ISLAMIC SCHOOL

This media is not supported in your browser

14.0K views03:07

"ሸኽ ሮመዳን!"
የወሎ ሰው «ዙር ገጣሚ አላህ ያርጋችሁ» ብሎ ይመርቃል። ከቁጥር ሳትጎድሉ ዓመት ዓመት ድረሱ ማለቱ ነው። መቼስ ከመቼውም ጊዜ በበለጠ የዚህ ምርቃት ትርጉም አሁን የገባን ይመስለኛል። አዲያ እንዴ ተማላ (እንደ ዋዛ) ዓመቱ ደርሶ እኔም ከቁጥር ሳልጎድል ዙሩን ገጥሜ ስንቱን ባጣንበት ሜዳ ቀና የማለቱን፣ ታላቁን ወር የማግኘቱን እድያ አገኘሁም አዴል? አሁንም አሚን እያልኩ እዬሸከርኩ እዬሃመድኩ ይችን ወጌን ሃያ ጀባ እላለሁ ዛሬም!
እኛ ወሎዬዎች ብዙ የዓረብኛ ቃላትን በተለይም ስሞችን በራሳችን ፈቃድና ስልጣን ለ‘ኛ በሚመች መልኩ ወደራሳችን አማርኛ ስበናቸዋል። ስሞችን ብናይ ዑመርን "ይመር" አዒሻን "አንሻ" ኢማምን "ይማም" ከቁልምጫ ከዶ፣ ሙሄ፣ አንሾ እና ሌሎችም። ረመዷንም እንደዚሁ ነው። ሸሕሩ ረመዷን ሲባል የሰማውን የወሩን መጠሪያ ወሎ ተቀብሎ "ሸህ ሮመዳን" አለው። እስካድግ ድረስ ይህ ትክክለኛ መጠሪያው ይመስለኝ ነበር። ደሴ ውስጥ ከጨረቃ መታዬት በተጨማሪ የረመዷንን መጀመር የሚያሳውቁ ትዕይንቶች አሉ። በዛ ምሽት የመንገዶቹም ሆነ የዬመስጅዶቹ መብራቶች በታየቺዉ ጨረቃ ቀንተው በሚመስል ሁኔታ ይበልጥ ደምቀው ይታያሉ፤ ሁሉም አካባቢዎች ሙስሊም ክርስቲያን ሳይባል በሰፈር ልጆች ተክቢራ ይደምቃሉ፤ መንገዶች ጀለቢያ ለብሰው ትከሻቸው ላይ መስገጃ ጣል ባደረጉ ወንዶችና ባብዛኛው "ሸርሸፍ" ተከናንበው ወደ መስጅድ በሚያመሩ ሴቶች ይሞላሉ፤ ከዬመስጅዶቹ የሚሰሙት ተክቢራዎች ልክ አሁን እያዳመጥኳቸው ያለ ያክል ልብን በሀሴት ይሞላሉ፤ ከዚህም ከዛም «እንኳን አደረሳችሁ« «እንኳን አብሮ አደረሰን» የሚሉ ድምጾች ይሰማሉ። ብቻ ከደወይሜዳ እስከ መናፈሻ ከዛም እስከ ጧኢፍ ሰፈር፣ ከመላኩ ደሳለኝ እስከ ዓረብ ገንዳ፣ ከሸርፍ ተራ ጫት ተራ ሸዋ በርን አካሎ እስከ ሰኞ ገበያ ያለው ድምቀት የቱ ተነስቶ የቱ ይተዋል!?
የረመዷን ፆም የሚጀመርበት ቀን የዋዜማው ምሽት "ገባረላ"ተብሎ ይጠራል። ምንኛ እንደሆነና ትርጉሙን የሚያውቅ እስካሁን ባያጋጥመኝም። በዚህ ቀን ታድያ የገጠር ዘመዶቻችን ተሰብስበው እኛ ቤት ይመጡና ከመስጅድ መልስ ዱዓ እያደረጉ ይቀበሉታል ታላቁን ወር። አጎቴ "እንዴው እታለም ሸኽ ሮመዳን እንዲህ እንዴ ተማላ መጣም አዴል? አምና እህነዜም እንድሁ ትልም አልነበር?" ይላል ለእናቴ በጊዜው መንጎድ እየተገረመ። "አይወይም ቤቱን ያብጅለትና ተ‘ኛ አይነጠልም ነበር መገን አላህ!" ይላል የሞተ ወንድሙን እያስታወሰ። ትክዝ ይልና ደግሞ "እስቲ የተቀረነውን ዙር ገጣሚ አላህ ያርገን!" ሲል አሚሚሚን ይባላል በረጅሙ። ከዛማ እናቴ እያጫጫሰች ቡኗን እየቆላች "አቦል ጀባ ቀህዋ ጀባ!" ትልና ምርቃቱ ከፋቲሓ ጋር ይቀጥላል እያከታተለች ትቀዳለች። አላሁመ ባሪክ ለና ፊ ረመዷኒም ይቀልጣል። ይህንን ስብስብ ትቼ መተኛት አልፈልግም። ግን ደግሞ ልጅ ነበርኩና ወደ አምስት ሰዓት ገደማ እንቅልፍ ያንገላጅጀኛል። ይህን ያዬ አጎቴ ታድያ " ሽታየዋ ህጅ ግቢ በረካ ሁኝ አቦ እሰይ ወርቄዋ ዱቃ (ዱዓ) ትወዲያለይ!" እያለ ራሴን ያሻሽና "ተኝ"ይለኛል። ቱፍታቸውን ተሸልሜ ገብቼ እተኛለሁ።
ደሴ በረመዷን የራሷ የሆነ የስሁር አላርምም ነበራት "አሊ ፓስቲኒ"። ይህ ሰው ወሩን በሙሉ በዛ በሌሊት በየሰፈሩ እየተዘዋወረ ከበሮውን ድው ድው ድው ያደርግና "አሊ ፓስቲኒ ተነሱ ሾርባ ቅመሱ ተሰሃሩ!" እያለ ሰውን ይቀሰቅሳል። አላህ ሥራውን ይውደድለትና እሱንና "ላሊበላ" (አባ ውዴዎችን) ሰው ይሁኑ አይሁኑ፣ ጥቁር ይሁኑ ቀይ፣ ፈረሰኛ ይሁኑ እግረኛ ለማዬት የነበረን ጉጉት አይረሳኝም። ሳስባቸው ፈገግ ከሚያስብሉኝ ነገሮች አንዱ የሱዳን ሙዚቃ ነሽዳ እየመሰለን የኮመኮምነው ነገር…!አንድ ልጅ ምን አለ "የሱዳን ዘፈን ስሰማ ይርበኛል ረመዳን እየመሰለኝ!" ሃሃሃ
በአንዳንድ መስጅዶች በአባቶች የሚባለው "ዓለይከ ረብበና ቢኹስኒል ኺታሚ"፣ በሌሎች መስጅዶች ከሚገኙ ወጣት አሰጋጆች የሚወጣው የተስረቀረቀ የቁርዓን ድምፅ፣ ከመስጅድ አቅራቢያ ከተኮለኮሉ የንግድ ድርጅቶች የሚሰሙ መንዙማዎች፣ ወደ መስጅድ ለመግባት እያሟሟቁ በዬሱቆቹ ደጃፍ ሰብሰብ ብለው የሚጨዋወቱ ሰዎች፣ በየቤቱ ሰብሰብ ብለው በአንድነት የሚያፈጥሩ ቤተሰቦች፣ ወዳጅ ጓደኞች፣ ያበሉ ያጠጧቸውን ሚስኪኖች ሳይጠዬፉ በመኪኖቻቸው ጭነው ወደዬመጡበት መልሰው ወደ መስጅድ የሚጣደፉ አዛኝ ሃብታሞች፣ የሳንቡሳው ሽታ፣ የስጋ ሾርባው መዓዛ፣ ልጅ ሆኜ ተራዊህ እሰግዳለሁ ብዬ ሄጄ እንቅልፍ የሚደፋኝ ነገር፣ ረመዷንን መቀበያ የየቤቱ ሁሉ ምንጣፍ ወጥቶ የሚታጠበው፣ በኅብረት የሚፈተገው የሾርባ እህል፣ ሌላ ሌላው ሸመታ ሁሉ በዓይነ ህሊናዬ፣ በእዝነ ልቦናዬ ይመላለሳሉ!
በረመዷን በርረ መዳን (የመዳን በር) ይከፈትልን፣ አገር አማን በላዑም ተብሪድ ይሁንልን፣ አዛ ናዚላ ሙሲባው ሓምና ጘሙ ሁሉ እንጃ ሜዳ ይውደቅ፣ ከከራሚዎቹ፣ አሁንም ዙር ከሚገጥሙት፣ ቀልብ ጀሰዳቸው ከጠራው የ‘ርሱ ሰዎች ያድርገን አሚን!!!

#ረመዷን_ሙባረክ!❤️
Atiqa Ahmed Ali

@IslamisUniverstiy_public_group

14.4K viewsedited 12:39