* * *
Қийналади офтобни кутиб
Ёмғирларда ивиган шаҳар.
Ухлаб қолдинг, йиғлаб, қон ютиб,
Кўринганда уфқда саҳар.

Мен тақдиримдан ҳеч нолимайман,
Гар алмашди шомга тонгимни.
Олиб келди бу оқшом билан
Узоқларда қолган жонимни.

Менинг сарсон умримга ойдин
Ривож тилаб у чекди фиғон.
Оёғини тавоф қилдим мен —
Дунёда энг омадсиз ўғлон.

У ҳеч нарса қилмади талаб,
Минг ўргилди қошу кўзимдан.
Унинг қаро сочларни силаб,
Бу тун кечдим ҳатто ўзимдан.

Ёмғир ёғди майда-майдалаб,
Майда-майда бўлди юрагим.
Тонг отгунча қайта-қайталаб,
"Севасанми" дея сўрадим.

Қийналади офтобни кутиб,
Ёмғирларда ивиган шаҳар.
Сен кетасан қайга қон ютиб,
Мени қайга бошлайди саҳар?

©Усмон Азим
https://www.tg-me.com/Adabiyot_olami

Ассалому алейкум азизлар!

Рамазон ҳайитингиз муборак бўлсин, юртимизга тинчлик, рўзғорларингизга барака, хонадонингизга файз берсин Аллоҳ, кейинги йилларда ҳам тинчликда, омонликда муборак Рамазон ойига, рамазон ҳайитига етиб юриш, барчамизга насиб этсин!..

Ҳурмат билан
© Абдувоҳид Сувонов
https://www.tg-me.com/Adabiyot_olami

* * *
Агар ўрмонда бўлсанг, ўрмоннинг бир қисмига айланасан. Агар ёмғирда қолсанг - унинг бир заррасисан. Тонг отса - тонгнинг парчасисан. Мен билан ўтирсанг, бир бўлагимга айланасан...

© Мураками
https://www.tg-me.com/Adabiyot_olami

ҲАЁТ ҲАҚИДА ЎЙЛАР

Туғилиш — ўлимга қўйилган биринчи қадам.
(И.В.ГЁТЕ)

Туғилдинг, бу ҳаёт остонасида,
Сени қарши олди, бир ёғоч бешик.
Улғайиб, яшаб сўнг кўзинг юмганда,
Қабринга кузатди, тебранмас бешик.
Бу ҳаёт — шу икки бешик ораси...

Туғилдинг, ўрашиб оппоқ йўргакка,
Эркалаб, эъзозлаб, севиб-суюшди.
Руҳ оҳир танангни тарк этган куни,
Яна оқ йўргакка ўраб қўйишди.
Бу ҳаёт — шу икки йўргак ораси…

Кўз очиб, ҳаётни кўрганинг заҳот,
Одамлар йиғингга жим қулоқ осди.
Бандаликни бажо келтирган кунинг,
Дунёни ўзгалар кўз ёши босди.
Бу ҳаёт — шу икки йиғи ораси...

Шу қисқа ҳаётда энг муҳим юмуш,
Яхши ном қолдириб, яшамоқ экан.
Англадим, туғилиш аслида дўстим,
Ўлимга илк қадам ташламоқ экан.
Ҳаёт — туғилиш ва ўлим ораси...

© Дилмурод Дўст
https://www.tg-me.com/Adabiyot_olami

БИРИНЧИ  АПРЕЛ

Иккинчи апрелда
айтолмам буни,
Балки моҳиятдан
қочади бу сўз.
Гарчанд ҳамма учун,
ҳазиллар куни,
Бугун нигоҳинга -
рост сўзласин кўз.

Ошкор қилмаганман,
изҳорларимни,
Сенга муҳаббатим
айтолмас эдим.
Бугун айтар бўлдим,
сирли севгимни,
Биринчи апрелда -
севаман дедим...

Жумбоқ сўз ясашдан,
менга на фойда,
Зарар келтирмасми,
бугунги сўзим.
Шоир борми?
Йўқми?
Кейин, йил - ойда,
Изҳорни,
Тақвимга,
муҳрлай ўзим.

Бошқа кун айтсам гар,
бўлур бу гуноҳ,
Бошқа кун,
журъатсиз бўламан ишон.
Бошқа кун,
иродам йўқолар ногоҳ,
Балки сўз демоққа
топилмас имкон!

Истасанг хўрлагин,
кулгин устимдан,
Кулгингда дард борми -
билмаган эдим.
Мен фойдаландим,
бугунги кундан,
Биринчи апрелда -
севаман дедим...

Сен кулиб қўйдинг,
Олдинг,
ҳазилга.
Хўп,
майли ҳазилга,
йўйсанг йўя-қол.
Яна севгим айтгум
кейинги йилга,
Бир йил,
рост севгимчун,
Тўйиб кула-қол...

© Абдувоҳид Сувонов
https://www.tg-me.com/Adabiyot_olami

ЯХШИДИР АЧЧИҚ ХАҚИҚАТ

Яхшидир ачиқ хақиқат,
Лек ширин ёлғон ёмон,
Ул ширин ёлғонга мендек
Алданиб қолғон ёмон.

Умримиз алдоқ жаҳонда
Алданиб ўтгай, ва лек
Сўнгги қийналғон ёмондир,
Сўнгги қийналғон ёмон.

Айтгали аччиқ азобинг
Бўлса дилдош яхшидир,
Сўз демай ўтли аламни
Жонингга солғон ёмон.

Жонга солғон ҳам на создир,
Элга сўйлаб мен каби
Шоири девонаи ишқ
Номини олғон ёмон.

Гар қилич келса бошингга,
Қўрқма, Эркин, ростни айт,
Яхшидир аччиқ ҳақиқат,
Лек ширин ёлғон ёмон.

© Эркин Воҳидов
1988
https://www.tg-me.com/Adabiyot_Olami

БИР ҚИЗ КЕЗАР...

Бир қиз кeзар - ёлғиз - дунёни,
Қадам ташлаб сeкин, оҳиста.
Кeча кўрган ажиб рўёни
Ўз-ўзига пичирлаб аста.

Бир қиз кeзар,
оёғи яланг,
Ҳарир либос қалбидeк нафис.
Одимлайди тақдирда аранг -
Майсаларда қолиб кeтар из.

Бир қиз кeзар,
Хаёлга чўмиб,
Узоқларга тeрмулганча жим.
Ҳам ўзини гулларга кўмиб,
Яратгандан сўрайди тўзим.

Бир қиз кeзар,
Қўлида тутиб
Авайлаган нозик юрагин
Минг йилларки бахтини кутиб,
Излаб борар яккаш кeрагин.

Бир қиз кeзар,
хаёл паришон,
Ҳам бошида чeчакдан чамбар...

© Маъсуд Махсудов
https://www.tg-me.com/Adabiyot_Olami

* * *
Агар сендан тонар бўлсам насибим оҳу зор ўлсин,
Баҳорим қишга айлансин, чечаксиз бир диёр ўлсин.
Чаманзорим, боғим-боғчам тўкилсин, бори хор ўлсин,
Мазорим ўт олиб ёнсин,
бу ишқим ошкор ўлсин.

Қўй эй булбул!
Тин, эй довул,
ки хоҳиш истироҳатдир,
Бу ерларда илинжим йўқ, юпанчим бир саёҳатдир.
Ўлим, эй воҳ, бу неъматдир,
бу бир шонли саодатдир,
Агар бевақт ўлар эрсам,
рақибим бахтиёр ўлсин.

Фалакдан интиқом истар
жўшиб руҳимда бўронлар,
На инсофни, на виждонни
билар, ё Раб, бу инсонлар.
Ёз, эй Вурғун, яна жўшсин
бугун оламда тўфонлар,
Йиқилсин меҳвари олам,
у тубдан тору мор ўлсин!..

© Самад Вурғун
© Раззоқ Абдурашид ўгирмаси
https://www.tg-me.com/Adabiyot_olami

МЕН БОСФОРДА БЎЛМАГАНМАН ҲЕЧ...

Мен Босфорда бўлмаганман ҳеч
Уни сўзлаб беролмам сенга.
Лекин мовий кўзларинг ҳар кеч
Денгиз бўлиб кўринар менга.

Қилмаганман Бағдодга сафар
Карвон билан элтмадим хино.
Аммо бир зум тин олсам нетар
Тиззангга бош қўйиб дилрабо.

Шафқат айла жонгинам дерман
Ҳам қилурман қанча илтижо.
Россияда машҳур шоирман,
Нечун зарра қилмайсан парво?!

Куй таратар қалбимда гармон
Қайдадир ит хурар ойдин кеч.
Эрон қизи мовий бепоён
Юртни кўргинг келмайдими ҳеч.

Бунда кўнгил ёзгани эмас
Излаб келдим хаёлан сени.
Оққуш қанот қўллар ҳар нафас
Оғушига чорлайди мени.

Нолишим йўқ ўтган умримдан
Аммо ҳорғин дил излар ором.
Дилбар менга қувноқ юртингдан
Бирор нарса сўйла бу оқшом?!

Афсун билан тарқат ўйларим
Токи чиқсин қалбида гармон.
Токи ўша шимол дилбарин
Ўйламайин, қилмайин армон.

Мен Босфорда бўлмаганман ҳеч,
Аммо сўзлаб берурман сенга.
Чунки мовий кўзларинг ҳар кеч
Денгиз бўлиб кўринар менга!

© Сергей Есенин
© Таржимон: Эркин Воҳидов
https://www.tg-me.com/Adabiyot_olami

АЗИЗИМ

(...га)

Мен бир тиламчингман, севгинг хайр қил,
Қалбимни қайтарма, ишқ бергин тотли.
Ўлимларни енгдим, оловлар кечдим,
Энди тириклик истам жўшқин, ҳаётли.

Исминг айтсам тилим най бўлмиш бу дам,
Юрагим сатодир, боқгил, азизим.
Оқилим, телбангман сенинг қаршингда,
Кўнгли шоирлардан шоир азизим.

Дариғ тутма ишқинг, ҳеч йўқ шу қутлуғ
Шукуҳли кунларда, шу карамли пайт –
Уч сўм хайр қилган каби чин дилдан,
Эҳсон қилгин менга, учта сўзни айт...

Мен бир тиламчингман...

© Гўзал Рўзиева
2022 йил, апрел
https://www.tg-me.com/Adabiyot_olami

БАХТ КУЛИБ

Бахт кулиб, васлингга бир имкон бўлса,
Сен-у-мен, кимсасиз бир макон бўлса.
Фасли гул, сафти ишқ ҳам равон бўлса.
Ҳижрондан вайрона дилим оғриса,
Сўзласак...
Сўзласанг...
Тингласам...

Бир умр мафтунман-десам, сен кулсанг,
Ишқингда тутқунман-десам,сен кулсанг.
Лайлисан,Мажнунман-десам,сен кулсанг,
Ҳижрондан вайрона дилинг оғриса...
Сўзласак...
Сўзласам...
Тингласанг...

Нигоҳим, нигоҳинг боғлатиб қўйсак,
Юракни юракка жойлатиб қўйсак,
Тил эмас, қалбларни сўзлатиб қўйсак.
Лабки ул ёноқдан новвот изласак...
Қалб эса сўзласа... сўзласа...

© Абдувоҳид Ҳайит
https://www.tg-me.com/Adabiyot_olami

© Абдувоҳид Ҳайит шеъри
🎤 Нилуфар Ботирбоевна
https://www.tg-me.com/Adabiyot_olami

ЎТИНЧ

Ҳали қанча юмушлар чала,
Ҳануз эколмадим дарахтни.
Бандангга йўқ нечун ҳафсала,
Уйғотгин - Раб мендек карахтни...

Кўрки обод дили хастаман,
Осийман-у, бир шикастаман.
Мен ғофилни уйғотгин Раҳмон,
Дунё деган - нафси дастаман.

Тонгда эшик хатлаб кўчага -
Чиқаман-у, қайтмоқлик гумон.
Шундайлиғин англасам ҳамда,
Бўлолмадим ҳазрати инсон...

Бир кун келиб тинар юмушлар,
Бир кун аҳир қиёмат қойим.
Мен дарахтни кўкартиргунча -
Куч бер менга - куч бер Худойим.

© Абдувоҳид Сувонов
https://www.tg-me.com/Adabiyot_olami

СЕН  ЎЛМА  ФАҚАТ

Чида, тўкилмагин, оз қолди йўлим,
Бу ёзганим балки сенга сўнгги хат.
Сени мен топаман, топмайди ўлим,
Сен ўлма фақат!

Гарчанд қўш чечаклар кетди терс томон,
Бизнинг шаън боғларда қўпти қиёмат.
Биз қиёматдан-да чиққаймиз омон,
Сен ўлма фақат!

Гарчанд юрагим ўт, билагим бардам,
Ғамнинг тойларини тахладим қат-қат.
Лоладай кетгайман қайғузорлардан,
Сен ўлма фақат!

Ўқдай тик йўлларни қарс бурганимда,
Ўқ томир дарз кетар, оғриқ билмас ҳад.
Фақат,
Сени топай мен борганимда,
Сен ўлма фақат!

© Ҳалима Худойбердиева
http://www.tg-me.com/Adabiyot_olami

Дарахтдан тўкилган япроқ қуришга қандай маҳкум бўлса, кўнгилдан қолган инсон ҳам унутилмоққа шундай маҳкумдир.

© Нежиб Фазил Кисакурек
https://www.tg-me.com/Adabiyot_olami

СИЗ ЭРТАГА КЕЛАСИЗ

Сиз эртага келасиз,
Ҳозир
Хабарини етказди симлар.
Бу хатарнок йўлда карвонни
ютган вабо – оҳангдор қумлар.

Сиз эртага келасиз –
Сабо
Салимга ҳам гулоблар қуйди.
Кўзингиздан ўпдим.
Лабларим
Юлдузларга теккандай куйди.

Лабингизда - бешикда жаҳон,
Жаҳонларни суйдим мастона.
Сиз эртага келасиз,
Бугун
Янги ранглар кияр остона.

Сиз эртага келасиз
«1»дай,
Одамларга номаълум сирдай.
Кўрасиз
Севгимни илиб қўйибман
Якшанбада ювиб ёйилган кирдай.

Сиз эртага келасиз,
Ҳозир
Юрагимни қўйдим ўртага.
Агар тузлар ютиб олсалар,
Тополмайсиз мени эртага.

Сиз эртага келасиз,
Қочиб
Таъқиб этган фаранги куйдан.
Сиз келасиз шошиб, аммо мен
Чиқиб кетган бўламан уйдан.

Сиз эртага келасиз...
Боққа
Либосларни хазондай ташлаб.
Бугун менинг чўллик қишлоққа
Кетгим келар кўзимни ёшлаб.

Сиз эртага келасиз,
Бироқ
Бугун тушиб қолдим мен асир.
Бу дунёда нима бўлсаям,
Менга ҳозир керакдир, ҳозир.

Сиз эртага келасиз,
Бугун
Ой нурига лим-лим тўламан.
Сиз эртага келасиз,
Аммо
Эртага мен ўлган бўламан...

© Салим Ашур
https://www.tg-me.com/Adabiyot_olami

© Салим Ашур
🎤 Эркин Бозоров
https://www.tg-me.com/Adabiyot_olami

* * *
Озгина тушунинг,
Озгина севинг,
Бир сафар озгина жилмайиб қаранг.
Нечун лабларингиз бунчалар ҳам жим,
Асабингиз нега озгина таранг?

Озгина ўйланинг,
Озгина ўйланг,
Озгина ишонинг муҳаббатимга.
Наҳот туйғуларнинг ҳаммаси ўлган,
Наҳотки айланган севги етимга?!

Билсангиз, юрагим озгина оғрир,
Оғритиб қўйгудек бутун оламни.
Наҳотки, тушуниш шунчалар оғир
Озгина ҳаёти қолган одамни…

©Жўрабек Рамазонов
https://www.tg-me.com/Adabiyot_olami