📖 #የመራም_ማስታወሻ
           ክፍል ~ ➍
✍ ፀሀፊ ☞አሚር ሰይድ



እኔና ታናሽ እህቴ እንደዚህ እንድንሆን ተከባብረን እንድናድግ ያደረገን ግን አንድ ሚስጥር አለ.... ልጆች አድገው ነገ ለሚኖራቸው ማንነት ቤተሰብ ከፍተኛውን ድርሻ ይወስዳል፡፡ ኡሚ ይሄን ጠንቅቃ ስላወቀች ለነገ መልካም ሰውነት ዛሬ ላይ እኛን በመልካም ለመገንባት ደክማለች፡፡ ኡሚ እርስበርሳችን እንድንዋደድ እንዳንጣላ ሁሌም ትነግረናለች፡፡ እኔ የሪም ታላቅ ብሆንም እውቀት በእድሜ እንደማይለካ እኔ ተሳስቼ ሪም ልክ ልትሆን እንደምትችል ..እዉነት መሆኑን ካመንሽበት ደግሞ ከእሷ ትልቅ መሆንሽን አይተሽ ሳይሆን ለእዉነት ቅድሚያ መስጠት አለብሽ ብላ ትነግረናለች፡፡

ሪምንም ታላቅሽን አክብሪያት የምትልሽን ስሚያት የማያግባባችሁ ነገር ላይ ተወወያዩ ብላ ትመክረናለች ይሄ ልባችን ላይ እንደ ማህተም ያረፈ ምክሯ ነው እህቴ ጋር በመተዛዘን እንድንኖር ያደረገን ፡፡ በተግባር ደግሞ ተአምር ቢፈጠር ተለያይተን አንበላም፡፡ በተለይ ደግሞ ህፃናት የሚወዳቸው ጣፍጭ ምግቦችን ለሪም አስቀምጨላት ልብላ ብላት እንኩዋን እናቴ በጭራሽ አትፈቅድልኝም፤ ምክንያቱም ራስወዳድነት ወይም ስስት መነሻው ይሄ ነው ትላለች፡፡ እኔ የራሴን ቀድሜ ከጨረስኩ ሪም ስትበላ ልቀና ወይም ደግሞ ሰርቄም ልበላባት ስለምችል ሁሌም አንድ ላይ ነው የምትሰጠን፡፡ እኛም በዛው ለምዶብናል ሰው ቤት ቢሆን እንኩዋን እህቴን ብለን ይዘን እንሄዳለን ተካፍለን እንበላለን እንጂ ብቻችንን በጭራሽ አንበላም፡፡
ኡሚ ለብቻ መብላት ፍቅር እንዳይኖረን አድርጎ ስግብግብና ራስወዳድ ያደርጋል ...ብቻውን መብላት የለመደ ሰው ሰው ጋር ሲቀርብ የሚሻሙት የሱ የሆነን የቀነሱበት ይመስለዋል ትላለች፡፡ እንደዚህ ሆነን በማደጋችን በጣም ነው የምንዋደደው ሪም ለኔ ሁሉ ነገሬ ናት ሁሌም አብረን ነን አንለያይም ስታለቅስ አብሪያት አለቅሳለሁ ስትደሰት ደግሞ ከእሷ በላይ እኔ እደሰታለሁ፡፡ እሷም ያለኔ አይሆንላትም የትም ሁና መራምስ ትላለች፡፡ ኡሚ ቁርአን ቤት ከመሄዳችን በፊት እዛው ቤታችን ቁርአንን ለመሀፈዝ እንድረዳን አሊፍ ባ ታ.. ለይተን እንድንሀፍዝ አድርጋ ሀርፎቹንም አሳውቃናለች፡፡
የሰዉ ባህሪ በአስተዳደጉ ይወሰናል ይባል የለ ባህሪ ፀባያችንም ለጎረቤት ለሰፈር ምስጉን የምንባል ልጆች ነን


አባቢ ልጆቹን ናፍቂ ሚስቱን አፍቃሪ እና ቤቱን አክባሪ ነው፡፡ ከስራ ሰአት ውጭ ያለውን ጊዜውን ከልጆቹና ሚስቱጋር ያሳልፍል፡፡ እኛን ለማጫወት ሲል ፈረስ፣በሬ እየሆነ ያጫውተናል በግራና ቀኝ ትከሻው ላይ እንደ ጦጣ ተንጠላጥለን አቅፎ ያጫውተናል፡፡ ቤታችን ውስጥ ፍፁም ሰላምና ፍቅር የሰፈነበት የሚያስቀና ቤተሰባዊ ትስስር አለን፡፡ እኔና ሪም ከእህትነትም በተጨማሪ ጓደኛሞች ነን፡፡ ሪምን በሁለት ክፍል እበልጣታለሁ፡፡ እኔ 4ተኛ ክፍል ስሆን ሪም 2ተኛ ክፍል ነች፡፡ የቤት ስራ የማሰራት የማስጠናት እኔ ነኝ፡፡ እኔን ደግሞ ኡሚ ታስረዳኛለች፡፡

የእናቴ ማህፀን ሁለት የምትወዳዱ እህታማቾች እስኪ አንድ ወንድም እነሆ ብሎ ጀሊሉ ወስኖ ....አልሀምዱሊላህ እኔና ሪም ወንድም ተወለደልን! ኡሚ የጠፋውን ወንድሟን በማስታወስ ፈይሰል ብላ ስም አወጣችለት፡፡

ፈይሲ በመልክ አባቢ ጋር ይመሳሰላሉ፡፡ አባቢን የሚያውቁ ሰወች ፈይሲን ባዩ ጊዜ "ትንሹ ዩሱፍ" ብለው ይጠሩታል፡፡ አባቢ ከመቸውም ጊዜ በላይ ደስታው እጥፍ ድርብ ሁኗል፡፡ ፈይሲ ሲወለድ የእርዚቅ መክፈቻ ቁልፍ ይዞ የተወለደ ይመስላል፡፡ሂወታችን በበለጠ ተሻሻለ፡፡ አባቢ አውራ ጎዳናን ለቆ ጥቁር አባይ የከባድ መኪና ሹፌር ሆነ እሰከ ጅብቲ ድረስ ስለሚሄድ አበሉ ከደመወዙ በላይ ነው፡፡ ገቢያችን ከመሻሻሉ በተጨማሪ ደግሞ ከምንኖርበት የመንግስት ቤት ተላቀን የግል ቤታችንን ለመገንባት በማህበር የተደራጅት ቦታ ተሰጠን፡፡ በዚህ ጊዜ ፈይሰል የ2 አመት ልጅ ነበር፡፡አባቢ ልጆቹን ከኪራይ ቤት አውጥቶ በራሱ ቤት አንቀባሮ ለማሳደግ ከወትሮው በበለጠ ጠንክሮ ይሰራል፡፡ የቤቱን ግንባታ ተጀመረ፡፡ ፈይሲ ብዙ ለውጥን ይዞ መጣ፡፡ እማ በፈይሰል ውስጥ ሶስት ማንነትን ማየት ችላለች፤ ወንድሟን፣ ባሏን እና ልጇን ታይበታለች፡፡

አባቢ ለስራ ከሄደበት እስኪመለስ ድረስ በጣም ይናፍቀናል፡፡ እማ ልጆቹንና ቤቱን በመንከባከብ ትቆያለች፡፡ አባቢ ይመጣል ከተባለ ሙሉ ቀን ቤት ውለን ስንጠባበቀው ብንውል ደስተኛ ነን፡፡ አባቢ ወደ ቤት ሲመለስ ስጦታ ይዞልን የመምጣት ልምድ አለው፡፡ አባቢ ለቤተሰቡ ቅድሚያ ይሰጣል፡፡ ለልጆቹ ፍቅር ሰቶ ለሚስቱ ምቾትን መፍጠር ይችልበታል፡፡ ለቤተሰቦቹ ሲል ይሞታል፡፡ ሀላፊነቱን አይዘነጋም፡፡


ፈይሲ ሶስት አመት ሞላው እኔም 7ተኛ ክፍል ሪም ደግሞ 5ኛ ክፍል ደረስን፡፡ በዚህ ጊዜ ነበር ሁኔታወች መዘበራረቅ ጀመሩ ...ዱንያ አንድ ቀን ወይ አንድ አመት ወይ አንድ ወር ወይም የተወሰኑ አመታት ደስታን ትለግስና ጀሊሉ እንዳለዉ ዱንያ የትንኝ ክንፍ ያህል ለኔ ቦታ የለትም ብሎ እንደነገረን የቀናት የወራት ወይም የአመታት ...ልፈትንም ካለ እስከ እለተ ሞት ድረስ የሀዘን ድር መጣል ይችላል ..
የሚያምር ሰዉ የሚቀናበት የኔንም ትዳር እንደነመራም ቤተሰቦች አድርግልኝ ተብሎ ዱአ የሚያደርጉበት ጎጆ የዱንያ ፈተና እየተከታለ እየመጣ የእናት እና አባቴን ኢማን መፈታተን ኢማናቸዉን ከልባቸዉ ላይ መቦጨቅ ጀመረ...የሀዘን እና የዱንያ ፈተናዎች ሊጀምሩ ተንደርድረዉ ሊመጡ እያሽኮበኮቡ ነዉ...

በእናትና አባቴ በጣም የሚቀናበት ትዳር ከከፍታ ቦታ ላይ እንደ ወደቀ ጠርሙስ መፈረካከስ የጀመረዉ.. ምን ይሆን ምክንያቱ??

#ክፍል ➎
ይቀጥላል......


www.tg-me.com/IslamisUniverstiy_public_group
  www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➎
✍ ፀሀፊ ☞አሚር ሰይድ



በእናትና አባቴ በጣም የሚቀናበት ትዳር እንደ ወደቀ ጠርሙስ መፈረካከስ የጀመረዉ ...ፈይሰል የሶስት አመት ልጅ ቢሆንም ፍጥነቱና ንቃቱ ግን ከእድሜው በላይ ነው በዚህም የተነሳ"ባጃጅ" የሚል ተቀፅላ ስም ወቶለታል፡፡ ሩጫ በጣም ይወዳል፡፡ እማ ቀስ እንዲል ብትመክረው ብትቆጣውም አልሆነላትም፡፡ከቁጣዋ ይልቅ ፍቅሯ ያሸንፋል፡፡ ምክንያቱም ፈይሲ ለሷ ሶስት ሰው ነው፡፡

ፈይሲ ፈጣን ከመሆኑ ጋር ተያይዞ ሲሮጥ ቤታችን ፊትለፊት ያለው የውሀ መተላለፊያ ቦይ ላይ ወድቆ ልቡን መቶት ከወደቀበት ሳይነሳ በዛው ዱንያን ለቆ ወደ አኺራ ሄደ፡፡ ኡሚ አበደች ከሰውነት ተራ ወጥታ እሷ ነች ወይ እስከሚባል ድረስ ሰወችን ግራ አጋባች፡፡ አባቢ ልቡ ተሰበረ እሱን መሰል ልጅን የማጣቱ ሰበብ እማን አደረገ፡፡

    ወሳጅ አላህ ሰጪም አላህ
     መቀበል ነው ቀደር አላህ
     እንጂማ እኛ በምን አቅም
     መቅበር እንጂ ሌላ አናውቅም
      ይሁን ካለ ያመውላና
     ማን ያስጥላል ከረበና
       ሁላችንም ወደርሱ ነን
      የሞትን ሰልፍ ተሰልፈን

አባቴ ሁለት ልጆቹን ተንከባክባ የማሳደጓን ውለታ ክዶ በፈይሲ ሞት ምክንያት ኡሚን ኮነነ፡፡ "ቀደረላህ" ብሎ ከማመን ይልቅ " ልጄ ፋይሲ በአንች ግዴለሽነት ቸልተኝነት ሞተ እንዴት አንድ ልጅሽን መጠበቅ አቃተሽ! ለልጅሽ እንኩዋን መሆን አቃተሽ? አንቺ ከደከመሽ ሰራተኛ ቅጠርለት ብትይኝ እምቢ አልልም ነበር፡፡ በአንች ግዴለሽነት ምክንያት ልጄን አጣሁት!" ልጄን ለሞት ዳረግሽዉ እያለ የኡሚን ሀዘን የበለጠ አባባሰው፡፡

አባቢ አላህ የቀደረዉን ማመን አቅቶት የተፈጠረበትን ሀዘን ለመርሳት ሲል ራሱን በሱስ ውስጥ መደበቅ ጀመረ፡፡ አንዳንዴ ሰወች መራራ የሆነን እውነት አምኖ መቀበል ሲከብዳቸው ራሳቸውን ረስተው በሌላ አለም ውስጥ ሌላ የተሻለ ማንነትን የሚያገኘበት ስለሚመስላቸው በሱስ ውስጥ መደበቅን ይመርጣሉ፡፡ አባቢም የፈይሲን ሀዘን መርሳት የሚችለው በጫት አቅሉን ስቶ የነበረውን ትክክለኛ ማንነት ወዳልሆነው አርቲፊሻሉ ዩሱፍ ሲሸጋገር ሀዘኑ የሚቀንስለት መሰለው፡፡

ፍቅርና መተሳሰብ የሞላበት ቤት የፍቅርን ዙፍን ጭቅጭቅ በመንጠቅ የፍቅር ዙፋን ላይ ፀብ የንግስናውን ዙፍን ተቆናጠጠ፡፡ አባቢ እንደ በፊቱ ልጆቸ ሚስቴ ማለቱን ትቶ ጫትን የሙጥኝ ቡሎ ይዟል ቤት ከሚመጣበት የማይመጣበት ቀን ይበልጣል፡፡

ከመጣ ደግሞ ኡሚን ሰይሰድባት ወይ ሳይደበድባት አይመለስም፡፡ በቀጥታ ቤት እንደገባ ፀጉሯን ነበር የሚዳብሰው፡፡ ፀጉሯ እርጥብ ሆኖ ካገኘው ከወንድ ጋር ተኝተሻል...በኔ ላይ ባልገሽብኛል ብሎ መከራዋን ያበዛዋል..እናቴም ቀን በቀን በማልቀስ ያ የሚያምር ዉብ ፊቷ መገርጣት ጀመረ....

ሰወች የሚቀኑበት እንደሞዴል አድርገው የሚወስዱት ቤተሰብ ፍርስርሱ ወጥቶ የፀብ ትርኢት ሜዳ ከሆነ ድፍን አንድ አመት ሞላዉ፡፡

ከአንደኛ ደረጃ ወደ ሁለተኛ ደረጃ ትምህርት ቤት ለመሸጋገር ሀገር አቀፍ ፈተና ለመፈተን ጊዜው ደርሷል ነገርግን ትኩረቴን መሰብሰብ አቃተኝ፡፡ በፍቅር ተኮትኩተን ፍቅርን እያየን አድገን አሁን በቤተሰብ ፀብ ምክንያት ቤታችን እንዲህ መሆን ምን አይነት አለመታደል ነው!


በመሸ በነጋ ቁጥር ሁሌም እኔና እህቴ አእምሮችን ተጨናነቀ ...አባቴ እቤት ሲመጣ እናቴን ስለሚደበድባት ምነዉ ባልመጣ እያልን እንመኛል፡፡
ደስታን ለማግኘት ሰዉ ያልሆነ ማንነት ይላበሳል አባቴ ልጁን በማጣቱ እሱን እረስቶ ደስታ ለማግኘት መጥፎ ጓደኞችን ተከልክሎ በመቃሚያ ቦታ አእምሮን በማደንዘዝ ለማግኘት ፈልጎ ነበር አልተሳካም ..በተለያየ ማንነት ሆኖ ደስታን ፈለገዉ ግን ሊያገኘዉ አልቻለም... ደስታ የዛሬን አያርገዉንና ከቤተሰቦቼ ሲገኝ አብረን ስንቋደስ ያየሁት የሚወዱት የሚኖሩለት ሰው ባለበት ጤና ባለበት መተሳሰብና ፍቅር ባለበት ሁሉ ደስታ አለ ..መጥፎ ዉሳኔ ከመወሰን በፊት ልብን አፅድቶ ደስታን መፈለግ ብቻ ነበር መፍትሄዉ...ለዚህ መፍትሄ አባቴ አእምሮዉን ለማስተንተን ፍቃደኛ መሆን አልቻለም። ይባስ ብሎ አባቴ ሱሱ ከአቅሙ በላይ ሆነበት የሚከፈለዉ ደመወዝ አልበቃዉ ሲል ማመን የሚከብድ ይሆናል ብለን አስበነዉ የማናቀዉ የብስ የቤተሰብ መበታተን አደጋ በአባቴ ሱስ ምክንያት ተከሰተብን..........

የመራም ማስታወሻ ክፍል ➏ ይቀጥላል

Join👇👇👇

https://www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➏
✍ ፀሀፊ ☞አሚር ሰይድ



አባቴ ሱሱ ከአቅሙ በላይ ሆነበት የሚከፈለዉ ደመወዝ አልበቃዉ ሲል ማመን የሚከብድ ይሆናል ብለን አስበነዉ የማናቀዉ በአባቴ ሱስ ምክንያት ተከሰተ.......
ማለቁን በጉጉት ስንጠብቅ የነበረው የቤት ግንባታ አባቢ ከእማ ደብቆ ሽጦታል፡፡ እማ ይሄን ስትሰማ ምንም ማረግ አልቻለችም ሆዷ የብስ ቁስል ብሎ አምርራ አለቀሰች! ልቧ ደጋግሞ ቆሰለ፡፡ ከአባቢ ጋር ለመለያየት ወሰነች ግን ምን ይደረግ እናቴ ነፍሰ ጡር ነች.... እርዚቅ በአላህ እጅ ነዉ ብላ የምታምን ሴት የወሊድ መቆጣጠሪያ መዉሰድ የለባትም እናንተም አድጋችሁ ጎጆ ስቀልሱ የወሊድ መቆጣጠሪያ እንዳትወስዱ ልጅን አላህ ይሰጣል እሱዉ በእርዚቁ ያሳደገዋል ትለን ነበር... ኡሚ በሆዷ ያለው ፅንስ ከመወለዱ በፊት መለያየት አትችልም፡፡ አባቢ ቤት አልፎ አልፎ ይመጣል ለኛ ግን አለመምጣቱ ሰላም ይሰጠናል፡፡

ኡሚ እርግዝናው በጣሙን ከብዷታል እንደበፊቱ የሚንከባከባት ሰው ዛሬ ከጎኗ የለም፡፡ ጎረቤቶቻችን ግን ያዝኑላታል፡፡ በየአቅማቸው ያገኙትን ያማራትን እየሰሩ ያመጡላታል፡፡ በተለይ ደግሞ እማማየ " አይዞሽ ትንሽ ቀን ነው ልጆችሽ ይደርሱልሻል ጠንክሪ" እያሉ ያፅናኗታል፡፡

ቀን ቀንን እየተካ የጊዜ መቁጠሪያ ሰለዳ ከወር ወር እየተሽጋገረ ይሄው እኔም የሁለተኛ ደረጃ ትምህርት ቤት ተማሪ ለመሆን በቃሁ፡፡ የፈይሲ ምትክ መፅናኛ ይሆነን ዘንድ ዳግም አዩብ ተወለደ፡፡ ሚስኪን አዩብ ፍቅር ጓዙን ጠቅልሎ ከመጣ በኃላ ዳግም ፍቅርን ሊመልስልን ይሆን የመጣው!? ብየ ራሴን ጠየኩ፡፡ አባቢ አዩብን ሲያይ ፊቱ በደስታ አበራ ግን ምን ዋጋ አለው፡፡ የተጠናወተው ሱስ አቋሙን አሽመድምዶ አልፈስፍሶታል! ሀላፊነትን መሸከም አይችልም፡፡ አባቢ ጥሩ ሞዴል መሆን ስላልቻለ ይሄን የተበላሸ ማንነት እያየ ማደጉ ለአዩብ ጥሩ ስላልሆነ ኡሚ ከአባቢ አርቃ ብቻዋን ማሳደግ ጀመረች፡፡ አባቢም አልተቃወመም " ከኔ የሚማመው ጥሩ ነገር የለም ልጄን አንች አሳድጊው" ብሎ ፈቀደላት፡፡

እማ ብቻዋን ሶስት ልጆችን ማሳደግ ፍርጃ ሆነባት፡፡ እንደበፊቱ ስራ ለመቀጠር ጊዜው አልፏል አሁን ድፕሎማ በድግሪ ተተክቷል፡፡ ለዚህ ደግሞ የእናቴ የሂወት ቀማኛ ሌባ እኔ ነኝ! ምክንያቱም እኔ በመወለዴ ምክንያት ነው ኡሚ ስራ ያቆመችው፡፡ ከስራ ሁሉ በላጭ እኔን አድርጋ መረጠችን! ታዳ ያኔ በፍቅር አታልየ የሰረኩዋትን ሂወት ዛሬ እንዴት ልመልስላት!?

እማ ለኛ ስትል እኛን ለማኖር ብላ የቀን ስራ መስራት ጀመረች እንጀራ መጋገር ልብስ ማጠብ ቤት ማፅዳት የእማ ቆሚ ስራዋ ሆነ፡፡
በትምህርት እንዳንሰንፍ ትመክረናለች፡፡ " እናተ ጠንክራችሁ ተማሩና ስራ ስትይዙ ከዚህ ሂወት ገላግላችሁ ታሳርፉኛላችሁ!" ትለናለች፡፡ እኔም ሆንኩ ሪም በትምህርታችን አንታማም፡፡ ለማሚ ስል እሷን ከዚህ ሂወት ለመገላገል ስል ከወትሮው በበለጠ መልኩ ጠነከርኩ፡፡


ከትምህርት ሰአት ውጭ ቆሎ፣ ስካር ድንችና የተቀቀለ እንቁላል ከ11 ሰአት በኅላ መንገድ ዳር እየሸጥኩ ኡሚን ማገዝ ጀመርኩ፡፡ ሪም አዩብን መንከባከብና መጠበቅ ስራዋ ነው፡፡ ቅዳሜና እሁድ ደግሞ የቤት ፅዳቱን እኔ እሰራለሁ፡፡ ኡሚ የምትሰራላቸው ሰወች በፊት የነበራትን ሂወት ስለሚያውቁ ያዝኑላታል፡፡ በተለይ ደግሞ ወይዘሮ ጥሩወርቅ በጣም ያዝኑልናል ከደመወዟ በላይ ጨምራ ነው የምትሰጣት ከዛ በተጨማሪ ደግሞ ሽሮ፣በርበሬ፣ የጤፍ ዱቄት እንጀራ በጋገረች ቁጥር እንጀራም ይሰጡናል፡፡ ወ/ሮ ጥሩወርቅ ስራ ባይኖራቸውም ልጆቻቸው አንቀባረው ያኖሯቸዋል፡፡ ከባለቤታቸው ከአቶ አለማየሁ ጋር በተንጣለለ ጊቢ ውስጥ ከአምስት ተከራይ ጋር ይኖራሉ፡፡

እኔም እሁድ ቀን የወ/ሮ ጥሩወርቅን ቤት ለማፅዳት በጧት ሄድኩኝ ወ/ሮ ጥሩወርቅ ልጃቸው ጋር ጀርመን ሂደዋል፡፡ አቶ አለማየሁ ደግሞ ሁሌም እሁድ እሁድ ቤተክርስቲያን የመሄድ ልምድ ስላላቸው በጧት የነሱን ጨርሸ ወደ ሌላ ለመሄድ አስቤ ነበር፡፡

ቤቱንም ጊቢውንም አፅድቸ እንደጨረስኩ ለመሄድ የጊቢውን በር ስከፍት አቶ አለማየሁ ጋር ፊት ለፊት ተገጣጠምን......
የሰዉ ልጅ ኑሮ አንዱን ሲይዙት ሌላዉ ይጎላል .. ጎዶሎዉን ለመሙላት ሲባል ደግሞ ባልጠበቁትና ባልገመቱት ሰአት ከሌላ አዲስ ችግር ጋር ያላትማል፡፡
አይ የኔ መከራ አለማለቁ....

አቶ አለማየሁ ምን አስበዉ ይሆን ???

#ክፍል ➐
ይቀጥላል



join👇👇

www.tg-me.com/IslamisUniverstiy_public_group
  www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➐
✍ ፀሀፊ ☞አሚር ሰይድ



ቤቱንም ጊቢውንም አፅድቸ እንደጨረስኩ ለመሄድ የጊቢውን በር ስከፍት አቶ አለማየሁ ጋር ተገጣጠምን.......
አቶ አለማየሁ እድሜያቸው ከሀምሳወቹ መጨረሻ እስከ ስልሳወቹ መጀመሪያ በሚገመት እድሜ ክልል ውስጥ ይገኛሉ፡፡ ፊት ለፊት ሲያዩኝ " እንዴት አደርሽ የኔልጅ" አሉኝ
" አልሀምዱሊላህ ሰላም አደሩ ጋሸ" ብየ መልስ ሰጠሁ
" ምነው ዛሬ አንች መጣሽ እናትሽ ደህና አይደለችም እንዴ!?"
"አረ ደህና ናት ዛሬ ረፍት ስለሆንኩ ላግዛት ብየ ነው"
"ጎሽ የኔ ልጅ ጥሩ አረግሽ እንዲህ ነው ልጅ ማለት" ብለው እጃቸውን ወደ ኪሳቸው ከተው ተጣጥፎ የተጠቀለለ የብር ኖቶችን አወጡና " ይሄ ለአንዳንድ ነገር ይሆንሻል"ብለው ሰጡኝ፡፡ እኔም በጣም ደስ ብሎኝ አመስግኘ ተቀበልኩ፡፡ " አይዞሽ ወደፊት ብዙ እጠቅምሻለሁ አንች ብቻ እኔ የምልሽን እሽ ማለት ብቻ ነው" ብለው እጃቸውን ትከሻየ ላይ ሲያሳርፉ ሰውነቴን ቅፍፍ አለኝ በቅፅበት በንዴት ፊቴ ተቀያየረ ...ግን ንዴቴን ሊያቀልልኝ የሚችል ቃል ፈልጌ አጣሁ ድንገት አፌ ላይ የመጣልኝን " አንተ የትልቅ ትንሽ የተዋረድክ ሽማግሌ በጣም አሳፋሪ ነህ" ብየ የሰጠኝን ብር በትኘለት ወደ ቤቴ ተመለስኩ፡፡

ብቻየን ሁኘ አለቀስኩ ሂወትን ታዘብካት ድሆች ሺህ ለማገኘት ያለ እረፍት ወር ሁሉ ይለፋሉ ሀብታሞች ለብልግና በቀናት ከሺህ በላይ ያወጣሉ አይ ዱንያ ለአንዱ ድሎት ለአንዱ ፈተና ምናለ ሚዛናዊ ሆነሽ ለሁሉ እኩል ብታካፍይ!? ብየ ደግሞ መለስ ብየ የንዴት ሳቅ መሳቅ ጀመርኩ፡፡ "ይገርማል የሰው ልጅ ግን ትንሽ ሰብአዊነት አይሰማውም!? ልጄ ብሎ አብረሽኝ ተኝ ማለት ምን ማለት ነው!? ንዴቴ ጣሪያ ቢነካም ኡሚ እንዳታውቅ ሚስጥር አድርጌ አፎኘ አስቀረሁት፡፡


ኡሚ ይሄን ከሰማች ዳግም ወደዛቤት እንኳን የኔ የሷም እግር አይረግጥም! ግን ወ/ሮ ጥሩወርቅ ጥሩ ሴት ናቸው ይሄን ነገር ሰምተው ከባላቸው ጋር እንዳይጣሉ ይሁን ወይም ደግሞ የሚሰጡን ጥቅማጥቅም እንዳይቋረጥ ይሁን አላውቅም ብቻ ዝም ብያለሁ ዳግም ወደዛ ቤት ግን አልሄድም ብየ ሀሳብ ሳውጠነጥን " መሪ መተሻል እንዴ ?? አዩብን ይዠ ወጣ ብየ ስትገቢ አላየሁሽም" ብላ ሪም ከሀሳቤ አባነነችኝ "
....እ አወ ተመልሻለሁ ማንም አልነበረም ስገባ" ብየ አዩብን አቅፌ ማጫወት ጀመርኩ፡፡

አዩብ ከኔ በተሻለ ከሪም ጋር ጊዜ ያሳልፋል ለዛም ይመስላል ሪምን በጣም ይወዳል ኡሚ ቤት ብትኖርም ምርጫው ሪም ናት! አዩብን ሳይ ውስጤ በሀዘን ይላወሳል! አንድ ቀን ድሎትን ሳያይ በችግር ተወልዶ በችግር ይኖራል ሚስኪን አዩ! ኡሚም ባየችው ቁጥር "አዩ ለኔ ስህተቴም መፅናኛየም ነው፡፡ ያረገዝኩት በስህተት ቢሆንም ግን ያጣኅቸውን መልሶ አዩ ያፅናናኛል ትላለች፡፡ ባለችን አቅም ሰርተን በምናገኛት ገንዘብ ለአዩብ ፍላጎት ቅድሚያ እንሰጣለን፡፡ ቤተሰቦቼ ሆኑ ጓደኞቸ " መሪ" ብለው ቢጠሩኝም አዩ ግን በተኮላተፈ አንደበቱ "መሊ" ብሎ ሲጠራኝ በፍቅር ልቤን ያሞቃታል፡፡ ጣፍጭ አንደበቱን ሁሌም አልጠግበውም! አይ ልጅነት! ገና ልጆች እያለን ነበር ሪም ስሜን አቆላምጣ "መሪ" ብላ የጠራችኝ የሷን ተከትለው የሰፈር ልጆች በስሜ ብዙ ቀን አስለቅሰውኛል፡፡ "መሪ" ማለት የመኪና መሪ ነው አባቷ ሹፌር ስለሆነ ለዛ ነው መሪ የሆነችው" ሲሉኝ አለቅስ ነበር፡፡ ለቤተሰቦቻቸውም ሂጀ ሰደቡኝ ብየ አለቅስ ነበር፡፡ ያኔ ሪም ብቻ ነበር "መሪ" ብላ ስጠራኝ የምደሰተው አሁን ግን መጠሪያየ ሆኗል፡፡

ጊዜ ጊዜን እየተካ መክነፉን ተያይዞታል፡፡ ይሄው እኔም ወደ ዩኒቨርስቲ ለመግባት ይች አመት ብቻ ቀረችኝ ሪምም ወደ መሰናዶ ለመሽጋገር ሁለታችንም የሀገር አቀፍ ፈተና ተፈታኞች ነን፡፡ አዩም ሶስት አመት ሞላው፡፡ ኡሚ ኑሮ ቢያበሳቁላት ብትጎዳም ቁንጅናዋ እንዳለ ነው፡፡ የማይጠወልግ ውበት! ዩኒቨርስቲ ገብቸ በከፍተኛ ማእረግ ተመርቄ እዛው ዩኒቨርስቲ መቅረት እና ኡሚን ከዚህ ህይወት መገላገል የምጓጓለት ህልሜ ነው! እኔ በዚህ መልኩ ራሴን ከቻልኩ ሂወት አትከብደንም፤ እኔና ሪም ተጋግዘን የእማን ሂወት ማቃናት አያቅተንም፡፡ ስለዚህ ማትሪክን ከፍተኛ ውጤት አምጥቸ እማን ተስፋ ልሰጣት አይዞሽ ደርሸልሻለሁ ትንሽ ታገሽ ልላት ጥናቴን ተያያዝኩት፡፡


በጣም ግራ የገባኝ ነገር ኡሚ አልፎ አልፎ ሲያነስራት አያለሁ፡፡ " አሞሻል" ስላት "አይ ፀሀም ላይ ስለምውል ለዛነው እንጅ ደህና ነኝ አሁንማ ደርሰሽልኛል የኔ ልጅ ከባዱን ጊዜ እንኩዋን ብቻየን አልተውሽኝም ብቻ ተስፍየ በትምህርትሽ ነውና ትምህርትሽ ላይ ጠንክሪ" ትለኛለች፡፡ ሪም እና እኔ ፈተና ጨርሰን ክረምቱን ምን እንስራ እያልን እየተወያየን በመሀል ኡሚ ወደ ቤት ገባች፡፡ የማይጠገበውን ፍቅሯን ሳትሰስት መስጠት የማይሰለቻት ኡሚ ዛሬ ግን ደህነኛ አልመሰለችኝም ፡፡ ሳቅ እና ፈገግታዋ የውሸት የማስመሰል ሆነብኝ አንድ የረበሻት ነገር እንዳለ ገባኝ፡፡
....ቀስ ብየ ተጠግቸ ምን እንደሆነች ጠየኩዋት እቅፏ ውስጥ አስገብታ ሳመችኝና አይን አይኔን አየችን፡፡ የልቤ ምት ፈጠነ የሆነችውን ለማወቅ ጓጓሁ፡፡ አይኖቿን ከኔ አንስታ ወደ ሪም አየች፡፡ ሪም ከአዩብ ጋር እየተጫወተች ወደኛ ትኩረት የላትም፡፡ እማ ወደ ሪም ማየቷ ሪም መስማት የለለባት ከበድ ያለ ጉዳይ እንደሆነ ገመትኩ ጭንቀቴ በረታ.........ጉዳዩ ምን ይሆን???

የመራም ማስታወሻ #ክፍል ➑


https://www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➑
✍ ፀሀፊ ☞አሚር ሰይድ




ኡሚን ያስጨነቃትን ነገር ለማወቅ በጣም በመጓጓት " ምን ሆነሽ ነው ??የሆንሽውን ንገሪኝ??" ብየ በአይኔ ተማፀንኩዋት፡፡ " የኔ ልጅ በጣም በጣም ነው የምወድሽ!! ሁላችሁንም ከልቤ ነው የምወዳችሁ!!" ብላ ወደራሷ አስጠግታ አጥብቃ አቀፈችኝ እና ግንባሬን ሳመችኝ፡፡ " እማ አታስጨንቂኝ የሆንሽውን ንገሪኝ ልጅሽ እኮ ነኝ ጭንቀትሽ ያሳምመኛል!" ስላት
....."መሪ ታውቂያለሽ እኔ እንደ እናት ግዴታየን ሳልወጣ ፍላጎታችሁን ሳላሟላ የልጅነት ጊዜያችሁን ሰርቄ በችግር እንድትሟቅቁ ፈረድኩባችሁ ግን ነገ የተሻለ ቀን ይመጣል በሚል ተስፋ ነበር! ግን ከዚህ በኃላ እኔ ለናንተ የምጠቅም ሰው አልሆንኩም!" ስትል በሀሳቤ የሆነ ነገር ብልጭ አለና በንግግሯ ጣልቃ ገብቸ
,,,,,," ኡሚ አንች እንደዚህ ካሰብሽ እኔ ምን ልበል!? እእእ የሂወትሽ ዘራፊ ቀማኛ ሌባኮ እኔ ነኝ! ያኔኮ እኔን በማለትሽ ነው ዛሬ ከሰው በታች የሆንሽው! ያንች ጓደኞች ዛሬ የት ናቸው!? ደመወዛቸውስ ስንት ነው? አንች አሁን የት ነሽ!? ኑሮሽስ እንዴት ነው?? ይሄኮ ላንች አይገባሽም ነበር ያኔ ከስራሽ አስበልጠሽ እኔን መምረጥሽ ነው ዛሬ ላይ እዚህ ያስገኘሽ! ኡሚ ታውቂያለሽ አንች ነሽኮ ህልሜ የመኖሬ ሚስጥር! እንች ከለለሽ እኔ ምንም ነኝ! ደግሞ አብሽሪ ቅርብ ቀን ነው ሁሉም ያልፍል ዩኒቨርስቲ ስገባ ደግሞ ምንም አላስቸግርሽም ክረምቱን ስራ ሳላማርጥ እሰራለሁ፡፡ እንደ እናት ምንም ሳላደርግ የሚለውን ሀሳብ ከአምሮሽ አውጭው በዋጋ ሊተመን የማይችለውን ውድና ንፁህ የሆነን ፍቅር ሳትሰስች መስጠት የማይሰለችሽ ከእናቶች ሁሉ በላጭ ውድ እናት ነሽ" ይሄን ስናገር እማ እንባዋ በመንታ በመንታ ይፈሳል፡፡
...." እወድሻለሁ ልጄ!!" ብላኝ ተቃቀፍን፡፡ እማን ከዚህ ስሜት ለማስወጣት ያስቃታል ያልኩትን የቆጥ የባጡን ሳወራት ቆይቸ ወደ ቤታችን ተመለስን፡፡


ለሊት በተኛንበት እማን ነስር ከእንቅልፏ ቀሰቀሳት አብሬያት ተነሳሁ ግን ደሙ ከአፍንጫዋ ብቻ ሳይሆን በአፏም እየፈሰሰ ነበር በጣም ደንግጨ ጮህኩ፡፡ ጩሀቴን ስለሰሙ ጎረቤቶች ወዳዉ መጥተዉ ተሰባስበው ወደ ሀኪም ቤት ወሰድናት፡፡

ዶክተሩ እኔን ለብቻየ ጠርቶ ጉበቷ በመፍረሱ ምክንያት የመዳን እድል እንደሌላት ሲነግረኝ ሰማይ እላየ ላይ የተደፍብኝ መሰለኝ! ሰማይ መሬቱ ተሽከረከረብኝ፡፡ መሬት ላይ ቁሜ መሬት ራቀኝ ጉልበቴ ክብደቴን መቻል አቅቶት ተዝለፍልፌ ወደኩ፡፡

ከመሬት አንስተዉ እንደምንም ደግፈዉ ዉሀ ረጭተዉብኝ እራሴን አወኩ ዶክተር ግን የሚያወራውን ያውቀዋል?? ስለሞት ማውራቱ ለራሱ ይታወቀዋል!? #እማ_መች_ኖረችና_ትሞታለች!!!??? "ሞት" የሚለውን ቃል መሰማት ለኔ ከእሬት በላይ መራር መሆኑን አያውቅም እንዴ? ከገባሁበት መራር የሆነ የህልም ቅዠት የሚመስል መራር እውነት ሰመለስ " እናትሽ ለይላ ልታናግርሽ ትፈልጋለች የተኛችበት ክፍል ግቢ" ብለውኝ ገባሁ፡፡

እማ በዛ ሁኔታ ተኝታ ሳያት እንባየ እንደጎርፍ ይፈስ ጀመር፡፡ እማ አይኗ ውስጥ ተስፋ መቁረጥ ይታይባታል፡፡ እንደዛ ሁና የማየት ወኔ አጣሁ ወደ በር ስመለስ"መሪ" አለችኝ በደከመ ድምፅ፡፡
....ድምፇን ተከትየ ስዞር እንድቀመጥ በእጇ ምልክት ሰጠችኝ፡፡
......ከጎኗ ተቀመጥኩ ሊፈርጥ በደረሰው አይኔ በትኩረት አየኃት፡፡
...." መሪ ይሄ እውነት ነው መራር ቢሆንም እኛ ከአላህ መጥተን ወደ አላህ ተመላሾች ነን የኛ ሀገር ዱንያ ሳይሆን አኺራ ነው ፡፡ አንች እድሜሽ እንጅ ትንሽ አምሮሽ ትልቅ ነው ልጄ! አሁን ሪምና አዩብ ያንች ናቸው አደራ ልጄ ጠብቂያቸው ባንቺ እምነት አለኝ! ከዚህ ቡሀላ እኔ አልጠቅማችሁም የወንድም እና እህትሽን አደራ ለአንቺ ሰጥቻለሁ .. ዱአ አርጉ የዱንያ ፍቅራችንን ጀነት ላይ ተገናኝተን በአኼራም አብሮ እንዲያደርገን አለችኝ በደከመ ድምፅ፡፡
...."እማ ቀድመሽ ታውቂ ነበር?"ብየ ስጠይቃት ከአፏ ቃል ሳታወጣ ቅንድቧን ከፍ በማድረግ ነገረችኝ፡፡
.....ምንም ቃል መተንፈስ አልቻልኩም ስቅስቅ ብየ አለቀስኩ😢 " ከዚህ በኃላ አልጠቅማችሁም" ያለችኝ ደጋግሞ አእምሮየ ውስጥ አቃጨለ፡፡ እንባ ከማፍሰስ ውጭ ቃል ማውጣት አልቻልኩም፡፡ ኡሚ ለቅሶየን ማየት ስቃይዋን አባሰው ፊቷን ወደ ግድግዳ አዞረች እጇን ሳምኩዋት ለመሄድ ስነሳ
....በተቆራረጠ ድምፅ መሪ መሪ .. "አባትሽ" አለችኝ ሰሙን ስትጠራ ደሜ ሲሞቅ ለራሴ ታወቀኝ በዚህ በመከራ ሰአት እንኩዋን ከጎናችን የለም አስከተለችና
" ይወዳችኃል ልጆቹን ጠልቶ አያውቅም አደራ እናንተም እንዳትጠሉት!" አለችን፡፡
.....ክፉ ቃል ላለመናገር ራሴን ተቆጣጥሬ እሽታየን ቅንጭላቴን በማወዛወዝ ገልጨ የውሸት ፈገግ አልኩ፡፡ ግንባሯን ስሜ እወድሻለሁ ብያት ወጣሁ፡፡


ከእናቴ ተለይቼ የወጣሁት የምሄድበት ኑሮ አይደለም እስከ መጨረሻ እስትንፍሷ ከጎኖ ብሆን ደስታየ ነው፡፡ ግን እንባየ ከቁጥጥሬ ውጭ ሆነና ስቃዩን እንዳላበዛው ፈራሁ፡፡ እናቴን ጠይቄ ስወጣ ጎረቤቶቻችን በጭንቀት ተኮራምተዋል እማማየ አይናቸው በእንባ ርሷል፡፡ ከአዩብ ውጭ ሁሉም አዝነዋል፡፡

እንደ ልጅነት የነፃነት አለም የት አለና?? አዩብ ኮሊደሩ ላይ እየተሯሯጠ ይጫወታል፡፡ ሪም አንገቴ ውስጥ ገብታ ለቅሶዋን አቀለጠችው በዛ ሰአት ሁሉም ከማልቀሰ ውጭ አይዞሽ ባይ አልነበረም፡፡ ሁሉም ነገር ከቁጥጥሬ ከአእምሮየ በላይ ሆነ የማደርገውን የምተወውን አላውቅም ብቻ በድኔ ይንቀሳቀሳል፡፡

እማ ሆስቲታል ከተኛች ዛሬ አምስት ቀን ሆናት የመዳን ተስፋ እንደሌላት ቢነገረንም እንድሁ ሁና እስትንፍሷ እንዲረዝም የሁላችንም ፍላጎት ነው፡፡ እዛው ሆስፒታል ሰለቆየሁ " ቤት ሂደሽ ረፍት አድርጊ ሻወርም ውሰጅ ልብስም ቀይሪ ልጄ አንችኮ ቀድመሽ ሞትሽ ለእናትሽ እኔ አለሁ ሂጅ" አሉኝ እማማየ መሄድ ባልፈልግም ቁጣቸው ሲበረታ ወደ ቤት ተመለስኩ፡፡


ልቤ ግን ሊረጋጋ አልተቻልም ጭንቅ የሚል ስሜት ውሰጤን ተቆጣጠረው ጩሂ ጩሂ ይለኛል ምን ሁኘ ነው!? ለራሴ ግራ ገባኝ ቤት ስደርስ ሪም አዩብን እያጫወተች ነበር፡፡ አዩ ከበር ገና "መሊ" ብሎ ተጠመጠመብኝ ለካ 2 ቀን አልተገናኘንም፡፡ ሳላውቀው ለካ ናፍቀውኛል፡፡ ሁለቱንም አቅፌ ሳምኩዋቸው እና የሆነ ውስጤን ቀለል አለኝ " ዛሬ ኡሚ ጋር ሁላችንም እንሄዳለን" ስላቸው "ከምርሽ ነው ማሚ በጣም ናፍቃኛለች በቃ እንሂድ" ብላ ሪም ተነሳች፡፡ " ቆይ እንጅ ገናኮ መግባቴ ነው ልብስ እንኩዋን ልቀይር" ስላት " ማሚ ማሚ እንሂድ" አለ አዩብ በኮልታፍ አንደበቱ፡፡ ጉጉታቸውን ሳይ ሻወር መውሰዴን ትቼ ልብስ ብቻ ቀይሬ ተያይዘን ወደ ተኛችበት ሆስፒታል ጉዞ ጀመርን፡፡

#ክፍል ➒
ይቀጥላል.........


join↘️

www.tg-me.com/IslamisUniverstiy_public_group
  www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➒
✍ ፀሀፊ ☞አሚር ሰይድ

ሻወር መውሰዴን ትቼ ልብስ ብቻ ቀይሬ ተያይዘን ወደ ተኛችበት ሆስፒታል ጉዞ ጀመርን፡፡

ሆስፒታል ስንደርስ ዶክተሩ እማ ከተኛችበት ክፍል ሲወጣ ተገጣጠምን፡፡ ፊቱን ጭፍግግ አድርጎ "አዝናለሁ" ሲለኝ "ኡሚ ሞተች!!?" ብየ በጩኸት አንባረኩበት፡፡ ዶክተሩ ባለንበት ትቶን ወደ ፊት ተራመደ በሩን በርግጀ ስገባ ነርሶች እማን እየሽፍፈኑዋት አየሁ!

እማማማማማማ የሚል ድምፅ በሀዘን ቅላፄ ሆስፒታሉን አደበላለቀው! የለቅሶ ድምፅ ከየአቅጣጫው መሰማት ጀመረ፡፡ መሬት ዳር ተዋደድኩ መሬትን አጥብቄ አቀፍኩ ኡሚን በሆዷ እንዳትሸሽግብኝ በሚመስል ሁኔታ ተደፍቸ አነባሁባት!😥😥ኡሚ ማለት ለኔ ምን እንደሆነች ሚስጥር ነገርኩዋት በሆዷ ባለው ጨለማ እማን ደብቃ እንዳታራርቀን ለመንኩዋት ግን መሬት ግኡዝ ነች መልስ መስጠት አትችልም፡፡ አዩብን ከሰወች መሀል በአይኔ ፈለኩት አዩም ጮህ ብሎ እያለቀሰ ነው፡፡ አዩ ሞትን አውቆት ነው? ወይስ መራር የሆነው እድሉ አንገሽግሾት በእድለቢስነቱ ነው የሚያለቅሰው? የማልቀሱ ምክንያት ምንም ይሁን ምን ለቅሶው ግን ልብን ሰርስሮ ገብቶ አንጀትን ይበላል፡፡

     እማ እናቴ የኔ እድለቢስ
     እኔ ልሰቃይ እኔ አፈር ልልበስ
     መቼ ይገባሻል ላንቺ ይሄ ስቃይ
     አላህ ይካስሽ በአኼራ በሰማይ
     እማ አካሌ እማ ብርሀኔ
     ከአሁን ወዳ ማን ነዉ የሚቆም ከጎኔ
     አንቺስ ጠንካራ ነሽ አላህ ያበረታሽ
     ሁሉንም አለፍሽው በፅናት ችሎታሽ
     እኔስ በምን አቅሜ ልቻለው ሞትሽን?
     ሳላይ ማደር አልችል ውብ ፈገግታሽን
     ላንቺ እኮ ስል ነው ነገን የማልመው
      አብሬሽ ልሙት ለማን ስል ልኑረው


የኡሚን ስርአተ ቀብር ለማስፈፀም ቤተዘመድ መሰባሰብ አለበት አሉኝ የሰፈር ሰዎች ፡፡ ኡሚኮ እኛ ነን ዘመዶቿ ሌላ ማን አላትና?? ብቸኛነት ትርጉሙ አሁን ገባኝ እናም ሀዘኔን አባሰው እማ ዘመድ የላትምና ማንም እንዲመጣ አንጠብቅም አልኩኝ፡፡ ለአባቢ ማን እንደነገረው ባላውቅም ከማናቀቸዉ ዘመዶቹ ጋር ተሰባስበው መጡ፡፡ ከኡሚ የቀብር ሰነስርአት በኃላ ድንኩዋን ውስጥ አባቢና ወንድሞቹ ተቀመጡ የሚመጡትን ለቅሶ ደራሽ የአባቢ እህቶች ያስተናግዳሉ በመጠኑም ቢሆን ረድተውናል ባይጠቅሙንም ግን ዘመድ አላቸው እንድንባል ሆነናል፡፡ እማ ሰባቷ ከወጣ በኃላ ሁሉም በየቤታቸው ሄዱ፡፡ አባቢ ብቻ ቀረ እሱም ለኛ ብሎ ሳይሆን ለቅሶ ደራሾች ይዘው ለሚመጡት ጫት ሲል ነው፡፡

ከዚህ በኃላ ከአላህ ውጭ ለኛ ማንም እንደለለን አሰብኩ፡፡ ኡሚ የተወችልኝን ሁለት የአደራ ልጆቸን እንዴት አድርጌ ማኖር እንዳለብኝ አስብኩ ግን ምንም ሀሳብ አልመጣልኝ አለኝ፡፡ ለጊዜው ኡሚ ስትሰራቸው የነበሩትን ስራወች መስራት ጀምሪያለሁ፡፡ ሁለቱን የክረምት ወራት የቀን ስራ በመስራት አሳለፍኩ፡፡ የክረምቱ መጨረሻ ላይ የማትሪክ ውጤት መጣ፡፡ ካርድ በእጃችን እስኪገባ ተማሪ ኢንተርኔት ላይ ውጤቱን ያያል፡፡ እኔ ግን ለማየት አልጓጓሁም ምክንያቱም ውጤቴ ምንም ይሁን ምን ለኔ ትርጉም የለውም፡፡ አሁን የምኖርላት እማ የለችም የማኖራቸው እህትና ወንድም እንጅ ከዚህ በኃላ የኔ አለም እነሱ ናቸው፡፡

ትምህርት ጋር እዚህ ላይ ተለያይተናል እንደማልማር ስለወሰንኩ እንደውም ውጤቴ ጭራሽ እጄ እንዲገባ አልፈለኩም ነበር፡፡ ማታ ወደ ቤት ስገባ ሪም ዘላ ተጠመጠመችብኝ " የኔ እህት አኮራሽኝ" እያለች አገላብጣ ከሳመችኝ በኃላ "ውጤትሽንኮ አየሁልሽ 589 ነው ያመጣሽው" አለችኝ በደስታ እየተፍለቀለቀች፡፡ ውጤን ስሰማ እማ ፊቴ ላይ ድቅን አለችብኝ እንባየ እንደደራሽ ውሀ ግልብጥ ብሎ ፈሰሰ፡፡ የማልቀሴ ምክንያት ገብቷታልና ሪም አብራ ከኔ ጋር አለቀሰች፡፡
..." እህቴ አይዞሽ እኔ አለሁልሽ እኔ አስተምርሻለሁ" ስትለኝ የሰማሁት ቃል ለጆሮየ ከበደኝና " ምን አልሽ!?" ብየ አፈጠጥኩባት
.... "አወ ምነው አንች ዩኒቨርስቲ ትሄጃለሽ እኔ እዚህ እየሰራሁ አስተምርሻለሁ ገና ለገና ኡሚ ሞተች ብለሽ ትምህርት ማቆም የለም ለትንሽ ጊዜ ብለሽ ደግሞ ማቆም ካለብኝም እኔ ነኝ" ስትል ከተቀመጥኩበት ቆም አልኩ
......... " ሪም ምን እያወራሽ ነው?? ማነው የቤቱ ሀላፊና አስተዳዳሪ ያረገሽ!!?እእ" ብየ ጮህኩባት " ትሰሚኛለሽ ትምህርት ማቆም የሚለውን ነገር ዳግም እንዳታስቢ!!!! መልሰሽ በምላስሽም ስትናገሪ እንዳልሰማ>>>እኔ የምማረው ለኡሚ ነበር አሁን የለችም ስለዚህ እኔ ለማንም አልማርም አንች ግን ለኔ ብለሽ ትማሪያለሽ" ስላት
,,,,,,ሪም አይኗ ፈጠጠ "መሪ ግን ጤነኛ ነሽ ???የምትናገሪዉን አዉቀሽዋል??አንችኮ ትንሽ ጊዜ ነው የቀረሽ እኔ ገና 10 ባልፍ 12 ልወድቅ እችላለሁ ስለዚህ እንደዚህ አይነት ትልቅ መስዋትነት መክፈል የለብሽም!!" አለችኝ "
......የከፈልኩት መስዋትነት ትልቅነቱ ከገባሽ አንችም ትልቅ ቦታ ላይ ደርሰሽ ዋጋየን ትመልሻለሽ ከአሁን በኃላ እኔ ነኝ ለናንተ ሀላፊነት የምወስደው የእውነት የምትወጅኝ ከሆነ ጎበዝ ሁኝልኝ ጠንካራ ሁኚልኝ ..እናቴን ከስቃይ ለማሳረፍ ተምሬ ለወደፊት የማልጨርሰዉን በአንቺ ትግል ስጨርሺ የዛን ጊዜ እኔ ከአንቺ በላይ ደስተኛ እንደምሆን አትጠራጠሪ እሽ የኔ ውድ" ብየ በእጄ ጉንጯን ቆንጠጥ አረጌ ሳምኩዋት፡፡ ሪም የወሰንኩት ዉሳኔ ከባድነት ተረድታ እምቢ የማለት አቅም አጥታ ተነጠየባት እንዳልሄድ በሚመስል አስተቃቀፍ አቅፋኝ ማልቀስ ጀመረች፡፡


የኔ አለመማር ከኔ በላይ እሷን ረበሻት ...እኔ ግን ከዚህ በላይ ደግሞ ያሳሰበኝ የአዩ ጉዳይ ነው መስከረም ላይ 4 አመት ይሆነዋል እና ምን አይነት ስራ ብስራ ነው እሱን እየከፈልኩ ላስተምር የምችለው???
ህይወቴን ይበልጥ አሳዛኝ የሚያደርገዉ ስለአንዱ ችግሬ እንኳ የማዋየዉ የሆዴን ተንፍሼ ነግሬዉ መፍትሄ እንኳ ባይሰጠኝ አብሽሪ የሚለኝ ሰዉ አለማግኘቴ ነዉ፡፡ ህይወቴ የማይጨበጥ ህልም ምኞቴ ደግሞ በአየር ላይ እንደሚቀር አዉሎ ንፋስ ተስፋ የሌለዉ ስለሆነ የሚደራረብብኝን ችግሬን የማዋየዉ ሰዉ ስለሌለኝ ሁሉም ነገር ልቤ ዉስጥ ሳይቆፈር ተቀብሮ ቀርቷል፡፡እናቴ ከሞተች ቡሀላ ምኞቴና ተስፋየ ሁሉ በመሟጠጡ ኑሮ እየከበደኝ ሂዶ ልቤን ሲያቆስለዉ ከጭንቀቴ ከመገላገል የልቤን ገልጬ የምነግረዉ ከእህቴ ዉጭ የሆነ ሰዉ ቢኖረኝ ሁሌ ምኞቴ ነበር ፡፡ ጭንቀቴና የሳለፍኩት ታሪኬ አሳዝኖት በተመስጥዖ የሚሰማኝ ሰዉ ብፈልግ እንደለማኝ የእነሱን እርዳታ ፈልጌ ስለሚመስላቸዉ ሀሳቤን የሚረዳኝ መቼም አላገኝም
ይሄ ትልቅ ራስ ምታት ሆኖብኝ ሳለ ሌላ ደግሞ ያልታሰበ ዱብእዳ ተፈጠረብኝ....
መራም ላይ ምን ተፈጥሮባት ይሆን???በምዕራፍ አስር የምናየዉ ይሆናል

Join👇
https://www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ 10
✍ ፀሀፊ ☞አሚር ሰይድ


የአዩ የትምህርት ጉዳይ ምን አይነት ስራ ብስራ ነው እሱን እየከፈልኩ ላስተምር የምችለው??? ይሄ ትልቅ ራስ ምታት ሆኖብኝ እረፍት ነስቶኝ ሳለ ሌላ ደግሞ ያልታሰበ ዱብእዳ ተፈጠረብኝ.......

የሶስት ወር የቤት ኪራይ ባለመከፈሉ ምክንያት ቤታችን ታሸገ፡፡ ታሽጓል የሚል ወረቀት ለጥፈው ሲሄዱ በቆምኩበት እንባየ መፍሰስ ጀመረ፡፡

አዩ ቀሚሴን ጨምድዶ ይዞ ጮህ ብሎ አለቀሰ! ለቅስው ሀዘኔን አባሰው፡፡ ነገሮች ሁሉ ከአቅሜ በላይ ሆነና አእምሮዬ ማሰብ ያቆመ ይመስል ቅንጭላቴ እንደ ድንጋይ ከበደኝ! የአዩ ትምህርት ሲያሳስበኝ ጭራሽ የጎዳና ሂወት ከፊት ለፊቴ ተጋረጠ፡፡ አባቢን ረገምኩት ደጋግሜ ኮነንኩት ቤታችንን ለሱሱ ብሎ ባይሸጥብን ኖሮ ዛሬ ጎዳና ላይ ለመውደቅ ባልዳዳን ነበር! ብቻ እንባየ ከመፍሰሱ ውጭ መፍትሄ ሆኖ የመጣልኝ ሀሳብ አልነበረም፡፡
.....ሪም አይን አይኔን እያየች ትቁለጨለጫለች! አይኖቿን ስመለከት " መሪ በቃ ጎዳና ላይ ልንወድቅ ነው!? እባክሽ የሆነ ነገር አድርጊ የእማኮ አደራ አለብሽ!" የሚሉኝ መሰለኝና አቅፌ " አይዞሽ ምንም አንሆንም" አልኩዋት፡፡ ባዶ ተስፋ አፌ ከየት አምጥቶ እንደተናገረ ባላውቅም እኔ ግን የታየኝ ምንም ተስፋ የለም አባቴን ከመኮነን ውጭ፡፡ ሪም ቃል ካፏ ሳታወጣ አቀፈችኝ፡፡

እኔ ተስፋ በቆረጥኩበት ሁኔታ የተስፋ ብርሀን ጮራ ፈነጠቀ! እማማየ " እኔ በሂወት እያለሁ የለይላ ልጆች ጎዳና ላይ አይወድቁም ከኔ ጋር የበላሁትን በልተው ይኖራሉ በማለት ሂወታችንን ታደጓት፡፡ ሽህ ይማምም በበኩሉ የነበረብንን የቤት ኪራይ እዳ ከፍለው ንብረታችንን እንድናወጣ ረድተውናል፡፡ በጠቅላላ ጎረቤቶቻችን የአቅማቸውን በማድረግ ከእኛ አልተለዩም፡፡

ጋሽ አህመድም አንድ ሀሳብ አቀረብልን እሱም አዩብን ወስደው የሚያስተምሩልን ሰወች እንዳገኙልን ነገሩን፡፡ ይሄን ብቻየን መወሰን አልፈለኩም፡፡
......ሪምን አማከርኩዋት እኔ በበኩሌ አዩብ እንደሌሎች ልጆች ሂወት ቢመቻችለት የፈለገው ሁሉ ተማልቶለት ማደጉ ፋላጎቴ ቢሆንም ግን ማጣት ድህነት በትልቅ ችካል ላይ ጠፍሮ አስሮኝ ላሟላለት ያልቻልኩትን ከሌላ ማገኘቱ አስደስቶኛል! ግን ከኔ መራቁ ደግሞ አስፈርቶ አስጨንቆኛል! የኔን ሀሳብ ለሪም አጋራኅት የሷም ሀሳብ ልክ እንደኔ ነበር፡፡


ሁሉም ሰው ለሚወደው ሰው የተሻለ የሚለውን ይመርጣልና አዩብን ከኛ ጋር አብረህ ተቸገር ማለት ክፋት መስሎ ተሰማንና የመጣለትን እድል ከምናበላሽበት ተመችቶት እንዲኖር ሁለታችንም ተስማማን፡፡

የአዩ አሳዳጊ የተባሉት ሶስት ልጆቻቸው ጀርመን አንዱ ልጃቸው ደግሞ እንግሊዝ የሚኖሩ ናቸው በተንጣለለ ጊቢ ውስጥ የሰው ያለህ እያለ የሚውለውን ቤታቸውን በአዩ ቡረቃ ድምጥማጡን ሊያጠፉ ፈልገዋል፡፡ እኔም አዩ ይሄን እድል ማግኘቱ ስጋቴን አስወገደልኝ፡፡


አዩን ሊወስዱት ሲመጡ ሪም ከአዩ የመለየት አቅሟ ተሟጦ በማለቁ እንዳታይ ከቦታው ተሰወረች፡፡
.....አዩ የመሄጃው ሰአት ሲደርስ ሰለመለያየት ክፋት ማን እንዳሳወቀም ባናውቅም ልብሴን አለቅም ብሎ ማልቀስ ጀመረ!
___እኔም ወኔየ ከዳኝ አንጀቴ ተላወሰ! ቃል ካፌ ሳይወጣ ከአይኔ እንባ ያለገደብ ይፈሳል! "የአላህ ምን አለ ገንዘብ ብትሰጠኝና ወንድሜን በእቅፌ ባሳድገው!?" እያልኩ ስብከነከን በሁሉን ነገር ላይ ቻይ እና አዋቂ የሆነው ጌታየ አላህ የሰውን ልጆች ቀልብ ባሻው የሚገለባብጠው አላህ "ኩን" በሚለው ቃሉ ሁሉን ያስገኘ ጥበበኛው ብቸኛው የአለማት ወራሽ የሆነው አላህ በልቤ ላይ ሲመላለስ የነበረው ሀሳቤ ከአላህ ዘንድ ይሁንታን በማገኘቱ በሰወቹ ቀልብ እዝነትን አስገባ፡፡

እናም አዩን በዛ ሁኔታ ከኔ ከመንጠቅ ይልቅ ስላለን ፍቅር ተገርመው አላህ እንዲጨምርልን ዱአ አድርገውልን በብር እጦት ሰበብ ፍቅራችን እንዳይነጥፍ የአዩን የትምህርት ክፍያው ሆነ አዩን የተመለከተ ማንኛውንም ነገር ሊሸፍኑልን ቃል ገቡልን፡፡
.... ለአላህ ምን ይሳነዋል!! ይሄን ቃል እንደሰማሁ በቆምኩበት ሱጅድ አድርጌ ምስጋና ለአላህ አደረስኩ!! ደስታየ ወደር አጣ ትልቅ ሸክም ቀለለልኝ አዩን አቅፌ ደጋግሜ ሳምኩት "አዩ አሁንም በእቅፌ ውስጥ ነው ኡኡፍፍፍ አልሀምዱሊላህ!!!"


ይሄን የምስራች ለሪም ለመንገር መንደሩን ባስስ አልነበረችም፡፡ ከሰአታት በኃላ ሪም ወደ ቤት ስትመለስ አይኗ ቅል ቅል አክሎ አብጧል ቅስሟ ተሰብሮ ኩምሽሽ ብላ ተመለሰች፡፡ ቤት ገብታ አዩን ስታየው የቀረበትን ምክንያት ሳትጠይቅ በመቅረቱ ብቻ ቦረቀች! እኔም ስለሆነው ነገር ስነግራት በደስታ ሰከረች! እማማዬ ሁኔታችን አሳዝኗቸው አይናቸው በእንባ ርሷል፡፡

አሁን ነገሮች መስመር እየያዙልኝ ነው አልሀምዱሊላህ! እኔም ሆን ሪም እማማዬ ማደሪያ ከቻሉን ቀለባችንን ራሳችንን መቻል አለብን እሳቸው ላይ ሸክም መሆን አንፈልግም፤ ስለዚህ ስራ ፈልጌ ማግኘት እንዳለብኝ ይሰማኛል፡፡ ስራ እንዲፈልጉልኝ ከነገርኳቸው ብዙ ሰወች ሪድዋን ስራ እንዳገኘልኝና ሂጀ እንድነጋገር መልእክት ላከ፡፡ ምን አይነት ስራ ይሆን ያገኘልኝ ??? እያልኩ ተቻኩየ ከቤት ወጣሁ፡፡

ክፍል ➊➊
ይቀጥላል....

Join👇👇
@IslamisUniverstiy_public_group
    @IslamisUniverstiy_public_group

📖 #የመራም_ማስታወሻ
           ክፍል ~ ➊➊
✍ ፀሀፊ ☞አሚር ሰይድ




ምን አይነት ስራ ይሆን ያገኘልኝ ??? እያልኩ ተቻኩየ ከቤት ወጣሁ፡፡

ሬድዋን የሰፈሬ ልጅ ጎረቤታችን ነው፡፡ የእኛ እንደዚህ መሆን እሱን ያሳዝነዋል! አብሽሩ ሁሉም ያልፋል" ብሎ የሚያበሽረን ጎረቤታችን ነው፡፡ ያገኘልኝ ስራ የሆቴል መስተንግዶ ነው፡፡ ስራ ሳላማርጥ መስራት እንዳለብኝ ባውቅም ከሰው ፊት "ምን ልታዘዝ" ብሎ ለመቆም ለካ ደህና ልብስ ያስፈልጋል፡፡ አሁን የለበስኩትን ልብስ ለብሼ ከአጠገባቸው ብቆም ያዘነ ገንዘብ ለመስጠት ወደ ኪሱ የለለው ደግሞ "አላህ ይስጥሽ" የሚሉኝ እንጅ የፍላጎታቸውን የሚያዙኝ አይመስለኝም፡፡

ደህና የሚባል ልብስ እንደለለኝ የገባኝ አሁን ነው! በልብስ እጦት ምክንያት ስራው እንዲያልፈኝ አልፈለኩም፡፡ ትንሽ አሰብኩ የመጣልኝ ሀሳብ አብራኝ የተማረች ልጅ አስታወስኩ የሀብታም ልጅ ናት ወደሷ ጋር ሄድኩኝ፡፡ ጓደኛየ ጥሩ ልጅ ናት የመጣሁበትን ምክንያት ስነግራት እሷ አሮጌ ያለቻቸው ለኔ ግን በጣም አዲስ ስለብሳቸዉ የሚያምሩ የሆኑ ብዙ ልብሶች ሰጠችኝ፡፡ የሚገርማችሁ ለእሷ አሮጌ ለኔ ኑርየ ደረጃ ግን ለብሻቸዉ የማላቃቸዉ ልብሶች ስለሆነ ደስታየ ወደር አልነበረውም! አላህ ኸይር ጀዛዋን እንዲከፍላት ዱአ አድርጌ ወደ ቤት ተመለስኩ፡፡


አልሀምዱሊላህ አሁን ደስተኛ ሁኛለሁ አዩብ እና ሪም ትምህርት ጀመሩ፡፡ እኔም የመስተንግዶ ስራየን ተያይዠዋለሁ፡፡ እማማየ አቅማቸው እየደከመ ስለሆነ በደከመ ጉልበት ስራ ብለው እንዲያስቡ አልፈለኩም፡፡ እማማየ እኔን ከልጅነቴ ጀምረው ተንከባክበው ያሳደጉኝ የአያቴ ምትክ ናቸው ስለዚህ ሂወታችንን ከጎዳና እንደታደጓት ሁሉ አሁን እኔም እሳቸውን የመጦር ሀላፊነት ይሰማኛል!
....እማማየ በእርጅና እድሜያቸው እረፉ ቤት ተቀመጡ ስላቸው ደስታቸው ወደር አልነበረውም ግን ደግሞ የኔ ያለ እረፍት ሙሉ ቀን መስራት ያስጨንቃቸዋል፡፡
ሪም የኔ ትምህርት ማቆም እና ስራ መጀመር አሁንም ቢሆን ይቆረቁራታል አልተዋጠላትም ከጓደኞቼ በታች የሆንኩ ይመስላታል ብዙ ምሽቶች ተኝታ ስታለቅስ አይቻታለሁ ግን እኔ በዚህ ጉዳይ ምንም ቅር የሚለኝ ነገር እንደለለ ከእህትና ወንድሜ ቅርብ ሁኜ እነሱን መንከባከብ መቻሌ ከደስታም በላይ ደስታ ይሰማኝ ነበር፡፡ እናም ሪም ለእኔ መከፋቷን ትታ የፍቅሯ መግለጫ ይሆነኝ ዘንድ በትምህርቷ እንድትበረታ አሳመንኳት፡፡

አዩም ምሽቱን የትምህርት ቤት ውሎውን እና መዝሙር ይዘምርልናል አዩን በዚህ ሁኔታ ማየቴ ደስተኛ አድርጎኛል! #ደስተኛ_ለመሆን_ብዙ_ገንዘብ_አያሻም ብዙ ፍቅር እንጅ ገንዘብ ቁስን እንጅ ፍቅርን አይገዛም ፍቅር ግን ከሁሉምና ከማንም በላይ ውድ የሆነውን የሰውን ልጅ ማንነት የመግዛት ሀይል አለው! አወ እውነት ነው ፍቅር ሀይል አለው! ሚስኪን ደሀ የተባለ ሰው ለአንድ ከበርቴ በየትኛውም ገንዘብ አንድ አካሉን ሊሸጥለት የማይችለውን ለሚወደው ሰው ግን ሙሉ እሱነቱን ሰጥቶ የሱን ሞት ሊሞትለት ይዳዳል! እውነተኛ ፍቅር ማለት ራስን ለሌላ አሳልፎ የመስጠት ችሎታ ነው! ይሄንንም ከኡሚ አይቻለሁ ለኔ ብላ ራሷን ስትረሳ ታዳ ዛሬ እኔም ለእህት ወንድሜ ስል የኔን ነገር ትቼ እነሱን የኔ ሂወት ባደርጋቸው አይገርምም!!

ስራ ከጀመርኩ ቀን ቀንን ሳምንታት ተደራርበው በወራት እየተተካኩ የጊዜ ቆጣሪው ይነጉዳል፡፡ በዚህ የስራ ጊዜ ቆይታ ውስጥ ብዙ ነገሮችን ታዘብኩ! አንዳንድ ባዶ ጭንቅላት ብቻ የተሸከሙ ሰወች ድሆች ለብር ካላቸው ጉጉት አንፃር ብር ያስገኛል የተባለ ነገር ሀራም ይሁን ሀላል ለብር ሲሉ ብቻ የሚሰሩ ለብር ብለው የሚኖሩ ይመስላቸውና ሰውን በገንዘብ ሊገዙት ይከጅላሉ እነሱ ሳይረዱ የረሱት ነገር ቢኖር ደሀ እምነት እንዳለው ነበር፡፡ ሰው ደሀም ቢሆን የተፈጠረበት የሚኖርበት እምነት አለው ከገንዘቡ በላይ እምነቱ ያኖረዋል! የሂወት መስመር አስማሪው እምነቱ ነው፡፡ ይሄ ያልገባቸው በገንዘብ አማለው ሊገዙኝ የፈለጉ ብዙ ወንዶች ቢኖሩም እኔ ግን የነሱ ገንዘብ ለነሱ ከሚፈጥርላቸው ደስታ የበለጠ የምወደዉ ዲነል ኢስላም ሀይማኖቴ እጥፍ ድርብ ደስታን ይፈጥርልኛል!
፡፡ አላህን ከመገዛት ባዘዘው ታዞ ከከለከለው መከልከልከል በአላህ ህግጋቶች ተመርኩዞ ሂወትን መምራት የሚያስገኘውን ደስታ ተግባሪው ሰው እንጅ ሌላ አያውቀውም፡፡እናም በሀራም ከማገኘው ገንዘብ ይልቅ 12 ሰአት ቁሜ የማገኛት የላቤ የሆነችው ገንዘቤ ትበልጥብኛለች፡፡

"አንድን ነገር ለአላህ ብሎ የተወ ሰው አላህ በተሻለ ነገር ይተካዋል" ብለውኛል ውዱ የኔ ነቢ ሰይዲና ረሱል ሰ.ዐ.ወ ይሄን የታዘብኩት ከወንዶች ሲሆን ከሴቶችም የታዘብኩት አለ፡፡ አንዳንድ ሴቶች የሂወት ትርጉም ያልገባቸው ሂወት ማለት መዝናናት ውድ የሆኑ ቁሳዊ ነገሮችን መሰብሰብ ይሄን ነገ የሚጠወልግ መልክ ለወንድ ስሜት መፀዳጃ በጥቅማጥቅም በራስ ፍላጎት መስጠት ህይወት ላይፍ የመሰላቸውና ሴትነታቸውን አማላይ ሰዉነታቸዉን ተጠቅመው የወንዶች ኪስ አላሚ የሆኑ ብዙ አይቻለሁ፡፡ ደግሞም ሳያፍሩ አፍቸውን ሞልተው " ውበትሽን ተጠቀሚበት አትፋዘዥ በዚህ ፍየል ዘመን በግ አትሁኝ ወንድ እንደሆነ አይታመንም" የሚሏት አባባላቸው እጅጉን አሳዝኖ ደግሞም ያስቀኛል ቆይ ውበት ማለት ምን ማለት ነው? እኔ እስከገባኝ ድረስ ውበት ማለት መልካምነት ነው ስለዚህ ይሄ አይነቱ እኩይ ተግባር ከውበት ተርታ አይመደብም ከብልግና እንጅ ይሄ ተግባር ደግሞ መልክም ሆነ የትምህርት ደረጃ ሳይጠይቅ ፍላጎተኝነትን የሚያሳትፍ ፀያፍ ስራ ነው ብየ አምናለሁ፡፡ እሺ ደግሞ አባባላቸው ትክክል ነው ልበል እና ወንድን ሳያምኑ ውበታቸውን ተጠቅመው ውድ የሆነ ቁሳቁስ አሟሉ እንበል ታዳ በዚህ ስራ ማን ተጎዳ??? ሴቷ ወይስ ወንዱ? እሷ ሂወት የመሰላትን ቁሳዊ ነገር ስትሰበስብ የእድሜ ቆጣሪው ተፈትልኮ ሂዷል ድንገት ዘወር ብላ ራሷን ስትመለከት ውበቷ ጠውልጎ ተተኪ እንቡጦች በዙሪያዋ ተኮልኩለው መጠውለጓን አጋነው ያወጉባታል ያኔ ቆም ብላ ስታስብ እሷ ቁሞ ይጠብቀኛል ብላ የጠበቀችዉ እድሜ ለካ ተፈትልኮ ከሷ ርቆ ሂዷል! የልጅ መዉለድ ፍላጎት ጣራ ነካ ግን ልጅ ከየት ይምጣ እንደ ሸክላ ተጠፍጥፎ አይሰራ ነገር ያኔ የጓጓችለት ነገር ዛሬ ተራ ሁኖ ሂወቷን ትርጉም አሳጥቶ ያደበዝዝባታል ለማን ነው የምኖረው??? ስትል አእምሮዋ መልስ ከመስጠት ይልቅ ጥያቄዋን ለራሷ እንደገደል ማሚት መልሶ ያስተጋባላታል፡፡ ያኔ ሂወት እንደ እሬት ብትመራት እንደ ኮሷ ቢጎመዝዛት ትርጉም አይኖረውም እና አሁን ብልጠት ቅልጥፍና የመሰላቸው ነገር ነገ የሚያሳጣቸውን ነገር ቢያውቁትና ከዚህ ፀያፍ ተግባር ቢወገዱ ፅኑ ፍላጎቴ ነው፡፡
አሁን ዘመን ላይ ያሉ ሴቶች .እኔዉ ሳልሆን ራሳቸዉ በተግባር እያሳዩ ያሉት ሴትነትን ለማህበረሰቡ እያሳዩበት ያለዉ ተጨባጭ ሴትነት ቁንጅና መልክን እያስዋቡ ተሟሙቆ የወንዶችን ጭብጨባና አድናቆት እየጠበቁ የሚኖሩ በወንድ ምላስ ምስጋና የሚፈልጉ...በያዙት የተፈጥሮም ዉበት ይሁን ወይም እድሜ ለአርቲቢሻን መቆናነጃ ታሳቢነታቸዉን ጭንቅላታቸዉን ሳይሆን ይሄን የሚረግፍ የተፈጥሮም ሆነ ፎርጂድ ዉበት ተጠቅመዉ እኪስ ዉስጥ የተቀመጠ የእህል ፍርፋሪ ለማራገፍ የወጡ ይመስል ከወንድ ኪስ ላይ የአይን ብሌናቸዉን ተክለዉ የወንድን እጅ እና ታምሪያለሽ የሚል ቃላት ጠባቂ ሁነዋል..ግን ሴትነት ይሄ አልነበረም በዉበትሽ የወንድ  ጥገኛ ነኝ የሚለዉን እሳቤ አቁመሽ..አእምሮሽን አሰሪዉና ዛሬ አንድ ሁነሽ ሴት የተባልሽዉን ነገ እናት👇

📖 #የመራም_ማስታወሻ
           ክፍል ~ ➊➊
✍ ፀሀፊ ☞አሚር ሰይድ




ምን አይነት ስራ ይሆን ያገኘልኝ ??? እያልኩ ተቻኩየ ከቤት ወጣሁ፡፡

ሬድዋን የሰፈሬ ልጅ ጎረቤታችን ነው፡፡ የእኛ እንደዚህ መሆን እሱን ያሳዝነዋል! አብሽሩ ሁሉም ያልፋል" ብሎ የሚያበሽረን ጎረቤታችን ነው፡፡ ያገኘልኝ ስራ የሆቴል መስተንግዶ ነው፡፡ ስራ ሳላማርጥ መስራት እንዳለብኝ ባውቅም ከሰው ፊት "ምን ልታዘዝ" ብሎ ለመቆም ለካ ደህና ልብስ ያስፈልጋል፡፡ አሁን የለበስኩትን ልብስ ለብሼ ከአጠገባቸው ብቆም ያዘነ ገንዘብ ለመስጠት ወደ ኪሱ የለለው ደግሞ "አላህ ይስጥሽ" የሚሉኝ እንጅ የፍላጎታቸውን የሚያዙኝ አይመስለኝም፡፡

ደህና የሚባል ልብስ እንደለለኝ የገባኝ አሁን ነው! በልብስ እጦት ምክንያት ስራው እንዲያልፈኝ አልፈለኩም፡፡ ትንሽ አሰብኩ የመጣልኝ ሀሳብ አብራኝ የተማረች ልጅ አስታወስኩ የሀብታም ልጅ ናት ወደሷ ጋር ሄድኩኝ፡፡ ጓደኛየ ጥሩ ልጅ ናት የመጣሁበትን ምክንያት ስነግራት እሷ አሮጌ ያለቻቸው ለኔ ግን በጣም አዲስ ስለብሳቸዉ የሚያምሩ የሆኑ ብዙ ልብሶች ሰጠችኝ፡፡ የሚገርማችሁ ለእሷ አሮጌ ለኔ ኑርየ ደረጃ ግን ለብሻቸዉ የማላቃቸዉ ልብሶች ስለሆነ ደስታየ ወደር አልነበረውም! አላህ ኸይር ጀዛዋን እንዲከፍላት ዱአ አድርጌ ወደ ቤት ተመለስኩ፡፡


አልሀምዱሊላህ አሁን ደስተኛ ሁኛለሁ አዩብ እና ሪም ትምህርት ጀመሩ፡፡ እኔም የመስተንግዶ ስራየን ተያይዠዋለሁ፡፡ እማማየ አቅማቸው እየደከመ ስለሆነ በደከመ ጉልበት ስራ ብለው እንዲያስቡ አልፈለኩም፡፡ እማማየ እኔን ከልጅነቴ ጀምረው ተንከባክበው ያሳደጉኝ የአያቴ ምትክ ናቸው ስለዚህ ሂወታችንን ከጎዳና እንደታደጓት ሁሉ አሁን እኔም እሳቸውን የመጦር ሀላፊነት ይሰማኛል!
....እማማየ በእርጅና እድሜያቸው እረፉ ቤት ተቀመጡ ስላቸው ደስታቸው ወደር አልነበረውም ግን ደግሞ የኔ ያለ እረፍት ሙሉ ቀን መስራት ያስጨንቃቸዋል፡፡
ሪም የኔ ትምህርት ማቆም እና ስራ መጀመር አሁንም ቢሆን ይቆረቁራታል አልተዋጠላትም ከጓደኞቼ በታች የሆንኩ ይመስላታል ብዙ ምሽቶች ተኝታ ስታለቅስ አይቻታለሁ ግን እኔ በዚህ ጉዳይ ምንም ቅር የሚለኝ ነገር እንደለለ ከእህትና ወንድሜ ቅርብ ሁኜ እነሱን መንከባከብ መቻሌ ከደስታም በላይ ደስታ ይሰማኝ ነበር፡፡ እናም ሪም ለእኔ መከፋቷን ትታ የፍቅሯ መግለጫ ይሆነኝ ዘንድ በትምህርቷ እንድትበረታ አሳመንኳት፡፡

አዩም ምሽቱን የትምህርት ቤት ውሎውን እና መዝሙር ይዘምርልናል አዩን በዚህ ሁኔታ ማየቴ ደስተኛ አድርጎኛል! #ደስተኛ_ለመሆን_ብዙ_ገንዘብ_አያሻም ብዙ ፍቅር እንጅ ገንዘብ ቁስን እንጅ ፍቅርን አይገዛም ፍቅር ግን ከሁሉምና ከማንም በላይ ውድ የሆነውን የሰውን ልጅ ማንነት የመግዛት ሀይል አለው! አወ እውነት ነው ፍቅር ሀይል አለው! ሚስኪን ደሀ የተባለ ሰው ለአንድ ከበርቴ በየትኛውም ገንዘብ አንድ አካሉን ሊሸጥለት የማይችለውን ለሚወደው ሰው ግን ሙሉ እሱነቱን ሰጥቶ የሱን ሞት ሊሞትለት ይዳዳል! እውነተኛ ፍቅር ማለት ራስን ለሌላ አሳልፎ የመስጠት ችሎታ ነው! ይሄንንም ከኡሚ አይቻለሁ ለኔ ብላ ራሷን ስትረሳ ታዳ ዛሬ እኔም ለእህት ወንድሜ ስል የኔን ነገር ትቼ እነሱን የኔ ሂወት ባደርጋቸው አይገርምም!!

ስራ ከጀመርኩ ቀን ቀንን ሳምንታት ተደራርበው በወራት እየተተካኩ የጊዜ ቆጣሪው ይነጉዳል፡፡ በዚህ የስራ ጊዜ ቆይታ ውስጥ ብዙ ነገሮችን ታዘብኩ! አንዳንድ ባዶ ጭንቅላት ብቻ የተሸከሙ ሰወች ድሆች ለብር ካላቸው ጉጉት አንፃር ብር ያስገኛል የተባለ ነገር ሀራም ይሁን ሀላል ለብር ሲሉ ብቻ የሚሰሩ ለብር ብለው የሚኖሩ ይመስላቸውና ሰውን በገንዘብ ሊገዙት ይከጅላሉ እነሱ ሳይረዱ የረሱት ነገር ቢኖር ደሀ እምነት እንዳለው ነበር፡፡ ሰው ደሀም ቢሆን የተፈጠረበት የሚኖርበት እምነት አለው ከገንዘቡ በላይ እምነቱ ያኖረዋል! የሂወት መስመር አስማሪው እምነቱ ነው፡፡ ይሄ ያልገባቸው በገንዘብ አማለው ሊገዙኝ የፈለጉ ብዙ ወንዶች ቢኖሩም እኔ ግን የነሱ ገንዘብ ለነሱ ከሚፈጥርላቸው ደስታ የበለጠ የምወደዉ ዲነል ኢስላም ሀይማኖቴ እጥፍ ድርብ ደስታን ይፈጥርልኛል!
፡፡ አላህን ከመገዛት ባዘዘው ታዞ ከከለከለው መከልከልከል በአላህ ህግጋቶች ተመርኩዞ ሂወትን መምራት የሚያስገኘውን ደስታ ተግባሪው ሰው እንጅ ሌላ አያውቀውም፡፡እናም በሀራም ከማገኘው ገንዘብ ይልቅ 12 ሰአት ቁሜ የማገኛት የላቤ የሆነችው ገንዘቤ ትበልጥብኛለች፡፡

"አንድን ነገር ለአላህ ብሎ የተወ ሰው አላህ በተሻለ ነገር ይተካዋል" ብለውኛል ውዱ የኔ ነቢ ሰይዲና ረሱል ሰ.ዐ.ወ ይሄን የታዘብኩት ከወንዶች ሲሆን ከሴቶችም የታዘብኩት አለ፡፡ አንዳንድ ሴቶች የሂወት ትርጉም ያልገባቸው ሂወት ማለት መዝናናት ውድ የሆኑ ቁሳዊ ነገሮችን መሰብሰብ ይሄን ነገ የሚጠወልግ መልክ ለወንድ ስሜት መፀዳጃ በጥቅማጥቅም በራስ ፍላጎት መስጠት ህይወት ላይፍ የመሰላቸውና ሴትነታቸውን አማላይ ሰዉነታቸዉን ተጠቅመው የወንዶች ኪስ አላሚ የሆኑ ብዙ አይቻለሁ፡፡ ደግሞም ሳያፍሩ አፍቸውን ሞልተው " ውበትሽን ተጠቀሚበት አትፋዘዥ በዚህ ፍየል ዘመን በግ አትሁኝ ወንድ እንደሆነ አይታመንም" የሚሏት አባባላቸው እጅጉን አሳዝኖ ደግሞም ያስቀኛል ቆይ ውበት ማለት ምን ማለት ነው? እኔ እስከገባኝ ድረስ ውበት ማለት መልካምነት ነው ስለዚህ ይሄ አይነቱ እኩይ ተግባር ከውበት ተርታ አይመደብም ከብልግና እንጅ ይሄ ተግባር ደግሞ መልክም ሆነ የትምህርት ደረጃ ሳይጠይቅ ፍላጎተኝነትን የሚያሳትፍ ፀያፍ ስራ ነው ብየ አምናለሁ፡፡ እሺ ደግሞ አባባላቸው ትክክል ነው ልበል እና ወንድን ሳያምኑ ውበታቸውን ተጠቅመው ውድ የሆነ ቁሳቁስ አሟሉ እንበል ታዳ በዚህ ስራ ማን ተጎዳ??? ሴቷ ወይስ ወንዱ? እሷ ሂወት የመሰላትን ቁሳዊ ነገር ስትሰበስብ የእድሜ ቆጣሪው ተፈትልኮ ሂዷል ድንገት ዘወር ብላ ራሷን ስትመለከት ውበቷ ጠውልጎ ተተኪ እንቡጦች በዙሪያዋ ተኮልኩለው መጠውለጓን አጋነው ያወጉባታል ያኔ ቆም ብላ ስታስብ እሷ ቁሞ ይጠብቀኛል ብላ የጠበቀችዉ እድሜ ለካ ተፈትልኮ ከሷ ርቆ ሂዷል! የልጅ መዉለድ ፍላጎት ጣራ ነካ ግን ልጅ ከየት ይምጣ እንደ ሸክላ ተጠፍጥፎ አይሰራ ነገር ያኔ የጓጓችለት ነገር ዛሬ ተራ ሁኖ ሂወቷን ትርጉም አሳጥቶ ያደበዝዝባታል ለማን ነው የምኖረው??? ስትል አእምሮዋ መልስ ከመስጠት ይልቅ ጥያቄዋን ለራሷ እንደገደል ማሚት መልሶ ያስተጋባላታል፡፡ ያኔ ሂወት እንደ እሬት ብትመራት እንደ ኮሷ ቢጎመዝዛት ትርጉም አይኖረውም እና አሁን ብልጠት ቅልጥፍና የመሰላቸው ነገር ነገ የሚያሳጣቸውን ነገር ቢያውቁትና ከዚህ ፀያፍ ተግባር ቢወገዱ ፅኑ ፍላጎቴ ነው፡፡
አሁን ዘመን ላይ ያሉ ሴቶች .እኔዉ ሳልሆን ራሳቸዉ በተግባር እያሳዩ ያሉት ሴትነትን ለማህበረሰቡ እያሳዩበት ያለዉ ተጨባጭ ሴትነት ቁንጅና መልክን እያስዋቡ ተሟሙቆ የወንዶችን ጭብጨባና አድናቆት እየጠበቁ የሚኖሩ በወንድ ምላስ ምስጋና የሚፈልጉ...በያዙት የተፈጥሮም ዉበት ይሁን ወይም እድሜ ለአርቲቢሻን መቆናነጃ ታሳቢነታቸዉን ጭንቅላታቸዉን ሳይሆን ይሄን የሚረግፍ የተፈጥሮም ሆነ ፎርጂድ ዉበት ተጠቅመዉ እኪስ ዉስጥ የተቀመጠ የእህል ፍርፋሪ ለማራገፍ የወጡ ይመስል ከወንድ ኪስ ላይ የአይን ብሌናቸዉን ተክለዉ የወንድን እጅ እና ታምሪያለሽ የሚል ቃላት ጠባቂ ሁነዋል..ግን ሴትነት ይሄ አልነበረም በዉበትሽ የወንድ  ጥገኛ ነኝ የሚለዉን እሳቤ አቁመሽ..አእምሮሽን አሰሪዉና ዛሬ አንድ ሁነሽ ሴት የተባልሽዉን ነገ እናት👇

ማህበረሰብ ለመባል ብቁ ሁኝ ...በዉበት የምትተማመኝ ከሆነ የአንቺ መጨረሻ የጭንገርድ ሁነሽ መቀመጥ ብቻ እንደሆነ አዘንጊ
ግን ሰው ባመነበት መንገድ ባሻው ቢጋልብ የራሱ ውሳኔ ነውና እኔም ባለችኝ ደመወዝ ከምወዳቸው ሰወች ጋር በደስታ መኖር መርጫለሁ፡፡


በንፋስ ፍጥነት የሚከንፈው የጊዜ ቆጣሪ ወደ አመቱ መገባደጃ ተጠግቶ እነሆ የአመቱ መጨረሻ ማጠቃለያ ፈተና ደረሰ፡፡ ፈተና እንደጨረሰች ሪም እና አዩብን የሆነ ቦታ እንደምወስዳቸው ቃል ገብቸላቸዋለሁ፡፡ እኔም ቃሌን ለመጠበቅ ዛሬ ፈተና የመጨረሻ ቀን ስለሆነ አዩና ሪምን የተሻለ ሆቴል ወስጄ እራት ልጋብዛቸዉ ወስኜ ከትምህርት እሰከምትመጣ እየጠበኩ ነው፡፡ የአሱር ሰላት ሰግጀ በተቀመጥኩበት ከእማማየ ጋር የሞቀ ወሬ ይዘናል፡፡
..... አቤል ከውጭ መሪ መሪ ብሎ በተቆራረጠ ትንፋሽ እየጮሀ ሲጣራ ሩጨ ወጣሁ.....
የአቤልን መደናገጥ እና የልብ ምት መፍጠን ሳይ እኔም በመደንገጥ "አቤሎ ምን ተፈጠረ ምን ሁነህ ነው!?" አልኩት፡፡
......እጁን ቀስሮ በአየር ላይ "ሪም " ከማለቱ ገና ከአፉ ነጥቄ
...... "ሪም ምን ሆነች!!?" አልኩት ድንጋጤ በአንዴ ሰዉነቴን ወረረኝ.... ልቤ ምቱ ፈጠነ.....


የመራም ፈተና እንደ ተተበተበ ክር መፍታት የከበደ ይመስላል እህቷ ሪም ምን ሁና ይሆን???

Part ➊➋
ይቀጥላል......
Join ⏬

www.tg-me.com/IslamisUniverstiy_public_group
  www.tg-me.com/IslamisUniverstiy_public_group

📖 #የመራም_ማስታወሻ
           ክፍል ~ ➊➋
✍ ፀሀፊ ☞አሚር ሰይድ



......እጁን ቀስሮ በአየር ላይ "ሪም " ከማለቱ ገና ከአፉ ነጥቄ
...... "ሪም ምን ሆነች!!?" አልኩት ልቤ ምቱ ፈጠነ " ..........መኪና ገጫት.."
በቆምኩበት ድርቅ ብየ ቀረሁ ጨለመኝ ሁሉም ነገር ዞረብኝ በደመነፍስ ሩጫ ቀጠልኩ የምሄድበትን ግን አላውቅም፡፡ አቤል ተከትሎኝ ሮጠ እማማየም ከኃላ "መራም አረ ቆይ ልጀ ተረጋጊ እንጂ" እያሉ ተከተሉኝ፡፡

እኛ ሰፈር አብሮ አደጋችን ሀቢብ ለእናቱ ክሰል አምጥቶ ሲመለስ ነበር የተገጣጠምነው መኪናውን አቁሞ " መሪ ምን ሁነሽ ነው የምትሮጪዉ?? የምትሄጅበት ቦታ ካለሽ ላድርስሽ !? ግቢ" አለኝ፡፡

ወደ ሀቢብ መኪና ገባሁ ያለገደብ ከአይኔ የሚፈሰውን እንባ አይቶ ደንግጧል "ሀቢብ በአላህ አፋጥነው! አፍጥነው ቶሎ በል!" አልኩኝ ወዴት መሄድ እንዳለበት ግራ ገባው፡፡ አቤል እየሮጠ ደረሰብኝና ሀቢብ መኪና ሲገባ "አቤሎ ምንድነው ነገሩ አንተ ንገረኝ እንጅ ሁላችሁም ዝም ብላችሁ አስጨነቃችሁኝኮ በአላህ!"አለ ሀቢብ.....
......፡ "ሪም መኪና ገጭቷት ነው ወደ ሀያት ክሊኒክ ውሰደን" አለው፡፡ "ገጭቷት" የሚለውን ቃል ስሰማ ጭንቀቱ የብስ ባሰብኝ! ሀቢብም በጣም ደነገጠ የሚለው ጠፋበት ከሪም ጋር በእድሜ በተወሰነ አመት ነዉ የሚለያዩት አቅፎ ተንከባክቦ አሳድጓታል ከልጅነቷ ጀምሮ በጣም ይወዳታል፡፡


ሀቢብ በፍጥነት እየነዳ ክሊኒኩ ደረስን፡፡ መኪናው በቅጡ ሳይቆም ለመውረድ ስሞክር በአፌ ከመደፋት አላህ ነው ያዳነኝ .......ሰወች በሁኔታየ ጮሁ እኔ ግን ሪምን ማየት ብቻ ነው ፍላጎቴ! ወደ ውስጥ ስገባ ሪም ግንባሯን እና እጇን ታሽጋ ቁጭ ብላለች ከጎኗ ፈንጠር ብሎ አንድ ወጣት ልጅ ተቀምጧል፡፡ ሳያት በእንባ የታጠበው ፊቴ መልሶ በእንባ ጎርፍ መታጠብ ጀመረ፡፡ "እንዳላቅፍት እንደብርጭቆ የምትሰበርብኝ መሰለኝ ሳሳሁላት፡፡

" ሪም የኔቆንጆ ደህና ነሽ!?" አልካት እግሯ ስር ተንበርክኬ በስስት እያየሆት
......."ደህና ነኝኮ አታልቅሽ" እያለች እንባየን ጠረገችልኝ፡፡ ከአጠገቧ ራቅ ብሎ የተቀመጠው ልጅ "እህቷ ነሽ?" ሲለኝ መልስ ከመስጠት ይልቅ "አንተ ነህ የገጨሀት አይደል!?" ብየ እንደ አራስ ነብር ተከመርኩበት፡፡ እጄን ለማላቀቅ ራሱን ለመከላከል እንካን አልሞከረም ዝም ብሎ በአትኩሮት ተመለከተኝ፡፡

እማማየ "መሪ ተይ ብየሻለሁ ቢገጫትስ ይሄው እጅ ሰቶ መጥቶ እያሳከማት ነዉ .... ገጭቷት ቢጠፋ ነበር ክፉ የሚያስብለው ልጄ እሱምኮ ፈልጎት አይደለም አላህ አገጣጥሞበት እንጅ" አሉ፡፡
.......ሪም ቀጠል አርጋ "መሪ በአላህ ተረጋጊ እሱኮ አይደለም የገጨኝ፤የገጨኝ ትቶኝ ሲሄድ አይቶ እሱ ነው አንስቶ ያመጣኝ" ስትለኝ ሰውነቴ እንደ በረዶ ቀለጠ እጆቼ ተንቀጠቀጡ "ይቅርታ" አልኩት ቃል ከአፉ ሳያወጣ ቅንጭላቱን በማወዛወዝ እሽታውን ገለፀልኝ፡፡

......ሀቢብ ሪምን አይቶ " አንች ሚዳቆ ይሄኔኮ ሩጠሽ ገብተሽበት ነዋ!?" ብሎ ሲቀልድባት
.....ሪምም እንደ አንተ እጁን ያላጠራ ሹፌር ገጥሞኝ ነዉ ብላ ሀቢብን ነካ አረገችዉ፡፡

ሪም ከባድ የሚባል ጉዳት አላጋጠማትም ትንሽ ግንባሯ ተፈርክሷል እጇ ተልጧል እንጅ የሚያሰጋ ነገር የለም፡፡ ሀቢብ ደህንነቷን ካየ በኃላ " በቃ እኔ ልሂድ ቢሮ ይፈልጉኛል አንች አይጥ ደግሞ ሙዝና ብርቱካን ፈልገሽ አይደል የተገጨሽው ከስራ ስወጣ ይዠልሽ እመጣለሁ" ብሎ አስቆን ሄደ፡፡

ሪም ደህንነቷን ደጋግሜ ጠይቂያት በጣም ደህና ነኝ ብላኛለች ..በቃ ወደ ቤታችን እንሂድ ብለን ስንነሳ እማማየ ልጅን እየመረቁ በየ መሀሉ ይመክሩት ነበር፡፡ እማማየ በቃ እንሂድ ወደ ቤት ብያቸው ቅድም ይቅርታ የጠየኩትን ልጅ አሁን ደግሞ ስላደረገልን መልካም ነገር "አላህ ኸይር ጀዛህን ይክፈልህ"አልኩት "አሜን" አለኝ፡፡


ወደ ቤታችን ለመመለስ ባጃጅ ብንጠብቅ በዋዛ ማግኘት አልቻልንም ሁሉም እየሞላ ነው የሚመጣው ጠበቅን ጠበቅን ከዛም " እዚህ ጠብቁኝ ወይ ኮንትራት ይዠ ልምጣ" ብየ መራመድ ስጀምር ለካ ባዶ እግሬን ነኝ፡፡ በባዶ እግሬ መንገድ ጀመርኩ ትንሽ እንደተራመድኩ ሪም "መሪ መሪ ነይ" አለችኝ በእጇ ምልክት እየሰጠችኝ ስመለስ አሁንም ያው ልጅ እኔ ላድርሳችሁ ግቡ ተቡለው መኪናዉ ዉስጥ ገብተዋል፡፡ በውስጤ "ኡፍ ገላገልከኝ" አልኩኝ፡፡

ወደ ሰፈር አድርሶን ሊመለስ ሲል እማማየ "ልጄ ምነው እዚህ አድርሰህን ቤት ሳትገባ መሄድህ?? በል ውረድ አንተም" አሉት
....እኔ ክው ብየ ቀረሁ ከአለባበሱ ጀምሮ መኪናውም ቢሆን ውድ የሚባሉ አይነት ነው፡፡ እሱ የሚኖርበትን የቅንጦሽ ኑሮ ከእኛ ጋር ሲወዳደር እዚህ ግባ የሚባል አይደለምና እኛ ቤት ያለውን ነገር ሳስብ ደንግጨ ቁሜ ቀረሁ በሆዴ መቼም አይገባም ብየ ሳስብ
......"ማዘር ማስቸገር እንዳይሆንብኝ እንጅ ብገባ ደስ ይለኛል" ሲል የበለጠ ደነገጥኩ
........"አረ የምን ችግር ልጄ ና እንግባ" ብለው ከፊት መንገድ እየመሩት ተከተላቸው እኔ ከኃላ በድንጋጤ እራመድ ይዣለሁ ሪምን ሳያት ሳቀችብኝ


ወደ ቤት ስንገባ የሰገድኩበት ሙሰላ እንደተነጠፈ ነበር፡፡ ፈጠን ብየ አነሳሁት " ቁጭ በል የኔ ልጅ" አሉት፡፡ እኔ ጨነቀኝ ምናልባት ስራ ቦታ ላይ የማያቸው ሀብታሞች ሁኔታ ይሆናል ያስጨነቀኝ፡፡

ሪም አልጋው ላይ ጋደም ብላ የሚሆነውን ታያለች፡፡ እማማየ "መሪ መክሰስ አዘጋጅ" አሉኝ፡፡ እኔ እሺ ብየ እኛ የምንበላዉ ከምንጠጣዉ ቤት ካፈራዉ ምግብ አዘጋጅቼ ቡና አፈላሁ፡፡ ከዛም አቀረብኩኝ...የቀረበለትን መክሰስ ከእማማየ ጋር አብሮ ደስ እያለው በላ፡፡
ቡና እያፈላሁ የአዩን ድምፅ ሰማሁ " አዩ ና ወደ ቤት ግባ " አልኩት
..... "መሊ ኔማ አድ ላሳይሽ"አለኝ አየተኮላተፈ
........... "ምን ልታሳየኝ ??ነው" አልኩት
....."በፊም የሚታይ መኪና" አለኝ፡፡ አቅፌ ሳምኩትና ቤት አስገባሁት፡፡

ሪም ታሽጋ ሲያይ ለማልቀስ ዳዳው "ማነው የመታሲ"አላት በቁጣ መንፈስ
..."ወድቄ ነው እሽ ማሬ" አለችው
...."ማን ገፍትሮስ"አላት "
..... አዩ ና መክሰስህን ብላ አራበህም እንዴ??" አልኩት
......."እርቦናል ግን ሊም ማን ያበላታል አመማት" አለ፡፡
..... አንተ ብላና ለሷ እኔ አጎርሳታለሁ አልኩት፡፡ ምግብ እንዳቀረብኩለት ወደ እንግዳው ልጅ ቀርቦ "እንብላ" አለው እሱም እንደገና እጁን ታጥቦ መብላት ጀመረ፡፡ ከአዩ ጋር በፍጥነት ተላመዱ፡፡ በርግጥ አዩ የሚወደድ ልጅ ነው፡፡ ከዛ እኛን አመስግኖ ሪምንም አላህ ያሽርሽ እየመጣሁ እጠይቅሻለሁ አብሽሪ ብሎ እማማየም መርቀዉት ከቤት ወጥቶ ሄደ፡፡

እማማየ ከዛ ጊዜ ጀምሮ ከልጁ ጋር ጥብቅ ወዳጅ ሁነዋል፡፡እማማየ ብቻ ሳይሆኑ አዩንም ይጨምራል ብዙ ጊዜ ቤት እየመጣ ይጠይቃቸዋል አዩን የተለያየ ቦታ እየወሰደ ያጫውተዋል ያዝናናዋል ውዴታቸው ጨምሯል እኔ ግን ስሙን እንኳን አላውቀውም፡፡

እማማየ ሳያነሱት ውለው አያድሩም ግን "ያ መልካም ልጅ"ነው የሚሉት እንጅ ስሙን ሲጠሩ አልሰማም ይገርማል ግን በምን ቋንቋ ተግባቡ??? ልጁኮ ከአፉ ቃል አያወጣም ዝምታ በሱ ላይ ነግሷል! በእርግጥ እኔ ስራ ስለምውል ብዙ አንገናኝም ነገር ግን እግር ጥሎን እንኳን ከተገናኘን ከዝምታ ውጭ ሌላ አላይበትም፡፡
ግን ደግሞ ቤት ሲመጣ ደስተኛ ይሆናል እንደሀብታም ተብየዎች  አያካብድም ልክ እንደኛ ሁኖ ለሰወች ይተናነሳል፡፡👇👇👇

ቤት አልፎ አልፎ የሚመጣ ቢሆንም ከጊዜ በኃላ ግን ሁል ጊዜ ቤት መምጣት ጀመሮ ለአይኔ በዛብኝ ቃል አውጥተን ባንነጋገርም አልፎ አልፎ አይን ለአይን እንገጣጠማለን፡፡


አንድ ቀን በስራ ሰአቴ እኔ ወደ ማስተናግድበት ካፌ ሁለት ሰወች ሲገቡ ተመለከትኩ ያየሁት ነገር አስደነገጠኝ ለተወሰኑ ሰከንዶች ድርቅ ብየ ቀረሁ፡፡
...ማን ገብቶ ይሆን ???
በክፍል ➊➌
ይቀጥላል........

Join👇👇
@Islam_and_Science