رأيكن

يا الله قديش في ناس مغشوشين بالبساطة المزيفة ،
وقديش في ناس مخفيين عم ينأذوا من هالعالم ،
بس كلو تقريباً من ورا الكواليس !
قديش في ناس عم تستعجل ع الحب ، وكأنو شي مصيري ، لازم نلحق حالنا فيه ،
مش قدر ومكتوب واختيار !
لما أي حدا فينا بحاول يفضفض لحدا همو ، القصة بتكون أشبه بأنو عم نقعد هالحدا عالكرسي ومنكبلو ومنقلو قوم ساعدنا !
بهديك اللحظة هيك كان إحساسها ، القصة كلها بلشت لأنها حابة تحكي لحدا غريب ،
هي كانت حابة تحكي وبس ، كانت تخفف الألم منها بالحكي والدموع !!
              _ وأنا كنت مستمع جيد !
قالتلي : كان أول تجربة بحياتي ، جربت معو كل شي لأول مرة ، بس أنا ما كنت الأولى عندو ،
بدايتنا بتشبه كل البدايات ، وحتى يمكن النهاية ، لأن مافيك تحزر ع أي حدا .
كان شي جديد بحياة بنت شربت من مرارة الفقد ، و حسيتو العوض لكل شي مرق بحياتي ،
بس أنا كنت مجرد محطة بدو يمشيها ليوصل لمحطة التالية !!؟
كان شخص ذكي ، اسلوب محترم ، وتفكير ملتزم .
وانا لليوم بتذكر أول مرة حكينا صوت ، بتذكر أول مرة قلي بحبك ، وقتها حسيت قلبي وقف من الفرحة ، أول ضحكة ، أول مرة إلتقينا ببعض ، أول مسكة إيد ، كل هدول تفاصيل حفرت بقلبي ، وعم تقلق راحتي هلأ وهو بعيد .
اول مشكلة صارت بيناتنا بسبب رفقاتو البنات ، ما راعي غيرتي وحبي إلو ، ولأول مرة بِ بَدي رفقاتو عليّ !
صدقني لو كان العكس كنت خترتو من بين ألف رفيق ، قريب كان أو بعيد !
بس للأسف هو غير !!
لما حط راسي عالمخدة لنام ، بيمشي بمخي شريط حياتي معو كلو تقريباً ، وبصير اتذكر كلامو و حنانو ، و كان في غشاء ع عيوني ، مخليني مابشوف شي من تصرفاتو البشعة .
                    بتعرف شو !؟
كل يوم بسأل حالي ألف مرة ليش تركني ، ليش من دون أي سبب مقنع ، أنا حبيتو وكنت مستعدة اترك كل شي لكون معو ، مع انو مرقت بكتير تصرفات ومشاكل وسايرت ، معقول هاد جزائي بالنهاية ، تكون الفترة يلي مرقت من عمري بالنهاية تسلاية أو كذبة .
طيب أنا شلون بدي قول لقلبي هاد وجع جدید ، شلون بدي قلو انخذلت من هالحدا !؟
يلي كنت تطلع من جسمي لتتخبى بصدرو لتحس بدفا وآمان .
يعني أنا هلا لازم وقف بين إيدين ربي وقول يارب نسيني هالحدا ! بعد ماكنت فيق بنص الليل لصلي وقول يارب خليلي ياه ! معقول هيك !!
طيب شو قول لأمي يلي قالتلي أنا ناطرتو ليجي يطلبك مش رح وقف بطريق سعادتك !
يعني هلأ روح قول لأمي أنا سعادتي توقفت لأنها كانت وهم !!
                   بتعرف شو !؟
اليوم وبعد كل شي مرق ورح يمرق عليّ من الوجع وكسرة النفس .
مش رح ادعي عليه ، مش رح قلك كان حدا سيئ !!
بالعكس هو كان وبعدو أحن شخص ولو بخيالي ، بكفي إنو قدر بيوم من الأيام يمسك قلبي بايدو ويمسح منو كل أذى ، يمكن مسح يلي راح مشان هو يكون الندوب الجديدة .
يمكن لو ما حظرني من كل مواقع التواصل ، رح ضل اكسر من حالي واحكي معو ، ضل اسأل عنو ، وقلو تفاصيل يومي ، بس الحمدالله بالنهاية ع كل شي ، بس لو يرجع لحتى اسألو شو السبب ، أو قلو بترجاك رجعني لأوجاعي القديمة أنا هلأ يتيمة قلب !

#من_قصة_حقيقية

#helal_alkernazi

كتار بيحكولك بكرا بتنسى ، بكرا بمر الوقت وبتنساه !!!
               ومفكرين في شي اسمو نسيان؟!
أو حتى مرحلة البرود يلي منوصلا بتكون سهلة !!
ليش في حدا بيقدر ينسى !!؟
_ ينسى الخسارة ، الزعل ، الحب يلي عاشو ب تفاصيلو الحلوة او الحزينه ب لحظاتو ب مشاكلو والقسوة تبعو !
وحتى النسيان كان الو نصيب  من اهل المتل 
                " القسى ما بينتسى "
يعني مافينا ننسى يلي منعيشو ويلي عشناه ، مستحيل ننسى الاشخاص يلي بمروا بحياتنا ، بعشعشوا بذاكرتنا ، وبصيروا بمروا كتير بتفاصيل حياتنا اليومية .
بصير بيلفتنا اسم متل اسمو ، او كلمة من كلماتو، أو حتى شخص بيحمل نفس الملامح تبعو ، مجرد تفصيل صغير كان يحبو ويجمعنا سوا ، كلن ذكريات مافي شي قادر يمحين من جواتنا .
       _ وعن هديك التنهيدة من قلب محروق ؛
      " كيف بدي انسى ، كيف فيني ارجع قوي "
كيف فيني وصل لمرحلة اسمع اسم هالشخص وما ينهز كل كياني ، كيف فيني انساه هداك النسيان البارد ، يلي ببطل تهمني فيه كتير قصص ، وحتى لما اتذكر هالشخص ما حس ببركان جواتي عم يفور ، بحب هالبركان يخمد ، وبطل اهتم .
  
        لـ حتى نقدر نتخطى هالشي لازم نتجاوز !!
    حتى ترجعلنا الثقة بحالنا والقوة لازم نتجاوز ، يعني ببساطة أكبر نحط فوق الجرح ملح ونتوجع ، ونسمح للوجع يرافقنا حتى نتأقلم ونتخطى هالمرحلة .
التجاوز أنو يصير عنا هالقوة لما نشوف هالشخص أو نسمع عنو قصة وما نتأثر بطريقة بشعة و صعبة ، التجاوز هو أهم خطوة لازم نوصّل إلها و نعيشها ⁦!

#Helal_alkernazi

كنت بحب شخص كتير ، كتير لدرجة العمى ، العمى يلي خلاني ماشوف غيرو !
وكل مره كنا نتزاعل اكتبلو جريدة عتاب ، من مبدأ انو ما هاين عليي بيوم نكمّل بدون بعض ، ومشيت الأيام وكل مره يغلط ويتمادى ، و مرق كتير شغلات ع أساس العشرة والأيام ..
وكل ما صارت جريدة العتاب تقل كلماتها .. ما بعرف هوي تعود ولا الملل خلا هالشي يكون !؟
المهم بعد وقت طويل ، وللتركيز ع كلمة طويل ..
صار عتابي يتحول لصمت ، و ردة فعلي تبرد " أنا اللي كنت اغلي متل النار بمجرد ما فكر أنو ممكن أصحى بيوم ما لاقيه "
وتغيرت أحوالي ، بس ضل العتب اسمو عتب ، لو بطلت اكتبو كان ممكن ينقرأ بسكوتي !!؟
وكترة الضغط والأذى ، بلشت تخلّي كل السبل قدامنا مسكّرة ..
وكأنو إشارة من ربنا انو هي النهاية ..
بتذكر بآخر رسالة كتبتها ، كانت ما فيها كتير حكي ، لأني حسيت أني استنفذت طاقتي كاملة بالعتاب على  مدار السنين ؛؟!
وانتهت بحكي بسيط ، ومالو قيمة !!!
لانو اللي بدو يصحى كان لازم يصحى من أول جريدة كتبتها
          ما يستنى آخر كلماتي ، قبل ما روح

#Helal_alkernazi

فيك مثلا تمرق اخطائي معك !؟
     او ما تدقق كتير ع اخطائي !
بهالفترة انا مو منيحة ابداً ، ويمكن انت كمان !؟
بس رغم كل شي ماعندي هالزوايا يلي ببان فيها الجانب التعبان .
غير يلي عم تشوفوا قدامك ، حاول ما كتير تركز فيها .
واذا صار وركزت .. لاتعاملني ك أنك قاضي !
يجي بقلب قاسي ، يحكم حكمو ويسكر القضية بدون طعن !!
كتير بعرف شو لازم اعمل وكيف اتصرف وكل النصائح يلي ممكن تنحكى وتنقال ، وكل كلمات المواساة .
ف الاحسن انك تعمل حالك مو منتبه كتير ع نفسيتي وتصرفاتي !!
او اذا كنت منتبه .. كون متفهم وبتقَدر، أو حتى تشوفني بقلبك ، وتحتويني فيه ، أنا متأكدة إنو قلبك رح يشوف روحي الباهته ويداويا .
صدقني انا معك بنسى حالي ، لدرجة اني ما بفكر ب كلامي ، و الكلمة يلي بتطلع مني بلا تفكير
هيي حتماً طلعت لأن روحي بترتاح قدامك ؛
ما بظن الها معاني أكتر من هيك ، وبتوقع أنت بتعرف إنو أعلى درجات الحب هي الآمان ، يلي أنا أساساً ما بعرفو غير لما شوف عيونك .
بتعرف شو عم بطل اعرف اتحكم بانفعالاتي ، وقلبي صاير هش مليان نكران عم يرفض الكل وماعم يعرف يتقبل حدا ، إلا أنت عم بهرب من الكل وكون حدك ، حتى لو وجودي عم يتعبني ويتعبك .
   _ حاول تتقبلني !
حاول بس لمرة وحدة ترجع وتشوف أنا مين وأنا شو بكون وأنا معك ، شوف إنو لو بهون كل الكون عليي أنت وحدك ما بتهون .
        تفكيري كلو مخربط و ضايع وضايج .
عم كون حدا كتير اناني ، بس مابدي اخسرك .
بس بدي تخفف نبرة العتب ، نظرة العتب ، او لهجة العتب .
بدي تحتويني ، تكون تعرفني ما الحدا يلي بتشوفوا .
     " لأن انا شوي عيوني متغيرة ع حالي "

#Helal_alkernazi

                   هل مرة غير كل مرة ،
المحادثة فاضية وبيضا ، بدون حروف وبدون كلمات .
ما لقيت شي بناسب هي اللحظة غير المكاتيب ؛
               كنت ممكن قدرت اوصلك !؟
            أو حتى كيف بقدر اوصلك !!
                    
                        _ بتعرف شو !!؟
نحنا فينا نوصل لبعض بس ماعم نحب ، وصدقني هيك أريح .

-سيدنا علي قال " الرزق نوعان ، رزق تطلبه ورزق يطلبك "

كنت كتير اتمنى انطلب منك ، بكل مرة كون زعلانه او مقهورة  ، انطرك . .
قول هالمرة رح يتغير ، رح يحس بقيمتي ، بُعدي عنو رح يفرق معو !
لأن صدقني مليت وانا اطلبك ، وانت ما تجي ، او تجي بعد ما روحي تتعب منك ومن الطلب ، وتخليني اكره حالي .
أخر شي صار عندي هي الشجاعه يلي خلتني بطل اطلبك ،
            _ مع انگ لساتك عندي الرزقين !!!

_ ما هيك واحدنا بعد ما يتعذب ويبكي وينجرح بيصحى ، وبِبطل الو نفس بكل الشغلات يلي بحبا
، بدك ما تواخذني اني صحيت !!
وبطلت شي مهم عندي ، او حتى يكون من اولوياتي قربك مني .

صدقني صرت بطل ادعيلك تكون معي ، بطلت اتمنى تكون لالي !!
     حتى ماعاد فيك تكون معي والي بصراحة ؟؟!
لان هاد الحب يلي بتمثلو انت ، صار صعب عليي ، ماعاد فيني كون متمسكة فيه ، ماعاد فيني كون بس انا الطرف يلي بيمسك الخيط وبحاول ما ينقطع .
صار بس بدي عيش مرتاحة ، ماتكون بتفكيري ، ما تكون مرافق تخيلاتي ، ما تقيدني ب أمل انك موجود ، ضل موهومة انك معي وانت مش معي .
      
              " ما بتتذكر شو كنت تقلي "
            _ اليـوم شفـت وحدة بتشبهك  !!
صدقيني كتيـر صعـب أو شـي مُستحيل شـوف حـدا بيشبهـك ، مافي حـدا متـلك  . .

مافي حدا فينو ياخد مكانك ، صعب كتير شوف حدا متلك . .
                              _ انت هيك ،
صعب يكون متلك حدا ، صعب يكون في حدا يجرح قلبي هيك .

يمكن فيني اتمنالك الخير والتوفيق بحياتك ، حتى ما كون بشبهك !!

       ما كون بشبه افعالك ، وتصرفاتك ، وبرودك

#helal_alkernazi

لما الشخص بغيب ، بياخد جزء مننا
بياخد تفكيرنا ، وبياخد قلبنا معو !؟
                  " متلك تماماً "
رحت وغبت واخدت جزء مني ، أو يمكن اخدتني كلي !!

ماعرفت بدلك .. كان صعب عليي اختار غيرك !
لان اتوقعت غيابك كم يوم او فترة وبتعدي ، ومتل كل مرة نحن أقوى من المشاكل ، و وجودنا حد بعض أهم شي ؟!
بس للأسف هالمرة ، رحت وبطلت ترجع متل كل مرة ، حتى محاولتي معك لترجع فشلت .
كنت اعطي لنفسي فرص اتعرف ع ناس جديدة وينسوني ياك !!!؟
بس ما كنت بتوقع انك مأثر فيي لدرجة كل هالناس ماقدروا يشيلوك مني ، كنت مل منن بسرعة ، حتى غيابن ما يأثر فيني .
عادي يمكن انا صرت من ضمن المدمنين !!
اي بس لا يروح فكرك لبعيد صرت مدمنتك ، متل شخص مدمن ع شي وما الو علاج ، لا وجودك بريح ولا غيابك كمان !!

ماعاد في أمل للعلاج ، هي المرحلة يلي بتستسلم فيها ؛
بصير بس بدك تضل تتعاطى ، لانك صرت مدمن !!؟
وللأسف أنا عم عيش بس ع الذكريات ، يمكن هي الشي الوحيد يلي عم بخليني كفي حياتي .

انت بتعرف اني ما بحب جامل ، وأساساً مافيني جامل واتقبل غيرك ، ع حساب قلبي !
ما بقلك ما حاولت ، صدقني حاولت كتير بس كنت فاشلة لدرجة خليتن ياخدو فكرة عني اني شايفة حالي ، صاروا يقولوا عني متكبرة وما بترضى بحدا ، أو باردة ، حتى مابقا حدا تقبلني ، حبي إلك كان يمحي مميزاتي للعالم .

بس هنن ما بيعرفوا انك مأثر فيني وبعيوني وبإحساسي ، مابيعرفوا انو ما عم احسن شوف غيرك ، ماعم اقدر حس الا ل الك ، هنن اكتفو بهديك الفكرة يلي عطيتن ياها ، وماحدا حاول يشوفك جواتي .

          _ كتير بتمنى وبنطر انك تجي !!!

مو مشان ترجعلي ، بس تعال علمني كيف فيني بدلك بس تغيب ، وإرجع كون أنا مع الكل ومع حالي .

#helal_alkernazi

كانت بكل مره نتقاتل فيها ، او نختلف ع شي موضوع
    تسألني انت بتحبني ، انت لساتك بتحبني !؟

وانا ماكان فيني جاوبها ، ماكان فيني اتحكم بغضبي ، وماكان فيني بديها لو لمرة وحدة ع زعلي ، يمكن زعلي كان صعب كتير لدرجة تفكر إنو ما بحبا .
كان عطول الشك يراودها ، وبكل مرة تسألني ؛ وانا ما تكون عندي هي القدرة اني قلا اي بحبك وانا معصب .
               
           _ بكل مرة نختلف ع شي سوا اسمع منها :

    " انت بطلت تحبني ، انت متغير ، انت ماكنت هيك "

كنت كتير حس بالذنب ، حس اني ظلمتا ، مع انو هي الغلطانة .

وانا كان همي بس علمها وفهما انو هيه غلطانة واني بحبا ، وحبي ل الها اكبر من المشاكل ، بس ماكان فيني احكي كتير .

_ لما بصير الزعل والخناق .. تلقائياً الواحد بصير بشك بمكانتو ب قلب التاني وخصوصي لما المشاكل تكتر ، ويبطل في اهتمام لحتى نتصالح أو لا ، لما يصير كل واحد فينا همو يكابر أكتر ، ويبين للطرف التاني إنو هو ع حق .

لهيك ، قبل ما تبلش بالعتاب او حتى قبل ما تبلش تراضيه .. وقبل اي شي !!

قلو أنك بتحبو ؛ ودائماً بتحبو .

صحيه اذا كان غفلان ع محبتو بقلبك ، صحيه وقلو انو محبتو اكبر من الزعل والخناق  يلي بيناتكن ، ومو من مشكلة صغيرة فيا تهدم الحب وكلشي أيام بنيتوا سوا .

خلي هالشي الاساس وقاعدة بالمصالحة وبكل مرة بتختلفو وبصير زعل .. لان هدول الكلمتين اهم من كلشي رح يجي بعدهن بهدف المصالحة ومكانتو عندك !!
رح يضل دائماً متذكر إنو حبو بآمان جوا قلبك ، وإنو حدا مميز وما بتهون عندو ، وبكل مرة يصير في خناق وتكون أنت يلي غلطان يتذكر إنك ولو لمرة وحدة وقفت معو وخليتو قبلك .

" هنن المصالحة والحب والتفاهم بحد ذاتها "


#helal_alkernazi

متل كل يوم صبح بعمل قهوتي وبقعد مع اغاني فيروز

ما بعرف ليش بحس الماضي متمسك بتفكيري ، متمسك يخليني ما انساك ، وتضل تحفر بذاكرتي وتأكد بصمتك ، وما اطلع منك أبداً .
بحس اي شي بحكي ، وبسمعو وبشوفو بذكرني فيك ، وبقلي إنك هون ، موجود جواتي ، مش ضروري تكون قدامي لشوفك ، لأ خيالك فيني مطبوع ، وكل شوي بقلي النسيان محرم عليكِ .

بهداك اليوم وبدون استأذان ، فيروز كانت عم تحكيني ؛

" قلو عيونو مش فجأة بينتسو وضحكات عيونو ثابتين ما بينقصو "

كانت عم تقلي مافينك تنسي ، مافينك تطالعي منك .
كانت عم تلومني ، عم تعاتبني ، ليش صرت ماضي .

كان بدا تشرحلي ، انو حتى لو غبت وصرت بعيد ما رح اقدر انساك ، ولا رح تغيب عن بالي ، رح تضل مرافقني بكل اللحظات الحلوة والبشعة .

رح تضل مطبوع بذاكرتي ، ومابعرف إذا أنا مطبوعة بذاكرتك أو إنك تجاوزتني ، ياترا فيك تتخطاني وتمشي وكأني ما كنت ، بهي الزحمة يلي براسي فيروز سكتت وما حكت ، وأنا كفيت مع حالي ، اسأل وجاوب ، وكأنك قدامي وكنت عاتبك ، وعصب عليك ، وشوي اشتقلك ، وحبك أكتر .

_ بالأخر بس بدي قلك ماعم احسن انساك ، ماعم اقدر امشي وحطك واريي !!
 هالمرة بس عرفت شو يعني لما يكون عندك حدا ؛ يكون الحياة ويروح !!

اي ورحت أنت واخدت كلشي معك

بس بدي قلك عيونك ماعم اقدر انساهن ، وضحكات عيونك ثابتين بس اختفو .

#Helal_alkernazi

مع أغنية 🤍

اشتقتولنا 🤍🌚
مجهزلكن شي حلو متلكن 🤍

" معقول قلبك ينساني وينسى الغرام "
هالمقطع ضلیت اسمعو وعيدو لدرجة حسيت في شي عم يلامسني فيه ، يمكن هاد المقطع بالتحديد أخد شقفة مني أنا ، أنو يعني بعد كل هالحب والاهتمام والغرام تنساني معقول !!
أنا يلي كنت حب بلش صباحي فيك ، لحتى حس إنو بالفعل صار صباح الخير ، وما اقدر اغفا إلا ع صوتك !! بتعرف شو !؟
هلأ بعد كل شي صار من الجفا والنسيان بيناتنا ، أنا لساتني بحكيلك أدق تفاصيل حياتي !!
وين رحت وين جيت مع مين وشو حكيت ... !!
أنت كنت ورح تضل الملاذ لكل شي فيني من أفكار وأسرار ، وشوية هالقلب يلي قدرت تحتوية بس بهمسة بسيطة .
أنا هلأ عم أخد القوة منك ! أو بالأدق من ذكرياتنا سوا . الخريف أكل عقلك مني ، بس أنا فيك كل أيامي شتوية !!
بالتحديد هداك اليوم وقت التقينا ، هداك اليوم ، و الساعه ، و هداك الجو .
هلأ أنا مابعرف لمين روح احكي أو اشكي !
يمكن الناس ملت مني ، لأن الكل قلي حكي ضدك ويقولو مش رح يضل معك ، كنت اضحك وقول هو الأبدية !
وكنت قول بقلبي غيرانين من حبك إلي ، ومن لمعة عيوني لما بقول اسمك ، بصراحة ولا مرة الحكي تبعن أثر فيني ، كان عندي ثقة فيك ، متل ثقتي إنو في موت وحياة ، في أنت .
هلأ أنا خجلانة قول الأبدية نسيتني ، وبطل في أبدية ، طلع في نهايات محتومة ،
أو بتعرف شو !!؟
لمين بدي روح قول مثلا !!
اليوم رفيقتي سألتني عنك ، ضحكت لدرجة الموت الأسود ! وقلتلها لك هبلة في شي اسمو أبدية ، عادي متل ما قلتوا قصة ومش رح تكمل ، وهي ما كملت ، وكتمت الغصة بقلبي .
أكيد كانت رح تدعي عليك ، ماقدرت بسرعة قلتلها الله يطول بعمرو ويحميلو شبابو ، أنا مش مسامحة كل الناس يلي أذوني ، بس هو رغم كل شي أذاه رحيم !
لساتني كل مرة بوقف بالصلاة بتذكرك وبدعيلك ، وبالنهاية قلبك نساني ونسى الغرام ونسى الايام ، لأن طلعت ذاكرة القلب ممكن يصيبها زهايمر !

#Helal_alkernazi

مع الاغنيه 🤍

مرحبا ، بحبك ، كيفو قلبك بعدو بحبني !!؟

هيك كان المفروض بلش كلامي معك ، وكتير مفروض انك تكوني جنبي ، انك تحتويني ، تواسيني ، وتكون معي .

_ بس كلا افتراضات غير واقعية !!!

بأخر مرة حكينا ، كان قلبي عم يبكي ، عم يعاتبني ، كان زعلان ، كان عم يلومني ، ويسألني ليش قربت وأنت بتعرف النهاية .
بوقتا ندمت كتير ، ووين قلبي ووين انا !؟

صارت الندم مرافقني و الأسئلة عم تاكل مني !

ليش اخترتك ضد قلبي وعقلي ، ليش مشيت بطريق نهايتو مرسومة قدامي ، حالياً أنا الندم اكل كتير مني ، بس بعد الوقت راح وعمري راح معو .
يمكن لازم اقتنع وبطل ضل قول ياريتني و ياريتني ما قربت ، يا ريتني ضليت بعيد وخايف ؛ يا ريت ضليت بهديك الحيرة وما خطيت خطوة اتجاهك ؛ يا ريت رديت ع عقلي وقت قلي هاد المكان مش الك ؛ ياريتني سمعت ل قلبي لما قلي لا تقرب !!
عالأقل كنت بعدت و لسا اخد عنك فكرة انك حدا منيح ، وحلوة من جوا وبرا ، وبس شوفك بكون قلبي صفيان ، ما في حقد جواتي اتجاهك .
بس للاسف انا قربت كتير عليك ، صرت بشبهك ، بشبهك كتير ، بشبهك لدرجة كلك انطبعتي فيني ، وبطل فيني اطلع منك ، يعني غيابك بس كان غياب جسد ، وصوت مش أكتر .
بتعرفي شو انا بدي شي يخليني وقف من جديد ، ما اشتقلك ، ما شوفك حلوة على طول ، حابب شوف الأذى يلي عملتيلي ياه ، بطل حطلك أعذار .


" مابدي تكوني انا ، بدي تتبدلي ، ما اشتقلك ، وما تكوني بتشبهيني "

#Helal_alkernazi

مع الاغنية 🤍

هي صفحتي العامة على الفيسبوك بتشرف ب الجميع فيها شغلات حلوة متلكن 🤍

https://www.facebook.com/helal7official/

الحب والزواج والرفقه ما اسمن نصيب ما اسمن نصيب !!
الحب اختیار الزواج اختيار والرفقه اختیار !!
النصيب لما بتكون ماشي بلشارع ولقيت مصاري هاد النصيب بس الاختيار انك تشیلن او تخليهن !؟
لان انت شفتن قبل ما تقرر يعني انت عندك اطلاع عليهن شفت بعيونك وفكرت بعقلك ؛؛
_ وهاد الشي بيتطبق ع اغلب الحالات يلي بيحكو فيها نصيب نصيب ف لما تنجرح من شخص او يضحك عليكي او يخونك لان هاد انتي اخترتي هالشخص مو نصيبك خلاكي تحبي لهالشخص .

_ ولما نتحجج بالاهل ؟!
ليش حتى نحب شخص ويكون القرار مش قرارنا !!

قبل اي شي منعملو لازم نعرف حالنا انو هالشخص مناسب ل النا ول أهالينا ؛!


_ و لما ما ترتاحي او ما يكون مناسب !!
وقفي وسكري الصفحه وامشي بدل 1 في 1000

#Helal_alkernazi

كل الشكر والحب يلي بياخدو كتاباتي مع اسمي او بيعملو تحويل لقناتن بدون حذف اسمي ، وكل الاحترام للناس يلي بتحذف اسمي وبينشروها عندن بدون اسم ، لان مافيني اعمل شي للناس يلي بتحذف اسمي بس يلا عادي 🤍

كتير اوقات بحاول اتظاهر بالبرود او فيك تقول بأغلب الاوقات !
" بس للاسف بكون فاشلة "
و كل ما حس بالغيرة ، بالشوق ، بالحنان !؟
" قلبي بيرجف حب مقابيلك "

هي الرجفة يلي بتكون متعبة ، متعبة لدرجة انو يمكن اشتقتلك بنص الليل ، وتخليني صحيك ، بس لحتى اسمع صوتك واطمن ؛
شوف صورك ، اسمع كلامك ، شوف محادثتك ، ارجع عيد كل كلمة قلتا ، وين أنا عصبت ، وين ضحكت من قلبي ، وين حبيتك أكتر من كل مرة .
اي اي هيك انا مجنونة ، وانا برتاح معك ، معك انت وبس ، هيك قلبي بياخد غفوة عن كل العالم وبيصحالك .

بكتير مرات تلاقيني اتصلت وانا عم ابكي ؛ وتسألني شبك !؟
وانا كون عاجزة عن الكلام ، ما بعرف شبني ، مابعرف ليش عم ابكي ؛ بس بدي كون معك ، بدون ما احكي شي ، يمكن لأن صوتك بيتكفل يمسح الوجع ، ويمكن لأن أنا بحبو !!

_ وكتير اوقات بفشل عبرلك ، بفشل اني وصلك احساسي ، هيك انا فاشلة ، بس مع هيك بحبك !!
حتى لما بتكون زعلان مني ، كتير بفشل اني اعرف كيف راضيك ، بس صدقني زعلك بهدني !!
كتير مرات بتقلي احكي لا تضلي ساكتة ، وسكوتي بيزعجك ، بس ياريتك بتعرف شو يعني سكوتي !!
انا مابحب عبر بالحكي ، ما بعرف كيف عبر بالحكي أساساً !؟
يمكن لأن مارح يوصلك احساسي .. أو ما رح تعرف بشو عم حس .
بس بحب انك تتطلع بعيوني ، تشوف ملامحي ، تسمع قلبي ، تلمس ايدي ، وعن هديك الرعشة بالروح كتير بتمنى تلمحا !
يمكن كون انا بنظرك ما بفهمك بمعظم الأحيان ، بس صدقني إني دائماً بحس فيك ، دخلك هاد الشي ما بكفي !
هيك انا ؛ شخص ما بيقدر يعبر عن مشاعرو بالحكي ، شخص ما بيقدر يكذب او يخبي !!
وبخاف من فكرة ، انك تمل وتهملني ، انك تقدر تنساني وكأنو ما كنت .
لهيك بترجاك شو ما صار ، مهما حكينا ، ضل !!

" لا تهملني .... لا تنساني "

#helal_alkernazi