يابو الفضـل يشــهدلك السـابِـع
چفَّـك لِـگـــوهِ اِبـرايـتَـك طابِـع
_________________________

سِر الأعظم بيهـا لو شَمرَتْ حرب
يل يمِـينـك خلَّت بخصمك رعُـب
وسَطْرِتك چانت تِـرَجِّف كل گلب
ريح صرصر بالحـرب لمَّـن تطب

ياغِيره من صَدرِ الشرف راضِع
جـفك لگــــــوه ابرايـتك طابع
__________________________

رَفرِفَـت فــوگ الظـعــن لـمَّـن طـلَــع
وشرف عهـدِ الخـوّه عالـرايـه انطـبع
أخــذ صِـيته العلگـمي منهـا او قِـنـع
وإنته صِـيتك للسـمه السبـعه اِرتـفع

تخـدِم أخوك او إنته مِتواضع
جفـك لگــــــوه ابرايتك طابع
_________________________

ويوم سابع من محــرم من تـرِف
يبدي نفخ الصُور عل سبعين ألِف
رايـه كلفه اوشـــالها فـارس كلِـف
آيـه قُدسيـة او شمس ماتـنكسِف

مو رايه (آيـه) ابيمنـتك رافِع
جفـك لگـــــوه ابرايتك طابع
_________________________

عن وَفـائـك بيـها ظـل طابـع أثـر
وخدر زينب مايشم نســمة خطر
من ترف چانت علامه اعله النـهر
اتگـول بعـده بخـير عبـاس الگمر

وي رايتك شِفتك نجم ساطِع
جـفك لگــــــوه ابرايتك طابع
_________________________

رايتـك وكت العطش تِـنـزل نِـده
عل خيـــم واَعظم لـهيب اتبـرِّده
اوياك تِـنـهـيـهـا بنـصر متعـاهده
بـزود عل رايــات صارت سَـيِّـده

والفخـر كِـلَّـه لموقفـك راجع
جفك لگــــوه ابرايتـك طابع
_________________________

حسين چانت عنده أعز امنِ الهَوَه
نبـض گلبـــه ورايـتـك رفَّـن سـوَه
ظامي، بس بجربـة اوجـودك رِوَه
العطش عِلَّه وشوفتك بالطف دِوَه

واِنتـه النهـر يـم خـوِّتك راكـع
جفـك لگــــــوه ابرايتك طابع
_________________________

إلـها حـتى اِعـداك ظـلَّت ترتجِـل
من طحت واتبدَّد بغربـــه الشمِل
جابوا الرايــه اوصفن بيها النـذِل
صاح ( أَبَيْتَ اللَّعنَ ) يا أبا الفضِل

لآخر نَـفَس عن دينك اتدافع
جفك لگـــــوه ابرايتك طابع
_________________________

خادم الحسين ع
مرتجى الحسَّاني

شيبي لاح وصار مِصباحي اغروب
وأفـز تـالـي اللـيـل فَـزَّت مصـيوب
_________________________________________

أفـز واَلـگـه بداركــــم بس آثــار
ذكريـــات افراگ من دون أخبار
كلشي بعدك وحشه مايملي الدار
وگطره گطره اويه الشمع عمري ايذوب
شيبي لاح...
___________________________

أحس داري بلايا صوتك تـابوت
واليحبكم بيها كل لحظه ايموت
حال يونس طايحه ابَّطنِ الحوت
مدلي چف إيدك يوارث يعگوب
شيبي لاح...
____________________________

هذا حالي اِبفَرگـتك واِنته اِتشوف
ظلـمه دنيـاي او گمـركم مخسوف
لون وجهي بدون وجهك مخطوف
ودمع عيني بليلـكم يطوي ادروب
شيبي لاح ...
____________________________

بويـه مـا عنـدي بِسَــاط اِسليمان
حتى اَجيلَك وين عد الله امچان
عندي بس اِثنين سِـبحه او قرآن
لـ الله بيـهـن أتِّـجِـه بـالـمـطلـوب
شيبي لاح ...
_____________________________

دعـوه منـك يل دعـائـك مقبــــول
يگضي ليل الغربه والوحشه اتزول
الصبر مفتـاح الفرج كِلهـا اتـگــول
وانه ليش بوجهي مسدوده البوب
شيبي لاح ...
_____________________________

رايح او كاسِر شكو بعمري اَغصان
مِن چِنِت زهره او وجودك بستان
نهر وَصلك من يشح عل عطشان
زهرِتَـك تذبل عطش يل محبوب
شيبي لاح ...
______________________________

أدري بيَّه اتحس مِثِل ماحس بيك
لْـياوكت تبقــه العـليـلــه اتـَّــانـيك
مايهـون اعلـيه للـمـــــوت أنطـيك
بس رضيت لخـاطرك بـالمكـتوب
شيبي لاح ...
_____________________________

فدوه طمِّـني بخـبر خل أرتـاح
بلكي عني اهموم هجرك تنزاح
تره الحيل الچان بـِوجودك راح
مثِل حيل أمك الزهره المتعوب
شيبي لاح ...
_____________________________

بويه مادامك عدِل آنه بخـير
وِبســلامتـكـم أفـكِّــــر لا غير
صرت بَعدك أخف من جنح الطير
وحلمي بالفرگه اعله بابك مصلوب
شيبي لاح...
_____________________________

خادم الحسين ع
مرتجى الحسَّاني

جاسم طالِـع مِن اِخيامه .. لو فِلْقَتْ قَمَر
هذا مَلَاك وْفوگه اِعمامه .. لو فِلقَت قمر

سُبحـان الله وَجهه اشمحلاه
هذا مَلَاك وْفوگه اِعمامه .. لو فِلقَت قمر
_______________________________________

لابس هندامه ويتبختر وِمن اِلثامــه ايشع النور
طالع ينصر عمَّه ودِينـه وِالغِـيره بشـريانه اتفـور
شاب وخلَّه الدنيا بظهره من نادى حسين بعاشور
گام ولـبَّه الدعوه بروحه حَل وكته ليومه المذخور

فك صدره لموتَه وماخايف .. عمره اَثلثطعش
فدوه لطوله وريجه الناشِف ..عمره اَثلثطعش

تـارك دنيـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
___________________________________

يافـارس يوگـف جـدَّامه وهاجت نخوة هاشم بِيهْ
وصعدت نار الغِيره براسه وكل ماي الشط مايطفِيهْ
صاح اِبشر عونك ياعمي حِملِ اليكلَف ذبني اعلِيهْ
موقف عندي يگر عيونك بس لَوليدك رخصه اِنطِيهْ

ياسبـعـين اتكـفِّي لســيـفي .. وآنه اِبن الحسن
اليوم اَحكم والحومه بكيفي ..وآنه اِبن الحسن

يزهر لاگـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
_____________________________________

شكــراً ياجاسـم يولـيـدي باسه براسه وشمَّه حسين
بعدك گله ازغير اعله الطف وين اِنته وهَل وادِم وين
مو قصدي اَستنقص من قدرك بس خوفي اعليك امن البِين
اوشِيصبِّـر أمك بفـراگك وِلْـطولك مشبوحه العين

گـلَّه أمي الشدتلي اِحزامي .. وحطَّت لامتي
گالت دمّك يضوي اَحلامي .. وحطَّت لامتي

ودِمعَتْ عينـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
______________________________________

للحومه اِسترخَص من عمَّه والموت ايصدلَه وخجلان
اِزغير وبس عد الله اشكبره چَـن آيــه بقـلب القــرآن
مابالِـغ حِلمــه امن اسـنينه بس بالـغ ضَربِ الفرسان
لاگـه الموت املاگه الطِفْلِ لْـصدر أمَّه لو حَس عطشان

فرحان بمـوته ومستبـشِر .. بي هيبة علي
ومن عين الحاسد متنكِّـر .. بي هيبة علي

يخسه العـاداه وجهه اشمحلاه
هذا مَلَاك وْفوگه اِعمامه .. لو فِلقَت قمر
______________________________________

سوَّه اَفعال اَكبر من عمره طب وداس اعله الممنوع
وبنص عـدوانه الغـــداره دنّـگ شَد نَعـلَـه المگطوع
ومن عرفوا يستهـزء بيهم وَاصبَح بي ذلَّه الموضوع
گالوا هذا الشاب انـغدره وْگلب أمَّه انخلِّيهْ مفجوع

او رَد لخيامه ودمّه بطوله .. والشمعه انطفت
وماتت من بعده الـهلـهوله .. والشمعه انطفت

مـيِّت جابـاه وجهه اشمحلاه
هذا مَلَاك وْفوگه اِعمامه .. لو فِلقَت قمر
______________________________________


خادم الحسين ع
مرتجى الحسَّاني
07819457321

مسلم طِـوَه الكوفه حيل الله بِـچفوفه
________________________________

سلّ الغضب وي سيفه والغِيره جدحت نـار
وبيهم فـتح ميـــدانه حيّ اِبن أخو الكـرار
ماسِك زِمـام الكــوفه چن مَسكَت البتــار
گص بيده خيط الرحمه سبحه وصفوا طشَّار

تنبض وِفه احروفه حيل الله بجفوفه
_______________________________

هـيبـــة علي بعــيـونه وِبروحه صبر حسين
وزود الگـمـــر بِزنـوده يـطبگ اِثنين اِثنين
هذا الوگــع من خـوفه وذاكه الشرد لاوين
ظل كوفي يسأل كوفي هذا الشجاع امنين

بيـهم تـرك خوفه حيل الله بجفوفه
______________________________

طوعه بشغف تربـيله واِتشَجِّعه اعله اعداه
حرمه وخذتها الغِيره رادت تطـب اِويـــاه
بس هيه عكس الوادم ماطِعـنَت بمگفــــاه
صارتله سيف او رايه عن يمنته ويســراه

بالشـده مَـتـعوفه حيل الله بجفوفه
______________________________

صاحب رساله وزوده گــدها وثلث تنـعـام
طاع الحُسَين وشوره وشد للمهمَّـه اِحزام
عن حُـبَّـه مايثـنـــونه مسلم أسـد ضرغام
يشبه علي بصـــولاته ضرباته فوگ الهـام

ضرباته معـروفه حيل الله بجفوفه
______________________________

وَحـده ومِئات اگبـاله ياعــازت العـبــاس
لو ينتخي بريشــاته چا طگها راس براس
وِيطب قَصرهم گوه وِيـفــرِّق الحـراس
عالحگ يگطْعِ اجفوفه والرايـه ماتنجاس

بالمعركه اتـشوفه حيل الله بجفوفه
_______________________________

خادم الحسين ع
مرتجى الحسَّاني

https://www.tg-me.com/MM_lt5

نخـوة الأنصار للسيدة زينب ع"

خل تظل مامونه ..... خيمتج
محد ايمس طارف ... شيلتج
مولاتي يازينب || مولاتي يازينب
________

اي وحگ خدرج يفخر الساده
مانخيبچ ، والرگَبْ سدَّاده
إطمئني وخلّي گلبج يستراح
لازمه احدودج أبطال وقاده

وأبو فاضل حارس .... ثايتج
محد ايمس طارف ... شيلتج
مولاتي يازينب
________

الليل يشهد عنَّه سِأْلي انجومه
امن اختبرنه حسين وسط الحومه
گال هذا الليل واتَّخْذُوه جَمَل
وعابس امن الغِيره شگ هدومه

حگه لو شگ ثوبه .... لغربتج
محد ايمس طارف ... شيلتج
مولاتي يازينب
________

غاليه او خدرج يعـزّ اعلينه
وساتر ، اگبال الخيم تلگينه
انصير سَد مانع إذا صار الهجوم
مانفشلج والله من تنخينه

بالشرف مرفوعه ..... هامتج
محد ايمس طارف .. شيلتج
مولاتي يازينب
________

واحد وسبعين يم صيوانج
مستعده اتضحي لجل اخوانج
گولي يامولاتنا او لاتستحين
مايردِّچ والله بس إلســانج

ولا تظل بعيونج .... حيرتج
محد ايمس طارف ..شيلتج
مولاتي يازينب
________

مايمر بس الهوى اعله اخيامج
وگبل إِخوتج ننذبِح جدامج
لو ألف مَرَّه لجل عينج نموت
هم نرد وِنـزيل ظيـم أيامج

حرمـة الله العــالي .. حرمتج
محد ايمس طارف .. شيلتج
مولاتي يازينب
________

للشهاده انطينه أخوج احچايه
اشما يبـيـعونــــه نِـرد شـرَّايه
انعاهدج مانِخذِل حسين الغريب
ومن دمانه انحـنِّي چف الرايــه

موتَه ونلَبـيـلِچ ....... نَخوتج
محد ايمس طارف .. شيلتج
مولاتي يازينب
________

لو أكو غير النَفِس ، ننطيكم
فَخُذِي مولاتي كيْ يرضيكم
آنه يخت حسين اِليْ كَلْمچ حبيب
روحي فدوه اشما يمر طاريكم

والمهم يازينب ....... راحتج
محد ايمس طارف .. شيلتج
مولاتي يازينب
________

خادم الحسين ع
مرتجى الحسَّاني
07819457321

خادم الزهراء مرتجى الحسَّاني
يازينب إنتي أول ( نهر ) تروينه بس عطشانه !!
https://www.tg-me.com/MM_lt5

للعليله ع..

أوَصِّيك .. ياگمر يل گاعد بحضن السِمَه
أوَصِّيك .. گِلهم اتســـــلِّم عليكم فاطِمَه
ـــــــــــــــــــــــــــــــــــــــــــــــــــــــــــــــــــ

إجاني اللـيـل وآنه الوحّـــــدِي ابـداره
أگَـلُّب ذكريـاته او أنچـــــــوي ابـنــاره
أسِــــــألك عن أبوي انگطـعت اخـباره
وَعَـــد بس گلي وانه انطيك ٱلِـ بشاره

الهجر طال .. وآنه عل هجران مامتعَلِّمه
أوصـــــيك .. گلهم اتسـلم عليكم فاطمه
ـــــــــــــــــــــــــــــــــــــــــــــــــــــــــــــــــ

چنت أغفه اعله صدره ولحظه ماعوفه
إذا مَـر بيَّه خوف ايـظمني بجـفــــوفـه
أخَذ راحتي وْبالي وبِعــــدت اطيــوفـه
صرت بالليل أدوره بطيف ماشــــــوفـه

يسـتار ..اشما أضوگ الماي بي ريحة ضِمَه
أوصيك .. گلهم اتســــــــلم عليكم فاطمه
ـــــــــــــــــــــــــــــــــــــــــــــــــــــــــــــــــــ

أبوي حسين راح او ماكو مِـنَّه اجواب
أعاين عل سِمَه واحسبله ألف احساب
أريد إتـگِــلــه بنتــــك تنـتظر عل بـاب
يجي لوما يجي من عنده جيب اسباب

تتـانيك .. گِلَه من يوم الرحت مانايِمَه
أوصيك .. گلهم اتســلم عليكم فاطمه
ـــــــــــــــــــــــــــــــــــــــــــــــــــــــــــــــــ

ابغـيابه اشلـون أنــام او هـوَّه مو يمي
تُـربـتَه اگبــال عيني وجمــــرته بدمي
تره اخلافه أموت بحســــــرتي وهمي
اشعـجب لليــــــــوم لا هـوَّه وَلا عـمي

بالِآهات. كل مِسه ومصباح روحي امحَزِّمه
أوصـيك ..گلهم اتســــــــــلم عليكم فاطمه
ــــــــــــــــــــــــــــــــــــــــــــــــــــــــــــــــــــــ

أنا بكل لحظه اشــوف الموت بعيوني
واصيـحـن ياهـلي امروّتكم اخــذوني
أنا بحاجـــــــــة دِواكـم لا تعـــــذبوني
إذا طوَّلتـوا خافَـن مَيْـتــه تـلـگــــوني

علامات .. بيِّنت للفرگه بعيوني العَمه
أوصيك .. گلهم اتسـلم عليكم فاطمه
ــــــــــــــــــــــــــــــــــــــــــــــــــــــــــــــــ

ابكـثُر ما بِسـمـه ألهــج يـبـسـت اشفـافي
دَبـللـــها ابجَـــــــوَاب امن الگـــلـب دافي
انگطع گلبي اعله أبوي اوْبهـتت أوصافي
العليلـه اتگــول ما أحمـــــــل بُعــد كـافي

أويلاه .. انگلبت القاروره حمره امن الدمه
أوصيك .. گلهم اتســــــــلـم عليكم فاطمه
ــــــــــــــــــــــــــــــــــــــــــــــــــــــــــــــــــــــ


خادم فاطمه العليله(ع)
مرتجى الحســـــــاني

07819457321 

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

لـ وداع العباس ع..

يـلِ مْضَحِــيـلي بحــيـاتك .. بيش اَجازيك
وْتدري بس روحي بغلاتك .. بيش اَجازيك

الْيمشي ذُخْره .. يگضي عمره .. بين الِجروح
_________

ياحسين اتـنادي أَســـمـعك
وانه اجيت اركاض أودعك .. خويه عباس

طِحِت وِچـفوفك شِلِـتهن
وِبـدمــــــاهِن قَـبَّــلـتــهن .. خويه عباس

عَثره عَثره ٱوْصَلِتْ يمَّـك
وِانحـنيت اعليك أشـمَّـك .. خويه عباس

شِفـتك بمــوقف واعـذرك
حاضِن الرايه اعله صدرك .. خويه عباس


ياعضيدي وحـامي ظهـري .. بالشدايد
عِفت أخوك لْـوحـده تدري .. بالشدايد

اليحني ظهره .. يگضي عمره .. بين الِجروح
______

ياسـنَـد ظهري او حُسَامي
ابطيحتك طاحت خِيَامي .. والألــم هاج

غـرُّبَـتْ شَمسي بـغِـيــابك
وانفتح جرحي بمصــابك .. والألـــم هاج

وانته تدري بروحي عِندك
بيش اَجُـر انفــاسي بَعدك .. والألــم هاج

والأِخــو محَّــد يِـعَــوضَـه
فَرگِـتَه امن الموت أمْضَـه .. والألـم هاج


تِـدري بفـراگـك مِــنِـيه .. يابو فاضل
ينولِـي اليفـگـــد اَخـيه .. يابو فاضل

وِشْيِصبره .. يگضي عمره .. بين الجروح
______

يلِّي مَـخـلـوق لْـنُـصـرتي
لو دَهـر تِجــــري دمعـتي .. ما أوافيك

حِـيرتي ابفگـدك چبـيـره
چَني فاگـدلي عشـــــيره .. ما أوافيك

عالقدر خويــه اشبـديه
يبقه فگـدك كسِــر بـيه .. ما أَوافيك

والأخو المــثلك وسـافه
ينفـگـــــد يابـو الكـلافه .. ما أوافيك


يلِّي مِنْـطي الخـوَّه حگـها .. وِالكفـاله
فگــــدك لـروحي حـرَگـها .. وِالكفـاله

وانته أدرَه .. يگضي عمره .. بين الجروح
______

عـازتـك ياخــويـه عــازه
موتـك اشــــمــاله تِـوازه .. يوم عاشور

فَـرهــــدَك من بيـن اديـه
اوْعل نـهر طحـنه سِـويه .. يوم عاشور

يا گمـر موحش سَـمـائك
وعل نهــر طايـح لـوائك .. يوم عاشور

ياخســـارتـنه برحـيـــلك
من جرح فگدك دخيـلك .. يوم عاشور


وسـفه يـابو الغــيره رايــح .. والله وسفه
اتعوف حِملي وگلبي طايح .. والله وسفه

الحاير امْـرَه .. يگضي عمره .. بين الجروح
______

اشلون أرد صوب المُخـــيَّم
وْشيـبتي مخضـوبـه بالـدم .. رجعتي اشلون

آخِـــــذ الرايـــه لـخـــواتك
واختـصر حزنـي بـممـــاتك .. رجعتي اشلون

لـو أوَدِّي اچــفــوفـك إلـهن
هســـه ينـتَـظـــرَنِّـي كِـلـهن .. رجعتي اشلون

لو أكـض خاصِـرتي بِيـــدي
امـبـيِّن امـفـــارِگ عضيدي .. رجعتي اشلون


راح أرد واهــدِم الخـيمه .. يم خواتك
الـكون صار بعيني هَيمه .. يم خواتك

الگلبه جمره .. يگضي عمره .. بين الجروح
________

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر ) تروينه بس عطشانه !!
https://www.tg-me.com/MM_lt5

نخوة أم وهب لولدها وهب

[ ياوَهَب يبني   مـو زَرَع بَـطـنِـي   اليترك حسين ]
[ لاتـعِز روحك   وٱنـثِـر اجروحك   بِل مـيــــادين ]
_____

گوم شِـد الرايه فوگ امـتونك اشـراع
هاي ساعتها واحشــمك إنهض ابساع
يبني گِص الروس واترس بيهم الگاع
ياسبِـِع وكت الكـــلافه اتـبـيْنِ ٱلِسـباع

[ يمه دِگ صدرك  واترك بظهرك    عرسك اوروح ]
[ إحمِل الرايـه   واكسب الغايه   بدم الِجـروح ]
_____

يل وِصِية أمك حِـرز شِدها اعله يِمناك
ما أعـذرك إلاّ اشــوف ابطولك ادمـــاك
عوف كلشي حسين بالطف يبني ناداك
رُوحله وطيح اعله جِـدمه وگِله عيـناك

[ گِلَّه طوع اَمرك   وانه أشِد أَزرَك    إنطي شيريد ]
[ روحك افديهـا     لا تعِــــز بيـها     يـبني ياحـيد ]
_____

لاتقـصِّر وي أمامك بالدمه إفدِيهْ
حته أشـــــوفه بوجـه أبيـض من ألاگيهْ
حســـين نِگـطَة حَـيَه ابگصْـتـك لا تِبدِّيهْ
لَـوَن بي ضـاگ الهـوه من صـدرك انـطيهْ

[ إبرز وقـاتـل   مِثل ابو فاضـل     دون الِخــيام ]
[ يبني لَتسالِم   بس بني هاشم      ترفـــع الهـام ]
_____

روحي ظَلمه وتضحــياتك بيها نبراس
وقِدوتي أم البنيـن او اِنتــه عبـــاس
كل محرَّم بِسمي تبقه اتسولف الناس
أم وهب ضحَّت بِـبنها ورُفـعَـت الراس

[ بيك أريد أفخَر  واِسمي خل يكبر   صِيته كل عام ]
[ آنــــه نــاذرتَـك   فدوه قـدَّمـتَك    لجل الإسلام ]
_____

يبني كلمن مشه بدرب حسين ربحان
والنِـزل مِن السَّـــــفِـينه يبـقـه نَدمـان
گـوم حظّـر هُـوســتك وانـزل الميدان
آل هاشـــــم ـ مـا تبــايع ـ آل سُـفيـان

[ يبني طُبلهم     هيجي گـللهم     سـاعتك هاي ]
[ مانبايعـــكم      بل نقــاتلـكم      والنَصـر جاي ]
_____
 
لا يخوفـــونك ييمـــه بكــثـر الأعـداد
إشـتـِـعِـل بالغــيره نـار اوذبهـم ارمـاد
أرد اشوفك ريح صرصر تعصف اعناد
وتِنحسِب باجر ٱمن أنصار ابو الســجاد

[ إنتـه وانصــاره    شِـنَّوا الغَـــاره    لا ترجــعون ]
[ يبني من توگَــع   لجله بالمصـرع   دمَّك ايهون ]
_____


خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

لـ علي الأكبر ع..نزال

هذا الشِــبِـل .. بِـي شَمايِل حيـدر
لو طب علي .. يگلب الطف خيبر

شـايِل .. رايـــــهْ كربـلائيه
تَحـيَـا .. ثورتنه الحُسَينيه
______

بسمِ اللّـــــهْ ياقـهَّــــار وسط الحــومه كـبَّـر
ابحَد السيف ناوي اليوم يكســر رايـة الشر
صاح بصوت وسط الجيش إبن حسين الأكبر
عل ســبعين حط سبعين سـيفي رايـد أكـثر

دگ الصَــدُر .. وانتخه بكل غِيره
دوره وِصَل .. وِبجـــداره ايديره

فارس .. بالساحه القِـتاليه
تحــيا .. ثورتنه الحسينيه
______

ظل يخـتار بالشجعان لا ما ينـطي فُـرصَـه
صاح اليوم والعــبـاس أكــــبر راس أگـصَّـه
كلـمــن راد يتحـــداه جسمـه ايطير نُصَّـه
مَلْك الموت عزرائـيل ماخَــــــلَّالـه حُصَّـه

فارس بطل .. يرهِـب بشخـصـيته
جــدَّه عـلي .. نَفِس عزمه وصيته

وارث .. من حيدر فِـرُوسِيه
تحـــيا .. ثورتنه الحـسينيه
______

إبن حسين هذا الشاب مو أي شاب أمدحه
بالطف چان هَمَّه الدِين ماهَـم بِـل يِذِبْــحَه
للإســــــلام باع الـروح وِعله عيونه فَرحه
عنده اشهود بالمــيدان سيفه وذاكه رمحه

بالمعركـــه .. محَّــد اتدنــاله
مِن الفرَس .. يشمُر الخـيَّاله

نـــازِل .. وِبكامل الحُـــريه
تحــيا .. ثورتنه الحـسينيه
______

ليلى اتصيح يمه أرجوك بَيِّض وَجهي بالطف
عالحگ طِيح والإســـلام كِون بحـيله يوگف
العليا اتريد مِثلك شاب وانته اعليها تِنـزَف
قدوه اتصير للشـــــبـان حـــولك كلها تلــتَف

يم الخـــيم .. أهلك ايهـوسولك
فوگ المجِد .. بيرغ ايرفـعـولك

بالطف .. بيك اتباها يوميه
تحــيا .. ثورتنه الحـــسينه
______

گلـبه ايفور مِن اضمـــاه بس ماضعف عزمه
ظل يزداد حُب واصرار مِنطي لــدِينه كِلمه
ابعِزّ الصيف إبن حسين هَب عالدنيا نَسـمه
لا مـامـات كل عاشـور ظل يتجـــدَّد اسمه

عاف النهـــر .. وْما انـغَـرّ بمــــايه
عالحگ وگع .. اوبِسمه ثَـبَّت رايه

امعدَّل .. شاب وخوش شخصيه
تحـــيا .. ثورتنه الحســـــــــينيه
________

خادم الحسين ع
مرتجى الحسَّاني

07819457321

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

للأكبر ع

[ طب يل اَكبر خل تِصير     ثوره وحسين الأمير ]
ــــــــــــــــــــــــــــــــــــــــــــــــــــــــــــــــــــــــــــــــ

إنتـه أوَّل فــــارس   هاشـــــمي طَبَّـــاها
بـاسِـتك بجــدامك   من دِست فوگــــاها
الغيره بيك اتباهت   حگها مِن تتبــــــاها
ساعه اَشوفك حيدر ســاعه اَشـوفك طه

[ والنهر بيـدك أسـير     ثوره وحسين الأمير ]
ـــــــــــــــــــــــــــــــــــــــــــــــــــــــــــــــــــــــ

يا أســــد بجفوفك  سِيطر اعله الغابه
واليخـالف رايك والله قاسي احسـابه
إگْـلُب الطـف خيـبــــــر يلَه واقلع بابه
خلها بس تِـتـناشَد حـيدر إلنه اشجابه

[ خلها بفعـالك تِـحِير     ثوره وحسين الأمير ]
ــــــــــــــــــــــــــــــــــــــــــــــــــــــــــــــــــــــ

خَل اشـــــــاهد حيدر آنه من اَفعالك
والزلم تتراجــف من تـشوف اخيالك
والله أشـــجع فارس مايصير اگبالك
للخَـــلِــف متعـــاين حتى لو چَـتـالك

[ راسه بالصارم يِطِير    ثوره وحسين الأمير ]
ــــــــــــــــــــــــــــــــــــــــــــــــــــــــــــــــــــــــ

أبو فاضــل عَمّـك والنعــم من صِيته
بيـــده چـان ايدربك كفـو من تربيته
مِثله تطـلـــع فـارس هايه كل أمنِيته
وانتــه دگيـتــــلـــها صـدرك ولَـبِّـيته

[ بيكم الحگ يِستجير    ثوره وحسين الأمير ]
________

حامي عن احدودك يالغــيور ابسـيفك
واليريـد ايحـــوفك گـبــله طلّع حيفك
اخبطهم وصَفيهم الحرب كلها ابكيفك
خل تفز مرعوبه من يمـــــرهم طـيفك

[ موقفك بالطف چـبير    ثوره وحسين الأمير ]
ـــــــــــــــــــــــــــــــــــــــــــــــــــــــــــــــــــــــــــ

گبل ليغدرونك اخذ منهــــــــــم ثارك
ومن شَرار عيونك بيهم اشعـــل نارك
هذا بِكْر ايصيحك صوته واصل دارك
عمر ابن وِد ثاني ينتــــــــــظـر بتـارك

[ اثنينهم نفس المصير    ثوره وحسين الأمير ]
ـــــــــــــــــــــــــــــــــــــــــــــــــــــــــــــــــــــــــــــــــ

خادم الحسين ع
مرتجى الحسّاني
07819457321

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

        المشترك بالقتِل والقـاتِـل يِجون
        وَقِـفُـوهُمْ ۖ إِنَّـهُـم مَّسْــــئُـولُون
  [ أللَّه يِنصُب مَحكمه   والْـتـحاكِـم فاطمه ]
               وَقِفُوهُمْ ۖ إِنَّهُم مَّسْــئُولُون
_______

فاطمه بيـوم القـيــامه        تظـهر بمـوقف حزين
اتنادي يارب الخــلائق        أَرِنِـي إبنـي الحسـين
ويجي حسين ودمه يجري  اتشوفه مِنّ الودجين
بچـفها تمسح دم رگبته     اتگله راسك يبني وين

وتلتفت لـ الله اوتِگله اليوم أريد
تِنـتِقم من حرمله وشِمْــر ويزيد

[ الأمر من رب السِمَه       والتحاكم فاطمه ]
              وَقِفُوهُمْ ۖ إِنَّهُم مَّسْئُولُون
_

ذوله گِطعـــوا راس إبنـي    وسَلِّـبَـــوا مِـنَّه الثياب
وهَـشّــموا بالخيل صدره    ودمه يجري اعله التراب
حيـــــدر بخـاتَـم تِصــدَّق    يِدفَـع الشَّــر والعـذاب
والحسين اِنطـه بممــــاته    خُنـصــر وخاتَـم ثواب

تِسْع ٱصابع يعني مِنْ صُلْبَه تِصير
تِسِع معـصومين والمهدي الأخـير

[ ملحمه بصف ملحمه   والتحاكم فاطمه ]
             وَقِفُوهُمْ ۖ إِنَّهُم مَّسْئُولُون
_

شايله اجفوف ابو فاضل    بيـدها والكل تِشـــوف
يا إلاهي اتگـلـــــه أُنظــر     ماذَنِب هـاي الجـفوف
اجفوف كافــل بِنتي ذني    گطِّـعـوهن بالســيوف
ربـي ثــــبـتـهِـن مـنــايـر    خل تگر عين الطفوف

إبني عبـاس الرفع راس أمَّـه بيهْ
اليوم اَطالب يا إلاهي بگطع اِديه

[ واَرد اَقيمن مأتمه      والتحاكم فاطمه ]
             وَقِفُوهُمْ ۖ إِنَّهُم مَّسْئُولُون
_

بيا ذنب عـبد الله بالطـف    ينــذبح بحضان أبوه
عمره ست اشهر وضامي    گطره وحده ماسگوه
اتنازع الجيش اعله حـاله    وتالي بالنبــــله رموه
بيش مطـلـــــوبه الربـاب     لچـفـها مَيّت رجّعوه

عمره شـمعه وتنطفي بعينه الحياة
وجهه أحلـه اهواي من ماي الفرات

[ يشكي من حر الضِمَه  والتحاكم فاطمه ]
              وَقِفُوهُمْ ۖ إِنَّهُم مَّسْئُولُون
_

علي الأكـــــبر شـنهو ذنبه     تِنسـفِك بالطف دِمَـاه
يـا نوايــح گلــب ليــــــلى     للعـرش واصل صَداه
ورمله چن اتشوف جاسم     واگـف المـوت ابگفاه
طَلَـع ، شِتذب مـاي ماكـو     شُمـرت الدنيـــا وَراه

آنـه أم واَشــــعر بحـال الأمَّهـات
الأم تِموت اويه الولد لو يمها مات

[ اعليه تنوح ولاطمه    والتحاكم فاطمه ]
               وَقِفُوهُمْ ۖ إِنَّهُم مَّسْئُولُون
_

بيا شرع زينب سِــــبوها     وچَـتِّــــفوها بيا سـبب
هاي لَبـْــــــوَتْ آل هاشم     زينب أم حَچي الذهب
تِحلف الناس بخـــــدرها      تـالـي يِتوَلُّـــوها سَـب
بِت علي واخت ابوفاضل    تنضـرب بيـن العــرب

وماكو بيهم عنده ذرَّه امن الاصول
شـالـته الغِيره على اعيال الرسـول

[ تِطلُب ابحـگ الدِمه         والتحاكم فاطمه ]
               وَقِفُوهُمْ ۖ إِنَّهُم مَّسْئُولُون
___

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

للسيدة رقية عليها السلام

عنّ اِعيـوني بِعــدوك بويه بويه
وراس لحضني جابوك بويه بويه

شفتك بالحلِم وِچفوفك اِتگـلّي تعـالي
ياساعه التجي مو شيِّـبَت گلبي الليالي
======================

ابعين اِليْ فارگ أبوْ اتموت الحيـاة

تاخِذَه بهـمـها او تِجيبه الذكريات

لاجفـوفك لاعبـــــاتك وين أبـات

بالسـفر گالــولي ماگالــولي مات


گالولي بسفـر راح بويه بويه
بس ما أگدر اَرتاح بويه بويه

تدري اِنته عزيز او عِد رقيه اهوايه غالي
ياساعه التجي مو شيِّـبَت گلبي الليالي

========================

بويه أقسِـم ما أزعلك بس تعــال

طيِّب اجفوفي الگِصتْ بيها الحِبال

وين اَشوفك والله فَت گلبي السؤال

أرد أنــام اِبحضنك او أشـبع دلال


شيرَجْع الزمن ذاك بويه بويه
واَرجع ألتقي اوياك بويه بويه

غيرك بالوجود اشعندي چا هوَّه شبقالي
ياساعه التجي مو شيِّـبَت گلبي الليالي
========================

بويه من جـابوك إلي كلشي نسيت

ورغم صعبه اجروحي بس أشعر شِفيت

گـلّي شنهي العطّـلك عني او بطيت

دوّرت عنك أثـر بس مالگـيت


إِحچي وعــوف الِفراگ بويه بويه
صدري لصدرك اِشتاگ بويه بويه

أرد اَشبگ عليك او احچي وياك الجرالي
ياساعه التجي مو شيِّـبَت گلبي الليالي
========================

يـا أبـوي وخيمتي وحلمي الچــبير

ليش بالطف جسمك وراسك أسير

اعيونك اتخبّرني عن حالي اشيِصير

وآنه اَگلهِـن هذا ميعـــادي الأخير !!


كسروا گلبي بالشام بويه بويه
وذبحوا كل الاَحلام بويه بويه

مو گتلي أبد ماعوفج او عايفني تالي
ياساعه التجي مو شيِّـبَت گلبي الليالي
========================

عَـطِّشُوك او مَـوِّتَـوا بِيَّـه الخَضَار

وروحي شبه الصحره وِتصيح البِدار

بلا وجودك ، گمت أوِن ليل ونهار

وغير أبوها اشعدها تترجَّـه الزغار


وبنتك تدري شتريد بويه بويه
بس اتشوفك اتهيد بويه بويه

ضُـمْني بفَي أمانَك خايفه والظيم حالي
ياساعه التجي مو شيِّـبَت گلبي الليالي
========================

خادم الحسين ع
مرتجى الحسَّاني
https://www.tg-me.com/MM_lt5

((روح الحسين كانت حاضرة مع السبايا في طريق السبي))

مِشينه وروحك اويانه نِضيع او هِيه تِـلگانه
الْيفارگ كل هَلَه بيا ذكرى يرتـاح
وَاگول لخاطرك تَعبِ اليسر طاح
مشينه مشينه
__________

شَــــــاءْ اللــه يَـرانَــــه سـبـايـا ونركب النـوگ
ثـلـث تـيــــام صِـيَّـــام وما مِـبتــلَّـه الِـعــروگ
إدينـــه ايسعــرن آلام كـثر ماشبـعن احـروگ
واِذا نِحمل أذى السوط اشيحمِل طبَّت السوگ

ورانه شگد ألـم قاسي يشـيِّب راسك وراسي
ويظل گلبي لمصابك يگطر اِجراح
واگول لخاطرك تعب اليسـر طاح
مشينه مشينه
___

يل مرافگـنه لِلشــام غيور وكلَّك احساس
الْرمح راسه انترس شيب بكثر ماشايل الراس
يَكَسرَك داخِل الروح وَاَحس توجعني اِلَأنفاس
وأخافن لو صحت آخ يوگـــــع راس عباس

أنوح بسكته لا يسمَع أخاف امن الرمح يوگَع
ويگلِّي البِيَّه يشمَـت كافلــج راح
واگول لخاطرك تعب اليسر طاح
مشينه مشينه
_

رغم مأساتِي والخوف وعذابـي اوسطرت البِين
أَكَـسْرَ اَصـنـــام الآلام واَصيح آنه اخت الِحسين
فَخُوره براسك اِنشال تِشـوفك عالي كل عين
وَأحسَّه اينَشْف الِدموع رغم ماعنــــده چفـين

مذبوح او تراقـبنه ها گـد روحك اتحبنه
تِطيِّبْ خاطري من فوگ الِـرماح
واگول لخاطرك تعب اليسر طاح
مشينه مشينه
__

أشِد جرح الزمن بيك وَأرد بحيلي وَأقوَه
اشْما تِقسي المسافات أَگول الثوره تِسوَه
التعب يم جرحك ايطيح إلك سبعين فدوَه
أطب مفتخره للشام قويه وكلِّـي تَقوَى

أطب بموكب أيتامك وَاكمِّـل رحلـة أيامك
علِي وعباس وإنته بيمنتي اسلاح
واگول لخاطرك تعب اليسـر طاح
مشينه مشينه
_

السِبَه اعيالك إلَه يوم لِزومـاً ينفـضِح بِيهْ
وكل ظالـم بَعَد حين تِدور الدائره اعليهْ
يظل دم نحرك ايفور المدامع ماتِـطفِّيهْ
ينـــادي بكربله الثـار على اِعناد اليعاديهْ

تـظل تتصارخ اجروحك ويفِت بِـينه ألَـم روحك
يمَن دمَّـك لبـاب الـثــوره مفتـاح
واگول لخاطرك تعب اليسر طاح
مشينه مشينه
_

أنَا للـثوره ( الإعلام ) وَوَضِّح كل هـدفها
ابوجود إبنك السجاد وَلا يِنمَـس شـرفها
ومَدام اختك يلِ حسين يظل يرمِشْ طَرفها
أسولِف واَفضح ايزيد واَذِل ناسَه بكهـفها

أگــلَّه ابلا وَجَـل ( باطِل ) واَشوْفَه الحگ بَـ اَبو فاضل

ظلام او وَجهَه شع للثوره مصباح
واگول لخاطرك تعب اليسـر طاح
مشينه مشينه
____

خادم الحسين ع
مرتجى الحسَّاني

https://www.tg-me.com/MM_lt5

(روايه من الخيال) بإنّ إمامنا الحسين يعقد مجلساً يوم القيامه بحضور شيعته ومُحبيه ويروي لهم ماجرى عليه وعلى أهل بيته في كربلاء.
***

للشيعه مجـلس ينعـقِــد باچِـر
وِحسين يِفـتَح مقـتـل العاشِـر

عن طف كربله .. يِـروِي مَقـتلَه .. باجـــــر
ـــــــــــــــــــــــــــــــــــــــــــــــــــــــــــــــــــــــــ

وي خـدامه يگعـد ينقــل إلهم أفجـــع أخبــار

بالطف علَى انصاره اوأهل بيته وعيلته شصار

الْخيمه اگباله تِشهد عل حِـرگ هـيبـتها بالنـار

اويِبدي يعتذر من عدها بس مرفوضه الاعذار


بهل لحظه حُور العِين إجن يَمه
گِـعـدن ينوحــن يـم أبـو اليِــمه

گـدام المَـلَه ... يروي مقـتله.. باجـــــــر
ـــــــــــــــــــــــــــــــــــــــــــــــــــــــــــــــــــــــــ

بسمِ اللهْ.. يِگول أبدي ابمُصيبة حرگ الِخيام

كِسرَت ظهري زينب مِن مشت مَسبيه للشـام

حرمـه او كـلـفـتـها بعــايلـه وِبموكـب أيتـــام

واَسمع صوتها يناديني علْ تَّـل والصَدَه اسهام


أسمعـها تـندب هـيَّه وايتـامي
إلحگلي خويه حرگوا اخيامي

عن مصرع هَلَـه ... يروي مقتله .. باجــــر
ـــــــــــــــــــــــــــــــــــــــــــــــــــــــــــــــــــــــــ

أوَّل نكبه حلَّت من فـگدْت أنصاري كِلــهم

وِگفـولي دِرع بالشــــده ماشـــايف مثلهم

حبيب وعابس وجون وزهير المـا أَمِلـهُم

مِثِل أنصاري ما يحصل بعدهم لا قَـبِلْهم

دون الخيم صاروا درع واحد
إلهم يرفرف ظل عَلَم شــاهد

دون العايله ... يروي مقتله .. باجـــــــر
ـــــــــــــــــــــــــــــــــــــــــــــــــــــــــــــــــــــــــ

وثاني امصيبتي بِـبني علي الأكــبر يشــــيعه

شفته اعله التراب او ضاگت ابعيني الوسيعه

ناديته على الدنيــا العـفــا يومـك فجــــــيعه

وْمن مثلي اعله صدره وينذبح بالطف رضيعه


عبد الله والأكـبر نبض گلبي
من فارگتـهم ضيَّـعت دربي

عن كل معضله ... يروي مقتله .. باجـــــــر
_______

وجاسم ثالث امصيبــه الدَهـتني من زمـاني

گـدامي انذبح وِنذبحـت ابروحي الأمـــــاني

عمـره اتلثْـطعش بس سطَّــر آيــات التفـاني

ضحَّـه بعمــره لجـلي وِانكـتـبلـه عُـمر ثـاني


بدم الشـهاده اتحنن اشموعه
وِعليها صورة وَجهه مطبوعه

لـ أمه الثاكِـله ...يروي مقتله .. باجـــــــــر
ـــــــــــــــــــــــــــــــــــــــــــــــــــــــــــــــــــــــــ

وْرابع فاجعه اعله المشــرعه بعضيدي عبـاس

قَـلَّت حيلِـتي وِاستضعفـتني ابطيحـته الناس

حـاسر للخــــــيم رديت أجـرَّن گـوَّه الٱنفــاس

لازم ظهري بيدي امن الألم وألطم علَى الراس


بس إختي عرفت راح أبو الشِيمه
من طيَّحِـت گـدَّامـــــها الخــــيمه

والنوح اعتِـله ... يروي مقتله .. باجـــــر
ـــــــــــــــــــــــــــــــــــــــــــــــــــــــــــــــــــــــــ

وانه امصـيبتي ياشــــيـعـتي اتلگـــاها صبري

ابنص گلـبي السَّــهم لمّن وگــع وِتعــدَّه ظهري

بعيوني شـفت حيـل الشـمر ثَـنَّه اعله صدري

بالسيف اثنعش ضربه ضربني اوحزلي نحري


ويم راسي زينب ظلت اتنــادي
إلحگ على ابنــك جدي يالهادي

اوْ دمَّه البل فَـله ... يروي مقتله .. باجــــــر
ـــــــــــــــــــــــــــــــــــــــــــــــــــــــــــــــــــــــــ

خادم الحسـين ع
مرتجى الحَـسَّـاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

للحسين عليه السلام والدفاع عن الشعائر..

حسـين ماعـايِز جَرِح مَكـســــور ظهره
شِـمِر ثـاني لا تِـصـــيرون ، اعله صدره

الْعنده غِيره اعله الخِيَم لا يِراميــــها بســهم

( حسين ماعـايز جـرح)
______

بـاب چان الطـف اوْ دَم حسـين مِفـتـاحه
الدِين مال او مَد وريده او كَمَّـل اِصلاحه!
حسين جَـيَّـة خـير إجـه ماشاهِر اسلاحه
اشمـالهم شِـهْروا بوجهه اسـيوف ذَبَّــاحه

إجه بمَشـروع الاِصلاح اوبيضَه نِـيتَه
يدري هاي الناس توگـف ضِد قَضيته

وِالقَـراها او مافَـهَم لا يراميــــها بســهم
حسين ماعـايز جـرح
________

حسـين رايدنه انتكـاتف واحنه خــدّامه
اِنصير عَثره بدرب خصمه موش جِدَّامه
بَدَل ما نلِچم اجروحه إنـوخِّر اِســـهامه
انردله خاتَم خنصر اِيده وذيچ الِعــمامه

لو رِدِت تدخِـــل الگـلـبه جـازي طِــيـبَه
إنطانه عمره وعُمر أخوه واِخته الغريبه

الْينحسِب مِن الخَدم لا يراميـــــها بســهم
حسين ماعـايز جـرح
______

حسـين عَـيَّـشنه بكرامـــــــه والثَمَن روحه
مرمي بالحَـر حتى چَـفنه النــار مَـتـلــوحه
وَســفه ماقَـدَّرنه جَـيْـته او تَعـبه وِجروحه
شگد غيور اعله اخته ظلت عينه مشبوحه

اموسد اوبآخر أنفاسه بشِيعـته اِيـهِم
هـوَّ يِـبْـنِي وإحنه عل حـاضر نِـهــدِّم

رُوحَه مَنجَـمْ للـقِـيَم لا يراميــــها بســهم
حسين ماعـايز جـرح
_______

رايد اليوفي ابكِلِمْـته اويحمي مِنهـاجه
مو يجي ايسلِّـب اثيـابه وْخاتَمه وْتاجه
حسين مامحتــاج واحد إحنه نحـتاجه
ابظهره خلّه الماي بالطف تِلطم أمواجه

عاهَد الله وِانطه لـ الله الغـالي كِـلّه
مـايريـد اتعـيــش خــدامه بمَــــذلّه

بـنَـهضِته اتحدَّه الألـم لا يراميـــها بســهم
حسين ماعـايز جـرح
_______

ياخَدم رصُّوا الصفوف اوَّحدوا كِلمَتكم
ولا تِخلُّون العدو ايشق صف عقـيدتكم
الْخيمـه إلِحترگت لزينب هيه خيمتكم
اوتحترگ مَرتين بالطف ترضه غِيرتكم

كربله مِن تِدخـل بنـص محتواها
راح تـلـگه اشگد قَـرابين بــثراها

كربلـه الفاهمهــا دَم لا يراميــــــها بســهم
حسين ماعـايز جـرح
_________

خادم الحسين ع
مرتجى الحسَّاني

خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

مِن كل بُـقعه بالكون جِمعَت كربله الناس
اَللَّه اِشخلَّه بِـ حسين شنهو السر يعـباس
________


نِمشيلك مِـنّ البحـر إلى النحـر
نمشيلك وانحطِّم أَصنـام الخَطر
نمشيلك ما نتعب، اِنْـتَعبِ الدهر
نمشيلك يدفعنه حبنه بهل سَفَر .. نمشيلك

شَدِّينه الحيازيم لِلطف يابو الاَحرار
اوْنشرب بالدرب ماي بس مايبـرد الثـار
يا سِر عشگ الگلوب ياتاج العلَى الراس
الله شخلّه بحسين شنهو السر يعباس
____

بگلوبنه إنته اَوَّل او آخر عشِگ
بگلوبنه مُوته ونبض حبك يدِگ
بگلوبنه يوميـه خيمــه تحـترِگ
بگلوبنه نِسمع اضلوعك تنسحِگ.. بگلوبنه

مَشَّايه او حفظناه اوننـدَل دربك منين
طعم السَفره وَياك مثلِ الجنَّه يحسين
يمك راحت البال ياسلطان الاِحساس
الله شخلّه بحسين شنهو السر يعباس
____

راياتنه بِسم العشِگ لجلك ترِف
راياتنه حرَّه اِو أبـد ما تنچـتِف
راياتنه لو طاحت اتخظّـر ألِـف
راياتنه كلها اعله حـبك تِئـتلِف ..راياتنه

سَدِيناها الِبيوت ولگبرك حدَه الشوگ
اگلوب اولاگت اعليك وِانته اعليهن اتلوگ
نعمه امن السَّمَاوات بالطف وسفه تنداس
الله شخلّه بحسين شنهو السـر يعباس
____

خطواتنه. تَسبيحه تِخلص بالدرب
خطواتنه. مرتبطه وي نبض الگلب
خطواتنه. بحاصِل تَعـبهِن تنـظرب
خطواتنه. يلگَنْ أجرهِن من نطب ..خطواتنه

اِنعيد الماضي وِنزود نِنطي چفوف وِعيون
وننزل علْ خيم ماي مابِيـنه الْيِحـرگون
ليش اليِخْدِمَك صار من اِجدامه ينباس
الله شخلّه بحسين شنهو السر يعباس
____

شباچك. والله اِشتهينه اِنشِم عطُر
شباچك. لِلـزايـر ايظل ينتــظُر ...!!
شباچك. بي جمره من ذاك الخِدُر
شباچك. دايِـر اضلوعه اعله الگبر
..شباچك

هنياله اليجي ايزور منـك ياخـــذ امراد
عشرين بصفر صار للشوگ اَحله ميعاد
بي تتلاگه الِگلوب وي اَغله امن الاَنفاس
الله شخلّه بحسين شنهو السر يعبــاس
____

خادم الحسين ع
مرتجى الحسَّاني

https://www.tg-me.com/MM_lt5

السيدة رقية تخاطب الشمر اللعين

سَلّبني واحرگ خيمتي بس خَـلِّيْ خيمة عَمِّتي

خيمه اِو بخِيتَه اتعَـثْرَك كِون الله ياخذ عُمرك
ـــــــــــــــــــــــــــــــــــــــــــــــــــــــــــــــــ

ياشــــمِـر هاك التراچـي اوعوفها
اعليك لا تدعي اوتمِـد اچفـــوفها
ينزع اعيونه الْـيريد ايشــــــوفها
الچان جبريل بعظمتــه ايطـوفها

إضربني واحرگ شِـيلتي بس خلّي خيمة عمّتي

باجر يِفُضحَك غدرك كون الله ياخذ عمرك
ــــــــــــــــــــــــــــــــــــــــــــــــــــــــــــــــ

إحذر الخيمه ابشـراره اتلوحها
صيت ابو فاضـل يدور ابروحها
لا تزعْـل اختــه وتزيد اجروحها
حيْ تره العباس يســمع نوحها

مجبوره أشوْفَك دَمعِتي بس خلّي خيمة عمتي

وِبسيفه نگطع نحرك كون الله ياخذ عمرك
ـــــــــــــــــــــــــــــــــــــــــــــــــــــــــــــــــ

چان عمّي لمـن ايمــاشــــــيـها
يمـســــــــح ابچــفه أثر رجليها
النَســــمه ماچانت تمــر اعلـيها
إلّا تاخـــــــــــذ أمـر من والـيها

ماترحم أدري بحالتي بس خلّي خيمة عمتي

دافن ضَغَينه بصدرك كون الله ياخذ عمرك
ـــــــــــــــــــــــــــــــــــــــــــــــــــــــــــــــــ

خـلِّي بس هل خـــيــمه لاتدنـالها
بيها عن الناس تِســــــــتـر حالـها
فازعــه اعله النار اديك اشــمــالها
ماگلـت عِـدمَن تبــــات اطفـــالها

خليني أموت بحسرتي بس خلّي خيمة عمتي

فازع عَلينه ابـشَرَّك كون الله ياخذ عمرك
ـــــــــــــــــــــــــــــــــــــــــــــــــــــــــــــــ

طَفّي نارك خاف يطلـــع صــــوتنه
النار متعلمه اعله حرگ ابيــــــوتنه
الگاع كـلها اتفـصـــــــلَّت تــابوتنه
الطف بِـسمنه امسـجَّل اوميـفوتنه

ماريد اعيش ابدنيتي بس خلّي خيمة عمتي

باچر الدنيا اتشِهرَك كون الله ياخذ عمرك
ــــــــــــــــــــــــــــــــــــــــــــــــــــــــــــــ

شلون تِرجِـم بالشـــــــتِـم قرآنك
لو عدِل عمي يگـص إلســـــــانك
راح أگـله الشـمر طگ نســــوانك
عود ذيچ الســـاعه ظل بمچـانك

عباس اصيح بجمرتي بس خلّي خيمة عمتي

يم الله شنهي عذرك كون الله ياخذ عمرك
ـــــــــــــــــــــــــــــــــــــــــــــــــــــــــــــــ


خادم الامام الحسين"ع
مرتجى الحســّــــاني
https://www.tg-me.com/MM_lt5

ياخدام أنَا المهدي وِعلَه الخدمه اوصيكم
گدام الخدَم باجـــر يم الله افتخـر بيكم
نِعمه ودافعلها حســـين نحره
مامحسوب شيعي المايشكره
____

أوصيـكم على حســــين وْعلى احياء المجالس
أريدنــكم تضـــحُّــــــون مثل ماضحــه عـابـس
إلبســوا بِـيض الگلـــوب عكـس لــون المـلابس
انا الهاضمـــــــني ياناس عمْـــتي بلايه حـارس

وانا بكل عـام اعاينها تركـض طارّه الهيمه
لمّن طاح ابو فاضـل طاحت هيه والخيمه

طاحت والحُسين انكسر ظهره
مامحسوب شيعي المايشــكره
_____

الما لاچمـته الِخـــــيام لا يبچـي لمحـــــــرم
المافاهم حَچي حسين لاينصــــــبـله مـأتـم
انا كل عمري عاشــــور ودمـوعي تصـب دم
أبد ماتطفه للمـــــــوت جمـرات المخــــــيم

عله العباس ابو الغيره أبد ماتنطفي ناري
واشـوف بگلبي عَمّاتي كلهن يدعن لثاري

حسين انطانه اخوهْ ونطانه عمره
مامحســـــــوب شيعي المايشكره
_____

يشيعه يل تواســــون إلطموا وذكروا زينب
سبيه امرافگه الروس مشـت وِخيَمها تلهب
هذاك ايطگها بالسوط تولاها حَچـي وسَب
وهذاكه لازم المـــــاي عمداً يمـها يشـــرب

وهذا ايمزِگ الرايه اگبال عيون كافلها
ظربت راسها بقوَّه بالمحـمـل الشـايلها

ومن فوگ الرمح كافلها يبـره
مامحسوب شيعي المايشكره
_____

دَيَن الخــــدمه ياناس اوْ حـگ الدَين أرجعه
كِلمن أجره محفــــوظ وِ عليكــــــــم أوزعه
الْيلطــم واليصب ماي وِعله امصـابه ينـــعه
والباچي اعله الِحسين مِن النــــار اطلـــــعه

من أسمع عله المنبر يقـرأ الناعي لطميه
انهض انه وجروحي واحضر بالحُسينيه

وَيّـاكم أصـــــيح بحـزني واقره
مامحســـوب شيعي المايشكره
_____

كِون اليخدم حســـــــين يرخصله بحـــيـاته
حتى اتشــــــمـله دعوات قُدســيَّه بممــــاته
حسين اعله الشرف مات وِيشــــــهدن بناته
إنطـــــه لحفظ الْحـجاب أعز وحده بخواته

كِون الـ مِن صدگ خـادم يِطبَع كربله ابَّـاله
لا مو معــــركه وفاتت لازم ندرس افعــاله

مو بس عَبره طف حسين عِبره
مامحســـوب شيعي المايشكره
_______


خادم الحسين ع
مرتجى الحسَّاني


خادم الزهراء مرتجى الحسَّاني
يازينب إنتي أول ( نهر )    تروينه بس عطشانه !!
https://www.tg-me.com/MM_lt5

تقول الروايه: دفنها أمير المؤمنين"ع وعفّى موضع قبرها، فلما نفض يده من تراب القبر هاج به الحزن، فأرسل دموعه على خدّيه وحوّل وجهه الى قبر رسول الله "ص فقال: السلام عليك يارسول الله والسلام عليك من ابنتك وحبيبتك وقرة عينك وزائرتك والبائته في الثرى ببقيعك المختار الله لها سرعة اللحاق بك ....
________

نفض مِنَّـه الـتُراب وهاجـت أحـزانه
وكلمــة فاطمــه ظلَّـت على إلسـانه

دفنها ورجع مقهور وليليه علي ايزور
يگعد يم گبرها ويتلو قرآنه
____

چـانت تخـفي سطـرتـها لو طب حيــدر اعليها
وِتحِط چفها فوگ العين خاف ايصِد علي بيها
ولـمَّن مــاتت الزهــــراء وبِده ايغسـلها واليـها
لـن عاين زراگ الســوط غـيَّر كـل معـــانيـــها

بچـه ،وأصحابه عالموقف يسألونه
يگلهم عاينت ضربــات ملـعــــونه

وضلع من عدها مكسور وليليه علي ايزور
يگعد يم گبرها ويتلو قرآنه
____

علي من عايَن الضربات گـوَّه ايجـر بقـه بنِفسه
جسمها بي جُروح اهواي أثر سـطره وأثر رفسه
صَلَّى اعليها تـالي الليـل واَملاك السمه اتحرسه
وِليْـشيِّـع حـبـيبه شلون يجبر خاطره ويـنسه

صــار الگـبـر حاجـز بينـها وبـينه
وداره ابلايا فاطم مگبــره بعـينه

دافـن بالگـبر نـور وليليه علي ايزور
يگعد يم گبرها ويتلو قرآنه
____

حسب ماوصِّته الزهره دفنها واَخفى موضعها
سـرّ او يبـقى للتــاريخ عن مأســـاة مصـرعها
ليش أَخفَوا گبرها بليل ومحّـد راح شيـــــعها
علي بس هوَّه وأهل البيت مِن اِديـاره طــلَّــــعـها

هذا السِر سبب كـافي لـظُلامتـها
شهيده فاطمه اوظلـمـتها أمَّـتـها

اِختفت عن باقي الِگبور وليليه علي ايزور
يگعد يم گبرها ويتلو قرآنه
___

ليله امن الليالي ايزور نـام وشـــاهد البضعه
تگله اگعد يبو الحسنين واِگصـد دارك بسـرعه
زينب فزَّت امن النوم واَدري اعليَّه منفجعه
تره لوما لِگتني اتموت موتت فرگه مو دَفعه

إترك كلشي بيـدك واِرجع لـبيتك
زينب فاگـده ومحـتاجه حنِّيتك

رَدّ وگلبه مجمور وليليه علي ايزور
يگعد يم گبرها ويتلو قرآنه
____

مـا وَجَّــه عـتب للبـــاب ظل يعـتِب على الأُمَّـه
ليش بلا عـدِل واِنصـاف تغصب حگَّه واِتـظلمه
تره مابيـــها زود اِرجـال تِتـبـاهــا بقَـتِل حُـرمه
ماتت غاضبه اعله الگوم بيها امن الغدر هَضْمه

أكو نَص بالوصيه او فَرُض تطبيقه
رضا الله من رضا فاطمه الصدِّيقه

شهيده وحگها مغدور وليليه علي ايزور
يگعد يم گبرها ويتلو قرآنه
__

خادم الزهراء عليها السلام
مرتجى الحسَّاني 07854824915

https://www.tg-me.com/MM_lt5

من منطلق قوله تعالى" أَفَإِنْ مَاتَ أَوْ قُتِلَ انْقَلَبْتُمْ عَلَى أَعْقَابِكُمْ " قال مولانا أمير المؤمنين (عليه السلام): " حتى إذا قبض الله رسوله، رجع قوم على الأعقاب، وغالتهم السُّبل، واتكلوا على الولائج، ووصلوا غير الرحم، وهجروا السبب الذي أمروا بمودته، ونقلوا البناء على رص أساسه، فبنوه في غير موضعه...."
________


بعـدَه الرســـول بلا دفِـن نصبـوا سقيفه !
ونكـروا ولايــــــة حيدره وحطَّوا خليفه

رجعوا علَى الأعقاب ودم فاطمه اعله البـاب
(( أوّل جريمه ))
____

رسول الله جنــــازه بعده مطروح
وعلي ايغسِّل حبيبه وگاعد اينوح
عجب نكروا وصيته بطلعت الروح
بثگل حملِ الرســاله تركوا اجروح

انجمعوا حدر سقف الغدر والنِـيَّه سوده
سـنَّــوا سنـاين ضـد علـي وادم حقوده

مـو يِدِّعون أصحاب ودم فاطمه اعله الباب
أول جريمه
____

إجوا كلهم حقد وگفوا على الدار
وبده الثاني يصيح إخرج يكـرار
إذا مَـتبـايــــع انشـب دارك بنــار
بمصير الأمَّه تحكـم وادم أشـرار

وسفه اِندفع باب النبي عالزهره وسـفه
ورادت تردهـم فاطمـه وعصروها خلفه

مو صحبه ذوله اِذياب ودم فاطمه اعله الباب
أول جريمه
_____

خذوا حيدر غصب من داره مقهور
يمِـد للبيعــــه چفَّـه وهوَّه مجــبور
وطلعت فاطمــه واِحجـابهـا النـور
تگلهم رجعوا حيدر ضلعي مكسور

لا أكشف لربي السِتِر واَشكيله حالي
واَدعي عليكم بالهَلَاك اعله الجرالي

دعوه بضلع منصاب ودم فاطمه اعله الباب
أول جريمه
____

كـادت فـاطمــــه تـدعي بالاَحـزان
وبِدَت برض المدينه اتموج الاَركان
إذا مـا إلـهـا حيـــــدر ودَّه سـلمان
هسـه الدنيــا تلـگـاهــا بخـبـر كان

طاعت لَمَن سمعت علي گاللـها اِرجعي
لوما منعـهـا اَبـو الحسن عالأمَّه تدعي

بس خضعت لأسباب ودم فاطمه اعله الباب
أول جريمه
____

عاشت بعـد أبوهـا أيــام صعبـات
انغصب حگها وطفلها بلاذنب مات
إجوا رادوا رضاها او ينِسِّي الفات
رضـا فاطم رضـا رب الســـماوات

بعد الغدر ندموا وإجواْ حسبـوها تِهدَه
دارت وجهها وماحچت أي كلمه وحده

يم الله عدها اِحساب ودم فاطمه اعله الباب
أول جريمه
____

مـاتت غـاضبــه اعليهــــم أويـلاه
وخصمها بعين حمره تلتقي اوياه
تـوَگفه اگبـالهـا اوتشكِيهْ الى الله
يـرب هـذا الظـلمني او سبَّب الآه

ماراضيه اعليهم مشت لا كلِّمـتـــهم
تِشكـيـهم لـرب السـمه ماسامحتهم

دعوتـهـا بالمحراب ودم فاطمه اعله الباب
أول جريمه
____


خادم الزهراء عليها السلام
مرتجى الحسَّاني 07854824915

https://www.tg-me.com/MM_lt5