Azizbek bilan yaqinda qilingan podcastimiz ostida qoldirilgan izohlardan biri


Bundan quyidagi 7 ta xulosani olish mumkin

1. Ingliz tili o’rganishga 25 yosh kech emas. (Ishonavering, yoshim 25 ga kirdi, menga kech bo’ldi endi deydiganlar juda ko’p)

2. Tilni mustaqil o’rganish imkoni yo’q emas. (har qalay odam kursga bormasdan boshlashi mumkin)

3. Bilimli va tajribali insonlar o’z bilimini ulashishlari juda muhim. (”Balki foydasi tegar” shiori kuchi mana shunday holatlarda ko’rinadi)

4. Ingliz tili beradigan imkoniyatlari ancha keng (cloud computingda master degani kelajak beton bo’ldi degani)

5. IELTSdan 8 yoki 9 olish shart emas. (6.5 darajasi bor odam 9 ga chiqaraman deb o’qishi bu vaqtni isrof qilish bilan teng)

6. 24 yoshda nima qilishini bilmay yurish bu fojea emas. (bilish albatta yaxshiroq)

7. Qisqa vaqt ichida inson o’z hayotini tubdan o’zgartira olishi mumkin. (agar harakat qilsagina)


Bek Olimjon
30.03.24
Norvegiya

Bir oy oldin pullik obuna kanalimiz ish boshlagan edi. Ana shu kanal faoliyati va natijalari bo'yicha bir oylik hisobotni siz bilan ulashaylik dedik. Quyida anonim so'rovnoma natijalari berilgan.





https://telegra.ph/Bek-Olimjon-pullik-obuna-kanali---hisobot-03-31

Chet elda o’qish - qaysi davlatni tanlash kerak?

Chet elda o’qimoqchiman, qaysi davlatni tanlash kerak savoliga ko’p duch kelamiz.

Bu post chet davlatda o’qish tanlayotganda nimalarga e’tibor berish kerak ekanligi haqida.

- o’qish tekin yoki yaxshigina arzon bo’lgan davlat bo’lsin. Qimmat ta’lim - sifatli ta’lim degani emas.

- o’qish vaqtida ishlab harajatlarni qoplash imkoni bo’lsin. O’zini boqa olish bu katta hayotga ilk qadam.

- o’qishdan keyin o’sha sohada o’sha davlatda karyera qilish imkoni bo’lsin. Bu o’sha davlat ta’limi real hayotdan uzilmaganligini bildiradi.

- o’qilgan soha bo’yicha o’sha davlatda o’rtachadan yaxshiroq daromad topish imkoni bo’lishi. Bu o’sha jamiyat hurmatiga ega odam bo’lishni ta’minlaydi. Inson hayotidan mamnun bo’lib yashashi uchun muhim omil bu.

- qadriyatlarga mos keladigan sharoit bo’lishi. Misol masjid, halol ovqatlar borligi/ko’pligi kabi.

- ish va oila balansini ta’minlash imkoni bo’lishi muhim. Inson hayotining mazmuni karyerasidan iborat bo’lmasligi kerak

- ijtimoiy himoya yaxshiroq bo’lgan davlat. Arzonroq va sifatli sog’liqni saqlash bo’lishi muhim. Birgina kichik operatsiya odamni bankrot bo’lishiga sabab bo’lmasligi kerak. Sifatli bog’cha va maktab muhim.

Yuqoridagi talablarning barchasiga Skandinaviya davlatlari javob berar edi, 2022-yilgacha. Afsuski hozir u davlatlarda Uzb fuqarolari uchun ta’lim tekin emas.

Unda qaysi variantlar bor?
Bu savolga javob berish osondir, ammo har bir chet elda o’qimoqchi bo’lgan odam bu savolga o’zi izlanib javob topishi shart degan fikrdaman.


Qanday qilib?
Kompyuterda bitta excel sahifa ochiladi. Ustunlarga yuqoridagi omillar yoziladi. Qatorlarga davlatlar guruhi yoziladi, undan keyin har bir davlat ostida universitetlar ro’yhati va o’qish mumkin bo’lgan yo’nalishlar yoziladi. Undan har birini yuqoridagi talablarga javob beradimi yoki yo’q ekanligi belgilab chiqiladi. Agar yo’nalish talabga javob bersa 1 javob bermasa 0 qo’yiladi. Eng ko’p bal olgan variant demak eng yaxshi variant hisoblanadi. Top 5 ta yo’nalish tanlanadi va o’shalarga topshiriladi.

Har xolda men 2009-yili mana shu tizimdan o’zim foydalanganman, tanishlarga aytaman. Pand bergani yo’q.

Bek Olimjon
06.04.2024
Eidsvoll, Norvegiya

Odatda Norvegiya politsiyasi qurol olib yurmaydi.

Bundan bir necha kun oldin Norvegiya politsiyasiga butun davlat bo’yicha qurollanishga buyruq berildi. Sababi internetdagi forumlardan birida kimdir hayit vaqtida 3 ta masjidga nisbatan terakt uyushtirish reja qilinganligi haqidagi xabar edi. Unda avtomat rasmi bor edi.

Oradan 2 kun o’tgandan keyin bu xabar yolg’on ekanligini politsiya tasdiqladi. Ammo bunday holatlarda musulmonlarda hadik bo’lishi tabiiy.

Rasm bugun Oslodagi masjidlardan biriga kirish qismida olingan.

Unda musulmon bo’lmagan aholini qo’lida «trygg i bønn» (xavfsiz ibodat) degan plakat bilan masjidga kirishda himoya sifatida turganini ko’rish mumkin.



Mana shunday gaplar azizlar. Media va voqe’lik orasida farq katta.

Barchaga hayit ayyomi muborak bo’lsin!

Shu kunlarga yetkazganiga shukur!

Bek Olimjon

Boshqalar hayotini kuzatib, o’z hayotimiz qanday o’tib ketayotganini sezmay qolamiz.

Ekrandan uzoqlashib tabiatga chiqish vaqti keldi.

Tabiat bu insonning ajralmas qismi. Aniqrog’i inson tabiatning ajralmas qismi bo’lishi kerak.

Ammo ekran sabab tabiatdan uzoqlashib bormoqdamiz.

Bir dunyo kasalliklar oqibati ham tabiatdan uzoqlashganimiz oqibati.

Men ham ketdim tabiatga. Sizni ekranda o’tirishingizga sababchi bo’lganim uchun uzr.

Bek Olimjon

Barchamiz bir vaqtda ikki xil dunyoda mavjudmiz. Biri bu tabiiy, ikkinchisi virtual.

Postlarimni tagiga nega sana va makon yozib qo’yishim haqida so’rashadi. Bu menga postni qaysi davlat va shaharda, qaysi vaqtda yozganimni eslash uchun xotira sifatida xizmat qiladi. Hozirgacha biz xotira sifatida ko’radigan eski fotoalbom yoki bloknotdagi ahamiyati tubdan o’zgarish arafasida.

Bunda sun’iy intellekt o’rni katta bo’ladigandek.

Men hozirda mavjud sun’iy intellekt na’munalarini huddi dastlabki floppy disklarga o’xshataman. Bu postni o’qiyotganlar aksar qismi floppy disk zamonidan keyin tug’ilganlar, uni nima ekanligini bilishmaydi ham 😊 

Floppy disk 1,44Mb hajm ma’lumotni saqlash mumkin bo’lgan disk edi (rasmda). Biz unda operatsion sistemalarni o’rnatar yoki yutsa orqasidan rasm ochiladigan shashka o’yinlarini o’rnatar edik.

Men birinchi olgan kompyuterim diski 100Mb dan iborat edi. Oradan 20 yil o’tib o’tmadi, rivojlanishni qarang.

Ayrim sun’iy intellekt bilan ishlaydigan xizmatlar shunday turi borki, unga siz o’zingiz xohlagan mavzuda va janrda qo’shiq tayyorlab ber desangiz 30-40 sekunnda tayyorlab beryapti.

Men rosa qiziqayotganim matndan video qilib beradigani. Bir kitobni yuklaysiz, kino qilib beradi. Hozir bor shunday AI. Ular rivojlanish darajasi huddi floppy disk kabi.

Men qanday kelajak tasavvur qilaman?

Men virtual olamda ixtiyoriy-majburiy ravishda ancha iz qoldiryapman. Gmail, instagram, youtube, sayohatlar, rasmlar, videolar va muhimi mening fikrlarim bayon etilgan postlar.

Farzand va nabiralarim, hayotimni, yoshligimni, qanday fikrlaganimu, nimalar meni hursand qilganlarini virtual holatda kino sifatida ko’ra oladi. Balki men o’lib ketganimdan keyin ularda men bilan ”suhbat qurish” imkoni ham bo’lishi mumkin. Ular mendan maslahat so’rashlari mumkin bo’ladi.

Bu qanchalik absurd tuyulmasin, bu allaqachon mavjud texnologiya.

Shuning uchun azizlar, yaxshi xotiralar bilan yashash muhim. Fikrlarni yozib borish muhim.

Bek Olimjon
14.04.2024
Frankfurt, Germaniya

Bundan bir necha yil oldin "Balki foydasi tegar..." deb boshlangan ishlar kichik bo'lsada natijasi.

Aziz Rahimov bilan qilgan podcast ostida qoldirilgan izohlardan biri ekan.

Foydali qilgani uchun shukur.

Mana shunday fikrlarni o'qib behuda vaqt sarflamayotganini tushunadi inson.

Azizlar, yozing, fikringizni o'rtoqlashing.

Hech bo'lmagandan o'zingizga foyda qilgan bo'lasiz.

Bek Olimjon

Muvaffaqiyat nima?

Turli inson uchun turlicha.

Kim uchundir iPhone 15 olish, mashina olish, uy qurish, sayohat qilish, chetda o'qish va hok.

Kim uchundir nimanidir o'rganish, sog'lom bo'lish, baxtli bo'lish va hok.

Biz sog'lom bo'lish, baxtli bo'lish va hotirjamlikka erishishga bo'lgan harakatdan ko'ra pul topishga ko'proq fokus qilamiz.

Bu tabiiy holat. Har bir inson boy, sog'lom va baxtli bo'lishni xohlaydi. Shu tartibda.

Menimcha muvaffaqiyatga erishish dastlabki bosqichi - inson hayotda nimalarni xohlamasligini, qanday hayot kechirishni xohlamasligini anglab yetishi.

Undan keyin o'zi xohlagan hayot tarzi qanday ekanligini aniqlab olishi va keyin o'sha hayot tarzini yaratishga harakat qilishdan iborat.

Inson o'zi xohlagan hayot tarzini aniqlab olishi juda muhim. Bunda "men xohlayotgan narsa bu rostdan ham men ich-ichimdan xohlagan narsami yoki jamiyat xohlagan narsami?" deya savol berish juda muhim.

Agar nima xohlashini bilmasa izlashda davom etish muhim. Buni topishda yordam beradigan savol: "Qanday qilib foydali bo'la olaman?"

Foydali bo'lish orqali inson boy, sog'lom va baxtli bo'la oladi.

Butun umrini ko'chada faqat pul topish uchun sarflab, qavat-qavat uy qurib, yosh o'tganda hovlini bir chetidagi kichkina xonada yolg'iz o'tirgan holda o'tgan umri uchun afsuslanmaslik muhim.

Bek Olimjon
17.04.24
Stockholm, Shvetsiya

Top 10 talikdagi universitetlar

Dunyoda Top 10, Top 100, Top 500 ro’yhatga kiradigan unviersitetlar haqida eshitamiz.

Bunday reytinglarga kirish uchun o’sha universitetlar har yili natija ko’rsatishi kerak. Misol yil davomida ma’lum son doktorlik dissertatsiyalari yoqlangan bo’lishi, ma’lum son ilmiy maqolalar chop etilgan bo’lishi, o’qituvchilar tajribasi, talabalar natijasi va shu kabi bir qancha mezonlar bo’yicha o’lchanadi.

Bizdagi unviersitetlar mana shunday reytinglarga kirishga harakat qilayotgan bir vaqtda dunyoning top universitetlari mana shu reytinglardan ixtiyoriy ravishda chiqib ketishmoqda.

Chiqib ketayotganlar ichida Harvard, Yale, Stanford, Zurich, Columbia, Georgetown, Berkeley, Utrecht va yana bir qancha universitetlar bor.

Bu reytingni tark etish jarayoni boshlanganiga o’zi bir necha yil bo’ldi, ammo ohirgi 2-3 yilda tezlashdi.

Nega?

Asosiy sababi “kim o’zarlik” paydo bo’lgani deya tushuntirishmoqda. Aytishlaricha sifatli natijaga fokus qilishdan ko’ra top reytingga kirish uchun natijalarga fokus bo’lib qolayotgan ekan.

Bizdagi univerlar top 1000 talikka kiraman deb harakat qilayotgan bir vaqtda, oqsoqol universitetlar o'sha top reytinglarni tark etishmoqda. Do’ppini olib qo’yib o'ylashga arziydigan vaziyat degan fikrdaman.

Iqtisodchi Charles Goodhart yozgan bir qonuniyat bor: “Agar bir o’lchov maqsadga aylansa, endi u yaxshi o’lchov emas”

Bu nima degani?

Oddiy misol sifatida talabalarning yaxshi o’qishi mezoni ularning 5 baho olishi deb olaylik. Aytaylik 5 olgan talaba bu yaxshi o’qigan talaba deb hisoblanadi. Talaba nima qiladi endi? Maqsadi 5 olishga aylanadi. Bor fokusini unga 5 olib keladigan ishlarga qaratadi. Dars qoldirmaydi, o’sha fandan konspektlar qiladi, doim formada, tanqidiy fikrini ustoziga aytmaydi va hok.

Yoki bo’lmasa bunga IELTS 9 olishni misol sifatida keltirishimiz ham mumkin.

O’lchov mezoni erishish kerak bo'lgan asosiy maqsadga aylanmasligi kerak.

Bek Olimjon
18.04.24
Stockholm, Shvetsiya

O’zgartirishga harakat qilma

Bir do’stim bor. Men uchun mentordek inson. Yiliga 2-3 marta ko’rishamiz, birga tushlik qilamiz.

Norvegiyada shifokor sifatida tez natijaga erishishimga bir dona gapi sabab bo’lgan edi.

Norvegiyada moliya sohasida top mutaxassislardan. Ammo ishlamaydi, ishlab pul topishga ehtiyoji yo’q. Undan har safar moliya sohasida ko’p narsa o’rganaman. Ammo meni hayron qoldiradigan jihati u g’azablangani yoki noliganiga hech guvoh bo’lmaganman. Aytishlaricha 30+ yildan beri yashaydigan xotini bilan biror marta urushmagan.

Sababini so’rasam,

”Bek, men boshqalar fikri va hatti-harakatini boshqara olmayman. Ammo men boshqalar fikri va hatti-harakatiga nisbatan o’z emotsiyamni boshqara olishni o’rganganman. Shunday ekan men boshqalarni deb asabiylashishim g’irt ahmoqlik. Katta, tushungan odamlarmiz. Bir muammo bo’lsa asabiylashmasdan hal etishga harakat qilish kerak degan fikrdaman.

Hotinim bilan urushmasligimga kelsak, oilada murosa juda muhim. Men shu inson bilan bir umr birga yashayman deb tanladim. Birga farzandlar ko’rdik.

Endi tasavvur qil, bir ota-onadan tug’ilgan, men bilan bir muhitda katta bo’lgan aka-ukalarim, opa-singillarim bor. Qonimiz, jinsimiz bir bo’lgam ukam bilan fikrim to’g’ri kelmaydi ba’zan.

Endi boshqa jinsli, boshqa oilada, boshqa madaniyatda katta bo’lgan inson bilan har doim ham fikrlar to’g’ri kelishini kutish bu ahmoqlik emasmi?!”

Buni qachon tushunib yetgansan desam:

”25-26 yoshlar edim, atrofimdagilar oilali qurishni boshladi, oradan ko’p o’tmay ayrimlarini doim xotin yo eridan nolishini eshitar edim. Hayron bo’lar edim. Hali oila qurmaganim uchun buni tushunishim va oldini olishim muhim deb o’yladim. Ulardan sababini sinchiklab so’radim. Shuni tushunib yetdimki, ular o’z turmush o’rtoqlarini o’zgartirishga harakat qilishayotgan edi. O’z fikrini o’tkazishga harakat qilishlari, vaziyatni o’zi xohlagandek bo’lishini istashlari edi. Bu insonga g’alaba hissini bersada, oilada totuvlik va baxtlilik hissini bermaydi.”

”Oiladagi janjallar asosiy sababi, biz turmush o’rtog’imizni o’zgartirishga harakat qilishimizda ekanini tushungandim o’shanda. Men o’zgartirishga majbur bo’lmaydigan turmush o’rtog’i topishim kerak ekan degan xulosaga kelganman. Shu talabdan kelib chiqib xotin qidirgandim, hudoga shukur, baraka topdim” deydi.

”Keyinchalik bu kriteriyani ishchi yoki hamkor qidirishda ham qo’lladim. Ancha yordam bergan” deydi.

”Biz odamlarni o’zgartira olmaymiz. Odamlarni faqat o’zlarigina o’zgartira oladi. Biz shunchaki ta’sir etishimiz mumkin xolos. Fikrimiz, hatti-harakatimiz, yashash tarzimiz ularga ta’sir qilishi mumkin. Ammo o’zgarish uchun kuch qalbidan chiqishi kerak.”

”Biz o’zgartirishga harakat qilaversak, ular go’yo o’zgargandek ko’rinadi. Eng yomoni ham shunda. Chunki asli o’zgarmagan odam senga o’zgargandek ko’rinmoqda”

Bek Olimjon
27.04.24
Oslo, Norvegiya

Boy bo’lmoqchisiz, avtomoykada ish boshladingiz. Umrida pul topmagan, otasi olib bergan mashinada kelgan bittasi sizga past nazar bilan qaradi. Moyka egasi tadibrkor odam maqsadigizdan motivatsiya oldi.

Dunyo kezmoqchisiz, sayohatni qishlog’ingizdan qo’shni viloyatga, avtobusda boshladingiz. Atrofdagilar uchun bu kulgili bo’ldi. Avtobusda Kanadalik turist bilan tanishdingiz. U Madagaskarga qilgan sayohati rasmlarini ko’rsatdi.

Marafon yugurmoqchisiz, do’stlaringiz ahmoqmisan deyishdi. Marafon yuguradiganlar xolis maslahatlar berishdi.

Zo’r mutaxassis bo’lmoqchisiz, chet tili o’rganishni boshladingiz. “Choyxonadan ustunmi” shu deyishdi. Ikki yildan keyin Frankfurtda o’zbeklar bilan choyxonadasiz. Ular sizning hikoyangizni maroq bilan tinglashmoqda.

O’zi biror natijaga erishmaganlar doim bir negativ fikr beradi.

Niyatimiz xolis va harakatimiz chin dildan ekanligini ko’rgan haqiqiy natijaga erishganlar doim biz tomon bo’lishadi, yo’l ko’rsatishadi, o’z davrasiga taklif etadi.

Bek Olimjon
Mallorca, Ispaniya
08.05.24

Inson nega o’ziga ishonchi past bo’ladi?

Sabablari bir qancha bo’lishi mumkin.

Hammasini bir nuqtaga olib keluvchi sababi unga bolalikda ”sen qila olmaysan” deyishlari.

Butun umr shunga ishonib o’taveradi keyin.

Aslida katta natijalarga erishayotgan odamlar ham siz va men kabi insonlar.

2018-yil Norvegiyada bir rus hamkasbim ishdan haydalishiga bir bahya qolgan edi. Bemor davolashda o’ziga ishonchi juda past edi. To’g’ri fikrlasa ham qaror qabul qila olmas edi. Natijada noto’g’ri qarorlar qabul qilar edi. Vazni og’ir, jismonan juda nozik edi.

Haligi hamkasbimni bir amallab birga yugurishga ko’ndirdim. Ishdan keyin birga yuguradigan bo’ldik. Boshlanishiga 500 metr, keyinroq 3-4km. Yugurgandan keyingi endorfindan foydalanib 2 oylardan keyin bo’ladigan yarim marafonga yozilishga ko’ndirdim.

Birga yugurdik, rosa qiynaldi u. Ohirgi 5-6 km yonida yugurib motivatsiya berib turdim. Amallab tugatdi.

Qizig’i keyingi haftasidan boshlandi. Ishida ancha ijobiy o’zgarishlar bo’ldi. O’ziga loser deb qarashni to’xtatgani sezildi. Sababini so’radim.

”Men hech qachon qila olmayman deb o’ylagan narsamni qila oldim. Umrimda marafon yugura olishimga ishonmaganman. Demak men o’zimga sun’iy chegaralar qo’yganman. Yengib o’tsa bo’lar ekan. Kunimdagi chegaralarni aniqlab, birma-bir olib tashlashga harakat qilyapman hozir. Birga yugurgan marafonimiz o’zimga bo’lgan ishonchimni orttirdi” dedi.

Men yarim marafon yugurishni odamni o’ziga bo’lgan ishonchni orttirish eng tez usuli deb bilaman. Har qanday sog’lom bo’lgan yosh odam (semiz bo’lsa ham) buni uddasidan chiqa olishiga ishonaman.

Asosiy muammo odamni o’ziga bo’lgan ishonchsizlikda.

6 haftalik tayyorgarlik bilan qilsa bo’ladi.

Mana shu postni uzunroq variantini Bek Olimjon Akademiyasi pullik obuna kanalida qo’ygan edim. Aprel oyi ichida yarim marafonni birinchi marta yugurganlar soni 8 yoki 9 ta bo’ldi.

”Qila olaman desangiz ham, qila olmayman desangiz ham siz haqsiz”

Bek Olimjon
10.05.24
Mallorca, Ispaniya

Mallorca - Ispaniya janubida joylashgan orol. Velosportga qiziquvchilar uchun top maskanlardan biri.

Men velosayohatga qiziqaman. Ammo velosiped minishda o’zimni olib qochadgigan narsalarimdan biri yomg’ir bo’lsa ikkinchisi balandlikka chiqish.

Mallorcada Valldemossa round degan velosayohat uchun yo’l bor. U Deia va Coll de Soller joylashgan 2 ta tog’dan oshib tushishdan iborat. Masofa tahminan 60-70 km. Balandlikka ko’tarilish esa 1450m. (Solishtirish uchun Everest 8849m) Bunday balandlikka velikda umrimda birinchi marta chiqishim. Hech ham qilgim kelmadi, lekin noaniqlik, qiyinchilik, komfortdan chiqish, tabiat undadi. Turgan mehmonxonamizdagi ko’m-ko’l basseynni tashlab, jaziramada velosiped bilan chiqdim kecha.

Yaxshigina qiyin, har qalay men uchun qiyin bo’ldi. Yakuniga yetdim. Chegara yanada kengaydi. Komfort zona yanada kengaydi.

Bir narsani o’rgandim.

Rasmdagi balandliklardan biriga ko’tarilayotganimda yonimdan bir kishi o’tdi.

Suffering is real deb hazillashgan edim, u menga ”Relax and suffer!” deb hazillashdi.

Haqiqatdan ham qiyinchilik bor va uni bosib o’tish kerak. Qanchalik qiyin bo’lmasin bosib o’tish kerak. Shunday ekan relax qilgan holda, odam o’z emotsiyasini boshqargann holda, nafsiga qul bo’lmagan holda, maqsadiga qarab davom etaverishi muhim ekanligiga yana bir amin bo’ldim.

Mallorcada velosayohatni albatta tavsiya etaman azizlar!

Bek Olimjon
12.05.24
Mallorca, Spain

Tasavvur qiling men 19, 20 yoki 22 yoshga qaytib qoldim.

O’zbekistondaman. Ingliz tili bilaman. Oz-moz IT ham bilaman. Ishim bor va 400-500$ pul topaman.

Hayotim keyingi bir yilini qanday o’tkazgan bo’lar edim?

Bu haqida ba’zan o’ylab qolaman. Menimcha eng to’g’ri qaror backpacking bo’lar edi.

Backpacking bu kundalik yashash uchun minimal narsalarni ryukzakka solib, o’ta arzon yo’l bilan sayohat qilish. Unda hotelda emas hostelda turiladi. Hostel bu bitta xonada 4, 6, 8 ta o’rin bo’lgan uxlash uchun arzon yotoqxonalar. Sayohat arzon bo’lishi uchun restoranda emas ko’chadagi arzon yoki tekin joylarda ovqat yeyiladi. Shahar aylanishni taksida emas, balki piyoda, juda bo’lsa arzon avtobusda qilinadi.

Men quyidagi yo’lni tutgan bo’lar edim:

1. Backpacking uchun manzil belgilar edim. Misol India-Nepal-Burma-Laos-Kambodja yoki shunga o’xshash

2. U davlatlarda komfort backpacking uchun tahminiy byudjet kuniga 25-40$, 60 kunga 2400$. Bilet 500$. Umumiy byudjet 3000$ deylik ana

3. Shuni topish kerak endi. Bu uchun kundalik harajatlarni maksimal kamaytirib, daromadni oshirib bir amallab 3000 to’plar edim

4. Pul to’plash jarayonida Janubiy-Sharqiy Osiyoda backpacking qiluvchilar facebookdagi guruhlar, Reddit, turli forumlarni o’rganib, taxminiy marshrut tuzgan bo’lar edim. Boshqalar tajribasini o’rganar edim

5. Faslga moslab, ishxonam bilan kelishib bir tomonga bilet olib shartta ketgan bo’lar edim. Ishxonam rozi bo’lmasa ham ishdan shunday voz kechib ketgan bo’lar edim. Sababi bugun 20 yoshda 500 topa olyapmanmi, 2 oy sayohatdan keyin ham kamida shuni topa olaman. Topa olmagan taqdirimda ham rizq borasida qo’rquvim yo’q. Tavakkal!

6. Sayohat davomida turistlar boradigan maskanlarga emas, balki mahalliy aholi to’planadigan joylarga borar edim. Maksimal darajada odamlar bilan suhbat qilgan bo’lar edim

7. Bir kundalik olib ko’rgan va his qilganlarimni, xulosalarimni yozib borar edim. Bu jarayonda ”men to’g’ri, boshqalar noto’g’ri” degan fikrdan yiroqlashgan holda yondashuv muhim bo’lar edi

8. Arzonroq kamera olib, yoki telefonga video va rasmlar olar edim

9. Olingan videolar yoki yozilgan kundalikni ijtimoiy tarmoqlarga vatanga qaytguncha qo’ymas edim

10. Sayohat davomida hostelda ko’rishgan yoki orttirgan har bir tanishim kontaktlarini olar edim. Instagram, Facebook, Whatsapp va hok, farqi yo’q.

Ikki oylik sayohatdan keyin vatanga qaytganda bir narsa insonni hayron qoldiradi.

Hamma narsa o’sha-o’sha. Ishxona ham, uy ham, odamlar, ko’chalar va hok. Hech narsa o’zgarmagandek.

Ammo ikki oylik sayohat davomida 99,9999% odamlar 20 yilda ham olmaydigan hayotiy tajriba va hissiyotlarga to’la bo’lgan, ancha yetuk, musofirlikni ko’rgan yangi inson sifatida qaytishim kafolatlangan bo’lar edi.

Qo’rqmaysizmi degan savol bo’lishi tabiiy.

Dunyo xavfli emas. Biz o’zimiz ko’rmagan dunyo haqidagi fikrlarimiz odatda noto’g’ri bo’lib chiqadi.

20 yoshlardagi arzon byudjet bilan sayohat qilish orqali olinadigan hayotiy tajribani beradigan hech narsa yo’qdek fikrimcha.

Buni 40 yoshga kirib tushunasan, agar tushunsang!

Bek Olimjon
17.05.24
Norvegiya

O'zbekistonda oftalmolog diplomiga ega, nemis tilidan B2 darajasida bilimi bo'lgan va Germaniyada oftalmolog bo'lib ishlash rejasida yurgan kim bor?

Germaniyadagi bir ko'z klinikasiga oftalmolog yordamchisi qidirilmoqda. Avvaliga oftalmolog yordamchisi, keyinchalik imtihonlarni topshirib litsenziya olganidan so'ng oftalmolog bo'lib ishlash imkoniyati bo'ladi.

Agar yuqoridagi talablarga javob bersangiz quyidagi formani to'ldiring. Ma'qul kelsangiz aloqaga chiqamiz.

https://forms.gle/WBSjUsy5Ek2Ub4r87

Men uylanish haqida post yozmaslikka harakat qilaman.

Yozmasligim kerak. Fikrlarim ommaniki bilan to’g’ri kelmagani uchun.

Lekin kechadan beri bitta fikr kalladan ketmayapti. Kecha tog’da velosayohat qilib yursam bir ukamiz maslahat so’rab yozipti. Bir qiz bilan tanishgan, hamma tomonlama ma’qul. Qiz yaxshigina muvaffaqiyatga erishgan, g’arbda yaxshi karyera boshlagan, pul topishi ham yigitnikidan ko’proq. Yigit ham u qizga ma’qul tushunishimcha. Yigit uylanish istagida. Hammasi zo’r va to’g’ri kelyapti. Ammo qiz shu 1-2-2,5 yoshga kattaroq ekanda. Shu o’ylantiryapti ukamizni… Nima qilay deydi.

Xayolim boshqa joyda bo’lgani uchun javobni qisqa qilib ”meni xotinim ham mendan katta, uylanganimda mendan ko’proq pul topar edi, gazini bos, barakali bo’ladi bundaylari” dedim.

Keyin o’ylab qoldim, nega yosh bunchalik katta ahamiyatga ega? Yigitlar bir qizni ko’radi, uni zo’r umr yo’ldosh sifatida ham ko’ra oladi, ammo yoshi katta bo’lgani uchun rishta qurishni xayoliga ham keltirmaydi.

Nega jamiyatimizda uylanmoqchi bo’lgan nomzod yoshi doim kichik bo’lishi kerak deyiladi? Bu qayerdan chiqqan fikr va standart? Javobini izlashga harakat qildim. Ayollar tez qariydi degan gap unchalik asosli emasdek, sababi kallik asosan erkaklarga hos 😊Semirish esa yosh va jins tanlamaydi 😀

Balki avallari oilalar asosan qishloq xo’jaligi bilan band bo’lgani va unda oilalarni bolalar mehnatiga ehtiyoji ko’proq bo’lgani uchundir?! Yosh ayol fertilroq bo’ladi va ko’proq bola ko’rishi mumkin deyilgandir. Bilmasam. Hozir bu ham argument emas. Sababi 2-3 ta farzand bilan STOP deyilyapti.

Men bilgan narsa shuki, ayolni va onani o’qigan bo’lishi, ilmli bo’lishi juda muhim. Bu bolalar va jamiyat kelajagi uchun juda muhim. Bir soha mutaxassisi bo’lsa undanda zo’r. Turmushgacha bir sohada mutaxassis bo’lib, bir joyda ishlab muvaffaqiyatga erisha oldimi, yanada yaxshi. Demak mehnatkash, maqsadi bor, qiyinchilikka chiday oladi, o’z ustida ishlay oladi, jamiyatga foydasi ko’proq tegyapti. Ertaga oilani markaziga aylanadi bunday qizlar. Eng muhimi bolalari salomatligi va ta’limi bilan jiddiy shug’ullanadi. Bunday qizlar onalik uchun yaxshi nomzod hisoblanadi.

Endi bu natijalarga 17-18 yoshda erishib bo’lmasligi aniq. Bunday natijaga erishishi uchun institutda o’qir, ishlar, til o’rganar, bir sohani egallar. Bular 2-3 oyda bo’lmaydiku axir. Bunga kamida 6-7 yil vaqt ketib qoladi va qiz yoshi 25-27 bo’ladi.

”Yigit 25 yosh, qiz 27 yosh ekan” desang, ”Eee, jinnimisan, nimalar deyapsan…” degan reaksiya bo’lishi tabiiy.

”Katta bo’lsa aqli kirib qolgan bo’ladi” degan argument ham bor jamiyatda.

Bo’ydoqlar ishoning, sizga aqlli xotin kerak, zarur 😀

Shu savollarni o’ylab yarim kechasi bir do’stimizga yozdim. Nega bizning jamiyatda shunday fikr bor, sababi nima bo’lishi mumkin deb so’radim.

”Ayol katta bo’lib, er yosh bo’lganini ko’rsatib beradigan misollar kam yoki deyarli yo’q bo’lgani uchun bo’lsa kerak” deb aytdi. Ha, fikriga qo’shilaman do’stimni. Hozirgi zamonamizda kam bunday misollar. Chunki yoshi kattaroq qizga uylanmaganimizdan keyin qayerdan ham bo’lsin bunday misollar.

Ammo misollar butunlay yo’q emas. Eng katta na’muna bor. Butun hayotini misol qilib oladigan shaxsimiz bor.

Yosh farqi 3 yoki 4 emas edi. Rosmana 15 yil edi.

Yigitlar, biz qo’shnilar, xolalar, bratanlar, atrofdagilar gapiga qarab emas, hayotga real qarab, onalar uchun yaxshi nomzodlarni tanlaymiz. Bu muhim. Onalikka nomzod ma’qul kelsa yoshiga uncha e’tibor bermaymiz.

Vaqt va umr nisbiy baribir.

Bek Olimjon
Norvegiya
23.05.24

Oftalmologlar uchun yangi kurs taklifi

Iyun oyida makula OCT kursini taqdim qilish rejalashtirilgan.

Kursni 2022 da o’tkazgan edik. Ishtirokchilar foydali bo’lganini aytishgan. Ana shu kurs materiallarini qaytadan taqdim etmoqchimiz.

Kurs narhi so’mda 10$

Savol-javob imkoni bo’ladi.
Kurs mundarijasi mana bu linkda:

https://telegra.ph/Intensiv-OCT-kursi-01-06

Qiziquvchilar bo’lsa
@Shukur_Adxamovich ga bog’lanishi mumkin.

Kurs pullik obuna kanal ichida bo’lgani uchun oftalmologiyadan tashqari ma’lumotlar bilan birgalikda ketadi. Misol may oyida shaxsiy moliya haqida postlar va jonli suhbat bo’ldi.

⚡️Битта тўғри ғоя билан миллатни аждодларга муносиб авлод қилиш мумкин.

Бунинг учун ғоя шамолини кўтариб, инсоннинг онг остига ўрнашиши лозим. Бунга 6 ой харакат қилдик.

Aгар ушбу видеони кўриб, қалбингиз жумбушга келган бўлса, айнан шу инсон менман ёки менинг фарзандларим, дўстларим, акаларим, укаларим деган инсонларга улашиб, шамолни қадриятли кўтарилишига, уларнинг миллатимиз умидига айланишига сабабчи бўлинг 🙌

Millat Umidi
Umidjon Ishmukhamedov - ғоя муаллифи
Zohidjon Olov - Шеър муаллифи
Zohirshoh Jurayev - Ижроси, мусиқаси муаллифи. Шу лойиҳада қатнашган ҳамма иштирокчиларга ташаккур!

Pul jigardan bo’ladi(mi)?

Xalqimizda pul jigardan bo’ladi degan ibora bor.

Rostdan ham shundaymi?

Pulni yaxshi ko’ramiz.

Tanamizni axlatlardan tozalab turadigan jigarimizdan ham ko’proq yaxshi ko’ramiz.

Unday emas deysizmi? Isboti mana:

siz tanigan birorta biznes egasini toping va undan
• o’tgan yili qancha daromad qilganini so’rang
• qaysi loyihadan qancha zarar ko’rganini so’rang
• nechta hodimi bor ekanligi, qaysi hodimi zo’r ishlashini haqida so’rang
• bankda qancha puli borligini so’rang
• keyingi pul qilmoqchi bo’lgan loyihalari haqida so’rang
• Qanday mashina olmoqchi ekaniyu, qanday harajat qilishini so’rang

Yuqoridagi savollariga javobni sizga aytmasligi mumkin, ammo bular haqida detallarigacha biladi, kechalari yarim tungacha uxlay olmaydi shular haqida o’ylab.

Endi o’sha odamdan
• qon bosimi qancha ekanini so’rang
• ohirgi 6 oydagi o’rtacha vazni qancha ekanini so’rang
• necha km yugura olishini so’rang
• maks pulsi va puls zonalari haqida so’rang
• oxirgi marta qachon kasallikni oldini olish uchun tekshirtirganini so’rang
• oxirgi marta xolesterin, trigliserid, HbA1c, gemoglobin, vit D, insulini qancha bo’lgani haqida so’rang

Juda katta ehtimol bilan bularga javobi yo’q

Yuk tashiydigan mashina hajmi qanchalik katta bo’lmasin, motori yaxshi ishlamasa ish bermaydi.

Biznes qanchalik katta bo’lmasin, egasini salomatligi yaxshi bo’lmasa tatimaydi.

Pul topaman deb yurakni unutmaslik kerak!

Bek Olimjon
29.05.24
Norvegiya

Nega velosipedda o’zingizni qiynab yurasiz degan savollar bo’ladi.

Rosti, aniq javobim yo’q.

Velosayohat qilish orqali bir kunda olinadigan taassurot va hissiyotlar shunchalik ko’pki agar har kunimiz shunday bo’lsa biz aqldan ozgan bo’lar edik.

Balki shuning uchun ham velosayohat o’ziga jalb etsa kerak.

Velosayohat davomida bir narsani tushunib yetasan kishi. Sayohat davomida qaysidir nuqtada juda og’riqli vaqt bo’lishini aniq bilasan. Bilasangki qiynalasan, budun vujuding seni taslim bo’lishga undaydi, barcha narsa senga qarshidek tuyuladi.

Ko’p narsa sening nazoratingda emas. Ketayotib bir kichik chuqurchaga yiqilib nogiron bo’lishing, hatto o’lishing ham mumkin. Himoyang deyarli yo’q.

Ammo aminsangki bu hissiyotlar o’tkinchi. Bu hissiyotlar senga tanish, chunki avvaldan bilasan buni. Mana shu hissiyotlarni yengib o’tgandan keyin yodingda qoladigan xotiralar badandagi og’riqlarni tishingni-tishingga qo’yib bo’lsada yengib o’tishga va davom etishga undaydi. Hech kim seni kuzatmayotganini bilasan, taslim bo’lging keladi, ammo taslim bo’lish eng oxirgi tanlov. Bunga aminsan. Taslimgacha bir qancha yechimlar bor.

Sayohat davomida shunday lahzalar bo’ladiki sen barchasini unutasan, badandagi og’riqlarni, ishxonani, atrofni, kundalik tashvishlarni, barchasini.

Sen, oyoqlaring ostidagi insoniyat kashfiyoti va tabiat.

Muammolaring eng primitiv darajaga tushgan - ovqat, xavfsizlik va keyingi manzilingga yetib olish.

Ko’krak qafasing yorilib ketgunicha chuqur nafas olasan, atrofga qaraysan, qanchalik kichkina va ahamiyatsiz ekaningni tushunasan, hissiyotlar okean shovqinidek otilib chiqadi va ich-ichingdan bor ovozing bilan baqirasan.

Sen nafasdan iborat bir kichik jonzotsan xolos.

Nega ixtiyoriy ravishda o’zingni qiynayotganing asl mazmunini anglab yetgandeksan.

Bek Olimjon
23.06.23
Dovre, Norvegiya

PS. Bu meni hozirgacha qilgan kamtarona tajribamdan kelib chiqib yozilgan xulosalar xolos. Kashf etish uchun yana nimalar bor meni kutayotgan…