#نزله_عگيلي
اخر ليله ويه حسيني
اخرليله ويه حسيني
                *---------------*---------------*

خلينه نودع والينه
باجر جا ياهو يضل لينه
نوگ الشمات التحدينه
ودموعي نزلت من عيني
                *---------------*---------------*
وبليل العاشر مفجوعه
شيتحمل گلبي جم لوعه
سبي عياله وكسر ضلوعه
جاياهو بعده ليحميني
                *---------------*---------------*
بس هليله يم اخواني
وباجر تذبح ولياني
يازينب صبري وصاني
بين الغربه ومخليني
                *---------------*---------------*
باجر تتسلب ياروحي
ياعباس تزيد جروحي
بس هليله ويكثر نوحي
هاك اسمع عباس ونيني
                *---------------*---------------*
ادموعي النزلت سياله
عباس وترضه بهل حاله
تفتر بخيامي الخياله
ترضاها عگبك يسبيني
                *---------------*---------------*
اخواني التموا ويانه
وبليل العاشر وصانه
بالخدر هاي الحزنانه 
مسبيه تاليها سنيني
                *---------------*---------------*
عذريني يازينب باجر
بلايه جفوف بيوم العاشر
وضلوعي طاحنها الحافر
عذريني خويه عذريني
                *---------------*---------------*
خادم السيدة زينب ع
✍️باقر جبار الشويلي

مقدمه ليله العاشر وداعيه

طول نحيبي موادع حبيبي
عليه الزمن جار ياشمسي غيبي
.........................................................
اليله اخر ليله اشمن دفو انفاسه
احساسه يذبل من يودع اعز ناسه
باچر يرفعون فوگ الرمح راسه
الله ليراويني حافر فرس داسه

باچر رميه. فوگ الوطيه
وضلوعه طشار. ياشمسي غيبي
......................................................
ياهي مثلي عدها اخو ينبع أمروه
گضه عمره وياي هيبه واعز تچوه
باچر بطيحه عضيده يمشي گوه
شيخ وبن شيوخ جدامي يتلوه

باچر انظره. ايده عله ضهره
وسهم الغدر جار. ياشمسي غيبي
.......................................................
عليه هاي الدنيا شو فرت رحاها
چني وسط ذياب نزعت مستحاها
چني ورده ودهري للهم سلماها
وبين سبعين الف ظالم ودعاها

وسفه الاميره. باچر اسيره
مابين الاخطار ياشمسي غيبي
........................................................
باچر اطوير الجنان يموت سكته
والمثلث سهم اكبر من رگبته
تموت ضحكات البرائه وي ضحكته
يروح شمعه ويرد مطفيه شمعته

يحنيلي طولي ويم مهده الولي
حار السهم حار. ياشمسي غيبي
.......................................................
خضر الشمري

نزله ليلة العاشر

باچر شلون يزينب باچر شلون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بـاچـــر المــوت يجيهـم بالسره
مــا تنــاميـــن بقيتـــي محيــره
اهلـچ شلـــون اذا دمهــم جـــره
حــان الــوداع يبــت خير الوره
مـا يضلـون يـزينـب مــا يضلون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شبعي منهم شوف هليله اخوتچ
مـاكــو بالكـون مثلهـه امصيبتچ
راح تبقيــــن يـزينــب وحّـــــدّچ
و بالبــراري تِحَضّـــري الركضتچ
وني يم عون يزينب وني يم عون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
باچــر المنضــر ابـــد لا مـا يسر
العجــب كـل العجـب يم الخدر
فــوگ صـدر حسيـن يتربع شمر
امنالگــفه تشـوفينـه لمــن ينحر
بـي يغدرون يزينب بي يغدرون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مــن يذبحــوه يحــركون الخيم
لا تنـاديـــن علـــى راعــي العلـم
طايـح اعلـه النهر وبعينه السهم
ابـلايـه چفيـن تــره شبعـي الــم
مـا يرحمـون يزينـب ما يرحمون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
باجـــر الاكبــر يطيـح اولا احــد
حتــه جســام بقيتــي ابــلا سنـد
مـــا تسمعيـــن دللـــــول الـــولـد
ينــذبــح عبــدلـلـه ويـاهـم بعـــد
دهرچ يخون يزينب دهرچ يخون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بـاچــر المـوقف ابـد لا مـو سهل
صعبــه ايدينـچ يشـدوهـا بحبل
و اليتـامـه بسـوط يضربها النذل
بالطـفوف ايضـيع منچ چـم طفل
من يهجمون يزينب من يهجمون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
آه يــا دمعـــة رقــيـــه و الحـــزن
بويــه مــن تصيح توجعني الاذن
حيــل لــــو جـــرو تراچيهـه تـون
ناس كلهه وحوش ما واحد يحن
تعمـه لعيـون يزينـب تعمـه لعيون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لليســــر تمشيـــن يالحــره غصب
آه مــن الشـــام وبعيـــد الــــدرب
تـزيـد لـوعاتـچ بعـد ضيم الحـرب
اعــرف الــديــوان طـاريــه صعب
لــــو ينادون يـزينــب لـــو ينادون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
#ابو #ياسر #المياحي

ليلة العاشر الوداع


الوداع يخواني
الوداع يخواني
...................

هاي آخر ليله نلتم بالخيام.. اه واويلاه لو طر الصبح
اني مامجروحه منكم مستحيل.. بس عليكم رايحه هواي انجرح
حسين خويه ادنه يم اختك تعال.. خل اشم نحرك الباجر ينذبح
كربله يخواني يرادلهه حيل.. وبعد كافل للعقيله مايصح

الوداع يخواني
الوداع يخواني
....................

باجر الديرت غرب تمشي الضعون .. وكلهه تتحزم عليي واني مره
وين ادير عيوني ياعباسي وين..  زينب خلافك تضل محيره
باجر امن اخيامي اشوفن بس رماد .. وگلبي مثل اخيامي ناره موجره
خويه اتمنه العمه من مستحاي .. ولااشوفن زلمه
صدلي بناضره

الوداع يخواني
الوداع يخواني
......................

ياهو بسمي ايصيح لو طبينه سوك.. والنسه البلقافله عدهن أهل
افلانه بت افلان ذوله اهلج اجوج.. وانه اضلن لاكفيل ولاامل
الماي من عيني يشح من النحيب .. وعل يتامه يسكن بگلي الوجل
ليل كلهه الدنيه بعيوني تصير.. الباجر اوياي الزمن حضر زعل

الوداع يخواني
الوداع يخواني
.....................

الزلم يرادلهه زلمه من تعيل.. ياخذ الحك منهم وماينكسر
خويه واني حرمه ماطالعلي صوت.. وخاف يطلع صوتي كدام الشمر
يابو فاضل خويه وبعينك تشوف.. زينب ام الخدر وبلايه خدر
والله دنيا وزينب بلايه الكفيل.. بيدي الحبال واطر درب اليسر

الوداع يخواني
الوداع يخواني
.....................

خويه درب الشام يالكافل طويل.. وروسكم برماح كدام الضعن
منين مادير الوجه كتال اخوي.. يحدي بينه وغايته الأصعب وطن
جم خرابه وراح أمر بيهن وابات.. خويه لجمات السبي ماينسن
آل هاشم انتم احمات الدخيل.. بياوكت نسوانكم يتغربن

الوداع يخواني
الوداع يخواني
.....................

اني من بيت اللذي يملك حصير.. ماخذيني القصر سفاك الدمه
راح اطب ديوان ناس ابلا ضمير.. واسمع ايشتمون ابوي وفاطمه
راح احجي وكلهه تسكت لو حجيت.. ينطق اعله الساني حماي الحمه
تنتهي بوداعكم عندي الحيات.. وعالصبر روحي تضل ملازمه

الوداع يخواني
الوداع يخواني

محمد هادي العقابي

فزاعيه مع هوسات  حول ليلة الوداع



*أليه اعتاب   ويه البيهم امروه*

*خوال ابني   وبعدهم خلصت العشره*

*( والعشره وياهم/فلوهه)*



اليه اعتاب هليله ويه اهالينه
لوصار الصبح كلشي امضيعينه
خال ابني الحنين الغمضت عينه
*(والخوه اشلون/ امضيعيهه)*



باجر لو يصير اشلون بل حاله
انريد ازلام لو تفزع الخياله
وين  اهل الحمل ويريد شياله

*(والحملي اليوم/ايشيلونه)*



خوال ابني وعليهم حيف يا وسفه
ارجال البل شجاعه اتخلص الكلفه
البيهم كل جرح بل روح خل يشفه
*(بل روح الونه /يداووهه)*



تريد اعتاب اهلهه الطلعو وياهه
يا محله الحجي يسوون ولياهه
تخاف من الصبح يا ناس لو جاهه

*(اتروح الخوه/وتفكد واليهه)*


باجر لو يصير اتروح اهاليهه
ويسبيهه الشمر ويروح حاديهه
كافلهه الكفلهه من يخليهه

*(مسبيه اتروح/ويه اعداهه)*


*لخادمة الزهراء   العلويه ام جعفر*
غير مبري الذمه من يحذف الاسم وياخذ الكلام وينسبه له




فزاعيه حول ليلة الوداع مع هوسات


*اليله اتودع اهلهه   عمت الساده*

*وي عباس اخوهه   حسين وولاده*



اليله ام الخدر يا حالهه اشلونه
تكلهم يا هلي عدمن تخلونه
اتنام اهل الحميه وخاف ينسونه

*(يا زينب صاح/اتودعينه)*


وصاحو للوداع اليله كوميله
وزينب للبطل عباس تحجيله
تراني امدلله وما احمل العيله

*(والعايل خويه/اتردونه)*



كاملهه الولي عباس حباهه
بيده دمعت ام الخدر مسحاهه
عد عينج يزينب بايده لزماهه

*(لزماهه وكال /افدي اعيوني)*



وحسين الاخو كام ويحاجيهه
قبلهه ومسح زينب بواجيهه
اخيتنه وثنيتج من يمر بيهه

*(والعايل بيج /انكص ايده)*



جسام وعلي كالولهه اشلونج
لاتبجين عمه وينخطف لونج
نفدي ارواحنه يابت علي دونج

*(كل روح الزينب /نفديهه)*


كالت وانعم منكم ينشميه
عل فركه صعب تدرون مابيه
اليله ومن هلي كلهه الوداعيه

*(وتودع زينب /ولياهه)*


*لخادمة الزهراء     العلويه ام جعفر*
غير مبري الذمه من يحذف الاسم وياخذ الكلام وينسبه له



ندبه ازهراء لحضور المجالس


*نضره يا ام حسين نضره   ابمجلسج كلمن يحضره*



نضره يا زهراء اليه
ابجاه أبو اليمه الشفيه
رايده منج عطيه
*سهليي كل حاضرامره*


نحضر ونقسم عليهه
ابزينب وماجره بيهه
الحاجه يمج سهليهه
*الكل موالي هنا يحره*



كل مريض اتشافي علته
ابجاه عباس واخيته
المجلسج جيت وحضرته
*والدمع بعيوني عبره*


المجلسج مولاتي اجينه
انواسي الحره الحزينه
نحضر احنه استقبلينه
*نبجي للمذبوح نحره*


نضره محتاجه واريدج
اقسم بنحره عزيزج
رايده اتمسحيلي بيدج
*كلبي وطفين جمره*


خادم ابقى للابد
نضره مولاتي بعد
مدد يا الزهراء مدد
*بل حشر مريلي مره*



*لخادمة الزهراء   العلويه ام جعفر*
غير مبري الذمه من يحذف الاسم وياخذالكلام وينسبه له




قصيده يوم العاشر


*رحت صوب المعاره اليوم  حسين ابن امي اندهنه*
*لكيته اموسد الحومه   ولاجني من احشمنه*


رحت صوب المعاره اليوم  الخال ابني الغفت عينه
لكيته عله الترب نايم   يا وسفه عله ابوسكينه
ندهته وما كعد ليه  ولا كلي التطلبينه

اجيت ودمعتي بعيني  ما تكعد يوالينه

*يخويه من الهظم مليت  وحكي من اعتبنه*



اعتبنه الولي من راح  واكله كافي النومه

اخيامك خويه بيهه النار  وزينبكم وكلثومه
يجيني وعل متن يضرب  خلافك خويه مهظومه
تعنيتك واجيت اشكي  لكيته امسلبه اهدومه
*أكعدت يمه وندهته بصوت  سمعني وضل يجر ونه*



يخويه الكوم اجت لينه  اخبرك بل سده والصار
هجمو يل ولي وفريت  وبخيامك لهيب النار
فرت كل حرم واطفال  ياخويه وفكدت ازغار
احتارت زينب ابهل حال  مابين العده وكفار
*ماعدهم رحم يحسين ابضربهم بيه احملنه*



يضربون الطفل يحسين  وانه انضرهم ابعيني
تمنيتك تجي وتشوف  يخويه ابن امي يحسيني
ابكلب زينب جثيره اهموم  اضل يمك تخليني
اموت ولا اشوف اعداي  الحرمه من تسميني
*عليه اشكد قسه وكتي وظيمه انواع اجرعنه*



يخويه شو حجيت اهواي  ولاجنك حجيت انه
تعبني الوكت مليت واجيتك حيل تعبانه

لفراكك يخال ابني  ابدمع وابنوحي حزنانه
اريدك تنهض وترجع  يخويه وتمشي ويانه
*تخليني امسح ادمومك  وجرحك حيل اشدنه*


*لخادمة الزهراء   العلويه ام جعفر*
غير مبري الذمه من يحذف الاسم وياخذ الكلام وينسبه له

اخر ليله بحماهم. بس تبجي اعله فركاهم
يليل العاشر اشمالك. دطول اوخلهه وياهم
… .. … ..… . … .. . .. ..

اليله مامر تاحه زينب
شما تطب خيمه تميل
تنضر اخر. نضره الهم
والدمع . منهه. يسيل
ومن تطب لحسين اخيهه
تباوع ابعينه. اوتطيح
ومن تكوم اتروح تركض
تصفن ابوجه الكفيل

زينب اليله تروكض علخيم بعيونهه
ضهر باجر يرسملهه صوره من يسبونهه
ويرسملهه اشلون باجر خيمه ويحركونهه

تحط ايدهه عله عيونهه.. وتكعد علكاع
وخوانهه ايشوفونهه.. يركضون لسباع
بالخيمه ايدخلونهه.. الماترضه اوداع
وتكلهم باجر يسبوني
……… . …… ..…… .
اليله يم عبدالله تكعد
وتلزم اكماطه وتفتحه
تمسح ابجفهه عله نحره
تبوسه وترد ا وتمسحه
تباوع. اعله امه وتكلهه
ابنج اخر. ليله يمج
6 اشهر. عمره يخيه
حرمله. باجر. يذبحه
باجر ابسهم المثلث ابنج ايروونه
اميه حسباله اجته اويفتح الهه عيونه
وره الخيمه ايموت باجر ابنج ايدفنونه

العلويه اتحاجيهه .وتهملهه العين
وتكلهه الله ايعينج .بمصاب البين
والله يكون بعوني...ابذبحت لحسين
هاي اخر ليله اويه خواني
…… …… …… … .
اليله تكعد يم رقيه
اتكدر اعليهه الحبل
اوهيه تسألهه يعمه
الجاي اشوفه موسهل
زينب اترد اوتكلهه
هيجي باجر. عالهزل
هايه اخر ليله لعبي
اوغدآ مايلعب طفل
باجر امتونج تورم باجر احنه ابغابه
اوجفج ايكض جرح باجر مايكض لعابه
متنج ايضربونه باجر ترف شنهي اسبابه
روحيله وكليله.. وحاجيلي حسين
عن باجر بالعاشر.. وين اتشردين
لويركض بن جوشن.. وانتي اتركضين

باجر يابويه ايركضوني
.
…… …… …… … . ..
زينب ابنص المخيم
تنضر ايمين وشمال
ودارت الخيمة الاكبر
عمه صاحتله تعال
وجيبلي القاسم اخييك
رايده اسألكم سوأل
يمهه وصلو وسألتهم
باجر ابوكت القتال

لودخلتو الساحه ردو وطمنوني عليكم
والله لوبيدي اخلكم يمي واشتم بيكم
بس يعمه الموت حتم باجر ايمر ليكم
ردولي وطمنوني… وخلوني ابتسم
ياروحي اودلالي.. اويادمعي ال يهم
عمتكم رادتكم.. محتاجه الزلم

باجر علناكه اتصعدوني

… . … .. …… . … ..
خادم اهل البيت ع. ابورقيه على التميمي

حان الوداع هالليلة اخر ليلة
باجر وراج رحله سبي طويله
ما بيها رايه ولا كفيل بس اليتامه والعليل
يا زينب يا زينب
ـــــــــــــــــــــــــــــــــ
يا غيرة الله بكربله دمعج وحي وبيه نازله
آيات الاوداع
هاي الثواني امن العمر لا تسبك اسهام الفجر
يا زينب ابساع
لو كشف الثامه الصبح نور الله ضامي ينذبح
ا مترب على الكاع
من ينغزل خيط الضوة يصبغها ظلمه ايامج
لاخيمه باجر لا علم بس الجثث كدامج
باجر ظلام ماكو بعد علويه
مذبوح اخوج متجتفه ومسبيه
درب السبي باجر طويل بس اليتامه والعليل
يا زينب يا زينب
ـــــــــــــــــــــــــــــــــ
شبعي وداع امن الولي ومن نور الاحسين وعلي
شبعيها الاعيون
واشتمي حيل امن النحر كحليها عينج بالكمر باجر يغيبون
هالليلة بس هالليلة الج يا بت علي باجر هلج كلهم يموتون
من هدم اخوج اخذي علك شديهن اعلى امتونج
خافن تضل تنزف دمه لو كامو يطكونج
وين السياط يا زينب انتي اوينج
وسفه بحبال يا بت علي امشبكينج
موقف مصابج مو قليل بس اليتامه والعليل
يا زينب يا زينب
ـــــــــــــــــــــــــــــــــ
بعباس اخوج امأمنه محد على خيامج دنه ما دامه موجود
لكن اذا باجر وكع متحير وجفه انكطع واتزرف الجود
تركضين صوب المشرعه تلكين اديه امكطعه وابراسه عامود
رديتي ما عندج كلب من شفتي حال اجفوفه
معذور كلتيله وبعد راح انسبي للكوفه
يعلم اخوج يا زينب اتعذرينه
ما عنده ادين وامطبر اتشوفينه
رديتي ضل جسمج نحيل بس اليتامه والعليل
يا زينب يا زينب
ـــــــــــــــــــــــــــــــــ
كومي يا زينب ودعي صلي بدمعتج واندعي لا يخلص الليل
ادعي الله لا تطلع شمس لا صدر اخيج ينرفس واترضرضه الخيل
ينزف جبدته امصوبه نايم وجثته امتربه ما بيه بعد حيل
نايم يضل اعلى الرمل والدم جمد بعيونه
من العطش كلبه يبس وما قبلوا يشربونه
ما عنده حيل ضل يزحف اعلى اركبه
وسفه الحسين ياهو اليكوم ايضربه
من حلكه ضل الدم يسيل بس اليتامه والعليل
يا زينب يا زينب
ـــــــــــــــــــــــــــــــــ
باجر اذا صار الضهر يضحك عليج ايضل شمر والكلب محروك
لازم بديه السلسلة وايدك عليجن حرمله وامحضر النوك
علويه تركب عالهزل يالمهدي موقف مو سهل من تدخل السوك
والشام جن عدهم عرس ياهو الكبل سابيجن
من فوك الاسطوح بحجر هالوادم اتراميجن
اتدك بالدفوف هالوادم وفرحان
عيد وفرح تتراكص وسكرانه
ما شفنه مثلج مستحيل بس اليتامه والعليل
يا زينب يا زينب
ـــــــ نعيم ابو باقر الساعدي ــــــــــ

ياليل الموادع وين رايح وين
خل اشبع سوالف من اخويه حسين
###################
هونك لا تروح بساع يا هالليل
تدري بگلبي خايف بيه ما ضل حيل
بس ظلمه وخيام ويدوي صوت الخيل
وانته تريد تاخذ مني شوف العين
####################
ياليل الوداع ارجوك طول هواي
اخوتي اليوم ضيف مساهرين اوياي
باچر لو مشو تفتر عكس دنياي
ويصوبني سهم الوحشه بصوابين
###################
مابين الخيم وحشه وعجيب الحال
ويوصيني اخويه حسين بالاطفال
من هالليله حسيت بسبي وحبال
واعله الناگه امشي مگيده الچفين
###################
صحت يحسين خويه ودمعتي بعيني
عشت كل ماضي عمري وياك وسنيني
احلفك وحدي باچر لا تخليني
وكل الناس تعرف عندي اخوه اثنين
##################
باچر عنكم احچي اصوابي للأيام
حرمه بلا كفيل وحايره بأيتام
باچر من يجينه الليل ماكو خيام
فوك اتراب نگعد واجرع المرين
###################
گاللهه يزينب خويه شيلي الراس
يالصبرج عقيده تعرفه كل الناس
باچر لا حسين يظل ولا عباس
وبصدري تكسر خيلهم ضلعين
####################
باچر من تشوف عيونچ الأجساد
تصبح كل خيمكم عالتراب ارماد
لمي عيال بيتي وعاوني السجاد
والأيتام احفظيهم لخوتچ زين
###################
لمي عيال بيتي وصيحي ياكرار
بناتك روعوهن بالسلب والنار
باچر الله يرحمكم ازغار اكبار
وانتي العده تظربچ خويه عالمتنين
###################
باجر من يچيچ الليل ها يم عوم
وحشه وعالتراب اعيالچ ينامون
زينب خويه حرسيهم وصيري عيون
ووصيج برقيه مجرحه الاذنين
###################
بأمان الله يزينب خويه ودعناچ
راح يطول حزنچ والهظم يبلاچ
شدي احزام صبرج خويه والله وياچ
احنه مقدر يفارگنه چف البين
###################
تمت بعون الله
خادم الحسين كرار حيدر الحاج

#شوط كربلائي ليلة الوداع


زينب ليلة العاشر. تودع اخوتها مهضومه
بين حسين والعباس. بالتـوديــــــع مالومه
..........

كصدت زينب بهمهه لخوها حسين ابوالعتره
تگلّه حسين يبن امي. خويه وتسجب العبره
بس هالليله ماشوفك. صدك يامهجة الزهره
باجر تنذبح ضامي
وراسك ينرفع دامي
وشوف النار بخيامي
وشوفن جسمك بلا راس. يخويه مسلّبه هدومه
........

ما عندي گلب يحسين. اودعك ياضوه عيوني
يريت الصبح ما يطلع. ولا بيكم يفجعوني
تدري بآل اميه ارجاس. وحقّك ما يرحموني
باجر لو طحت يحسين
علينه تهجم الصوبين
وين انروح نركض وين
وانت الخيل تسحگ بيك. ظلوعك كلها مهشومه
..........

يگلها حسين يازينب. هذا مقدّر ومكتوب
راسي عله الرمح مرفوع. وجسمي مگطع ومسلوب
باجر من تشوفيني. دامي وعالوجه مگلوب
اصبري لمحنتي وحالي
وحفظي امن العده طفالي
وراسج خل يضل عالي
يزينب لا يشوفونج. بعد غيابي مهمومه
...........

زينب سمعته وصاحت. يليل العاشر ارحمني
طوّل خل اودع حسين. گبل لا جرحه يلچمني
گبل لا ينذبح عطشان. وسيف الجاني يهظمني
باجر ما تظل خيمه
وتضيع اطفاله بالهيمه
اهل الغيره والشيمه
باجر تنذبح كلها. بظِهِر العاشر ويومه
...........

طلعت زينب وراحت. لخوها الكافل تودعه
صدك تتركتي يا عباس طبت سألته بدمعه.
انت تكفّلت بية. ورايك لازم انسمعه
يگلها ورفرف الرايه
يزينب انتي بحمايه
إنه المايخلف حچايه
لحدما توگع چفوفي. يزينب يختي محشومه
............
باجر من يغدروني و تطيح ايساري ويميني
يضربون بعَمَد راسي. وتنسد بالسهم عيني
اطيح وما ارد ليكم. يزينب يختي عذريني
بچت من سمعت جوابه
ونزل بعيونها صوابه
سبيه تروح بغيابه
مچتوفه بحبل للشام. باجر تمشي مظلومه

سيد زيد الفحام

قصيدة ليلة وداع ليلة العاشر عن السيدة زينب
****

غربة او وداع اومدمع التمينة
يركض الليل وننحب مخلينة

كلـــش كَصير هـــــــواية ليل العاشر
من يطر صبحك يكسر اشچم خاطر
نتفاركَ وكلمن دموعة ابعينة
_
نتسامر ونكَعد سوة چنة شحلات الكَعدة
زينب انة وي اخوتي كلمن دموعة بخدة
بالليل اطلبك ياصبح وجهك تظمة بسدة
مصباح عاشر مطلعة ايطلع البين شعندة

حلوة الليالي الچانت ويخواني
والليلة ما يــشبع اخّو من الثاني

كـــــــل جفن ما نام ويـتاني مــــساهر
من يطر صـــــبحك يكسر اشچم خاطر
نتفاركَ وكلمن دموعة ابعينة
****
نسكت ونتبادل حچي بالعين واهمل دمعي
كَالوا وصاية انحملچ لهاي الوصاية استمعي
ابهالخيمة اطفال وحرم باچر يزينب جمعي
خلوني اخاف من الصبح يالـيلي طوّل ادعي

يادمعة تنزل ينــــــجرح احساسي
وموادع الخــوان شــــــــيب راسي

ابيض رمــش عيــــني ابجـــفاكم صاير
من يطر صـــــبحك يكسر اشچم خاطر
نتفاركَ وكلمن دموعة ابعينة
**
حسينچ يزينب منذبح باچر يخوية وغافي
ينفطر كَلبي من الضمة وتنفطر حتى شفافي
ياخوية اطفالي وحرم باچر يتامة اخلافي
وانتي على حـر الجمر تركض اجدامچ حافي

هاي الوصية بت علي سمعيها
بنيتي رقية بعينچ اتحطــــــــيها

وياچــــــن ابكـل المواقف حاظــــــر
من يطر صبحك يكسر اشچم خاطر
نتفاركَ وكلمن دموعة ابعينة
****
ياعمــتي منــين ابتدي امي يعــــــمة امي
ماتحمل فراكَي وتون ابمدمعها يكثر همي
يبني علي من تنتحب ونتها تنحل عظمي
بأمي وصيتي لو رحـــت بيها يعمة اهتمي

بسيوف امية باچـــــر ايوذروني
عن امي بكتار الخيم ظيعوني

بالخــــــيمة ارد سالم يعـمة اتـناطر
من يطر صبحك يكسر اشچم خاطر
نتفاركَ وكلمن دموعة ابعينة
**
ما البس هدوم العرس ثوب الحرب ينطرني
من الشهد احلى والذ وي عمي موتي يسرني
ياعـمة امي وصيتچ صـبريها من تـذكرني
مثلچ وحــيدة او فاكَـدة ابدمعتها لا تقهرني

باچر اطفي شموعي من اوريدي
يا عمة احــــط دم الشهادة بأيــــدي

حي جاسم العريـس نادن باچـــــــــــر
من يطر صبحك يكـــــسر اشچم خاطر
نتفاركَ وكلمن دموعة ابعينة
****
وداع الاخو وي الاخت يكـسر كَلبها الحرة
وانتي يزينب وين اكو مثلچ اخـت بالعشرة
بيچ ارد اوصي وصيتي يالماكو يوم مقصرة
وصلي سلامي للبقت بدرب الضعن منتضرة

لمي العزيزة الظلت اتانيـنة
وفة ابو فاضل يكَلچ ديــــنة

ايميــــنة ويـسارة اطاها وي الناضـر
من يطر صبحك يكسر اشچم خاطر
نتفاركَ وكلمن دموعة ابعينة
**
أسالكم الدعاء #رائد #الاسدي

ليلة 10 محرم

آخر ليلة وياج باجر بين عداج
يازينب ضميني يازينب ودعيني

1
هليلة آخر ليلة يختي الحرة
يازينب بصدري مصايب كَثرة
باجر اخوج الخيل تهشم صدره
باجر يذبحونه عزيز الزهرة

عيالج تصبح وين من يروح حسين
يازينب حاجيني يازينب ودعيني



2
وكت الظهر باجر يسلوة حيدر
من الخيم خويه عجيب المنظر
جسمي سليب أعله الثرى بلا منحر
وضلوعي كلها من السحك تتكسر

ماترحمني الخيل تأخذ مني الحيل
يازينب شميني يازينب ودعيني



3
ماهمي موتي خويه يمج همي
ماريدج تشوفيني ضامي ومدمي
ماريد سكنه الطفلة توصل يمي
خافن تموت بيوم تنظر جسمي

خويه خذيها بعيد وخفيها أعله يزيد
يازينب سمعيني يازينب ودعيني



4
باجر يخوية أمرج صعب تفسيره
وحدّج بالحومة يزينب حيره
يم النهر مذبوح راعي الغيرة
أنتي محنتج يالحنينه اجبيره

مايحضر عباس مهشم منه الرأس
يازينب عذريني يازينب ودعيني



5
من الخيم باجر تفر العيله
وسوط الشمر يركض عليها بحيله
عيالي تنوح ودم دمعها تسيله
الله يعينج بين رملة وليله

مابين الرضعان مابين النسوان
يازينب ضي عيني يازينب ودعيني



6
باجر يزينب نار تسعر كبره
وخدرج يروح ولا عضيد أيحضره
خليني اخبرج لو مشيتي ميسره
اوصيج بعيالي البقت يالحره

من لوعات الشام بالج عالايتام
يازينب وافيني يازينب ودعيني

شطره
امجد صاحب الشطري

موشح للوداع (گوم ودع حسين)


گوم ودع حسين عمه ياعلي
باچر ايصبح وحيد وينولي


گوم ودعه ياعلي واشبع وداع
ضل وحيد وبالحرب نومه السباع
باچر افراگ وذبح باچر ضياع
ماتضل اخيام عدنه ولاولي
گوم ودع حسين عمه ياعلي


تخلص الوليان وتطيح الخيم
باچر افراگ وذبح باچر الم
والبطل تنصاب عينه بالسهم
امنين اجيبن عين وانطي الكافلي


امنين اجيبن عين وانطي للكفيل
الماي والدم عالنهر باچر يسيل
گوم ودع حسين عمه يالعليل
گله بويه اخلاف وجهك چا شلي
گوم ودع حسين عمه ياعمه


گله بويه اخلاف وجهك وين اروح
گلبك وگلبي تساون بالجروح
والله مانلام حگنه من ننوح
خلصو الطيبين والمجلس خلي
گوم ودع حسين عمه ياعلي


خلصو الشجعان مچتول وذبيح
والله حگنه الله واكبر من نصيح
باچر المظلوم بالحومه يطيح
محد يباري اليتامه ومحملي
گوم ودع حسين عمه ياعلي


محد ايباري اليتامه والحمل
ياسواد الليل فجرك لايهل
من يروح حسين مايرجع عدل
بين غربه يعوفني تالي هلي
گوم ودع حسين عمه ياعلي


بين خيل ونار وازلام الغرب
وانضرب بالسوط باچر وانرعب
اصرخ بحرگه يجيدوم الحرب
ليش نايم ماتگلي ادللي
گوم ودع حسين عمه ياعلي



لشاعرة اهل البيت
ام هجران العمارچية
غير مبري الذمة من يمسح اسم الشاعره او يغيره او ينسب الرثاء لشخص اخر

ليلة وداع ... يازهراء
ليلة وداع ... يازهراء

يالزچيه اخيامكم بالغاضريه
خَيَّم اعليهه الحزن هاي المسيه
الليله مَملِي اجروح گلب الهاشميه
منهه باچر تاخذ اعزاز المنيه
باچر ضَياع ... يازهراء
ليلة وداع ... يازهراء

اتروح من خيمه لعد خيمه العقيله
وتمشي مشي الناحل وينحب دِليله
تحچي ويَّه حسين والمَدمَع تسيله
فَرگِتَك صعبه يبن حامي دخيله
حلو الطِّباع ... يازهراء
ليلة وداع ... يازهراء

هالمسيه اموادَع اطفال ونساوين
يالزچيه وماتِجِف الدمعه بالعين
الليله آخر ليله وي عباس وحسين
باچر الوليان عالغبره مُطاعين
وين الشِّجاع ... يازهراء
ليلة وداع ... يازهراء

ليله أم الأكبر ايودِّعهه ابنهه
وتنحب ام القاسم وتنعه ابحزنهه
والرباب ايلوب عبدالله ابحظنهه
باچر الأحباب يتفرهَد ضعنهه
ومتلمهه گاع ... يازهراء
ليلة وداع ... يازهراء

جينه يا أم الحسن هالليله جينه
للعزاء بالدمعه والحسره لفينه
مانسينه هالجرح لاما نسينه
ابليلة اوداع الولي وحامي الضعينه
عدنه اجتماع ... يازهراء
ليلة وداع ... يازهراء

سيد علي الموسوي

ليلة الوداع

ليل العاشر. محد يتصور مأساته
والد حاير. گاعد ويودع ابنياته
كل كلمه تحمل جرح. ماضل وكت للصبح
**
صفت ليلة مأسي بكل معانيها
اليريد يودع اهله دموع يگضيها
بقت حته الخيم تبچي اعله اهاليها
ليلة نايبه شتريد سميها
شنهو يصبره،،،، الناوين احبابه يودعونه
يخلص عمره،،،،، بس الدمعه بطرف عيونه
عنده الفرح مايصح،، ماضل وكت للصبح
**
يفتر عاالخيم بعيونه دمعاته
ويتحضر بده يودع عزيزاته
ماتتوصف اليله معاناته
من العبره تموت بصدره كلماته
كلش صعبه،،، هاي تشمه وهاي تشبگه
اصبح گلبه،،، مثل الورقه النار تحرگه
باچر وداع وذبح ،، ماضل وكت للصبح
**
زينب لاگته متألمه وتنعه
شماله اليل رايح يركض بسرعه
علي الردالشمس! مو يمي ويرجعه
دمعهم صار دمعه تسولف الدمعه
هدمت حيله،، اخته وماتگدر لوداعه
واخر ليله،، والزينب ضلن چم ساعه
راسه يصير برمح،،، ماضل وكت للصبح
**
گابل مهد ابنه وضل يناغيله
وي امه يلولي من تلوليله
عبدالله العطش غير تفاصيله
نحره للذبح ساعات باقيله
سهمه ينطره،،، والمنحر من هسه يريده
تكسر ضهره،،، من يذبحون ابنه بأيده
باالدنيا ماكو ربح. ماضل وكت للصبح
**
يعاين للعضيد وصاحب الخوه
اذا طاحن اچفوفه تموت المروه
عكب عباس بيمن بعد يتگوه
يرد من يمه لكن چنه موهوه
بعد اعظيده،،، حسين تضيگ الدنيا بعينه
يمشي وبيده،،، من عاالشاطي يلم چفينه
دمع الحزن خل يسح. ماضل وكت للصبح

سعد العبودي

تفاركنــــــي وتيتمنــــــــــي
يخويه مـــــــــن تودعني
***
يخويه بليـــــــــــل توديعك جمره تسعـــــر بروحي
لأن بس هالمسه ويّـــــــاك وأعاشر بـــاچر النوحي
وريته مــــــــــا يجي باچر البي تتهـــــدّم صروحي
ومــــــــا يبقه حمه ولا دار فقط الآمــــي وجروحي
هــــــد الحيل هــــــــذا الليل
وزيّــــــــد بالگلب حزني
*
ليل وداعــــــك الما صار گبلـــــــه ولا يجي بعده
كل وحـــــــده ويه واليها تلـــــــــــوذ مأمّنه بسده
وتعلم لــــــو طلع صبحه صبحـــــه يذبحـه ويبعده
عنهــــــــا وتبقه مفجوعه وشدتها أشـــــــــــد شدّه
مـــــــن يروح عزيز الروح
يهد الحيـــــــل ويهدني
**
أحس الموت هــــذا الليل گــــــــرب منّي وتعنّالي
من شفتــــــــــك تودعني لو تـــدري شجره بحالي
وتدري أشصار من گتلي خويـــــــه أتكفلي عيالي
وگتلي أني مــــــــــا أبقه ولا يبقـــــه الوفي الغالي
تمنّيتـــــــــــه اللي حسيته
گبلكم خويه مـــا خذني
*
يخويه لـــــــــو غبت عنّي وغــــــاب وياك عباسي
أضنها أتغيــــــــــب ويّاكم روحي وگلبي وأحساسي
ويذبل كـــــــل امل عمري ويشيّب كـــل شعر راسي
وموتي يحين لــــــو غبتوا يـــــــــا اغله وأعز ناسي
بلا أخـــــــوه فــــــــــلا يسوه
العمر ويخيب كــل ضنّي
*
يريت الليل مــــــــا يطلع صباحــــــه وانفجع بيكم
ويبقه أمـــــــــوادع العيله اليأذيني ويأذيــــــــــــكم
ويبقه گبـــــــــــــال وحده وليها اللي يــــــــــواليكم
خوفي لــــــو طلع صبحه أمشي وموتــــــه أخليكم
بالميـــــــدان عالتربــــــان
وهــــــذا الحال يهضمني
****
رغم كل هــــــــذا يبن امي ابـــــــد لا ينشغل بالك
ورغم مصـــــــابي والآمي كــــــل الردته يجرالك
بعيوني اوّســـــــــــط گلبي سكــــن الأيتام وعيالك
وتعـــــــــــــذرني إذا منهم فرد مــــــــات وتعنّالك
مــــــن ينوح يـــــــا مذبوح
والله بموتـــــه يفجعني
*
يرب بحسيـــــــن وبزينب اطلـــــــب هالمسه منّك
ترد الغاب عـــــــن الناس وعـاش بأمنـك وحصنك
عجّل بأمره يــــــــا معبود وأنطي الرجعتـــه أذنك
اعلم طلعته بأيــــــــــــدك واعـرف هالشأن شأنك
يمته يعـــــود يـــــــا معبود
أمانــــي ومأمني وحصني




الشاعر
قاسم حتروش البلداوي
خادمكم
أسألكم الدعاء 🤲🤲🤲🤲🤲🤲🤲
غير مبري الذمه كل من يقرأها بطور الغناء

دم تجري مقلها بموادع اهلها
زينب ليلة العاشر الأميره باچر تنسبي وتمشي أسيره
بموادع أهلها
***
بوداع الأهل مـــــــــا نشفت الدمعه
وتون مـــــــن الهضم والحالها تنعه
يـــــــــــا أخ التودعه وداعها يفجعه
ويبچي الحالها كـــــــل واحد تودعه
بهالليلة الطويله مفجوعه العقيله
ولو طر الفجر حيرتها حيره باچر تنسبي وتمشي أسيره
بموادع أهلها
*
آه شحـــــــــال زينب والدمـوع تسيل
مــــــن خيمه لعـد خيمه التوالي الليل
وداع اللي كفلها هـــــــــــدّملها الحيل
لأن تدري المصايب بعده تصبح سيل
چم لوعه ومصيبه لتصيب الغريبه
لو عنها بعد بدر العشيره باچر تنسبي وتمشي أسيره
بموادع أهلها
****
ونّت لكن شونّـــــــــــه بوداع حسين
أهتـز إلها العرش بچّت أصول الدين
بمسه باچــــر تمسّي بلا ولي ومعين
مهضومه اوّحيده ضنــــــوة الطيبين
بلا اخوه ومخيّم ومحد بيها يهتم
لوعتها ومصيبتها چبيره باچر تنسبي وتمشي أسيره
بموادع أهلها
***
سلّمها وصيتــــــــه وگصدت الكافل
حزينه والدمـــــع عالوجنه متواصل
گـــــــــــــــام إلها وتلگّاها أبوفاضل
وگللها بأمانــــي ودمـــــــعج النازل
عهد الكافل أخته بس ربّي بقدرته
قادر هالوعد هوّ اليغيره باچر تنسبي وتمشي أسيره
بموادع أهلها
***
اطمأنّت لكــــــــــــن أبداخلها مقهوره
لأن تعـــــــــرف عدوها وتعلم بجوره
بوصيته حسيـن وضّح إلها كل صوره
وتعلم كــــــــــل ربعها تمسي منحوره
صبرت وبصبرها كفلت كل أمرها
ضعن حسين أبو اليمه ومصيره باچر تنسبي وتمشي أسيره
بموادع أهلها
*
يم جاسم والأكبـــــــــر راحت بحسره
تودعهم يويلــــــــــــي وبالگلب جمره
حزينه ومـــــــــــــا يلمها العالم بأسره
لأن تعلم جثثهم باچـــــــــــــــر موذزه
وتبقه عالوطيه بلا روس ورميه
بلا غُسل وكفن تبقه وحفيره باچر تنسبي وتمشي أسيره
بموادع أهلها
*
بالوداع الجــــــــــــــــره وبليلة العاشر
نندب يــــــــــــــــــا ودود وقاهر وقادر
عجّل طلعــــــــــــة المحجوب والصابر
مهدينه وأملنــــــــــــــــه اليجبر الخاطر
يتاني لهسّه ثاره ويريد الأشاره
ناصر دينك وناس الفقيره باچر تنسبي وتمشي أسيره
بموادع أهلها





الشاعر
قاسم حتروش البلداوي
خادمكم
أسألكم الدعاء 🤲🤲🤲🤲🤲🤲
غير مبري الذمه كل من يقرأها بطور الغناء

ليلة العاشر


يايمه يايمه ونيني انت اتسمعه
يايمه يايمه عد راسك انعه
يبني المذبوح ومتروس اجروح

عدك راسك انعه

ــــــــــــــــــــــــــــــــــــــــــــــــــــــــــــــــــــــ

طريح ذبيح وشفتك تتلوه من اجروحك
طحت شفت دوس الخيل مطلع روحك

يا اغله واحد بالضنه
حاجيني جلمه امك انا
بصدرك اثر حافر شفت
بجتلك تره ضهري نحنا

ياويلي ياويلي شصاير برسومك
ياويلي ياويلي مسلبين اهدومك

وبالحر مطروح ومتروس اجروح

عد راسك انعه

ـــــــــــــــــــــــــــــــــــــــــــــــــــــــــــــــــــــــــــــــــــ

اجيت والكيت صدرك يمه بخيل مرضرض
نعيت وبجيت بلكت تسمع وني وتنهض

كضيت ضلعي وحنبت
وطيحت نده كبالك طحت
من شفـــــــــــــتك اكبالي تون
مـــــــــــــن البجي يمك متت


يوليدي يوليدي ذبحك موتني
يوليدي يوليدي جرحك يوجعني

شيبني النوح ومتروس اجروح

عد راسك انعه

ــــــــــــــــــــــــــــــــــــــــــــــــــــــــــــــــــــــ

حسين عاليش بالهيمه مطشرين ضلوعك
خضيب عجيب والخيماتك تجري ادموعك

للخيمه دمعاتك تسح
رغم انت كاضيك الذبح
بجسمك يبعد امك شفت
الف وتسع مية جرح

اه يبني اه يبني حركوها اخيامك
اه يبني اه يبني مطحونه اعظامك

ماضلت روح ومتروس اجروح

عد راسك انعه

ــــــــــــــــــــــــــــــــــــــــــــــــــــــــــــــــــــــ


بنحيب وثغيب بضهر العاشر من اوصلتك
يحيف شفت برجله الشمر يكلب جثتك

يايمه احس ضاك النفس
بضلعك لمن شفته رفس
يحسين يانبض الكلب
من مثلي ابجروحك يحس


ذباحك ذباحك فرحان بذبحك
ذباحك ذباحك يم راسك يضحك

وجرحك مفتوح ومتروس اجروح

عد راسك انعه

ــــــــــــــــــــــــــــــــــــــــــــــــــــــــــــــــــــــ

دمه وضمه ومامش ناس لي رحمونك
كمت امسحت الدم الجامد فوك اعيونك

حاه ياليل اهدعش
دمك عله الكاع انفرش
مطروح باقي بلا غسل
ذبلان من كد العطش

بعيونك بعيونك شاهدت المنضر
بعيونك بعيونك ركضات الخدر

وجفنك مشبوح ومتروس اجروح

ـــــــــــــــــــــــــــــــــــــــــــــــــــــــــــــــــــــــ
حسين عبد الزهرة الدراجي

ليلة العاشر

تعبني يـــــــوم العاشر اهواي
ومنهد امــــس ماشاربه الماي
شحجيلك عله الصار يحسين
بمتوني ســــوط وجمر جواي


انه الجان مـــــــــــحد شايف اخيالي
صرت مسبيه امشي ودمعتي اتلالي
رحت عل ناكه بس النفس ينجر اخ
اخ الشام صار الـــــــــــشام جتالي

للسوك من طبوني يحسين
تضحك عليه الناس صوبين
كام الوجع ينشاف بالعين



ويلاه يبن امي ويلاه يبن امي
ــــــــــــــــــــــــــــــــــــــــــــــــــــــــــــــــــــــ

ما انــــــــــــدل وجيتك بلا حيل
وجدمي يتــــــــــــعثر بالمجاتيل
لمن وصــــــــــــلت وشفت نحرك
دايس البوسه مــــــراكض الخيل


بوسة امــــــــــــي دايس فوكها الحافر
ادنيت ارد اشـــــــــمك كلبي ضل حاير
من كل كتر طـــــعنه وجرح صاير بيك
عمت عيــــــــــني عليك بحالك شصاير

ياخوي يامــــن فدوه الـ اسمك
لومه الســــــــــتر بعباتي المك
مثل البــــــــذر طشرو جسمك

ويلاه يبن امي ويلاه يبن امي

ــــــــــــــــــــــــــــــــــــــــــــــــــــــــــــــــــــــ

خلــــــــــــيني اكلك ياضوه العين
صعبه الركـــــــض للمثلي يحسين
امجــــــــــلبه ابعباتي النار وركض
افــــــــــتر ادور عـــــــــل نساوين


من شــــــــــــبو النار ابوسط ديوانك
علي طالت يحــــــيف اذراع عدوانك
اكعد ياكلـــــيط الساده شوف شصار
هامت بالبــــــــراري حسين نسوانك

ياهضــــــــــــمت الهضمه يخوتي
ياحيف والله انســـــــــمع صوتي
اتمنيت انـــــــــا بهل ساعه موتي


ويلاه يبن امي ويلاه يبن امي


ــــــــــــــــــــــــــــــــــــــــــــــــــــــــــــــــــــــ

انه اخــــــــــــت المخوفها الرجال
مالايكه بجــــــــــــفوفي الحبال
امشي بمــــــــــــرام الحادي ضليت
ودخل الســــــــــــوك ودمعي همال

من اذكر طبــــــــــــتي للسوك يبن امي
مثل حركـــــــــت اخيامي يحترك دمي
ابــــــــــاوع راسك عله الرمح ينفخ نار
من تســـــــــمع ابشامت يلفض ابأسمي

صـــــــــعبه عليكم هاي صعبه
امشي ويــــــــوادم كلها ويغربه
ديوانهم فشله مــــــــــــن اطبه

ويلاه يبن امي ويلاه يبن امي

ــــــــــــــــــــــــــــــــــــــــــــــــــــــــــــــــــــــ


ماجانــــــــــت عله البال هايه
نســــــــوانكم تطـــــــلع سبايه
وجتالـــــــكم نمـــــــشي برايه
وجــــــــدامنه شــــــكو الرايه

هضموني وغــــــــلاتك خويه هضموني
اول تالي انــــــــــــه انطك عله امتوني
انه اخت الكــــــــــفيل المايعرف الخوف
يزعل مــــــــــن يشوف الدمعه بعيوني


فشله يخـــــويه طبتي للسوك
وطـــــرف العبايه بنار محروك
من اونيني طك الشيب بالنوك

ويلاه يبن امي ويلاه يبن امي


ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي