نعي للامام الحسن العسكري ع

الـــــزهــره اليوم يتجدد حـــزنها
يــــــهمل يا خلگ من دم جِفــنها
الـــــمصايب كثرن اعليها وعمنها
ابـــــسامره الحسن مسموم ابنها

السامره الزجــــيه اتعنــت اليـــوم
اجت من المدينه امحمّله اهــــموم
وگلبها اعله الحسن يا ناس ملجِوم
تصيح العسكري ابيا ذنب مــسموم

مســــــــــموم الحسن هاي المسيه
انــــــــــصبوله العزاء يالجعفــــريه
وعــــــــــزوني يشيعه بهــــــالرزيه
ولــــــــــطموّ روسكم ويه الزجــيه

الّــــــطمو روسكم والدمعه هــــلوها
حزيــــــنه ام حسن هالليه واسوها
ومجــالسكم يشيعه اليوم انصبوها
وشيلو اجنازت العسكري وشيعوها

علي كاظم المنصوري

عجّل يالغايب ناديـــنه
وطلب ثارك يا مهدينه
ــــــــــــــــــــــــــــــــــــــــــــــــــ
يامن رب الــعزّه اختارك
منّ الضالم تاخــــذ ثارك
تنتـــظرك عالنار انصارك

سيف ابجف ايدك خلينه
عجّل يالــغايب ناديـــنه
ــــــــــــــــــــــــــــــــــــــــــــــــــ
اطلب ثار اظلوع الزهــــره
حرّگ الباب وجرح السطّره
ولمحسن ومصابه بصـــغّره

يالمهدي وطبرت والينه
عجّل يالغايب ناديـــنه
ــــــــــــــــــــــــــــــــــــــــــــــــــ
تاخذ ثار السمّو جـــبده
ما خلّو گبره بصف جده
صابو نعشه بسهم الرده

ورتدو عن طـٰه ودينه
عجّل يالغايب ناديـنه
ــــــــــــــــــــــــــــــــــــــــــــــــــ
اطلب دم الحــــزو نــــحره
داست خيل الگوم بصدره
وشبّانه الطاحو عــــــالغبره

وعمك لنگطعن جفّينه
عجّل يالغايب ناديـــنه
ــــــــــــــــــــــــــــــــــــــــــــــــــ
ثـــور وافزع للعــــــلويه
عالهـزل راحت مســـبيه
ماكو والـــي اتلوذ ابفيّه

موقفها لهــــسه ايذّينه
عجّل يالغايب ناديـــنه
ــــــــــــــــــــــــــــــــــــــــــــــــــ
يهل العالم صيح ونادي
واهتف يا ثارات اجدادي
امن السجاد الّحدّ الهادي

نار وتســعر بيك وبينه
عجّل يالغايب ناديـــنه
ــــــــــــــــــــــــــــــــــــــــــــــــــ
ثار المــــــسموم بســـــامـره
وعظم امصابه اعليك وغدره
فگد الوالـــــد يترك حســـره

بدلال ابنه ويعله اونينه
عجّل يالغايب ناديــــنه

علي كاظم المنصوري

لاستشهاد الامام الحسن العسكري عليه السلام

ساكن گلوب الوفيه    هوه الروضه العسكريه
★★★★★
نرثي اركان الامامه   والمعارف والشهامه
نسچب الدمعه بمقامه  بهلمصاب وهلرزيه
★★★★★
الباري سامره حفظها  وجنه علدنيا فرضها
مسچ والياقوت ارضها   أي وحگ سيد البريه
★★★★★
يبو الحجه شنهي ذنبك  حيف بالسم يگضي نحبك
شكثر منهم عانى گلبك  من المهد حد المنيه
★★★★★
جينه باحزان ومدامع  بينه لوعات ومواجع
ندري يوم الحشر شافع  وحگ من راحت سبيه
★★★★★
مقصد افكار الضلاله  ينمحي وجه العداله
قدمت لكن رساله     تزيح ليل الجاهليه
★★★★★
العسكري مولاي أجينه  الگلب يمطر حنينه
زاد بمصابك ونينه     ونت العاشک خفيه
★★★★★
مهديت ابكل اراده  المن اتصير القياده
باچر اتكون السياده   الصاحب الطلعه البهيه

الشاعر حسن لعيبي الحريشاوي

لاستشهاد الامام الحسن العسكري عليه السلام

من دمعي وجت نار بحشاي
لفگد الامام الحسن مولاي
★★★★★
والد الحجة المات مظلوم
من گوم بيهم مانفع لوم
غدر وشماته معدن الگوم
ماحصل بالصعبات وَفَّاي
★★★★★
سود الفواجع لملم البين
مفجوع گلب الحجة والدين
موحش زمانه وتهمل العين
راح السند بالشده حَمَّاي
★★★★★
اليوم الامام المهدي مفجوع
بصدره المواجع ألف موضوع
صارت حياته احزان ودموع
الحامل الرايه وصاحب الراي
★★★★★
شذنب الحسن هلگوم جافوه
ومثل الامام الهادي سموه
وحده بظلام السجن خلوه
وهو الظلام الناس مَحَّاي
★★★★★
بياثار لهل الذنب مطلوب
ذاك الامام الوفي المهيوب
أبسم الخيانه طاح مصيوب
طلعت اسباب الخافيه اهواي
★★★★★
عايش حياته تحت الانظار
وحرَّاس فوگ اتراقب الدار
حسبوا وجود العسكري اخطار
خيوط الجريمه تبدي من هاي

الشاعر حسن لعيبي الحريشاوي

نعي عن الإمام العسكري عليه السلام

سَمَّوك  ياسيدي و متغيره الوانك
قصد العده ياجبل  تتهدم اركانك
يابوكلام العذب  مافارگ السانك
نكروك يلعسكري  وماردوا احسانك
من سجن بيك السجن يردون عدوانك
ظنوك تهتز  صدگ  لويضعف ايمانك
حرموك من الاهل  وابعدوا  خلانك
ثلاثين ماكملت  يلذبلت اغصانك
سم وخيانه وغدر   مافاز من خانك
انذلوا أسياد القصر وانته ارتفع شانك

الشاعر حسن لعيبي الحريشاوي

لاستشهاد الامام الحسن العسكري عليه السلام -

ليش ايامك صارت مره  
يانور بظلمة  سامره
صابر علمايعرف قدرك    
يابوالمهدي شمكثر صبرك
              يانور بظلمة سامره
★★★★★
حنيّت الدار امفارگها   
دار المختار وطاريها
دار الكرار  وطيبتها  
جبريل الچان ايمر بيها
يم العدوان الماترحم  
ايامك صارت تاليها
چم شبهه توضحها بعلمك 
واثار الباطل تمحيها
ال العباس وسطوتهم  
ماشفت الراحه ابدولتهم
جور اشگد يتحمل صدرك   
يابو المهدي شمكثر صبرك
يانور بظلمة سامره
★★★★★
اركان الدوله امشيدها   
والمستقبل راسم شكله
من نورك شعّت انواره  
وعن  الناس يزيح الذله
ايذل المتكبر والطاغي   
والخط المرسوم يكمله
لهذي الاسباب المذكوره  
مرت ضدك ابشع حمله
يبن الانوار المظلومه    
حتما دولتهم مهزومه
مايكبر شان الي ايصغرك  
يابو المهدي شمكثر صبرك
يانور بظلمة سامره
★★★★★
من كل سفياني وعباسي  
شكد شافوا لوعات العتره
رحله من الهم مرت بيهم  
من اول يوم من الهجره
من دار المختار اولها  
لحد دار اخرها  ابسامره
من بيت المتواضع ركنه  
ليش الحاكم مهتز  قصره
تحقيق وتفتيش ابداره    
چم جاسوس يلم اخباره
من ناس تعرفك وتنكرك   
يابو المهدي شمكثر صبرك
يانور بظلمة سامره
★★★★★
مصلح الهم چنك عيسى 
يضيعونك ليش التصلحهم
مكسور الخاطر شاريهم
رفضوا خيرك  زادوا شرهم
مانصحوا وياك ابلحظه  
اجاهد كل وكتك تنصحهم
دومك للصح رايد بيهم   
وحاقد للظلمه ايرجعهم
تعطيل الدين وانواره    
مقصد هلناس الغداره
وهذا الحال الشاغل  فكرك  
يابو المهدي شمكثر صبرك
يانور بظلمة سامره
★★★★★
للخير اتريد اتوصلهم   
لكن امر الحاكم يرفض
تبني الانسان ونفسيته 
لاترفع بيه ناس وتخفض
رايد بالامه المظلومه  
تنقذها وبالواقع  تنهض
بالسم ينهي الحاكم عمرك
لامن صدفه ولاسوء الحظ
بالسم حارب كلمن مثلك    
جم معصوم تعذب قبلك
بالسم ينهي الحاكم عمرك   
يابو المهدي شمكثر صبرك
يانور بظلمة سامره

الشاعر حسن لعيبي الحريشاوي

استشهاد الامام العسكري ع

……………………………………………………………


اليوم يندب كل موالي وجعفري
السلام اعله الامام العسكري
      وا اماماه •• وا اماماه

……………………………………………………………


السلام اعله الامام المنغدر
حتى للثلاثين ماجازي العمر
ورده ماتت وانجرح بيها العطر
عاشت ابليل وفلا شافت فجر

الحسن موسى وهمه گوم السامري
السلام اعله الامام العسكري
        وا اماماه ••وا اماماه

……………………………………………………………


يا امام و مقتلك اكبر جرح
صار سمهم سيف وانت المنذبح
ليل همه وانته مشراگة صبح
ماصخه الدنيه و رحل عنها الملح

كربلاء ابموتك اتعازي الغري
السلام اعله الامام العسكري
     وا اماماه •• وا اماماه

……………………………………………………………


الج يا سامره مشتاگ الگلب
بالبواجي البيت ابو محمد اطب
يا امامي الخلص عمرك بالغرب
انت عيسى ابوسط دارك منصلب

فدوه الك روحي ودليلي وناظري
السلام اعله الامام العسكري
     واماماه •• وا اماماه

……………………………………………………………


تسقط الملويه وي المعتمد
وعاشت الگبه الشريفه وللابد
اشجاب عنوان النعامه اعله الاسد
ابو محمد سيف ماشاف الغمد

اسمه اية موت لمن ينقري
السلام اعله الامام العسكري
    وا امامام •• وا اماماه

……………………………………………………………


السلام اعله الامام و دمعته
من ذكر جده السليب و ذبحته
طافحه الخيل بحوافر داسته
وثلث تيام الشموس الصهرته

ذكر عماته بهزايل تنسري
السلام اعله الامام العسكري
     وا اماماه •• وا اماماه

……………………… .…………………………………


السلام اعله الامام و عل الابن
المهدي لفراگ الابو يبجي و يون
زغير ما شابع دلال و لا حضن
توم وي المهدي مولود الحزن

والهموم تبيع بيه و تشتري
السلام اعله الامام العسكري
وا اماماه ••وا ماماه

……………………………………………………………


السلام اعليك و اعله السيده
نرجس الحره الجليله الخالده
مثل مريم هي اميره ومسعده
لان للموعود  هي الوالده

شما تريد الباري ويگلها ابشري
السلام اعله الامام العسكري
      وا اماماه •• وا اماماه

……………………………………………………………
✍️ ( سيد خضر الزاملي )

قصيدة لاستشهاد الامام العسكري ع


بداية غيبتك بيهه ابتدت رحلة غيابي
بأمان الله رحت وانه اكتبت قصه عذابي

اعله دهري شكد اعاتب.
انه الفاكد كواكب

………

ماظال كلشي من الدمع. ياوالدي وروحيتي
بينك وبين الطف كضت. من ضيمي كل عافيتي
بسامره ذبحولي حلم. وبكربله امنيتي
اعله كبوركم صحت بهضم . يادنيتي شخليتي

طواريك تهد خيل واحس بيهه بضلوعي
وماي دموعي خلص وبدمه تنزل دموعي.

انه الشابع مصايب. انه الفاكد كواكب

……..

ياهو الغريب بدنيته. مثلي ومثل احزاني
لا والد ولاعندي اخو. هيج الوكت خلاني
البكّاء من كثر البچي. والدنيا دار احزاني
من مثلي عماته انسبن. ومتغيرات الواني

انه العرفو اسم عمته وحبل خلو بديهه
انه ابن العايله الحركو خيم عزهن عليهه

صرت من ضيمي شايب. انه الفاكد كواكب

……..

يابيت اهلنه بلا ابو. ولاصوت للحنيه
هالليله ميتلي وطن. ودعت الانسانيه
خليتني بعمر الورد. بس الله يدري شبيه
نعشك احس هودج سبي. وروحي المشت مسبيه

كضو اهل الله والباقي انه وغربة زماني
مناره بديره مهجوره ومنو اليسمع اذاني

اعيش بلا حبايب. انه الفاكد كواكب
………

فوك الجتاف جنازتك. وكل خطوه عثره بدربي
مااحس حفرولك كبر. يحفرون احس بكلبي
جوه الترب صار الضوه. والهوه الچان بگربي
صحت ان وعد الله حق. يادمعه بالخد كتبي

انه وعمري ووجع روحي وعشرتي وذكرياتي
الثامن من ربيع اول. حضر موت امنياتي

شفت بيه العجايب. انه الفاكد كواكب

……..

الدنيا شكبرهه والبشر. يابويه ادري هوايه
هل من مناصر لو صحت. ياهو اليشيل الرايه
محد يجاوب صرختي. بس اسمع اني حچايه
لبيك يامهدي اعتله. صوت الخدم وفايه

صبراً ياخدم راجع واعيد الغاضريه
وعله الرايه اخط بدمعي. ياثار الزچيه

مع الوقت المناسب. انه الفاكد كواكب

………

نسألكم الدعاء
حسين صادق العقابي

قصيدة ( مر بينه ) إلى الامام الحجة ابن الحسن العسكري عليهم السلام




مــر بينــه مــر بينــه
صحره احنه وانته الماي
تــروينــه چلــمــة جــاي
يالغايـــب شنــهي الـراي
مـــر بينــه. مــر بينــه

*----------*----------*

تتاني الــروح ويـن الجيتـك مطـره
صفت بعدك يغايــب بالبعد صحـره
يتامى احنـه ونتاني منــك النظـره
نحلفـك بيش بحسين وگطع نحـره
تـدرينــــه تـدرينــــه
ننتظـــرك يـالـمـوعـود
يالمهـدي يمـتـه أتعــود
وتـــرد الفــرحـه اردود
مـــر بينــه مــر بينــه

*----------*----------*

مــر بيـنا الحـــزن نشــف مـدامعــنه
وحچي الشمات لجلك هد مسامعنه
بـلا نـــورك يغـــايــب سيدي ضعنــه
وبس انتــه التطـــيب كل مواجعنه
تــاذينــــه تـــاذينــــه
نسمعها واحنــه ازغار
چــا وين الغايب صـار
يالمهــدي لجــل الثــار
مـــر بينــه مــر بينــه

*----------*----------*

ظلمه الدنيه مرنه واشعـل الشمعـه
وامسح من جفنّه سيــدي الدمـعـه
بغايبك كل وكـت يبن الحسن ننعه
نحلفك بالبقن بچفوفه بـس تسعـه
تـروينـــه تـروينــــه
يبست بينـه الامـــال
ملينه القيـــل وقــال
يالمهدي بهذا الحــال
مـــر بينــه مــر بينــه

*----------*----------*

ضاگــت بالنــفس يالغــايب الريه
يا نســمة صبــح يـل كلــها حنيـه
الفرحه أويه العقيله چنها مسبيه
وبس انتــه التردهه مـن بني ميه
ملينـــه ملينــــه
مـن الـدمعه ومــن الاه
يــا جــرح المـا ننســاه
كل يــوم نعيـش ويــاه
مـــر بينــه مــر بينــه

*----------*----------*

مثــل حــال العليله لجيتــك انتــاني
البعـد يـبن الحسن غيرهــن الــواني
هااا هســه يجـي مــا مــره تنسـاني
يزيح اهمومي كلها ويجلي احـزاني
نــادينـــه نــادينـــه
عجــل عجــل مــولاي
يا عمري الراح وجــاي
يــــا قبلـــة كـــل وفاي
مـــر بينــه مــر بينــه

*
الشاعر
موسى البديري

❇️ قصائد استشهاد الامام الحسن العسكري عليه السلام



ذا نِدائي * بِوَلائي لستُ انساكَ يبنَ محمدْ
صوتُ قلبي * سَيُلَبّي لستُ انساكَ يبنَ محمدْ
صرخةٌ في ذاتي رتَّلَت آياتي يا إمامي
-----------
صرخة من ذاتي وصداها يردد اسمك
رتِلَت آيات من قرآن همّك
اذكرِت چبدك سيدي ومصاب سمك
اوعلى فراش الفاجعة اتصوّرت جسمك
بأنيني * وحَنيني وفؤادٍ بحُزنٍ توقَّدْ
هاجَ حُزني * ذابَ جَفني لست انساك يبن محمدْ
صورةُ المأساةِ رَتَّلَتْ آياتي يا إمامي
------------
سيدي بدار الغرب خلصت سنينك
او لا حصل واحد على همومك يعينك
جمرة السم خمّدت جمرة ونينك
چف مماتك غمّض اعلى النوح عينك
بِرِثائي * وبُكائي سوفَ أنعاكَ دَهراً مؤبَّدْ
جمرُ وجدي * خَطَّ عهدي لستُ انساكَ يبنَ محمدْ
واستَمِع آهاتي رتَّلَتْ آياتي يا إمامي
-----------
سيدي يل عسكري يبن الأطايب
سنين عمرك خلصت آلام ومصايب
حتى شبلك غاب من غدر النواصب
سيدي ولا زال عن كل عين غايب
غابَ صبرا * صارَ فجرا بانتظارِ الظهورِ المؤيَّدْ
وشِعاري * بانتظاري لستُ انساكَ يبنَ محمدْ
ساكباً دمعاتي رتَّلَتْ آياتي يا إمامي
-----------
غاب مهدينه ولواء الثار بيده
وبفؤاده تنزف جروح العقيده
كَسِر ضلع الزهره وحسين او وريده
اوياه سكنت دار الاحزان البعيده
وَالبلايا * وَالرزايا بينَ أحشائِهِ تتجدَّدْ
فهْيَ تَسعى * وهْوَ يَنعى لستُ انساكَ يبنَ محمدْ
وجراحُ الآتي رتَّلَتْ آياتي يا إمامي
-------------
ياللي چبدك من لهيب السم تفطر
وبدياجير اللحد نورك تستر
خصمك بهل يوم رد باحقاده أكثر
واعلى گبرك جمع حشوده ونوه الشر
وَاعتقادي * بالجهادِ أُرخِصُ العمرَ واللهُ يَشهَدْ
في حياتي * ومماتي لستُ أنساكَ يبنَ محمّدْ
رافعاً راياتي * رتَّلَتْ آياتي ** يا إمامي
---------------
عقيل الكاظمي / بغداد

❇️ قصائد الامام الحسن العسكري عليه السلام


#رئيسية

جيت اقره قرآن العشگ  بيدي سلاحي
ثوب الوفه بسوح الحرب  أصبح وشاحي
جندي بحشد حبك صرت  ناذر دمائي
-----------
شبّت على حدود الوطن نار الخيانه
باعوا ترابه وخانوا حگوگ الأمانه
والأرخصوا هذا الوطن
خانوه بالسر والعلن
بالطائفية وبالفتن   هزوا كيانه

شنوا حرب عل معتقد    واضح هدفهم
دين الضغائن والغدر     مبدأ سلفهم
وآنه اعلى دين المصطفى   صار ابتدائي
جندي بحشد حبك صرت    ناذر دمائي
----------------
راياتهم تشبه ضمائرهم مظلمه
ووجوههم صفره وأبد ما بيهه رحمه
اسم الله عل رايه انحمل
بس بسرائرهم هُبل
بسوء النَوايا والعمل  عقدوا الهمّه

من سيرة ابن النابغه     درسوا السُنه
وآنه اعلى منهاج النبي   ما مِلِت عنه
سيرة الهادي والوصي    هو الروائي
جندي بحشد حبك صرت   ناذر دمائي
---------------
شنّوا حربهم بالحقد  ضد الشريعه
وبدمهم الخسّه  وجرائمهم شنيعه
مره بقتل مره بنحِر
وسبايكر شاهد عصِر
ويصرخ نزِفنه المستمر   ذوله احنه شيعه

ولمّن وصل يم مرقدك    جيش المطامع
رادتني ساحات الشرف   عنك أدافع
ولبّيت والعالم سِمَع    صرخة ندائي
جندي بحشد حبك صرت   ناذر دمائي
-------------
حشّدني حبك والحرب بهواك عيدي
بسمك أحفّز همتي وذكرك نشيدي
ناذر بدربك منحري
وجرحي انتفض يل عسكري
وصرت بغرامك عسكري  وسلاحي بيدي

يصعَد غُبار الملحمة  وتصعد الغيره
وأعلِن هجومي والعدو يعلِن نفيره
يَسقط لواءه ويرتفع   بالحق لوائي
جندي بحشد حبك صرت   ناذر دمائي
-------------
أول سلفهم صاب بالمحراب جدك
وآخرهم بسم الخيانه صاب چبدك
المعتمَد صوب چبدتك
واحفاده هدموا گبتك
ولليوم ظلت غربتك  وجروح فگدك

كلما أثور اعلى الخصم  وبگلبي ناري
منهم أريد لچتلتك   آخذ بثاري
واستشهد بسوح العشگ   لجلك رجائي
جندي بحشد حبك صرت ناذر دمائي
--------------
بحِجر الشهادة من طحت يل غالي لجلك
ميت وعيني اعلى الدرب منتظره شبلك
وجروحي تنخه المنتظر
يا ساعه تظهر يا گمر
الدنيه انملت جور وخطر  محتاجه عدلك

يل عسكري وتحت اللحد  من صار أمري
ظليت اناطر والأمل    تحضر بگبري
بيك ابتديت ويمّك   ايصير انتهائي
جندي بحشد حبك صرت    ناذر دمائي
-----------
عقيل الكاظمي / بغداد

استشهاد الامام العسكري ع

البُگه براسك يمهدي بالامام العسكري
تعزية كل جعفري
بالنوايح .. يابو صالح
تعزية كل جعفري
""""""""
ما نگول الله ايعوضك بيمن ايعوضك نگول !
واللي فاگدهم يمهدي إثنعش ويه البتول
ولو نعدهم .. للـتودهم
ويه جدهم .. تلطعش ويه الرسول
والدك هالليله يرحل منهو يبقالك بعد
لا ابو ولا من ولد
نواسي جينه .. يا ولينه
تعزية كل جعفري
""""""""
هالمصيبة تچوي گلبك تختلف عن كل مصاب
هالحبيب انت الـتدفنه وبايدك اتهل التراب
بهم وحسره .. اتنزله گبره
وتلقي نظره .. تدفن ايات الكتاب
والدك گبره ترشه بدمعك وماي الورد
وللبُعُد يلله استعد
كل سنينك .. تبچي عينك
تعزية كل جعفري
""""""""
اخر احبابك يمهدي شفته صح بالسم يطيح
وابو اليمه انذبح ضامي وسلبوا ثياب الذبيح
بلايه رحمه .. يجري دمه
وابنه يمه .. بنحره نبلة ودم يسيح
حسين راسه برمح عالي وراس عبد الله برمح
منذبح يم منذبح
شگد مصايب .. آ يغايب
تعزية كل جعفري
"""""""""
سيدي صبراً جميل انذكرك بزينب نريد
الشمر گلها سبية آخذچ الا لـيزيد
يسروهه .. وشتموهه
وچتفوهه .. حالها حال العبيد
صاح شدوا حيل اديهه ولا ترخون الحبل
يلله صَعدوها الهزل
بمحنة اهلك .. نعتذر لك
تعزية كل جعفري
""""""""""
العسكري بالسم تشوفه وعمتك اهناك شتشوف
الشمر راواهه عمداً راس مگطوع وچفوف
وبيسرهه .. شگد قهرهه
تصد گمرهه .. بجثته اثار السيوف
بلا يمينه ولا يساره بعينه نبلة حرمله
وزينب اتعاين إله
شكُبره صبرك .. شكُبره قهرك
تعزية كل جعفري
"""""""""
والدك يالمهدي تالي اتشيع بگبره اندفن
وجدك المذبوح عاري بلا غسل وبلا چفن
وبالصحاري .. وبالظهاري
جسمه عاري .. ضلوع صدره اتهشمن
علي السجاد بحصيرة تالي جسمه يلملمه
يلملمه ويبچي دمه
بغربة جدك .. وانت وحدك
تعزية كل جعفري
""""""""""
شيعتك كل جمعة ندعي يعجّل الله باللقاء
ننتظر بالكوفة تحضر واللقاء بكربلاء
يمته يمته .. تظهر انته
الشيعي ونته .. تعتلي صبح ومساء
چفك الطاهر نبوسه (ألعجل يبن الحسن)
كافي مو طال الزمن
صحنه كلنه .. يا املنه
تعزية كل جعفري

انيس الخفاجي الكربلائي

ابوذيات نعي للحسن العسكري عليه السلام

اله ثغر الفرح مايوم بَسَم
وضعف عوده صفه ينلظم بسم
حسافه العسكري ياناس بالسم
يذبل جبده ويلاكَي المنيه
........
تره اليجري اعلبو المهدي جرا من
الطغاة على الاذه اجتمو جراماً
من سمو ابو القائم جرا من
جبده الدم على اشفافه النديه
..........
الزمن مايرحم الزينين يو جار
وصديقه ايصير كلمن شين يوجار
العدو ابجبدة ابو المهدي يوجر
نار السم يخليهه سريه
..........
غالي العسكري وهيهات ينذل
ومو جَن ليل بعده ايصير ينذل
عوف الحسن صحنه بصوت ينذال
خلو مرقده انواره زهيه

ياسر العارضي

قصيدة منبرية اساسية
ذكرى استشهاد الامام الحسن العسكري (ع)

بعد اهدعش من الظهور يبدي الامام الغائب
العسكري بأبنه اصبح فخور ضل للأمور الصاحب
يعني يمشي وكَلبه مرتاح
تعبه لا بالمهدي ماراح
ضل للأمور الصاحب
....................................................................
هيه هاي احله امنياته وجانت اكثر من حلم
توصل المهدي الامامه ويبتدي عصر العلم
اشكَد خفاه من الاعادي بالحروب وبالسلم
من اجل شيعة محمد دينهه ما ينثلم
هَم شيعته بوجوده ينزاح
تعبه لا بالمهدي ماراح
ضل للأمور الصاحب
....................................................................
مرت اسنين العقيده ماتحس طعم السلام
من كثر ما حاربوهه تحتظر وي كل امام
مره سيف ومره بالسم والسجون اكبر ضلام
واستلمهه المهدي لكن يبقه غايب عالانام
ومايعيش ابعمره الافراح
تعبه لا بالمهدي ماراح
ضل للأمور الصاحب
....................................................................
ثار الحسين ومصابه والقيام بمأتمه
من إمام الثاني عاشت هالقضيه المؤلمه
وجوهر الثار العقيده اتضل قرون القادمه
العسكري سلمهه لبنه وروحه صعدت للسمه
روحه فاضت والعطر فاح
تعبه لا بالمهدي ماراح
ضل للأمور الصاحب
....................................................................
صله اعله جثته المنتظر وادموعه تجري عالخد
فكَد الابو جداً صعب جمر الكَلب مابرد
سافر حنانه ومايرد للمكَبره وابتعد
جبده مسموم المصابه كَلب مهدينه انمرد
بالصلاه صوت النعش صاح
تعبه لا بالمهدي ماراح
ضل للأمور الصاحب
....................................................................
احتوت سامرا جثته يم علي الهادي اندفن
باب رحمه لليكَصده فاتح ابواب الصحن
زيارته من وكت موته بدت من ذاك الزمن
تربت القبر الشريفه وطن للماله وطن
صيته عالي وعمره ماطاح
تعبه لا بالمهدي ماراح
ضل للأمور الصاحب

الشاعر ياسر العارضي

قصيده للأمام الحسن العسكري عليه السلام
لسان حال ولده الامام (المنتظر) عجل الله فرجه
🔸▪🔸▪🔸▪🔸

الأمـام الـمـنـتـضـر. لوالده محني الظهر
يردد وگلبه انكـسر. والـدي  والـدي

🔸▪🔸▪🔸▪🔸▪🔸▪🔸
1
بـويـه يااخــر عـطــر مــن الامــامـه
شلون اودعك والظلم شاهر حسامه
بعيني اشـوفن ليلـك وتهـت بظلامه
والـدي اليخـرج درر مـنـطـق كـلامه

وسفه وبسم الحقد.  بويه جبدك ينمرد
وبمـكـانك من يسد.  والـدي  والـدي

🔸▪🔸▪🔸▪🔸▪🔸▪🔸
2
يالعـفـتـني بدنـيـا بـيهـا بس الجـروح
عندي من حرگ المخيم خنگه بالروح
ولسبي عمتي العـقـيله گـلـبي مـذبوح
الألـهـا متحضـر انـوح بگـد عـمـر نـوح

مــن روايـات الـسـبـي.   وقتل ابن بنت النبي
اعليها اون واني صبي.   والـدي  والـدي

🔸▪🔸▪🔸▪🔸▪🔸▪🔸
3
بويه من اقـره الروايه اعلـه العقـيلـه
مــاانـام ولـلـصـبـح دمـعــي اسـيـلــه
وشـوغه ضلت بالگلب قصـة العـليلـه
الألهـا قصـه ويالضعـن كـلش طـويلـه

ضلـت ابـدار الـحـزن.  عالأهل تبجي وتون
تصرخ بدمعـه وتحن. والـدي  والـدي

🔸▪🔸▪🔸▪🔸▪🔸▪🔸
4
ياصدى ضـل بذني يهـتف كل مسيه
ثـار ينـتـضـرك يمـهـدي مـن الـزجـيه
مـن الطـفـولـه شـيبـتنـي الـغـاضـريه
من اقـره قصة عمـتي الطـفلـه رقـيه

من اثر سوط وضرب.  طفله ماتت بالغرب
والدمع يمـطر سحب.   والـدي   والـدي

🔸▪🔸▪🔸▪🔸▪🔸▪🔸
5
وتبقى قصه اعله الشريعه تشيب الراس
قصـه عن غيره وشجـاعـة عـمـي عباس
الداهـم وبيده جـربـته وعـالخـطـر داس
وضحـه بجـفـوفه لخـواته لأخـر انفـاس

خله رايه اعله النهر.  اتاني جيت المنتضر
ياخـذ بـثـار الـگـمـر.  والـدي   والـدي

🔸▪🔸▪🔸▪🔸▪🔸▪🔸
6
ابـقـى بـالـغـيـبـه الطـويلـه بالـنـوايـب
عـالـمـشـت لـلشـام بـيـتوهـا بخـرايـب
والـغـريـبـه بـديـره مــابـيـهـــا گـرايـب
ومـن يزيد وزمـرتـه شـافـت عـجـايـب

مختصر كل قصتي.  راح اضل ابدمعتي
لـلـعــقـيـلـه عـمـتي.  والـدي   والـدي

🔸▪🔸▪🔸▪🔸▪🔸▪🔸

          تمت بعون الله تعالى
      
      عقيل حسين الگـرعاوي

للصحن جينه. نواسي مهدينه
العسكري بيده. ايسجل اسامينه
***
الخدمه نوعيه بيها روحيه ابدار الامام
نرفع الرايه واحنه وفايه بهذا المقام

اليوم كردوس الخدم رافع شعاره
والتحيه تختلف جوه المناره
عالامام نسلم ونقره الزياره

نقترب منه وهوه يقبلنه
بالصحن نشتم ريحت الجنه
***
كل ايادينه بيد مهدينه نبع الحنان
سيد النعمه وعطره نشتمه بهذا المكان

من نطب سامره ياخذنه العشك وين
وشحلات الهوه يم العسكريين
ما يرد خالي اليدك باب الامامين

اشمحله سامره الناضر تسره
وحلف المهدي خادم الحضره
**




كل سنه نعاهد حضرت القائد ونحي العزاء
بالصحن نصطف وخدم نتشرف الراعي العطاء

الرايه هاي المنتظر يشرف عليها
يعني عطر العسكري موجود بيها
بعلي الهادي ونرجس احنه مزوريها

تبقه رايتنه رمز خدمتنه
بدار ابو صالح تعله صيحتنه
**
كل سنه وكل عام تلتم الخدام بوسط الرواق
وللضريح نصد ولحضه من نبعد نموت اشتياق

ونرجع نطوف الكبر ويزيد حبنه
بالامام المهدي متعلك كلبنه
يمته يوم الثار يالغايب ندبنه

دوم ندعيله وكلشي نحجيله
صاحب المرقد ويانه كل ليله
**







الارض سامره تحضر الزهره والهم تنوح
تنصب الماتم والدمع من دم وتبدي الجروح

تعتني يم الامامين الحزينه
اتنادي يبني توني اجيت امن المدينه
تصيح ليش اوليدي جبده مسممينه

عالولد تنعه وتذرف الدمعه
وتدري بالمهدي منكسر ضلعه
*
تمت
تحسين الخفاجي

اجه الموت ...عليك وما حضرتك
اجه الموت.....يبويه وماحضنتك

بويه والدمعه دمه
وياي تنحب فاطمه
****
انه المهدي اجيتك.......يبويه ودمعي هامل
صباح الخنگه بيتك........صفت غربه المنازل
مسا الخير اعتنيتك........تظل بس الارامل
اشوف الطف ثنيتك......يشيعك ابوفاضل

على الاه......ينادي بعالي صوته
على الاه.........ولا موقف يفوته

تنحني اكباله السمه
وياي تنحب فاطمه
***
عليك اتهدم الحيل.......صعب هجرك يغالي
الحزن شد المراسيل.....اجاني وبيتي خالي
اعليه اظلم الليل........بقى بس دمعي هالي
السمه بفراكك اتميل....الجرح بعدك صفالي

بلياك.........اعيش ايامي غربه
بلياك ....وحكك دمعي اصبه

شوف روحي الهايمه
وياي تنحب فاطمه
***
حمام البيت ينعاك........تون بداره خرسه
تحن وتريد وياك......تكول اخلافه شنسه
وحكك كلشي ناداك....تغيب بداري شمسه
يويلي طاغي سماك....يلوج بحسره نفسه

يمسموم........عليك الدنيا تنحب
يمسموم......تواسي عمتي زينب

العسكري بصوته ارتمه
وياي تنحب فاطمه
****
عجيبه بيتي خالي ......تعودت انه اشوفك
انهدم نص حيلي تالي .اظل احسب طيوفك
ابويه هوايه غالي...صعوبه اشلون اعوفك
الهجر غربه صفالي...الجرح ماظن يروفك

بالاحزان.......اعاتب دهري خاين
بالاحزان....صرت بالدمعه اعاين

حيره وكت الموزمه
وياي تنحب فاطمه
****
صعب هجر الحبايب ..تظل سامره تنعه
بدونك كلشي غايب .السمه مزروعه دمعه
وحكك كلبي ذايب..واشوفه بحيره وضعه
يدنيا شكد عجايب....تموت بداري شمعه

اويلاه........عذابي من المأسي
اويلاه......اشوفن شيب راسي

يا جرح بيه احتمه
وياي تنحب فاطمه
****
يبويه آخر مسيه ......وداعك بي غيابي
انهدم بيتي عليه......وحس لحظة عذابي
الدمع يحجي الرزيه.....مصابك دم مصابي
انحنت شفت الزجيه....بدت تسمع عتابي

وداعا......وصل موسم بكائي
وداعا.......بده مجلس عزائي

حضر حماي الحمه
وياي تنحب فاطمه
****
تمت بعون الله
خادمكم...... يوسف الفتلاوي

ياصاحب الزمان


من تجري دموعك تذكر المن ياجرح
عالزهره وضلعهه لو على المات بذبح
---------------------------
انته يالمهدي دموعك من تهل
كلشي مخلوق اعله دمعك ينسأل
ياهو الاصعب حتى ينقاس السهل
ضلع امك فاطمه اوموت الطفل

يالصبحك نوايح ولمسه تكضي دمع
تندب اه يجدي واه ياذاك الضلع
---------------------------
عمرك وجرحك مثل جرف ونهر
اصواب امك فاطمه كسرة ضهر
لو تون لحسين محزوز النحر
الداسته الخيل وبقه ابلايه اثر

مشتركه بجروحك باب وخيام ولوه
ومن تذكر رزيه ابصدرك ايشح الهوه
---------------------------
جرح الاطفال وحرگ ذيج الخيم
وطيحت العباس من طاح العلم
وركضت النسوان مذعوره ابهيم
هنه ذني الخلن ابعينك سهم

من تذرف دموعك امخالط ادموعك دمه
وحزانك چبيره ماتلم ارض اوسمه
---------------------------
يامصيبه الي تزيد محنتك
ويابو صالح ليش حمره دمعتك
هم شفت ضعن السبايه وعمتك
عالمهازل ذيج صارت غربتك

مقروحه جفونك من يجي ابالك امر
تندب اه يزينب اشلون تمشين ابيسر
---------------------------
من اميره زينب اتروح ابيسر
وهاي ترست گلبك اجروح اشكثر
وعله ديران الشماته من تمر
هاي خلت گلبك ايساوي الجمر

يابو الدنيا كلهه وگلبك اتخذم خذم
بس الله اليعينك عالمصايب والالم
---------------------------
علي سليم الحسناوي

قصيدة ندبه للأمام المهدي عج
من ديوان #مواجع_الطف_الجزء_الأول

{ اندبك ياأمامي }

اندبك ياامامي الحجه مولاي
طالت غيبتك ياسيدي اهواااي

اندبك كل مسيه
متى الطلعه البهيه

طالت غيبتك ياسيدي هوااي

•───✧◐◐✧───•

كل يوم اليمر ننتظرك بشوك
على فراكك حبيبي الكلب محروك
منتظريك تطلع تاخذ احكوك

ثار الزهره وحسين
تاخذهن يالحنين

من فركاك بينه زايد الداي
طالت غيبتك ياسيدي هوااي

•───✧◐◐✧───•

العيشه بغيبتك مولاي مره
بوسط اصدورنه مكسوره عبره
يمك كل عملنه وانت ادره

تدري شصار بينه
وتسمع لو نخينه

بس يمك حبيبي شاغل الراي
طالت غيبتك ياسيدي هوااي

•───✧◐◐✧───•

سراب الدنيا بغيابك يمهدي
حياة بلا وجودك مرض معدي
عايش باانتظارك ماكو عندي

بس انت الأتانيك
بروحي سيدي اشريك

نفرح لو طلعت وتكسر اعداي
طالت غيبتك ياسيدي هوااي

•───✧◐◐✧───•

حلات الدنيا انت تكون موجود
وتزهي بطلتك وايامك تعود
انت بكل وكت مولاي مريود

وكتنه يريد والي
وغيرك ماكو غالي

وجودك سيدي ينورها دنياي
طالت غيبتك ياسيدي هوااي

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
🚫لايجوز حذف اشكال الذمه من القصيدة

قصيدة بحق الامام الحسن العسكري عليه السلام


يمة يا مضلوم صاحت فاطمة
عليك سامرة حزينة ومضلمة
===================
انصاب گلبي من سمعت مصيبتك
والطم اعله الراس فوكَ جنازتك
ريت مشلولة ادين السمتك
نار بالدلال ضلت مضرمة
===================
نور سامرة انطفة واصبح ظلام
يمة ما رحموك اولاد الحرام
يالحسن يمة صعب هذا الكلام
اتلوج بالسم والطغات امنعمة
===================
بالحزن متروس گلبي يالحسن
شوفني بيا حال انعاك بشجن
ضلوعي چن اليوم هذا اتكسرن
مو دمع لحلك تصب عيني دمة
===================
انصب الماتم واون ليل ونهار
واحزن وانعاك وبدلالي نار
يامصيبة ايشيب من عدها الزغار
حالك ايبچي الارض وي السمة
====================
راحوا الاولاد لو سم لو چتل
المُعين اللَّه گلبي شيحتمل
بيك يتشفى النذل ابن النذل
ايريد يطفي النور والله ايتممة
===================
يمة يالمهدي الابو يحني الضهر
سهمة بالدلال صاباك وعبر
عظم الله اجرك ييمة المنتضر
جيت اواسي ابهالمصيبة المؤلمة
====================
أسألكم الدعاء رائد الاسدي