ابوذيه
الامام الحسن العسڪري عليه السلام

يبومحمد تشتت راح شملك
غير الدمع والحسرات شملك
دناك الموت شم الورد شملك
وحيد ابنك رجع  ناره سريه

الشاعر حسن لعيبي الحريشاوي

( هوسات ) عن استشهاد الامام الحسن العسكري عليه السلام (تجليبه)

كلشي ينوح لجلك ظل يبومحمد
يضي الگاع نورك علارض من رد
املاگه الگاع بسماها الدمع للخد
     ( ملچومه الگاع ابسامره )

المجد والدين دمعه اتسابگ الدمعه
لبوالحجة المعارف  والعلم ينعه
مو ألها الفخر    سامره مرتفعه
     ( نورك سامره امعليها )

حگها اعليك تحزن سيدي الأملاك
وتنوح شماتنوح وتنحب الفرگاك
كل واحد اجاك ابشوگ وتعناك
    ( متعني الجنه وظامنها )

مثل أفعال جدك والد الزهره
ومثل نهج الإمام المرتضى وصبره
تدلي الفگد دربه وحاير ابامره
     ( ياهادي الناس ابن الهادي)

البلسم اعتنولك كونهم يدرون
يلثابت اساسك همه اليطيحون
وين أهل الغدر چا باچر يروحون
      ( ابنك باچر يأخذ ثارك)

الشاعر حسن لعيبي الحريشاوي

#شهادة_الإمام_الحسن_العسكري ع
#اطوار_مختلفه
#تصوير حضور السيدة الزهراء ع عند ولدها العسكري ع



تِنوح الزَّهره وجَتلَه        تبكي لحاله تدعيله
إبني العَسكري سَمّوه      ودَمعي ما نِشَفْ سِيله
إِجيتَه لازَمة ضلوعي      وَواسي المَهدي هاللِّيله
فِجَعني دَهري بولادي   وكِلْمَنْ صابوْ ادليله


كِلّ ليلة دَمِعتي تِطوف   على خَدّي واصِيحِ الآه
لَرِض سامِرّا اتعَنّيت      وإِجيت السَّاع الحَسَن اَنْعاه
مِمَدَّدْ عالفِرِشْ بيلوج    ولهيبِ السَّم سرى بِحْشاه
يِديرِ العين على المَهدي  ووِنينه للقَلِب كواه

*#آآآه ، متى الفرج يا ابن الحسن ، متى تأخذ بثار أبيك العسكري ، وبثأر أجدادك المقتولين،
أين المعدُّ لقطعِ دابر الظلمة ، أين المُنتظرُ لإقامة الأمتِ والعِوج ، أين المُرتجى لازالةِ الجور والعدوان* 💔 :


يالمَهدي إلَك ثاراتْ ما تِخلَص ولا تِنعَد
اوّلها كِسر ضِلعي  وبَعد يُمّه ضِلوع الجَدّ( واحسينااه)
على حَرّ الثِّره ذِبْحُوه طَريحِ وما إِجاله حَدّ
وعَمّتَك ما اظِنّ تِنسى لَجِلها دَمِعتَك بالخَد


🖊️خادمة أبي الفضل

#طور_الفراق
#لحن مستهل يبوفاضل طيحت إيدك مو وقتها



وينه وينه    الشايل أحزان البريه
وينه وينه    الياخذ  بثار  الزكيّه
وينه وينه    لهسه تنتظره السبيّه
وينه وينه ...

آيمهدي    عاشق  وحلمي  أشوفك
آيمهدي    يمتى تحضرني واطوفك
آيمهدي    شوقي  قَبّلها  كفوفك
آيمهدي ...


بإنتظاره     قلبي متروس بحسرته
بإنتظاره     دمعي  بخدودي حَفرته
بإنتظاره    حزني للملقىَ نشرته
بإنتظاره ...



🖊خادمة أبي الفضل

#شهادة_الإمام_الحسن_العسكري ع
#طور_أمك_إجيت_انه (للشيخ محمد درويش)
#لسان حال الإمام العسكري ع ووصيته لولده الإمام المهدي عج



يوليدي يالمهدي  ..  هاك إسمع اوصيّه
خَلّ دمْعَك ال بالعين  ..  للداسه أعوجيّه
ونحره دِماه تسِيل .. فوق السَّمهريّه
وجِسمه التِوذر حيل  .. بسيوف آل اميّه


وونِّينَك  لعَمتَك  ..  ام الخِدر والصّون
التتستّر بِديها  ..  وال توجعها المتون
والصِعدَت الهِزَل  ..  والعسكر ايْنْظرون
تنشد يا ولياني  ..  أمشي بسبي تِدرون


خلّ الدّمع ميزاب  ..  للعمه والإيتام
بيهن حدىَ الذّباح  ..  حد ما وصل للشام
ومن دَخْلَن الديوان  ..  ما فزعت الأعمام
لو حاضر انت هناك  ..  وامحضّر الصمصام

ولا تنسى ام حسين  ..  ماتت من العَصره
ومن عصرِةَ الملعون  ..  صاب الصدر كَسره
نفس الهجم عالدار  ..  خلّ الخيّم جمره
ومحسنها لمن طاح  ..  عبدالله طرّ نحره


🖊خادمة ابي الفضل

قصيدة بحق الامام الحسن العسكري عليه السلام


يمة يا مضلوم صاحت فاطمة
عليك سامرة حزينة ومضلمة
===================
انصاب گلبي من سمعت مصيبتك
والطم اعله الراس فوكَ جنازتك
ريت مشلولة ادين السمتك
نار بالدلال ضلت مضرمة
===================
نور سامرة انطفة واصبح ظلام
يمة ما رحموك اولاد الحرام
يالحسن يمة صعب هذا الكلام
اتلوج بالسم والطغات امنعمة
===================
بالحزن متروس گلبي يالحسن
شوفني بيا حال انعاك بشجن
ضلوعي چن اليوم هذا اتكسرن
مو دمع لحلك تصب عيني دمة
===================
انصب الماتم واون ليل ونهار
واحزن وانعاك وبدلالي نار
يامصيبة ايشيب من عدها الزغار
حالك ايبچي الارض وي السمة
====================
راحوا الاولاد لو سم لو چتل
المُعين اللَّه گلبي شيحتمل
بيك يتشفى النذل ابن النذل
ايريد يطفي النور والله ايتممة
===================
يمة يالمهدي الابو يحني الضهر
سهمة بالدلال صاباك وعبر
عظم الله اجرك ييمة المنتضر
جيت اواسي ابهالمصيبة المؤلمة
====================
أسألكم الدعاء رائد الاسدي

اناغيلك عشگ
من دم محترگ
صــار ســـــنين اتاني
عله عيوني غفه
حلم بس ماصفه
حلم صاحب زماني

يمته تثــمر الندبه وتظــــهر ديـــــنك الباقي
نهر ميت نشف طينه هيج صـــايره اعماقي
تره روحي بلا مهدي شجره مناطره الساقي
وكل ما طـالت الغيبه تبدي اتصوفر اوراقي

ايــن النجوم الزاهره
مو کلبي ناره موجره
شوكت ابقه انتضر … ياجرح العمر

من عشــــــگي ذاك الاولي
عندي وصي من رس علي
اكحل عيني بي … امامي المنتظر

اخاف الموت يلفيني
ومنك تنحرم عيني
غيري يشوفك وانه
تراب الگبر غاطيني

راح احجي جروحك
بداعت ذن جروحك اكسر غيبتك
محـد رد ثـار اهلك
وطلعت بيـن الـوادم تركض عمتك
......
الله يـا حـامـي الـشــــــريـعـة * * * أتـقـر وهـي كـذا مـروعه
بـك تـسـتـغـيـث وقـلـبـهـا * * * لـك عـن جـوى يـشكو صدوعه
تـدعـو وجـرد الـخـيـل مـصـغـيـه* * * لـدعـوتـهــا سـمـيـعه
وتـكـاد ألـسـنـة الـســــــ‎ـيـوف * * * تـجـيب دعوتها سـريعه
.....
وين ادورك … ليت شعري يوصل لحضرة جنابك
وشوف شيسوي بكلب اليحب غيابك
تدري كل جمعه افر وجهي اعله بابك
.....
من جمعه لجمعه
تهلكني الــــدمعه
لو تـــدري بحالي
چــن ام امضيعه

بنفسي … مره لو بالصدفه اشوفك
بنفسي … يمته اقبــــــلهن جفوفك
بنفسي … هسه مــره بطيف مرني
بنفسي … عيوني محتاجه لطيوفك

وهل مثلك يقبل مثلي
اذا رافضني بـس گلي
يوميه اكــــــولن هاي
بلا مهدي العمـر شلي

ياخذني الهجـــر ويرد
اريد اوصل لابن احمد
اين السبب المتصل بين الارض والسمه
ثارك بيه مـــــــــا يبرد
موجر گلبي چن مـوگد
يذبحني اليجامل على كسر امك فاطمه

نسو كسرة ضلعها
ملعون الــــدفعها
والبلوه صـــفعها
وبعدها الوادم تجامل

اسف جرحتك … ولكن مو قصد
ضل الاشتياق … ياخــذني ويرد
ابجيك بدمع … دمــــع فاگد ولد

بدونك كلشي ماينفع خـــل تهجرني الوادم
المهم عندي اشوفنك واسمع (الايا ايها العالم)
كلبي يترجم حروفك كوه يضل يضخ بالدم
مريض وعلتي مخفيه وانته تعرف المبهم

متى ترانا ونراك
وبيدك الرايه تصـيح
جــدي عالغبره ذبيح
تشفي بيدك جم جريح … متى ترانا ونراك

ياكاشف الكربِ عن وجه الحسين
اكشف كربة المهدي
فقد طال الصدى
بك يارب ياغياث المستغثين
حزنه بكل وكت يبدي
ازل عنهُ الاسى
فأليك الرجعى والمنتهى
فقد طال الصدى

بوجهك الكريم
بلطفك الرحيم
اجعل حوائجنا بهِ مقضيه
اجعل صلاتنه بهِ مقبوله
اجعل ذنوبنا بهِ مغفوره
بوجهك الكريم
-*-*-*-*-*-*-*
خادم القصيده
عزيز المياحي

شهادة مولاي الحسن العسكري


يامـــــــولاي... يارجــــواي....يالــــوالي
يامـــــــولاي... يارجــــواي....يالــــوالي
ــــــــــــــــــــــــــــــــــــــــــــــــــــــــــــــ
مصيبتكم ملتنه اجروح.ننزف مو جرح واحد
تبدي من بني العـــباس.ويبقى هالجرح خالد
سمهم بالچبــد صـاباك.وگبلك سمو الوالـــــد
تبقى الـشيعه تتعـناك.نهح للموت وتعاهـــــد

بوّجــه الموت... صحنه بصوت.. منبالـي
يامـــــــولاي... يارجــــواي....يالـــــوالي
ـــــــــــــــــــــــــــــــــــــــــــــــــــــــــــــــ
مضلوم انته يامـــــولاي. باقي ضلمك ويمــتـد
اليمرلك مـــر عله اجدادك. لا محصي ولاينعــــــــد
الذبح والسم شعار الكم. الحُسن العاقبه تنــعد
قانون وصــــدر باللطف.حسينك موقفه يشهد

ضحه حسين...لجل الدين....بالغــــــالي
يامـــــــولاي... يارجــــواي....يالــــوالي
ـــــــــــــــــــــــــــــــــــــــــــــــــــــــــــــــ
درّو من صلبـك المـوعود.منقذ هالخلگ يسطع
صبحو بالفعل فرعـــون.لمــــــن ذبح الرضـــع
موسى من اله الكـــــون.ضمه لحــين مايطلع
ونته حاضر تعايــــــــن.ضلمهم والأذن تسـمع
جّرعت المرّ...قصتك شلت...احوالــــــي
يامـــــــولاي... يارجــــواي....يالــــوالي
ـــــــــــــــــــــــــــــــــــــــــــــــــــــــــــــــ
شاهدنه عطف وحسان.. ولمّسنه هالامان البـيك
علُم ومعرفـه وغيـــره.تسولف كلهه عن ماضيك
شنهو الصار وشسويت.سمهم بالغـــــــدر ياذيك
بيك انفجعت الأكـوان.وجــدك طاها ليجازيك

اريدن صوت...يگلي مـــلا...انعالــــــــي
يامـــــــولاي... يارجــــواي....يالــــوالي
ـــــــــــــــــــــــــــــــــــــــــــــــــــــــــــــــ
ردو عالضريح انــــوب.رادو للتراب يصــير
حقداً بالنبي وأهلــــــه.قرو حكم بالتدمــير
جيش الناصبي خطط.سوه بمرقدك تفجير
بغض لكل فتاويـــكم.يمشي بفتوت التكفير

لاأرهــــــــاب..لاأذنــــاب...منـــــوالي
يامـــــــولاي... يارجــــواي....يالــــوالي
ـــــــــــــــــــــــــــــــــــــــــــــــــــــــــــــــ
ننصبلك عزيه اليوم.وخليهه الخلگ تعلم
ندري تحظر الاملاك.كـــل اجدادك ونلتم
فايز كلمن اتعـــناك.هناك بالحشر يسـلم
حبكم هذا ماننسا.. الله بحالنه الـــيعلم

فــــــاز الي...عينه بصورتك....مالـــــــي
يامـــــــولاي... يارجــــواي....يالــــوالي
ـــــــــــــــــــــــــــــــــــــــــــــــــــــــــــــــ
يدرونه زلم وسباع..لــــــــو عالموت مانندم
بفتوه من أبو محمد..خليــــــــنه العده تردم
فزعت عالمنايه صفوف.خيرهم بقى يـلعثم
ضحو لجل ابو المهدي.سامره ارتوت بالـــدم

أضل انطر... لحدما.. يضهر الغالي
يامـــــــولاي... يارجــــواي....يالــــــوالي
ـــــــــــــــــــــــــــــــــــــــــــــــــــــــــــــــ
تمت بفضلهم ع
خادم الزهراء ع
✍️ياسر الزيادي

عضم الله اجرك بويه ياصاحب زماني

گبال عينـــــــــه ويحتظر
يســــــــاعد اللـه المنتظر
أصعــب اوداع...يمهدي.. أصعب اوداع
ــــــــــــــــــــــــــــــــــــــــــــــــــــــــــ
گبال عينه العسكري بالســــــم گضـــــه
وسهم يچوي المهدي وبگلـــبه مضـــــه
متربــــه وتصـــــرخ اجتلـــــه الرافضـه
كــــــــل أرض سامره حزنت والفضــــه

ورق ميّوصف اوحبر
ياگلـب يحـــمل صبر
أصعب اوداع يمهدي... أصعب اوداع
ـــــــــــــــــــــــــــــــــــــــــــــــــــــــــــــ
وداع موت المهدي ودع والـــــــده
اوعله اخدود الورد سالت مو نــده
بعده شاب وغدت عينه مجعـــــده
حيل صعبه المهدي ضل ألـــــوحده

والــــــده ابسم انغـــــدر
حيل دگــــو اعله الصـدر
أصعب اوداع يمهدي.... أصعب اوداع
ـــــــــــــــــــــــــــــــــــــــــــــــــــــــــ
نزلت املاك السمه تواسي الــــــولي
الزهره تنعى وياهم وينحـــــب علي
ثگلت اهمومه وبعد مـــــــــا تنجلي
ينعى كل عمره بگى ودمعه يهلــــي

گلب مهدينه انفطـــــر
دمعه عالخد كالمطـــر
أصعب اوداع يمهدي....أصعب اوداع
ــــــــــــــــــــــــــــــــــــــــــــــــــــــــــــ
چم جرح بگليبه شايل چم قهــــــر
باب محسن والضلع طبره ونحـــــر
بذنه يدوي صوت خد من انســــطر
والجنين النار حرگتلــــه الظهــــــــر

عمـه محسن من وگع
عالوجـــه حـيل نرگع
أصعب اوداع يمهدي...اصعب اوداع
ـــــــــــــــــــــــــــــــــــــــــــــــــــــــــــــ
ايگطـــع ابچبـده يطاري كربلــــــه
من تمر ابـــــــدمعه ثــوبه يبللـــــه
والاشد شوغات عنده عمّته لمدللـه
تعثر برجليهه لمَن ركظـــوها بلفلـه

أخ يا ذاك الظهـــــــر
عالرمح راس الطهــر
أصعب اوداع يمهدي... اصعب اوداع
ــــــــــــــــــــــــــــــــــــــــــــــــــــــــــــــ
تمت بفضلهم ساداتي ص
خادم الزهراء ع
✍️ياسر الزيادي

 (#١٤٤٦ لشهادة الامام الحسن العسكري عليه السلام)           
             غابت شمس عن أرض سامره

              والمهدي ضلت  ناره مستعره

صوت النياح تسمعه بيها ... ايد الظلم سمت وليها

                 ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يوم  ثامن من  ربيع  الحزن  يوم النايبه

شمس ذاك اليوم مدري  يامصيبه جايبه

صفت روح العسكري بسم الاعادي ذايبه

أصبحت سامره حزينه وبالدمع متلاهبه



             حزنانه  ضلت دوم حزنانه

           وفوك المتون انشال جثمانه


   وللمنتظر كل تعازيها ... ايد الظلم سمت وليها

                ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

اليوم سامره أعلى صوت الناعي فزت ناسها

وطلعت  ناس  ابدمعها  وناس  تلطم  راسها

ومو   ركن  منها  التهدم  بل  تهدم   ساسها

اليوم مجروحه الضماير وخنكه كل أنفاسها



            وناعي المصيبه بالخبر ناده

           كومو لنعش الحسن ياساده


الساده الهظم زايد عليها ... ايد الظلم سمت وليها

             ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

دار  الامامه   موحشه  صارت  وتسمع  ونها

جنها  خيام  ابكربله  من  الزلم  فرغت جنها

اخلاف ابو المهدي مظلمه بس الحزن يسكنها

ويلاه امس جانت شمس تشعشع بنوره منها




            ومأجور يابو الغيبه مأجور

          هاي المصيبه اتذوب الصدور


ابعينك المايسكت بجيها ... ايد الظلم سمت وليها

                  ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

يبن  الحسن يالمنتظر  ياامنية  كل مشتاك

يالغايب ندري  تره يجوي  الكلب كل افراك

يتسابك  لجفنك دمع ولكلبك الضيم  اسباك

انباك من روحك فرح ومن عينك النوم انباك



             ثار الحسن انت الذي تجيبه

            ومولاي عجّل  طالت  الغيبه


   والشيعه تتنطر تجيها ... ايد الظلم سمت وليها

                 ومارحمت بعترة نبيها

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

ماتنسه ادري  كربله  ولا باب فاطم والنار

وللثار  ياابن  الحسن  عجّل   يمهدي للثار

عندك ضعن رد منسبي للسوط بمتونه اثار

عندك  ذبيح بكربله اضلوعه صارت طشار



            عندك رضيع من الدمه اترّوه

             واجفوف عمك راعي الخّوه


اظهر اعداك وامحّي اساميها ... ايد الظلم سمت وليها

                  ومارحمت بعترة نبيها


الشاعر الحسيني: عباس محمد الحميداوي

(١٤٤٦.٢٠٢٤ ربيع الأول شهادة الامام الحسن العسكري عليه السلام)

رباطات ختامية للحسن العسكري

وينوح مهدينه / وينوح مهدينه
ذب اعمامته وينوح مهدينه

—————————-
ودمعته بعينه / ودمعته بعينه
يبچي اعله العزيز ودمعته بعينه

👈🏻الشاعرة ام علي الإماره

—————————-

كل احنه خدامه / كل احنه خدامه
نون للعسكري وكل احنه خدامه
——————————
مگابل نخليها / مگابل نخليها
لطمتنه سوه مگابل نخليها

👈🏻المله ام علي الكربلائيه

—————————-

امشونه لسامره / امشونه لسامره
نواسي فاطمه امشونه لسامره

👈🏻المله ام حيدر المسلماوي
—————————-

عونه اليواسيها / عونه اليواسيها
الزهره أعلى الولد ....عونه اليواسيها

——————————
لمصابك الليله / لمصابك الليله
ندك أعلى الصدر / لمصابك الليله

—————————-
ويريد عوانه / ويريد عوانه
يايومه ثجيل ...يريد عوانه

👈🏻العلويه ام علي بغداد

————————

ورايده مرادي / ورايده مرادي
منك يبو صالح رايده مرادي
👈🏻العلويه ام مؤمل ناصريه

—————————-
جيناك عنايه / وجيناك عنايه
مولاي بحزن جيناك عنايه

👈🏻المله العلويه ام سجاد

—————————

رباطات مشتركة من تجمع خيمة عزاء اهل البيت ع
غير مبري الذمه اليحذف اسماء الملايات من المنشور
العمل مهدات لمولاي الحجه المنتظر عج

رباطات نهاية عزاء للأمام الحسن العسكري


وين اليواسونه / وين اليواسونه
الحجه بوالده وين اليواسونه

—————————-

نتعنه سامره / نتعنه سامره
برايات الحزن نتعنه سامره

—————————-

والزهره ويانه / والزهره ويانه
تلطم للحسن والزهره ويانه

👈🏻الشاعرة ام علي الإماره

——————————
للمهدي عوانه / للمهدي عوانه
نمشيله بحزن للمهدي عوانـه

——————————
مشونه نعزيها / مشونه نعزيها
الليله فاطمه مشونه نعزيها

👈🏻المله ام محمد العلويه

——————————
والدمعه مجريه / والدمعه مجريه
نواسي المنتظر والدمعه مجريه

——————————

وندك عله الهامه / وندك عله الهامه
نواسي فاطمه وندك عله الهامه

👈🏻المله ام محمد باقر
—————————-

وين التعازينه / وين التعازينه
مصاب الحسن وين التعازينه

👈🏻العلويه ام محمد ميسان
————————-

الدمعه بعيونه / الدمعه بعيونه
اليوم الجعفري الدمعه بعيونه

——————————

نلطم وياهن / نلطم وياهن
لنرجس ولحكيمه نلطم وياهن

👈🏻المله ام علي كفاية
—————————

والحاجه مكضيه / والحاجه مكضيه
بجاهك يالحسن والحاجه مكضيه

👈🏻الشاعره فضيله هاشم الموسوي

—————————-

رباطات مشتركة من تجمع خيمة عزاء اهل البيت ع

غير مبري الذمه اليحذف اسماء الملايات من المنشور
العمل مهدات لمولاي الحجه المنتظر عج

للصحن جينه. نواسي مهدينه
العسكري بيده. ايسجل اسامينه
***
الخدمه نوعيه بيها روحيه ابدار الامام
نرفع الرايه واحنه وفايه بهذا المقام

اليوم كردوس الخدم رافع شعاره
والتحيه تختلف جوه المناره
عالامام نسلم ونقره الزياره

نقترب منه وهوه يقبلنه
بالصحن نشتم ريحت الجنه
***
كل ايادينه بيد مهدينه نبع الحنان
سيد النعمه وعطره نشتمه بهذا المكان

من نطب سامره ياخذنه العشك وين
وشحلات الهوه يم العسكريين
ما يرد خالي اليدك باب الامامين

اشمحله سامره الناضر تسره
وحلف المهدي خادم الحضره
**




كل سنه نعاهد حضرت القائد ونحي العزاء
بالصحن نصطف وخدم نتشرف الراعي العطاء

الرايه هاي المنتظر يشرف عليها
يعني عطر العسكري موجود بيها
بعلي الهادي ونرجس احنه مزوريها

تبقه رايتنه رمز خدمتنه
بدار ابو صالح تعله صيحتنه
**
كل سنه وكل عام تلتم الخدام بوسط الرواق
وللضريح نصد ولحضه من نبعد نموت اشتياق

ونرجع نطوف الكبر ويزيد حبنه
بالامام المهدي متعلك كلبنه
يمته يوم الثار يالغايب ندبنه

دوم ندعيله وكلشي نحجيله
صاحب المرقد ويانه كل ليله
**







الارض سامره تحضر الزهره والهم تنوح
تنصب الماتم والدمع من دم وتبدي الجروح

تعتني يم الامامين الحزينه
اتنادي يبني توني اجيت امن المدينه
تصيح ليش اوليدي جبده مسممينه

عالولد تنعه وتذرف الدمعه
وتدري بالمهدي منكسر ضلعه
*
تمت
تحسين الخفاجي

على الحسن ويلي وويلاه
......
يالناعي انعى بعالي الصوت
شد الرحال السفرت الموت
اشلون العظيم ايضمه تابوت
يونس بجاله من بطن حوت

بكسرت الخاطر صار ينعاه
.....
مات بغدر سم اليكرهون
واعليه جرت دمعات العيون
اظلم صبح من بعد هالكون
والعرش ناح اويه الينوحون

عظمه المصيبه يلي تهواه
.....
هالساعه روح المهدي ياناس
متوجرة ابنيران الارجاس
ازغير بعدة وشيب الراس
بفراك ابو ما ظلت انفاس

جم لوعه عاش بسبب فركاه
......
وين اليواسي بدمعت العين
قائم محمد ناصر الدين
ذايب دليله من الونين
ما شاف راحه بهاي السنين

سهم اليتم من زغرة صاباه
......
يم النعش متمدد يصيح
ساعه يكوم وساعها يطيح
اشبه بسعفه وتاخذا الريح
فاكد الحيل ودمعته تسيح

من البواجي انعمت عيناه

.......
شيع المهدي والدة اليوم
مو بالمدامع لا بالدموم
عظمه المصيبه حكه مالوم
بيه انزرع كل حزن معصوم

الله يعينه العظم بلواه
.....

للمهدي نرفع تعزيتنه
بلطمت صدرنه الشرفتنه
تحت امره نوضع تضحيتنه
ما نخلف اويا قافلتنه

لخر نفس باقين وياه
......
الحمدالله رب العالمين
اللهم صل على محمد وال محمد
موسى الخادم

أبو ذيات في شهادة الإمام العسكري عليه السلام .
ـــــــــــــــــــــــــــــــــــــــــــــــــــــــــــــــ


تِحِضرَك فاطِمة الزهرة لَوَنهَه
تُوِن وِجــبَال تِتفَطّر لَوَنهَه
تِــشاهِد حَالَك ٱتغَيّر لَوَنهَه
يِگطّع چَبدِتَك سِمّ المِنيّة

ـــــــــــــــــــــــــــــــــــــــــــــــــــــــــــــــ

شتِريدِ الدنيا مِن عِندك وَشِلهَه
سِمهَه ٱحشَاك گطّعهَه وَشَلهَه
وخَلّص حَتّى مِن عَيني وَشِلهَه
وبُقَت بَس بالدّمه ٱعيوني جِرِيّة

ـــــــــــــــــــــــــــــــــــــــــــــــــــــــــــــــ

إلَك ما أبخَل بحَــسرَة وَجِرهَا
مُصابَك جَمرَةِ ضلوعي وَجَرهَا
عَليك الدمعة مَذروفة وَجِرهَا
ٱنكتَب باللّوح يَم رَبّ البَرِيّة

ـــــــــــــــــــــــــــــــــــــــــــــــــــــــــــــــ

**

هوسات في شهادة الإمام العسكري عليه السلام.
ـــــــــــــــــــــــــــــــــــــــــــــــــــــــــــــــ

وَسفة ٱبن النجابة والشرف ظلموه
ما رَاعَــوا گرابة جَدّه وحِـشموه
سَليل الدّين أهـــل الجور سَمّوه

مصدوع الدِين وأركانَه

ـــــــــــــــــــــــــــــــــــــــــــــــــــــــــــــــ

وعلى امصابه الملائك تِهمِل العَبرَة
وَبو صـــالِح دِلِيله يِلهَب بجَمرة
ضَـــــجّت بالألم والدمعة سَامَرّا

ولِبسَت ثوب اسود حَزنانة

ـــــــــــــــــــــــــــــــــــــــــــــــــــــــــــــــ

إبن حَيدر علي باب العِلِم مظلوم
ودَارَه مظلمة وبالوَنّة هذا اليوم
طايِح يا وسافة والچبِد مسموم

وظَل خالِي وموحِش دِيوانَه .

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

ماخله السبي دمعات تبجيــــــــها
ذكرى امصاب ابوك شلون تحييها
ــــــــــــــــــــ
فاگد والعرف جرحك نسه اشفاگد
ويه الحزن جنك دوم متواعـــــــد
مثلك باجي دم مااعتقد واحــــــد
يصبح عينك الدم ويمسيها
ــــــــــــــــــــ
ماظل دمع بس سهم السبي بعينك
العليل اتعينه زينب ياهو اليعينـــك
شالت نعش ابوك شلون جفينـــــك
نكثته اتراب گبره لو بقه اعليها
ــــــــــــــــــــ
وحدك منهضم لا اخو ولا صاحب
وبحكك الضايع محد يطــــــــالب
گلبك من كثر نـــــــاره شمع ذايب
واجروحك تكشفها وتغطيها
ــــــــــــــــــــ
ساكن بالصحاري وسهر ليليــــــــه
ماتنلام عندك حره مسبيـــــــــــــه
بيك الشام كلما يمر طاريــــــــــــه
تصفك جفك وهامتك تحنيها
ــــــــــــــــــــ
اعيونك ذابله وامحفره اخدودك
وحيل اتريد منك فاتحــة عودك
جنك عمك العباس بس جـــودك
عينك لجن دم مو سهم طافيها
ــــــــــــــــــــ
بيك الفرح مامر حتــــــى لو خطفه
تبجي اضواها خاف اعيونك وتطفه
يالمهدوم حيلك بيــــــــــك عالوگفه
الوادم من تجي اتعزي وتلاگيها
ــــــــــــــــــــ
يامخلوق صبرك گــــــــــــدر يوصلله
خمس اسنين عمره واعله ابوه صلله
ياهو يصيحلك من تعثـــــر اسم الله
ونارك لو دوت ياهو اليطفيها
ــــــــــــــــــــ
بجفوفك قميص حسين المدمم
صار الهوه يلجمك جنك امهشم
تطلب ثار جم مذبوح ومســـمم
وجم مهضومه تنطر فزعتك ليها
ــــــــــــــــــــ

اللهم عجل لوليك الفرج
علي محسن الزيادي
ونسألكم الدعاء

نعي ليلة الامام العسكري ع

نعش العسكري يا ناس نزلوه
يشبع منه شوف المهدي خلوه
دوه مامش صحت عدكم تداوه
شمسوي الحسن والكوم سموه
غريب العسكري والناس ضلموه
ليش بعيد عن حسين دفنوه

يشيال الجنازه ريض اشويه
مات العسكري وماهم اهاليه
يوميه ابو صالح يبجي يوميه
عله امصيبة ابوه والعين معميه

وكلها يمه  وكلها يمه  يهنياله اليموت وكلها يمه
ونحيل جسمه  ونحيل جسمه  تعب من الوكت ونحيل جسمه

شدو النكاب شدو النكاب  تره الشايل معدل شدو النكاب
ونهيل التراب   ونهيل التراب   فوك الروس حكنه نهيل التراب


مكسور ضهره  مكسور ضهره اليوم المهدي ضل مكسور ضهره
وينوح كتره وينوح كتره   رامي عمامته وينوح كتره

خيمه خيمه  الابو بالبيت يا هالناس خيمه
هضيمه هضيمه   يضل بلايه ابو المهدي هضيمه

لليوم لليوم   امصاب العسكري ما طاب لليوم
مسموم مسموم  اشلون ايموت راعي الزود مسموم
*
الشاعر
تحسين الخفاجي

''

#ابوذيات بذكرى استشهاد الإمام الحسن العسكري عليه الصلاة والسلام..
.
.

#بل_انهار
مو سيل الدمع يجري... بل أنهار
وموش الليل بي انحب... بل انهار
جسم العسكري ناحل... بل إنهار

سبب سم الفتك بيه المسيه
........................

#هامات
نلطم عالعسكري هاليوم... هامات
ولأرض سامره هالأرواح... هامات
هاا راحل سند الإسلام... هاا.. مات

ابو المهدي و زعيم الجعفريه
.........................

#وحنه
مهدينه    اعتله    ونه... وحنه
وطبگ ظهره الحزن ويلي.. وحنه
اجه   السامره   هالليله... و حنه

نواسيه بمصابه بهل مسيه
........................

#وجاه
يبن أهل الفضل والدين... وجاه
شب ناره الحزن بحشاك... وجاه
سهم غدره الزمان اعليك... وجاه

وخطف منك أبوك بهل رزيه
.........................

✍🏻 علي نوري الحلفي