🏴🏴. قصيده في هجوم القوم على دار فاطمه الزهراء وسقوط جنينها
الوزن ميمر

كسروا ضلعها ويجري دمعها
لمن غبت يالمختار
بالزهره ماتدري اشصار
تغير وضعها يجري دمعها
.......................................
ماتدري بيها. اشصار. ياواليها
لمن غبت هجمواالكوم اعليها
بالنار حركوا دارها. تاليها
ماتدري بيها. هجموا عليها
جاروا عليها الاصحاب
كسروا ضلعها بالباب
والي فجعها. يجري دمعها
.......................................
ويلاه يمصاب البتول الزهره
بالباب لاذت ويلي ام العتره
كسرو ضلعها بأثر ذيج العصره
وينك يبوها. بعدك ولوها
طاحت على الكاع تنوح
وعالعتبه محسن مطروح
مصابه صدعها ويجري دمعها
.......................................
عالعتبه طاحت والضلع ماذيها
وينج يفضه كومي لحكي عليها
شوفي الجليله شنهو الماذيها

وياضلع الانصاب
من عصره الباب
شوفي الضلع شوفي العين
يافضه شوفي ام حسين

ياهو الدفعها ويجري دمعها
......................................
تغير وضعها وبس تهل دمع العين
وزينب تنادي اشيوجعج يم حسين
كسر الضلع ماذيج منه. تونين
تون الزجيه الونه خفيه
ماتنسه ابد يوم الباب
تون ودمعها سجاب
محد سمعها. يجري دمعها
......................................
بنت النبي الزهره اشكثر مظلومه
عاشت عمرها مقهره. ومهظومه
والباب ماتنسه مصابه ويومه

ماينّسه الباب
ولاغدر الاصحاب
من حركوا اعليها الدار
وصوب صدرها البسمار
وزيد وجعها. يجري دمعها
.......................................
ابجوا على الزهره وعلى مصيبتها
بنت النبي محد حفظ. حرمتها
للموت ظلت بس تهل دمعتها

مصاب الجليله ماكوا مثيله
صابو كلبها صوابين
ومن عدها كسروا ضلعين
ومحسن فجعها. يجري دمعها
........................................
تمت القصيده بعون الله تعالى
الشاعره ام حسين الهلالي✍️
اسالكم الدعاء لي ولوالدّي
لا اجيز شرعا حذف الاسم

موشح حماسي للزهراء

اه يا زهراء اه يا زهراء
عليج ونينه صحته وبجينه
الضلع ماننساه اه يا زهراء

*
اشلون ننسه يالزجيه امصيبتج
عليج دوم اتنوح ظلت شيعتك
كلوبنه ممروده والله لمحنتج
نبجي ونعين العقيله ابنيتج

انوح وياها اونبجي لبجاها
نصيح واويلاه اه يا زهراء

**
عليج يمحسين نجري هالدمع
وابد ماننسه ابد كسر الظلع
وكل موالي اعليج كلبه منفجع
وابد ماننسه يزهره هالوضع

نذكر اولادج تبجي لمصابج
ومحسن اذكرناه اه يا زهراء

**
ابد ماننسه الباب اللي حرقوه
والجنين العلى العتبه سكطوه
وظلعج الطاهر يزهره كسروه
وحيدره مجتوف ياويلي خذوه
امصابج اذانه ابنوح خلانه
بالحزن ننعاه اه يازهراء

*
هاي بضعه طه خلوها تنوح
طايحه عالكاع واهواي الجروح
امكسره ضلعين ودماها تفوح
امن المصاب امنحله وماعدها روح
تبجي وتنادي وتندب الهادي
هالوضع ترضاه اه يازهراء

**
تصرخ الزهره اولا رحموها
مارعوا حرمتها ماهابوها
الباب ياويلي بحقد دفعوها
والزجيه اضلوعها كسروها

سكط محسنها عالترب منها
وسفه وفكدناه اه يازهراء

*

عليج يازهره اشكثر ونينه
والمصابج كلنه اتاذينه
والجرالج ابد ماناسينه
بالقيامه انريدج اتحظرينه

انصيح حضرينه لاتخلينه
للمحب وياه اه يازهراء

****

الشاعره
ام حسين الهلالي
ذكروا امواتنه بسوره الفاتحه مع الصلوات
لا اجيز حذف الاسم

نعي مجرد للزهراء على هجوم القوم عليها

ابجوا على مصابي يشيعه
انه الطاهره الزهره الشفيعه
وانه الضايعه واشلون ضيعه
**
ياشيعتي ابجوا عليه
انه الجليله الهاشميه
وذكروا الجرى والصار بيه
*
انه الذي كسروا ضلعها
يوم الرجس بابي دفعها
ومحد لوناتي سمعها
**
ورى الباب من كسرو اضلوعي
صحت ياهلي وهلت ادموعي
يامحنتي اوياكثر لوعي

***

ونت وهلت دمعت العين
ومن طاح فوك الكاع الجنين
وتكسرت من عدها ظلعين
*
ابجوا على الاذت ورى الباب
وهجموا عليها الكوم الاصحاب
سكطوا حملها والكلب ذاب

**
يامن تحبها ابجي عليها
تون والضلوع امكسريها
وطاح الحمل واغشى عليها
***
حملها وكع والعين حمره
سطرها اللعين اشلون سطره
طاحت تون والدمع يجرى
****

بقلم ✍
الشاعره
ام حسين الهلالي
اسالكم الدعاء لي ولوالدّي

🏴🏴 فزاعيه للزهراء
لسقوط الزهراء

على طور اويلاه يكربله


اويلاه يم الحسن

🖤🖤🖤
يفاطمه يم الطهر
ماننسه يومج للحشر
ويلاه يضلع المنكسر
مالومه من غدر الزمن
▪️▪️▪️▪️
دفعوا الباب اعليها
وضلوعها امكسريها
ابجوا يشيعه اعليها
ويلاه ياغدر الزمن

▪️▪️▪️▪️
بالباب عصروها العده
الزمره اللعينه الحاقده
يالهادي ماتدري اشسده
ضلعين منها. اتهشمن
▪️▪️▪️▪️
بالنار حركوا دارها
صاب الصدر مسمارها
تبجي عليها ازغارها
اعليها البنات اتناحبن
▪️▪️▪️▪️
هالكوم ماعدهم رحم
عصروها والضلع انهشم
ضلت تلوج امن الالم
اتنوح ومدامعها جرن

▪️▪️▪️▪️
ويلاه يابت النبي
مقهوره ظلت يالولي
وزينب مدامعها تهلي
وياها البنات تناحبن
▪️▪️▪️▪️
هاي الجليله الطاهره
منها الضلوع امكسره
والهادي مايدري اشجرى
غدروها اصحاب الفتن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
✍️الشاعره ام حسين الهلالي
اسالكم الدعاء لي ولوالدي
لا اجيز شرعا حذف الاسم

طور يخيمات

ورى الباب
عصروا فاطمه الزهره ورى الباب
صاحت صوت فضه صدري انعاب
ومحسن سكط من عندي بالعتاب
▪️▪️▪️▪️▪️▪️▪️▪️▪️▪️▪️
بس غمضت عين النبي /الكوم اهجموا عليها

حركوا الباب بكل حقد /واخذوا علي وليها

عصروها والضلع انكسر /طاحت ميدري بيها

وعالعتبه محسنها وكع /
وتنطر علي يجيها

يكرار
صاحت وين ياحيدر يكرار
ترضه اشلون وجوا داري بالنار
ضلعي انكسر وبصدري البسمار
▪️▪️▪️▪️▪️▪️▪️▪️▪️▪️▪️
يابويه ماتدري اشجرى /واشعملت الرعيه
ما رعوا كدري وحرمتي /هجموا سوى عليه
ماجني بنت المصطفى /وعزيزته الزجيه
شنهوا الذنب مني صدر /
وبيتي احترك عليه

على العين
صابوني وسطروني على العين
وانه اصرخ وانادي يالابوا وين
عفتني ابين هالكوم الملاعين
▪️▪️▪️▪️▪️▪️▪️▪️▪️▪️▪️
هاي الجليله الطاهره /بس ماغبت ولوها
وصيتهم بيها اشكثر /
بعدك ولا رعوها
للدار اجوها بالحطب /
والبابها احركوها
وهيه تمانعهم غدت /من خلفه واعصروها

على الكاع

عصروها العده وطاحت على الكاع
صاحت بويه منها الكلب مرتاع
ماواحد حضر للزهره فزاع

▪️▪️▪️▪️▪️▪️▪️▪️▪️▪️▪️
ضلت عليله بالنزل /
زادوكثر وجعها
تنوح وتون ام الحسن /
سكته ويهل دمعها
عن حيدره تخفي الوجع /تخفي الم ضلعها
مايدري حماي الحمه /
ولاتشتكي وسمعها

بالاهات
تكضي الليل بالحسره والاهات
وتبجي عالجنين الي كضه ومات
مهظومه وعليه تهمل الدمعات
▪️▪️▪️▪️▪️▪️▪️▪️▪️
▪️▪️▪️
بضعه الهادي فاطمه /والطاهره الجليله
ماعدها والي او لا حمه /
بس الدمع تسيله
مالومه بفراش المرض /
ضلت تون عليله
مجتف خذوا من النزل /حامي الحمه دخيله

ينوحون
عليها اولاها اللتموا ينوحون
وابعيد البله كلهم يصيحون
وينادون يمه وتجري العيون
▪️▪️▪️▪️▪️▪️▪️▪️▪️▪️▪️▪️▪️▪️▪️▪️

خادمه اهل البيت
ام حسين الهلالي
اسالكم الدعاء لي ولوالدّي

علي ع يتكلم

ماتت زهره روحي
وكثرت بيه جروحي
بدفنتها بذاك اليوم
ردت عونه ردت عونه

يسموني بحامي الجار
محد هد طفه النار
كاسر روحي البسمار
ردت عونه ردت عونه

طحت كلي وي طيحتها
النار بجفها طفتها
انكسر ضهري بعد كلشي
بس لتطيح شيلتها
@@@@@@@@@@@@@&@@@@@@@@@

ماضل شي ما ينجاب
ماتت من دفعه باب
الناس تباوع وتگول
انخطف لونه انخطف لونه

فاگد حنية الكون
ولدي عله امهم يبجون
رايد من عدكم عون
انخطف لونه انخطف لونه

وكف گلبي عله شوفتها
نذر روحي عله عيشتها
طفه حلمي عله بابج
الزهره عازه عازتها
@@@@@@@@@@@@@@@@@@@@@@@

ماتت مدفوعه اباب
وراح الحگها بمحراب
الفاگد من عده احباب
شيسمونه شيسمونه

محسن بويه بكبري
يكبر ويكض ضهري
الميت ابنه ابسمار
شيسمونه شيسمونه

مربط بلوصيه انه
جا ما سرفن ردانه
قدر صار وأشاء الله
علي يحتاج عوانه
@@@@@@@@@@@@@@@@@@@@@@@

حاجيت الزهره بروح
ابنج باجر مذبوح
كعدي وخلينه نروح
عله عيونه عله عيونه

خيمت بزرج تنشاف
باجر زينب تنعاف
باجر ميته النسمات
عله عيونه عله عيونه

خلصت رحلت عمري
بعيني وشايف گبري
من طاحت ام حسين
باجر طايح خدري

كرار تحسين الخيكاني

إسقاط الزهراء
جديد /١٤٤٤هـ
__
شَبَّوا النار وفاطم مارعوها
من ورى الباب الزهرا سقّطوها

من درى عنها عصرها ومايهمه
اغشي اعليها وصار الكون ظلمه
طاحت على القاع ومحسن سال دمه
بضرب الاسياط أويلي لوعوها

من رآها غشت بالنور عينه
شال يمناه عسى شلّت يمينه
صفع بنت المصطفى الدرة الثمينة
راحت العين من الضربة عموها

هجموا البيت وهي مغشي عليها
سيدة الناس من اتعدّوا عليها
مات محسن ورايح من إيديها
والعقيلة العفيفة أرعبوها

هالخدر كان محط وحي الرسالة
والنبي يجيه بآداب وجلالة
بالإذن يطلب دخوله في جماله
واللي دخلوا عليها أغضبوها

من خدر فاطم بدت كل المصايب
والنبي مالحدونه بالترايب
وحيدر المحزون سيف الله الغالب
بحبل مچتوف وفاطم يضربوها

يوم عاشور ابتدى من هالرزية
والخدر راح ومشت زينب سبية
وضربة المسمار في صدر الزچية
صارت اسهام ثلاثة ضاعفوها

صدر الحسين تكسر مع ضلعها
والدم يسيل وزينب تنظر إلها
والحطب شبوه واليشعل جزلها
يوم عاشور خيمهم حرّقوها
___
بدرية آل عصفور
لا أجيز حذف الاسم أو طبعها للبيع

*في فقد الأم*
❤‍🔥❤‍🔥❤‍🔥❤‍🔥❤‍🔥
*افراق الوالدة يصعب عليه*
*جرحه بالقلب مثلات چية*

❤‍🔥❤‍🔥❤‍🔥❤‍🔥❤‍🔥

*يمه يا الحنونه وين رحتي*
*على فرقاش ما جفت دمعتي*
*ظلمة الدنيا من يوم الرحلتي*
*ترى جمر الفقد ناره سرية*

❤‍🔥❤‍🔥❤‍🔥❤‍🔥❤‍🔥

*دارش موحشة ظلمة وكئيبة*
*صعب اعله المحب يفقد حبيبة*
*شيعوض حنانش يالحبيبة*
*شمعة بيتنا ورحتي امن ايديه*

❤‍🔥❤‍🔥❤‍🔥❤‍🔥❤‍🔥

*محلا بسمتش محلا حچاياش*
*ويامحلاها يمه القعدة وياش*
*شيصبرني يايمة اعله فرقاش*
*طول العمر هالجمرة لظية*

❤‍🔥❤‍🔥❤‍🔥❤‍🔥❤‍🔥

*عنا يالحبيبة وين رحتين*
*حسافة بالقبر يمه تنامين*
*أنا ياليت قبلش أخذني البين*
*عقب عيناش ماريد الدنية*

❤‍🔥❤‍🔥❤‍🔥❤‍🔥❤‍🔥

*يا الحضنش دِفا يا الكلش احساس*
*يا أغلى من روحي واعز الناس*
*شلون انسى اللي ربتني يهالناس*
*ليل انهار ودمعاتي جرية*

❤‍🔥❤‍🔥❤‍🔥❤‍🔥❤‍🔥
*نسرين الشيخ*
*أم محمد الحداد*

إسقاط الزهراء سلام الله عليها
_______

طاح محسن والبتول اغشي عليها
قومي يافضة للزهرة سنّدِيها

شوفي حالتها بعد مامات أبوها
هجموا على الدار عصبة سقطوها
اتسترت بالباب لكن مارعوها
بولية العدوان واويلي عليها

سنديها وافرشي فراش المنية
ذّبت المحسن وعلتها خفية
عيونها انصابت من الصفعة القوية
والضلع مكسور والمسمار بيها

شالت الزهراء والمحسن اتعفّر
دمه يجري وانطفى المصباح الأصغر
بنت رسول الله بعد عيناه تُقهر
منتحل منها البدن ومسقّطيها

تنادي فضة وين بن عمي أريده
يغسّل المدلول ويدفنه بإيده
مات حملي والسبب عصرة شديدة
صدري إتهشم وداري حارقيها

قالت إلها يابتوله مادريتي
بعد ماطحتي من السطرة واغشيتي
قادوا الكرار وانت ما وعيتي
شالوا العمامة وإيده امقيديها

لبست الزهراء خدرها تريد تطلع
تمشي خطوة من الوجع كل ساع توقع
بغير حيدر ماتريد الدار ترجع
والأولاد تصيح تبچي من بچيها

لوعوها بالسياط وعذبوها
يا ألم قاست وبالسيف أوكزوها
آذوا الزهراء بعد ما مات أبوها
بالحزن ردت مع والد بنيها
__
بدرية آل عصفور
لا أجيز حذف الاسم أو طبعها للبيع

⚫️عنج غفن⚫️



طور ملا عمار الكناني
يافاطمه يم الحسن
.
.
.

يافاطمه يم الحسن. اعيون النبي عنج غفن
دمعج ولا يبطل بعد. وراحن لياليج الصفن
———
يا طه بس من غمضت. بنتك تره ايطردونها
تسكن بعد دار الحزن. وابوابك ايسدونها
قالوا يأذينه البجي. ويحرقنه جمر اعيونها
بعدك ترى ام الحسن. باحقاد وايلوعونها

يافاطمه غاب القمر ظلمه بعد كل العمر
حيدر علي لاجله يون ابنص الگلب أَشعل جمر
———

يالهادي لو تدري اشجره. وتنظرهم ايشتمونها
بسياط غاليتك تره. اصحابك ايضربونها
ابعتبتها لموه الحطب. بالنار وايشعلونها
ولدارها اتعنوا غصب مقصدهم ايدخلونها

وابلا حجاب ام الحسن. دخلوه غصب ابلا اذن
بباب احتمت تطلب ستر . وهبت اعاصير الحزن
———-

لاذت ورا الباب احتمت. ياويلي بس عصررها
مسمار نِبْتوا بالصدر. واضلوها كسروها
بالباب عصروها ووسف . لاجنينها سقطوها
هذي الوديعه فاطمه. نهر الفرج يدروها

مصحف محمد فاطمه. كوثر يطفي الحاطمه
عگبك تراها يالنبي. دمعتها ظلت ساجمه
———-

ياطه بس انت رحت وصيتك گطعوها
جثتك بگت عالمغتسل. ماهمهم وعافوها
ظلت ثلاثه امدده ولاحنوا ودفنوها
رفضوا ولاية حيدره. وبكل سبل منعوها

رحت وبعد شمسك طفت. وايامك الحلوه جفت
ضگتي المرار اويه الكدر . من والدج عينه غفت

————
✍🏻. نقلتها خادمة العتره
زينب آل جمعة ✨✨
ونسألكم الدعاء لتعجيل الفرج
لاأجيز حذف الأسم

( رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي)


تمت بحمد الله تعالی
بقلم : بنت الشمري

سقوط المحسن ع)في رثاء الزهراء عليها السلام

سگط محسن يافضه بساع الحكيني
لزمي ايدي وعلى مصابي اعينيني
««««««🖊🖊🖊🖊🖊
عينيني  تراني حيل   مابيه
كسرولي الظلع وامسيت محنيه
وبصدري نبت مسمار ياخيه
الزم الايد وعل الحيطان تچيني

««««««🖊🖊🖊🖊🖊

شوفي الدم تعالي علـّۓ الكاع يسيل
انفاسي اتكطعت مِڼعندي راح الحيل
يابويه   تَعاّلّ    بساع  شفت الويل
ريتك حاظر وانته الي تحميني
««««««🖊🖊🖊🖊🖊

دفعوا باب داري عليه وعصروني
يبويه وعلى وجهي حيل سطروني
وصيتك  بيه  چانت  واهم اذوني
دفعني  بقوته  ويسمع  تره اونيني
««««««🖊🖊🖊🖊🖊
يسمع ونتي وماهمته البضعه
الحگلي يبويه صحت بلدفعه
كسرولي الظلع والوجع شيجرعه
سطرني المايخاف •اللّـہ‌‌ علـّۓ  عيني
   
                             «««««🖊🖊🖊🖊🖊
يبويه كيدوا زوجي علي الكرار
كضته الوصيه وما شهر،بتار
لْـۆ لامشية الباري يصير الصار
جاشفت شيسوي بلياذيني

                                    ««««««🖊🖊
تمت
✍الشاعره حسينية الهوى
زهراء الحربي

لاستشهاد فاطمة الزهراء عليها السلام. (وزن تجليبة )

العين من البواچي والحزن حمره
على مصاب الزچيه الطاهره الحره
★★★★★
زمن غدار  هذا الحال من طبعه
مثل حال الاعادي بلوعتچ يسعه
مبتشرين مثله وهمه من ربعه
على الماعنده عثره طلبوا العثره
★★★★★
شلون تنام عيني وتهجر الغربه
وتمر قصة عذابچ يم حسن صعبه
تهز ريح الحزن دلالي وتعذبه
ويهد حيلي شجنها وخاطري اتكسره
★★★★★
نكروا كل جرم وتجاسروا بالرد
وكتب موجوده عن ذاك الجرم تشهد
وعن كسر الضلوع وسطر ذاك الخد
بخد الْقَبْلَّه  المختار  چم سطره
★★★★★
غدروا بالغدير وشيمة اليغدر
حتماً يدعي وگال النبي يهجر
وحتماً يوج دار وبلضلع يكسر
وحتما مايهمه الدين والعتره
★★★★★
دنيا الحاربتها شكثر مذمومة
كر وفر  عليها اتحولت حومه
سهام الماخطن بجروح ملچومه
شگد ظيم ونوايب شافت الزهره
★★★★★
لحد الموت ابچي ومايجف دمعي
على المظلومه ماابطل الحزن وانعي
حسيني الروح دوم وفاطمي طبعي
لحد الموت هذا النوح والحسره
★★★★★
اتفق طبع الزمان وناس خداعه
لهل الطاعه گالوا مابعد طاعه
للغالب الدنيا والقوي اذراعه
الجاري الماي نوگف بلدرب صخره

الشاعر حسن لعيبي الحريشاوي

لاستشهاد الصديقة فاطمة الزهراء
عليها السلام. (وزن الحدي)

بياحال حمّاي الحمه    
من يوم راحت فاطمه
★★★★★★
شيطفي گلبه المستعر.
غياب المحب شده وعسر
ظلمه الوكت صبح وعصر 
جروحه تون من كل كتر. 
فرگتها اصعب خاتمه
من يوم راحت فاطمه
★★★★★★
بعد الزچيه بياوضع         
بالدنيا حيدر يقتنع
بليل الحزن ذايب شمع  
بگلبه الف لوعه و صدع
أيامه صارت مظلمه
من يوم راحت فاطمه
★★★★★★
لومر على عيونه الصبح   
يلگه الصبح ليل وجرح
ياطير مكسور الجنح 
طير السعاده المنذبح
ماشالته  ارض  وسمه
من يوم راحت فاطمه
★★★★★★
ياحلم  ضاع من اوله    
بالعين من صار وحله
الچانت شمل بيته وهله   
وكل العمر چانت اله
اركان  المحبه امهدّمه 
من يوم راحت فاطمه
★★★★★★
حال اليحب والله صعب 
لورجع مفجوع الگلب
وعلمحب لو هل الترب 
بياحال جدمه على الدرب
وابسهم مايشفه انرمه
من يوم راحت فاطمه
★★★★★★
كلما ذكر بيته احترگ   
وعلى الظلع باب انطبگ
وعدوان ملتمه الخلگ
ريت الصدگ  لا  موصدگ
ايامه صعبه ومؤلمه
من يوم راحت فاطمه
★★★★★★
عايش على الدنيا رسم   
من فارگت روحه الجسم
ياجبل  ماشال  الهدم  
والحيل خايف ينهدم
وللموت ناره مضرمه
من يوم راحت فاطمه

الشاعر حسن لعيبي الحريشاوي

لاستشهاد الزهراء عليها السلام

بگلبك كسر أصبح يكرار
ماينجبر بعد الجره وصار
ضلع انكسر عن صدفه لوثار
ولو عن گصد من حرگوا  الدار
ولمن نبت بالضلع   بسمار
كلهم عزم يلفون الاشرار
يوم أغمدت سيفك البَتَّار
عن النبي من سمعوا أخبار
من گالك. أخفض الفقار
لومالگيت اعوان وانصار
خوفي ترد الناس  كُفَّار
زيد الصبر لاتضل محتار
وبيده الأمر ربك الْقَهَّار

الشاعر حسن لعيبي الحريشاوي

لاستشهاد الصديقة الزهراء عليها السلام

فاطمة  يافاطمة  يافاطمة
ضَيَّعُوهَا.  ولَّوعوُها. ومارعوها
فاطمة يافاطمة يافاطمة
★★★★★
توالت عليها المحن  مطرت عليها
الحزن من بعد الاهل شمخلي بيها
تشگف سياط   العده ظلت بديها
تبيع بيها الدنيا ليش    وتشتريها

غربتَّها      حيرتَّها    وعذبتَّها
فاطمة  يافاطمة  يافاطمة
★★★★★
علربيع شعجّل الشيب وعذابه
بالزجر صار الزمن لهجة خطابه
لچمة تندل لچمة من حرگة غيابه
يوم ابوها هجمت الگوم على بابه

ياجمرها.   ياصبرها   و ياكسرها 
فاطمة  يافاطمة  يافاطمة
★★★★★
مانساها الحزن ماتّيه دربها
والشكه ونتّها  والجّرح  گلبها
والغصب منها المواريث وغصبها
شكثر الله ستر   دنيا وماگلبها

حاربوها   وعذبوها    وارعبوها
فاطمة  يافاطمة  يافاطمة
★★★★★
ظالم ابوجه الزچيه صوته يعله
ماالچ ميراث گاللها      وتگله
بياقوانين وشرع حكمك واصله
الماتقبله عليك ولغيرك تقبله

مارحمها      ومافهمها    من ظلمها
فاطمة  يافاطمة  يافاطمة
★★★★★
نظره علتاريخ ياهو العنده نظره
وكل عذاب الي جره  اعليها يفسره
ليش ماتت فاطمه وبالكلب حسره
وليش بالسر تندفن فاطمه الزهره

يادمعها     ياصدعها     ياضلعها
فاطمة  يافاطمة  يافاطمة

الشاعر حسن لعيبي الحريشاوي

لاستشهاد الزهراء عليها السلام

اكبر جريمة قتل   ماتنذكر معقول
الكون منها ارتعد  من الحصل  مذهول
والارض الها بچت  محزونه عرض وطول
تاريخ اسود چذب   ماكو جريمه ايگول
محد ضرب فاطمه  باب التهم مشيول
ولاظلع عدها انكسر  ماكو جسم معلول
ولابيت نار اشتعل  لاكو طفل  مكتول
واكثر خفايا الكتب بيها الخبر منقول
اباب الزجيه العده   تجول العده  وتصول
وبعض الكتب  زورت لاشاهد ومدلول
عن موتها فاطمه   محد طلع مسئول
وتالي الجريمه اصبحت مكتوبه ضد مجهول

الشاعر حسن لعيبي الحريشاوي

ياتؤام الاحزان  لاستشهاد الزهراء
عليها السلام  ملمع ( بين قوسين فصحى )

(ياتؤام الاحزان والسقمُ     مَعْصُوْمَة  بالدمع تعتصمُ
الدمعُ والاهاتُ تعرفها      والليل  والزفرات والالمُ
فالكسر لايجبرْ    في سورة الكوثرْ)
★★★★★
من راح ابوها وغيبوا عصره
احنوا  ضلع بعد الكسر عصره
حزن الصبح بيه اتصل عصره
والليل مظلم  ماطلع  فجره

(باي ذنب اسقطوا الطفلا          واي ذنب كان للضلعِ
هل احدثت في الدين من امر ام احدثت رايأ على الجمع
رام الاسى يظهر        في سورة الكوثرْ) 
★★★★★
ابيت النبوة اليگطع الزهره
مايدري دافع فاطمة الزهره
كوكب عطارد كوكب الزهره
كلها ابسماها ادور مفتخره

(من جاء للزهراء ينذرها    وداهم الدار واهليها
ان يجنحوا للظلم والقهر اويحرقوا الدارومن فيها
بالرعب قد اثرْ   في سورة الكوثرْ)

★★★★★
بنار الحقد دار الشرف وجهه
لامستحي ولامن عرگ وجهه
ماظلت الها للاسف     وجهه
لله البتول اصبحت   متوجهه

(عاصمة للحزن والجرح   دامية والقلب مهتظم
للجبت والطاغوت بالعون  كم احدثوا قهروكم ظلموا
فالحزن قد ابحر    في سورة الكوثر  )
★★★★★
وين الشهامه والقيم ونها
زيدها فوگ الون على ونها
ظالم گطع غصن الورد ونها
يوم السلب حگ الورث منها

(خزائن الاسرار فاطمة    فاي سر مودع  فيها
لويعرف الملعون انصفها  ماشأن فاطمة لباريها
الخير لدى المحشرْ   في سورة الكوثر)
★★★★★
لاموسم اثمار الشجر لاحن
چفوف المنايا  للثمر  لاحن
لامن رحم بيها الوكت لاحن
اوراق منها ثمنطعش طاحن

(ماذنب انوار محطمةٌ       في الليل سرا كان مدفنها
ماتت على الاصحاب غاضبة  ومن جنى جرما واحزنها
لايعرف الجوهر      في سورة الكوثر)

الشاعر حسن لعيبي الحريشاوي

عن لسان العقيلة زينب تخاطب
ابيها امير المؤمنين عليه السلام
بعد استشهاد أمها الزهراء عليها السلام

اه يابويه    شلون بيه        
امي راحت   من اديه
وهذا گلبي المنفجع    معاشر جفوني الدمع
  اه يابويه        اه يابويه
★★★★★
اه يبويه راحتي   حسره عليه
ريت گبل  امي لفت  روحي المنيه
ماي عيني غفله.     راحت من اديه
امي راحت سلوتي  الزهرة الزچيه

ماتردلي     طال الغياب
وبحسرتي  هلگلب ذاب
مثل ميذوب الشمع        معاشرجفوني الدمع
اه يابويه      اه يابويه
★★★★★
اه يابويه  وحشتي      اليوم شكبرها
ياسمه اتراب الارض      اصبح گبرها
اثمنطعش يابويه.        ماكمل عمرها
راح اعيش ابلوعتي    واصبر صبرها

من بعدها    شلون ارتاح
خذت مني     كل الافراح
بعد كسرات الظلع.     معاشر جفوني الدمع
آه يابويه   آه يا بويه
★★★★★
اه يابويه   چنه مايلتم شملكم
ريت روحي ماتضل لحظه بعدكم
بجنه روحي. تعيش محله أيامي يمكم
ريت عمري فدوه يابويه العمركم

بعد شحمل      حسره وفراگ
احزان عمري  انطبگن اطباگ
دنيا مابيها نفع     معاشر جفوني الدمع
اه يابويه    اه يابويه
★★★★★
شفت امي بعيني من كسرواضلعها
صابره على الصار. سلوتها دمعها
الحجر من ونها تصدع من سمعها
وردتك هلبين.     يابوبه  گطعها

فارگتني         ام الاطياب
گبل راسي     هلگلب شاب
شفت گلبي المنصدع.     معاشر جفوني الدمع
اه يابويه   اه يابويه
★★★★★
من بعدها حالي يصعب چنت ادري
من بعدها ينملي     شوغات  عمري
وگفت الدنيا تشوف     شلون يجري
دمعي الماطفه ناري   وصار جمري

امي تالي     ا نگطع  ونها
بيت واصبح    خالي منها
الوصل حبله منگطع     معاشر جفوني الدمع
اه يابويه   اه يابويه

الشاعرحسن لعيبي الحريشاوي

لاستشهاد الزهراء عليها السلام (وزن الهجري)

عظم الله.    يحيدر.  .     أجرك بهذا المصاب
بعد فگد الزهره حالك   مدمع و نوح  وعذاب
★★★★★
أَتَغَيَّر الدنيا شكلها.  بعينك ولون الزمان
جنتك بِاللَّحْد صارت. والله دنيا بلاامان
روحك تشع بضواها.  التارسه البيت ابحنان
شلون ماتستعر نارك  جنتك تحت التراب
★★★★★
تشكي للمعبود حزنك.   فارگت اغله العباد
ابيضت عيونك عليها. وصبحك توشح سواد
گلبك الحارگته فرگه.   شلون مايصبح رماد
الراحه من بعد الزچيه    صفت بعيونك سراب
★★★★★
كاسر ضلوع الزچيه.    للظلم گلبه حليف
مَهَّد لطبرة الهامه.   الي سطر خدها  الشريف
صنع دولة شر لعينه.  رافع على الرحمه سيف
يعينك الباري دعينه  . اشكثر تتحمل صعاب
★★★★★
غربه واحزان وفجيعه.   دمع وهموم ومرار
انْصَبَّت أعليك المصايب. سوته ليل النهار
أمقيد ابحكم الوصيه    ما إلك غير اختيار
ذبلِّوا  زهرة شبابك.    ماتت ابعز الشباب
★★★★★
فرهدوا راحات گلبك.   سلبوا الراحه من اديك
طفوا من البيت شمعه.    لضاويه چانت عليك
الدنيا وفراگ الزچيه.    ياعلي شمسويه بيك
ساعه ماتحمل عگبها.    شلون لوطال الغياب
★★★★★
للامام المهدي نسعه.     ونرفع  آيات العزاء
يمكن أبلطمة صدرنه.   لفاجعة خير النساء
وبدمع جمرات تجري.     انهوَّن عليه البلاء
انخفف من احزان گلبه  گلبه من اللوعه ذاب

الشاعر حسن لعيبي الحريشاوي