ለህግና ገቨርናንስ ኮሌጅ የቤተ- መፃሕፍት ሰራተኞች የአቅም ማጎልበቻ ስልጠና ተሰጠ።
*//*
ሰኔ 11/2016 ዓም
በሀዋሳ ዩኒቨርሲቲ የህግና ገቨርናንስ ኮሌጅ ለቤተ-መፃሕፍት ባለሙያዎች በውጤታማ የቤተ-መጽሐፍት አደረጃጀትና የአገልግሎት አሰጣጥ እንዲሁም የሙያ ስነ-ምግባርን ማሳደግ ላይ ያተኮረ ሁለተኛ ዙር ስልጠና ሰኔ 10 ቀን 2016 ዓ.ም ተሰጥቷል።

የኮሌጁ ዲን ዶ/ር ደብረወርቅ ደበበ በስልጠናው ማስጀመሪያ ወቅት እንደተናገሩት የቤተ-መጽሕፍት አደረጃጀትና አገልግሎት አሰጣጥ የተጠቃሚዎችን እርካታ በመጨመር የተሻለ እውቀት እንዲገበዩ የሚያደርግ እንደመሆኑ አገልግሎቱን የሚሰጡ ሰራተኞች በቂ ግንዛቤና አስፈላጊው ስነምግባር ሊኖራቸው እንደሚገባ ገልጸዋል። መሰል ስልጠና በአመቱ መጀመሪያ የተሰጠ ቢሆንም የአዳዲስ ሰራተኞች ዝውውር በመካሄዱ በድጋሚ እንዲሰጥ መደረጉን የገለጹት ዲኑ ከስልጠናው በኃላ ሰልጣኞች ሳይንሳዊ የሆነውን የቤተ-መጽሐፍት አገልግሎት አሰጣጥ በመተግበር የተሻለ የስራ አፈጻጸም ያሳያሉ ብለው እንደሚጠብቁ ተናግረዋል።

ስልጠናውን የሰጡትና ከፍተኛ የቤተ-መፃሕፍት ባለሙያ የሆኑት አቶ ሙሉጌታ ወ/ፃዲቅ በበኩላቸው ቤተ-መፃህፍት በይዘትም ሆነ በአይነት የተለያዩ የመማሪያና የማጣቀሻ መፃህፍት የሚገኙባቸው እንደመሆናቸው አደረጃጀታቸውና የአገልግሎት አሰጣጣቸው በዘፈቀደ ሳይሆን ሳይንሳዊ መርህን በተከተለ መልኩ ሊሆን ይገባል ብለዋል። ስልጠናው እንዴት መጽሐፍትን ቀላልና ለአንባቢያን ምቹ በሆነ መልኩ ማደራጀት እንደሚቻል፣ ቀልጣፋ የአገልግሎት አሰጣጥን እንዴት ተግባራዊ ማድረግ እንደሚቻል እንዲሁም የሙያ ስነ-ምግባሩን የጠበቀ አገልግሎት መስጠት በሚቻልበት ዙሪያ በቂ ግንዛቤ ያስጨበጠ መሆኑን አቶ ሙሉጌታ አክለዋል።


👉https://www.tg-me.com/hugadssachannel