السلام عليك مولاي ايهاالحسن الزكي يبن رسول الله


جنة جنة جنة. حبك حبيبي جنة
يالحسن يالغالي. عايش بدلّالي
حبك حبيبي جنة
🌸🌸🌸🌸🌸🌸

خلهـم يلـومـوني انت نور عيوني
يالحسن ماعوفك. عاشگك يدروني
يالحسن حبّيـتـك بالگلب ضميتـك
خـادمـك وتبــاهـا گلبي صاير بيتك
شوفه شوفه شوفه. گلبي بغرامه شوفه
عـاشگــك للتــالي. عـايـش بدلّالـي
حبك حبيبي جنة
🌸🌸🌸🌸🌸🌸

يالحسن مجنونك. حاء سين ونونك
بالگلـب مطبـوعـة. اي وحگّ عيونك
اهلـي مـن ربّـونـي لخدمتك نذروني
ياحبـيبـي وروحي. خـادمـك سمـوني
غايه غايه غايه. انت الأمل والغايه
منهجك يحلالي. عـايش بدلّالــي
حبك حبيبي جنة
🌸🌸🌸🌸🌸🌸

انت تاج براسي. اغله من كل ناسي
اشعـر بلمسـاتك. سارية بـأنـفــاسـي
يالحسن محبوبي. شمعه تضوي دروبي
حبــك اليمحيــها. مـاتظـلّ ذنـوبــي
بسمه بسمه بسمه. بشفافي انت بسمه
يالمقامك عالي. عايش بدلالي
حبك حبيبي جنة
🌸🌸🌸🌸🌸🌸

فرحتي ابميلادك. يالحسن وعيادك
كتبـه هـاي الليلـه. اسمي وي وفّادك
والله عيدك عيدي. عـاشـگ وترديدي
للتـهـــاني الليــله. وردة جايب بيدي
فرحة فرحة فرحة. هالليله نور وفرحة
ماتفــارگ بالـي. عايش بدلالي
حبك حبيبي جنة
🌸🌸🌸🌸🌸🌸

ليـلتـك نضـويـها. بالفــرح نحييـها
بمـولـدك يالغالي. فاطـمــة انهنّيـها
يالحسن سهـرانه. فاطمة وفرحانه
تـنـظـــر لأنـوارك شــالتـك مـولانه
آية آية آية تقره لوجودك آية
الله رادك والي. عـايـش بـدلالــي
حبك حبيبي جنة

خادم الإمام الحسن المجتبى عليه السلام
سيد زيد الفحام
_________________________________

لولادة الإمام الحسن المجتبى عليه السلام


يالمجتبه مولانه. حبـك كبـر ويـــانـه.
بالمـولـد بهالليله. كل شيعتك فرحانه
🌻🌻🌻🌻🌻🌻

هالليله وجهك يالحسن شع نوره
دنيـه وسمـه بر وبحـر مســروره
بشهر الله رايـات الفـرح منشوره
ورود الـولادة بالـفــرح منـثــوره
نعلنها هاي افراحك. مية هلا بمصباحك
معنه الكرم والطيبه. بيـك نولـد عنـوانه
🌻🌻🌻🌻🌻🌻

هالليلـه امـك فـاطمــة انهنّيها
يالمجتـبـه بميـلادك أنحيّـيــها
اجمـل تهـاني لفاطمــة نهديـها
هيه الشفيعـه بالحشــر ندريـها
فرحانه بت الهادي. واحنه بفرحنه انّادي
بمحبـتـك يالغــالي. بيوم الحشر منجانه
🌻🌻🌻🌻🌻🌻

هالليلـه يامحلـه الفــرح بالمجتبه
اصل الكرم هذا الحسن جود وابه
متورث اوصـاف النبـي منّ الصبه
بحضان جده المصطفه صار وربه
اسمه الحسن محلاته. شمرة علي شمراته
بحجر امه يزهر نوره. ماينوصف احسانه
🌻🌻🌻🌻🌻🌻

هالليله نورك يالحسن شع بينه
لدرب الهـدايـة والعـدل يهدينه
نحييـها فرحـة مولدك هالجينه
ماجينـه لو ما مـولـدك ماجينـه
ينطقها دوم الساني. انت الإمام الثاني
كل مؤمن بلا حبك. مايكتمـل ايمـانـه
🌻🌻🌻🌻🌻🌻

نحييـها يبـن المصطـفــه ايــامك
احنه ونضل طول العمر خـدامك
انت الولي وحسبنه احنه ايتامك
يالمجتبـه يامحله عطـر انسـامك
يالمجتبه محبوبنه. انت وتضل بگلوبنه
حبك يدور ابدمنه. مـن الزغـر غــذانـه
🌻🌻🌻🌻🌻🌻

لـو گطّعـونه بحبـك وذبـحــونه
منعـوف حبـك يالحسن يدرونه
هـذا الشعـار وخلهـم يسمـعـونه
بيك الروافض يالحسن مجنونه
يالمجتـبـه للتــالـي. نحبك نظل يالوالي
غالي وتظل يالغالي. اصل الكرم وحسانه

خادم الإمام الحسن عليه السلام
سيد زيد الفحام
____________________________________

ابوذيات لولادة الإمام الحسن المجتبى عليه السلام


الحسن ضوّه الأرض والكون من صار
بجماله وهيبته عله الناس. من صار ؟
اليحب المجتبه وبهواه. من صار
يشفعله الحسن شبل الزچيـــــه



الحسن طِيب وكرم وخلاق. وحسان
اشعـر بالگـلـب مـوجــود. وحسان
اجي بميلاده واجب هاي. وحسان
اقدمله الورد بچفوف اديـــــه



الحسن مثل البدر بالليل. ينشاف
بحــر للجـود لا هيــهات. ينشاف
اذا گلبـي انفتـح للنــاس. ينشاف
يدگ بسم الحسن صبح ومسيه



الحسن يشفي الگلب ويزيل. مرضاه
وذا ينسه الحسن لحضات. مرضاه
اجيـت بمـولـده وحضيـت مرضاه
لإن بالفرحه شاركت الزچيــــه



گلبــي ابمـولــد المحـبــوب ورّد
احــيّـي اليحضــر المـولـود. ورّد
وسلّــم عالحســن مــــولاي. ورّد
اكيد من الحسن يرجع عليــــه

خادم الإمام الحسن المجتبى عليه السلام
سيد زيد الفحام
________________________________

هوسات لمولد الإمام الحسن المجتبى عليه السلام


بفجر خامس عشر من شهر رمضان
انولد نور الحسن وستبشر القرآن
فرحت فاطمة وزدهرت الأكوان
( وستبشر حيدر من شافه )
🌹🌹🌹🌹🌹🌹🌹🌹🌹🌹.

اجه لبنته النبي لمن سمع بيها
تعنّه لدارها ورايد يهنيها
وستبشر فرح لمن وصل ليها
( من شاهد اوّل اولاده )
🌹🌹🌹🌹🌹🌹🌹🌹🌹🌹.

شال الحسن بيده المصطفه وناغاه
بأمر الله الحسن طه النبي سماه
تشهّد بالشهاده ابمهده من حاچاه
( بچفوف الهادي يشع نوره )
🌹🌹🌹🌹🌹🌹🌹🌹🌹🌹.

من وجه الحسن وجه البدر خجلان
تسطع من جبينه غُرّة الإيمان
جمال الشايله ماشاله اي انسان
( ضل صافن يوسف من شافه )
🌹🌹🌹🌹🌹🌹🌹🌹🌹🌹.

منبع للكرم والجود عنوانه
الليله بمولده الأملاك فرحانه
لعيون الحسن چم عين سهرانه
( يامحله السهرة ابميلاده )
🌹🌹🌹🌹🌹🌹🌹🌹🌹🌹.

ابميلاد الحسن يامحله لمّتنه
نهنّي الزهره والكرار غايتنه
ابفرحتهم حيينه اليوم فرحتنه
( وورود المولد جبناها )

خادم الإمام الحسن المجتبى عليه السلام
سيد زيد الفحام
________________________________

صلوات صلوات عالمجتبه والينه


وجه الحسن هالليله يسطع نوره
ارض وسمه بر وبحر مسروره
مشكوره ياام الحسن مشكوره
مناجات مناجات بسم الحسن ناجينه
🌼🌼🌼🌼🌼🌼🌼🌼🌼🌼

بحجر الزچيه شعشعت انواره
للمرتضه وللزهره احله بشاره
الله ونبيه عظموا اسراره
روايات روايات تذكر صفاته ودينه
🌼🌼🌼🌼🌼🌼🌼🌼🌼🌼

ماينوصف نور الحسن محلاته
يوسف تجنن من نظر وجناته
حته البدر خجلان من نظراته
علامات علامات شايلها من هادينه
🌼🌼🌼🌼🌼🌼🌼🌼🌼🌼

هالليله سهرت فاطمه وفرحانه
فرحت ببنها وعالحسن سهرانه
لخدمتها جبرائيل مد جنحانه
كرامات كرامات يحملها من بارينه
🌼🌼🌼🌼🌼🌼🌼🌼🌼🌼

وحنه بحفلنه نفرح بميلاده
جينه وحضرنه للحسن وفاده
نقدم تهاني بمولده عالعاده
هتافات هتافات بسم الحسن علّينه
🌼🌼🌼🌼🌼🌼🌼🌼🌼🌼

زواره احنه وشيعته واحبابه
باب الحوائج بابه وندگ بابه
لعيونه فدوة ارواحنه ولترابه
حكايات حكايات حب الحسن تهدينه

خادم الإمام الحسن المجتبى عليه السلام
سيد زيد الفحام
_________________________________

قصيدة في ولادة الإمام الحسن المجتبى عليه السلام


فديتك مهجتي وعمري .. اصيح وفرحتي بصدري
احبك يالحسن تدري .. احبك يالحسن تدري
💚💛💚💛💚💛

الك مـولاي يالغــالـي فـديـت الروح
أنه الولهان وعشگتك عشگ مفضوح
عهد يالمجتبه الغالي
اظـل ويّـــــاك للتالي
عشت بحماك يالحبك يداوي جـروح
الگلب يهـواك فك بابه الـك مفتـــوح
مقامك يالحسن عالي
إلاهــك نـصّـبـك والي
عشگ حبّيتك بزغري .. رضيت وسلّمت امري
احبك يالحسن تدري .. احبك يالحسن تدري
💛💚💛💚💛💚

بشهر رمضـان ميـلادك سطع عالكون
تشـع انوار من وجـهـك وسيع عيـون
جمالك يالحسن وحدك
مثـل وجـه النبي جدك
فقت درجات عن يوسف جمـال ولون
وگف مذهول من شافك صبح مفتون
صفات المصطفه عندك
تكـلّم فـاطـمـة ابمهـدك
عشت يالمجتبه بفكري .. غرامك بالگلب يسري
احبك يالحسن تدري .. احبك يالحسن تدري
💚💛💚💛💚💛

أنه المجنون وبحبّك همت مولاي
فلا انساك من زغـري عشت ويّاي
وجـيـت الليله للمولـد
عبد وبحضرتك اسجد
ملكت الروح لا اكثر جميع اعضاي
بغلات النور والنسمه بغلات المـاي
لساني بأسمك يردد
ربيـعـك بالگلب ورّد
اجيتك والهوى بظهري .. لزم شوگ الگلب صبري
احبك يالحسن تدري. .. احبك يالحسن تدري
💛💚💛💚💛💚

جـبـت ويّـاي اشـواگي ورود وياس
اهنّي اليــوم بالمــولــد اعـز النـاس
اهنّي فاطمه وحيدر
يغالي وبالفرح اسهر
وجودك نور حسّيته غمرني حساس
عطر شمّيت من عطرك عله الانفاس
برضـاك المـولـد اتعطّر
اعرفك يالحسن تحضر
طفيت بلذّتك جمري .. مزجت بمولدك عطري
احبك يالحسن تدري .. احبك يالحسن تدري
💚💛💚💛💚💛

الحسن مولاي يالوجهك يشع انوار
بشــارة خيـر للـزهــره وعـلي الكرار
يفرحت فاطمه الزهره
بوجودك طابت السهره
نـطـشّ ورود بالمـولـد نـثـرنه ازهـار
شعلنه شموع يالغـالـي الـك كـل دار
قصيدة بمولدك نقـره
حضرنه نشارك العتره
نـريــد المادره يدري .. عشگناك بعشگ فطري
احبك يالحسن تدري .. احبك يالحسن تدري
💛💚💛💚💛💚

حبيبي وبيك اتباها يبحر الجود
احبك موت يالغالي بلايه حدود
اريــد الكل يسمعـوني
هديتك گلبي وعيوني
الك مولاي كل لحظه غرامي يزود
اخــذ نـبـضــات دلّالي عليّة شهـود
يدگ بسمك نبض گلبي
يتـرجـم عـن كبـر حبّي
دخيلك لو خلص عمري .. اريدك تحضر بگبري
احبك يالحسن تدري. .. احبك يالحسن تدري

لحن القصيدة ملا باسم الكربلائي
علي يااغله كل غالي

سيد زيد الفحام
__________________________________

قصيدة في ولادة الإمام الحسن المجتبى عليه السلام


عاشگ وهواك. بالروح ألگاك
يبن الزهراء. هيهات انساك
💜💛💜💛💜💛

يالحسن حبـك بالگـلـب لگيته حبيبي
عهدي العقدتّـه وياك مانسيته. حبيبي
وگلبي الملكته بحبك وخذيته حبيبي
بالمـولــد الّليله الـك هـديتــــه. حبيبي
ليـلة افـــراح. وجهك مصباح
فرحان وجيت. اسـهـر ويّـاك
💜💛💜💛💜💛

ليلة نصف رمضان ياعظُـمـها. حبيبي
بنورك سطـع يالمجتبه نجمها. حبيبي
هبّت نسـايم عـطـرك ونشمـها. حبيبي
هالليله بسمك يالحسن اسمها. حبيبي
يالغالي سلام ياثاني امام
دايم مولاي. خلّيني معاك
💛💜💛💜💛💜

للزهــره امّـك ابـعـث التهـــاني. حبيبي
فرحــانه بيـك اتحقق الامـــاني. حبيبي
بگلبـي اهنّـي فاطـمـه ولســاني. حبيبي
شوگي لحضرّتك هالمسه خذاني حبيبي
بنفاسي ادّور. گلبي المسرور
رفّ ونـاداك. يامحله ضواك
💛💜💛💜💛💜

وجهك بدر ضوّه الأرض ضيائه. حبيبي
حتى الـگـمـر غـاب وترك سمائه حبيبي
شــــالـك عــلي وظلّلّك بـردائـه. حبيبي
ياوارث علــومـه وحسِـن بهــائه. حبيبي
شافك ورتاح. كل همّه نزاح
عن طه علي. بسمك سمّاك
💜💛💜💛💜💛

انت الامام الثاني وعتصامي حبيبي
ابعث الك وي الهوى سلامي. حبيبي
يالحسن يحله بمولدك كلامي حبيبي
يمك بداية رحلتي وختـامي. حبيبي
ليلة ميلاد. بسمك تنعاد
بفراح ونور. للموت وياك

سيد زيد الفحام
___________________________

قصيدة ( يا اغله محبوب )
اداء ملا غسان الزبيدي
كلمات خادمكم زيد الفحام

قصيدة في عيد الغدير ذكرى تنصيب امير المؤمنين علي عليه السلام خليفه بعد النبي بأمر الله جل جلاله


بلّغ يامٌحمّد. للكرار اشهد
سلّمله الولاية بعدك للنهاية
والرحمن أيّد والرحمن ايّد
.................

بلّغ يامُــحــمّـــــد وخبر الناس
علي هوه الأمير وتاج عالراس
علي مثلك يبوالزهراء ينقاس
نفس اخلاق روحك نفس الاحساس
سلّمله الامامه. تحلاله الزعامه
سيّد عالبراية. بعدك للنهاية
والرحمن ايّد. والرحمن ايّد
.....................

اذا ما بلّغت ما يكمل الدين
بلّـغ يارسـول اللّه هالحين
علي بعدك خليفه عالمسلّمين
ارفع چفّه خل تشوف كل عين
گلهم الله راده. خصّاه بالسّياده
نزلت لجله آية. بعدك للنهاية
والرحمن ايّد. والرحمن ايّد
.......................

رقه المنبر رسول الباري محلاه
صاح بصوت صاح الكون ويّاه
ألا مَن کُنتُ يا هالناس مولاه
علي هـذا اميره وهـوه مولاه
من بعدي خليفه. خسران اليعيفه
منهاج الهداية بعدك للنهاية
والرحمن ايّد. والرحمن ايّد
........................

علي هوه الخليفه واللّه راده
رسول الله حصر بسمه القياده
حله براس الوصي تاج السياده
مثل طه يعيّشنـه بـسـعــاده
بالحق والعداله يحفظها الرساله
معروف السجاية. بعدك للنهاية
والرحمن ايّد. والرحمن ايّد
..........................

احنه الشيعه متمسكين بامره
بايعنه علي وهيهات نبره
غصباً عالنواصب نحيي ذكره
قدر المصطفى المختار قدره
نرفضها السقيفه. بس حيدر خليفه
هوه من البداية. بعدك للنهاية
والرحمن ايّد. والرحمن ايّد

سيد زيد الفحام
_______________________________________

هوسات وابوذيات في عيد الغدير


دين الله كتمـل بـولايـــة الـكـرار
الله ختاره من بعد النبي المختار
والي عله البريه ومخزن الاسـرار
( والبايع حيدر هنياله )



شال ايده الرسول وصاح يالاصحاب
هـذا المـرتضـه الكـرار داحــي البـاب
حـاضـركـم يوصـل هـالخبـر للغـــاب
( حيدر واليكم بغيابي )



رافـع ايـد ابوالحسنيـن ابوالزهـراء
تشهدله الشمس والناس والصحراء
صـاح بصـوت منكـم رايـد الإصغاء
( مو آنه الخالق مختاره )



كلمـن واله ابوالحسنيـن والاني
والعـاده الوصـي الكـرار عاداني
علي بعدي الإمام ومايصح ثاني
( والينكر حيدر ماريده )



علي رب العُله ختـاره. وراده
رفض كلمن نكر فضله. وراده
ربيـع ولايتــه فـاحـت. وراده
عطر حب الوصي حامي الحميه



رسـول الله بغـدير الخم. جمعها
النـاس وقـرر ونـاده بــ جمعها
الولاية بحب علي الباري جمعها
وتنصّب للنبي حيدر وصيّه



صفات المصطفه حيدر حملها
شريعة ربنه بس حيدر. حملها
ورث علم النبي وشايل. حملها
علي وطه النبي نفس السجيه

خادم امير المؤمنين علي عليه السلام
سيد زيد الفحام
_____________________________

قصيدة في عيد الغدير

ياعلي مدد بايعنه بالولاية
ياعلي مدد بيعتنه للنهـاية
.................

بعد النبي مُحـمّـد. انت الولي المسدد
بيك الشرع تجسّد. ياحيـدر وتـأيّــد
بيعـه للأبـد يالطاعتك هداية
ياعلي مـدد. بيعتنــــه للنهاية
..................

بارينــه بالاراده. خصصلك القياده
تحلالك السياده. تاج عله كل عباده
حافظ العهد ياطيّب السجاية
ياعـلي مـدد. بيعتنــه للنهــاية
.....................

يابيعـــة الغــديـــري. يافرحة البشيـري
هالصرخه من ضميري. حيدر علي اميري
واضح السند. ترويها چم رواية
ياعـلي مــدد. بيعتنـــة للنهــاية
.......................

بايعنــه عـن عقيده. بس شخصك النّريده
بس شيعتك سعيده والينــــــــه يالصميـده
رادك الصمد سيّد عله البراية
ياعلي مـدد بيعتنــه للنهــاية
.......................

ياسيّدي اجينه. مدّينه الك ادينه
يالنصّبَك علينه. رب العُله ونبينه
توفي بالوعد. ياوافر العطاية
ياعـلي مــدد. بيعتنــه للنهاية

سيد زيد الفحام
________________________________

قصيدة في تتويج الإمام المهدي المنتظر عجل الله فرجه الشريف


ياوريث المصطفى وجامع خصاله
علمه وخلاقه وفضل جاها وجماله
..

سيدي يالمهدي خصّك بالكـــرامه
خالق الأكـوان ونطـاك الزعـــــامه
لبّسك يالمنـتـظــر تـاج الامـــــامه
سيدي وكل شيعي يبعثلك سلامه
الله خـصّـك بالـعـــلم جـلّه جــلاله
..

اليوم تتويجك ياقـــائـدنه واملنه
الله مـن دونـك فـلا يـقـبـل عملنه
انبـايـعـك يالمهدي هالليله بحفلنه
نـشـكـر المعبـــود خـدامـك جعلنه
بيك يالمـهــدي كـمـل نهج الرساله
..

توّجك رب العرش يالمـهـدي قــائد
وارث أهل البيت غيرك ماكو واحد
انّـجـمـعـنـه الليله اتبـاعــك نعــاهد
انبايعك بعد الحسن والباري شـاهد
كل محب يمته الفرج تسمع سؤاله
..

فرحـت الزهــراء بيـك وفرحة هيّـه
مـن تـسـلّمـت الأمــر هــاي المسيّــه
انـت تـاخــذ ثـارها امن النـاصبيّــــه
وثـار ابـوالأكـبـر ذبيــح الغـاضـريّــه
بسيفـك تبـيـد الظلم وهـل الضــلاله
..

بفـرحــة التتويـج هالليله انجمعنــه
سيـدي انـهـنّـيـك يالمهدي ابفـرحنـه
احنه انصـارك يـمـهـدي العترة احنـه
يمته يايوم الفـرج يالمـهـدي صحنـه
كل ظلم يـنـزاح وتـســود العـــــداله

سيد زيد الفحام
________________________________

قصيدة في مولد سيد الكائنات محمد رسول الله صلى الله عليه واله


مُحمّد اشرقت انواره
مُحمّد. والأله اختــاره

🌿🌿🌿🌿🌿🌿🌿🌿

اشرقـت انـوار طه يافرح مر بينه
نَـوّر الأكــوان نـوره بمولده تهنّينه
ذا حبيب الله مُحمّد ياهلا بهادينه
انبارك المهدي مُحمّد بالمحافل جينه
مُحمّد. النه احله بشاره
مُحمّد. والألـه اخـتــاره

🌿🌿🌿🌿🌿🌿🌿🌿

بمـولـد المختار احمد نـفـرح ونتباها
حلوه لحظات الولاده بالفرح عشناها
يارسـول الله مُحـمّـد كـلـمـة رددناها
جَمعَه وافراح وتهاني الليله يامحلاها
مُحمّد. ياعظيم اسراره
مُحمّد. والألـه اخـتــاره

🌿🌿🌿🌿🌿🌿🌿🌿

آدم وكـل المــلائـك سجدت لمحبوبنه
نـور هادينـه مُـحـمّـد هالبـزغ بـدروبنه
والصـلاة عليـه هـيّ تمحي كـل ذنوبنه
بالحشر منّه الشفاعه هذا بس مطلوبنه
مُحمّد. شيعته وانصاره
مُحمّد. والألـه اخـتــاره

🌿🌿🌿🌿🌿🌿🌿🌿

الله خص طه نبيّـه وميّـزه باوصــــافه
من جماله ينور وجهه بعين كلمن شافه
سيّد عله الناس كلـــها بتقوتـه وألطافه
عشگته گلوب البـرايـا كل گلب ما عافه
مُحمّد. خالد بـآثــاره
مُحمّد. والأله اختاره

🌿🌿🌿🌿🌿🌿🌿🌿

سيّـد الأكــوان كلــــها نـفـرح ابميـلاده
هذا هوه الهادي أحمد سيّد عله الساده
للـرسـاله الاحـمـديّـة الله خـصّـه وراده
لاشك المهدي يشـــارك يحضر باعيـاده
مُحمّد ما تجف انهاره
مُحمّد. والألـه اخـتــاره

سيد زيد الفحام
____________________________________

ابوذيات وهوسات في ولادة رسول الله مُحمّد صلى الله عليه واله


اجتنه وبشّرت نفـرح. رسلنه
بولادة سيّـد وآخــــر. رسلنه
تهاني الفرحة للمهدي. رسلنه
نهنّي المنتظر هاي المسيــه ( صلوات )



خبر عن مولد الهادي. وردنه
يفوح بعطره هالليله. وردنه
حضرنه بمولده نفرح. وردنه
نشارك بالفرح بنته الزچيـه. ( صلوات )




مُـحـمّـد ما وصل واحد. لفضله
رسـول وعالبشـر كلـــها. لفضله
ربـنـه بأعـظـم الفــاضه. لفضله
يمدحه بخُلقه وخلاقه السخيه. ( صلوات )


هوسات //

سُبحـــانـه الإلــه شـصـوّر وابـدع
خلق طه النبي من نوره وتشعشع
من وجه النبي نور وحِسِن يسطع
( نَوّر دنيانه بانواره )



فجر سابع عشر صار بربيع اوّل
انولد نور الرسول الطاهر الأكمل
من سابـع سمـه الأمـلاك تـتـنـزّل
( تـتـبـرّك بالهادي ونوره )



مُحمّـد اشرق بوجهه اليشع انوار
حبيب الله الرسـول وهازم الكفّار
لولا المصطفه هـذا الخلق ما صار
( لعيونه الخالق سوّانه )



واحنـه بمـولـد المختـار فـرحـانيـن
ننصب محفل لراعي الشرع والدين
ويـن الرايـد ينـول الشفـــاعـة ويـن
( خل يفرح بالهادي ويانه )

خادم سيد الكائنات وحبيب الله مُحمّد صلى الله عليه واله
سيد زيد الفحام
________________________________

https://youtu.be/u42yVJn7F7o
ارجو الاشتراك بالقناة اخوتي الأعزاء ليصلكم كل ما هو جديد في رثاء محمد وآل محمد عليهم السلام
حفظكم الله من كل سوء

https://youtu.be/fVIXA-zQHuM
ارجو الاشتراك بالقناة اخوتي الأعزاء ليصلكم كل ما هو جديد في رثاء محمد وآل محمد عليهم السلام
حفظكم الله من كل سوء

قصيدة في ولادة الإمام المهدي عجل الله فرجه الشريف


گلبي حَبّك مو بديه وماشفت غيرك حبيب
انت روحي واعز منها هيچ احسنّك قريب
آنه مجـروح بغيـــابـك إلّا اشوفنّك وطيب
يمته يالمهدي تجينه
نـنـتـظـر امرك بقينـه
............

جيت اباركلك يمهدي بمولدك يبن الحسن
أرد اگلّك ياحبيبـي گلبي صايـرلـك وطن
يمته اشوفك ياامامي ياكل بعمري الزمن
مولدك فرحة وسعاده
نـفـــرح بهــاي الولاده
...........

ابعث ورود وتهاني لحضرتك يالمنتظر
جيت اقدملك ولائي حبّك بگلبي كبـر
اغله من كل الغوالي يا أمام عله البشر
انـتـظـر سـاعـة ظهورك
يمته شوف بعيني نورك
............

ويـن دلّيني ابمكـــانــك سيدي آنه اعتنيك
لشوفتك ملهوف گلبي كل وكت أسأل عليك
مره وحده وهاي تكفي أرد شوفك ارتجيك
يمته اشوفك يا امامي
كل وكت أرسل سلامي

@zaidzai11

سيد زيد الفحام
________________________

قصيدة مدح في حب الإمام المهدي المنتظر عجل الله فرجه الشريف

يامهدي وينك والصبر ماذيني
مر بيه طيف وخل تشوفك عيني
مشتاگ اشوفك والهجر اذّاني
عطشان حيل وشوفتك ترويني
مجنونك. يالمهدي مو بيدي العشگ
وعيونك. حبيتك وحب من صدگ
ياريتك. تنظرله گلبي من يدگ
بسمك ينور عيوني
شاغلّي فكري وماغبت عن بالي
اسمك حبيبي واغله من كل غالي
انت الهوى ،، وسمك دوه ،، ما اسوه لوما حبك مكفيني
يمهدينه يمهدينه يمهدينه الك روحي
............

مثلك بشر لا ما يمر بروحي
عايش تظل يالمنتظر بجروحي
سهرانه عيني لشوفتك كل ليله
يمته الفرج خضّر مصاب بنوحي
أيامي. ظلمه ورحل عنها الفجر
آلامي. يالمهدي عايشهن عُمُر
بغيابك. تدريني ما أحمل هجُر
هجرك صعب ياغالي
روحي عله حبك سيدي موصّيها
كل يوم جمعه عله الوعد تلگيها
عنك ابد ،، ما ابتعد ،، سهران اظل حد ما تشوفك عيني
يمهدينه يمهدينه يمهدينه الك روحي
................

مو آنه كلشي بهالزمن ينتظرك
ولياوكت عايش وحيد بعمرك
ماظل صبر بيّه الهجر اذّاني
اتمنّه اموت ولااعيش بهجرك
ارويني. عطشان الك صبح ومسه
احييني. رايـد هـــــواك اتـنـفّـسَـه
يهديني. گلبك حنيـــــن وما نسـه
يالمهدي يامولانه
سامع دعائي بكل فجر يوميّه
اشكيلك جروحي وعذابي البيّه
مات الصبر ،، طيفك يمر ،، چا يمته يالمهدي وتجي وتحييني
يمهدينه يمهدينه يمهدينه الك روحي
........

لاموني كالـوا ما يرد محبوبك
وانه ازرع ورود الفرج بدروبك
گلتلهم ابقه عله العهد ماعوفه
مو بيدي هوه الگلب راح لصوبك
حبيته. اسمك يمهدي امن الزغر
حسّيته. هجرك مثل طعم الجمر
يامهدي. ادعي لظهورك كل فجر
ياربي عَجّل يومه
مشتاگ ابوس تراب جدمك بوسه
يالمهدي روحي بحضرتك مغروسه
يابوالوفه ،، والمعرفه ،، يالشوفتك تحيي الفرح بسنيني
يمهدينه يمهدينه يمهدينه الك روحي

سيد زيد الفحام
_________________________

قصيدة في ولادة امير المؤمنين علي عليه السلام


فرحانه كل الدنيا فرحانه
بمولد علي الكرار مولانه
***
سُبحانه مَنْ سوّه الوصي وراده
بالكعبه بيته يصير ميلاده
هذا الأمير وسيّد الساده
حيدر علي معروفه امجاده

فرحتنه من كل دار
مولد علي الكرار
من مهده شع النور
يامحله هالانوار

عيون التحبّه تبقه سهرانه
بمولد علي الكرار مولانه
***

انشق الجدار ودخلت ام حيدر
بيت اللّه شعشع بالوصي وازهر
هاي الكرامه لا متتكرّر
بس لعلي حامي الحمه الاطهر

ساجد قره القرآن
للخالق الرحمان
بعد النبي المختار
حجه عله كل انسان

مبتهجه جنّ وأنس ويّانه
بمولد علي الكرار مولانه
***

ستبشر نبينا بهلّت انواره
حيدر وصيّه واقدس انصاره
بچفوفه شاله ويعرف اسراره
امن الكعبه شاله المصطفه لداره

يامحله هالنورين
طه وأبو السبطين
شرّفهم المعبود
بيهم ختام الدين

انزل علينا الباري احسانه
بمولد علي الكرار مولانه
***

ثالث عشر هالليله نحييها
بيها انولد حيدر علي بيها
ليلة ولاده بفرحه نگضيها
نور الوصي الكرار يضويها

ليلة هنه وافراح
عطر الورد فوّاح
ميلاد ابو الحسنين
كل التعب ينزاح

بس شيعة الكرار ربحانه
بمولد علي الكرار مولانه

سيد زيد الفحام
_________________________________