قصيده للرسول الاكرم مُحَمد صل الله عليه وال وسلم
========

تبجي العيون مُحَمد تبجي العيون

لسيد الكون مُحَمد سيد الكون

========

شال ياراعي المعاجز والشيم

ابو روح الحلوه ياراعي الكرم

غيره واحساس وعقيده والحلم

وبلمعارك قائد ورافع علم

يرحل شلون مُحَمد يرحل شلون

سيد الكون مُحَمد سيد الكون

💛💛💛

يانبي الامه على يومك شگول

انته  ياأخر  نبي  اخر  رسول

وسفه راحل للأبد يابو البتول

چنه من خير وكرم ايدك ننول

لاتشيلون مُحَمد لاتشيلون

سيد الكون مُحَمد سيد الكون

💛💛💛

محزنه الافلاك في ارض وسما

ويه حيدر والزچيه فاطمه

بهلخبر  والناس كلها مألمه

تدگ وتنوح وتنادي ولاطمه

لاتدفنون مُحَمد لاتدفنون

سيد الكون مُحَمد سيد الكون

💛💛💛

ياحبيبي يامُحَمد مادريت

بويه بغيابك يبو الزهره بچيت

مساهره ليلي ابد ماغمضيت

شلون بلفرگه يوالدنه رضيت

كلبي محزون مُحَمد كلبي محزون

سيد الكون مُحَمد سيد الكون

💛💛💛

على امصابك ما ابطلنه الونين

من رحت يابويه طيحولي الجنين

هجمو على الدار كوم الظالمين

وبلورث حقي يبويه   غاصبين

ماتورثون مُحَمد ماتورثون

سيد الكون مُحَمد سيد الكون

💛💛💛

ماتورثين النبي گالولي

وعصرو الباب وظلع كسرولي

طفل علتبه بحقد طيحولي

باب بيتي بنارهم حرگولي

حمره لعيون مُحَمد حمره لعيون

سيد الكون مُحَمد سيد الكون

========
خادمة ال البيت الحجيه ام علي البصره نسألكم الدعاء

الحجيه ام علي البصره بخدمة خدام الحسين عليه السلام
لانجيز حذف اسم الحجيه ام علي من قصائدها
او ينسب الكلمات لنفسه
غير مبرء للذمه امام الله والزهراء ع

اليوم بويه بيتي كــــبت نايحه
عليك مدري عليه أقره الفاتحه

بدمعتي طه صحت
انت لـــــو انه المتت يارسول الله

ــــــــــــــــــــــــــــــــــــــــــــــــــــــــــــــــــــــ

انت قرآني من اشوفك صدري بويه ينشرح
جان وجهك بويه يشرق احلى من وجه الصبح
ياحنين الله بغيابك راح اشوف اشجم جرح
مثل نحر حسين عمري بس تغرب ينذبح

اليوم كون اتموت روحي اشوالي
شنهي ضلته اللــــــــي يفارك غالي

والله بويه اتعذبت
انت لو انه المتت يارسول الله

ــــــــــــــــــــــــــــــــــــــــــــــــــــــــــــــــــــــ


لا تهاجر من تهاجر كول ماتت فاطمه
الخيط مايندل الابره اله واحد يلضمه
الدنيه بلف احزام بعدك علي بويه محزمه
شنهي ذنبي بزغر سني ودمعتي تنزل دمه

فاطمه انه العاشت بنص روحك
ميت ولفراكي اسمع نوحك

انه البروحك عشت
انت لو انه المتت يارسول الله

ــــــــــــــــــــــــــــــــــــــــــــــــــــــــــــــــــــــ

انه فاطمتك يبويه جنت تشتمني هوه
ليش جا هسه عفتني جرح وبعازت دوه
انه وانت بروح وحده ليش مامتنه سوه
ياضوه بيتي بغيابك بيتي ضل بلا ضوه

روحي ذبلت حيل سلاها الحزن
شنهي ضلت الوركه اذا مات الغصن

بس هضم بعدك شفت
انت لو انه المتت يارسول

ــــــــــــــــــــــــــــــــــــــــــــــــــــــــــــــــــــــ

راح اعلم الناكه بعدك شني معناة البجي
تكضي ايامه مناحه العله غيابك ينتجي
سالفت هجران طولك سالفه الما تنحجي
محد يعوض حنانك يلي مثلك مايجي

بعدك عينك عيني ابد ماغافيه
شوفة عيونك تردلي العافيه

ردلي يالمني رحت
انت لو انه المتت يارسول الله

ــــــــــــــــــــــــــــــــــــــــــــــــــــــــــــــــــــــ

باجر اصحابك يبويه ماتراعي حرمتي
باجر يكسرون ضلعي الوكلتهم خبزتي
باجر يفرحون كلهم لمن توكع دمعتي
باجر البسمار يشهد عن وكعتي وكسرتي


عذبوني من الله لا يرعاهم
ليش ماغزر ملحنه وياهم

منهم انه اتمرمرت
انت لو انه المتت يارسول الله

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

لطميه لوفاة النبي( ص)


الزهره تنوح شايل سيد الكون

وحسين وحسن جدهم يريدون
…………………

عنها اليوم ابوها حمل وشال
مصاب المر عليها يهدم اجبال
الراس معصبته وحالها حال

( الشايل منها… الحيل تهدم لغيابه)
……………… .

خيمتها وعمدها بالترابات
يبچيه الوحي وكل السماوات
حسافه على النبي من غرب ومات

( ونت مهظومه… اليوم الزهره)
……… …… .

حسن وحسين يبچون على فرگاه
خالي البيت والتربان غطاه
الزهره تصيح ابونه ضيعيناه

( المنبر خالي...دارك ظلمه وسدوها)
…… .. ..

تصيح شعاجلك يالشايل بعيد
يالكلك محنه وشوفتك عيد
اريدنك عدل بس كلشي ماريد

( وسفه يدفنونه… الرايح مايتعوض)
…………… … .

الگوم خلاف عينك مايرحمون
ضلعي ينكسر محسن يسگطون
بابي يحترگ خدي يلطمون

( داري يحركوها… خلاف عيونك)

……… تمت…………………

بقلم ام زهراء العامري

ابوذيات شهادة الرسول " ص"
..........
البـرية بنور طه من براها
يون أصل النبوة من براها
جروح الألم بعده من براها
ولا تبره جروح الفاطميه
.......
ثبـت هسه الألم بينه يجدنه
صدك ترحل تودعنه يجدنه
ويتامى خلافك العالم يجدنه
واه بكل وكت ننصب عزيه
........
العـقيلة تنسبي خلافـك يجدها
شمر حادي ضعن بيها يجدها
وبدواوين الغرب زينب يجدها
اليريد يشوف زينب وين هيه
........
النعم بيك أنت يالهادي يتمها
برحيلك سيدي الزهره يتمها
الوديعة تحـضر وياها يتمها
خديجه بالهضم تلكه الزجيه
........
حسن وحسين بغيابك من الهم
وتشاهد يا حزن بيهم من الهم
يريدونك طلب عدهم من الهم
ترد الهم يبويه بهل مسيه
.......
بألم ون الخلق ميت وحيها
محمد وادع ألزهره وحيها
جبريل بحزن يبجي وحيها
والله يعظم أجرج يالزجيه
........
أبأنين الشجن وينوح يانوح
ينوح الحزن هم بنوح يانوح
لحبـيب الله يـأدم نـوح يانوح
بمحـمد كوم وستقبل عـزيه
.......
أهل بيت النبي المعروف ياهم
خبر موت الرسول اليوم ياهم
ورحيله بيا هضم يا نوح ياهم
يحل بيها الحزن زهره الزجيه
.......
الك حزنت سمه الدنيه والأفلاك
الف حسره على فكدك والأفلاك
الك اللطم عـلى راسي والأفلاك
وأدورك بالنفس يابو الزجيه
........
عظمتك كل جبل راسي رسلها
وحـروفك بالرسل ربك رسلها
رسالات الوحي بنورك رسلها
العرف نورك عرف رب البريه
.......
عظيم ومحـد اليعـرف عظمتك
الوعـظ ما فاد ابامتـك عظمتك
لان كسرو يبو الزهره عظمتك
لمـن كسرو ضلع من الزجيه
........
يمولاي العرش صله بصلاتك
ولا واحد وصل عنده بصلاتك
يوصي الباري الوصل بصلاتك
النكًـر وصلك نكًـر رب البريه
.......
الشاعر
اياد الفرح التميمي

لسان حال الزهراء بعد فقد رسول لله


عـلـى بـابـي لـيـالـي الـسـود.. وچان
وبــعــد مـــا تـبـرد الـنـيـران.. وچان
مـشــه عـنـي عــزيــز الـروح.. وچان

أبــوي وخــيــمــتـي وفــيــاي الـيــه

                                       *---------------*---------------*

✍خادم رسول لله ع
الشاعر رعد الجريخي

لطميه لوداع النبي ص
    نفس طور لطميه يوم عاشر
الوداع الوداع يهل بيتي الوداع


الوداع              الوداع

   يارسول الله الوداع
…………………… .

فاطمه تنعى حزينه   يارسول الله الوداع

يرشح تعاين جبينه

وللمنيه  مجبلينه

.… ……….....
بعينه دار على الزچيه

ودع وداع المنيه

شلون صاحت بويه بيه
……………………………………

يكتل فراگك صعب

موالك نوم الترب

والدمع منها يصب
………………

الگوم عگبك يظلموني

ورى الباب يسگطوني

بجفن عيني يسطروني
……………… .

ضلعي يالهادي يتكسر

والعدو علينا يتجسر

يقيدونه تدري حيدر
………………… ..

تودعه بونه شديده

غالي ابوي تصيح اريده

لايخليني وحيده

………… .تمت…….

      بقلم ام زهراء العامري

قصائد استشهاد الرسول (ص)
نــزلــه
.................................................................
فارگيناك    والفراگ    يبويه شگد صعب
.................................................................
انـــــه بنتك تدري بيه من الزغر حبيتك
انـــــه بنتك هايبويـــــه لاتضن ناسيتك
ساكن بگلبي يبويــــه بگلبي هالضميتك
بويه من يوم العفتني وحشه صاير بيتك

يضل ذكراك    يبويه    عايش بنص الگلب
.................................................................
بويـــه مــن يوم العفتني بگلبي ضلت خوفه
وروحــي تسعرنار بيها روحـــي الك ملهوفه
صحت ياموت اعلى هونك خل ابوي وعوفه
خله بس لحظات أليه مشبعت مـــن شوفــه

فگـدناك        يغالـي     انته يااغلى محب
.................................................................
بنتك وتـــــدري انتـــــه بيــه مااعيش بدونك
وعينــــي بغيابك يبــويــــه ماتصد لعيـــونك
ريتني ميته يبويه ولاشفتهم بـــويه يدفنونك
كون گبلك ميته أنه ولاشفتهم بويه يشيعونك

دفناك      حرامات     تاليها وبنص الترب
.................................................................
ماتوقعتك يبويــه انتــه عــن عينـــي تغيب
يادواي وياطبيبي انتــه لجـروحـــي طبيب
ياحبيبي الغيره مااحب أنتـه يااغلى حبيب
مـن تغيب انته يبويه جروحي صدگ ماتطيب

ودعيناك  والوداع     شفت بيه العجب
.................................................................
بغيبتك تدري يبويه وحشه صارت دنيتي
بالبچي عمري يخلص النوح صاير سلوتي
چنت رفعت راسي انته بويه وانته هيبتي
بغيبتك تـدري يبويه صعبه صارت حالتي

لويمر طرواك     تراني   ابچي والمدمع يصب
.................................................................
بغيبتك عايفني وحدي لناس ماعدها رحم
بغيبتك هجموا عليــــه بويــــه اشباه الزلم
بلايه غيـــره بلاحميــه ناس ماعدهم شيم
ترضاها يابويــــه عليه تالي عمـــري انشتم

هجموا اعداك       عليه    جمعوا ابابي الحطب
.................................................................
الشاعر  عماد محمد الدراجي
الجمعه          2022/9/23

نعي
الزهراء ع اتخاطب رسول لله ص


يبويه صورتك بالعين
ضلت والدمع جاري
تمنيت اندفن وياك
يغالي ورحمة الباري
ايام الفرح راحت
وبگيت اتلوع بناري
يالهادي اشبقه عندي
ريتك تسمع اخباري
*----------------*------------------*
بدموع الحزن ضليت
يبويه وصورتك سلوه
اطيوفك تمر عالبال
وذيچ ايامنه الحلوه
عفتني بلوعتي بويه
وگلبي بنارك اچوه
ماريده العمر بعدك
يغالي وابد مايسوه
*----------------*----------------*
يتيمه بغيبتك انه
وجناحه الحزن مده
دارك موحشه وضلمه
فجئه ونورك اتبده
افراكك جرح روحي
والحيل البعد هده
اذّكر چنت وياك
حلوه وغاليه الكعده
*------------*------------------*
✍بقلم خادم الحسين ع
الشاعر رعد الجريخي

مُصيبة أمير المؤمنين (صلوات الله عليه) في استشهاد رسول الله (صلوات الله عليه وآله) ...

ذكرني بأيامي العزيزات
ضي وجهك يآنسني كل يوم
يفارگني وجهك موش عالبال
ويبقالي بس عطر البلهدوم

تمنيت بيدك توسدني
بگبري وعليه لحد تبني
حيدر اخوك اليقلع البوب
انهد حيله بيك وضعف متني
هالدنية تدري بناسهه وحوش
وعلينه عگبك ضلت تهوش
انه وبنيتك خذنه وياك
مو خوش روحة أبد مو خوش

زهرة حياتك راح تنصاب
ومحسن يطيح بعتبة الباب
يبقى أثر دمهه أعلى الحياطين
ومن عندك يطلبونه أحساب

الدار إلي تستأذن أهلهه
من عگبك الذل يدخل إلهه
دار الوحي يشبونهه بنار
وتالي الحزن يجمع شملهه


✍🏻محمد منير...

#الطميه_بديوان_بحر_الولاء_الجزء_١٨_.


لطميه للرسول صلى الله عليه وآله


الزهره اتنوح وي جبريل بلكون
شال المصطفى واولاده يبجون
❥━──➸➽❥❂❥━──➸➽❥❂
ما نامت الزهره ساهره الليل
بس غمض ابوهه هجمت الخيل
حركو دارهه واتهدهد الحيل
عنهه وين شايل يلنبي وين
❥━──➸➽❥❂❥━──➸➽❥❂
عنهه وين ابوهه حمل او شال
يمصيبت الزهره اتهدم الاجبال
مكسورة ضلع والدمع همال
تكله ارجع يبويه اوفتح الاعيون
❥━──➸➽❥❂❥━──➸➽❥❂
تكله ارجع او شوف اشسوت اعداك
اريدن للمنيه اخذني اوياك
ما اصبر يبو ابراهيم لولاك
واليفكد عزيزه يصبر اشلون
❥━──➸➽❥❂❥━──➸➽❥❂
الزهره اتنوح والاملاك حزنت
وي جبريل عالي الصوت نحبت
شايل يا رسول الله او ونت
ظلمه دنيته والكون مرجون
❥━──➸➽❥❂❥━──➸➽❥❂
شال المصطفى الليله ابونينه
والزهره تون ونه حزينه
تصيح بصوت ارجع ياولينه
والحسنين ضجو ما يسكتون
❥━──➸➽❥❂❥━──➸➽❥❂

*تـــمت والـــــفضـــ🤲ـــل لله تعالى*
*بقلم✍الشاعره أميره أم محمد الكناني*
*صاحبه ديوان📚أقل الوفاء في مصائب كربلاء*
*❌لايجوز شرعاً وغير مبرء الذمه كل من يحذف أسم الشاعره وينسب القصيده اله علماً أن القصيده قد سجلت بدفتر الزهراء عليها السلام❌*

⬛️◼️القصيدة-1-◼️⬛️

يومٌ بهِ جبريلُ راحَ يُنادي
قد ماتَ أحمدُ علةُ الإيجادِ
وأنا أمينُ الوَحيِِِّ صرتُ بوَحشةٍ
بعَد النبيّ ِ الطاهر ِ ِالأجدادِ
أَقرَأتُـهُ سُوراً فكانَ مُعلمي
بِحِـرآءَ يَتلوها بِعُمقِ الوادِي
فمُحمدٌ حازَ المكارمَ والعُلا
وحَباهُ ربُ الكونِ بالأمجادِ
سِرٌ فريدٌ حيثُ لولا نورُهُ
ماقَرتِ الأرواحُ في الأجسادِ
فلَقد رأى مِن قومِهِ كُلَ الأذىٰ
بالسُوءِ جازَوُه ُ معَ الأحقادِ
ونظرتُ عِزرآئيلَ يأخذُ إذنـَهُ
ويقولُ عٰذراً جِئتُ لِلميعادِ
فَلِِصدرِهِ اعَتنقَ الحُسينُ وهٰكذا
حَسنٌ يُقّبِلُهُ ويَبكي الهادِي
وبحِجرِ حَيدرةٍ قَضىٰ لهفي لهُ
وعليهِ أجهشَ سيدُ الأسيادِ
والبَضعةُ الزهرآءُ تنشُجُ عالياً
ودُموعُها امتزجَت بحُزنٍ بادِ
أبتاهُ ياخيرَ العبادِ أرومةً *
أَجّّلْ رَحيلَكَ واستَمِع لِمُرادي
خُذني إلىٰ حيثُ المنيةِ يأأبي
فَحياتيَ اتشَحَت بِكُلِ سَوادِ
قَد كُنتَ لي ظٍلاً ألوذُ بِجنبهِ
ياوالِدي مَهلاً جَرَحتَ فُؤآدي

#سميرالصالحي
#النجف_الأشرف
‏
* أرومة = شريف الأصل والحسب والنسب

⚫️ نعي لشهادة الرسول ص

صرخ جبريل مات النبي المختار
وعليه العرش يبچي بليل ونهار
والله يساعدك يا علي الكرار
على فراگ ابن عمك علة الكون

شبع ضيم ومرار وقهر وهموم
ورحل وسفه واظنه راح مسموم
من گومه واصحابه شكثر مظلوم
يعاني وخلص كل سنينه محزون

عگب موته غدت تندبه الزهره
تصيح الله بويه وتجر حسره
عيني شلون وجهك ما تنظره
لظل بعدك عليله مغيره اللون

يبو ابراهيم ما ينحمل فرگاك
يريت الموت إجه ياخذني وياك
يبويه ادري وبعد مايصح ملگاك
لنوح اعليك بلچن تعمه العيون

#سمير_الصالحي
#النجف_الأشرف

#الرسول_الاكرم

قصيدة للرسول محمد لسان حال مولاتي فاطمه لبنتها زينب عليها السلام

{ جدچ راح }

جدچ راح زينب لطمي ويـاي
شال اليوم عزنه وخاب رجواي

•───✧◐◐✧───•

لطمي اوياي زينب راح الحنين
يستاهل عزه ويستاهل اونين
اظل صبح ومسيه تدمع العين
{ نتكابل / وانزيد ابجانه }

•───✧◐◐✧───•

جدچ راح يايمه من ادينـه
يتامه اخلافه يازينب صفينه
وصدك راح الحنين وايسينه
{ يادينه اويانه / مياله }

•───✧◐◐✧───•

انه انعي ييمه اوني ويــاي
من شال العزيز ازداد بلواي
من ينشد عليه ويكعد اوياي
{ احا يابويه / ويايومه }

•───✧◐◐✧───•

يايومك يبويه يهدم الحيل
هاي اعزيزتك مانامت اليل
يجد ابني عليك المدمع ايسيل
{ نجر بيها / الونه اعليك }

•───✧◐◐✧───•

تجينـي وتكعد ابيتـي يوالي
افرح من تجي ومسرور حالي
عكبك يالعزيز البيت خالـي
{ الكعده اوياك / اخسرناها }

•───✧◐◐✧───•


اهدي ثواب القصيده الى خادم الحسين السيد جاسم الطويرجاوي

بقلم ✍🏻المله والشاعره ام علي الأماره
غير مبري الذمه اليحذف اسم الشاعره وينسب الكلام له

نعي للنبي لسان حال مولاتي فاطمه عليها السلام


روحي بعد ماتحمل اغياب
من شال ابوي وساد الباب
هجمو عليه الكالو اصحاب

•───✧◐◐✧───•

بس مارحت يابوي ناديت
ميته عساني وياك ياريت
مظلم يبويه ويوحش البيت

•───✧◐◐✧───•

يومك يبو ابراهيم يكتل
وكلبي على فراكك تعلل
الماعنده ابو ياناس ينحل

•───✧◐◐✧───•

خلاف الأبو تموت البنيه
راح الأبو وشلون بيه
موتك كلف يصعب عليه

•───✧◐◐✧───•

انه فاطمه يالدللتني
ليش بعجل بويه عفتني
يتيمه اصبحت يالفاركتني

•───✧◐◐✧───•

مكسور كلبي الف كسره
خلاف الأبو ياهو اليجبره
ناديت انا بنيتك الزهره

•───✧◐◐✧───•


بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له

#يارسول_الله
#يارسول_الله
#عظم_الله_لكم_الاجر



يافطمه يم الحسن
الله يعنينج عل محن
جن طاحت اليوم السمه
الله يعينج فاطمه


من عيونة الباب السمه صوغه الدمع دزينه
بهاي  المصايب  فاطمه  انعينج  اتعينينه
شيعه احنه تربات الحزن يم الحسن تدرينه
من عالم الذر  والخلق  عل  مجلس  اتربينه

اليوم  مجلس  للنبي
شايبنه يلطم والصبي
وعيون واست للعمه
الله يعينج فاطمه
######
شنواسي والشايل نبي كل الحزن مو كده
عنوانه يترسله سمه ياهو بمكانه يسده
يافاطمه بس الدمع والشيعي حيله بخده
والهامه ناذرهة الج والصدر هذا العنده

عطشانه الگلوب وتون
والكون غيم بس حزن
والغيمه بالوان الدمه
الله يعينج فاطمه
######
يافاطمه بنت النبي الله يعينج عل صبر
غمض اعيونه والدج والضلع بالباب انعصر
حال الولي وگلب سوه اثنينهم ضل منكسر
حصرات ودموع والم فوك الوجن سكته ويدر

حزنان كلشي اعله الارض
والحزن بالطول وعرض
الكون كلبه يالمه
الله يعينج فاطمه
######
متانين ربعك موتتك يانبي ربعة متانين
عدهم سقيفة ساعدة والربع كلشي محضرين
يمثلون دور اعله النبي اصحابه ماعدهم دين
امسوين فتنه ضدعلي كلشي اليضده مسوين

لادين عدهم لانبي
اسسو مناك السبي
سلبو حماي الحمه
الله يعينج فاطمه
######
توجع سوالفهم تره هاي الحقيقة المؤلمه
مو ذيج ريحانة علي ذبلانة كلش فاطمه
الجانت لبوهة مدلله وحصتهة بس الغانمه
طفاهة ياوسفة النذل مكسوره تبجي مألمه

مات الوحي ومات الشرف
الزين والشين انعرف
بنتك عليك معلمه
الله يعينج فاطمه



مهند الشمري
                                                  

مربوعه الرسول.(( صلى))

ام حسين نصبت ماتم وتنعه
تصيح الراح مني بعد شيرجعه
➖➖➖➖➖➖➖
شال الجان خيمه وتكعد ابسده
افراكه يطول ابوها وبعد شيرده
تشوف اشكد هظيمه وظيم من بعده
طفه نور المدينه وصبت الدمعه
➖➖➖➖➖➖➖
تصب دمعه الزچيه لشيلة الوالي
الگلب مكسور منها والدمع هالي
تصيح ابصوت بويه خابت امالي
بمصاب النبي هاليوم منفجعه

خادمة اهل البيت ام ابراهيم الحلفي
➖➖➖➖➖➖➖➖
مفجوعه الوديعه بفكد واليها
مكسورة گلب والدمعه تجريها
جان المصطفى بنيته يمر بيها
شال وعافها مهظومه للبضعه
➖➖➖➖➖➖➖➖
مهظومه الزجيه تنوح وتنادي
شلي بدنياي بعدك بويه يالهادي
نتعازه ونون آنه ويه اولادي
والكرار لأجلك منحني ضلعه

ام ✍️ علي الموسوي
➖➖➖➖➖➖➖➖
مهضومه الزجيه وتهل دمعتهه
للوالد تون وتجر ونتهه
اليوم ام الحسن كلفه مصيبتهه
روح الزاجيه صبحت متصدعه
➖➖➖➖➖➖➖➖
اليوم الزاجيه تون اعله ولدها
وفراكه كلف واليوم ضاهدها
مهدومه عليه الله اليساعدها
حكهه من تضل اعليه متلوعه

✍️ ام حسين العامري
➖➖➖➖➖➖➖➖

تمت باقلام خادمات أهل البيت عليهم السلام في رابطة كفيل الهاشميه
🤲🏻نسالكم الدعاء 🤲🏻

#المدينة
*العودة للمدينة والديار الخالية~لحن لفى عاشور~*
رجعت زينب الحرّه وطبّت دار راعيها~
تحاچي الدار بالعبره وتنشد وين اهاليها~
وحشه والگلب حسره راح الكان عمد بيها ~
راح الغالي عا گلبي وبعد مظلمه دياره
لحن الفراق♪
وحشه يا دار~ من بعدهم بيتي خالي
وحشه يا دار~ بفرگته ظلمه الليالي
وحشه يا دار~ لا أخو عندي لا والي
ليش زينب وين اخوتك؟
ودعتهم~ والگبر مسكن الاحبه
ودعتهم~ والعمر اعيشه بـ غربه
ودعتهم~ صعبه والله خويه صعبه
خادمة آل محمد✍🏻

*زينب تصبح في كربلاء يوم الحادي والعشرون من صفر*
*يا موالي مولاتنا زينب ع كيف نصبت عزاءها عند قبر الحسين ع صبيحة يوم الحادي والعشرون هل أطبقت جفنيها عند قبر اخيها المظلوم الشهيد المذبوح تبلل قبره بدموع عينيها ~* لحن ساعة وداع الرچيه للشيخ المعاتيق~

راحت بونّه تِودعه يا ضيا العين ~ يا ضيا العين~
صاحت وهلّت الدمعه خويه يا حسين خويه يا حسين~
شلون افارگ هالگبر
يا ضيا عيون العمر
〰️〰️〰️〰️〰️
شمّت التربه الزكيه آيمظلوم آيمظلوم~
يا ذبيح الغاضريه ظامي محروم ظامي محروم~
ما ذقت ماي الشرب
يا ذبيح على الترب
〰️〰️〰️〰️〰️〰️
دارت العين ببچيها حان الوداع حان الوداع
وعالگبر نادت وليها بصرخة اوجاع بصرخة اوجاع
عنك انه راحله
والمدامع سايله
خادمة آل محمد✍🏻

قصيدة لرجوع السيدة زينب للمدينة ولقائها مع ام البنين عليهما السلام


يمة يازينب انشدچ    ياضــوة العـين

 شغير رسومچ ييمة    وماهو الحسين

عباس واخوانة اربعتهم    وفوا حليب الرضعتهم

--------------------------------------------------
احســــــين كَليلي اعلى حالة يالعـقيلة

تچوي الكَلب عدچ احــس ونة ثجيلة

بعيــــــونچ ايبات الســهر ما نمتي ليلة

شنهي الجرالة وسفرتة صارت طويلة

ظنيت وياكم اشوفة    واتنة الظعون

فركَاه تجرحلي دليلي    وتاخذ عيون

الحيود شنهي سالفتهم   وفوا حليب الرضعتهم

------------------------------------------------ 

شحچيلچ وابدي يطــــيبة ابيا مصــــيبة

العباس ما ظاكَ العــــذب طاهر حليبــــة 

كل اخوتي انچتلوا ظلم وانة غريــــــبة

وظليت مكسورة جنح صرت السليبة

بحبال مچتوفة واحشم   ويـن الاخوان

حادينا چتال اخـوتي   وحراس عدوان

عالغبرة اخوتي عايفتهم   وفواحليب الرضعتهم

------------------------------------------------ 

ربيــــت واسهرت اللــيالي اجر ليالي

يايمة ابن ام الحــــــسن تدرون غالي

يولادي توفــــون الربة چان ابتـــهالي

وافوا اخيهم مانســوا تعبي ودلالي

فدوة كَليـلي ييـمة   بكربلة اشصار

ماشفت طول العزيز   ابكَلبي النـار

اولادي كلهم فاديتهم    وفوا حليب الرضعتهم 

------------------------------------------------ 

يم الوفــة ما كَصــــروا ولـدچ يحــــرة 

هالكَد حليبچ بي وفة وعيــــون حمرة

العباس كافل محمــــلي مكَطوع نحرة

شحچيلچ حسينچ بقى مكسور ظهرة

تدرين ياكــل بالكَلب   يافكَد الاحــباب

وفراكَ خواني سهم   لب الكَلب صاب

واحد الواحد ودعتهم    وفوا حليب الرضعتهم 

------------------------------------------------ 

للدار طبيـــــتي ودليلي اعليچ مفجـوع

محفور بخــــدودچ شفت انهار الدموع

شفت القميص ادوهنت اشلون منزوع

آثــــار بي دم ولحــــم وتكسر اظــــلوع

اشلون داســــتة الحوافر   وين الاولاد

چا موش كَلتهم اخوكم    لب الفــــواد

لحسين كلهم ناذرتهم    وفوا حليب الرضعتهم 

------------------------------------------------ 

خافن تموتين من سولف شنهي وضعة

سهم البچــــبدة تحـيرت اشلون اطلعة

الخيل تـســحكَ عالصدر ويون اسمعة

ابن امي فاركَتة وبـــــقى بالعين دمعة

ودعتة وانة اعلى الهزل  والعين حمرة

والراس مرفــوع برمح   مكَطوع نحرة

مسبية اخوتي مفاركَتهم    وفوا حليب الرضعتهم

------------------------------------------------ 


أسألكم الدعاء    رائد الاسدي

#حصريا 🔥💔😭

نعي خروج السيده زينب من كربلاء الى المدينه

اخت وتريد توادع اخوها شلون تودعه وترجع للديار الخاليه لرض المدينه شلون حالها 💔💔💔
كعدت يم الكبر وصاااااحت


يخويه مودع الله اليوم ماشين
ماتكعد تكوم ويانه يحسين
لرض المدينه تردنه يحنين

•───✧◐◐✧───•

يحسين خويه كوم ليه
لبيوتنه نرجع سويـه
وترجع ليالينه الزهيه

•───✧◐◐✧───•

حملي ثجيل يريد والي
وانتم على الغبره الغوالي
واختكم نحيله وهذا حالي

•───✧◐◐✧───•

ثلث تيام يمك ماشفتنـي
ولا كلت هايه عمت ابني
حنينه اخيتي وجايـتني

•───✧◐◐✧───•

دربنه طويل يريد شجعان
وانتم صفيتو حدر تربان
واختكم ترد والحيل تعبان

•───✧◐◐✧───•

شينسه عشرتي اويه العزيزين
ياروحي موتي ولا تظليـن
عليهم يكون اعميچ ياعين

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج