چـان اليمــوت اويـاك ماينـــدَم

جيت بوكت چان الظلُم مِستـعـبِد الوادِم
كل الفضِل يرجــــع إلك إنته وگمر هاشم

يل صاين احكام الشَرِع حدما خِيَامَك تقـتـنِع
حسيناه حسيناه
________________

خادم الحسين ع
مرتجى الحسَّاني
https://www.tg-me.com/MM_lt5


07854824915

نخوة أم وهب لولدها وهب

[ ياوَهَب يبني   مـو زَرَع بَـطـنِـي   اليترك حسين ]
[ لاتـعِز روحك   وٱنـثِـر اجروحك   بِل مـيــــادين ]
_____

گوم شِـد الرايه فوگ امـتونك اشـراع
هاي ساعتها واحشــمك إنهض ابساع
يبني گِص الروس واترس بيهم الگاع
ياسبِـِع وكت الكـــلافه اتـبـيْنِ ٱلِسـباع

[ يمه دِگ صدرك  واترك بظهرك    عرسك اوروح ]
[ إحمِل الرايـه   واكسب الغايه   بدم الِجـروح ]
_

يل وِصِية أمك حِـرز شِدها اعله يِمناك
ما أعـذرك إلاّ اشــوف ابطولك ادمـــاك
عوف كلشي حسين بالطف يبني ناداك
رُوحله وطيح اعله جِـدمه وگِله عيـناك

[ گِلَّه طوع اَمرك   وانه أشِد أَزرَك    إنطي شيريد ]
[ روحك افديهـا     لا تعِــــز بيـها     يـبني ياحـيد ]
_

لاتقـصِّر وي أمامك بالدمه إفدِيهْ
حته أشـــــوفه بوجـه أبيـض من ألاگيهْ
حســـين نِگـطَة حَـيَه ابگصْـتـك لا تِبدِّيهْ
لَـوَن بي ضـاگ الهـوه من صـدرك انـطيهْ

[ إبرز وقـاتـل   مِثل ابو فاضـل     دون الِخــيام ]
[ يبني لَتسالِم   بس بني هاشم      ترفـــع الهـام ]
_

روحي ظَلمه وتضحــياتك بيها نبراس
وقِدوتي أم البنيـن او اِنتــه عبـــاس
كل محرَّم بِسمي تبقه اتسولف الناس
أم وهب ضحَّت بِـبنها ورُفـعَـت الراس

[ بيك أريد أفخَر  واِسمي خل يكبر   صِيته كل عام ]
[ آنــــه نــاذرتَـك   فدوه قـدَّمـتَك    لجل الإسلام ]
_

يبني كلمن مشه بدرب حسين ربحان
والنِـزل مِن السَّـــــفِـينه يبـقـه نَدمـان
گـوم حظّـر هُـوســتك وانـزل الميدان
آل هاشـــــم ـ مـا تبــايع ـ آل سُـفيـان

[ يبني طُبلهم     هيجي گـللهم     سـاعتك هاي ]
[ مانبايعـــكم      بل نقــاتلـكم      والنَصـر جاي ]
_
 
لا يخوفـــونك ييمـــه بكــثـر الأعـداد
إشـتـِـعِـل بالغــيره نـار اوذبهـم ارمـاد
أرد اشوفك ريح صرصر تعصف اعناد
وتِنحسِب باجر ٱمن أنصار ابو الســجاد

[ إنتـه وانصــاره    شِـنَّوا الغَـــاره    لا ترجــعون ]
[ يبني من توگَــع   لجله بالمصـرع   دمَّك ايهون ]
_


خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

للعليله "سلام الله عليها

شيبي لاح وصار مِصباحي اغروب
وأفـز تـالـي الليـل فَـزَّت مصيوب
_____________________________________

أفـز واَلـگـه بداركــــم بس آثــار
ذكريـــات افراگ من دون أخبار
كلشي بعدك وحشه مايملي الدار
وگطره گطره اويه الشمع عمري ايذوب
شيبي لاح وصار مصباحي اغروب
___________

أحس داري بلايا صوتك تـابوت
واليحبكم بيها كل لحظه ايموت
حال يونس طايحه ابَّطنِ الحوت
مدلي چف إيدك يوارث يعگوب
شيبي لاح...___



هذا حالي اِبفَرگـتك واِنته اِتشوف
ظلـمه دنيـاي او گمـركم مخسوف
لون وجهي بدون وجهك مخطوف
ودمع عيني بليلـكم يطوي ادروب
شيبي لاح ...
____________

بويـه مـا عنـدي بِسَــاط اِسليمان
حتى اَجيلَك وين عد الله امچان
عندي بس اِثنين سِـبحه او قرآن
لـ الله بيـهـن أتِّـجِـه بـالـمـطلـوب
شيبي لاح ...
_____________

دعـوه منـك يل دعـائـك مقبــــول
يگضي ليل الغربه والوحشه اتزول
الصبر مفتـاح الفرج كِلهـا اتـگــول
وانه ليش بوجهي مسدوده البوب
شيبي لاح ...
_____________

رايح او كاسِر شكو بعمري اَغصان
مِن چِنِت زهره او وجودك بستان
نهر وَصلك من يشح عل عطشان
زهرِتَـك تذبل عطش يل محبوب
شيبي لاح ...
______________

أدري بيَّه اتحس مِثِل ماحس بيك
لْـياوكت تبقــه العـليـلــه اتـَّــانـيك
مايهـون اعلـيه للـمـــــوت أنطـيك
بس رضيت لخـاطرك بـالمكـتوب
شيبي لاح ...
_____________

فدوه طمِّـني بخـبر خل أرتـاح
بلكي عني اهموم هجرك تنزاح
تره الحيل الچان بـِوجودك راح
مثِل حيل أمك الزهره المتعوب
شيبي لاح ...
_____________

بويه مادامك عدِل آنه بخـير
وِبســلامتـكـم أفـكِّــــر لا غير
صرت بَعدك أخف من جنح الطير
وحلمي بالفرگه اعله بابك مصلوب
شيبي لاح...
_____________

خادم الحسين ع
مرتجى الحسَّاني
https://www.tg-me.com/MM_lt5

07854824915

للقاسم عليه السلام

جاسم طالِـع مِن اِخيامه .. لو فِلْقَتْ قَمَر
هذا مَلَاك وْفوگه اِعمامه .. لو فِلقَت قمر

سُبحـان الله وَجهه اشمحلاه
هذا مَلَاك وْفوگه اِعمامه .. لو فِلقَت قمر
___________________________________

لابس هندامه ويتبختر وِمن اِلثامــه ايشع النور
طالع ينصر عمَّه ودِينـه وِالغِـيره بشـريانه اتفـور
شاب وخلَّه الدنيا بظهره من نادى حسين بعاشور
گام ولـبَّه الدعوه بروحه حَل وكته ليومه المذخور

فك صدره لموتَه وماخايف .. عمره اَثلثطعش
فدوه لطوله وريجه الناشِف ..عمره اَثلثطعش

تـارك دنيـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
_______________________________

يافـارس يوگـف جـدَّامه وهاجت نخوة هاشم بِيهْ
وصعدت نار الغِيره براسه وكل ماي الشط مايطفِيهْ
صاح اِبشر عونك ياعمي حِملِ اليكلَف ذبني اعلِيهْ
موقف عندي يگر عيونك بس لَوليدك رخصه اِنطِيهْ

ياسبـعـين اتكـفِّي لســيـفي .. وآنه اِبن الحسن
اليوم اَحكم والحومه بكيفي ..وآنه اِبن الحسن

يزهر لاگـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
_________________________________

شكــراً ياجاسـم يولـيـدي باسه براسه وشمَّه حسين
بعدك گله ازغير اعله الطف وين اِنته وهَل وادِم وين
مو قصدي اَستنقص من قدرك بس خوفي اعليك امن البِين
اوشِيصبِّـر أمك بفـراگك وِلْـطولك مشبوحه العين

گـلَّه أمي الشدتلي اِحزامي .. وحطَّت لامتي
گالت دمّك يضوي اَحلامي .. وحطَّت لامتي

ودِمعَتْ عينـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________________

للحومه اِسترخَص من عمَّه والموت ايصدلَه وخجلان
اِزغير وبس عد الله اشكبره چَـن آيــه بقـلب القــرآن
مابالِـغ حِلمــه امن اسـنينه بس بالـغ ضَربِ الفرسان
لاگـه الموت املاگه الطِفْلِ لْـصدر أمَّه لو حَس عطشان

فرحان بمـوته ومستبـشِر .. بي هيبة علي
ومن عين الحاسد متنكِّـر .. بي هيبة علي

يخسه العـاداه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________________

سوَّه اَفعال اَكبر من عمره طب وداس اعله الممنوع
وبنص عـدوانه الغـــداره دنّـگ شَد نَعـلَـه المگطوع
ومن عرفوا يستهـزء بيهم وَاصبَح بي ذلَّه الموضوع
گالوا هذا الشاب انـغدره وْگلب أمَّه انخلِّيهْ مفجوع

او رَد لخيامه ودمّه بطوله .. والشمعه انطفت
وماتت من بعده الـهلـهوله .. والشمعه انطفت

مـيِّت جابـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
__________________________________


خادم الحسين ع
مرتجى الحسَّاني
https://www.tg-me.com/MM_lt5

لأبي الفضل"ع(( العباس سر الحياة ))

نـعرف سر حيـاة الكون بالماي
بس عباس جوده اتكفَّـل بهاي

صاحب موقف اِيماني خلَّه بجوده سر ثاني
عباس عباس
____________________________

لـغـــز ماينـحــزر كـ بـاء البســمـله
مقـاتـل عن ألــف تعشگه المرجـله
نهر شـــــايل نهر لَهسه ومـا خِـلَه
يفيض امن الوفه سبـيـل بكــربله

لُـو من جـوده توگـع گطره عل گاع
بُحيرة اتصير (لِلظامي وِفَه) اِمتاع

حكمه بلطف ربَّـاني خله بجوده سر ثاني
عباس عباس
__________________________

رســـول المشـرعه بذَل كل غـايته
لَحـد آخــــر رمَـق يواسي لخـوِّته
وَفِيْ وصاحب گلب عجـيبه امروِّته
النهـر كلمـا نِگص أخَذ من جربته

أخو ونعم الأخو گـد الوفـه چان
بين إيده الفرات وچبده عطشان

لجل الخوَّه متفاني خله بجوده سر ثاني
عباس عباس
__________________________

العطش يخسه العطش أبو فاضل نهـر !!
مثل موسى النبي إذا طگ الحجر
لْــعـظَمته تنـفجــر ينـابِيـــع الدهر
ويظل يشرب وفـه شكو بالدنيا بَـر

لاكن هايه چانت سهله وِتهـون
لَبو الســجاد فَجَّـر ماي العيون

درس عن خوِّته اِنطاني خله بجوده سر ثاني
عباس عباس
__________________________

مثل خطفت بَصر يجــاوب بـس نعـم
أشوفه اعله النهر واَشوفه اعله الخيم
الخيم تنگــع نِـده إذا ثـغــره اِبتـسم
يطيح اعله الجرح وَلا يـتــــرك ألـــم

يِتـلاشه العطش لو عل خيم لاح
وزينب كل تعـبــها بوجهه ينـزاح

الْيصدلَـه يخجل ايعاني خله بجوده سر ثاني
عباس عباس
__________________________

شمس يلهب غضب گمـر يسطع وِفه
تـرك بالطـف أثَــر يسولف موقـفه
عگب ما لامِـسَــه بالِمـروَّه اكـتِـفه
لَهسـه العلـگـــمي يِنعـتـونه شِـفَه

لأن لامَس يمينه بي شِفَـه صار
تِطأْطأْ حدر جدمه ايقدِّم أعذار

اوْيگله اشربني شِمتاني خله بجوده سر ثاني
عباس عباس
_______________________________

خادم الحسين ع
مرتجى الحسَّاني
https://www.tg-me.com/MM_lt5

تقول مولاتي زينب ع

أَمِـدّ اجفوفي• بس عني ابعيد النهر
عَلِيك اعتابي• يل كافل مو عالدهر

أريد أعتب•واَسمعنك• واذكرك بِالْوِعود

_______________________


يل على الشاطي
امگطعه اجفوفك لجل أشرف وَعد

حالي يشكيلك
يابو فاضل مـا إلي غـيرك أبـد

يا أخو عيوني
صدگ ماتنظر وجه زينب بعد

طيحتك صعبه
والْخِيام اتطيح لو طاح العمَد


يراعي الغيره • مسموح اوياك العتب
أصيح ادخيلك• وإنته بلاصوت شعجب

حزن روحي وعتب كلبي على افراكك يِزود
أريد أعتب واسمعنّك واذكرك بالوعـود

ـــــــــــــــــــــــــــــــــــــــــــــــ

خيمتي احترگت
واحـترگ خدري او أصيح امـروّتك

إلحگ اعله اختك
ضاعت أطفالي وضعت وي ضيعتك

تعـتـــــــذر مني
وماتجــــيـني او خدري ينطـر فزعتك

اشگد صحت خويه
كلمـة الخــوّه اشــــعـجـب ماهـزَّتك

غريبه وحالي يشرحلك يابا الفضل
عگب چفينك شدَّوا بجفوفي الحبِل

وبقت عيني على الرايه يخويه وعل زِنود
أريد أعتب واسمعنّك واذكرك بالوعـود

ــــــــــــــــــــــــــــــــــــــــــــــ

الماطلع حسها
تمشي وي چتّالك ابذاك الدرب

خويـه ترضــاها
أدخــل بنص الـدواوين الغرب

عاين امتــــوني
وَرِّماها السوط من كثر الضرب

والله ماعوفك
يابو فاضل بس رحت عنك غصب

وداع الغــربه ودعـتـــك ياكافلي
جِنت مِن أنسه بيك أَشـتَم ريحة علي

انطحن عمري برحى الغربه ودمعتي بلا حدود
أريد أعتب واسمعنّك واذكرك بالوعـود

_______

لحظت اوداعـــك
تدري صعبه اعـليه وآنه اميـسره

من على المحمل
خويه ودعـتـك يســــــبع الكـنطره

أدري بعــــــتابي
ألـچـم اجروحك واصيــح المعـذره

خويه شــــافوني
أشكي والعَـبره بدليلي امكسره

جنت مصيونه اوطولي المحّد شايفه
رحت مجتوفه وِعله اعيالك خايفه

عگب ظلّك يبو فاضل بالِچفوف القيود
أريد أعتب واسمعنّك واذكرك بالوعود

ـــــــــــــــــــــــــــــــــــــــــــــــــ

آنـــه عـاذرتــك
والله عاذرتك گبل لاتعـتـــــذر

والكســــر گلبي
يابو فاضل بالظعن يحدي الشمر

أمشي لو تنهض
جاوب إختك كلمـه منك تـنـتـظر

إلخــــــدر غالي
هـالله هـالله يابو فاضل بالخــــدر

ينور اعيوني وَدَّعتك بالله ورحت
دحِـن الحـالي وبعـينك ليه إلتـفِـت

گلت لازم أعذرنك بعـــــد لا ما تعـود
أريد أعتب واسمعنّك واذكرك بالوعود

ـــــــــــــــــــــــــــــــــــــــــــــــ

خادم الحسين (ع)
مرتجى الحســاني

https://www.tg-me.com/MM_lt5

يابو الفضـل يشــهدلك السـابِـع
چفَّـك لِـگـــوهِ اِبـرايـتَـك طابِـع
_____________________

سِر الأعظم بيهـا لو شَمرَتْ حرب
يل يمِـينـك خلَّت بخصمك رعُـب
وسَطْرِتك چانت تِـرَجِّف كل گلب
ريح صرصر بالحـرب لمَّـن تطب

ياغِيره من صَدرِ الشرف راضِع
جـفك لگــــــوه ابرايـتك طابع
______________________

رَفرِفَـت فــوگ الظـعــن لـمَّـن طـلَــع
وشرف عهـدِ الخـوّه عالـرايـه انطـبع
أخــذ صِـيته العلگـمي منهـا او قِـنـع
وإنته صِـيتك للسـمه السبـعه اِرتـفع

تخـدِم أخوك او إنته مِتواضع
جفـك لگــــــوه ابرايتك طابع
_____________________

ويوم سابع من محــرم من تـرِف
يبدي نفخ الصُور عل سبعين ألِف
رايـه كلفه اوشـــالها فـارس كلِـف
آيـه قُدسيـة او شمس ماتـنكسِف

مو رايه (آيـه) ابيمنـتك رافِع
جفـك لگـــــوه ابرايتك طابع
_____________________

عن وَفـائـك بيـها ظـل طابـع أثـر
وخدر زينب مايشم نســمة خطر
من ترف چانت علامه اعله النـهر
اتگـول بعـده بخـير عبـاس الگمر

وي رايتك شِفتك نجم ساطِع
جـفك لگــــــوه ابرايتك طابع
_____________________

رايتـك وكت العطش تِـنـزل نِـده
عل خيـــم واَعظم لـهيب اتبـرِّده
اوياك تِـنـهـيـهـا بنـصر متعـاهده
بـزود عل رايــات صارت سَـيِّـده

والفخـر كِـلَّـه لموقفـك راجع
جفك لگــــوه ابرايتـك طابع
_____________________

حسين چانت عنده أعز امنِ الهَوَه
نبـض گلبـــه ورايـتـك رفَّـن سـوَه
ظامي، بس بجربـة اوجـودك رِوَه
العطش عِلَّه وشوفتك بالطف دِوَه

واِنتـه النهـر يـم خـوِّتك راكـع
جفـك لگــــــوه ابرايتك طابع
_____________________

إلـها حـتى اِعـداك ظـلَّت ترتجِـل
من طحت واتبدَّد بغربـــه الشمِل
جابوا الرايــه اوصفن بيها النـذِل
صاح ( أَبَيْتَ اللَّعنَ ) يا أبا الفضِل

لآخر نَـفَس عن دينك اتدافع
جفك لگـــــوه ابرايتك طابع
_____________________

خادم الحسين ع
مرتجى الحسَّاني
https://www.tg-me.com/MM_lt5

لايزال ذلك الجرح العظيم فينا يتوقَّد ألماً وحزناً وحماساً على الحسين (جرح عاشوراء)

بعيوني طفّ امن الحزن بي صوت أَبو مْسافِر
وِتـهِـل مواعِـيــــد الألـم وَي لـيلـة العـــاشِر

عِشت العـمُـر خيمه وجَـمُـر
وي ليلـة العــاشر
__________________________

أرد ارسم الطف وأنچـــوي بِمـصــيـبته ونِيـرانه
وحسين واگـف بالحــــرب ايزف للمنايا اخوانه
بْداخِل الْخيمه ارسم ضوه زينب لچن حـزنـانه
والجـيش دايِـر عل خِـيَــم وِيصيح ابن مَرجانه

لا تَبقـوْا لَهل البيت أَهَل كِلهــم إقِـتلوهُمْ
خَلهــم ينـادون العَطش لا لا ترحمـــوهُمْ

[ شَّب الغدُر خيمه وجمر وي ليلة العاشر ]
_____________

أَسمع رَكُض خيل وهَضل والصـوت تارس بـالي
ثـاريهـا ابو الأكـبر وِگـــع اوظَل المُخـيَّـم خـالي
وِبعـشر خـيــاله انْـطحَن صَدر اِلحـسين الغالي
ظلِّـــيت أنـوح ابلا وَعـي والـزهـــره تِـتــراوالي

تِـنعه اوصدى ابچاها يِـرد آ يبـنـي آ يبـنـي
فگـــدك طَعَـن گلبي برمح وِبجرحه عذبني

[ جَرّعني مُـر خيمه وجمر وي ليلة العاشر ]
_____________

رِيجـي يِـبَس وتفَطِــرَت مِنّ المُـصيبه اشــفافي
گالــوا أبو فاضل وگــــع وأركضله بالطف حـافي
بس شِفته حاضن رايته ضَمها اعله صدره وغافي
يم الجُـرف كاتب عــذُر يحســــين إلك مـاوافي

أم الـبنــين اتـعـــــــنـتـه والزهـره يم راسه
عَفيه إبنـي عباس البِذَل للـخـوّه أنـفـــاسه

[ نِلت النصر خيمه وجمر وي ليلة العاشر ]
_____________

من أَلـــم زينب جَمْـــرِتي والمــاي مـايِطـفِــيها
بركـان تتحــــــــــوَّل إذا عاشـــــور مـر اعليــها
يحسين كلمات الشـــعِـر مـا أُوفِـي حگك بيـها
يلباقي جسمك بالشمس حتى الخَدَم تِحمـيها

يل عيشتني بعـالمَـــك خادم وأعَـزْ خادِم
لو إنته تِقـــبل خدمتي شيهمـني بالـوادِم

[ ليك العذُر خيمه وجمر وي ليلة العاشر ]
_____________

ياكـربلـــه بوكت المحـن عن زينب اتخــلِّـيتي
من فارگَتْ عزهــا الزلم عن عـزها ما حامَيتي
طشَّرتي شـمل العـــايله وْبآل النبي اشسويتي
احسين مُصلِح طب إلچ وانتي عَكِس طَبيتي

أتمنــيـتج اتفــزعين إلـه من حرگوا اخيامه
وي زينب اتلِمِّي الحـرَم من ضاعت أيتامه

[ بالـبر تِـفُـر خيمه وجمر وي ليلة العاشر ]
_____________

أَنظر المهـــدي اوْدَمْعِـته دم تنزل اعله خدوده
يحچي اويه زينب عمِّــته أيّـام ، بس معــدوده
واَرجــــع برايـــات النصر والعـــز يرد لحدوده
اوْ تـتـبـدَّل جروح الســبي خير او أمل بِوجوده

كل جُمْعَه ياروحي صِحِت عينـچ على الرايه
لازم يِجـيج اعله الوَعــــد وِيشَرْف الـ اولايه

[ راعي العصر خيمه وجمر وي ليلة العاشر ]
________________

خادم الحسين ع
مرتجى الحسَّاني

07819457321

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

         أم الگمـــر صَلَّـت ركـعــتين
         نِيـابــةً عن ظـعـنِ الِحْـسين

فرض الوفَه اِيصلّون وَصَّـتهم ايضَحُّون
نيابة عن ظعن الِحسين

_____________________________

وِصِيتي
گبل يوم السَفَـر .. لَخُـوتَك يل گمــر .. وِصيتي
ردت منكم وَعَـد  .. توقـعـولي عهـد .. وِصيتي

إحســين اخوكم واجب اتضَحُّولَه
وبديـرة الغــــــــربه دِرِع صِـيروله
دنگــوا خَجـل لا توگفـون ابطـوله
بس سـمـعاً وطوع أمرَك اتگولوله

من يحچي صِيحَوا صار مولاي
الشّـــور شورك وانته ابو الـراي

[سِمعُوني من تمشون وَصَّـتهم ايضَحُّون]
              نيابة عن ظعن الحسين
_____________

                       يعباس
تعال اگرب إلـي .. يبن غِـيرة علي .. يعباس
أمانــه برگـبتك .. أُخـوك وعيلتك .. يعباس

لا تِـنســه يل غِــــيرة أبـوك براســـك
إِسـمع وِصيتي وضمها بين احساسك
لو ضاگ بحسين الهَوَه ٱنطي انفاسك
انته الفخـــــر لَـمَك وأبوك وناســـك

عنك أريد اتسولف الناس
ماكو مِثِـل خـوَّة العـباس

[ وانه اَدري مَتقصرون  وَصَّـتهم ايضَحُّون]
              نيابة عن ظعن الحسين
_____________

                     أريدك
تِطـرِّز كـربلـه ... وفــاء ومرجـلـه ... أريدك
إذا يعطش ثَـغَـر ... تِصيرلهم نهر ...أريدك

شِد حـيـلك اوشِدّ الظعـن وتأَهَّـب
وٱثْـنِـي رُكبتَـك لَمّن اختــك تِركب
لَحسـين عين اوعين ضُمها لزينب
لَيـغُـرَّك المـاي اوگـبـلـهم تِشـرَب

لا تعطش اختك وانته موجود
ماعِـــذرك إلاّ بگـطع اِلِــ ازنود

[بوجه ابيض اتردّون وَصَّـتهم ايضَحُّون]
               نيابة عن ظعن الحسين
_____________

                      يروحي
يعثمان استمِع ... إخذ ثار الضلع .. يروحي
جبل لا تنـهـدِم ... أســد لاتنـهزِم .. يروحي

يوليدي يابعـد اِلـِ اعـيـون اليِضْـوَن
عينك لَـخــوك الدنـيــا مـا تـتـأمَّن
إِنـزِف اشما عـنــدك وِفَــه وِتـفَـنَّن
خل كربلـه بـدم منحـــرك تِتـلـوَّن

للخوّه اريدك ثاني عِنوان
إنته او أبو فاضل يعُثمان

[ بالشمر لَـتفكرون   وَصَّـتهم ايضَحُّون]
             نيابة عن ظعن الحسين
_____________

                      يجعفر
أريدك بالحرب .. تِذلهم من تطب ..يجعفر
ترفعون اللوَه .. وتسِـــدُّون الهَوَه .. يجعفر

واعِدنِي بالطف تِـفدي أخـوك بعمرك
گبل ابنــه الأكبـر بالحرب مِد نَحــرك
طُبـلـهم وعبــد الله يِســــنِـد ظهـرك
امْنِ الْخوف خَلِّي الگاع ترجِف حَدرك

ٱمن اربع جهات اتحِيطوا بحسين
خلفـه او أمامــه ايســــار وِيمين

[ بالمعركه اتطيحون  وَصَّـتهم ايضَحُّون]
            نيابة عن ظعن الحسين
_____________

                      رســـاله
يعبد الله الدِمَه .. إبعـثه لفاطـمه .. رســـاله
عليها امْوَقَـعَـه ... مناحِـر  أربعـه .. رســـاله

عبد الله يبني اتحزَم اويه اخوانك
جاهد بسيفك من تطب وإلسانك
رد ثار حـيــدر واخذه من عدوانك
لَـتخـلي چـف الشَــر يمِـس قـرآنك

أرد افتــخر بيكـم يل أولاد
گدام أخوكــم أبو السـجاد

[ للغـالي دمنه ايهون  وَصَّـتهم ايضَحُّون]
             نيابة عن ظعن الحسين
____________

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

لـ علي الأكبر "عليه السلام


من غَـيِّمَت دنياها طبها علي او صفَّاها

____________________________


أَرخَصلَه أبـوه او گلّه روح إكسر عزمها
وخلها تِـشـوف الهاشــمـيين وزلمــها
إگـلُبــها ليـل اوطيِّــح ابچفك نجــمها
ضَيِّع ذكرها امن الاَرض وامسح اِسمها

وصدرِ بصدر لاگاها طبها علي وصفاها

____


تبدي القيامه بسيف چفك من تطبهم
لِمهُم حطب خل نارك اتشب بحطبهم
كِضهُم ومن اصــدورهم طلّـــع گلبهم
گطْعِ الرؤوس وخل يرجعـــون برگبهم

نار الحرب شبَّاها طبها علي وصفاها

____


هز رمحك وصب الغضب فوگ آل اميه
واخنگــها من اَربع جهــــات الغـاضريه
چف الله چفك وانته ابن حامي الحميه
جـيب ابيمـــينك راس ابن غانـم هديه


وجيب النصر ويّاها طبها علي وصفاها

____


صيت الحرب يم سيفك اتواضَع قدرها
وِمأَمنَّـه احــــدودك ولافــارس عُـبرها
هاشم تِريدك تعلِن اعله الشط نصرها
كض الشِريعه ابيمنتك واكسـر ظهرها

والزلمه خل يدناها طبها علي وصفاها

____


گِـلهم يالاَكبر ماكو شرده اليـوم مني
وينه اليسد ماي النهر وِيمنعَـه عني
سـبعين ألف عدكم بعد لو هِنّه ذني
خل الكتـايب بالحــرب كلـهن يِجَّـنِي

يمناها مِن يسراها طبها علي وصفاها

____

خادم الحسين "ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

"مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ.."
لسان حال الأنصار يخاطبون الحسين "ع
---------------------------------


كربلـه نادتنـه واِحنه اِرجالها
گبل لاتـنـخـانـه نتـعــــنَّـالها

**

گبل لاتنخانه وبـ(حيهم )تصيح
وَهَب بالميدان گبل الحر يطيح
بكربله مِتخاويـه اِسلام ومسيح
حسين عدنه الدنيا موش بحالها

***

فتَّحت بـيـبانها الجنّه اوتگول
ياهلا بأنصـار حيـدر والرسول
اشما تطول الحرب خلگ الدم يطول
الگاع تترس من كرَمنه اسلالها

***

واحد وسبعين فارس بين اِديك
ننطي دم واَرواح مانبخل عَـليك
شفنه بيك القبله وِتوَجَّهنه ليك
بلا رضاك الناس مـيته اعمالها

***

إنتـه زمـزم خل يســدُّون الفرات
لو عطشنه بعينك انشوف الحياة
المات لجلك هذا مايتسمَّه مات
صيته رايـه وچف محـــرَّم شالها

***

دمنه للحـگ مثل بركان او يفور
وللشهاده اوياك مبتشره النحور
ثايـه مِنّ امخيّمك تسوه القصور
والمـلائـك ماسكـين اِحبـــالها

***

خَـيَّـرِتنه، وماقِبلنه اِتـظل وَحيد
إلّا نخــــلط دم وريد بدم وريد
نيَّـه وحده والهدف واحد أكيد
والتـخــــذلك الله مايـبرالـها

***
اليوم نـثبت عل عهد والإلـتزام
اوياك عالصعبه وسِلِم وكت السلام
إحنه نِنـزل عاليضد شـرِّ انتـقام
وندحـر اعداك او نِگطْعِ اَوصالها

***

اِنطينه كلمه او لازم انوفّي الوعود
وإحنه من انگول ماحاجه لشهود
بيك منتـصــرين للجــنَّه نعـــود
هاي غـايتنه او نعيش لـجـالها

***

خادم الحسين "ع
مرتجى الحسَّاني
https://www.tg-me.com/MM_lt5

كان الامام الحسن "حاضراً روحاً في كربلاء مع أخيه الحسين "عليهم السلام


يل تگول الحسن غايب واهِم
سيف چان ايلوح بيد القاسم

***

غِـيرته بجاسم زرعها اوطگّت افياي
عل حُسَين بيوم منعوا يوصَلَه الماي
چان صح ازغير والطف أكبر اهواي
زوده أكبر من عمرهم واَثـبَت بهاي

عمـره وي ارگابـهــم متوالِـم
سيف چان ايلوح بيد القاسم

***

تَعَـب عل دِين بكثر ماتاعِب اعليهْ
كبَّـر إبنـه او راد بالطف يفتخر بيهْ
وجاسم ايگلّه بمحرّم تعبك أُوفِيهْ
مايظل ظامي الزرعته بدمي أرويهْ

گـلَّه ماترجـــع أريدك سالِم
سيف جان ايلوح بيد القاسم

***

الحسن ما غايب أبد عن نصرة حسين
روحه چانت حاضره وماشافته العين
وجاسم امن اَفعاله ماخذ چان ثلثين
ومن تصدهم بالحرب ماچنهم اِثنين

الحسن چم ثلمه بركنهم ثالِم
سيف جان ايلوح بيد القاسم


***

فضل عالثوره او نصرها چانت اِدماه
وروحه خطوه بخطوه تحدي لكربله اوياه
وخاف مايبقه لمحـرَّم إبنـه ضمّاه
لجل أبو السجاد يفدي بنحره وصَّاه

وي عمامه ايشن حرب وِيهاجم
سيف جان ايلوح بيد القاسم

***

اشلون أخوهْ بالغربه وَحده وگلبه يرتاح
بوجهه چف الموت بالطف شاهر اسلاح
نبضت الغيره ابـوريده والكــرم فـاح
اعقول چانت قافله وسيف إبنـه مفتاح

الدِين باقي بفضل هذا الصارِم
سيف جان ايلوح بيد القاسم

***

هدَف واحد چان هَمهُم حفظ الاِسلام
وحتى إسمه ايظل علَم واِتطيح الاصنام
الحسن لَحسين بمحـرّم تچوَه واِحزام
رافع اجفوفه ابدعائه اويشگف اِسهام


ولازم الدم ينتـصر عالظالم
سيف جان ايلوح بيد القاسم

***


خادم الحسين "ع
مرتجى الحسَّاني

https://www.tg-me.com/MM_lt5

لحن..(هاي الخيل شد واشتد يميمرها)

لسان حال "التاريخ" يخاطب أبو الفضل العباس "ع "
---------------------------------

ياعبــاس گَـصِّـر خـلگك اوياها
ريح إِعصار هِبْ واِكسِر رواياها


* * * *


عالَت ، واِنته ماواحد يعيل اوياك
يفصل بالمعــارك مِن يرف إلواك
نبض الخـوّه يوگف بالدهر لولاك
والاَحكـــام لومـا دمَّـك اَحيــاها

***

إركب مُهـرتك واتوسط الميـــدان
خلّي الدم يصير اعله النهر طوفان
واِختمها اعله اِيدك ختمت القرآن
إختـم من جديد او إرجــع إقراها

***

الْما مِعتَـبره خلها اليوم عِبره اتصير
للأجيــال ، وبـدرس الأخــــوّه اتـحير
عشره اِخوان يوسف بس رموه بالبير
واِنتـه بخِــوِّتـك عرش الله يـتـــبـاها

***

روس اِعداك مِن تِخطف عَليها اتگول
مَـلْك المــوت نـازل عالفرات ايصول
گصِّرها اعله خصمك لاتخلها اتطول
هاي الناس مرضى او سيفك اِدواها

***

خل روس الجثث تتطاير اويه الريح
وإسم حسين بلســانك ذِكِر تسبيح
اچفوفك لازمات الگاع خاف اتطيح
ياهـو الگـال هاشــــم طايح اِلواها

***

أوگف عل نهر واسحگ ثنايا الماي
واِبطي ابوگفِتَك حدما يحـير الراي
حان السَـوم وإنته بكربلـه الشرّاي
دون حسين سهله الموته شَروَاها

***

ماي المشرعه اشما عَـز عليك ايهون
واِمـلِي الجود بيدك وافرض القانون
لاكن لاتـمنـعـــه خلهـــــم ايشربون
موش اَخلاق دينك هيجي ترضاها

***

كلشي ايريد أخوك بلا احساب اِنطيهْ
واِخـسر دِنْـيتك بس المهم ترضيهْ
عـوف المــاي بالطف لاتـفكِّـر بِـيهْ
والله الخــوَّه أعـذب منَّـه تِـلگـاها

***

بالطف رادوا ايبعدونك امن حسين
وماهزّوا شعورك والله طرفة عين
وَجـه الخوَّه عندك مايصير اثنين
واحـــد چـان والموقف تِـبـنَّـاها

***

يابو الغيره يل بالغيره راســك حار
إنته الحل چنت لحسين من يحتار
مثـلك يابو فاضل يصعب التـكرار
گـــرَّة بـت محمَّـد بيـك عيــنـاها

***


خادم الحسين "ع
مرتجى الحسَّاني

https://www.tg-me.com/MM_lt5

قام العباس بتحريك خيل الثورة بأمر أخيه الحسين ابن علي دفاعاً عن الاسلام.
---------------------------------

راعيها ساگ الخَيل راعيها
خل تستعِد كربله والْبِـيها

______________________


شَـد العهــد تعويذه بِزنوده
والرايه رفَّت واِبتـسَم جوده
ماينعـبر خط أحمـر احدوه
تحسبله مِيْةِ اِحساب خليها

***

خل تحسب او تجمع كتايبها
يوصـلها عبـاس او يحـاسبها
بالسـيف لـو عـالَـت يـأدِّبــها
ومن ألَـم علَّـتـــــها يـداويها

***

حط إخته بالهودج على الناگه
او يسگيها ماي ويابسه ارياگه
ترتــــاح مِن وَيَّــاه تـتــــــلاگه
وكل خوف مايوصل بعَد ليها

***

للطف طلَـع غاضب لجل دينه
من شاهــدَه اِختـلَّـت مَـوَازينه
ودِين الله لاذ بســــاعد اِيـمينه
ويدري بو الغيره بدمَّه يگضيها

***

لجل القِـيَم والمبدأ السامي
چان اِندفـاعه بدافع اِسلامي
إلجـود بيـده والعدِل ظامي !!
والأمَّــه رادت مــاي يرويـها

***

طب كربلـه واِخيـــامه دگّـاها
وشيخ العشيره حسين حياها
دنّـگ وأخــذ تُـربتـها شمَّـاها
وصاح الشهاده بدمّـي شاريها

***

وزّع القـــــــادَّه كلمـن او دوره
واتحدَّه بيهم خصمه واِقصوره
چانت امفَرعَه او ردها مستوره
إلدنيا ، من ذب صـايته اعليها

***

هاي الحـرب مـاهِيْ إعتبـاطيه
عن مصلحه أَو رغبه شخصيه
چانت حرب ضد ( العبوديه )
وحسين بَـيَّـن كـل معــــانيها

***

گاللـهم الحگ هذا والباطل
من قَبِـل لاينــزل أبو فـاضل
اعله احساب دِينه والله مَيجامل
والمارضت بالسيف يرضيها

***

مو خـوف راد ايبـيِّـن الحجَّه
خاف اِلها راي اتردله محتجّه
كلما يحــذرهم تِهِـب ضجّه
عن لاتسمعه وصوته يهديها

***

كتبوا نصرهم بالدِمَه الغالي
وماخلّوا افراش المجد خالي
ماتــوا عَليهْ بالموقف العالي
والحگ شُكرها او قبَّـل ايديها


***

خادم الحسين "ع
مرتجى الحسَّاني

https://www.tg-me.com/MM_lt5

للعباس ع

دگ صـدره مـرتيـن يم إخت الِحْسـين

[ من ألــزَم الشارب . أگضيلج الواجب ]
ـــــــــــــــــــــــــــــــــــــــــــــــــــــــــــــــــــــ

آنه الكمر موجـود بحـــــدود الخيام
ياخويه شنهو الماي عنـدج أمر هام
بس أشـري عد عيناج أتحزم احزام
جيش ونهـر واخيول تـركـع لِلِجدام

مايفرغ الجــود والساقي موجود

عباس أسـد غالب ..... اكضيلج الواجب
ـــــــــــــــــــــــــــــــــــــــــــــــــــــــــــــــــــــ

گالـتله سبع أنعام منـــــــــك يوفـاي
والعدها هيجي اخوان ماتهتم بمـاي
كل همّي بالاطفال مو همّي بضـماي
عطشانه سكنه اتگول ياعمّتي هواي

كلـهم يريدون وبحضني يبچون

موقفهم ايطالب ..... أكضيلج الواجب
ـــــــــــــــــــــــــــــــــــــــــــــــــــــــــــــــــــــ

مگضيه لتفكــرين مگـضــــيه يخـتي
لوما گضت بالســـيف تگضي برگبتي
لو عيني لو يمــنــاي لو دم يســــرتي
ايروحن سبع فدوات لحجـابج إنتي

للنخوه يم عون أگـلبـلچ الكـون

يم عِتبِـتچ كاتب ..... اكضيلج الواجب
ـــــــــــــــــــــــــــــــــــــــــــــــــــــــــــــــــــــ

بِشري يخت عباس مايبقـه مطلب
لو ردتي أجـر الغيــم يمـــج يزينب
متعـوِّد اتشــــــربين إلّا آنـه أشرب
عالكون أذب الكون لو شيله تنذب

وفّــاي الِعهــود حمّــاي الِحدود

چم جود إلج جايب ... اكضيلج الواجب
ـــــــــــــــــــــــــــــــــــــــــــــــــــــــــــــــــــــ

ما أنســـه كلمه انطيت من زغري الكم
انتي او أخوج حسين بعيوني احطكم
آنه او أخوتي انصـــــير ســاتر خيمكم
فَـنَّه الشـــمر بي زود لو يوصللـكم

مـامـــــونه تبـقين لا ما تـذلين

يافَخْر أبـو طالِب ........ اكضيلج الواجب
ـــــــــــــــــــــــــــــــــــــــــــــــــــــــــــــــــــــ


خادم الحسين ع
مرتجى الحسَّاني
07819457321

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

علي الاكبر يخاطب القاسم ابن الحسن


جاســـــــم يبن عمّي    شِدْ عزمك ابعزمي
والحـومه آنـه اويـاك    نِدخـلـها يل نشمي
__________________________


إلمــن نـريد الحــيل والحــيل اِجه وكــته
خـل ابـرز بمـهــــرك وِبمهـــري طـب إنته
نتگاسـم الســـــــبعـين كل واحد وحُصْته
دمنه اعله ثار ايفـــور شيـسكته شيـسكته

حَـيـهُم يصـيح الـدم    حي الله وِلْـد العَـم
وِتشـــاهِدوا للموت      والصــارم ايسمِّي
ــــــــــــــــــــــــــــــــــــــــــــــــــــــــــــــــ

شتــگول اذا بالســــيف نتبادل ابكيــفك
انته ابرز ابســـــيفي وآنه ابرز ابســـيـفك
روس اشتهت ذباح گصهن واخذ حيـفك
خل تنرعب بالنـــــوم لو عِثـرَوا ابطيـفك

إرعبهم إرعــبهـم       وبســــيفك أدّبـهم
مايبــرد إلّا ابثـار        دمَّــك مثــــل دمي
ــــــــــــــــــــــــــــــــــــــــــــــــــــــــــــــــ

عمنه البطل عبــاس عالغـــيـره علمـــنه
لمن يصـــــــير ازماط نتـزامـط ابعـمـــنه
مات ابكلبنه الخوف وتغـســـــل ابدمــنه
احنه اعله حگ مادام لو متـنه ميهــمــنه

حـط ظهرك ابظهري   وادفعهم ابصدري
آنه ادري انته ازغير     بس سطرتك تعمي
ــــــــــــــــــــــــــــــــــــــــــــــــــــــــــــــــ

وِنْسـه الحرب جسـام الماله خلگ يتعب
والصِيته باشــط موت يم حدّه مايگرب
اليوم اليِخـــون الظيف بالحـومه يتأدب
لازم نطلع احگــوك عالحـــگ اذا نغضب

والطايل إلســـــــــانه    بالسيف أگصه آنه
والتصعب انته اعليك   حلها الصعب يمي
ــــــــــــــــــــــــــــــــــــــــــــــــــــــــــــــــ

صِيت العرس ميدوم وآنه ادري مو نِيتَك
لمّن شهيد اتطيح يصعــــد شرف صيتك
بالجنه تلگه اهناك مَنصــــــوبه صينيتك
والزهره عدها اشــــمـوع تعـلگهن ابيتك

شتــســــوّي بالحِنّه   واگبـــــالك الجَـنّــه
باجــر على الرايات    تلگه اِسمك او إسمي
ــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــ

خادم الامام الحسين
مرتجى الحســّــــاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

ليله وحشه اعله زينب ليله وحشه
ماكو خيـمه الْـتَّراب إلهُم تِـفــرشه

من بعد نوح وعذاب ..نوَّمَـتهم عالْـتَرَاب
ماكو خيـــــمه
ــــــــــــــــــــــــــــــــــــــــــــــــــــــــــــــــ

فِرشَت اتراب العـقـــــــيله الكل الايتـام
گالتـلهــــم يالله ناموا مامش اخــــــيام
سكنه صاحت مثل أبونه عله الثره اننام
عمّه أخاف اتحز رگبتي ابسكـته الاحلام

وين ابويه الچنت من يغفه أشمه
لا تجــــبريني مـانـامن يعــمـه


دمعة الفاگد جواب نوّمَـتهم عالتراب
......ماكو خيمه
ــــــــــــــــــــــــــــــــــــــــــــــــــــــــــــــــ

عمه ليش بهالطريقـه نفـــــــرش افراش
ماكو خيمه البيها تحصل وصلت اقماش
صاحت احـترگـــن يعمــه ابنــار الأوباش
الْيبقه حي من بعَـد خلّـه كونه لاعـاش

يارقيه اعله چفي الليله باتي
نـامي عمه واغطـيچ ابعباتي

وزينب ابذاكه المصاب ... نوّمَـتهم عالتراب
.............ماكو خيمه
ــــــــــــــــــــــــــــــــــــــــــــــــــــــــــــــــ

تلتفت زينب عليـــــهن تحجي بهداي
عمه ابوچن بالسفر خلّـيچن اوياي
فدوه گليله رقيه عطشـــــــت اهواي
خل يجيــبلها بطريقه امن النهر ماي

هسه ابوچن يجيچن هسه ابوچن
هذا يمچن علي الســجاد اخوچن


امن المواجع گلبي ذاب ..نوّمَـتهم عالتراب
ماكو خيمه
ــــــــــــــــــــــــــــــــــــــــــــــــــــــــــــــــ

ذوله ياهُــم عمه اَشـوف بهالكـتر ناس
خاف ابوي حسين اِجه لو عمي عباس
لا يعمـــــــه ذولــه غربه اعلينه حراس
أيِّـسن ســــكنه اورقيه ولطمن الراس

وسفه صاحن علينه الدنيــا دارت عكب ابونه غُرب تحرسنه صارت

والحچي اتسمعه الرباب . نوّمَتهم عالتراب

.............ماكو خيمه
ــــــــــــــــــــــــــــــــــــــــــــــــــــــــــــــــ

امن الجمر ياعمه إنتي اموَرمَه رجليج
اشويه گعدي ارتاحي واحنه انصبّر اعليج
هم مثلنه انتي يعمه الســــــــوط ياذيج
أي يســــــــــكـنه متـني ازرگ مـا أراويج

متني ازرگ يسكنه متني ازرگ والمصيبه اعله عيني وسفه انطگ


وصبّت ادموع العتاب ..نوّمَـتهم عالتراب
.............ماكو خيمه
ــــــــــــــــــــــــــــــــــــــــــــــــــــــــــــــــ

هذا ياحيـل اليــظل ماظل بعــد حيل
من جِلوس اتصلي گامـت زينب الليل
عگب ابو فاضل اخوها شــافت الويل
هدّت اعلـيها المحن چن هـدَّت الخيل

عالمخيم والأصعب يابو فاضل
من شفتـــها غريبه ابلايه كافل

مايصح للفزعه باب ...نوّمَـتهم عالتراب
.............ماكو خيمه
ـــــــــــــــــــــــــــــــــــــــــــــــــــــــــــــــ

خادم الحسـين ع
مرتجى الحسَّاني
https://www.tg-me.com/MM_lt5
خادم الزهراء مرتجى الحسَّاني

لــ عبد الله الرضيع ع

فاجعة كربله ياسهم حرمله

صوّبت طفلي اوصبتني بنحري وَيّاه
للخـيـم مذبـوح اجــاني وارضـيعاه
وارضيعاه
ــــــــــــــــــــــــــــــــــــــــــــــــــــــــــــــــ

وي أبوه راح وبقيت أبچي اِبخيــامه
يشـرب المـاي او يرد ليـه بســـلامه
إبني يرضـع بعــده ماواصِل فِـطَامه
بيا شَريعـه ينـذبح بچفوف إمــامه

ياسـهـم مايصِـح بيــد أبـوه ينـذبح

بالنحر لمّن رميتـــه گلبي صاح آه
للخـيم مذبوح اجاني وارضــيعاه
ــــــــــــــــــــــــــــــــــــــــــــــــــــــــــــــــ

ياسهم لو تمـتـلك ذرّة مشـــــــــاعـر
چان بِسته بنحره ومخيبِ العـسـاكـر
هذا عبد الله اشــــعلامك جيته طاير
ياعجب هيجي إبني عندك مالَه خاطر

لو ضمـيرك رجـع كل نـزاع انگــطَـع

اوترجع اتصوّب عدوَّه اوتسفك ادماه للخــــــيم مذبوح اجاني وارضـــيعاه
ــــــــــــــــــــــــــــــــــــــــــــــــــــــــــــــــ

شِفته ساكت ماله حِـس گلت ابني نايم
ياهله ابعـبـــــــــد الله راجـع ليه سـالم
تالي نابت بالنـحــــــر شــفـتـك يظـالم
ماحسـبت احســــــاب أمَّــه والفواطم

شنهي گلبك حجَر ماخِجـل وانـكسَـر

آنه كل حلمي رويته اودمَّه روّاه
للخيم مذبوح اجاني وارضيعاه
ـــــــــــــــــــــــــــــــــــــــــــــــــــــــــــــــ

يمه ظل خالي المهــد بعـــدك ييمه
بي أشمّــن ريحــتـك ولصدري أظمه
ليـلي خـنگـه اونحرك اشتاگيت أشمه
عمري ماي آنـه اوتبـــدّه اشلون ألمّه

وگلبي شمعه او طُفه والجرح بي غُفه

والولد أحســبله يكـبر ميّت ألگاه
للخيم مذبوح اجاني وارضــيعاه
ــــــــــــــــــــــــــــــــــــــــــــــــــــــــــــــــ

يبني هاي اختــك رقــيه اتـنــوح اجتك
يالله إفـتـح عـينك إلهـا اونـاغي إخـتك
قبل ساعه يـمّـي ماصـــدّگ فگــــدتك
حتى ملك المـوت يخـجـل من نظـرتك

يُمه بعـــدك طفل ابيـا ذنب تـنچــتل

مرّه أصرخ يبني ..مرّه واحســيناه
للخــيم مذبوح اجاني وارضيعاه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

خادم الحسين (ع)
مرتجى الحـسَّاني
https://www.tg-me.com/MM_lt5
خادم الزهراء مرتجى الحسَّاني

         باجـر السـلاَّب والقـاتِـل يِجون
         وَقِـفُـوهُمْ ۖ إِنَّـهُـم مَّسْـــــئُـولُون
  [ أللَّه يِنصُب مَحكمه       والْـتـحاكِـم فاطمه ]
               وَقِفُوهُمْ ۖ إِنَّهُم مَّسْــئُولُون
_______

فاطمه بيـوم القـيــامه        تظـهر بمـوقف حزين
اتنادي يارب الخــلائق        أَرِنِـي إبنـي الحسـين
ويجي حسين ودمه يجري  اتشوفه مِنّ الودجين
بچـفها تمسح دم رگبته     اتگله راسك يبني وين

وتلتفت لـ الله اوتِگله اليوم أريد
تِنـتِقم من حرمله وشِمْــر ويزيد

[ الأمر من رب السِمَه       والتحاكم فاطمه ]
              وَقِفُوهُمْ ۖ إِنَّهُم مَّسْئُولُون
_

ذوله گِطعـــوا راس إبنـي    وسَلِّـبَـــوا مِـنَّه الثياب
وهَـشّــموا بالخيل صدره    ودمه يجري اعله التراب
حيـــــدر بخـاتَـم تِصــدَّق    يِدفَـع الشَّــر والعـذاب
والحسين اِنطـه بممــــاته    خُنـصــر وخاتَـم ثواب

تِسْع ٱصابع يعني مِنْ صُلْبَه تِصير
تِسِع معـصومين والمهدي الأخـير

[ ملحمه بصف ملحمه   والتحاكم فاطمه ]
             وَقِفُوهُمْ ۖ إِنَّهُم مَّسْئُولُون
_

شايله اجفوف ابو فاضل    بيـدها والكل تِشـــوف
يا إلاهي اتگـلـــــه أُنظــر     ماذَنِب هـاي الجـفوف
اجفوف كافــل بِنتي ذني    گطِّـعـوهن بالســيوف
ربـي ثــــبـتـهِـن مـنــايـر    خل تگر عين الطفوف

إبني عبـاس الرفع راس أمَّـه بيهْ
اليوم اَطالب يا إلاهي بگطع اِديه

[ واَرد اَقيمن مأتمه      والتحاكم فاطمه ]
             وَقِفُوهُمْ ۖ إِنَّهُم مَّسْئُولُون
_

بيا ذنب عـبد الله بالطـف    ينــذبح بحضان أبوه
عمره ست اشهر وضامي    گطره وحده ماسگوه
اتنازع الجيش اعله حـاله    وتالي بالنبــــله رموه
بيش مطـلـــــوبه الربـاب     لچـفـها مَيّت رجّعوه

عمره شـمعه وتنطفي بعينه الحياة
وجهه أحلـه اهواي من ماي الفرات

[ يشكي من حر الضِمَه  والتحاكم فاطمه ]
              وَقِفُوهُمْ ۖ إِنَّهُم مَّسْئُولُون
_

علي الأكـــــبر شـنهو ذنبه     تِنسـفِك بالطف دِمَـاه
يـا نوايــح گلــب ليــــــلى     للعـرش واصل صَداه
ورمله چن اتشوف جاسم     واگـف المـوت ابگفاه
طَلَـع ، شِتذب مـاي ماكـو     شُمـرت الدنيـــا وَراه

آنـه أم واَشــــعر بحـال الأمَّهـات
الأم تِموت اويه الولد لو يمها مات

[ اعليه تنوح ولاطمه    والتحاكم فاطمه ]
               وَقِفُوهُمْ ۖ إِنَّهُم مَّسْئُولُون
_

بيا شرع زينب سِــــبوها     وچَـتِّــــفوها بيا سـبب
هاي لَبـْــــــوَتْ آل هاشم     زينب أم حَچي الذهب
تِحلف الناس بخـــــدرها      تـالـي يِتوَلُّـــوها سَـب
بِت علي واخت ابوفاضل    تنضـرب بيـن العــرب

وماكو بيهم عنده ذرَّه امن الاصول
شـالـته الغِيره على اعيال الرسـول

[ تِطلُب ابحـگ الدِمه         والتحاكم فاطمه ]
               وَقِفُوهُمْ ۖ إِنَّهُم مَّسْئُولُون
___

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

الإمام السجاد يتمنى الشهادة في أرض كربلاء مع أبيه الحسين فيخاطبه بلسان الحال :

أَتمـنَّــه لو مِستَـشهِد اوياك
وِادمَاي بويه اتخالِط اِدمَاك

مفتاح السعاده •• يامحله الشهاده
أتمنه لو مستشهد اوياك
_____

من بِعيد اوصوت غوثَـك يِنســمِع
ايعز عليَّه اشلون أَسِمعَك وَامتـنِع
شِلِت سيفي ومَالَحَگْتَ ألبَس دِرِع
رغم چانت حـالتي بأصعب وَضِـع

إرخصني گِتلك خل أواسيك
بِالروح گبل اليفـــزَع أفديك

والموت إلنَّـه عاده يامحله الشهاده
أَتمنَّه لو مِستَشهِد اوياك !!
_

قَبَّلـتني او رَجَّعـتني لـخيمـتي
وگتلي اَريدك إنته تكفل عيلتي
وحتى ماينگطع نَسلِي بعِترِتي
رد يبويه الگـوم تِطلـب رگبتي

طِعتَ أمرك اورديت مَهضوم
بس گلبي ظلّ اعليك مالـوم

ماحصَّل مُرَاده يامحله الشهاده
أَتمنَّه لو مِستَشهِد اوياك !!
_

بين اديـك اشگــــد تمـنِّيت اَنـقـتِل
وراسي عن جسمي بطريقك ينفصِل
والله وسفه اتموت وآنه أبقـه عدِل !!
حكمة الله إقتضَت أَمشي اعله الهزِل

ياريت أروح اعله الرمح راس
او لا بِيَّه بَعدك تِـشمَتْ الناس

يل موتك وِلاده يامحله الشهاده
أَتمنَّه لو مِستَشهِد اوياك !!
_

لا يظل بالك يبويــه اعله الحــرم
روحي أَفصِّـلْها على اعيالك خِيَم
وما يِـهـــــدِّم معنــويـاتِي الألم !!
إبنك ابعين الگِطَع نحرك سهم

تَعبِ السبي لعيونك ايطيح
شِلناك رايه او أحلى تسبيح

يل ذِكرك عباده يامحله الشهاده
أَتمنَّه لو مِستَشهِد اوياك !!
_

رِحِت وَاملاك السمه بظعنك تِحِف
والمدامع مارِضَتْ بعــــــدك تِجِف
امچَتَف وطول الدرب يجري النَزِف
بس لِسَـــان الثـوره اَبــد ماينچتِف

آنـه ابنـك اِربـاتـك يصـنديد
عالْمنبر أصعد وافضح ايزيد

وَاكسِر كل عِنَاده يامحله الشهاده
أَتمنَّه لو مِستَشهِد اوياك !!
_

بويـه أَوِعــدَك هَم أرد لزيـارتك
اوراسك المگطوع أردَّه لجثِّـتك
وفوگ گبرك راح أحط اعمَامِتَك
واذكر امصــابك وَاشمَّن تُربتك

ومو ماي أرشَّن فوگك اجروح
وَانحب عَلِيك لطلعتْ الروح

واِترابك وِساده يامحله الشهاده
أتمنه لو مستشهد اوياك
_

خادم الحسين ع
مرتجى الحسَّاني
https://www.tg-me.com/MM_lt5
‏