ـ المقياس الحقيقي للعلاقات ما بي مقدار المسافة البيناتنا ولا حتي مساحة البعد ..🌼

ـ بل بالمواقف البنكون فعلاً محتاجين ليك فيها ونلاقيك جمبنا ، وبي وجودك معانا في ٲوقات شدتنا .

ـ لما كل الناس تسيبنا في عز حوجتنا ليها ونلقاك ٲنت واقف معانا بتمسح دموعنا وبتزيل الآهه الجوانا ..💛

ـ بتتقاس بي مدي صبرك علينا وتحملك لي كل تقلباتنا ومزاجتنا البتباغتنا ، بي تحديك للظروف عشان ما تكون معانا ..

ـ دي الحاجات البتثبت ليك مدي صدق العلاقة البيناتنا دي من غير اي مسمي 🌸
ـ وبتوريك منو الدايرك ومنو المابيك وبتخت ليك النقط في الحروف وبترتب ليك ناسك بحسب المكانة البستحقوها.

ـ عمرها العلاقات ما بتتقاس لي مجرد حبك لي فلان بل مدي الحاجات البتقدر تقدما عشان خاطرو هو ..

ـ يعني ٲنا ممكن ٲقول بحبك واي شي بس لمن تحتاج لي ماتلاقاني وقتها حبك دا يا ترا بفيدني بي شنو ٲسال نفسك ولو عرفتا تجاوب بي جواب منطقي ٲكتفي بيهو لي نفسك وبس ..!

ـ فٲتذكر ٲنو اي زول ليهو زاوية خاصة بشوف بيها الحاجات وبي وجهة نظرو الشخصية فٲذا ٲنت ما متقبل ماملزم تواصل ولما عرفتا تثبت موقفك ما تستمر وبس وكفاية ٲذي ✨


#سمرية

سلسلة

#مودة_ورحمة❤️

الفصل (٩) :


كترتُو عليكم مش 😂👋؟! بس والله إلا ما يجِي يوم وتحتاجُوا ليهم..
عموماً البوست طويل بس ممكن نقول إنو دا أظرف بوست في السلسة دي😂💛.


خلَاص شهر العسَل خلَّص ، وأيام الدّلع والحلاوة عدَّت .. وكل واحِد الفيهُو إتعرفَت ، وجينَا للواقِع ، للحياة الزوجيَة الحقيقيَة...

أول سنَة دي هي حجَر الأساس لبِناء حياة زوجِية مُستقرّة ، وكلما كان الحجَر ده متِين كلما ما كان البِناء سليِم وحيتحمّل الضغط والصعُوبات والعقبَات
بعد الزَّواج وفي أول سنةً تحديداً بتظهر حواجِز كتيرة في طريق السّعادة الزوجِية ، وأصلاً لازم تعرفوا إنو الطريق دا ما مليَان ورُود وقلوب حمراء إيڤري وير😓💕 وإنما إنتوا اللي حتهوِّنوه على بعض ، إنتوا اللي حتحطمُوا الحواجِز دي وتخلوه ملاذ آمن ومساحَة دافِئة

🌸 أول الحواجِز دي هو اختِلاف الطِباع..
كل واحِد إتربى في بيئة مختلفَة ، إمكن بعادات وتقالِيد مختلفة وجمَعكُم النصيب تحت سقف واحِد ، فعشان ما تنصدمُوا ببعَض وبالإختلاف البيظهَر من المعاملة عن قُرب وتصلوا لخيار الإنفصَال .. لازم تفهمُوا إنو مافي زول كامِل ، فالحياة الزوجيَة ما قائمة على التناسِخ في الآراء والأفكار والإعتقادات وإنما على التكامُل ، إنو كل واحِد يكمّل نقص التانِي ، علشان تعيش مع شَخص مختلِف عنّك دايماً خُت قدامك نقاط القُوة والجمال فيه ، في حديث للنبِي ﷺ بيقول فيه : {لا يفرك مؤمِن مؤمِنة ، إن كرِه منها خُلق رضِيَ منها آخر}
يعني بإختصَار أعملوا موازنة بين العيُوب والمزايا ، إفتكروا الحاجات الحلوة لبعَض مش دايماً السيئة وبس
آي هو عصَبي بس حنين ، صح هِي طلباتها كتيرة بس بتحترم كلمتِي...إلخ

🌸 الحاجِز التاني هو تدَّخُل الأهَل
ومن هسِي بقول ليكم ما تخلُّوا زول يعرف عنكُم غير كُل خِير مهما كان -ربنَا حيسامحكُم عالكذبات الزي دِي😄-
عشان تدَخُّل الأهل الكتِير بيخلِق فجوة كبيرة بينكُم وبيكبِّر الموضُوع زيادة ، حتى في مشاكِل مرات إنتوا تنسوهَا وأهلكم يفضلُوا متذكرينهَا ليكم كدَا طول العُمُر😂 ، بس طبعاً ممكِن أحياناً تستشيروهُم -تلميحاً لا تصريحاً- ، وكمان مثلاً لو هو بيضربِك أو بسِئ ليك جِداً .. يبقى هنا تدخُّل الأهل لازم قبل ما يتطوّر الوضِع ، إنتِ أمانة في رقبتُو ما عربية إشتراها ويعمل فيها اللي عايزو

🌸 الحاجِز التالت هو المقارنَة بالعلاقات السابِقة..
مثلاً ، غالباً .. غالباً لو فيكُم واحد كان على علاقَة سابقة -سواءً خطبة أو زواج أو حتى علاقة حُب- بيقعُد يقارِن ، خطيبتي الزمان كانت وكانت ، راجلي المات كان وكان ، طليقي كان وكان...إلخ ، الموضُوع دا مهين جداً ، لأنو ماف زول بيقبَل يقارنُوه بحبيب قديم ولاّ زوج سابِق
فاااشنو الماضِي ماضِي والحاضِر حاضِر
(سامعه زول قال الماضي حاضر -دا إسم مسلسل كوري يا جماعة-😂 ، تحية للكيبوبر)

🌸 الحاجِز الرابع
التعلُّق الكبير بالأهل ، في أول سنة الواحد بكون ما قادر ينسى سريرو ولا طبِيخ أمو وبيفقِد قعداتو الطويلَة مع أصحابو ، فمرات من الشغُل مثلاً الواحد جرررري علي بيت أهلو
ولا تلقاها هي دايماً ماشة بين ناس أمها ، وكل مشكلَة كبيرَة ولا صغيرة شايلة هدومهَا ومقضية الإسبوع عند أهلها..
أها يخوااانا متين حتقعدُوا تتفاهمُوا مع بعَض وتبدوا حياتكُم!😑
كل وقت بتبعدُو فيهو عن بعض -من غير عُذر حقيقي- بيخلق فجوة بينكم مع الأيام ما حتقدرُوا تسدّوها..
فااا سيبكُم من الإتعودتُوا عليهو في بيت أهاليكُم ، وحاولُوا تشكِّلوا لغة جدِيدة خاصة بيكم إنتوا وبحياتكُم الجاية
أول سنَة دي قلِّلوا زيارات لبيت العيلَة بالله قدر الإمكان ، وحاولوا أفهموا بعض كويِّس بدون أي تدخُّل خارجِي😙💕

🌸 الحاجز الخامِس هو التعوُّد..
تجي تنومِي في أمان الله فتصحي الصباح وإنتِ مسؤولة عن فردة الشُراب الكُحلي لشخص آخر على الكوكب😂 ، قبلها ما كنتي مسؤُولة غير عن نفسِك ، قبلها ما كان عندك إلتزامَات تجاه زول غيرَك ، وفجأة بتلقى نفسك مسؤول عن زول تاني ، أكل وشراب وحُب وإحتواء وإكتفاء وتلبية رغبَات...إلخ ، فاااشنو الواحِد يصبُر .. الصبُر جبُر ، وشوية شوية حتتأقلمُوا علي بعَض وتكون المسؤولية جزء أساسي من حياتكُم

🌸 الحاجِز الخامِس التعجُّل..
يعني الواحد بكون دايرهَا تتغير بين ليلة وضُحاها ، وهي دايراه يبطِل عادات معينة بين ليلة وضُحاها ، لازم نراعي لإنو الطرف التاني دا بنِي آدم برضو وعاش جزء كبير من حياتُو على الطبِع الإنت مش راضيهو فيه ، ما بُنِي في سنين لا يتغيّر في أيام .. فالنُصح بالمعرُوف وبالهداوَة
والتقبُّل ثم التقبُّل ثم التقبُّل!!

🌸الحاجز السادس تغيير الأولويات :
الواحد طول عمرو عندُو أولويات بيرتب عليها حياتو حسب أهميتها أهلَك ، شُغلَك ، أصحابَك ، الجمب ، الكورة...إلخ
بس هنا الوضع إختلَف ، بقيت مسؤول عن زوجة وبيت وقريباً عن أسرَة ، فلازم يحتلّوا مكانة مُناسبة بين مشغولياتَك الكتيرة دي ، المكانة اللي تكفيهُم وتشبَع رغباتهم بما يرضِيهم قد ما تقدَر
وما تهمِل مرتَك لمن تفتِش الإحتواء والأمان عن حد غيرَك ، إياك تفقد الأمان فيك وتحس بالغُربة وهي جمبّك
وإنتِ برضو طبعاً ، لو كنتي شغالة ما تهملِي بيتِك ، وحتى لو كنتِ سيدة أعمال وما عندِك وقت للطبيخ والفهم دا خلي عندك إن شاء يوم في الإسبوع تعملي ليهو حاجة من يدك ، رتبي أولوياتِك كويس وما تقصري تب وإلا حيدبِّلوا فيك🙆

#نصائح_لطيفة_عالماشي💛 :

🌸 لو دوختِي في أي وقت وإنتِ راكبة عربيتُو وعايزة ترجِّعِي حاجة أكلتيها في بطنِك -الله يديِك أب عربية قولي آمين😂- خليهو يركُن بالجمبة ، دا عادي ممكن يفتح ليكِ جيبو ترجِّعي فيهو بس العربية لاااااsorry sorry .. مااا حيسامحِك😂

🌸 الأفلام غير الواقِع ، يعني لمن يكون قاعد يحضَر في كورة مهمّة ما تجي تقاطعيهو وتعديها ماشة جاية قدام وشُو وفجأة تتذكرِي ليهو كل الحاجات المهمة الكنتي ناسياهَا وتتذكري المسلسل الناسياهو من شهَر عالـ mbc4 ، يااخي لو طلعتِي حامل زاتو ما تقولي ليهو الخبَر دا وهو مركِّز مع الماتش ، معليش بس أجّلي المواضيع دي بعد الكُورة عشان ما تسمعي رد ما يعجبِك(ما تقولي ما كلّمتِك😂!!)

🌸 إياكِ تكوني نِد لأمه ، الراجل الصالح مستحِيل يرضِيكي على حساب أمه مهما كَان بحبِّك ، خليك ذكية حبيبتي أنا وأكسبِي حماتِك تفوزي بيهو وتفوزي بيها💕.

🌸🌸🌸🌸🌸🌸🌸🌸

الدكتور #كرِيم_الشَّادلي في كتابُو (لم يخبرُونا بهذا قبل أن نتزوَّج) بيقول نصائح حلوة شديد -وظريفة في نفس الوقِت- جبت ليكم منَّها :
🌸 بمجرّد أن يُغلَق عليكما بابٌ واحِد ، حاوِل أن توطِّن نفسَك على أنه ليسَ في الإمكان أفضل مما كان ، زمن الإختيارَات إنتهِى ، فلترضَى بما هِيَ عليه ولترض هيَ بما أنتَ عليه

🌸ما تدخُل الزواج بقيَم المُجتمع وتجارُب الآخرين ، إكتشِف بنفسَك فرُبما ما كان شراً لغيرَك خيرٌ لَك

🌸 لن تتصرَّف زوجتك كرجُل ، ولن تتفهّمك كما يفعَل صديقَك أشرَف ، فأشرف هو أشرَف حيفكّر معاك بعقلانية كالعادَة ، وزوجتَك هي زوجتَك ، عقلها بين ضلوعهَا وعاطفتها
ودا ما معناه إنك ما تستشيرهَا ، بس بلاش تقارِنها بأصحابَك

🌸 ما تقلَق لما تتهمَك بإنك ما بتحبَّها عشان نسيت تجيب (الزبادِي ، الكريمَة الوصّتك ليها ، حفاظات الأطفال...إلخ) ، إبتسم بس وما تنسَى تجيبهم المرة الجاية ، أوعى تنسَى😂

🌸 لو هي إشترَت ليك حاجة ولا أشارَت ليك إنك تشتريها وعجبَت أصحابك ، كلمهَا ، الحاجة دِي ممكن تبسطهَا جداً ، ماف زول ما بيحب المديِح على إختياراتو سبيشلي النسوان😂

🌸 ما معنَى إنها صدّقت كذبتَك إنها صدقتها فِعلاً ، ما تتمادِى وتستهِين بذكائها لأنها حتكشفَك حتكشِفَك😂✌️

🌸 مهما كانَت مرتَك طيبة ومتديِّنة وجاهلة بالتكنولوجيا حتعرف الباسويرد بتاعك حتعرِفو .. كيف؟؟ ما تسألني😂

🌸 ما تسخَر من هوايتها ولو كانت تافهَه في نظرَك ، بالعكس ذكرهَا بموعد الحلقَة رقم 216 من برنامج الطبخ ، جيب ليها ألوان للماندالا ، بإختصار أدعمها💛

🌸 لو حكَت ليك أي أسرار (عنّها ، عن أهلهَا...) إياك تستخدمها ضدّها وقت الزعَل ، ما حتحكي ليك تاني

🌸 لمن تسألك من يُومك ، خليك جاهِز بقصة ترويهَا ليها ، إجابات من نوع (الحمدُ لله ، عادي ، ماشي الحال...إلخ) هي آخر ما تودّ سماعه (بإختصار أرغي يا برنس😂)

🌸 دايماً إحتفِظ بهدية في مكان خفِي ، إلّا ما يجي يُوم وتحتاجهَا لمن تنسى مُناسبة من قائمة المُناسبات البتعني ليها كتير (يوم ميلادها ، ذكرى زواجكُم...إلخ) طلّعها ليها براحَة وخليك شِفِت ما تنسى تلومها (معقولة بس أنسى اليُوم دا😂💕)

🌸وضع الأتربة والأوساخ تحت السجّادة لا يعنِي إنكَ قمت بالتنظيف ، وكذلك الموضوع بالنسبة لأخطائك -ما تنساهَا بعد تعدّي المُشكلة بتكون قاعدة عندها في الإرشِيف- فاستعِد للكلام عنها في المشاكل الجاية🙊

🌸 في حاجات كتِيرة مهمّة بالنسبة ليها (الإحترام ، تقدير جُهدها ، تفهُّم مشاعرها...إلخ) ، وإحساسها بالأمان -ودا الأهم- فمهما كنت غاضب ما تزعزع الإحساس دا "ما تهدِّدها مثلاً" ، حاول إتجاوز عنها قدر الإمكان لأنو فطرتهَا وتركيبتها النفسِية رقيقة وبتختلِف عنك شديد

🌸 أعلم أننا كرِجال نحب المرأة الرشيقة -عدا الشعب السوداني طبعاً😂- فدايرها إنجلينا جولي أبقى ليها براد بيت ، مع العلم إنو أنجلينا ما مهرودة في المطبَخ وعندها ميزانية وفراغ بتمشِي فيهو للتمرين

🌸 حاول دايماً تعبّر عن ضيقَك من إعجابات سِهَام وكومنتات دُعاء و..إلخ عالفيس بوك ، أخبرها دائماً إنك ما راضِيان والله عن كدا😂 -بإختصَار احترِم غيرتهَا-

🌸 دايماً مهما إنشغلتُوا خلوا عندكُم وقت خاص بيكُم ، يوم في الشهَر تطلعُوا فيهو ، تتعشُّوا برا ، تتمشُّوا مثلاً ويا حبذا لو مسكتَ يدها وإنتوا برا البيت بدل ما تخليها جارية جري عشان تقدر تمش جمبك ، تفاصِيل بسيطة بس بتفرِق جداً💕

🌸 وآخر حاجة بنصحك بيها..
حافِظ على رصيد الأمان بينكُم ، الأمان أدفى وأعمَق من الحُب ، ودا الحتتذكروه لو الدنيا إتقفلت في وشّكُم، زي أي اتنين متزوجين حصل خِلاف وبيتشاكلُوا ، فقامَت هي علَّت صوتها عليهو ، دخَل أبوها ولقاها بتعلِّي صوتها علي زوجهَا وبتتشاكل معاه فرفَع يدو عشَان يضربهَا (وكأنو بيقول ليها كيف تغلطِي كدا ، أنا ما ربيتِك علي كدا..)
فجرَت وإتخبّت وراء زوجها -الكانت بتشاكِل فيهو هسي- وحضنته من وراء ضهرو وإتحامَت بيهو من أبوها ، فزوجها عاين ليها وضحِك ودافَع عنهَا وإنتهَت المُشكِلة - دي عائشَة رضى الله عنها والزوج دا هو النّبِي عليه الصلاة والسّلام والأب دا أبو بكر رضِي الله عنه (القصة دِي مذكورَة في الصَّحيح)
جرت عليهو لأنو أمانها من الدُنيا حتى من أبوها ، لأنو سندها وطُمأنينتها وكتفهَا اللي بتتسنِد عليه

- البوست طويل مش😂💔
بس والله كنت بضحَك طول الوقت وأنا بكتِب فيهو ، ظريف لطيف😂 ، ربنَا يجمعكُم باللي يهوِّن عليكم الدُنيا ويفهمكُم ويسندكُم لآخر يوم💛


_ الناس البحبو الإطّلاع ، دي كتب حتفيدكم في الموضوع دا عموماً 📚🌸:

● هيبتا - محمد صادق (هي رواية ، بس ظابطة جداً ، بتشرح المراحل البتمُر بيها كل علاقة بطريقة حلوة شديد ، حتفتّح عيونكم عالدنيا).

●واي مِن لوڤ مزز "Why men love mozz"- إيهاب معوّض (كتاب حيخليك تفهم النفسية والعقلية البفكر بيها كل من الرجل والمرأة بس بطريقة غريبة شديد ، تافِه شويتين-دمو خفيف-😂 بس والله كتاب مليان ، أدب على علم نفس على إجتماع .. للناس البتفهم حتطلع منو بمعلومات ممتازة جداً ).

● سندريلا سيكرت - هبة السّواح (كتاب مش للبنات بس ، ما حـ أقول ليكم غير إنو كتاب كل واحد فينا محتاج يقراه).

● (أزواج وزوجات أمام الطبيب النفسي - روعة الزواج - الغيرة والخيانة - الطلاق ليس حلاً - الزوج أول من يشكي - امرأة في مِحنة - مشكلات عاطفية ) ديل مجموعة كتُب رهيبة لدكتور عادل صادق ممكن تفيدكم جداً ❤.

- البوست دا سمح حق سلمى المصباح ، شوفوه💛
https://m.facebook.com/story.php?story_fbid=10158289031716351&id=660141350

.

(النقاط أعلاه لخصتهَا من كتاب يوميات مأذون لأحمد بدر ، وكتاب لم يخبرُونا بهذا قبل أن نتزوّج لكريم الشاذَلي وضفت عليها من عندي ).

نتلاقى في البُوست الجاي بإذن الله💛

#مريم_الشيخ♥

@theorkeed

" تٲكد ٲنو ربنا بيلطف بيك ، في كل اللحظات اللي بكون قلبك فيها مليان كمية من الحزن ، فربنا بيسوق ليك يا ٲما الكلمة الطيبة ، ٲو شوية ناس لطيفين.🌸
المهم حتجيك لحظة كدا حتحس بي شعور رحمة ربنا المحاوطاك في كل الٳتجاهات دي ، فاللحظة دي ممكن تخدر حزنك ٲو تنسيك ليهو للٲبد ..💙

فلاذم نحمد ربنا علي طول ،وفي كل حالاتنا وما ضروري نجري ليهو لحظات ٳنكسرنا ، فربنا بيتقبلك في كل حالاتك وبس يعني "

#سمرية

سلسلة

#مودة_ورحمة❤️
الفصل (10):


زولتنا وزولنا مشوا الدكتُور عشان تفحَص لأنها بتستفرغ كتير آخر فترة😂 ، المهم الدكتور بعض الفحص قال ليهم
#مبروك_المدام_حامل💕 وهاك يا أحضان ما يشيِلا الدَّرِب..

💛أعظم نعمَة ممكن ربنَا يكرِم بيها أي اتنين متزوِّجين إنو يرزقهُم بذرية طيبَة ، من غير قلَق ولا تأخير ولا مشاوِير للدكاترَة ، ولا معط النَّاس (أها مافي حاجة كِدا ولا كِدا ، أها مافي حاجة في الدّرِب ، أها ما دايرين تجيبو ليكم جريو..إلخ!😒)

بمُناسبة المعِط دا فحقيقي ياخوانَا نحن مصطلَح" خصوصية " معدوم عندنَا عدم يا كافِي البلاء ، صعبَة ياخي تمسِك خشمَك دا علِيك؟؟؟
حامل ما حامل .. دي حاجة ما بتخُصّك يا شعب يا سُوداني ، مالك ومالهم يَاخ ، داير تربِّي ليهم أولادهم إنتا!!

لا وكمَان في ناس بعد تجيبُوا المولود الأول .. طوالي يجوا ناطِّين ليك (أها ما دايرين تجيبوا ليهو أخو!) نو كُومِنت طبعاً😑
في ناس حقيقي بكون عندهُم مشكلَة في الإنجاب ، وناس تانية ما دايرين يلدوا على طول كدا ، وناس تانية ما خلو دكتور ما مشوا ليهو وما عندهم مشكلة بس الله ما قسم ليهم .. فسُؤالَك ليهم غير يجدِّد وجعهم ما حيعمَل ليهم حاجة
خشمَك وعندَك😒 ممكن؟

💛 طيب نرجَع لزولنَا وزولتنَا..
الربنَا منَّ عليكُم بالنعمَة دي فالحمدُ لله
وجود طِفل في حياتكم معناه نعقَل ونهدأ بعدا..
وجُود طفل يعنِي مسؤوليَة ، يعنِي أمانة ، يعني اللي فَات دا حمادة واللي جاي دا حمادة تانِي خالِص

#نصائح_مهمة💛
● ما تخلِّي راجلك يحسّ إنو البُساط إنسحب من تحِت رجليه ، ما عشَان بقيتي حامِل تنسيهو وتقصِّري في حقو ، ما تخليهُ يا بتنا يغيِر من الشافِع حتى قبل ما يجي للدُنيا😁.
وإنت لازِم تتفهَّم وضعهَا ، وإنو في تغيُرات جسدية ونفسِية بتحصَل للحامِل ، لازم تقدّر وضعها يا مان وما تجهِدها أكتر من اللازم ، وإتحمَّلها ، في واحدات عديل كدا بكونوا ما دايرين يشوفوا وشك دا ، بعرف لي واحدة كرهت راجلا أيام الوحم والتعب داك وما رجعت ليهو إلا بعد ما ولدت😂 ، المهم إتحمل أي شئ منها وأصبُر ، فترَة وبتعدّي💕

● إياكُم والشكَل والنقاشات الحادة قدام البيبي ، آي هو في بطنها عارفة😂 ، بس بيسمَع وبيتأثّر بنفسيَة الأُم ودا كلام علمِي مثبت بدراسات عالمية معرُوفة ، وبالتالِي دايماً خُتي يدّك على بطنِك وأشبعِي روحه وجسمه من الكلام الطيّب ، رتّلي قرآن ، أذكار..إلخ
وراعِي للأمانة اللي إستودها ربنَا فيك ، إتغذي كويس وتابعي مع طبيب (النصايح الذي دي أهلكم ما بيقصروا😄)

● أوعَى تفرّطي في حقوق ربنا عليكِ في فترة الحَمل من صلاة وغيرُو ، وطبعاً موضُوع الصُوم دا يفضَّل إستشارة طبِيب يورِّيك الأفضل ليك ولطفلِك ، ودايماً ذكّري نفسِك إنك في نعمَة كبيرَة ، متخيلَة إنو حتّه منِّك ، وإنو حيبقى شبه أبوه وشبهِك ، روحكُم إمتزجَت في شخص واحد وبقى حلمكُم من لحم ودَم. ❤️

🌼 تسمِية الطِفل :
● قبل الوِلادة أقعدِي إنتِ وزوجك قعدة مودّة وشُورى وإختارُوا اسِم للبيبي ، اسم الطِفل من حقِّك إنتِ وأبوه ، وما من حق آي بني آدم تاني يفرض عليكم اسم معيّن وفي الشّريعة الأولوية للأب فاابس إتفقُوا المُهم😂 ، ما عشَان ود خالتَك مات، أمك تجي تقول ليك يا تسمِي عليهو يا ما عافيَة ليك .. بكرة( بخيت) ولا (جاد الله) دا يقول ليكم غيرو لي اسمي دا هسي😂!

الإسم الحتختاروه حيبقى ملازِم ليهو طول حياتو ، فاختاروا اسم مُناسِب عليكم الله ، ما تخلوه بعد يكبَر يخجَل من اسمو دا ويكرَه اليُوم الإتولد فيهو
بالنسبَة للأولاد ، ففي الشّريعَة مراتب الأسماء خمسة :

- الأولى : عبد الله وعبد الرَّحمن
وذلك حسبما ورَد عن النبي ﷺ : {أحبَّ الأسماء إلى الله عبدُ الله وعبد الرّحمن} رواه مسلم.

- التانية :
سائِر الأسماء المعبّده لله عزّ وجَل زَي عبد الرؤوف ، عبد الإله ،..إلخ.
- الثالثة :
أسماء الأنبياء والمُرسَلِين
- الرابعة :
الصّحابَة وعباد الله الصالِحين وأهل العِلم ، يستحَب التسمّي باسمائهم الحسنَه اقتداءً بهِم وطلباً لرفعة الدرجة.
الخامِسة :
كلَّ اسمٍ حسَن ذُو معنىً صحيح جميل
والبنَات كلّ اسم معناه حسُن وجمِيل
(لازم تعرِفوا معنَى الإسم ، ما تلطشوا ساي).

بالمناسبَة..
يجوز إنو الواحد يغير اسمو إذا كان معناه غير حسُن ، أو كان فيه مخالفة زي (عبد النبي ، عبد الرضا ، عبد الحسين...إلخ)
وقد وردت أحاديث كتيرة في السنة عن إنو النبي غير أسماء بعض الأشخاص في عهده
الأدلة في الرابط :
https://islamqa.info/amp/ar/answers/14622


🌼 تحنِيك المولُود :
والتحنِيك هو وضع شئ حلو في فم الطِفل أول ولادته كتمر أو عسَل
عن أبي موسى قال : {وُلِد لي غُلام فأتيت به إلى النّبي ﷺ فسمّاه ابراهِيم وحنّكه بتمرَه ودعا له بالبركة ودفعهُ لِي}.
ويستحسَن يعني يودوه لزول من أهل الصلاح يحنِّكه.

وفي فوائد صحية للحاجة دي ما دايرة أمعطكُم بيها ، المهِم هو فِعل مستحَب وله فائدة صحية كبيرة للطفل (مذكورة بالتفصيل في كتاب يوميات مأذون)
وبرضُو قراءة الآذان في أذنه وإعلاناً بإنو مسلِم

🌼 حلق شعر الرأس
روى الترمزِي عن سمرة قال : قال رسول الله ﷺ : {الغُلام مرتهَن بعقيقتهُ يُذبح عنه يوم السابع ، ويُسمَى ، ويحلق رأسهُ)
ودا دليل على إستحباب حلق رأس المولود (الذكَر) ودا من السنة وليس واجِب
ولازم تكون حذِر لأنو بشرتو لسه رقيقة ، وحلق الشعر دا ليهو فوائد صحيّة كبيرة جداً منها تنشيط بصيلات الشعر ، تقوية جلدة الرأس..إلخ-لمن يهمّه الأمر مذكورة بالتفصيل في كتاب يوميات مأذون-

● الخِتّان :
وكلنا عارفِين الختّان ، وبيُسمى عندنا (الطهُور)
لم يَرِد ذكرَه في القُرآن ، وإنما له أصل في السُّنة ، وهو حدِيث النّبي ﷺ : { خمسٌ من الفِطرَة : الإستحداد ، والختانُ ، وقصّ الشارِب ، ونتف الإبط ، وتقليم الأظافِر}
بالنسبة لحُكم الختّان :
فعِند عامَة العُلماء #ختان_الذكور سُنّة ، وعند بعضهُم سنةً يؤثَم تارِكها فهُم يطلقونها على مرتبة الفرض
بعضهم يختتن بعد الولادة وآخرون عند عمر السابِعة وفي الحالتين يجِب أن يتم على يد طبيب متخصِّص أو ذو خبرة حتى لا يتأذى الطِفل نتيجة للمُمارسة الطبية الخاطئة
أما بالنسبة للنّساء فقد ثبَت وجُود ضرر صحِي لذلك وتم منعهُ ، فالناس البيتبلّوا علي الإسلام ومنظمات حقُوق المرأة فعندنا في السُّنة النبوية (لا ضرَّر ولا ضِرار) ، وقد صدر قرار من المجلس الأعلى للبحُوث الإسلامية بالأزهر ووفقاً لليونسيف بإن #ختان_الإناث " لا أساس له في الشريعة الإسلامية الأساسية أو أي من أحكامها الجزئية ، وأنه ضار ويجِب ألا يُمارس"
فالإسلام لم يحُثّ عليه ولم يدعُو له وكل الأحاديث التي وردت في مشروعية خِتان الإناث ثبتَ ضعف إسنادهَا.!

الرابط دا فيهو ورقَة بحثية كاملة شامِلة قدمها الشيخ يوسف القرضاوِي في مؤتمر العلماء العالمي ، وأظهر فيهو الموقِف الصحيح للإسلام تجاه الموضوع دا ، وحلّل فيهو كل الأحاديث الوردت عنو ، بحث شامل كامِل مفصّل👇
https://www.al-qaradawi.net/node/4306


🌼 العقيقة أو (السِّماية) :
وهي ما يُذكَّى عن المولود شكراً لله تعالَى ، وقد إتفق مجموع الفقهاء على أن الذّبح يستحَب أن يكون في اليوم السّابع ، فإن لم فالرابع عشَر ، فإن لم فالحادي والعشرين ، بإختصار لا تفوّت عند تأخيرها ، ويستحسن أن تقسّم إلى ثلاثة أثلات ، يأكلون الثلث ، ويطعم من أراد الثلث ، ويتصدّق بالثلث الثالث ، ولا يُشترط ذلك ، فإن أراد قسمها لنصفين أو يأكلها كلها ، أو يتصدّق بها كلها ، المهم الأفضل يأكل منها ويتصدق منها.

ولهنا نكون وصلنَا لنهاية البُوست ، نتلاقى في البوست الجاي ونتكلم فيهو عن #التربية🌼.

(بعض النقاط مذكورة أعلاه بتصرِّف من كتاب يوميات مأذون لأحمد بدر)


#مريم_الشيخ♥


@theorkeed

#ٲحلامنا_الراجينها


"يا
حُلمنا
المرمي
في
جب
الحياة
صبراً
عليك
فغداً
ستٲتي
الغافلة "♥

 يخوانا كل زول فينا عندو حُلم وعايز يحققو ويمكن لحدي اللحظة ما قدر يصل فٲنا بقول ليك ما تستسلم لانك عشان تصل حتمر بي ظروف كتير ماتسمح ليها تكون عايق في طريقك ، حتمر بي لحظة يٲس وٳحباط ما لاذم تقيف فيها وتعيش جو السوداوية الفيها ،حتلاقي كمية ناس حتقلل من شٲن حلمك وتكسر مجاديفك وتحاول تعدم حلمك البسيط 💔.
لو ماقادر تجتهد علي حلمك ما تفكر تحلم ، لو ماعندك ٳيمان بي نفسك ما تحلم ، لو ما واثق من نفسك ما تحلم ، لو ما حتقدر تتحدي الناس الحتحبطك ماتحلم ، لانك كدا بتدخل معركة مسبقاً ٲنت مهزوم فيها فما تفكر تخش فيها عشان حتخسر نفسك ٲكتر من ٲنك تكسب حلمك ..

لما ٲحدهم قال لي " تجارب الحياة لا تعمم علي الجميع " فكرتا فيها ولقيت ٲنو عندها كم جانب مابس في العلاقات كمان في نظرتك لي ٲحلام غيرك يعني ما تبني حلمك ع ٲحلام غيرك ، يعني لما تشوف ٲنو نفس حلمك فلان قدر يصل ليهو ساعتها ما تحاول تعامل حلمك بنفس طريقتو لانو كل شخص معركتو مختلفة وتجاربه مختلفة فما تقعد تعمم نتائج غيرك دي وتقارن نفسك بيها ..


صح كتار وصلو لي ٲحلامهم بس هل ٲنت شفتا مدي الحروبات العاشوها ومدي الخسارات اللي ٲتعرضو ليها اكيد لا يبقي ما تبني حلمك علي حطام غيرك اللي انت بس ماشفتا منو غير انو في زهرة في وسطو ..


حلمك من حقك ولاذم تحققو بي طريقتك أنت بي ٲسلوبك وعلي قدر قوة تحملك ، مهما كان كبييييير خيالي بس مامستحيل ماف مستحيل الا في قاموس الانسان المتخازل اللي ماقدر يصل اللي بحاول يخلي تجارب غيرو شماعة .


طيب ٲنت منتظر شنو خت حلمك قصاد عيونك وقوم عافر عشان تصنعو ما تتنازل ما تتكاسل وصدقني حتصل ، حلمك حافظ عليهو وٳحتويهو ودسو في كل سجدة ♥


قوم عشان حلمك راجيك عشان مستقبلك عشان تبني نفسك وتكسر عين كل زول ٳستهان بيك في يوم انا ذي وذيك عندي كمان ٲحلام مؤمنة بيها سوي حٲقدر ٲحقهها ٲو ٲحقهها ومهمة بالنسبة لي حتي لو ماكانت بتعني غيري وانا حٲصل ليها بأذن الله حقول جزء منها عشان انا وٲنت نتشجع ونتحرك " من ٲحلامي ٲكون شخصية مختلفة ٲحفظ القراءن او حتي لو ٲجزاء وٲكون ملمة بالدين وٲفتح لي مركز تعليم مجاني  وٲقدر ٲتحصل علي درجة علمية كبيرة وٲكون ٲخصائية ٳجتماعية هادفة وعندها رسالة واني اقدر اخدم ٲكبر شريحة في المجتمع واكون متطوعة وعندي منظمة   وٲسافر لي كم دولة  وٲني ٲكون رسامة محترفة في يوم من الٲيام وكاتبة وانو اكون حريفة في الهاند ميد وتفاصيل كتيرة كفاية لحدي هنا " 🙈♥ ..

شايفين دي من ضمن اللستة بتاعت ٲحلامي اللي كل سنة بكون فيها حلم جديد ويمكن لحدي اللحظة ما قدرت ٲحقق منهم واحدة بس ماشين في السكة نمد ولا بد تجي اللحظة المناسبة والفرصة الٲنسب وٲنا عندي كل ثقة يبقي ٲنت كمان لاذم يكون عندك ثقة عشان تجينا اللحظة اللي نقدر نفخر بي حلمنا ونشوفو واقع قدامنا فما تستسلم وقوم نفض غبار السنين من حلمك وناضل عشان تصل ...🌸

" يا
حلمي
صبراً
للزمان
مهما
تعثر
بيك
طريق
باكر
بتتحقق
ضمان
وتصبح
ٲجمل
مما
كان ✨"
وذي ما قلتا ليك ماف مستحيل يا انسان وعفواً وحباً♥
#سمرية

" لاذم تعرف يا ٲنسان ٲنك مهم شديد ، بالرغم من عبثية الظروف والضغوطات ، بالرغم من الناس البتحاول تحسسك ٲنك ماليك قيمة، عاين لي هنا ٲنت مهم للٲبد،وٲنت محور الكون جوا عينهم .وٲنت رهيب وعظيم وجميل بكل ملامحك وتفاصيلك ، بس كل مافي الٲمر ٲنك مافي مكانك الصح والبناسبك البديك قيمتك كما تستحق ، وما حوليك الناس الصح القادرين يشوفو قدر شنو ٲنك مختلف ومميز،
فغير المكان وٲختار الناس الصح وخليك واثق من نفسك يا حلو يمنعنع 😘💙"

#سمرية

المسافات عمرها ما بتكون حيطة عشان تنهي علاقة
ما كل زول جمبك حاسس بيك ، وقرب زول ليك احيانا ما بالمسافات كم من قريب ومعاك تحت سقف واحد وهو غريب ، وكم من غريب وهو اقرب ليك من كل الحواليك ، محتاجين نفهم إن المسافة عمرها ما كانت مقياس لي علاقة سواء بالقرب او البعد المقياس الحقيقي للعلاقات هي إلتقاء الارواح 🖇❤️ ✨

" إذا لم يزدك البُعد حبآ فأنت لم تحب حقآ "

@mohammed_alkhatim

ليه الغيرة مستعدة توصل اتنين لي انهم يختارو " نهاية العلاقة " ليه الطرفين ما مستعدين يقعدو ويتفاهمو بدل يختارو الانفصال ! وليه بشوفو ان الراحة ليهم الاتنين في ان العلاقة تنتهي ! ليه ما يقعدو ويشوفو حلولو وما يفكرو ف ان كل مشكلة ممكن تتحل ! وليه دايما اول خيارات بتكون عبارة عن " بلوك " يسيبو بعض " لو خُليت خربت يا جمااعة ولا من البداية هي تسلية وتقضية زمن وبس ! الحب ما عبارة عن كلمة للتسلية او تقضية زمن علي الفاضي بحبك معناها عايز ابداء معاك رحلة وتخلص بي عقد قران تكون رحلة ابدية ما اول ما نواجة مشكلة واحد فينا يتخلي عن التاني ف نص الطريق 💔 اتشاكلو واعملو كل حاجة بس خلو حكاية نهاية دي بعيدة ، المشاعر ما لعبة والبمشي تاني ما برجع والبحبك من قلبو لو خسرتو مافي حاجة بتعوضو وبس 🤷🏻‍♂️

@mohammed_alkhatim

وقت تلقونا بنصدكم من البداية دا ما خوف من العلاقة في حد زاتها ، نحن ما بنخاف من العلاقات لكن بنخاف التعلق والتعويدة ، بنخاف نكون فترة في حياة بعض بنخاف ما نتفهم صح وتتخلو في اول مفترق طُرق ، بنخاف يسوقنا العشم لي بعيد وانتو في اول مشكلة بترخو وبتفكرو كيف تكون النهاية ، نحن في كل العلاقات بدمرنا العشم ، عشان كدا لو بتلقونا بنصدكم حافطو علي العلاقة الحلوة البينا وياريت تخلوها كدا من غير اسم ✨❤️

@mohammed_alkhatim

ـ الماضي وما ٲدراك كمية من الٲحداث اللي مرينا بيها في حياتنا وفضلت ورانا سواء كان تفاصيلها سعيدة او مليانة حزن.


ـ الماضي مامضي يخوانا بي كل السؤ الفيهو فمن المهم انو نحن نتجاوزو ونسيبو ورانا نبطل نخليهو حمل علينا وكل ما نمش خطوة نرجع ليهو خطوتين.


ـ الماضي دا يكفي انك تستفيد منو تحاول تطلع وانت قوي وقادر تستمر و كفاية تتعلم منه وتاخد دروس في الحياة بس ما لاذم تقيف عنده لاذم تعدي.


ـ ماتسمح لي نفسك تخليك حبيس في سجن الماضي وتعذبك بكمية التفاصيل اللي انت بتحاول تتنتساها وتتجاهلها مالاذم ترجع نفسك لي نقطة الصفر وتقيف وتعيد الشريط وتخش في مود الكآبة والسلبية .


ـ فالمهم لو عايز تواصل حياتك دي لاذم تطوي صفحة الماضي وتبطل تفكر فيها فٲكيد ما حنقدر تبداء فصل جديد في حياتك وٲنت لسع ماطلعتا من اللي قبله فٲكيد ٲنت ما حتقدر تواصل في رواية في حين انت واقف في الصفحة الاولي ليها لابد تقلب الصفحات.

ـ مالاذم تدمر حاضرك بي سبب ماضيك ما تخش في معركة انت حتخسر فيها مستقبلك مسبقاً فحاول ٲنقذ نفسك عشان تطلع منها وانت رابح نفسك ومستقبلك.

ـ فعشان كدا ٲعتبر الماضي صفحة قابلة للطي وسيبا علي رفوف النسيان وٲبعد نفسك منها عشان تقدر تستمر في حياتك وٲنت قوي وسعيد وراضي عن نفسك.

ـ عشان تقدر تصل للحتة العايزاها وانت بجواك مرتاح و تبين لي نفسك قدر شنو انك قادر تتجاوز عتبة الماضي 👣.



#ومن_الاخر_كدا

"لو بدٲنا معركة بين الماضي والحاضر فسوف نجد اننا خسرنا المستقبل " ونستون تشرشل.


#سمرية

ـ الناس تحاول تعيش الحياة بي أمل وتفاؤل تبطل تتشاؤم وتفكير سلبي في تفاصيل الحياة المختلفة .

ـ لاذم تتراجع من اي فكرة بتخليم تتشائم وتسبق الأحداث ما تقول يوم بكرة انا حاسي انو ما حيكون حلو .

ـ مثلا الرقم دا ما بحب لمن اشوف الحاجة دي ما بحصل لي خير لي نخت في بالنا حاجات بالشكل دا .

ـ أولاً هي أقدار نحن مابنعلم خيرها ولا شرها تاني شي دا سؤ ظن والعياذ بالله فرب الخير لا يأتي الأ بالخير .


ـ التشاؤم دا لاصفة كويسة ولا بعني أنك بتفكر صح وأتذكر حاجة مهمة انو النبي ﷺ " يحب التفاؤل ،ويحب الكلمة الطيبة ،ويكره التشاؤم "

ـ فالتفاؤل دا بيعني : حسن ظن بالله وطمع في فضله ،وهو يؤدي إلى العمل وترك الكسل ..

ـ أما التشاؤم فهو : سوء ظن بالله ،
وترك للعمل خوفًا من أمر ما ، ويؤدي إلى الخوف والوساوس .


ـ فعشان كدا بطل تتشائم والتشاؤم في معني تاني التطير وعندو كفارة يخوانا .


ـ فالصحابة سألوا النبي صل الله عليه وسلم: يا رَسُولَ اللَّهِ ما كَفَّارَةُ ذلك؟
قال صل الله عليه وسلم: أن يقول أحدهم: "اللهم لا خير إلا خيرك، ولا طير إلا طيرك، ولا إله غيرك"


ـ شايفين قدر شنو هو حاجة سيئة فبطل تشاؤم وعاين للجانب المشرق للحياة ظن الخير حتي يأتي ..

ـ وتذكر كمان انو رسُول اللَّه صلي الله عليه وسلم يُحب الفأل الحسن، ويُكثر من قول : " أبْشِّر! " .

صلُّوا عليه وأبشِّروا🤎 .




#ومن_الاخر_كدا

" ‏قُل للذي مَلأ التشاؤمُ قلبَهُ
‏ومضى يُضيِّقُ حولنا الآفاقا

‏سرُّ السعادةِ حسنُ ظنك بالذي
‏خلق الحياةَ وقسَّم الأرزاقـا " 💚



#سمرية

ـ حتمر بيك فترة وعي كدا تخليك تبطل تكون ٲنت بس المهتم بالطرف التاني والبفقد والبرسل علي طول.

ـ واللي علي طول هو البستحمل برودو والبتنازل وبفضي من كل حاجة بتشغلو عشان يلقاء زمن ليهو.

ـ والبكون قاعد قصاد فرحتو وبحاول بقدر الإمكان يحافظ ع سعادة الطرف التاني حتي لو كان خصماً من سعادته.


ـ حتصل لي مرحلة كدا حتخت فيها نقطة وتخلي القرار لي الطرف التاني في ٲنو حتكون دي النهاية ولا حيكون في سطر جديد💚 .


ـ حتتجاوزو حتي لو من جواك ماعايز كدا بس التعامل البتلقاهو منو دا بستنزف قدرتك.

ـ وحتي انو بيخصم من رصيد الفرص الختيتا ليهو وممكن بعدها تاني ما تقدر تتقبلوا في حياتك 😕.

ـ حتصل لي قرار ٲنك تاني ما تبادر بي شي وتمسك نفسك عليك .

ـ لٲنو بالجد ٲنت بالرغم من الود البتقدموا ما بتلقاء غير الجفاء .

ـ وعن كمية الأهتمام اللي بتقدمها للطرف التاني بي شكل مفرط وأنت مفتقدها منو حتي لو كان في سؤال بسيط بس.

ـ فأنت كمان من حقك تلقاء الأهتمام ودي من أبسط حقوقك .

ـ كفاية في كل مرة هو يقصر فيها ويحاول يبرر لي نفسه بي أعذار تافهه وأنت بكل طيب خاصر تسمع وتدافع ليهو قصاد نفسك.

ـ فٲنا ما عايزة ٲقول ليك تتعامل معاهو بي نفس الٲسلوب لا كل زول بي طبعو.


ـ فأنت خليك في طباعك السمحة وبي نواياك الطاهرة وبياض قلبك.

ـ بس في نفس اللحظة دي ماتحاول تتمسك شديد أنت بس ٲرخي وتاني القرار برجع ليهو لو عايزك في حياتو حيشد عليك.


ـ حيجيك ويعتزر علي كل اللحظات اللي ماكان فيها معاك وحيعتذر منك ع كل المواقف اللي كان مقصر فيها تجاهك.

ـ حيعرف قيمتك وحيقدر يحافظ عليك فلو ما كدا معناها يا حبيب تلملم نفسك عليك .

ـ وتحافظ علي عقاب قلبك دا وتنسحب من حياتو وفرصة سعيدة وبتلقاء الٲسعد منها .🌼


#ومن_الاخر_كدا


" الأهتمام مطلب لا يُطلب " 👌💛



#سمرية