اللهم صل على محمد وأل محمد
-----------------------------------
ياهــلال ألـَأم زينب لاتـِهل
تنزل ادموعي لون اسمك يحل
وبيك علـ تربان مذبوح الكفل
والعطاشى بشهرك أماذيها
********
ياهلال البيك مكتوب الالم
وبيك طيحة علنهر راعي العلم
وصابته العدوان وبعينه السهم
وجربته يم راسه مخليها
*********
ياهلال البيك مذبوح الشباب
وفگدة القاسم لرمله شگد عذاب
وباقي ضل بمصرعه فوك التراب
وخيمته بدم نحره محنينها
**********
ياهلال البيك ماسالم الرضيع
والسهم وسط النحر ضل بيه صريع
مو اله سهم الحرب نحره رفيع
عصابته بدم رگبته مخضبيها
**********
ياهلال البيك مسبيه العيال
والسكينه تمشي مجتوفه بحبال
وجانت الحره عليها اكثر سؤال
هاي زينب ماهو اشو كفالها
**********
ياهلال البيك اللأم وعلل
و العليله الفارگت بيك الاهل
ايست يلتم بعد ذاك الشمل
وضلت الشمات تضحك حالها
*****'****
لخادم الحسين ع
ذوالفقار جميل الخفاجي

أللهم صل على محمد وأل محمد
* * *-* * *
هليت يهلال الحزن خليت زينب بس تون
تيتمت بيك العيال
وبيك دمع اطفاله سال
ياهـــــــلال ياهـــــــلال
* * *-* * *
ياهلال المن تهل بسك مصايب
ياهلال بجيتك تلفي النوايب
هلتك ترسملي مفارگ حبايب
اتعذبت بيك العقيله من الصعايب
الــٓـأم بيك شگد الم والنار من تحرگ خيم
وهجمت الخيل ورمال
وبيك دمع اطفاله سال
ياهـــــــلال
__________
ياهلال بشهرك نذبحت نواحر
وبيك صدر حسين متطشر بحوافر
ولگمر فاگد نصف من النواظر
وضل بعد عباس شامتهم يأمر
وجروح مايتوصفن بجيتك ضلن ينزفن
أحزان تكبر لامحال
وبيك دمع اطفاله سال
ياهـــــــلال
__________
ياهلال أنتركت بشهرك غريبه
ورده ذبلها العطش لا ولمصيبه
طفله عافوها اجوها لگوها شيبه
وفارگت والدها اليگلها الحبيبه
دمعات مترجع الرحل من راح ماضل كل أمل
والفراگ هوايه طال
وبيك دمع اطفاله سال
ياهـــــــلال
__________
ياهلال البيك سكنه غروبها
والرقيه بنص خرابه تريد ابوها
ومن زغرها خوله ورده ويتموها
والصفيه فوگ هـِزل صعدوها
والشمر حادي الضعن نوگه ابد ما نوخن
حادي صار أعلل جمال
وبيك دمع اطفاله سال
ياهـــــــلال
__________
يا شهر يا شام يا شر وبـَـليه
بيك بت حيدر علي تمشي سبيه
گعدت جَم ميت الخطبه الأبيه
وصلت بيها رسائل عالميه
السجاد يمشي بلدرب صحراء ولممشه صعب
عليل لاجن حاله حال
وبيك دمع اطفاله سال
ياهـــــــلال
- - - - - - - - - - - - - -
لخادم الحسين ع
ذوالفقار جميل الخفاجي

اللهم صل على محمد وأل محمد
- - - - - - - - - - - - -
عطر الورد بس مجلسك
شوگ والم أتاملك
عطر الورد
__________________
يحسين احسن بالألم
من اذكره راعي العلم
واتصوره بعينه السهم
وراسه يفره اعلل خيم

بكد السمه اشتاكلك
شوگ والم اتاملك
_________________
يحسين اسولف ذبحتك
مولاي گطعوا ركبتك
وبخيل سحكوا جثتك
وبلا دفن هم موتتك

جسمي وكياني كله الك
شوگ والم اتاملك
________________
يحسين ماشايل طفل
وردك رويته ورد ذبل
خذته عدل مارد عدل
ورجعته للخيمه بخجل

مشهد يأذي عالمك
شوگ والم اتاملك
_______________
يحسين راسك علرمح
وزينب تناضرله بصدح
يل ذبحتك ماتنشرح
اذوك ياترف وسمح

الموعلى نهجك هلك
شوگ والم اتاملك
______________
راحن على نوگ الهزل
كل وحده مشدوده بحبل
والحبل ياذي ومو سهل
وتاذه كل ذاك الشمل

كل العيال تنادي الك
شوگ والم اتاملك
______________
بمجلس يزيد ام الخدر
يحسين ينضرها شمر
ويطگ بناتك الجسر
ويشتمهن بدرب اليسر

متاذيه كلش عيلتك
شوگ والم اتاملك
_____________
ذوالــــفقـــار جميل الخفاجــْْي..

اللهم صل على محمد وأل محمد
_________________________
هل شهر عاشور وينك يامُحب
اتذكر العطشان طايح عالترب
هل عاشور..بان الحزن..
هل عاشور.. ولهله ون..
----------------------------
هل شهر عاشور خل نستقبله
بلبواجي اعله المشت من كربله
وعلئ كل طفله يتيمه مدللـه
راح ابوها وضلت بيـٓد حرمله
هل عاشور..شهر المحن
هل عاشور.. ولهله ون..
---------------------------
هل شهر عاشور ضل دگ الصدر
أذكر الصار وجره بذاك الظهر
وأذكر الراحن مشي بدرب ليسر
ويلي شدوهن حبل واحد سطر
هل عاشور..جرح الزمن
هل عاشور.. ولهله ون
--------------------------
هل شهر عاشور خل نحي الأمر
ونحي ذكر حسين يامحله الذكر
ضحه لجل الد ين ياناس العمر
فدوه اله كله العمر موبس شهر
هل عاشور..ليه وطن
هل عاشور.. ولهله ون
--------------------------
على ظهرك خلي زنجيلك يدگ
وعله متنك دگتك تنطيها حگ
حسين تدري الحافر بمتنه سحگ
ولجل عينك حتى صيوانه احترگ
هل عاشور.. يوگف الذهن
هل عاشور.. ولهله ون
---------------------------
هل شهر عاشور حضر قامتك
وبصباح العاشر اجرح هامتك
ولا تقصر بللطم عن وجنتك
حته باجر تنوجد وي خدمتك
هل عاشور.. وجنوني فن
هل عاشور.. ولهله ون
--------------------------
لخادم الحسين ع
ذوالفقار جميل الخفاجي

اللهم صل على محمد وأل محمد
__________________________
كون، كون اشوفن حنتك علخيمه
موش، دمك الطاهر يروي الهيمه
يجسام والأسهام فلا ترحم جمالك
تمنيت آياريت مثل عمك خصالك
يجسام. يجسام.
___________________________..€
يمه يمه يل ولد ضهري كسمته
ودورت عنك يغالي بليل سكته
راوداني خيالك بطولي وشبكته
وجن كلتلك ليه ترجع يمته يمته

يلوحيد ألي عيد لون اشوف أعيونك
الجرح باد ملا ضماد يضل يطول بدونك

يجسام. يجسام.
___________________________..€
كون أشوفن حنتك بلخيمه خطت
بزفة القاسم تقام الليله كتبت
وداير الخيمه ييمه شموع وجت
وكل اهل بيت الاطايب بيك فرحت

يفرحون يهنون ييمه ابوك بعرسك
كل الناس ولعباس يجي يحضر لزفتك

يجسام. يجسام.
__________________________..€
مبين العريس من ثوبه وكيانه
ونته ثوبك شايل احزان بزمانه
المن انطيهه الكلب بعدك حنانه
تبقى ضلمه لدنيه إخلافك ضوانه

من ألوليك حلم بيك انه جده لعيالك
حلم ذاب بلتراب شفتهه كل وصالك

يجسام. يجسام.
__________________________..€
يمه كل عريس اله ساعة زفافه
ينرش بورق الورد أبكل ترافه
بلسهام انته يرشونك حسافه
وطبرت لسيف وطعنته وكل وصافه

تاذيك تحنيك دماياك اعلطولك
جراحات جثيرات العده يايمه حولك

يجسام. يجسام.
__________________________..€
خايفه دهري كبل لا بيك يهدم
و الورد يا يُمه بجفوفك تيتم
نهاري يوم الفارگتني بات مظلم
والوحيد نته زفافك صار مأتم

نساني زماني لون نسيتك يمه
جرحني وذبحني وكلبي تعب من همه
يجسام. يجسام
_________________________.. €
لخادم الحسين (ع)..
ذوالــــفقـــار جميل الخفاجــْْي..

الخيمه باجر بلحرك تصبح رماد
يله كومن وارتدن لون السواد
باجر العاشر
يكسر الخاطر
تصبح رماد. تصبح رماد
****************************
يله كومن قبل لا تلفي الخيول
قبل لا يخطب ابن بنت الرسول
قبل لا تصبح خيمنه الهم دخول
قبل لابينه العطش بلحر يصول

قبل لا رمله تخضب راسها
بحنه القاسم حزين احساسها
مصرعه باجر. يكسر الخاطر
___________________________________
يله كومن دنت ساعات الصباح
قبل لا يناده حي علئ الفلاح
قبل لا تملي ضهر خيي الرماح
وقبل لا يملئ ابو فاضل جراح

قبل لاعون وي الاكبر يبرزون
قبل لا يم الخيم يتودعون
يعمي الناضر. يكسر الخاطر
__________________________________
ما بقه لطرت الفجر بس الوداع
يمر مثل لمح البصر يخلص بساع
قبل لا بطفالنه يصير انفجاع
قبل لا تطشر اعضام الضلاع

قبل لا ما يبقه بيده الخاتم
قبل لا بينه الغرب تتشائم
حسين ما حاضر. يكسر الخاطر
__________________________________
الحبيب وجون مسلم وي زهير
مثل ساتر وكفو بامر القدير
وابو فاضل بلوسط بيهم ينير
ما تهمهم دنيه حشمهم ضمير

طلكو دنيتهم وصاحو حسين
بين اديك نموت يبن الخيرتين
ودمهم الطاهر. يكسر الخاطر
_________________________________
ابو فاضل باجر اكبالي الشهم
بجوده لا مو ماي يحصد بس زلم
الجيش كله بيمنته يطشره ويلم
محد من جيوشهم منه سلم

ينادي باجر شبل حيدر انه
بيه اخلي جيوشكم حيرانه
لوالدي الذاخر. يكسر الخاطر
_________________________________
باجر ادموع العطاشئ تجر سوه
ويزدحم ماي الدموع وي الهوه
هذه يركض هذه بلرمل انجوه
وهذه المن العطش ميشوف الضوه

والصحره كلش حاره وفوكاهه نار
وابد ما ترحم جوت جدم الزغار
وماكو ابد ناصر. يكسر الخاطر __________________________________
لخادم الحسين (ع)..
ذوالفقار جميل الخفاجي..

لوكربو علئ خيمنه. نفديلك مناحرنا
سبحة بايدك احنه نصير
نخلي القاده بينه تحير
نفديلك مناحرنا. نفديلك مناحرنا
****************
صت صوت الانصار رعيد لهذه ليوم متحضرين
التمو مثل لفت السور وخلو بلوسط حسين
كل منهم يصيح الموت قربان انذبح للدين
نرد كل انتصار الفات اليرموك وأحد،صفين
نشبة صولت الفقار. حيدر علي الكرار
نفسر اصفوفهم تفسير
نخلي القاده بينه تحير
تحيرهم ارادتنا. نفديلك مناحرنا
___________________________________
زهير الميمنه واكف وحبيب الميسره ترجل
الرافع راية وسط الجيش عباس الوفي اتكفل
عباس الي لو حارب يعدل كلشي لو ميل
مكرم الضيف والايتام وميردله شخص يسئل
دخيل افعال وعلومه. لمن ينزل للحومه
يطشر جيوشهم تطشير.
نخلي القاده بينة تحير
الزلمه ليه ما يدنا. نفديلك مناحرنا
___________________________________
مسلم جون وي عابس وهب يم الغفاريان
مثل نيران الجهنم وبحر يطفيهه يلتكيان
انصار حسين متبصرين وجيوش الكفر عميان
واحد جيش ابو اليمه الف يذبح وهو عطشان
كلبهم واحد السبعين. ملتم موش متطشرين
كلبهم صافي وي الغير.
نخلي القاده بينة تحير
حب حسين امنا. نفديلك مناحرنا
__________________________________
ابوفاضل يكل لحسين لو وصلو علئ خيامك
اشطرهم الك ابساط تمشي فوكه اجدامك
تريد اشجخهم اعلئ الكاع مثل ارماح كدامك
لو بيهم اسوي تلول ستر لخيام حرامك
لو بالخندق ادفنهم. واكطعلك نفس حسهم
شورك سيدي يا امير.
نخلي القاده بينة تحير
شورك انتة سيدنا. نفديلك مناحرنا
___________________________________
عابس گال انه لمجنون بحب حسين اسمعوني
مابيكم كفو يحارب يترس وحده بأعيوني
بسيفي اليوم ابارزكم واشوفن هم تذبحوني
لهذه سيفي ذبيته واريد أنتم تگبلوني
ودرعي راح اذب ولطاس لاخوذة وريش علراس
بيكم ابدي التحرير.
اخلي القاده بينة تحير
خوه وحده تجمعنا. نفديلك مناحرنا
__________________________________
وهب ودعهه امه واراح يم زوجته الكوفيه
يكلهه هانيه نفسي ترد لحسين مرضيه
ولوله حب ابو اليمه روحي احسبهه ماهيه
الروح التنشغف بحسين تصبح روح قدسيه
امشي وي اخت عباس. وضلي رافعه الراس
بمشاج الهه صيري نضير.
نخلي القاده بينة تحير
نواسي الطاهره بحبنه. نفديلك مناحرنا
_________________________________
لخادم الحسين(ع)..
ذوالفقار جميل الخفاجي..

باجر تركض حيل الخيل. وتفر ايتامي
فوك تراب الصحره الحار عطشان وضامي
وتسلب اثيابي انه العده
و ميموني يرد لوحده
عطشان وضامي. عطشان وضامي.
****************************
باجر و بفجر عاشر لمن القي جلماتي
وعلئ جيوش الكفر انضر وجر عليهم اهاتي
اعرف هدة الفرسان لو هدت عله بناتي
وعلئ الاطفال والخيمات ويم سجادي حسراتي

خوله وسكنه يصيحن ماي. وعباسي طايح
ودم عينه يضل علوجنات. يضل جامد سايح
صعب البعيالي انه سده
وميموني يرد لوحده
عطشان وضامي. عطشان وضامي
_________________________________
باجر فكده الاصحاب واحد يتلي الاخر
الواحدهم كلب يراد لو ودعني واتاخر
شلون انضرهم اكبالي وحبيب عمامته مشمر
وجون يحاور بعباس يكله اعله الشمر نخطر

مسلم والحر وي عثمان. وحدهم امه
بلدم نهر انسوي هنا للاصحاب اسمه
العزم وي انصارا انا بده
وميموني يرد لوحده
عطشان وضامي. عطشان وضامي
_________________________________
كلهه تهون احسنهه وينهيه الزمن ويروح
بس اوداعي وي عباس من ياخذهه مني الروح
نفسي يضل يجر ويا ويكطع من تصيبه جروح
وبس جسمي يضل واكف اكبال الخيمه اله مشبوح

والرايه ترف وسط الجيش. وترعب المجبل
واسمه لو مر علفرسان. بلا شهكه يجفل
ارجازك للنهر ارعده
وميموني يرد لوحده
________________________________
الاكبر باجر وجسام مني سيوف تاخذهم
حلم رمله وحلم ليلئ عده باجر توذرهم
ورده عمره ست اشهور ذبحوه ما سلم منهم
الكوم السجدو لابليس ميته كل ضمايرهم

نكرو حيدر داحي الباب. ونكرو معرفته
ونكرو رسول الاحزان. وهم نكرو بنته
والاكبر سيفه يجردهه
وميموني يرد لوحده
_________________________________
وداعي اطفالي بلخيمات كلش يكسر الخاطر
وصدري الي يشبكونه باجر ينثره الحافر
بس هليله اسم حسين باجر عنهم امسافر
اخلاف عيوني علحرام يصبح فاجعه العاش
باجر كل ترجيه بصوب من طفله تنجر
فوك الجمر وفوك النار. يجون خدر
والسبي انه اشهده
وميموني يرد لوحده
__________________________________
رواسي اجبال تتفطر ودمع باجر يفيض الطف
باجر كلهم السبعين جحافلهم تذل توكف
بوداع الحره وي عباس ومدامع جرها مايوصف
ضلمة وليل مر بساع لا طول و لا عطف
ويوصيهه علئ الاطفال. ويسلمه اضعونه
ويم سكينه والخيمات. مشبوحه عيونه
والقدر عني ابعده
وميموني يرد لوحده
__________________________________
لخادم الحسين(ع)..
ذوالفقار جميل الخفاجي..

اللهم صل على محمد وأل محمد
______________________________
بيع سيفك وأشتري أبوزنه الذهب
هجي صار بـأرض كوفان العجب
أنباعت أشراف لبعض يلعنها سائل
و الضماير راحت إبلا يا مُـقابل
_____________________________
جان كلمن عنده سيفه وخاله بغمده أنترك
مامحسب يجي يومه يحارب وما يندرك
هسه اجة ساعة نزاله ولزم لا ما ينترك
لازم يرد التحرك عن مساره او أي شرك

بيع سيفك. صاحو وتركو لحرب
هجي صار. و الأمر كلش صعب
(ذاك سلم هذه ضل بيهم ينازل)
و الضماير راحت إبلا يا مقابل
____________________________
بعد ماوصلت رسايلهم لأبن خير لعمل
أقدم علينا بشيراً يالله كتبوا بالعجل
بلعراق مجنديلك وحنه الك بيت وأهل
ماكو غيرك النه قائد ماكو بس أنته لعدل

بيع سيفك. وأشتري جايك هلاك
هجي صار. للـهرب من هالعراك
(يحلم الرايد يحارب لا يحاول)
و الضماير راحت إبلا يا مقابل
____________________________
لجن ابن زياد باغي ينگط من افكاره سم
غرر النسوان راحت غمدت اسيوف الزلم
كل مره تكل البعلها انطي سيفك واستلم
ذهب لاتصبح فريسه وانت من اهل السلم

بيع سيفك. والوضع اصبح خطير
هجي صار. واحنا لليوگع نَـصير
(تنازلت عن لعقيده شكد جحافل)
و الضماير راحت إبلا يا مقابل
_____________________________
حين طب لهه سفيرحسين بن عقد لوله
هجت وعجت عليه أذيابه رادت تاكله
حسهم ب هذه حقدهم مو ألي كتبو اله
راد يوصل للحسين (يكله رجع القافله)
بيع سيفك. گالو وقر كلذليل
هجي صار. وگال أبد لامستحيل
(مايطخ هيهات للذله يقاتل)
و الضماير راحت إبلا يا مقابل
______________________________
إنأمر مسلم بلرساله يوصل ويعلن سلام
بأرض كوفان واهلهله لحجه يلقيها بؤئام
صار طاعون الخيانه جرح ماله أي لتمام
حاطو اعليه مثل طير وتلتم أعليه السهام

بيع سيفك. لوتموت انته نزيل
هجي صار. وأحنه بلينزل نعيل
(عليك تلتم كلهاا يامسلم شمائل)
و الضماير راحت إبلا يا مقابل
______________________________
ألاف گالتله نحارب لجلك نقاتل جيوش
نطبگ عليهم نخيم مثل علعين الرموش
سيف واحدنه طواريه تضل بيهم تحوش
وجه داره اعليهم وناضر على هيئة وحؤش

بيع سيفك. واشتروا من الجميع
هجي صار. تنجبر تصبح مطيع
(واليبايع مسلم لجوه الرمايل)
و الضماير راحت إبلا يا مقابل
_______________________________
لخادم الحسين ع
ذوالفقار جميل الخفاجي

كل جرة نفس أذكر شبابك
وكل حنة عرس أذكر خضابك
يبني يهون كلشي
لفكدك شاب رمشي
(يمه يمه)
_________________________
كل جرة نفس أسحبهه وأبشهكه
بعدك يلولد شاب أنا وين الكه
يبوطول لحلو لرمضاء إليتحركه
شجاك أتآخرت يايمه عل ملكه

و إمصابك ييمه التعباني
أرجع يلولي موكافي اتاني

أحوبي صرت وأمشي
لفكدك شاب رمشي
..............
كل شاب الأشوفه بيك اشبهنه
و اصيحه يمه يالأكبر وأندبنه
ابد إبروحتك ماكاطعه الضنه
ترد ليه و أرد حبك اجمعنه

و ترد ليه اليالي إلفاكدتها
جن روح أمشت وردت جسدها

فكدك بيه يفشي
لفكدك شاب رمشي
.............
الورده بلايا ماي تموت ماتبقه
وانته الماي الي ونداوة الرقه
تبدي النار دوم بمطرف الورقه
انا بطرف لكبر ولشيب اخذ حقه

آخذ حقه ييمه و كبراني
لحد مامن كثر نوحي عماني

بيه مابقه أي شي
لفكدك شاب رمشي
.............
تمنيتك تلم كبرتي يا للاكبر
عكازي تصير من امشي مااعثر
تلم طولي وتلم عضاي ليه تبر
ييمه وبيك باجر بلقيامه افخر

غيرك ماكو والي عندي يمه
وعطرك يلولد كلساع اشمه

نضري صاري يعشي
لفكدك شاب رمشي
............
احسبلك جنت يا يمه ايام
واضل اكعد يحيلي لمن تنام
اخاف من الهوه ياذيك ضرغام
هسه مو هوه تمر بيك الاسهام

ولسيوف ورماح تمر وسطها
ولجيوش وعساكر موت طبها

صحت لاحزاني دشي
لفكدك شاب رمشي
..........
يشامخ طول ياحلو المحاسن
الك ابكلبي حب ابكد مدائن
شيردك بعد يبن الميامن
تطبر ضهرك بكثرة مطاعن

تمنيت الدموع ترجع المات
جانشفت انا بعيني الصبيات

وياك يروح نعشي
لفكدك شاب رمشي
..........
لخادم الحسين (ع)
ذوالفقار جميل الخفاجي..

من هدم الخيم لومن العلم
جيبلي قطعه
ضلوعي تطشرن مايتجمعن
وجروحي وسعه
(ليا صوب أدير لعين كلهه مجلله)
________________________
خويه زينب
لو كصدتيني من خيمنه تعالي
خويه زينب
جيبي طفله بيهه أشم ريحة عيالي
خويه زينب
صيري جرعه و للشمر لا لا تبالي
خويه زينب
هوه جوه لكاع واحنه إلنه الأعالي

حملي لوناداج ياأخت لخوارج
لا تحاجينه يضل ماله مخارج

(شسوت بصدري نباله حرمله)
_______________________
خويه زينب
لو أجيتي لا تبينين انتي جايه
خويه زينب
ما أريد اهواي تحضر بس عبايه
خويه زينب
وهلعبايه مخصصه ولضعوني رايه
خويه زينب
وداعت الله روحو يازينب سبايه

لا تطيحين بدرب تشبحلج عيون
خلي عينج لرماحه خويه يم عون

(هوايه حملتنه مصايب كربله)
_______________________
خويه زينب
ادري آخر مره تشوفيني وحدي
خويه زينب
باجر اكبال الضعن شوفيني أحدي
خويه زينب
اليوم أيدي وباجر الشمس اعلخدي
خويه زينب
وصي سجادي اريده يصغره لحدي

حته كلي يلمني كبري وأنجمع بي
لحمي لمطشره لحوافر خويه لمي

(زينب ولميلي اديه الناحله)
_______________________
خويه زينب
هذه أبوفاضل ترى حكه علينه
خويه زينب
كبلي ادفنوه هذه كفال الضعينه
خويه زينب
هناك صوب لعلگمي تلكوه ادينه
خويه زينب
حيل يزعل لونسيتوا هم علينه

وتزعل أمي فاطمه وي أم البنين
هذه عباس الربه ويانه سنين

(تبقى عيني عله الجربه هامله)
_________________________
خويه زينب
وليدي الاكبر هم تعرفينه أعلطوله
خويه زينب
شفافه ذبلانه وجثث تلكين حوله
خويه زينب
و يمه عبدلله الي ماشبعان لوله
خويه زينب
ويلي المثلث ذبح حلم الطفوله

القاسم مكتر تشوفينه ب دمومه
عرسه بين رماح وسيوف أعلحومه

(كولو عريس الطفوف لسائله)
________________________
لخادم الحسين (ع)
ذوالفقار جميل الخفاجي.

يعبدلله الولد يبني يمدللول
ما شابع بعد جلمة دللول
عزبت بسهم وبمنحرك نام
عمرك يلولد جم ورده وايام
-------------------------------------
يعبدلله..وأسم الله.. كبل لمن تنام أگعد
عمت عيني..ضوه سنيني..صرت بمهدك اتفگد
يسالفتي..وينايحتي..ويجرحي العمره ماينسد
دحاجيني..ودسليني..الحزن ايامه ما تنعد
يعبدلله تعال الروح خلصت
وأيام الفرح يبني تعدت
بدت بيه الجروح تصل بلعضام
عمرك يلولد جم ورده وايام
------------------------------------
يگلبي انته..الذبل حته.. بغيابك نبضه مو الأول
حسبتك..يجي وكتك..وازوجك بيدي وا أتأمل
لكبر سني.. وجنت ضني..عمرك مني حيل اطول
من عمري..علئ عمرك.. شتريد اسنين الك أكمل
يعبدلله اموتن گبل ماتموت
تمنيتك اليه تشيل تابوت
الحسبته لكبرتي وليك اوهام
عمرك يلولد جم ورده وايام
عمرك يلولد جم ورده وايام
------------------------------------
يعافيتي.. ويحينيتي.. يبعد الروح والجبده
تمنيته.. انه غطيته.. الترب عن لايصل خده
بعد امه..الحلو رسمه.. خلافه النوم ماسده
اعرفنه.. وافهمنه.. جريم وسهمه مارده
يعبدلله اضلمت يايمه دنياي
وحيده وفاجده من بعدك الراي
نومك بلمهد موبين لخيام
عمرك يلولد جم ورده وايام
-------------------------------------
يبسماتي.. ويضحكاتي.. ويبعد الروح والريه
يضنوني.. من عيوني.. اشربك منهن أميه
ماعوفك.. ولاشوفك.. وجهك ذابل وضيه
تضل يمي.. ياحلمي.. واشبع منك أشويه
يبعد أمك تمنيتك بلـضعون
لضمك ياگمر من اليحسدون
الليله اعليك ماتنعد بلف عام
عمرك يلولد جم ورده وايام
--------------------------------------
تقبــلها.. اليزعلــها.. أمك يمشي حـاديها
راسك فوگ.. شاف السوگ.. والنضرات تاذيها
الصلاه يبني.. تضهدني.. بهوادجنا ونـصليها
وشنرتاح.. و الذباح.. صار الگوم واليها
والتبجي دمعها اينشفه السوط
مانشگف ادينا من الجر خيوط
تعودنا وبعد من حسها الأم
عمرك يلولد جم ورده وايام
--------------------------------------
شينسيها.. اليمسيها.. ويصبح بعينها الجتال
لاموهاي.. يبني الماي.. ماخله اعلحالي حال
ياحلمي.. و يا أمي.. عساها بذمته النبال
وياذمه.. للبسهمه.. ثلث شعاب للاطفال
سمالله عليك ومناغاك محلاه
ويوميه الفجر اتسامر وياه
وحسبتك تضل تجايه وحزام
عمرك يلولد جم ورده وايام
----------------------------------
لخادم الحسين ع
ذوالفقار جميل الخفاجي

وداعج يطول وصعب وبهيام ياخيام
بس أنتي لباجر تحمينه
من شمس الله فياي علينه
ياخيام. ياخيام.
__________________________________
هليله موادعنه كبالج نجمه تودع نجمه وتبجي
سكينه تودع عمهه تكله بعدك باجر المن نشجي
لو طرينه أكبال الغربه هيمه مضيعين ومانحجي
عالم ما نعرفهه تكله ثكال حمال علينه ترجي

وإمصايب وبس قهر ولجروح كلهه نوح

وخافن غربه احنه لتحدينه
من شمس الله فياي علينه. ياخيام..
__________________________________
ياخيمه من شموع لقاسم هليله انتي مضويه انوارج
بوسط لهيمه بضلمة وصحره حسبينه اليله خطارج
متبات الحنه وما تبقى لزوم نحنيج من اسوارج
بلورد انعلگ بيبانج و مانمحيه يضل تذكارج

يضل موقفج ذكريات للخلود والصمود

و لجوري بعطرج شمينه
من شمس الله فياي علينه. ياخيام..
__________________________________
ياخيمه احزانج رسميها ماضل اي شيء ويصبح باجر
من هليله رسمي و باجر يتجرح جم خاطر
حسين الهسه بوسطج كاعد باجر منثور من الحافر
باجر غربه حنه تفرهدنه ويسدي عليج نتي الماصاير

مثل الحرك والسلب والخيول بيج تصول

والماصار انتي تشوفينه
من شمس الله فياي علينه. ياخيام..
_________________________________
تذكارج راح بخدمتنا يبقى يضل دوم ويتمدد
قدرج هذه راح انقدره وراح يضل لينه ويتمجد
راح يكرمج الله بخدمه بس مونار وذكرج يصعد
للمشايه فياي تصيري ويلبسونج ثوب الاسود

ثوب الاسود داخلج جن حداد السواد

وحجيي هم راح اتذكرينه
من شمس الله فياي علينه. ياخيام
_________________________________
ياخيمه انتي ماقصرتي وضحيتي ويانه وكفيتي
شكدحاولتي بكل قدراتج حته بنفسج هم ضحيتي
والنار الي تشب اطرافج باجر تجوي اطفالي وبيتي
وماترمحهم مهما صرخوا والدخان يأذي بريتي

واطفال اكو تختنك وتعتثر من لشمر

والظالم باجر يحدينه
من شمس الله فياي علينه. ياخيام.
________________________________
لخادم الحسين (ع)..
ذوالفقار جميل الخفاجي

عطشانه يحسين شو ونته نايم
وجسمك شفت بيه ارماح وصوارم
خويه وبحر ظهر..ردلي خالي المهر
شو ونته نايم
** ** ** ***** ** ** **
يوم العاشر بعاشور من دارت علينا الناس
ناديت بعلو صوتي تسمع خويه يا عباس
هاي الگوم حاطتنا ومشاهد تگطع الانفاس
سوالف شيبت گلبي وشيب منها حته الراس

مابين الأجناب ركضت سكينه
والشامت حذاي ماغضها عينه
وليه دار النظر .. ردلي خالي المهر
______________________________
التمت كل جحافلها وعساجرها عله خيمنه
الشمر ماخله بينه گلوب خويه احسين نشفنه
يرفع راسك اعلينه واحنا من الخيم صحنه
عوف حسين يا ملعون شويه وابتعد عنه

ياخنجر حسين ماينذبح دوم
ورد ويشموه وتتنفسه الكوم
ضل يحز بلنحر.. ردلي خالي المهر
_____________________________
انادي بصوتي المبحوج حسين حسين تسمعني
رد أعليه يبن امي فگدك حيل يضهدني
أصبح فرجه بين الناس والأطفال تتعبني
من خيمه لخيمه اركض وسيوف التعثرني

واعثر واگومن من كثر الاسهام
مشبوگه الرماح بيبان الأخيام
وعيني صوبي النهر.. ردلي خالي المهر
_____________________________
شثگلها حسرة الملجوم والرايح لخوه المات
حزني وحالي مايوصف ولاتكفيه ابد جلمات
سمعت واحد يصيح بصوت المن ذني البنيات
واحد گله اضن لحسين و مبينات علويات

ردينا جم ثار من فحل الفحول
يشگگ مهجتي من اسمعه يگول
بجلمته شگد قهر.. ردلي خالي المهر
______________________________
يريته العاشر ولاهل ولا هالصار حاضرته
اشوفن صدرك موذر يويلي الخيل ساحگته
وارد انظر علئ العباس الراح وما رجع لخته
اوصلله وي ريح الهاب مكتوبي بدمع سكته

وبياهي اخبره ويا ضيم الأحجيه
واصغاري كلفات جا ياهو الاخفيه
طايح علئ النهر.. ردلي خالي المهر
_____________________________
لخادم الحسين (ع)..
ذوالفقار جميل الخفاجي

اللهم صل على محمد وأل محمد
-----------------------------------------
شبكت اديه وحاطتهن فوگ راسي
لمن شفتها ضعونهم حملت ناسي
لا ابوي الكالي يابويه اركبي
وانا متانيته وايدي فوگ كلبي
بلکت يناديني ... بلكت يناديني
_______________________
شبگت اديه و عيني تترسم صور
من الصور حرك المخيم
ضليت اگوم وابجي والطم واعتثر
ودمعي يهل دم
طحت بهل موقف راودني ارسم صوره
بعيني رمله شالت شمعه بس مكسوره
واحلامي تتسولفلي أبالي قصة خيمة
محترگه وبيها ابنيات تطر الهيمه
وحلمي ضل ياذيني ... بلكت ايناديني
** ** ** ** ** ** ** ** **
راسي على الباب انتجه وراح بحلم
وحلمه ذهلني
جن التراجي اتكطعن و عليها دم
وهم خوفني
گبالي رقيه انضر طاحت حيل وتبجي
درفعها الشامت ضل يضحك حيل ويحجي
مافرزنت انا احجاياته بس من گلها
وينه احسينج بلمسبية وضحكت كلها
وسوطه ضل بعيني ... بلكت يناديني
** ** ** ** ** ** ** ** ** **
فزيت وعيني اعلضعونه ضلت تربي
ومشبوحه ضليت
شلت انا اديه للسمه وادعي الربي
شلون ابقى بلبيت
ما اكدر وأحلام الليل اخ تراودني
كل ماردت اغفه لغربه تضل تفززني
وعيني كل لحضه اعلخيامه تاخذ منضر
جن ابلا والي اعلضعونه وغربه التفتر
رايده يحاجيني ... بلكت ايناديني
** ** ** ** ** ** ** ** ** ** **
جنه اشوفنه الضعن عني بعد
رايح بلاحباب
وحدي بقيت امرمره مايمي احد
بس عتبة الباب
اجروحي والام فراگي انا الماتركتني
ماتركتني لحضه وحده وماعافتني
كل تفكيري عليهم باقي يم خيمتنه
وعمي العباس وعبدلله ويم عمتنه
شوفته ترويني ... بلكت يناديني
** ** ** ** ** ** ** ** ** ** **
ضل بذني ينعاد الصده من حملو
وناده خواتي
صدليه وبنضرة حزن لمن مشو
وبيدي عباتي
من ايدي طيحت اهدومي او وجهي تلون
كل دمعه الطاحت من عيني بلكاع اترن
ماوكفن دمعات عيوني نهر يصبن
حته اهدومي من دمعاتي كلهن نكعن
لوحدي مخليني ... بلكت ايناديني
____________________________
الخادم الحسین (ع)
ذوالفقار جميل الخفاجي..