ولادة امير المؤمنين علي عليه السلام

ما لايك لغيرك علي تاج الزعامه
بيعة شرف بايعتك ليوم القيامه
بهاي الولاده
نور وسعاده
...............

من عالم الذر ياعلي عاشگتك الروح
ياحيدر لحبّك فقط دلّالي مفتوح
مسموح احبك اي نعم غيرك ممسموح
ابميلاك الليله العطر من گبرك يفوح

حبيتك هواي
يالعايش وياي
لكل مؤمن وكل مؤمنه حبك علامه
بيعة شرف بايعتك ليوم القيامه

..............

بالكعبه نورك من سطع ضوّه السموات
مثلك يحيدر ينولد بالكعبه هيهات
الله اصطفاك ورادك بهاي الكرامات
بيك انتصر دينه وثبت رغم المعاناة

رادك وليّه
تنصر نبيّه
يالوارث علوم النبي وصفه وكلامه
بيعة شرف بايعتك ليوم القيامه
..............

بهاي الولاده الطاهره جيتك يمولاي
اعـلن ولائـي وحبك المالكني ويّاي
الراي الرايك سيدي وماعندي اي راي
احسبني خادم قنبرك وتشرف بهاي

حبك نجاتي
صومي وصلاتي
گلبي ابمحبتك ياعلي يعلن هيامه
بيعة شرف بايعتك ليوم القيامه
............

يابالحسن نورك سطع وتنوّر الكون
من حگي اعشگك وفتخر بيك آنه مجنون
ما همني عدواني الحچوا خلهم يلومون
آنه بغرامك ياعلي من زغري مفتون

گلبي الملكته
لسمك وهبته
سُبحانه مَن بيدك جَعل كونه ونظامه
بيعة شرف بايعتك ليوم القيامه
...............

هذا آنه بايعتك علي وماعفتك بيوم
شوفة ضريحك انسعد وتزيح الاهموم
ختم الولاية امن الازل بگليبي مختوم
وجهك مثل وجه البدر بعيوني مرسوم

اسمك شفائي
يسري بدمائي
متمسّك بدربك علي درب السلامه
بيعة شرف بايعتك ليوم القيامه

سيد زيد الفحام
________________________________________

هوسات لمولد امير المؤمنين عليه السلام


اجت ام الإمام وصلت الكعبه
نشقلها الجدار بأمر من ربه
بيت الله فقط بس فاطمة اطبّه
( طبت وبحيدر حيّاها )


ابّطن الكعبة ولدت فاطمة حيدر
خصّه بهالكرامه الخالق وقرر
بس حيدر علي بهذا الأمر يُذكر
( شرّف كعبتنة بميلاده )


نولد بالكعبة ساجد حيدر الكرار
يسبّح بسم ربه الخالق القهار
من وجهه الشريف تشعشع الانوار
( ساجد ويرتل آياته )


من بعد الثلاث ايام بيها شهود
طلعت بت اسد من كعبة المعبود
مولود باديها وحيدر المولود
( تتباها بحيدر فرحانه )


واحنه بمـولــد الكـرار فرحـانين
نصبنه المحفل بميلاده مجتمعين
نهنّي المنتظر حامي الشرع والدين
( مو غايب حاضر ويّانه )


نهني بمولد الكرار مرجعنه
نهوسله ونريده اليوم يسمعنه
ياسيد علي لولاك چا ضعنه
( وبحشدك منصورة الشيعة )


اسست الحشد بيدك ياابو الطيبات
ورجال الحشد فزعوا داسوا الصعبات
ذلّوا داعش ودگوا للنصر رايات
( تتراجف منك خلوها )


سيد زيد الفحام

افراح شعبان

شعبان هل نور وفرح ونتشرت اعياده
نبعـث تهـانـي للنبـي بميــــلاد اولاده
ياهلا ياهلا. شعبان الافــــراح
ياهلا ياهلا. گلب المحب صاح
..........

هلّت ونتشرت بالدنيا. انوار لبني طه
بشعبان الموعد محلاها. خمس انوار شفناها
اول مَن اشرق ميلاده. حسين بنوره ضوّاها
بثالث شعبانه. ميعاده فرحه ورحمه ويّاها

مولد ابو الأكبر بزغ هاي المسيه
نبعث تهاني بمولده لَمّه الزجيه
من وجهه كل دار
تسطع بالانوار
حسين الحبيب ومولده اجمل هديه

ننصب محافل للفرح والشيعه فرحانه
بالفرحه املاك السمه فرحانه ويّانه
ياهلا ياهلا. شهر الفرح لاح
ياهلا ياهلا.    گلب المحب صاح

.....

برابع. ايّامه. نَوّرنه عباس وسطع نوره
بمهده ويتحمّس للرايه. من عاينها منشوره
فرحت بي امه. وتشمّه. وملاك السمه تزوره
زينب. بالكافل. ووصافه. هاي الليله مسروره

عباس هالليله انولد راعي الكفاله
والمرتضه قَبّلهن يمينه وشماله
چفّينه والعين
مذخوره لحسين
يكفل خواته بكربله بعزّه وبساله

عباس ابوالغيره انولد خل تفرح احبابه
باب الحوائج كل زمن ما ينغلق بابه
ياهلا ياهلا. بمحبوب الأرواح
ياهلا ياهلا. گلب المحب صاح
.........

واجب. بالمولد. نفرحله. للسجاد ابو الرحمه
هادي بمنهاجه. وفكاره. الله اختاره للأمه
رابع. بالعتره والعصمه. ونخط بالعرش اسمه
وارث اسراره. وعلومه. منّ حسين ابواليمه

زين العباد ابمولده ضوّه المدينه
مثل الشمس خير وكرم اشرق علينه
نبع الكرامات
ضوّه السماوات
ننثر ورود بمولده ونفرح اجينه

السجاد هذا البي شبه من جده بوصافه
يشبه مُحمّد بالوصف يشهدله مَن شافه
ياهلا ياهلا. حزن الگلب راح
ياهلا ياهلا. گلب المحب صاح
..........

فرحه. عشناها. محلاها. للأكبر علي هيه
تسطع من وجهه ماتطفه انواره السماويه
يشبه بالصوره. والنظره للهادي ابمعانيه
الأكبر. من مهده. حد موته. كل افعاله قدسيه

بالطف علي الأكبر رسم نهج البطوله
ضحّه بحياته ومتثل لله ورسوله
نفخر ذكرناه
ما ننسه والله
حتى الشمس من شافته صارت خجوله

يالتسأل المن هالفرح للأكبر الغالي
ما ينمحي اسمه ويظل عنوانه للتالي
ياهلا ياهلا. عطر الورد فاح
ياهلا ياهلا. گلب المحب صاح
...........

آخر. فرحتنه. جمعتنه. للمهدي وعناوينه
اشرق مولوده والذِكِره. طشّت بالفرح بينه
محفل والفرحه. نعلنها. ونقدم تهانينه
حبنه. وطاعتنه للمهدي. نكتبهه بأيادينه

هالليله للمهدي الفرح يحله بسمانه
ارض وسمه والكل اجه يفرح معانه
عندك يموعود
تحت ايدك جنود
يمته الفرج ياسيدي نرفع اذانه

يالمهدي اظهر سيدي تنتظرك الشيعه
حان الوعد امرك وجب عالعالم انذيعه
ياهلا ياهلا. يامشفي الاجراح
ياهلا ياهلا. گلب المحب صاح


سيد زيد الفحام
__________

مولد الامام الحسين عليه السلام

انت الحبيب الغالي. يا ابا عبدالله
غيرك فلا يحلالي. يا ابا عبدالله
شكراً يمولاي
حبيتك هواي. يا ابا عبدالله
.................

نبض الگلب بسمك تدگ نبضاته
حبك قريته وحفظت آياته
شهر الفرح شعبان يامحلاته
ايّامه تزهي بنورك وساعاته

بميـلادك وافــراحه يا ابا عبدالله
كل شيعتك مرتاحه. يا ابا عبدالله
يالعايش وياي
حبيتك هواي.             يا ابا عبدالله
.................

اجمل عشگ طول العمر حبيته
هذا العشگ وسط الگلب ضمّيته
عشگك يبوالسجاد طاهر صيته
توئم دليلي من زغر سمّيته

حبك مشه بشرياني. يا ابا عبدالله
ما عندي غيرك ثاني. يا ابا عبدالله
وتفاخر بهاي
حبيتك هواي. يا ابا عبدالله
.................

امي وابويه لخدمتك نذروني
بحبك حبيبي من زغر ربّوني
نبض الگلب انت وضوه لبعيوني
اجمل اسم خادم الك سموني

بميلادك افرح واجب. يا ابا عبدالله
يا اغله وجمل صاحب. يا ابا عبدالله
ونطيتك الراي
حبيتك هواي. يا ابا عبدالله
.................

محلاها ليلة مولدك محلاها
وجهك بدر شع بالسمه وضوّاها
هاي المحافل بالفرح عشناها
فرحة واناشيد الفرح نقراها

فرحتنه بيك الليله يا ابا عبدالله
وراعي الأمر ندعيله. يا ابا عبدالله
تشهدلك عضاي
حبيتك هواي. يا ابا عبدالله
.................

هالليله جينه لفاطمه انهنّيها
بميلادك وننصب محافل بيها
نهنّي النبي وحيدر علي حاميها
ورب العرش انزَل سلامه عليها

ام الحسن فرحانه. يا ابا عبدالله
وبمـولـدك سهرانه. يا ابا عبدالله
يالحبك دواي
حبيتك هواي. يا ابا عبدالله

#سيد_زيد_الفحام
________________________________

مولد ابا الفضل العباس عليه السلام

احله الليالي
بسمك يغالي
يابوفاضل مولدك نور وسعاده
............

يابالفضل من حضرتك هبّت نســـايم
نسمة فرح وتعطّرت منـها العــــــوالم
تعلن ولادة هاشمي بـدر الهـــــــواشم
شايل لواء المرتضى وحامي الفواطم

برض المدينة
اشـرق علينة
وجهك وضوّه الارض نور الولاده
...........

من مهدك يشـع الضوه ويرسل رساله
انت السنـد لبن النبـي وراعـي الكفاله
تشبه علي حامي الحمه وارث خصاله
رادك علي لطف كـــربـله توگف بــداله

درع المنية
لبن الزجية
تنصر ابن المصطفى ساعة جهاده
............

يابالفضل بيك ابتشر حامي الحميه
رادك لبوالاكبـر سنـد بالغـاضــــــريه
حقق مراده بمـولـدك رب البــــــريه
قَبّل چفوفك بالمـهـد وضّح قضيــه

معنى الاخوّه
بچفوفه ضوّه
والله يالتشبه علي ذكرك عباده
............

لم البنين الطاهـــــرة نبعـث تهـاني
غايتها انت ومولدك احله الامــاني
يابالفضل ولشوفتك تحسب ثواني
فرحانه وتنادي بفرح عباس اجاني

نورك غمرها
فرحة عمرها
ابيت الامامه مولدك بيت السياده
................

خدامك احنه عله العهد ننصب حفلنه
بميـــــلادك وننثـــــر ورد ولتـم شملنه
ياكافـل اختـك سيــــــدي چفك كفلنه
مـو بالعمـــــل يوم الحشـر حبك املنه

بـدر العشيره
ماصح نظيره
بالطف يكافل موقفك قوة واراده

#سيد_زيد_الفحام
__________________________________

مولد سيدنا وامامنا وقائدنا الامام المهدي عجل الله فرجه الشريف

نسهر ونفرح سويه. بالولادة المهدويه
راحه وفراح. والحزن راح
بالولادة المهدويه
.............

الليله من احلى الليالي نصف شعبان
أنـولـــــد مهدينــه بيها والفــرح حان
نفـــرح ونبعث تهاني وننسه الاحزان
بالمهــد مهدينـه ساجد يقـــره قــرآن

بالوصف يشبه نبينه. يسطع النور بجبينه
عطره فوّاح.   والحزن راح
بالولادة المهدويه
.............

مـولـد المهـدي مُحـمّـد صاحب الثار
فرحت الشيعه وفرحها ضوّه كل دار
مـولـد بكـلّ العـــــــوالم مثله ما صار
بكربـله تحله الزيـــــارة تزهي الانوار

نشعل شموع الولاده. بالصحن تحله العباده
بالگلب لاح. والحزن راح
بالولادة المهدويه
.............
الليله نفرح والنواصب خل يموتون
ما يگــدرون عله حبنه ما يگــدرون
الليله بفـــــراح وتهاني نگلب الكون
نقهر گلوب الاعـــــادي من يشوفون

نفرح ونشعل شمعنه. بمولد المهدي انجمعنه
فرحت ارواح. والحزن راح
بالولادة المهدويه
.............

بصحـن ابواليمه فرحنــه يحـله ياناس
وتحله هوســات الولاده بصحن عباس
يبقـه اسم المهـــدي راية وتاج عالراس
وجهه مصبــــاح الهداية وحبه نبــراس

ننتظر ساعة ظهوره. يملك الدنيا بحضوره
همنه ينزاح. والحزن راح
بالولادة المهدويه
.............

نبعث ايات التهاني الاحمــدية
للأمام العسكـري وامه الزكيــة
نرجس الحرّة الوفية الفاطميّة
انباركـــــلهم بالولادة المهدوية
مولد المهدي املنه. نفرح ويلتم شملنه
تشفه الاجراح. والحزن راح
بالولادة المهدويه

سيد زيد الفحام
_______________________________________

مولد الامام المهدي عليه السلام

يالمهدي. ياعشك روحي
يالمهدي. بلسم جروحي
حبيتك... واليتك..... يبن الزجية
...........

حبك اليسري بوريدي هوه روحي وديني
بعــالم الـذر وعشگتـــه من گبل تكوينــي
ياحـلاة الحُـب يمهـــدي بينـك ومابينــي
لعمـرك الغالي يمهـــدي فدوه كل سنينـي

لعيونك. عيني سهرانه
لعيونك. فـدوة دنيـانه
هنّيتك.... واليتك..... يبن الزجية
...........

آني لو انسـاك لحظـة انـت ما تنساني
من زغـر سني لوفاتي عينك الترعاني
يالحنين بكل صفاتك عايش بوجداني
دوّرت يالمهدي غيـرك ما شفتلك ثاني

يالواحد. ماكوبوصافك
يالواحد. والگلب شافك
حسّيتك...... واليتك..... يبن الزجية
...........
الليله اطشّ ورود وفرح ياعشك دلّالي
وشعل شمــــوع الولادة مولدك يالغالي
جيت اجددلك عهـودي والعشك يبرالي
ما اعوفك يشهــــــد الله عالعهد للتالي

محبوبي. جنّة ميلادك
محبوبي. حلوة اعيادك
شمّيتك..... واليتك..... يبن الزجية
...........

فرحت الشيعــه يغالي بمولــدك وفراحه
الدنيا والاكـوان تزهي من يشع مصباحه
الراحة بس وياك حلوة ماكو بعدك راحه
الليله جبرائيـــــل ظلّل عالحفل بجناحه

مجنونك. خل يسمّوني
مجنونك. خل يلوموني
واسيتك...... واليتك..... يبن الزجية

#سيد_زيد_الفحام
________________________________________

ولادة الامام الحسن المجتبى عليه السلام

افرح وهنيك مولاي الحسن
افرح وهنيك مولاي الحسن
......

بميلاك تهنّيت. للمولد تعنّيت. ابعث تهاني
حبك سكن بالروح يابلسم المجروح. حبك ضماني
اي يالحسن اهواك. لا والله ما انساك. اسمك هداني

وتعلّقت بيك. مولاي الحسن
افرح وهنيك مولاي الحسن
.......

ليلة نصف رمضان. بيها الفرح عنوان. بسمك يغالي
بدر المحاسن لاح. ونتشرت الافراح. احله الليالي
ياوارث الاسرار. من حيدر الكرار. نورك يلالي

بسنيني افديك. مولاي الحسن
افرح وهنيك مولاي الحسن
..........

يافرحة الزهراء. اعلنها بالاجواء. صرخة ودادي
اهوه الحسن مبخوت. بالمولد بهالصوت. كلمن ينادي
واني بغرامي وياك. طول العمر اهواك. هذا اعتقادي

بالروح اخليك. مولاي الحسن
افرح وهنيك. مولاي الحسن
.........

يا آيه الرحمن. يا قلعة الايمان. وارث مُحمّد
هذا الحسن مولاي. واليته من صباي ياربي اشهد
بميلاده انطي عهود. ما انسه راعي الجود. والحب تجدد

دمعاتي ترثيك. مولاي الحسن
افرح وهنيك مولاي الحسن

سيد زيد الفحام
_______________________________________

قصيدة في ولادة الإمام الحسن المجتبى عليه السلام


الليله محلاها. بيها نتباها
ليلة النص من شهر رمضان ميلاد الحسن



الليله اعظم ليلة عدنه وللفرح جينه
وجه أبو محمد تلاله واشرق علينه
ياگـمـر ما ردنـه نورك نـوره يكفينه
للحسن تحله التـهانـي ويمّه خلّينه
من وهج خدّه. يشبـه لجـدّه
مثله وبروعة بهائه والله ما شاف الزمن



( طلـعَ البـدرُ عَليَنــا ) شـعّـت انواره
جَلَّ من ابـدع جـمـاله وكوّن اسراره
الحسن هذا وعالعوالم طشّت اخباره
الليله جبـرائيـل نـازل جايب ابشـاره
لفاطمة وحيدر. بالحسن بَشّر
فرحه وورود الولاده ليله كلهن فتّحن



واحنه للمحفل اجينه نبارك الزهره
طابت السهره علينه نشارك العتره
يالحسن صحنه ودعينه ردنه بس نظره
ياكريم واحنه فقره تكفي بس مرّه
يالعشت بينه. نظره تكفينه
للبقيع وللمدينه كل محب گلبه يحن



يشبه الهادي مُحمّد وارث اوصافه
تترس الدنيه محبّه بسمة اشفـافه
ياالـف هنيـاله كلـمـن كلّمه وشـافه
گلبي من يوم العرفته والله ماعافه
بالمهد يزهر. درّة الكوثر
تزيّنت من نور وجهه واشرقت جنّة عدن



بشهر رمضان الله راده وخلّه ميلاده
شـرّفـه وثـانـي الأئـمّـه عالخلگ راده
الحسن نور الباري نوره بجوده ومجاده
من رسـول الله تـفــرّع سيّـد السّــاده
تشهد الآيه. بفضله والغايه
تشـرح تبيّن مقامه هالأمـــام المـؤتـمـن



يالله ياشيعه بحلفكم فرحوا هنّوله
للحسـن بثّوا التـهـاني ورده اهدوله
سَمعـوا للمـولـود منكم احله هلهوله
والإمام المهدي حاضر فرحوا ودعوله
حاضر المهدي. يافرح ابدي
يا الهي فرّج لساعة ظهور ابن الحسن


سيد زيد الفحام
_________

السلام عليكم ورحمة الله وبركاته

خدام الحسين عليه السلام
اليكم قصائد #عيد_الغدير

ابوذيات لعيد الغدير الأغر

عشِگنه لحيدر وحبنه. وهوانه
علي برواحنه ودمنه. وهوانه
امام علينه منّ الله. وهوانه
شفيع ومنقذ بيوم المنيه
.....

علي الله اصطفاه النه. وعاده
خسر كلمن نكر حبّه وعاده
رجع عيد الغدير النه. وعاده
وفرحنه بحب علي هاي المسيه
......

علي نفس النبي وسمّاه. خِلّه
ولوما حب علي بالدين خِلّه
كمل يوم الغدير ونور خَلّه
على الاسلام حب حامي الحميه

سيد زيد الفحام
________________________________&

#عيد_الغدير

#بلّغ_يامُحمّد

نزل قران يمدح احله شخصيه
نفس طه النبي بالفعل و النيه
بلّغ يا مُحمّد صرّح القرآن
نصّب حيدر وامدح معانيه
لا تخشه اليبغضك ربك يحاميك
بلّغ وشرح الخطبه الغديريه
الا من كنتُ مولاهُ علي مولاه
اهتف يا مُحمّد وقره يوميه
اذا ما بلّغت ما يكمل الاسلام
ناقص يبقى بحكام السماويه
إلا بحب علي ما ينقبل اي دين
يكمل دينك بحبه ومساعيّه
امتثل لله طه ونصّب الكرار
رفع ايده وهتف بالناس واعيّه
الا من كنتُ مولاهُ علي مولاه
واليرفض علي بالنار تاليّه

(((((( صلوات))))))

سيد زيد الفحام
_________________________

#عيد_الغدير

مو توني ياهالناس واليته
من عالم الأرواح حبيته
ولمن صرت بالدنيا بايعته
***

من عالم الذر يابشر حيدر عشگته
يشبه مُحمّد بالوصف شفته وتبعته
روحي اشتهت حبّه وهمت بسمه وندبته
ولمن صرت اول عشگ بگليبي شلته

اسمعها امي ياعلي تلولي
وهلي بعشگهم عنه يحچولي
منّ المهد لليوم ما عفته
ولمن صرت بالدنيا بايعته
***

بايعته عالفطره وصحت حيدر امامي
من زغري وندب ياعلي اول كلامي
آنه ابتديت بحب علي وبسمه ختتامي
گلبي اليدگ ينبض علي عشكي وهيامي
هذا العشگ من گلبي ولساني
عاشگ علي ومابايعت ثاني
روحي وحياتي وعمري سلّمته
ولمن صرت بالدنيا بايعته
***

حبهم علي وحبوا علي الله ورسوله
للهادي بس حيدر سند غيره ورجوله
لوما علي ما ينتصر دينه بسهوله
ثبّتهن بسيفه علي فروعه واصوله

يحمي الرسول بكل حرب سيفه
ما عافه لحظه بيقضته وطيفه
مثل النبي نفس الوصف شفته
ولمن صرت بالدنيا بايعته
***

تگول الرواية المسنده في محتواها
بموضع غدير الخم رسول الله حچاها
لمن رفع چف حيدره بچفوفه طه
نصّب علي والكل سمع صوته ورواها

كلمن يوالي علي والاني
كلمن يعادي علي عاداني
بأمر الله ياهالناس نصّبته
ولمن صرت بالدنيا بايعته
***

غصباً على المايقبل ويبغض ولينه
بس حيدر تنصّب ولي وارث نبينه
احبابه احنه وشيعته انبايعله جينه
ننصب محافل للفرح ونمدله ادينه

جبنه الورود وجينه للحضره
انبايع علي ونفرّح الزهره
عيشو الفرح حان الفرح وكته
ولمن صرت بالدنيا بايعته

سيد زيد الفحام
____________________________________