يابناتي اشتي احكي لكن قصتي ،،،
اليوم زوجي بيقلب في التلفون....وبيقلي جي ابسري على نقش ....اشتي تتنقشي
وانا ضحكت ...قلت الله يزكيك عقلك ...قال للمه او انا مجنون......والله انش عتتنقشي....قلت هههه..ان شاء الله في اقرب مناسبه ..قال مابلا اليوم ...قلت بغير جنان .. قال قذا سمعتي حرام انش عتتنقشي
قلت وانا حرام مايدخلني نقش.. ياسعم ان عاد احنا عيال امس ...ومن كلمه لاكلمه ...الا وهو يقل وانا حرام وطلاق لوما تتنقشي اليوم ...ماتجلسي في بيت .........وانا فارت بطوني..واقتهرت وقمت فتحت الدولاب وشليت لي اثنين ارواب وقلت وانا حرام فوق حرامك ما اطرح لي راس ؛وهو قام جنن وكان يراجم بالداتي كلهن من الدرج.... والقيامه قامت ......والكل سمع ..طلعو عيالي ونسوانهم مابه ...مالكم
قلت كله عمل الايدي المجغبصات المنقشات الذي بيبسرهن وهو نبع لي..وقدو ملبب وبينهل .. والعيال سحبوه ..قلت يشتي اتنقش شيبة قمر....وكلهم ضحكو ضحكه بخوف قال ابني عادي يمه اتنقشو على عافيتكم .
تعميم للكل ....الان اقرب منقشه عليها الوصول للبيت ههههه..ونسوان عيالي بيتشاوين ويضحكين و كل واحده بزت تلفونها وبتتصل للمنقشه الذي تعرفها وانا اقل حرام ما اتنقش ......وابني يقل حرام لاتتنقشي وانا عد ادي الكفاره ..ماتشتي تفلتي بيتش وعمرش على سب نقش.. ويصيح هيا اتصلتي للمنقشه جت المنقشه ...اول مابسرت مرت ابني قالت لها انتي الذي عتتنقشي...وهي ضحكت قالت ماشي امي ؛وانا قد عيوني حمر
ونخرتي ملان وشي من البرقطة ...
وتنقشت ....وامري لله .. ...فيابناتي الذي كودكن بتصورين ايديكن حرام عليكن مايجوز....جننتن لنا الشيبات😅

احلا حاجه في الحياة بعد البن القهوة المثلجة 🤤❤️

ملحوظه:بنات لاحد تدخل تتفلسف وتقولي مناكيرك مقرش لاني داريه 😒

معي تجربة اليوم اشتي احكيها خاصة للبنات لانه ممكن تستفيدين.. ولو المنشور طويل 😅
امس وانا في الشارع بين احاول اتخارج من الزحمة جا صاحب سيارة دقني من ورايا، افترضت انه بالغلط اتاري الادمي مواصل بيدهف السيارة حقي!!
طبعا الشارع ملان وزحمة وبه عيال كثير بيتفرجوا ...
خرجت راسي بين اقله مالك!!
وواحد من اللي بيتعشوا صيح انزلي اضربيه وضحك .. وانا مطننة ومصدومة صدمة عالمية
كيف واحد عنده كل هذه الجرأة؟
كيف كل اللي في الشارع محد قله عيب؟؟
المهم نزلت وسيارته كلها معكسة ولا حتى نزل الزجاج بصراحة افتجعت وخفت من قوة عينه..
قمت حفظت رقم السيارة حقه وروحت.
وصلت البيت شحنت تلفوني واتصلت بعمليات المرور قالوا لي بكري بكرة لاقسم كذا وكذا وقيدي البلاغ حقش..
قلت طيب.
بكرت اليوم الثاني كتبت شكوى طويلة فيها كل شي حصل وسرت القسم،
دخلت مكتب المرور داخل القسم وكان لطيف معايا الا ان قلت له اشتيك تقيد البلاغ حقي (طبعا كل قسم معه دفتر قيد بتراجعه وزارة الداخلية عشان كذا مايعجبهمش يقيدوا) قام بهرر فوقي قلي تشتيه بشكل رسمي؟!!
قلت له ايوة!
قال خلاص يالله دخلي السيارة الحجز وهو بيصيح قلت له على طول افتحلي الباب.
طنن شوية وقلي مايحتاجش مالش الا مايرضيش، قلت له اشتيه يتأدب لانه واضح انه ..... وماعيفعلش هكذا بي وحدي!
قلي خلاص ولايهمش الموضوع عندي، قلت له كيف عندك قال خلاص اطرحي رقمش واحنا نتواصل معش..
قلت له اذا شخطى بدون شي عتقيد البلاغ حقي قلي خلاص انتظري
اتصل لحد وطلعوا بيانات صاحب السيارة من ضمنها رقمه وبأسم من السيارة ومن الضمين والعاقل وكل التفاصيل (مش تلميع لانه هذا اقل القليل اللي مفترض الدولة تقدمه).
المهم اتصل بالرجال والرجال صيح واتشنتح وقال هذي كذابة خليها تثبت..
قلت للعسكري الكاميرات 😁
سرت للمكان وحددت الاماكن اللي فيها الكاميرات ورجعت له قلت له افعلي امر لا كذا وكذا انهم يدولي التصوير ، وفعله ذكسع.
ورجعت وبعد بحث وسط الفيديوهات طلعت الفيديو اللي وهو بيصدمني عمداااً وزد يدهف السيارة.
شليته ورسلته للفندم قالي خلاص تعالي...
وصلت وقد الجني اتصل بصاحبه الفندم فلان وقدهم يشتوا يلفوا الموضوع..
قالي وين سيارتش خرج يبسرها قال مابش فيها شي! هو مستعد يصلح!
قلت له الموضوع اعتداء مش مسألة سيارة، بدأ يلف ويقلي احنا مرور مالناش دخل.. رجعته مرة ثانية للبلاغ حقي قلت له خلاص هات البلاغ حقي شاقيده قضية جنائية وهو كل ما اذكرله البلاغ يتوتر مدري ليش 😂😂
قلي خلاص احنا عنقيده جنائي قلت له تمام، فلته ودخلت القسم مرة ثانية لاعند مدير التحقيقات وريته الفيديو وقلت له البلاغ عندكم وقدهو عند العمليات حق الداخلية والكل، قلي ولايهمش.
سرت اشتغل وفجأة ميرندا يتصلي العسكري قلي الرجال يشتي يعتذر قلت له مش الا كنت كذابة ومابلا اثبات؟ 😂😂😂
وين انتي؟ قلت له انا في مكان كذا..
قال خلاص عنجيلش
قلت له تعال.
المهم وصل سيد الناس صاحب البورش (سيارته بورش طبعاً ومايستاهلهاش)
ونزل ادمي كبير في السن فاجأني قال انا مقصدش وجاب كمية وافرة من الخرطات وانه كان بيهرب من السيارة اللي وراه..
واللي يرضيش نسويه وجالس يستظرف
قلت له ابسر بما انك رجال كبير ويمكن فعلا ماتقصدش، الا ان الذي مثلك هم الذي معيشين النسوان في رعب مالهش داعي!
واحد يدقنا وواحد يطنن لا وجهنا وواحد يتحرش وواحد يصيح وواحد يكسر مراية ... انا بنمشي وكل النساء اليمنيات بنمشي في الشارع واحنا خايفات!
سكت...
ورجع قال انا محكم ومدري ايش قلت له خلاص هات ورقة وانا افعلك التنازل واتنازلت، بس بردت قلبي 😂😂
الشاهد من الموضوع يا بنات ولو انه مش شرط يوقع معكن نفس الشي الا انه اتمنى ان محد تكن تسكت
وهذا علمي وماجاكم شر 😁

بنيان جمال

مش فاهمه كميه التدني الاخلاقي الي وصله البعض اليوم هذي السياره كانت واقفه بمنتصف الطريق ورجعت ريوس لافوق سيارتي دقت لي الباب اليمين نزلت شفتها بنت قولت في نفسي عادي حديد بحديد يفدانا جنبت اشوفها ونيتي خير والله وبصدر رحب ونزلت تفاجئت انها تصيح تصيح من داخل السياره ورافعه الزجاج مارضت حتئ تنزل نتفاهم ياجماعه مش مفروض تنزل نتفاهم غلطانه تصلح لي ولو انا غلطانه اصلح لها او بتراضي كل واحد يروح في حاله ايش يخليها تصيح وتجنن ايش في؟! صراحه نزلت من سيارتي وانا مش ناويه الا ع خير لاكن الاسلوب!!! ..... وبالاخير هربت وفحطت من جنبي ولا كانو حصل شي ؟!!هذي سياره الهانم المفحطه 🙂

اسماء ثابت

جمعتكن حسينه

كيف تعبري عن امتنانك وشكرك لزوجك وأبو أولادك؟

يُمثل #الزوج مصدر الأمان والحماية لعائلته، ولما يرجع من عمله بيشعرو بالاطمئنان لوجوده ومسؤوليته عنهم.

وجود #الزوج بين أبنائه في البيت بيساهم في إبعاد القلق والتوتر عن أفراد العائلة خاصةً #الزوجة والأطفال..

#عودة_الزوج_من_العمل
#الحب_والعائلة
#الدعم_المتبادل

"اللهُمَّ ولا داعيًا إلا أجبتهُ،
وآتِ كل ذي سُؤلٍ سؤلهُ،
ولا تبتلي أحدًا في مَطلبه."🤍

وصلى الله على نبينا وحبيبنا محمد وعلى آله وصحبه أجمعين❤️
#R

في هذا البلد تظلم المرأة مرتين؛ مرة من القضاء الجائر ومرة من المحكَّمين القبليين، وهؤلاء كان حكمهم أقسى، فقد نظروا إلى المسألة من جانب واحد مهملين تماما الضحية الأهم في القضية وهي الفتاة المغتصبة، ظلمها القضاء وأهملها التحكيم القبلي، ومن أين لشيخ قبلي أن ينصف امرأة، وكيف نتوقع من يوتيوبر بذيء أن يقف في صف امراة مظلومة. شيخ قبلي عائد لتوّه من السعودية يرى الأربعين مليونا مبلغا زهيدا، ويوتيوبر كانت شهرته بسبب بذاءته الموجهة ضد النساء، وهكذا حكم القضاء ضد الشاب المنتصر لشرفه، وحكم المحكَّمون القبليون لإنصاف المغتصِب ومعاقبة أسرة الضحية بالنفي وبغرامة لا تقدر عليها ..
د. قائد غيلان

عوضها اخوها #احمد_الزويكي بقتل مغتصبها ودافع عن عرضه وشرفه .. لاتزعلي يافاطمة اسأل الله العلي العظيم أن يعوضك خير الدنيا والآخرة بحق يوم عرفه ..

ال40 مليون الديه عتخرج في أجسادهم نار وشرار
#فاطمه_ذوي_الاحتياجات_الخاصه
#كلنا_مع_عائله_الزويكي

لبناتنا على تطبيقات: تيك توك وإنستجرام وسناب شات وشبيهاتها،
قالت العرب حكمة وقيمة:
"تجوع الحرة ولا تأكل بثديها".
تجوع الحرة ولا تسّخر جسدها لحاجة أو مال، سواء بالحلال أو الحرام.
تجوع الحرة ولا تتزوج لحاجة وفقر، فما بالكن تعرضن أجسادكن برخص التراب في نخاسة السوشيال ميديا؟

فما معنى لبيك؟

"لبيك" معناها أنني مقيم على طاعتك، اتجاهي إليك وقصدي وإقبالي على أمرك، أي أنني تركت كل الدنيا بمباهجها وزخارفها واستجبت لدعوتك وأقمت على طاعتك يا رب وحدك لا شريك لك، فيقول الحاج لبيك اللهم، أي سمعا وطاعة يا من كلفتني بأداء هذه الشعيرة، وفي الكلمة معنى الترحيب بالتكليف وصفاء النفس.

الله أكبرُ والأماني بين يديك
‏الله أكبرُ والصعب هيّنٌ عليك

تحذير
بنات العيد قرب وكل واحده تركز علا العواده في مؤامرة كبيره علينا 🤣 لا للغش، وحسكن تقبلين من هذه الحدايد 😂

رحمة الله تغشى الانسي لوماهو أيش عنسمع كل عيد!
قلك يما وياحنجا؟ ولو ماعسبتيناش عنخلع ضرسك الذهب😳😳؟؟
هذي غنية ولافلم رعب
يلا حجرة ويابجرة وطاسة وضغاطة وياحنجه وعليها كل عيد قصايد عمى وضمى🤦‍♀️

تالين جمال

لا تبحثو عن. اخلاق الرجال. في المساجد وساحات الذكر وميادين العبادة
ابحثو عنها. عند تقاطع الحقوق/
وتضارب المصالح ..؟
عند البيع والشراء. !! وتوزيع الميراث. ؟
راقبوها في السفر .؟.
في مجاورة مسكن ..؟
في مصاهرة ...؟
في نسب ..؟
راقبوها في. الخصومات ..؟
والنزاعات ..؟
في الطلاق وحقوق الاطفال ؟
ففي الخصومات ينكشف متصنعي الاخلاق والدين .

هنادي نعمان

طبعا اليوم جيتكم بتعامل معفن من قاعة قصر السعيد مع الزباين وكانهم بيتصدقو بالقاعة الا صدقة 🙂
ذي قصة صحبتي اقراوها وقولو لي هم كذا مع الكل ولا معفنين معها

اولا احنا اخترنا تاريخ وقررنا عليه وقلنا له يحجزه لنا واتفقنا على سعر وكذا ومرينا بنفس اليوم لمحل كوش الملكة نشوف الكوشه ونحجزها بنفس تاريخ حجز القاعه قال انه هذا التاريخ محجوز عندهم كوشة لقاعه قصر السعيدة لبيت الفلاني واحنا انصدمنا رجعنا وقتها للقاعه ونقولهم كيف تكون محجوزة واحنا قد حجزناها انصدموا طبعا وقالوا بنشوف الوضع واتصلوا لمحل الكوش واخذوا رقم الناس اللي حاجزين وقالوا لهم تعالوا ادفعوا واحنا عندهم بالقاعه! ومش اول مرة يفعلو كذا قصة ويحجزو لعروستين بنفس اليوم 🙂🌚

قلنا لهم احنا لنا الاولولية لان احنا عندكم الان وبندفعها قال لا ما نقدرش هذولا طلعوا اصحاب صاحب القاعه ومعاريف ومدري ايش
وقال خلاص ولا عليكم تعويض لاي تاريخ انتو تشتوه ولكم احسن خصم وكلام من هذا
رجعنا قلنا نتقرص العافيه ونختار تاريخ ثاني
واتصلنا له يوم ثاني واخترنا تاريخ قال تمام اي يوم تعالوا ادفعوا العربون

ورسل لنا بالليل الساعه 8 تعالوا ادفعوا العربون الان
واحنا جينا اليوم ثاني الصباح نشتي ندفع العربون
قام يتغامزوا فيما بينهم وصاحب القاعه حتى ما لفت لعندنا قال انا ما بتفاهم معاهم وجاب لنا الموظف اللي عنده وقالوا قد حجزوا هذا التاريخ لواحد منهم قلنا له كيف واحنا قد حجزناا قال ما دفعتوا العربون
قلت له انت رسلت امس الليل وجينا الصباح وين الغلط
قال ليش ما ترسلوها
قلنا له جينا ندفع وناخذ سند بالفلوس اللي اندفعت ونكتب عقد ونتفق ع السعر
قال خلاص وقام شل نفسه وخرج واحنا جالسيين نتكلم معه باسلوب تافهه ولا كاننا موجودات 🙂

طبعا صحبتي انقهرت جدا من تعاملهم المعفن معها والتلاعب معها +انها كانت محتاجة التاريخ علشان تقدر تنجز امورها ومع ذلك مافيش اي مراعه لاي وضع

أسلوب مستفز وقليل ذوق منهم ومش أول مره لهم 🙂

جميلة القحطاني