💥 Беларусь наведала рэдкая птушка! У вёску Выхадцы Лёзненскага раёну заляцеў белагаловы сіп. Яго сфатаграфала 7 чэрвеня Юлія Прудоўская.

Гэты від адзначаўся ў нас усяго некалькі разоў, упершыню – у 1924 годзе ў Віцебскім раёне. Адна з апошніх рэгістрацый адбылася таксама на Віцебшчыне, у жніўні 2016 года.

Гэтым разам дзякуючы паведамленню ў Клуб200 сіпа змаглі пабачыць многія птушкары. І нават стаць сведкамі мясцовай “драмы”: галодны драпежнік цягам некалькіх дзён паеў буслянят у некалькіх гнёздах у навакольных вёсках. Дарослыя белыя буслы не змаглі абараніць сваіх птушанят.

🦅 Белагаловы сіп – вельмі моцная птушка, размах крылаў – амаль тры метры. Звычайна ён харчуецца падлінай і не прыстасаваны паляваць на жывую здабычу, але можа забіваць аслабленых жывёл.

😲 Расказваюць, што жыхары спрабавалі адпудзіць драпежніка стрэламі з драбавіка. Пра тое, што забіваць сіпа нельга, ім ужо расказалі. Усе дзённыя драпежныя птушкі ў Беларусі - пад аховай закона, і грашовае пакаранне за забойства сіпа вельмі істотнае.

❓ Як птушка апынулася ў Беларусі?

Найбліжэйшы гнездавы арэал белагаловага сіпа – Балканы і Крым. Гэты від для палёту выкарыстоўвае тэрмікі — цёплае паветра, разам з якім ён падымаецца ўверх. А потым дзясяткі кіламетраў можа лунаць у любым кірунку да наступнага тэрміка. Дзякуючы добраму надвор’ю, птушка, лунаючы, праляцела незаўважанай паўднёвую і цэнтральную Беларусь.

Відавочна, згаладнеўшы пасля доўгага пералёту, сіп і апусціўся ў адной з вёсак Віцебшчыны. Птушкары прыязджаюць да сіпа амаль штодня. Невядома, калі адбудзецца наступны візіт гэтай птушкі ў Беларусь.

📷 Фота: Алёна Ціхановіч, Іна Субоціна, Таццяна Алешка, Юлія Прудоўская.