#Kun_tartibi

Parkent tumani kompleks rivojlantiriladi

Parkent tumanida xizmat ko‘rsatish sohalarini, xususan turizmni rivojlantirish, aholiga maishiy, savdo, transport, tibbiy va boshqa turdagi zamonaviy xizmatlarni ko‘rsatish, yangi ish o‘rinlari yaratish, mavjud resurslardan samarali foydalanish hamda aholi turmush darajasini yanada oshirish maqsad qilingan.

Bugun mazkur tumanda Toshkent viloyati hokimi Zoyir Mirzayev boshchiligida o'tgan yig'ilishda ayni shu masalalarga atroflicha to'xtalindi. Xususan, O‘zbekiston Respublikasi Prezidentining PQ-228-son hamda Vazirlar Mahkamasining 489-sonli qarorlari ijrosi yuzasidan ayni kunlarda keng ko‘lamli ishlar boshlab yuborilgan.

Ma’lumot uchun, tumanning "Zarkent", "Boshqizilsoy" va "Gulbog‘" hududidan tanlangan jami 58,4 gektar yer maydonida sanoat zona tashkil etish hamda 70 mln dollar miqdoridagi investitsiya, shuningdek, qarorlar doirasida jami 1,4 trln so‘m mablag‘ o‘zlashtirilishi belgilangan. "Kumushkon" mahallasida esa ishlab chiqilgan master-reja asosida 3 516 gektar yer maydonida “Oltinbel” tog‘-chang‘i kurorti zonasi quriladi. "Chashma" mahallasi va “So‘qoqsoy” soyi bo‘yidagi jami 130 gektar maydonda zamonaviy mehmonxona, gastronomik turizm xizmatlarini ko‘rsatish, savdo-ko‘ngilochar maskanlar barpo etish koʻzda tutilgan.

Shuningdek, oziq-ovqat xavfsizligini ta’minlash, “Toshkent–Parkent" yo‘nalishida elektrlashtirilgan temir yo‘l qurish, issiqlik ta’minotini yaxshilash, aholini uy-joy, ichimlik suvi bilan ta’minlash, ichki xo‘jalik yo‘llari va ko‘priklarni rekonstruksiya qilish ishlari olib borilishi rejalashtirilgan. Yig‘ilishda bu borada belgilangan tadbirlar va ishchi guruh a'zolari tarkibi xususida ta’kidlandi.

Zoyir Mirzayev Parkent tumani qiyofasini tubdan o‘zgartirish va hududni qulay maskanga aylantirish bo‘yicha mutasaddilarga ko‘rsatma berdi.

✅Telegram 🌐Website 📹YouTube 🌐Instagram✅Facebook🕊Twitter