https://youtu.be/H5MhYAyUdR4

قصيدة // اول كــرامـاتـك
اداء الرادود ميثم الكعبي
كلمات سيد زيد الفحام

في ولادة رسول الله محمد صلى الله عليه وآله

صلوا على مُحمّد وآلهِ الاطهار. وآلهِ الاطهار
.....................

هالليله ميلاد الرسول الهادي
اشرق علينه وبتهج كل وادي
نور الخليقه سيّد الاسيادي
واجب علينه الليله بسمه انادي

الأحـمَـدْ المـؤيّـد ومَنجمُ الاسرار. ومَنجمُ الاسرار
صلوا على مُحمّد وآلهِ الاطهار. وآلهِ الاطهار
.....................

وجه الرسول تشعشع بانواره
اشرف بشر رب المعالي ختاره
شمس الهداية اشرقت من داره
ميـلاده للأكـــوان احله بشاره

في خُلقهِ تَفرّد. ومتازَ عالاخيار ومتازَ عالأخيار
صلوا على مُحمّد وآلهِ الاطهار. وآلهِ الاطهار
.....................

ربّ الجلاله ابدع بتكوينه
شعّ بجماله والأمل بجبينه
شرّف خصاله حتى ينشر دينه
اسمه مُحمّد هالأسم يهدينه

لولاهُ ليسَ يُعبد الخالقُ الجبار. الخالقُ الجبار
صلوا على مُحمّد وآلهِ الاطهار. وآلهِ الاطهار
.....................

بمـولـد نبينا نـفـرح ونتباها
شموع الولاده بمولده علگناها
يحله الفرح هالليله ليلة طه
ليلة حبيب الباري عشنه اوياها

مَن ذا سواهُ يُحمَد في جنّةِ الابرار في جنّةِ الابرار
صلوا على مُحمّد وآلهِ الاطهار. وآلهِ الاطهار
.....................

انقذنه من عصر الجهل والعتمه
نوّرنه بنوار العلم والرحمه
سوّانه بالإسلام افضل امه
باخلاقه ساد عله الارض وبعلمه

يُرضيهِ مَن تَودّد لعترةِ المختار. لعترةِ المختار
صلوا على مُحمّد وآلهِ الاطهار. وآلهِ الاطهار

سيد زيد الفحام
____________________________________

ولادة رسول الله محمد صلى الله عليه وآله

لساني وگلبي ردد
مُحمَّد يا مُحمّد
تهانينه
يهادينه
مُحمَّد يا مُحمّد
....................

بزغ وجهك جماله. على الدنيا تلاله
شغف گلبي بكماله. يبوالزهره حبيبي

نبي ابمهدك هدايه. يمحبوب السجايه
الك نور ودرايه. يمحبوبي وطبيبي

مُحَمَّد يارسول الله وحبيبه
عجيبه خُلقك ونورك عجيبه
كرم طيب وسماحه
علم نور وفصاحه
الك جينه
يهادينه
مُحمَّد يا مُحمّد
....................

حبيب الله مُحمَّد احبك والله يشهد
الك حبي تجدّد. يبو خلاق العظيمه

لگت گلبي السعاده الك يعلن وداده
فرحت بهالولاده. يبو چفوف الرحيمه

على وجهك يبوالزهره ابتسامه
نشرت الرحمه والحب والسلامه
صفات الله صفاتك
ابد ماكو بغلاتك
امانينه
يهادينه
مُحمَّد يا مُحمّد
....................

صحت هالليله هيه الولاده الاحمديه
نسيمك هب عليه. شرح صدري بعطوره

يغالي بكلشي انته. الك گلبي وهبته
مثل عمري ملكته. يمن تعرف شعوره

نبينا آمنت بيك وتبعتك
شرف كل الشرف اشعر خدمتك
احب آلك وحبك
ضوه الاسلام گلبك
عشگ بينه
يهادينه
مُحمَّد يا مُحمّد
....................

ينبع الخير كلّه. عليك الباري صلّه
فقط حبك اجِلّه. ملك روحي وكياني

شعلت شموعي عشره. وبخورك فاح عطره
ردت مـولاي نـظــره. احط بيها ضماني

دخيلك سيدي انت الوسيله
احبك واليحبك تنتخيله
اليحب آلك تحبّه
وغداً تغفرله ذنبه
تگر عينه
يهادينه
مُحمَّد يا مُحمّد

سيد زيد الفحام
________________________________

رسول الله مُحَمَّد
.......................

مثل گلبك فلا شايف يطش ويهدي حنّيه
گلب ابيض ولا مره حقَد لو شال منّيّه
تحب الخير للناس
رؤوف وكلّك حساس
ينور وتاج عالرس
رسول الله مُحَمَّد
.......................

عجيبه گلبك شكبره وسع للناس يحويها
تأذيك شكثر چانت تحبها وماتأذّيها
شكثر عندك سماحه
اليجيك يشوف راحه
تحب حچي الصراحه
رسول الله مُحَمَّد
.......................

تواضع شايل ورحمه فلا شايلها انسان
عظيم بخلقك العالي يمدحك بيها قرآن
نشرت بحبك الدين
بسيط تشوفك العين
ابو كل المساكين
رسول الله مُحَمَّد

#سيد_زيد_الفحام
___________________________________

لولادة الامام جعفر الصادق عليه السلام

هالليله فرحتنه. بسادس أئمّتنه
نفرح سويه. نفرح سويه
.................

هالليله ميلاد الامام الصادق ونوره
سادس أئمّتنه انولد والشيعه مسروره
ننصب محافل للفرح نتوجّه انزوره
سُبحانه خالق مَنظَره ابهه واجل صوره

مانعرف اسراره والخالق اختاره
يصبح وصيه. يصبح وصيه
..................

لرض المدينه الطاهره نبعث تهانينه
للصادق الليله الفرح يادنيا مَر بينه
يشبه مُحمَّد بالوصف وارث عناوينه
بعلمه وكلامه ومنهجه للجنّه يهدينه

يافرحة انصاره. من شعّت انواره
ضوّه البريه. ضوّه البريه
..................

من جعفر الصادق شرف مذهبنه يتصدّر
أسس مدارس للعلم طول الزمن تُذكر
من طه علمه وحكمته ومن الوصي حيدر
هالليله خل ننسه الحزن ضيف الفرح جعفر

خل نجتمع لجله. ونسولف بفضله
يالجعفريه. يالجعفريه
....................

احبابه احنا وشيعته تجمّعنه بالمحفل
نهنّي الامام ابمولده انصاره نتسَجَّل
بالصادق وجاهه سوه للباري نتوسَّل
يغفر ذنبنه وننسعد بالجنه من نرحَل

گلناها چم مرّه. ما نترك العتره
ولِد الزچيه ولِد الزچيه
..................

نبعث تهاني امن الگلب للمهدي هالليله
يعجّل ظهوره ونلتقي ياربي ندعيله
ظلم النواصب والالم عن شيعته يزيله
مهدينه نقسم لو ظهر مشايه نمشيله

من يرفع الرايه. نوگفله وفايه
اول مسيه اول مسيه

سيد زيد الفحام
____________________________________

https://youtu.be/NU13w55Y5fY
سادس أئمّتنة
ملا علي البديري
كلمات سيد زيد الفحام

( يانائب القائم )

ياحافظ بلدنه يحفظك الله النه
نحتاجك سندنه. ابو وفكرك املنه

يانائب القائم بعيونك اتحطنه
تشهدلك العالم. بالحكمه والفطنه

قائدنه ياسيد علي مرجعنه الإلهي
هذا العراق بصايتك وبزودك يباهي
________________________________

من چفك لمسنه دوه يشافي جرحنه
من بيتك شمسنه تشع ضوّت وطنه

مرجعنه ياغالي. يالفتوتك ثوره
رد الوطن عالي بتدبيرك ونصره

بالفتوه اسست الحشد. ياعزنه وفخرنه
بحچاية فزعتلك زلم وتحقق نصرنه
________________________________

مرسوم القياده الك يالغالي يحله
عن حكمه واراده النصر بسمك تسجله

بيك الشعب حالف ما يتبع لغيرك
يدري النصر بيدك ما يخطه تدبيرك

السستاني محبوب الشعب من كل الطوائف
والدافع وصان الوطن تشهدله المواقف
_________________________________

نقراهن صفاتك زهد تقوه وحميه
معروف بحياتك. مثل حامي الحميه

يا سيد الموقف من تكلف الشدّه
بيك النصر يهتف شما طالت المدّه

شُكــراً الك ياسيـــدي ادّيت الامانه
انصارك احنه عله العهد نفديلك دمانه

#سيد_زيد_الفحام
___________________________________

ولادة فاطمة الزهراء عليها السلام نور ورحمه

صلوات صلوات على الزجية فاطمه
..............

ليلة ولادتــــــها فرح ام الحسن هنّوها
هاي ام ابوها فاطمه بفرحتها لا تنسوها
بكل بيت ياشيعة علي شموع الفرح علگوها
لرض المدينه الطاهره اصواتكم وصلوها

بالافراح بالافراح ويانه املاك السمه
صلوات صلوات على الزجية فاطمه
..............

حورية انسيّة ذهب سُبحانه من سواها
وردة وتشع نور وعلم للمصطفه اهداها
الله اصطفاها عله النسه. وعله البشر علّاها
ارض وسمه بر وبحر. ما تنخلق لولاها

يهالناس يهالناس بيها العوالم هايمه
صلوات صلوات على الزجية فاطمه
..............

مولدها رحمه عله البشر بضعة نبينا الهادي
يا فاطمــه يا فاطمــه هالليله كلنه انادي
وردة مُحمَّــد فاطمــه سُلطانه عالاورادي
اشرق وجههه عله الارض. منها ابتشر كل وادي

كرامات كرامات. الهه الملائك خادمه
صلوات صلوات على الزجية فاطمه
..............

شيعتها احنا عله العهد. هالليله نفرح بيها
ليلة ولادة فاطـمــــة نتبـــارك ونحييها
عالزهره صلّو سلّمو. صلّه الإلـه عليــها
احنا بولاية فاطمــه نخدمها ونواليــها

اناشيد اناشيد افـــراح الهه قائمه
صلوات صلوات على الزجية فاطمه
..............

عدنا الامـام المنتظـر باقة ورد نهديله
امه الزجية فاطمـــه نفرحله ونهنّيله
بهاي الولادة الطاهره دعوة فرج ندعيله
لاشك يشاهدنه ويجي حاضر معانه الليله

مسّرات مسّرات ساعة ظهوره الحاسمه
صلوات صلوات على الزجية فاطمه

#سيد_زيد_الفحام
____________________________________

١٠ رجب مولد الامام مُحَمَّد الجواد عليه السلام

فرحتنه جواديه جواديه
واللمّه حُسينيه حُسينيه
...........

مولد بعاشر رجب. للجواد المنتجب
هيه فرحة كل محب نوّرت عمره
تشعشع الليله الفضه. من وجه شبل الرضا
الليله عيد الرافضه. بتاسع العتره

يامحله معانيه معانيه
واللمّه حُسينيه حُسينيه
...........

بالمدينه الطاهره. شع ضيائه بمظهره
من مُحمَّد مصدره. محله ميلاده
بالمهد يسطع ضوه. كل علم گلبه حوه
اسمه للشيعه دوه سيّد الساده

هالرحمه سماويه سماويه
واللمّه حُسينيه حُسينيه
...........

للجواد المؤتمن. افرح افرح يازمن
گبره للشيعي وطن. تزهي انواره
ضيّه بالكون انتشر احله من وجه الگمر
الليله املاك وبشر. كلها زواره

صرختنه ولائيه ولائيه
واللمّه حُسينيه حُسينيه
...........

الليله ليلة مولده. احنا شيعه انعاهده
نبقه نخدم مرقده. جنة الشيعه
بالمحافل نجتمع. ننثر ورود وشمع
للامامه نتّبع. واجب انطيعه

والشيعه فدائيه فدائيه
واللمّه حُسينيه حُسينيه

#سيد_زيد_الفحام
_____________________________________

مولد امير المؤمنين علي عليه السلام

عيد بهالمسيه. خل نهتف سويه
بميلادك فرحنه. ياحامي الحميه
..................

فجر ١٣ يوم برجب اشرق علينه
نورك ياعلي شع بجماله بكل مدينه
لمحفل مولدك يابالحسن هالليله جينه
جبنالك ورد انت الورد عطرك بدينه

وبهاي الولاده. غمرتنه السعاده
ياوالينه صحنه. ياحامي الحميه
..................

الله شگد ايحبّك ياعلي مَيّز صفاتك
بالكعبه ابتدت يابالحسن ساعة حياتك
حتى يبين لكل البشر صورة غلاتك
لحظة مولدك بالكعبه اجمل ذكرياتك

هاي اول كرامه. يا نور الامامه
وبحبك ربحنه. ياحامي الحميه
...................

ليلة مولدك يابالحسن فرحة وسعاده
مبخوت اليحبك ياعلي ذكرك عباده
رادك للنبي رب العرش قوة واراده
من بعد النبي لايگ الك تاج السياده

بسمك ياولينه. بايعنه ورضينه
عاهدناك احنه. ياحامي الحميه
..................

ياحي بت اسد جابت اسد يسطع بديها
ستقبلها النبي من جابتك سلّم عليها
فرحان بعلي شاله وندب تسمع نبيها
اهلا ياعـلي ياقـوّتي الاتباها بيها

منتظرك نبينه. ياروحه وأمينه
ويّاك انشرحنه. ياحامي الحميه
......................

احنا بمولدك يابالحسن كلنه انجمعنه
مثلك بالبشر ما شفنه واحد لا سمعنه
بس حبك يحيدر آخره ودنيه نفعنه
هالليله احتفلنه بمولدك نشعل شمعنه

ياروح العقيده. غيرك ما نريده
يانسمة صُبحنه ياحامي الحميه

#سيد_زيد_الفحام
_______________________________

هوسات لولادة امير المؤمنين علي عليه السلام

الليله بمولد الكرار. كل الدنيا فرحانة
واملاك السمه بهاليوم. نزلت تفرح ويانه
سجدت يم علي الكرار. تـتـبــرّك ابيبانه

(( بورود الجنة يهنّونه ))
_______________

بالكعبه انولد هاليوم حيدر والنبي ستبشر
سيفه ودرعه بالشدات وحزام الظهر وكثر
بحيدر يهـزم الكفـار. صگّار الزلم حيدر

(( فرحان الهادي بكرّاره ))
_______________

هاي الليله قدسية. وتنـعــدّ بالـف ليله
ليلة مولـد الكرار. روح المصطفى وحيله
نسهر واجب ونفرح ورود الفرحه نهديله

(( نفرح ونهنّي بميلاده ))
_______________

حيدر من بعد طه. موش الرابع، الأوّل
احنه بحبه مجنونين وخل الماقبل يزعل
ميهمنه حچي الشمات. ما نخضع ولا ننذل

(( بس حيدر مانرضه بغيره. ))

#سيد_زيد_الفحام
______________________________________

https://youtu.be/Vav8mLOpsmA

فرحتنه جواديه
الرادود مهدي المنكوشي
كلمات سيد زيد الفحام

ميلاد حبيب القلوب الإمام الحسين عليه السلام

اغله امن الهوى عيشني حبك
عفوك والسماحه وطيب گلبك
محلاهن صفاتك
يحسين وحياتك
اغله امن الهوى عيشني حبك
.................

ظلمه الدنيا من دونك
فدوه عيوني لعيونك
هنيال اليحبونك. فازو بالكرامه

لوما انت ما اسوه
غيرك گلبي مايهوه
حبك بالگلب ضوّه. يابدر الامامه

يحسين العشگ بس بيك يحله
يرخص كلشي لجلك وانت تغله
جنّة بذكرياتك
يحسين وحياتك
اغله امن الهوى عيشني حبك
.................

ضوّه الدنيا ميلادك
گلبي بفرحة اعيادك
يقره الليله بمجادك. وبعثلك سلامي

مولاي شكثر غالي
بس بيك انشغل بالي
خادم وبقه للتالي. لعيونك امامي

عبدك آنه لا تعتقني لحظه
گلبي بلا هواك يموت نبضه
مرخوص لغلاتك
يحسين وحياتك
اغله امن الهوى عيشني حبك
.................

جيت لمولدك اني
يلهج بسمك الساني
غيرك ما احب ثاني مالكني بحنينك

اوفي بحبي وعهودي
شايل باقة ورودي
اتباركلك بزودي. وبغض مبغضينك

ابعثلك يبواليمه التهاني
لاشك تسمع وتنظر مكاني
مجنون بحلاتك
يحسين وحياتك
اغله امن الهوى عيشني حبك
.................

غصباً عاليعادوني
افرح ما يمنعوني
موتو يالتلوموني فرحان بحبيبي

حسين وما احب غيره
عايش عمري من خيره
مجنون بتصاويره محبوبي وطبيبي

اتنفّس هوى حسين واشمّه
افديله العمر كلّه واخدمه
غطيني بعباتك
يحسين وحياتك
اغله امن الهوى عيشني حبك
.................

الليله الزهره فرحانه
بيك وتحضر ويانه
بالمولد يمولانه. وتسجل اسامي

كلمن يفرح وياها
تكتب اسمه يم طه
خادم بسمه تتباها. تشفعله وتحامي

حگهه بمولدك فرحانه امك
الله الشرّفك وختار اسمك
مرضاته برضاتك
يحسين وحياتك
اغله امن الهوى عيشني حبك

#سيد_زيد_الفحام
______________________________________

مولد الامام الحسين عليه السلام

يحسين يحسين انت الحبيب الغالي
يحسين يحسين يالنوّرت دلّالي
...........

حبك سكن وسط الگلب نبض الگلب بسمك
خليني عبـدك سيــدي جنّة عــدن يمك
عند الله مرضي ومنسعد تقديره ليخدمك
يكفيني خير بدنيتي تراب اليمس جدمك

مولاي مولاي خلّيتك ابّالي
يحسين يحسين يالنوّرت دلّالي
...........

بميلادك الليله انشرح گلبي وعلن سرّه
ولساني يلهج سيدي بسمك يبوالعتره
ابعث تهاني للنبي ولفاطمه الزهره
افرح وبارك حيدره وبصمله بالعشره

فرحان فرحان بايعته للتالي.
يحسين يحسين يالنوّرت دلّالي
...........

يحسين الك كلّي مُلك ما امتلك نفسي
خالقني الله لخدمتك يالخدمتك انسي
ياخامس اصحاب العبه ذكرك ذكُر قُدسي
گلبي عله شاطي محبّتك صبح ومسه يرسي

بالله بالله. اسمك يضل عالي.
يحسين يحسين يالنوّرت دلّالي
...........

غصباً على كل ناصبي ننصبلك المحفل
عيد الروافض مولدك وبحضرتك اجمل
ميهمنه حچي الناصبي والفرحه خل تكمل
خلهــم يمـوتـون العـده أئـمـرنه ودّلّل

نهواك نهواك. يالوجهك يلالي
يحسين يحسين يالنوّرت دلّالي
...........

لوما هواك وخدمتك ما عيشن سنيني
عهد الخدامه للحشر ما بينك وبيني
والليله ليلة مولدك سهرانه الك عيني.
شاعلّك شموع الفرح يادنيتي وديني

ويّاك ويّاك كلماتك گبالي
يحسين يحسين يالنوّرت دلّالي

#سيد_زيد_الفحام
__________________________________

هوسات لمولد الإمام الحسين عليه السلام

وجه حسين اشرق ثالث بشعبان
شعشع بالمدينه ونوّر الاكـــــوان
بحجر الزهره امه محور الايمان

(( والهادي ستبشر من شافه ))
..............

الليله الزهــره والـكــرار فرحانيـن
بحسين الحبيب وماكو مثل حسين
يسطـع بالـمـهــد ما بينــها ومابين

(( حيدر ، والزهره توليله ))
...............

سُبحـانه الإله شـأبــدع وصوّر
انزل كل جماله بوجه أبوالأكبر
يوسف من جماله اتحيّر وكبّـر

(( نور الله يشع بوجناته ))
................

احنه عله العهد يحسين متمسكين
ننصب محفلك كل عام متعودين
نفـرح بالولاده وبيك مجنونيـن

(( يحسين بحبك ربّونه))
................

عله اعناد النواصب واليبغضون
نحبك سيدي حب عابس وجون
الليله بمولدك خلهم يموتون

(( عدوانك ماتو هالليله))

#سيد_زيد_الفحام
________________________________________

ولادة قمر العشيرة ابا الفضل العباس عليه السلام

ياهلا بعباس وفّاي الوعد
..........

الليله ليلة مولده وشاع الخبر
شاف عباس استحه وغاب الگمر
ليلة افراح وهنه وطاب السهر
مولد العباس بالدنيا انتشر

شعّت انواره. طشّت اخباره
كفّال لزينب يوم الطف ثاره

(( من شاهد زينب شال چفوفه وسلّم ))

نادته حيّاك ياشبل الأسد
ياهلا بعباس وفّاي الوعد
..........

فرحت ابميلاده ام الاربعه
سمّته العباس ليث المشرعه
من سمعها گماطه بيده گطّعه
چن يگلهه ادلّلي ابنچ وعه

فرحانه تشوفه. ينظر لچفوفه
ترفرف للرايه روحه الملهوفه

(( عرفت مگصوده وخلّت بيده الرايه ))

ربّته لحسين تچّايه وسند
ياهلا بعباس وفّاي الوعد
..........

حسين ابوالسجاد من شافه ابتسم
ياعضيدي يصيـح منّـك والنعم
ياهلا بعبـاس شيّــــــــال العلم
حزام ظهري وبيك شديت العزم

وتصوّر هايه حاچاه بحچايه
بالطف موعدنه انطيك الرايه

(( كيف بالگاله بوجه حسين اتبسّم ))

ياشهم محروس من عين الحسد
ياهلا بعباس وفّاي الوعد
..........

دخلت لعباس زينب شافته
ستبشرت بچفوفها من شالته
ياهلا بكفّــال زينـب نادته
ببتسامه حيّه اخته وحيّته

اخته وشايلته وتحبّه بگصته
كافلهه تريده. للطف ذاخرته

(( من يهضم زينب كافل زينب يمهه.))

بالمهد عباس عاهدهه العهد
ياهلا بعباس وفّاي الوعد
..........

ياهلا بعباس غيره ومرجله
صاحب النوماس فارس كربله
بالصلاة عله النبي نستقبله
نهنٌي امه الطاهرة وعقد الوله

وفّاها عهوده. من ضحّه زنوده
زينب وسكينه. بالطف شهوده

(( يوم الطب بيهه صاحت كلهه دخيلك))

شما تزود جيوش ميّهمّه العدد
ياهلا بعباس وفّاي الوعد

#سيد_زيد_الفحام
___________________________________

هوسات للعباس عليه السلام


وجه عباس اشرق نوّر الكون
كل شيعي بغرامه اليوم مفتون
حضروا بالحفل للمرتضه يهنون
( قبّلهن حيدر چفينه )


بحضن ام البنين ينور عباس
تنضح من جبينه الغيره والنوماس
بس هوه الغيور ورفعة الراس
( وعهوده لحيدر وفاها )

خادم العباس عليه السلام
سيد زيد الفحام

قمر بني هاشم روحي له الفداء

عباس عباس. افعالك هوايه
عباس عباس تشهدلك الرايه
...............

ام البنين الجابتك لبوه
ونولّدت بميلادك الخوّه
حزام الظهر يالوگفتك تسوه
صاحب كرامه وغيره ومروّه

ياصاحب الغيره. ياطيّب السيره

عباس عباس بچفوفك الغايه
عباس عباس تشهدلك الرايه
...............

رادك علي لحسينك تنصره
ونطاك سيفه ورايته الخضره
وستبشرت بنوارك العتره
وهيه بکبرها فرحت الزهره

والزهره فرحانه. بالمولد ويانه

عباس عباس ما تخلف حچايه
عباس عباس تشهدلك الرايه
...............

يا باالفضل متميّزه اوصافك
هيبه وبساله وتبهر الشافك
وحسين ماعفته ولا عافك
وحِمِل الطفوف الشلته بچتافك

ما ينوصف وصفك بس فاطمه تعرفك

عباس عباس آية وتظل آيه
عباس عباس تشهدلك الرايه
...............

ومن سمعت بميلادك واسمك
زينب اجت تعلگ شمع يمك
ياهلا بكافل زينب تكلمك
حره النجيبه الجابتك امك

كافلهه وتشوفك. وتقبّل چفوفك

عباس عباس ذاخرتك لهايه
عباس عباس تشهدلك الرايه
...............

خدامك احنه لمولدك جينه
يا باالفضل وقبل تهانينه
خير وفرح ميلادك علينه
عهد الموالي بينك وبينه

يالغالي وعيونك ما نرهم بدونك

عباس عباس وگفاتك اكفايه
عباس عباس تشهدلك الرايه

#سيد_زيد_الفحام
___________________________________