📚🎧 Няма часу чытаць? Падрыхтавалі для вас файную падборку новых беларускіх аўдыякніг у YouTube:

1️⃣ Максім Гарэцкі – «Дзве душы»
«Дзве душы» – адзін з самых важных і актуальных твораў у гісторыі беларускай літаратуры, дзе наш класік Максім Гарэцкі падымае пытанне: хто мы такія і чаго хочам. Аўдыякніга выйшла на YouTube-канале «Беларуская літаратура».

2️⃣ Ігнат Абдзіраловіч – «Адвечным шляхам»
У працяг даследавання беларускага светагляду прапаноўваем паслухаць легендарнае эсэ Ігната Абдзіраловіча (сапраўднае прозвішча – Канчэўскі. Псеўданім ад галоўнага героя аповесці «Дзве душы») «Адвечным шляхам». Твор раскрывае драматызм гістарычнага лёсу беларусаў, іх неадольнае імкненне захаваць незалежнасць свайго духу. Аўдыякніга выйшла на YouTube-канале «Лятучы ўніверсітэт».

3️⃣ Надзея Ясмінска – «Пацеркі і кроплі»
Гэта дзіцячая кніга – неверагодна цёплая і ўтульная гісторыя беларускай пісьменніцы Надзеі Ясмінскай, вытканая з роздумаў і пачуццяў пяцігадовага хлопчыка, які крыўдзіцца, марыць, чакае лета, вучыцца чытаць, разважае пра жыццё і пра тое, што знаходзіцца па-за ім. Аўдыякніга выйшла на YouTube-канале «Кніжны Воз»

4️⃣ Альгерд Бахарэвіч – «Сабакі Эўропы»
Кніга, якая адной з першых стала "экстрэмісцкай" у Беларусі. «Сабакі Эўропы» Альгерда Бахарэвіча —незвычайны густоўны твор з шасці частак-гісторый пра надзённае і надрэальнае, пра час і пазачасавасць, пра брэх сабак і пырскі сэрцаў, пра нас з вамі. Аўдыякніга выйшла на YouTube-канале «Падкасты Свабоды».

5️⃣ Франц Кафка – «Працэс»
У аўдыяфармаце ёсць не толькі беларускія творы, але і файныя пераклады сусветнай літаратуры. Аўдыякніга «Працэс» аўстрыйскага пісьменніка Франца Кафкі выйшла на YouTube-канале «Беларускія аўдыякнігі». Гэта трагікамічны раман пра немагчымасць перамагчы сістэму і выйсці за яе межы, пра абсурднасць судовай бюракратыі — і, шырэй, жыцця ў цэлым.

Стаўце 👍, калі хочаце бачыць падобныя падборкі часцей.

Падпішыся на канал ТРЭНДЫ: ПАПУЛЯРНЫЯ ВІДЭА БЕЛАРУСІ