نافذ البصيرة | الملا علاء التميمي
https://youtube.com/watch?v=_EEHjKEWfpc&si=imRdjHA8rSDyOzU0

تلميذ ابوفاضل || الرادود علي المهنا || #هيئة_عزاء_الله
https://youtube.com/watch?v=E91nN0W_RdQ&si=y9MtAIB_hHLkLvfc

الرادود احمد العاشور الشاعر عبدالله الشويلي رابطة التقوى الحسينية اخراج ...
https://youtube.com/watch?v=z-lSahoBCO0&si=6h_0eTrnwjaF5aQr

جنازة النور :: محمد حسين مطرود :: مسجد الصديقة فاطمة :: الليالي الفاطمية...
https://youtube.com/watch?v=IbMRzjnAkJI&si=LaTFcGophGgFbh9R

#شور

السلام عليك يا علي الآباء



ها يداحي أبوابها وذيج الثكال
مال وياك الحمل شبسرعه مال
علي ومو نفسك علي صاير خيال
علي توه بگلبك اشتد القتال

ها يالقلعت بيمنتك خيبر
ومنزل اعلام الكفر والشر
تشتت رقادك يالمشتتها
يا عقل يدركها انت تتعثر

مرتاح خصمك هسه مرتاح ....وابداخلك يا حيدر اصياح .....يا داحي خيبر محسنك طاح .....وماتت الزهره وضلتك عجيبه

وشلون شلت اجنازت النور....مكسور أضن شايله مكسور ....رديت وبگلبك.جفه يدور....آمنين اجتك ياعلي المصيبه

نار بفقارك ....يالقرارك ...صبر
ما تطفه نارك ....وانكسارك ....هجر


السلام عليك يا علي الآباء
.
.
.
.
علي من يمتى الخشب تَجوئ الديك
علي فكد ام الحسن شمسوي بيك
البگه برأسك بس هجر خضر بياض
علي وحيطان السلف تنحب عليك

يمبچي حتى الما لمح سيفك
والدنيا كلها اندارت بكيفك
جا ليش دمعك حافر بخدك
جا وين حيفك يالخذت حيفك


ترد الحياتك والله هيهات ....الفاكد الزهره حكه لو مات ....هديت حيل أهل السماوات .... بهذا الدمع يالفاكد الحبيبه
دافن الزهره وحمره العيون ....مدري انت يا كرار مدفون ...عايش لجن وي اليموتون ....محسوبه روحك ياعلي الغريبه

هِد الخواصر ....يالتكابر .....بعد
حطم قيودك...ذاك زودك...شهد


السلام عليك يا علي الآباء
.
.
.
.
الوي ذرعان الحزن لويّت الباب
واصنع امواج الامل من السراب
گبال زينب فاطمه وحيدر تصير
استقيم اگبالها وكف المصاب

أخبرها عن صفين والكوفه
والشال أيدِه يرجع بلا جفوفه
كللها ما يثبتلي أي فارس
وحطيت بصدور العرب خوفه


ايدك المرت فوگ الضلوع .....ضم بيها بتك وكت الدموع ....مفجوع خل يحضله مفجوع ...وامسح على رأس البقت وحيده
للبير احجي البيك مولاي.....الحد ما يجف من الحجي الماي .....
ازغير يالوجعاتك اهواي ....احجيله قصة فاطمه الشهيده

ماتت حزينه ..... والمدينه...بصمت
عافت ضناها.... يالوراها ...انعفت


السلام عليك يا علي الآباء
.
.
.
.
جانت ام البيت من تحجي الحياة
تبتسم واتموت كل النايبات
لمن تدعي اتفتح ابواب السماء
ويستجيب الله لَكل الداعيات


ماكو يتامى بحضرت الزهره
والفقره يم عتبتها مو فقره
جان اليجوع اتشبعه بحجايه
كلشي تراب وفاطمه حضره

تطحن رحاها وتطعم الغير ....ومن جفاها ياكل يا علي الطير ....يمها الفقير ايصير ابن خير ....بخبزة شعير اطيّب الخواطر

بوكت الحرگ ما شفنه جيران....؟خل نتفرض ماكو زلم جان .....جا ليش ما فزعت النسوان ..... معقوله ما تدري المدينه شصاير

الجار الحميته ...طب لبيته .....جمر
جا ما فزعلك ....ماتو اهلك ....صبر



السلام عليك يا علي الآباء

الشاعر عبدالله الشويلي

ادور عزه امي .. الرادود محمد السيلاوي ١٤٤٥..للشاعر عبدالله الشويلي
https://youtube.com/watch?v=ZFnNnRZSz0A&si=urDztMcMcNaNL0rh

#رئيسية_لام_البنين_ع



ما اريد جفك يرد ما منگطع بالغاضريه
ماريد ترجع عدل يا أبا الفضل هاي الوصيه

يا مالك الماي سيفك قرارك
فتحٌ من الله هذا شعارك


يا يمه هذا عيدك....سويها واگطع ايدك .....ترجعلي ما اريدك ....موتك رضاتتي
يمفصل الكافله ....خل توصل المقاله .....ذب يمنته وشماله .....هاي امنياتي

يالمتقن افنون الحرب يالسطرتك ثچيله
اوكف مثل وگفت اسد ضل سوي للعقيله
وشيل الفرات من الجذر شلون العلم تشيله

اكشف ضلام الحرب لمن تطب فوك الاصيله
ارفع ستار العطش وكت الضمه وروي القبيله

تغطي الخيم كون يبني بوقارك
فتح من الله هذا شعارك
.
.
.
.
خلي الحرب تطوفك .....ومن كل جهه تشوفك ....خل تهتز بجفوفك ....سويها ضلمه
اختك شرف خدرها .....كون الهوى اليمرها ....يترخص بسفرها ...يلا تشمه

اگلب ضوه هاي الشمس فيّ يبني عالعبايه
واسمح اثرها لو مشت ايه وتداري ايه
وبس بالدايه وگفتك وكل الضعن بدايه

شاهين فوگ الضعن افتر وطن يا محلى صيدك
اركض ييمه بفخر ركضت اسد للي تريدك

سيف بيمنتك جود بيسارك
فتح من الله هذا شعارك
.
.
.
.
لا تنطبگ جفونك .... ساهر على ضعونك....للخوه بدي لونك ....يا سيد الاحساس
وجهك ضوه المحامل ....غير انت يا ابو فاضل .... اجمل شخص مقاتل ....غير انت عباس

المح أطراف المعركه وتسجدلك المنايه
وبس اخزر ارگاب الزلم توگعلك الضحايه
يالما لمس جفك درع خل الگلب وقايه

الزلم تنمد الك مدت جسر ماله نهايه
يتنكب الموت اذا وجهك غضب بيك الكفايه

بس بالمناحر ينحد فقارك
فتح من الله هذا شعارك
.
.
.
.
حل معصبك تحلهم......هد مهرتك تشلهم ..خل ينگطع نسلهم .....
لو گطعو الماي
اشطب على السلامه....وجعلها كالقيامه .....الشرد كر أمامه ....بس انت الهواي

حطهم بغرببل الغضب سفرهم الجهنم
لَمت ارموش اعله الجفن عالموت خلها تلتم
تظلم عليهم كربله ثغرك اذا تبسم

ياعلو وفوگ العلو حدك علي والباقي نَصه
الماي ماي الخيم هاي الخلگ ما الها حصه

لو شلت الازنود تچويها نارك
فتح من الله هذا شعارك
.
.
.
.
كلشي وره وأمامك ....بس الحسين إمامك .....اركض اله بمقامك .....لمن يصيحك
باجر الدنيا يمك ....تسجد وأتذكر امك......وكل المَلك تخدمك.....
يكبر ضريحك

بعينك اذا ماكو سهم ماكو شمس علينا
ولوما جرِبتك والعطش الماي ما يجينا
وايدك اذا ما تنگطع ما تلطم احنا ادينا

عزت نفس طيحتك من مهرتك يارافع الهم
ماي الوجه ماوكع چي عالارض منك وگع دم

من شيلت الواك يبدي انتصارك
فتح من الله هذا شعارك

الشاعر عبدالله الشويلي

بت وادم احرار
ودت وين الحار
صار الطف بس نار
حي الله ام الكافل

ثار تطلب من ذيج النار الحرگوا باب الدار ودت الهم عباس
بساع كالت تجفوها الكاع بس انتو وماكو اسباع لا تشرد منكم ناس

حيهم صاح الحسين اودتله اربعتهم
مو عالراحه عالموت هي العلمتهم
وكلمن بيده بتار لمن طلعتهم


تنحط فوگ الراس
جا غير ام عباس
لسه مرجف الناس
جفه امرجع العايل
.
.
.
.
حيود صاحت وين البي زود يشمر بالطف زنود صاحو يمه تبشرين
باس جفها وكال العباس اشمر جفين وراس لو گربوا رجل حسين

غيره ومرجله وزود دار الله بلبنها
تنسه عدها اولاد يم حسين ابنها
ماتو كلهم وصار بس لحسين ونها

منها تعلم جون
من تكرم بجنون
تنطي الغالي ودون
ولو مرخوص ! اتقاتل

.
.
.
.
لاح ضلها الغيم ورد طاح اعله خيمه تبده وساح وانطت كل الموجود
نور بدويه وام بدور خالقها الله العاشور كلفه اوادمها حيود

المتزوجها ابو تراب شتبزر غير السباع
رَحاله بحب حسين مو رَحاله عالكاع
مقياس الخدم هاي صارت للوفه اشراع

بدويه چن نور
للخدمه دستور
بچتنه بعاشور
لا ما ردت سائل
.
.
.
.
تكول أنه ام الكلها اجتول سوولي المامعقول تحجي وياهم كل حين
وين ابني اليطفيلي العين ويرفع راس أمه الزين يم الزهره ام حسين

جان زغير عباس واتعلمه اعله السيوف
تگله يالشهم گوم مَثِل گطع الجفوف
وباجر تطفي العيون سد عيونك وشوف

اطفال الطف اهواي
لو گالوا عالماي
اتحول سگاي
وزمزم جودك شايل

.
.
.
.
دار جمعت كل الأحرار نقدسها ازغار كبار تاج وتنحط عالراس
فار دمها وطلگت بحرار من عدها الحب وصار بي شاره من ام عباس

أيقونة الخدام صارت هي الاول
الما حلتها الاثگال بس انخاها تنحل
يخرس كلشي يمها ترتيلتها مقتل

ثكيله وبت اثكال
مضرب للامثال
تسوه اهواي ارجال
لسه تعدل المايل


الشاعر عبدالله الشويلي

من توصل الساقي الحنين
سلم على ام البنين


أيقونة الخدمه الحسينيه
ماتت على العطشان محنيه
تعلمنه منها خالص النيه
وصرنا بفضلها كربلائيه

يالسوتك خادم حزين
سلم على ام البنين



هاي الوفيه الماترد سائل
القَبَل اديها حضرت الكافل
والنعم منها ام ابو فاضل
انخاها حملك ما يضل مايل

يالقسَت وياك السنين
سلم على ام البنين




سلم عليها وگلها مشكوره
ربيتي كافل بَدَع بدوره
ما مات ابنج ضل يشع نوره
ومو عينه ذيج النبله مكسوره

مكسوره والشاطي سجين
سلم على ام البنين




وصت ولدها الاربعه بهايه
طيحو قبل لا توگع الرايه
موتو اربعتكم عالمسنايه
تبشرين صاحو وانطو احجايه

دگو صدرهم سالمين
سلم على ام البنين



يوم الرجع ضعن السبط خالي
صاحت يبشر أخبرني عالغالي
گالتله والله شيبت حالي
گاللها بالطف ما بقى والي

والناس سمعت منها أنيين
سلم على ام البنين




ام البنين ام مدمع الدامي
ماتت حزينه والگلب ضامي
تمنت يغسلها يجي الحامي
ويدفنها بيده السيد السامي

لاچنه مگطوع الأدينين
سلم على ام البنين

الشاعر عبدالله الشويلي

#شور


ام عباس الولاء
تمطر غيره اوفاء
جابت بس الثِگال
وانخسفت كربلاء


منو تعزب زلم 
بوكت مابي شهم

مره وجابتها للكلفه الفحوله من العرب
الكرم بس للحسن والها  مره تكرم رگب
بوكت كلمن شرب روحه وابنها ما شرب

حياج يا ام البنين


حي الله ام الوفه
مبخوته وعارِفه
عدها اربع ولد
بالكلفه عاصفه
.
.
.
.

عدها اسباع وحتوف
فطمتهم عالسيوف
اليزعل بيهم يناس
يذب راسه وي الجفوف



راية الله الشهم
زلمه فوگ الزلم

الهوى من رايته نشمه وبلاها ما نشم
منو مثله انگطع جفه وفرك حلگ الزلم
بشر بس دورت اعيونه وعلي تردم ردم

حياج يا ام البنين

مشكوره ام البخت
واشموعج ما طفت
ابنج سبعين الف
من سيفه ما نجَت
.
.
.
.
معروفه ام البنين
نور اللهُ المبين
صارت معنى الحياة
وحبل الحب المتين



جابت الها نهر
فرك حلگ الدهر

سمار الدنيا من جفها الفلك الها ابتسم
ابنها السيد الساقي تگمطه بالعلم
صبي ومو بالمهد نومه تنومه بالمخيم

حياج يا ام البنين

تهمسله بمسمعه
روح الوي المشرعه
معلمته من الصغر
اجفوفه مگطعه
.
.
.
.
.
منها صار النهار
من جفها كل خِضار
عدها تبشر يجاي
ماعدها مستعار



واليجي بمسأله
يشبع من الهلا

بعد ام زينب وزينب اميره اعله النسه
الفروض الخمسه لو سته تصير السادسه
مره عد االله وأهل الله جبيره مقدسه

حياج يا ام البنين

ما يوصفها قلم
هي نون وقلم
هي معنى الزهد
هي التين و ألم
.
.
.


.
بنتُ خُزام الشهاب
يمها اتلين الصعاب
لو قِسنه اعله النساء
بس هيّه اُم تراب



عزبن جم جرح
من النهر للذبح

يعزبن بالذي يسوه اليهد حيل الخلگ
حسين حسين يا يمه گلبهن من يدگ
وعلي من عدهن اعرفنا قوانين العشگ

حياج يا ام البنين

منها شمحله الهلا
بصمه بنص كربله
ما تنعاد بزمن
هالحرمه معدله


الشاعر عبدالله الشويلي

مايله الهزله | الملا علاء التميمي | عزاء الناصرية المركزي | هيئة ٣١٣ الح...
https://youtube.com/watch?v=6LdYkh2d2mg&si=8bjYeDsc8BXzhvDo

#شهادة_السيدة_زينب

يا غربتي ......ميته والوادم تضم الماي عني
يا غربتي .....خشبت التابوت چن سوط اعله متني

جزاني موتي
واريد اخوتي
شِوصله صوتي


انه ذيج الخَجِلت حتى الحزن
الخذاها الكافل وردها الهزل

جان اليه اخوان يسوون العتب
وهسه ما ضللالي بس دمعي اليهل

اندارت الدنيا وصرت بين الزلم
امشي محنيه ويعت بيه الحبل

اني اول حرمه يكتلها الغياب
والهجر خلاها كل لحضه تسل

مو ثگيله ... صرت اخف من الخيال نوكل حيلي
مو ثكيله .....وين ابو فاضل اليفزعلي ويجيلي


ويجي المسيه
بعلمنا اليه
ويسبل اديه








اني ميته من شفت خيل وزلم
دارت اعله حسين چن دور الرحه

من تربع عالصدر شمر الخنا
ولزم شيبات الولي بلا مستحه

من ركضت بكربله اوادم وراي
وصحت يا ابا الفضل لاچن ما صحه

من طلعت بليل محنيه وأنوود
ابحث اعله حسين وحسين انمحه


اهلي خلصوا.....لو طبر لو سحگ لو عاصرهم الباب
اهلي خلصوا ......ياهو اليشيل الجنازه مامش احباب

كبر حنيني
منو اليجيني
ويسدها عيني
.
.
.
.

بعازت اخواني يجوني بهل المسه
ارد اگلهم ميته والضحكه وراي

حرب ما عندي ولا عندي سلاح
ليش أهل الشام ما ينطوي ماي

صرت عدهم مثل عبدالله الرضيع
اطوها لا تطوها ما ثبتوا براي

انه خطار العرب تكرم الضيف
ليش بس ال لا هله ترست سماي


عدله ميته .....نفس شلعان الگلب والضيم نفسه
عدله ميته .......واسمي مثل حسين ياهو المر يرفسه


گبل اميره
صرت اسيره
ومتت كسيره
.
.
.
.
تفزع أهل الشام للميت فَزِع
ليش بس اجنازتي بلايه متن

لحجر ضل يبچي عليه وما بچو
كلها تضحك ما شفت واحد يون

حتى ام المغتسل عكست وياي
گالوا اسمي گبالها وگالت وأن

الوكت شد وياي حد الغربه هاي
ليش بس اعليه احسنه سجن

وين اخوتي ......حملي مال وأهل هالديرة شماته
وين اخوتي ..... وين ذاك الوسط عينه حط خواته

غريبه اني
ولا اجاني
الوكت سباني
.
.
.
.
خشن تابوتي مثل سوط الشمر
وحگ ذاك الماله تابوت وجفن

اسهام ضحكات العدو جاسني حيل
وطاحن بنعشي مثل نعش الحسن

وفرحت النسوان چن يوم السبي
الضحك نزل دمعهن من اجن

گالن اعليه الغريبه ام الجروح
وكالن الما عدها اخوه ولا وطن

ها يروحي .....والله لو ميته اويه امي اهوايه احسن
ها يروحي......موتي حتى لو غريبه ضاله المن


بقيت اعاني
الحزن جزاني
التعب خذاني



الشاعر عبدالله الشويلي

على زينب وأهل زينب كلبي ناصب فاتحه

رجعت من السبي محنيه وتنوود
لا نظر لا حيل لا چلمت هله

التطب ديوان مشدوده بحبال
من يكلي شلون توصل كربله

كلها كالت يا خلگ مسبيه هاي
ماكو واحد كال هاي امدلله


صاحت العالم اسيره....وهي اميره وبنت اميره...هذا شلعان الگلب
والله لو ميته احسن الها........ولا الوادم تهد كلها ......تضيّگ اعلها الدرب
اللزمت اجفوف ابو فاضل .....حيره مجتوفه بسلاسل ....ودم ايديها يضل يصب

تطلع الخوية شثگلها من كثر ما صايحة
.
.
.
.

الهزله جنها الدنيا كلساعه تميل
مايله الهزله اويه زينب مايله

مو فقط ذيج السياط العلمتون
اتلاثه واثمانين واحد شايله

زينب بگد ما مبچيها الافراگ
هاي ميته اعليها وادم گايله

الجان طوله في خواته......گطعوا اجفوفه الشماته .....گَطعَت الماي العذب
كلها تصرخ عمي وينه .....ونبله سدت شوف عينه ....... وسفه باقي للسلب
ياهو يقبلها اعله زينب .......بالسبي يا ناس تنسب ......نار وبدمها تشب

لو تشوف الرمح يهتز گول زينب طايحة
.
.
.
.
انشالت ادلال الاعزاز من المضيف
وانطفه الموگد وشبت نارها

بعد ضيم السبي والسوگ الثگيل
تختنك زينب بشوف اديارها


يوم نظرت بالدمع لام البنين
چنها خيمه اوجت أمن اكتارها

فاگده ويذبح نعيها .. ووين ابو فاضل حچيها ...
الفاگد يموته النِشد
ضايعه وحرگوا خدرها .. والهزل موش لعمرها .. ومو حبل بيها اليشد
زينب المكفولة صارت .. كافلة وكلش احتارت .. بالكمر تحلم يرد

تمشي تتلفت لخوها تگله اختك رايحة
.
.
.
.
رجعت المكسور تنطي الدمعه لون
حمره دمعتها اليموت احسينها


تل مصغر ظهر ناگتها يصير
ومشرعه وبيها ابو فاضل عينها

دمعه دمعه تموت هي الغربه هيج
وتنحني من السوگ المجتفينها

امچتفه وبحه بحچيها .. والحبل شلع اديها.. و السبي يريد ازلمه
وهيه حرمه من ال هاشم .....ضلها ما شافت الوادم....عالدلال امعلمه
أمن البچي وموت السبايه.. ضاله بس العبايه .. ذبلت بگد فاطمه

مثل ما ماتت الزهرة اتموت زينب شابحة
.
.
.
.
وصلت وبيها شكثر نظرات شام
الوين چنتي اسهام بذن الضايعه

الخوية طلعت منها دمعه وعد غريب
امن الگلب لحسين طلعت نابعه

واليزور اگبور لازم عنده ماي
وچلمه من الماي زينب سامعه

الفاتحة العدها چبيرة .. عدها اخو انلم بحصيره..وعدها چف اعله النهر

وصلت بيوم اربعينه .. تعبت الخوه الحنينة .. تمشي صارلها شهر

شافت الطف التغير .. مگبره وبترابة الاحمر .. ضاله اشلاء ونحر

وريحة ارماد المخيم لسه بالطف فايحة


علي هادي الخزعلي
عبدالله الشويلي

ها يداحي أبوابها:الرادود محمد حسين مطرود:موكب شباب القاسم 1445هـ
https://youtube.com/watch?v=rTEl5C9Kj-Y&si=LGqhztgBLi44iUjC

#شور
#شهادة_السيدة_ع

العازه من تموت وبعيد اعله اخوتك
من تشوف الناس كلها تريد موتك
من يدورولك على مغيسل يغسلك
ومحد يصيح عليك الكل تفوتك

فرفحت روحي شكثر محد وصلها
واسمع اتكول الشماته وين اهلها
يا اهل والاعوجيه فرهدتنا
وصارت كبالي هزيله الدنيا كلها

صاحت الناس
وينه عباس
هاي عازه

اختك ام عون
رايده امتون
للجنازه

.
.
.
.
والله لو ميته ويه اخوتي ولا حجيهم
بالجنازه وأسمع تصفگ ايديهم
ليش ماي الله يضمونه عليه
خلصت ايامي ولا خَلَص سبيهم

كلها كالت حيل بيها ما اجوها
هيه هايه الجان ابو فاضل اخوها
مو بعيده ما يدفنوني بارضهم
عدله ميته اني ذيج المرمروها

كان ما كان
عندي خوان
بيها فزعه

صارو ابعاد
ويه الاولاد
ماكو رجعه



.
.
.
.
نسوة أهل الشام التمن يضحكن
منين اجيب امي وخواتي اعليه يبچن
ام المتون النحيله عليه كالن
مثل ما انه سبيه بموتي بفرحن

جابن احبال السبي وخلنها يمي
بيها دم من جف رقيه وبيها دمي
هو هذا الماله اخوه ماله فزعه
ودفنتي حسره اعله حسره چنها امي


التمن اهواي
بدن الماي
وحيل ضحكن


هلهلن حيل
من أجه الليل
بموتي فرحن



.
.
.
.
هينه ياروحي اكو تابوت اليه
بس اخويه ضل بلا نعش وعزيه
اليطشره الحافر اتلمه حصيره
والتطشره الغربه يطلب اهله جيه

اني مشلوعت گلب من صغري لسه
المثلي يا طف يا هزل يا شام تنسه
والله بس اسايطهم كافي لرحيلي
كالرمح وبراس اخوتي الشام أحسه

الشام جتال
مثل الأحبال
البيها اديه

لسعة الشام
لسعت اخيام
الغاضريه




الشاعر عبدالله الشويلي

#شور #شهادة_السيدة_ع


اني الحبيبه ....وصرت الغريبه


بنص الجنازه واسمع تكول الناس
الميته هاي تصير اخت العباس
بالموت ما مرتاحه جا يمتى ارتاح
اسوالف الشام ثگيله وتشيِّب الراس

تابوتي طب بين الغُرب يالخوان
واتذكرت طبتي بذاك الديوان
كترين متوزعه الخَلگ عالتابوت
ومثل امي ماكو اعليه صايح نسوان



من فزعوا ليه يضحكون اعليه موش شيعوني
ضعفانه هوايه والوادم هايه حيل يسَمعوني
لحگوا يخواني الشام اذاني وناسه يجرحوني
.
.
.
.
كون اليموت ايصير هو الجناز
وشيِّع برَوحه لَوَن ماكو اعزاز
جا شلت روحي حتلو ماكو امتون
بس نعشي هم يبقى لخوتي معتاز

يلْچم امتوني النعش لَمَن ينشال
الما گاله واحد بالسبي هسه انگال
مو عالهزل هسه وسط التابوت
ميته وسمعت الحجي المامر عالبال



يمعدلل العدله ضلت بس هزله ما جابوا ليه
بيه شكد عالو اسمعهم گالو هاي المسبيه
المارحموا جثتك ميرحمون اختك لو مو علويه
.
.
.
.
حَزَت ابنفسي هواي وگفت نسوان
واعليه كالن هاي دخلت ديوان
بتابوت ينشال الغريب البالشام
بس اني تابوتي بقى بلا عوان


ضعفانه، نحلانه صرت چن اخيال
جا ليش نعشي عالارض ما ينشال
شمسويه حتى بموتي يسبيني الشام
وسفه بلسنهم يخوِتي صرت انكال

عطشانه عيوني يالماجيتوني حسره بدلالي
وحْدي وحيرانه لا امي اهنانه لا ابوي الغالي
السجاد امحير بس وَحده شيكدر وادموعه اتلالي
.
.
.
.
بس العليل وياي بعيونه يدير
ما ضل الي لا خاطر ولا تقدير
ضلت بنفسه يموت بالخنگه احذاي
ونفس النعش ينشال ووياي يصير

الغربه توجعني واحس ارض الشام
مو گدري والله وگدِر ذيج الأحلام
جانت بنفسي اندفن وي المذبوح
عاد ابارض كربله اكو اسم اخيام

هيج وكون اني ميته وي اخواني وبنصهم گبري
اتراب من الخيمه ودم اهلي وضيمه يخلون بكتري
بهيده ينزلوني خاف ايلجموني ورايتهم حدري
.
.
.
.
الناس كلمن لونه وانه ابلا لون
اشباقي بيه السوط رايدله امتون
مو ذيج زينب بعد موت العباس
ام المصايب هسه لا مو ام عون

گطعان واهس عيشتي ذيج الخيل
الخلتني اركض لحد ما صار الليل
رجليه فَرَت كربله اذراع اذراع
واسياطهم بمتون أطفالي تشيل

اركض محنيه دم برجليه الطف كله انياحه
عثره تجر عثره مدري شكم مره فريت الساحه
عمري بس لجمه صار اسمي الهضمه ما شفت الراحه

عبدالله الشويلي

#شهادة_السيدة_ع

فتحت عزا أو رئيسية


الدنيا عدها سجن
وافراج اجاها الگبر
اليخلص عمرها تون
ما يسوه عدها العمر

الغربه من اتموت وحدك وماكو يمك اي عرف
وتنتظر جيت اخوتك وروحك عليهم ترف
هاي زينب توها ماتت والنزف نفسه النزف
لا أهل يمها وگرايب ولا علم يمها يرف

وصت اكتبوا بدمع
يا أبا الفضل عالجفن
ميته وبعدها تحن
ما يسوه عدها العمر

.
.
.
.
الدنيا سجن ام عون صارت و الفرج بس اللحِد
امنيتي اسمع مره وحده تجتمع يمها الولد
وأبو فاضل يوصل الها ويكسر بسهمه البعد
والتغسلها امها فاطم والحسن عايش يرد

وحسين اخوها يجي
وما منذبح منحره
لو شافته محتزن
ما سوه عدها العمر
.
.
.
.
اهوايه ماتت هالحنينه ما طلع هذا عمر
موته وكت الركضه صارت وموته من راح الخدُر
وموته من شافت اخوها بالحجر ضل ينشمر
وموته من نظرت رقيه على الرأس وتحتضر

الموته الجبيره لَمَن
طبت لذاك القصر
الماعدها اخ وابن
ما يسوه عدها العمر
.
.
.
.
شتنسه زينب يا مصيبه بحسره گضتها الحياة
كربله وماي وعطاشه كل شريط الذكريات
الحادي عالهزله اخذها الجسم اخوها والفرات
والنسه الوياهه تعبت والله يدري شباچيات

الشافت طفل منذبح
من الأذن للاذن
تبچي دمه بلا إذِن
ما يسوه عدها العمر
.
.
.
.
وداعت الله من يگلها وينحب عليها ويون
حتى هاي الموته تقهر والدفن مو اي دفن
ماكو تشيع وبواچي الشام گللها وأن
بالسبي حبل الچتفها وهسه چاتفها الحزن

يا يمه محد صرخ
ولا دمعه نزلت ترا
وكلمت عدوها وأن
ما يسوه عدها العمر

الشاعر عبدالله الشويلي

#شهادة_الامام_الكاظم_ع


التقن ....سلسلة موسى وحبل ام الخدر
التقن .... بظلمة الطاموره والملگه جمر

اتلاگن الاه والدمع
وانشرح كل الوضع
التقن......التقن


كاظم الغيض آخر رمق گدامه عرضت صورة
اتلاگه الحبل بالسلسله واهتزت الطامورة
بهذا اللقاء كلشي نروى وكلمن حجه عن دوره
من الشام اجه حبل اليسر بس جيّيته مكسوره

كله دم ..... من الجفوف القبلتها ام الحسن
كله دم .... وصل من الشام ما حَده زمن

لونه احمر بس يشع
وانشرح كل الوضع
التقت ....التقت
.
.
.
.
السلسلة تبدي بشرح كل الجره بالعتمه
كالت متن موسى نزف حد ما سبحت بدمه
والسندي شداني لَمَن وَصَل حديدي لعظمه
ومن گال أخ من الوجع شَتِمو جده وامه


لو سجد ..... انْضب أكثر على جسمه والعنق
لو سجد ....على تربه والله احس بي ينشنق

وعلى وجهه يندفع
وانشرح كل الوضع
التقن ......التقن
.
.
.
.
للسلسله يروي الحبل ويگلها شدوا بيه
كل الاطفال البلضعن والنوگ والمسبيه
وبجف رقيه شكد بتت وصفت شكد عليه
گالتلي يا حبل اتعض اني ترا علويه

شكد ترف .....چفها ذاك اللزم خنصر منگطع
شكد ترف ....من نزل منها عَلي ذاك الدمع

بچفها اني منطبع
وانشرح كل الوضع
التقن التقن
.
.
.
.
كال الحبل اصعب جرح حين الجتفت الحره
وجروني وحسين التفت اوگعَت دموعه الحمره
ومحنيه شفت ام الحسن مسكور ضلع الزهره
الله يساعد هالمره للطف اجت منعصره


دورت ..... على ابنها المنذبح واتصيح يمه
دورت ..... وشافت بذيح الحوافر اثر دمه

أيدها فوگ الضلع
وانشرح كل الوضع
التقن .......التقن
.
.
.
.
تذكر الحبل الجامعه وعنق الامام وتعبه
ومن أُمر سهل الساعدي يرفعها عن الرگبه
وحللها ابن سعد وخرج اعله امتونه كل دم گلبه
وگله خُزينا امنِ النظر والناس صارت گربه


يا سهل .....اعطي حامل روسنا بعض الدراهم
يا سهل ....قد خُزينا أمنِ النظر ويانه ساهم

الناس صارت تنجمع
وانشرح كل الوضع
التقن ....التقن


الشاعر عبدالله الشويلي

كلبي ناصب فاتحة - عبد الحسين الزيرجاوي - استشهاد السيدة زينب ع كلمات عبدالله الشويلي وعلي هادي الخزعلي
https://youtube.com/watch?v=yUo0LZM53sI&si=EpK7Y94gXiZya2kq