ابوذيات في ولادة الإمام محمد بن الحسن المهدي عجّل الله فرجه الشريف


نور المـهـدي اشرق. منّ نبينه
يگول الهـادي عنّـه. مِنّ نبينه
أبَـيّـن فضله وعجز. منّ نبينه
فرحنه بمولده بهاي المسيه
🌿🌿🌿🌿🌿🌿🌿🌿

خبر عن مولد المهدي. وردنه
فرحنه وجبنه للمولـد. وردنه
تمنّينـه الفـرح يـكـمـل. وردنه
بظهور المنتظر شبل الزچيه
🌿🌿🌿🌿🌿🌿🌿🌿

نولد مهدينـه والاكـوان. سرها
حبيب الزهره امّه وبيـه. سرها
فرح گلب الزچيـة اليوم. سرها
وفرحنه وياها بالهمدي سوّيه

سيد زيد الفحام
____________________________

هوسات في ولادة علي الأكبر عليه السلام


واجب نفرح الليله ونطشّ ورود
بمولد علي الأكبـر نشكر المعبـود
خصنه بهالولاده وطَيّب المـولـود
( وارث من احمد اوصافه )
🌷🌷🌷🌷🌷🌷🌷🌷

نهنّـي حسيـن والينــه بعـلي الأكبـر
مثل وجه النبي وجهه السطع وزهر
الليله بـمـولـده كـل رافضي ستبشـر
( يامحله الفرحه ابميلاده )
🌷🌷🌷🌷🌷🌷🌷🌷

سُبحـانه الإلـه الخـالــق السـوّاه
آية من الجمال وللحُسين اهداه
يوسف آل هاشـم كامـل ابمعنـاه
( يتعجّب يوسف لو شافه )
🌷🌷🌷🌷🌷🌷🌷🌷

نـفـرح بالولاده ونسهـر الليله
لـلأكـبـر عــلي وورود نهديله
علي نور ويشع بعيونّه نشيله
( خـدام الأكبر سـمّـونه )

سيد زيد الفحام
_________________________________

قصيدة في ولادة علي الأكبر عليه السلام


علي الأكبر. بدر نوّر
ياهلا بميلاده. ياهلا بميلاده
🌿🌿🌿🌿🌿

نجمعنه بمولد الأكبـر وجينه
شـمـع وورود لـلأكبـر بدينــه
نهنّي المصطفه وحيدر ولينه
بدر وجهه ويشع نور بجبينـه
بوهج خدّه. يشع مهده
ياهلا بميلاده. ياهلا بميلاده
🌿🌿🌿🌿🌿


شبيه المصطفه بحِسِنه وجماله
عـلي الأكـبـر رسـول الله بكماله
كلامه وشكله وخلاقه وخصاله
اجينـه بـمـولــده نحيي احتفاله
ابـواليمّـه فرح بسمه
ياهلا بميلاده. ياهلا بميلاده
🌿🌿🌿🌿🌿

نهنّي حسيـن ابـوالاكبـر بالاكبر
سطع وجهه وعله الأكوان ازهر
اجينــه الليـله بالافــراح نسـهـر
علي الأكبر نحبّه وبيـــه نـفـخـر
تهانينه. يوالينه
ياهلا بميلاده. ياهلا بميلاده
🌿🌿🌿🌿🌿

لـواء الأكبـر ابـطال الميـاديـن
رجال وبالشدايد نصروا الدين
نهنّيـهــم نـريــد بأبن الحسيـن
علي الأكبـر يعلّمـهـم مضاميـن
نحيّيهم. نهنّيهم
ياهلا بميلاده. ياهلا بميلاده
🌿🌿🌿🌿🌿

علي الأكبـر لوائه بزوده معـروف
رجـال وماتهـاب المـوت والخوف
على خط السواتـر وگفـوا وگـوف
انتصارات الهم بكل معركة نشوف
بسراياهم علي وياهم
ياهلا بميلاده. ياهلا بميلاده

سيد زيد الفحام
_____________________________

قصيدة في ولادة علي الأكبر عليه السلام


ميـلاد الأكبــر هالليله
وطيور الفرحة تغنيله
شعشـع نوره
بجمل صوره
وطيور الفرحة تغنيله
🌸🌸🌸🌸🌸🌸🌸

تزهـر هالليله ومحـلاها الأكبـر ضاويـها
هـل نـوره ونـوّر دنيــانـه ونـوّر مـابيــها
ننصبله المحفل هالليله شموعه انضويها
هالليلـه بافـراح وبسمـه نسـهـر نحيـيـها
ونهني حسين ابميلاده
بـالاكبـــر اوّل اولاده
وجهـه تنوّر
يشبه حيدر
وطيور الفرحة تغنيله
🌸🌸🌸🌸🌸🌸🌸

ستبشر وجه حسين الليله وزادت انواره
بمـولـد شبلـه الأكبـر هـذا النـوّر كل داره
بلسان الهـادي مـن البـاري نزلـت اخبـاره
وارث كل اوصاف الهادي شكله واسراره
وارث هادينه باوصافه
متمسك نهجه وماعافه
يشبـــه جــده
ويزهي بمهده
وطيور الفرحة تغنيله
🌸🌸🌸🌸🌸🌸🌸

يم امه الزهره بفرحتها حضرت فرحانه
تهنـيـــها بمـيــلاد الأكبــر وتبيـّن شــآنه
وتـقـيــــم السُنّـة بميــلاده تكبّــر بآذانه
نـزلـت وياهـا الأمــلاك تصـفّــگ ولهـانه
هزت مهـده وگعـدت يمه
ساعة تقبله وساعة تشمه
يبني تگلّه
بيك اتسلّه
وطيور الفرحة تغنيله
🌸🌸🌸🌸🌸🌸🌸

يامحلـه الدنيـه بميـلاد الأكبــر مسروره
ونجـوم الكون وعالمـها فرحت وطيوره
وي جبـريل امــلاك البـاري نزلتلـه تزوره
كل كوكب من نوره تنوّر يسطع من نوره
دنيانه الأكبر ضوّاها
تـزهـ.ر للعالم خلاها
هل مصباحه
هاي افـراحه
وطيور الفرحة تغنيله
🌸🌸🌸🌸🌸🌸🌸

فرحانه الشيعة بميلاد الأكبر هالليله
والعـاده الأكبر بالمحشر باچر ياويله
للاكبـر نصبت محفلها الشيعة تغنيله
تهني بالمـولد وشواگ الفرحة توديله
بمولوده الأكبر فرحانه
شيعـة وبالاكبر ولهانه
بي مسروره
وتنظـر نوره
وطيور الفرحة تغنيله

خادم علي الأكبر عليه السلام
سيد زيد الفحام
______________________________

قصيدة في ولادة الإمام محمد بن الحسن المهدي عجّل الله فرجه الشريف


مهدينه مهدينه بايعنه مهدينه
هالليله بالميلاد بايعنه مهدينه
🌸🌸🌸🌸🌸🌸🌸🌸

ليلة نصف شعبـان احله الليـالي
بيها نـولـد مـولـود اغله الغـوالي
سُبحانه من سـوّاه بـدر ويــلالي
مثل النبي المختار عند الله عالي

يهدينه يهدينه بعلومه يهدينه
وبفرحة الاعياد بايعنه مهدينه
🌸🌸🌸🌸🌸🌸🌸🌸

ليـلة فـرح ونــوار ليلـتـنــه گـمـره
للمـهـدي هـذا النـور خـاتـم العتره
عطر الجنان يـفـوح هالليله عطره
وي صاحب الثارات نگضيها سهره

نادينه نادينه يالـمـهـدي نادينــه
انت الهوى والزاد بايعنه مهدينه
🌸🌸🌸🌸🌸🌸🌸🌸

ضوّه الأرض والكون يامحله نوره
كل شيعي هذا اليوم اعلن سروره
نـتـنـطّـر باشـواگ سـاعـة ظـهـوره
هالليـله ليـلة عيــد والـكـل يـزوره

خلّينــه خلّينــه يادنيــه خلّينــه
بالفرحه والإنشاد بايعنه مهدينه
🌸🌸🌸🌸🌸🌸🌸🌸

نهنّي النبي المختار سيـد البريه
والزهـره والـكـرار حامي الحميه
والعتره كلها اليوم فرحت سويّه
بالمهدي راعي الثار هـاي المسيه

هنّينــه هنّينــه لـلـعـتـره هنّينــه
رغماً عله الحُسّاد بايعنه مهدينه
🌸🌸🌸🌸🌸🌸🌸🌸

بالمنتظر هالناس فرحـانه كلها
طشّت ورود وياس مولد املها
ليلة تهـانـي وعيـد ربّـك جعلها
بالدنيــه والايّـام ما صح مثلها

حنّينــه حنّينــه للمهدي حنّينــه
من هسّه للميعاد بايعنه مهدينه

سيد زيد الفحام
_______________________________

يموعود يموعود حبك جمعنه الليله


والافراح والافراح يالمهدي بسمك صاحت
والارواح والارواح بلهفـة غـرامـك طـاحت
والجراح والجراح مشفيـه بسـمـك راحـت
هالليلـه يامحــلاها
وشموعك اعلگناها
الك يوم الك يوم نطلب امر تعجيله
🌻🌻🌻🌻🌻🌻🌻🌻🌻🌻🌻

عشگناك عشگناك يالمهدي ياوالينه
عرفناك عرفناك انت الـذي تحمينـه
نطرناك نطرناك يـومـك يهل اعلينه
يامـهــدي يامـولانه
كل شيعتك فرحانه
والزهراء والزهراء فرحت وحامي دخيله
🌻🌻🌻🌻🌻🌻🌻🌻🌻🌻🌻🌻

بالگلـوب بالگلـوب حبـك سـكـن يالغــالي
يمحبـوب يمحبـوب للشيعــه انت الوالي
يمحجوب يمحجوب بس حبك اليحلالي
ياساعة تظهر لينه
من الظلـم تنجينه
عله اعداك عله اعداك بيرغ نصرنه انشيله
🌻🌻🌻🌻🌻🌻🌻🌻🌻🌻🌻🌻

للميـلاد للميـلاد نعـلــگ شـمـــع ونّـادي
والعياد والعياد كل منطقـة وكـل وادي
والانشاد والانشاد بسم الوصي والهادي
كل شيعي بسمك ناده
يمتــه الفـرج ميعــاده
والعاداك والعاداك يالمنتظر ياويله
🌻🌻🌻🌻🌻🌻🌻🌻🌻🌻🌻

هويناك هويناك خل العده يلومونه
تبعنــاك تبعنـاك عنـك فلا يمنعــونه
اجيناك اجيناك خل العده يشوفونه
غصباً على العادونه
ماگــدروا يبعــدونه
يضل بيك يضل بيك كل شيعي همه يزيله

خادم الإمام المهدي عليه السلام
سيد زيد الفحام
_______________________________

يااغله محبوب
ساكن بالگلوب
يالمهدي يالمحجوب طوّلت الغياب
🌼🌼🌼🌼🌼🌼🌼🌼🌼🌼

نتنطّـرك مـولاي ساعـة عله ساعـه
يمته الفـرج ونشوف نور الشفاعـه
بـس للإلـه وليـك نبـدي الاطــاعـه
وجهك مته عالكون يزهي بشعاعه
نتنـطــر سنيـن
ياوارث حسين
وين الوعد چاوين يانسل الاطياب
🌼🌼🌼🌼🌼🌼🌼🌼🌼🌼

لامتنه كل الناس تقبل يموعـود
مهديكم يگولون ماضنه موجود
احنه عله جمر النار نتنطر تعـود
قائدنه وحنه وياك يالقائم جنود
نشكيـلك الحـال
طال الوعد طال
بالغيبه چم دلال يالمنتظر ذاب
🌼🌼🌼🌼🌼🌼🌼🌼🌼🌼

منبع شهامه وطيب يالكلك احساس
جنّنه حبـك صـار يجــري ويالانفاس
يالمنتـظـر مـولاي تـاج انـت عالراس
قائدنه وحنه ويـاك رغماً على الناس
شيعة وتبعناك
لا مـانسيـنــاك
وعله العهد وياك ياعدل الكتاب
🌼🌼🌼🌼🌼🌼🌼🌼🌼🌼

يمسافـر اليايـوم ترجــع يغالي
يالمنتظر بجفاك وحشة الليالي
ندعيـلك بكل يـوم رب المعالي
يفرّجـلك المعبـود تظهـر يوالي
تظهر يموعـود
وتقيم الحدود
بيك الفخر والزود وبسيفك احساب
🌼🌼🌼🌼🌼🌼🌼🌼🌼🌼

يالمـهــدي حبينـــاك حـب المجـانيـن
واحدنه عابس صار بس انت الحسين
صبـح ومسـه بطـاريك نتنطـر سنين
تهتـف يمهــدي الثـار كـل المـلاييــن
يالمـهــدي للثار
صار الوعد صار
وبسيفك الفقّار يتصفّه الحساب

خادم الإمام المهدي عليه السلام
سيد زيد الفحام
_______________________________

مهدينه يامهدينه. احبــابـك تعنّينـــه
ياسيــدي تلگـانه. جبنه الورود ويانه
يمته الفرج نادينه
💖💖💖💖💖💖💖💖💖💖

احبابك احنه ونفتخر مهدينه
ياسيــدي بميــلادك اتعنّينـــه
يالمهدي وورود الفرح بيدينه
نحيي الولادة بكربلائك جينه
موعدنه يم حسينك يالمهدي بينه وبينك
كل شيعتك فرحـانه. جبنـه الورود ويـانه
يمته الفرج نادينه
💖💖💖💖💖💖💖💖💖💖

ليلة نصف شعبان بيها اسرارك
وبكربلاء حسيـن تزهي انوارك
يالمهـدي جينـه بمولدك نتبارك
احبــابك بهــذا الفـرح نتشــارك
انت الحبيب الغالي عالي بمقامك عالي
بسمـك يرف الـوانه. جبنه الورود ويانه
يمته الفرج نادينه
💖💖💖💖💖💖💖💖💖💖

جنة ضريح حسيـن يامحـلاها
نـور الإمــام ونـورك الضـــوّاها
بصحن الحبيب حسين اديناها
زيـارة نصف شعبــان ماعفنـاها
يالمنتظر عشّاگك ذوّبنه طول فراگك
طول الهجر أذّانه جبنه الورود ويانه
يمته الفرج نادينه
💖💖💖💖💖💖💖💖💖💖

هالليلـه ليلـة مـولــدك نحييها
احبــابك تجمّعنــه نفــرح بيها
اولـها نـور ومــولــدك تـاليــــها
يالمـهـدي باقـات الورد نهـديها
ماتنوصف اوصافك. خيعونه كلمن شافك
بيـك البشـر حيـرانه. جبنـه الورود ويـانه
يمته الفرج نادينه
💖💖💖💖💖💖💖💖💖💖

يالمهدي جينه نبايعك هالليله
ندعـي الإلـه بامـرك وتعجيـله
كل شيعـي قدملك ورد اكليله
يالمهدي وعدك طوّل وندعيله
ياساعة يگضي غيابك. يمته وترد لحبابك
نـتـنـطّـــرك مــولانـه. جبنه الورود ويانه
يمته الفرج نادينه

خادم الإمام المهدي عليه السلام
🖍سيد زيد الفحام
_________________________________

يافرحة طشّي بمولده وزيدي
عيـد الإمــام المنتظــر عيـدي
من زغري حبيته
محبـوبي سميته
عيـد الإمــام المنتظر عيــدي
♥♥♥♥♥♥♥♥♥

ليلة نصف شعبان محـلاها
نـور الإمـام المهـدي ضوّاها
وآنه العشگته بزغري وتباها
ليلـة حبـيـبـي اسهــر ويـاها
مولـد حبيبي المهدي هالليله
سهرانه عيني وگلبي يدعيله
وبگلبـي ضميته
محبوبي سميته
عيد الإمام المنتظر عيدي
♥♥♥♥♥♥♥♥♥

ارض وسمـه بميـلاده فـرحانه
حته الشمس من نوره خجلانه
سُبحــانه مـن ســوّاه سُبحــانه
صورة جمـال المهـدي وحسـانه
ياگلبي افرح والحزن عوفه
مولد حبيبك عاينه وشوفه
بميــلاده هنّيته
محبوبي سميته
عيد الإمام المنتظر عيدي
♥♥♥♥♥♥♥♥♥

بالدنيـه غيـره واللـه ماعنـدي
حته الگلـب نبضــاته يامهـدي
ماينـوصــف للـمنـتـظـــر ودّي
بيـه العشـگ للمنتـظـر يحـدي
صومي وصلاتي مذهبي وديني
نـوّر حيـــــاتـي ونـوّر سـنـيـنــي
وبروحي حسّيته
محبـوبي سميته
عيد الإمام المنتظر عيدي
♥♥♥♥♥♥♥♥♥

باقــة ورد جايبلـه للمـولـد
عـن الإمـام المنتظــر انشد
ناذر نذر يم حضرته اسجد
ويـايه حاضـر ادري مايبعد
ترعاني عينه وتنگضي همومي
ويـايـه دوم بيقضـتــي ونومي
يظـهـــر تمنّيته
محبوبي سميته
عيد الإمام المنتظر عيدي
♥♥♥♥♥♥♥♥♥

ادعـي الإلـه يعجّـل ظـهــوره
بعيـوني اشوفه وافرح بنوره
رايـة محـمــد بيــده منصوره
روحي بغرامه تذوب معذوره
اهل الملامـه خـل يسمعـوني
للمهدي عشگي ودايم جنوني
ياروحي ناديته
محبوبي سميته
عيد الإمام المنتظر عيدي

خادم الإمام المهدي عليه السلام
سيد زيد الفحام
______________________________

موال في مولد الإمام محمد بن الحسن المهدي عليه السلام

من هل علينه واجه جاب الفرح شعبان
نور الإمام المنتظـر بخمسطعش شعبان
ضـوّاها ارض وسمـه نور الولـي شعبان
مـولـد المهـدي المنتظر باقة ورد وديت
للمهـدي ولعتـرة علـي مـنّ الزغـر وديت
يظهـر وشـوفن هيبتـه ياهالخلگ وديت
نصيـن گلبـي موشعب صـارن اله شعبان

خادم الإمام المهدي عليه السلام
سيد زيد الفحام

قصيدة ( حبيب الگلب ) في ولادة الإمام محمد بن الحسن المهدي عجّل الله فرجه الشريف


عاشگ حبيب الگلب ما عوف هذا العشگ

ويّـاه عشـت دنيتـي ولـلـمـوت ما افـتـرگ

اسمه بدليلي انحفر يعني الگلب بي يـدگ

مثـل الهـوى عـازتـه لو ما اشــوفـه ختنـگ

گالولي ناسي وهلي علّمنه وحچي الصدگ

گـلـبـك يـود يابشـر وبنــار حبّـه احـتـــرگ

گلّتـلـهـم اهـوى اللذي ما منـوجـد بالخلـگ

شايل صفــات النبـي وعالناس فضله سبگ

محبـوبي ابن الحسن لمهدينـه هـذا العشگ

سيد زيد الفحام
___________________________________

قصيدة في ولادة الإمام محمد بن الحسن المهدي عجّل الله فرجه الشريف


يا اغله من عيوني مهدي يمهدي
مجنونك يسمّـوني. مهدي يمهدي
🍁🍁🍁🍁🍁

هالليله ليلة مـولـدك يالمـهـدي مولاي
گلبي ابتهج ياسيّـدي وسهرانه عيناي
مو آنه بس كل شيعتك فرحانه وياي
هاي الولاده الطاهـرة ما تنوصف هاي
ولخدمتك نذروني. مهدي يمهدي
مجنـونـك يسمّوني. مهدي يمهدي
🍁🍁🍁🍁🍁

كُنية مُحمّد كُنيتـك واسمك عله سمه
يالمـهـدي يالنورك صبـح للناس رحمه
وجهك سطع مثل الشمس بدّد الظلمه
محلاها نسمت مـولـدك ما منـها نسمه
يالماتخيب ظنوني. مهدي يمهدي
مجنـونـك يسمّوني. مهدي يمهدي
🍁🍁🍁🍁🍁

گلبي العشگ اسمك عشگ ما شافته العين
يشبـه عشـگ طف كـربـله عابس والحسين
ويـن الـگـه مثـلك سيّــدي يالمنـتـظـر ويـن
لا ما عـفـتـنـي ابشيـمـتـك كل هـاي السنين
نورك يشع بجفوني. مهدي يمهدي
مجنـونـك يسمّوني. مهدي يمهدي
🍁🍁🍁🍁🍁

گلبي الملكتـه بمولدك يالمـهـدي فرحـان
يبن الرسـول المصطفـى يا اغـله انســان
يمته الفرج يبن الحسن وتزيح الاحــزان
كل شيعي تدري لشوفتك يالمهدي لهفان
عنك فلا يبعدوني. مهدي يمهدي
مجنونك يسمّوني. مهدي يمهدي
🍁🍁🍁🍁🍁

نتعنّـه كلنـه لـكـربـله ونقيم الافراح
وبـمـولـدك يالمنتظـر تتهنّـه الأرواح
يمّ الحُسين بكربله كل همنـه ينـزاح
ننثر ورود ابمولدك كل شيعي يرتاح
رغماً عله الّلاموني. مهدي يمهدي
مجنـونـك يسمّوني. مهدي يمهدي
🍁🍁🍁🍁🍁

نـور الله نـورك سيـــدي يامحـله نـورك
يالمـهـدي كلنـه بعـازتـك عجّـل ظهورك
تـدري بـمـلاييـن البشـر تـنـطـر حضورك
دور النبي وحامي الحمه يالمهدي دورك
يالعايش ابمضموني. مهدي يمهدي
مجنـونـك يسمّـوني. مهدي يمهدي

سيد زيد الفحام
________________________________

قصيدة في ولادة الإمام الحسن المجتبى عليه السلام


الليله محلاها. بيها نتباها
ليلة النص من شهر رمضان ميلاد الحسن
🌹🌹🌹🌹🌹🌹

الليله اعظم ليلة عدنه وللفرح جينه
وجه أبو محمد تلاله واشرق علينه
ياگـمـر ما ردنـه نورك نـوره يكفينه
للحسن تحله التـهانـي ويمّه خلّينه
من وهج خدّه. يشبـه لجـدّه
مثله وبروعة بهائه والله ما شاف الزمن
🌹🌹🌹🌹🌹🌹

( طلـعَ البـدرُ عَليَنــا ) شـعّـت انواره
جَلَّ من ابـدع جـمـاله وكوّن اسراره
الحسن هذا وعالعوالم طشّت اخباره
الليله جبـرائيـل نـازل جايب ابشـاره
لفاطمة وحيدر. بالحسن بَشّر
فرحه وورود الولاده ليله كلهن فتّحن
🌹🌹🌹🌹🌹🌹

واحنه للمحفل اجينه نبارك الزهره
طابت السهره علينه نشارك العتره
يالحسن صحنه ودعينه ردنه بس نظره
ياكريم واحنه فقره تكفي بس مرّه
يالعشت بينه. نظره تكفينه
للبقيع وللمدينه كل محب گلبه يحن
🌹🌹🌹🌹🌹🌹

يشبه الهادي مُحمّد وارث اوصافه
تترس الدنيه محبّه بسمة اشفـافه
ياالـف هنيـاله كلـمـن كلّمه وشـافه
گلبي من يوم العرفته والله ماعافه
بالمهد يزهر. درّة الكوثر
تزيّنت من نور وجهه واشرقت جنّة عدن
🌹🌹🌹🌹🌹🌹

بشهر رمضان الله راده وخلّه ميلاده
شـرّفـه وثـانـي الأئـمّـه عالخلگ راده
الحسن نور الباري نوره بجوده ومجاده
من رسـول الله تـفــرّع سيّـد السّــاده
تشهد الآيه. بفضله والغايه
تشـرح تبيّن مقامه هالأمـــام المـؤتـمـن
🌹🌹🌹🌹🌹🌹

يالله ياشيعه بحلفكم فرحوا هنّوله
للحسـن بثّوا التـهـاني ورده اهدوله
سَمعـوا للمـولـود منكم احله هلهوله
والإمام المهدي حاضر فرحوا ودعوله
حاضر المهدي. يافرح ابدي
يا الهي فرّج لساعة ظهور ابن الحسن


سيد زيد الفحام
_____________________________________

قصيدة للإمام الحسن المجتبى عليه السلام

ليلة ولاده وفـرحـة ليلتنه
بسم الحسن يامحلة لمّتنه
نبعث تهانينـه
للمهدي والينه
بسم الحسن يامحلة لمّتنه
🌷🌷🌷

وي الإمــام المجتبـه انسـاهر
لمّتـنـه ليلـة مـولـــده الطـاهر
عالدنيـه اشـرق والوجـه زاهر
سُبحانه من سوه الحسن قادر
هالفرحه نادينه
للمهـدي والينـه
بسم الحسن يامحلة لمّتنه
🌷🌷🌷

ليلـة نصـف رمضـان محـلاها
وجـه الحسـن بنـواره ضـوّاها
هالليلــه مـســرور النبــي طـه
وامـه الزچيــه وحيــدر وياها
والحِنّة والزينه
للمهـدي والينه
بسم الحسن يامحلة لمّتنه
🌷🌷🌷

حگـها الزچيــه الليلـه فـرحـانه
ويه الحسـن بالفـرحـة سهـرانه
بحسنه وجمـاله الدنيـه حيرانه
نجوم السمـه من نوره خجلانه
چم بوسه ودينه
للمـهـــدي والينه
بسم الحسن يامحلة لمّتنه
🌷🌷🌷

نحـيي الولادة بالـفــرح جينــه
نشـعـل شـمـع ونـعـلّـگ الزينــه
ولفــاطـمـه انـقــدم تـهـانيـنـــه
مـاينوصـف واللـه الفـرح بينــه
والوردة بيدينه
للمـهـدي والينه
بسم الحسن يامحلة لمّتنه
🌷🌷🌷

نفــرح عله اعنـاد البغض حيدر
بسـم الحسـن نتبـــارك ونسهــر
يالنـاصبـي مـوت بحـقــد اكثـر
هالليـلـــه مـيــلاد الحـسـن نـوّر
باركنه ودعينه
للمهـدي والينه
بسم الحسن يامحلة لمّتنه
🌷🌷🌷

الليلــه الإمـام المهـدي مولانه
حـاضــر يهنّـي الزهــره ويّانه
عايف دمعتـه وعـايف احزانه
روحـه عله شـوفة عمـه لهفانه
گمـرة ليالينـه
للمهدي والينه
بسم الحسن يامحلة لمّتنه

خادم الإمام الحسن المجتبى عليه السلام
سيد زيد الفحام
_______________________________

قصيدة في ولادة الإمام الحسن المجتبى عليه السلام


يالحسن مولاي جينه نفرح ابعيادك
يابدر ضوه الليـالي وجهك ابميلادك
يامولاي. يامولاي
يامولاي. يامولاي
..............

الليله فرحه .. يشفي جرحه .. بهالولاده كل موالي
النور اجانه .. وبسمـانه .. يالحسن نورك يلالي
ياشهر رمضان بيك احزاني
تنجلي بمولد امامي الثاني
يالحسن حبك صبح عنواني
ويلهج باسمك يغالي الساني
يالحسن ثاني الأئـمّـه الله هوه الرادك
يابدر ضوه الليالي وجهك ابميلادك
🌼🌼🌼🌼🌼🌼🌼🌼🌼

بهالمسيه .. للزچيــه .. نبعث ورود وتهاني
بالسعاده .. هالولاده .. حققت كل الاماني
فاطمة الزهره الفرح مر بيها
بمولـدك يالمجتبـه انهنّـيـهـا
وانت بين اچفوفها تناغيـها
بالمهد يالمجتبه اتحاچيــها
بيك فرحانه الزچيّه وسولفت امجادك
يابدر ضوه الليالي وجهك ابميلادك
🌼🌼🌼🌼🌼🌼🌼🌼🌼

بالمدينه .. هل علينه .. مولدك يبن الزچيه
هالتهاني .. والأماني .. للوصي حامي الحميه
نبارك المرتضه حامي دخيله
يالحسن مـولاي هـاي الليله
بـمـولــدك باقـة ورد نهديله
والـدك حيـدر عـلي نوافيله
( قُلْ اعوذُ ) يقره يمك تنعمي حُسّادك
يابدر ضوه الليالي وجهك ابميلادك
🌼🌼🌼🌼🌼🌼🌼🌼🌼

من مُحمّد .. الله يشهد .. يالحسن نورك تشعشع
من حلاته .. من صفاته .. وارث ومن عنده تنبع
من رسول الله وجماله ونوره
الله سوّاك ورسملك صوره
انت وارث هيبته ودستوره
بالحسن بيكم حچت چم سوره
وارث الهادي مُحمّد سيّدي بارشادك
يابدر ضوه الليالي وجهك ابميلادك
🌼🌼🌼🌼🌼🌼🌼🌼🌼

وحنه جينه .. ياولينه .. يالحسن ننصب حفلنه
من فرحنه .. كلنه صحنه .. بالحشر حبك املنه
شيعتك وحبابك اتسمّينه
بمولدك يبن الأكارم جينه
الليله ونهنّي بفرح مهدينه
يالحسن مولاي اله شتاگينه
وجتمعنه الليله كلنه سيدي ابميعادك
يابدر ضوه الليالي وجهك ابميلادك

سيد زيد الفحام
____________________________________

لولادة الإمام الحسن المجتبى عليه السلام

صحت يابلسم جروحي
حبيبي وساكن بروحي
محبتك يالحسن جنّه
🌸🌸🌸🌸🌸🌸🌸

محبتك يالحسن بعضائي سرايه
يمن حبك كبر من زغري ويايه
اظل وياك .. ما انساك .. يالمعناك .. معنايه
كتني الشوگ .. يالمعشوگ .. بيك تلوگ .. چم آيه
غرامك يالحسن تدري
اسرني وبالگلب يسري
ولا لحظه انفصل عنه
🌸🌸🌸🌸🌸🌸🌸

ولا لحظه انفصل عنه وكبر بيه
تحبك روحي ليك الروح مهديه
الك گبتين .. تنور الدين .. وسط هالعين .. مبنيه
مناره ونور .. تجيك تزور .. ملك والحور .. يوميه
يمن وجهك سطع نوره
بفرح والدنيه مسروره
وجه سيد البشر چنه
🌸🌸🌸🌸🌸🌸🌸

وجه سيد البشر چنه الحسن وجهه
يفوق عله الخلگ كلها بحسِن ابهه
همت مولاي .. بيك هواي .. يالدنياي .. باهجهه
ملكت الروح .. ليك تبوح .. فرح وبنوح .. مازجهه
تعال وادخل بگلبي
اراويلك كُبر حبي
سبب بُعدك كثر ونّه
🌸🌸🌸🌸🌸🌸🌸

سبب بُعدك كثر ونّه وكثر همه
يمن حبك سكن گلبي سره بدمه
أنه المجنون .. بيك عيون .. تملي الكون .. بالبسمه
الك محتام .. هاي اعوام .. والظلّام .. محتزمه
شيصبرني كثر شوگي
سريت ابدمي وعروگي
ولا لحظه امل منّه
🌸🌸🌸🌸🌸🌸🌸

ولا لحظه امل منه كبر حبك
اطير من الفرح لو شمعه وبدربك
همت بثنين .. حاء وسين .. نون الدين .. من اسمك
يراعي الجود .. يالموجود .. بيك الزود .. من عزمك
أقدم يالحسن عمري
الك يالمجتبه تدري
اظل حبك اعشگنّه

سيد زيد الفحام
________________________________

قصيدة ... ( مجنون الحسن )


عن حالي الأهل والناس سألـوني
گلتـلـهــم أنه المجنــون عوفـوني
مجنـون بغــرام اهـواي ليـل نـهار
عشگته والعشگ مفضوح بعيوني
گالوا مو طبيعي انشوفك ومحتار
گلتـلـهــم أنـه ومحبـوبـي خلّـوني
گالـوا شسمه محبوبك نريـد اخبار
گلت ماگـول بسمه بهـاي عـذروني
احبه وحبه يجري بالدمه وبعضاي
شرط عندي واگول بأسمه فهموني
إلّا عله النبـي تصلــون وآلــه وياي
وگلكم بالحسـن مجنـون سمعـوني

(( صلـــــوات ))
اللهم صل على محمد وآل محمد

خادم الإمام الحسن المجتبى عليه السلام
سيد زيد الفحام
__________________________________

السلام عليك مولاي ايهاالحسن الزكي يبن رسول الله


جنة جنة جنة. حبك حبيبي جنة
يالحسن يالغالي. عايش بدلّالي
حبك حبيبي جنة
🌸🌸🌸🌸🌸🌸

خلهـم يلـومـوني انت نور عيوني
يالحسن ماعوفك. عاشگك يدروني
يالحسن حبّيـتـك بالگلب ضميتـك
خـادمـك وتبــاهـا گلبي صاير بيتك
شوفه شوفه شوفه. گلبي بغرامه شوفه
عـاشگــك للتــالي. عـايـش بدلّالـي
حبك حبيبي جنة
🌸🌸🌸🌸🌸🌸

يالحسن مجنونك. حاء سين ونونك
بالگلـب مطبـوعـة. اي وحگّ عيونك
اهلـي مـن ربّـونـي لخدمتك نذروني
ياحبـيبـي وروحي. خـادمـك سمـوني
غايه غايه غايه. انت الأمل والغايه
منهجك يحلالي. عـايش بدلّالــي
حبك حبيبي جنة
🌸🌸🌸🌸🌸🌸

انت تاج براسي. اغله من كل ناسي
اشعـر بلمسـاتك. سارية بـأنـفــاسـي
يالحسن محبوبي. شمعه تضوي دروبي
حبــك اليمحيــها. مـاتظـلّ ذنـوبــي
بسمه بسمه بسمه. بشفافي انت بسمه
يالمقامك عالي. عايش بدلالي
حبك حبيبي جنة
🌸🌸🌸🌸🌸🌸

فرحتي ابميلادك. يالحسن وعيادك
كتبـه هـاي الليلـه. اسمي وي وفّادك
والله عيدك عيدي. عـاشـگ وترديدي
للتـهـــاني الليــله. وردة جايب بيدي
فرحة فرحة فرحة. هالليله نور وفرحة
ماتفــارگ بالـي. عايش بدلالي
حبك حبيبي جنة
🌸🌸🌸🌸🌸🌸

ليـلتـك نضـويـها. بالفــرح نحييـها
بمـولـدك يالغالي. فاطـمــة انهنّيـها
يالحسن سهـرانه. فاطمة وفرحانه
تـنـظـــر لأنـوارك شــالتـك مـولانه
آية آية آية تقره لوجودك آية
الله رادك والي. عـايـش بـدلالــي
حبك حبيبي جنة

خادم الإمام الحسن المجتبى عليه السلام
سيد زيد الفحام
_________________________________