رجعنا لك ياخويه بالزياره
وونيني اعليك يجري بالزياره
وانا بسمك اردد بالزياره
ودموعي اعليك تتساقط جريه

علي الأحسائي

أبوالاكبر أخويه البربعينه
أجيله وأعتذر له وبربعينه
العقيله ام عون خلهم بربعينه
يقولون ارجعت له اخته وفيّه

دروب اشلون ياخويه مشينا
وجوه اعدانا من شرها مشينه
غصب من يمك ابساعة مشينا
خذوني باليسر عنك سبيه

علي الأحسائي

عودة السبايا الى كربلاء لسان
حال العفيلة زينب عليها السلام

يوم اربعينك جيت  ياخويه يلغالي
شهر وعشر تيام   اسوون ابحالي
★★★★★
بالعبرة صدري مختنگ  والمدمع يسيل
بعيال اجيتك تنتحب    فوگ المهازيل
من هظم كل ذاك الجره ماضل بعد حيل

يامكثر الشمات   أعلينه بحقد تنظر
ومن رحمة العدوان كل رحمه مانذكر

★★★★★
من الشام جيت الكربله  والحيل مهدوم
من كل الاصفاح الگلب  ياخويه ملچوم
الراس جبته للجسم بس خويه مهشوم

راسك يطيب الذات    بيه العده اسووت
برسومك الحلوات    كل رسم ماخلت
★★★★★
من الشام گلبي منصدع   بيه تلتهب نار
بحالي  شخبرك ياشهم  لوعندك اخبار
ياليل نمته من صدگ   ياريته ماصار

اعيالك ينادون  وگلوبهم تنحب
انريد ابونه حسين  ياعمه يازينب

الشاعر حسن لعيبي الحريشاوي

▪️وشحال الاحباب▪️

في وصول السيده زينب عليها السلام الى كربلاء يوم الاربعين



جايه وقلبي ابهضم ذاب
كربله وشحال الاحباب
اگبورهم فتحيها  الابواب

—-
كربله آنه العقيله وانت تدرين
ابياشكل طبيت ارضج ماتشوفين
بالامس باين دلالي ابفي الحسين
واليوم شوفي هضمتي اتسولفلج العين


جايه ورووس الاهل هاي
جايبه ويّه الضعن ماي
اگبورهم فتحيها الابواب
———-

شوف  لاروح  البكت  لا ظلّي حيلي
من بعد عينك شمر خلوه كفيلي
خويه من طفوا نهارك  عالي ليلي
لاقمر خويه ونجم صاحب دليلي

جيتكم وامتيّهه الراي
گوموا گاتلني اضماي
اگبورهم فتحيها الابواب
———
روحي مشتاگه وذبح گلبي حنيني
جيت بلكي ينتهض واحد يجيني
وين يا زهره ييمه احضنيني
جيت مهضومه وارد املوعيني

ومنهو السمعها شكواي
نار وتشب وسط  احشاي
اگبورهم فتحيها الابواب
———
ياگبر محتاره اضمه وبلكي ضمني
كل گبر الهم  اشمه وايهضمني
آه يا ريحة دفاهم  جن تلمني
غابو ا وحتى الهوا چنه يسمني

ياكربله گطعيتي إلفاد
وعاشر محرمج عاد
اگبورهم فتحيها الابواب
———
✍️ #بنت_الشمري

لطمية للاربعين (اليوم اجتكم)


اليوم اجتكم ... زينب المهضومه
اتصيح بسكم نوم يهل الحومه


اتصيح ياشجعان يهل المرجله
چنه طاب الكم النوم بكربله
اليوم جبتلكم عليل وعايله
روحي ماتحمل بعد مهدومه
اليوم اجتكم ... زينب المهضومه


روحي ماتحمل مرار امهدمه
وين ابو فاضل شبل حامي الحمه
عينه صوبهه السهم لو نايمه
ياحسافه يعوفني الجيدومه
اليوم اجتكم ... زينب المهضومه


ليش اگول يعوفني وينسه العهد
چان بالكلفات جيدوم وضمد
هاي هيه وانگطع ضني بعد
ايست منه وفگدت ارسومه
اليوم اجتكم ... زينب المهضومه


ايست هيهات صارت گعدته
مات اخوي الكلهه تحچي بخوته
وين گلبي انوب ينفض عبرته
گلبي مكسور وعثر بهمومه
اليوم اجتكم ... زينب المهضومه

گلبي بالهضمات كلساع وعثر
وين اروحن وانطي وجهي لياگبر
هاذه نحر حسين دولبني النحر
جرحه مكشوف وتصب ادمومه
اليوم اجتكم ... زينب المهضومه


الجرح مكشوف والدم ضل يصب
نام ابو السجاد بتراب الحرب
اشلون اروح المنزله واشلون اطب
الگه داره مكدره ومهجومه
اليوم اجتكم ... زينب المهضومه


الگه داره البين هاجمهه هجم
چا شگلهه بكربله نومه الزلم
عافو بگلبي الم فوگه الم
راح اموت اخلافهم مالومه
اليوم اجتكم ... زينب المهضومه



✍شاعرة اهل البيت
ام هجران العمارچية
غير مبري الذمه من يمسح اسم الشاعرة او ينسب الرثاء لشخص اخر

ياحداي الضعن ارجع وردنه
الى اگبور الاهل نوصل  وردنه
ذبل ياكربله بارضج وردنه
وقطفتي اورود حيدر والزجيه
——
  ✍️ #بنت_الشمري

اليوم اجينه أمن الشام
لكبور اهلنه
وين اخونه العباس
خل يفزعلنه
....
اليوم من درب اليسر ردينه
يم مكابرهم سوه التمينه
صحنه وين الكطعو جفينه
للوطن عباس يرجع بينه

من ابونه الكرار
هوه الكفلنه
وين اخونه العباس
خل يفزعلنه
....
لويكول السهم طفه اعيوني
آنه زينب ورمولي امتوني
لويكول ابهامتي طبروني
آنه اكلله بحبل جروني

أمن السفر تعبانين
يهل المحنه
وين اخونه العباس
خل يفزعلنه
...
عادة اليرجع يلاكي اخوانه
واحنه شو ماواحد اتلكانه
مامش امعزب فرش ديوانه
وين ابوالغيره اليكف اردانه
نكعد اعله التربان
لو يفرشلنه
وين اخونه العباس
خل يفزعلنه
....
خل يكوم وكبره يفتح بابه
لو اغرك بالدموع اترابه
ليش ماحاسب اخوي احسابه
حتى ماباني خيم لحبابه

بالخيم لسه النار
توجع كلبنه
وين اخونه العباس
خل يفزعلنه
....
انه اخته وهوه اخوي الغالي
وارد اسولفله اعله شلت حالي
هند مهيوبه بقصرهه العالي
وآنه كل السوك شاف اخيالي

دنيه من غير اخوان
مابيهه معنه
وين اخونه العباس
خل يفزعلنه
...
اليوم اسوي اعله الفرات اقرايه
وانه اصيرن عالكمر ملايه
الشام خنكتني واريد الرايه
اشم بيهه ذكريات اهوايه

رايتك يالكفال
جانت تلمنه
وين اخونه العباس
خل يفزعلنه
.....
اللهم عجل لوليك الفرج
محمد الجماسي

أعظم الله أجوركم يا صاحب الزمان

جديد الملا عبدالستار الطويل

قصيدة اول المجلس
https://youtu.be/ZsuxQaDbBqY?si=wL8DLPtZfALwC0BL

قصيده ثكيله لاربعينه الحسين ع
🏴🏴🏴🏴🏴🏴🏴🏴
على كبور العزاز احنه بجينه
تلاكونه ياهلنه اليوم جينه
ماوحد سمعنه
هلينه دمعنه
😭😭😭😭😭.
تعبنه السبي وتحدينه عدوان
حرم وطفال تمشي بغير وليان
بجينه بدم عليكم اه يلحنان
رجعنه وحالنه اشلون
دم تبجي هلعيون
ماوحد سمعنه هلينه دمعنه
////////////////////////
نعتب ولعتب ويه النودهم ا
اعزاز وبلكلب ضلت صورهم
صدك بلمكبره اتغير رسمهم
عذبني جفاهم
مكدر انساهم
ماوحد سمعنه
هلينه دمعنه
//////////////////
اليوم العاشرونه شالو بعيد
نبجي ولبجي شفيد ويعيد
ما مرو علينه بلليله العيد
ما مرو وجونه
جرحونه وجفونه
ماوحد سمعنه
هلينه دمعنه
//////////////////
شمللك ياوكت تغدر بلحنان
تفاركنه ومشت ياذيج الاخوان
وزانه الوكت ولدهر خوان

ضلينه باملهم
منحمل ذكرهم
ماوحد سمعنه
هلينه دمعنه
///////// //////////
يدنيه ليش مياله بلحباب
تعذبنه وفكدنه شكثر غياب
كليوم ونشيع بيج جم شاب
شباب ومايعودن
بلله ابجن يلعيون
ماوحد سمعنه هلينه دمعنه
//// //////////////////

بقلمي خادمه البتول الزهراء ام نادين✍🏻

على گبور العزاز احنه بچينه
تلاگونه ياهلنه اليوم جينه

كلمات الشاعرة /ام نادين المحمداويه
بصوت.(مسلم المطيري)

شسولفلك يبو فاضل وحجيلك على حالي
بقيت ابوليت العدوان حرمه وما الي والي
***
شسولفلك قصص صارت ريتك وتحله
زينب ضلت بحيره وبعدك ياهو كافله
تضل ابوليت العدوان ادري انت متقبله
بس اطفال والخدر ياهو اليبره محمله

يا عباس حاجيني
انه اختك يضي عيني
بعدك خابت امالي حرمه وما الي والي
****
لو تدري بعد عيناك بعبد الله الجره والصار
انذبح وبحضن ابوه حسين ذكرت الزهره والبسمار
وذكرت الصطره والمحسن اوذكرت حامي الجار
ندبته الحك يبو الحمله حسين الوحده محتار

من شفت الخيم والنار
اذكرت حرك الدار
انه الماشافو خيالي حرمه وما الي والي
*
ضل حسين بالميدان بعدك وحده
حاير يتلفت يدير العين ماعنده ولا ناصر
حمل حمله عل كل الجيش جن حيدر علي ثائر
من دارت عليه الكوم ريتك ياكمر حاضر

بسهام ونبل ورماح
انمله كل جسم اخي جراح
ومنطاح انشده بالي حرمه وما الي والي
*
بعد شحجيلك عل حسين ماضل للمصايب حيل
جسمه عللترب عاري وسحكت على صدره الخيل
من بعده تفرهدنه وشفنه حنه الهضم والويل
ياخوي حرم وطفال وهل جلجل عليه الليل

كل وحده باسم تندب
وانه عليك اضل اعتب
بيت من الزلم خالي حرمه وما الي والي
***
انت اللي جبتي وياك وانت تكفلت بيه
اخبرك ياكمر هاشم زينب هسه مسبيه
يضربوني وصيح بصوت بسمك الحك عليه
وشوف الخيل كدامي وصبر بيه مابيه

بعد عيناك يا عباس
تتفرج علينه الناس
زجر والشمر يبرالي حرمه وما الي والي
*
واخر امنيه تمنيت ريتك خويه تسمعني
طبينه لعد ديوان ويزيد النذل سبني
كدام الجميع ياخوي كام يريد يضربني
حشمتك يابو فاضل لاكن ما تجاوبني
امنيتي ايرجعا الجفين
من يضرب اشفاف حسين
وتشوفه يضرب الغالي حرمه وما الي والي
___
الخادم عماد العبودي

عباس............للشام.........يسبوني
اااثار ..........للسوط..........بمتوني
ءءءءءءءءءءءءءءءءءءءءءءءءءءءءءء
ع الي جره بدرب اليسر * يابالفضل احچيلك
قصة يتامه عله الهزل *ياخويه راح ارويلك
ومن الشمر يابالفضل * ياخويه ارد اشكيلك
كل ماضربني عله المتن* عباس اصيح ادخيلك
چاوين.......عباس....... ....نادوني
ءءءءءءءءءءءءءءءءءءءءءءءءءءءءء
عفتك يخويه بكربله * ومگطعات اچفوفك
لو بيدي چايمك اضل * والله ابد ما عوفك
ياوسفه ضامي تنذبح * فوگ النهر ونشوفك
ادعي عله نهر العلگمي * يبست يريت اجروفك
وماشوف.......كل ماي...........بعيوني
ءءءءءءءءءءءءءءءءءءءءءءءءءءءءءءءءءءءءءءءءءء
ياخويه من سارالضعن * وآنه بحبل مچتوفه
انضر عله وجوه الحرم * والوانها المخطوفه
لمن تصد للمشرعه * والشوفتك ملهوفه
وانوب تنضر للرمح * راسك عليه اتشوفه
نزلوه..............انخاه.............خلوني
ءءءءءءءءءءءءءءءءءءءءءءءءءءءءءءءءءءءءءءء
كلش صعب هذا الوضع * عدوانك مسلبينه
ياخويه واصعب حالتي * تسأل عليك اسكينه
كل مايضربوها اصرخت* عمي الگمر جاوينه
يرضاها خدر ننسبي * وللمجلس مودينه
وانوب..........ليزيد............يهدوني
ءءءءءءءءءءءءءءءءءءءءءءءءءءءءءءءءءءءءءء
ولمن دخلت المجلسه * اشر يزيد اعليه
ناداني ها يخت الگمر * جابوچ الي مسبيه
دولبني ياحيف الدهر * بيكم چنت محميه
ياوسفه رحت ويالشمر* واشگف ضرب بيديه
وانوب.........هالگوم...........شتموني
ءءءءءءءءءءءءءءءءءءءءءءءءءءءءءءءءءءءءءء

الشاعر مصطفى الغريباوي

(( إجَت زينب ))
ابيات نعي في ذكرى رجوع السيدة زينب عليها السلام في زياره الأربعين

إجَتْ زينب عگب غُرْبَه … لَخوها و الدمع صوبين
إجَتْ و بغَصَّة الفَرْگه … تنادي گبر أخويَه وين
*
لِفَتْ منهاره مَحْزونَه .. عگب سَفْرَة سَبي و آلام
وسط مَحْمَلْها مَقْهوره .. و تحاچي راس أبو الأيْتام
يَراس احْسين شَسولِفْ لك .. و چِنِتْ وَيّايَه كل لأيّام
على راس الرمح ويلي … تشوف اِمْسيري وين إلْوين
*
يَراس إبن أُمّي تدريني .. اِشْكثُر وَيّاك أنا عانيت
و كِتَمْت اُوْنيني و همومي .. لجل اُوْلادي حين اِمْشيت
و أضُمَّن كل طفل عندي .. إذا بخوفَه و قَهَر حَسّيت
و أصَبّر كل حرايرنا … وسط سوط و شَتِم قاسين
**
شأوَصُّفْها مُعانتي .. و راسَك يسْمَعَن و يشوف
اليتامَه لو زجر جاها .. حوالَيَّه تلوذ اِتْحوف
و أنا لراسَك و ابو فاضل .. أصد و دمعي هَلْ مَذْروف
و أصيح اِبْزَفْرَة آهاتي … أجيب اِخْواني آنه اِمْنين
**
و تشوف اِبْطَشْتَك أحوالي .. مجالس أدخل بأگياد
ولا چَنّي أنا زينب .. يجرّوني اِبْشَتِم و احْقاد
و يضربونَك و أنا أنظر .. و ضربهم چم طعَن لِفّاد
كَإن مو كافي إن شِفْتَك … عليك الخيل تدوس احسين
**
إجيتك صاحت اِبْحَسْرَه .. و لاچن أسْتَحي ألْگاك
غَصب عَنّي عِفِتْ طِفْلَه .. بَراضي الشام دِفَنْت اِهْناك
رُقَيَّه ما إجَت خويَه .. رُقَيَّه ما گُوَتْ فَرْگاك
على راسك وسف ماتت … ابْخَرابَه غَمُّضَت هالعين
**
يَخويَه شَيّبَت راسي .. عليك اِتْناشد اِبْكِل ساع
يَعَمَّه بويه چاوينه .. وَعَدني الشام يخَلْص اُوْداع
أريده هَسَّه يحْضَرْني .. من اِفْراگه دليلي إلْتاع
و جابو إلْها اِبْطَشِت راسَك … و عَليه إنْطَت عُمر للبين
*
غريبه ماتت الطفله.. و غريب إنته يَبو السجاد
و أنا الغربَه اِتْلِفَتْ روحي .. صفيت اِبْلا أخو و سناد
أرِدْ أوطاني چيف أرجع .. بحَرَم ثَكْلَه و زين عباد
شأگولَنْ لو يسألوني … ظَعَنْكم رَدْ بلايا امعين
**
شَجاوب كِلْمَن يناشد .. عن الكافل و عن الوليان
أرد اِبْيوت صُفَت ظَلْمَه .. و عليله تنتظر بأوطان
يَليت الموت يبو اسْكينه .. گبل أرْجَع گُرُبْكُم حان
و يُوَسْدوني وسط تُرْبَك … و أوَسِّد كل صبر لسنين

الشاعر : أبو شهيد الأحسائي
الثلاثاء 1445/1/20هـ
════════════
*لا يجوز و محاسب شرعاً حذف او تغيير التوقيع*

زينب اجت مكسورة

زينب اجت مكسورة
وينك يعباس
****

من السبي شو بت علي تعبانه
ومابيج حيل وعافــية وذبلانه
جم يوم مــرج بلدمع سهرانه
وماكلتي من عگب المشه وعطشانه

وبس بلحبل مجرورة

زينب اجت مكسورة
وينك يعباس


لمن اجــــــــت وذكرت ملهوفه
ريحت علـــي وبيته الگبل بلكوفه
وصاحت يحاضر بلشدد معروفه
مشتاگة يحضـني الگمر بجفوفه

لو عاتبـــت مجبورة

زينب اجت مكسورة
وينك يعباس



ويتمنه هــــسه الگلب وي اونينه
جروحه أطيبـــــــــهن ورد جفينه
ولو بيــدي شيلنه السهم من عينه
بس من عمت عيني لولي مگطعينه

بيتي ورحـــل ناطورة

زينب اجت مكسورة
وينك يعباس



والدنيا من عگبــك علي مگلوبه
وماتت رقية للأســـــف مرعوبه
وتنخه بلرد يوســــف ل يعگوبه
يرد للگلب لمن صحت محبوبه

التارس عيوني بنورة

زينب اجت مكسورة
وينك يعباس


من الناگة فوگ الگبر اشمر روحي
من الشام اجيت الكربلة انه بنوحي
واتمنه بجفــــوفك تشد أجروحي
ويم گبرك يطگني النذل وشيوحي

وگبرك جروحي زورة
زينب اجت مكسورة
وينك يعباس



خادم عزيز الله محمد البنداوي

رجوع السيدة زينب عند قبر العباس ع

قصيده للأربعين
~~~~

راجع ضعنه ..... راجع ضعنه
لأرض الطفوف اليوم راجع ضعنه

أهل المحنه ..أهل المحنه
ماكامو من النوم أهل المحنه

➖➖➖➖

راجع ضعنه من بعد تعب الليالي

جبت اليتامه وجايه بضيم حالي

مريت اناشدكم وادور عين والي

واحجي لأخوي لجابني بذاك دلالي

واجذب الونه... واجذب الونه
وابدي العتب وي كافلي واجذب الونه
➖➖🔥➖🔥➖➖

راجع ضعنه.... راجع ضعنه
لأرض الطفوف اليوم راجع ضعنه
➖➖🔥➖🔥➖➖

اجذب ونيني عالكبر بلكت يكعدون

لوسمعو اعتابي خوال ابني يفزون

ياهلا ويامية هلا بزينب يكولون

زوار اجينه وهمه للزاير يضيفون

ونزور اهلنه.. ونزور اهلنه
خطار اجينه من اليسر ونزور اهلنه
➖➖🔥➖🔥➖➖
راجع ضعنه..... راجع ضعنه
لأرض الطفوف اليوم راجع ضعنه
➖➖🔥➖🔥➖➖

حسبوني خطار واجيت اليوم ليكم

يهل المضايف والكرم لليعتنيكم

حرمه ويتامه وياي خويه أنتخيكم

ضيفوني روحي مفرفحه وتحن عليكم

ماعاتبنه ... ماعاتبنه
لوكعد خال ابني أبد ماعاتبنه

➖➖🔥➖🔥➖➖

راجع ضعنه .....راجع ضعنه
لأرض الطفوف اليوم راجع ضعنه
➖➖🔥➖🔥➖➖

لا أبدي المعاتب ولاكولن على الحال

لاراوي متني ولا اسولف عن الحبال

ولاكولن بديوانهم حطوني الانذال

واني غريبه مجتفه مابين الرجال

خويه وعثرنه .. خويه وعثرنه

بين الانذال مجتفه خويه وعثرنه

➖➖🔥➖🔥➖➖

راجع ضعنه .....راجع ضعنه
لأرض الطفوف اليوم راجع ضعنه
➖➖🔥➖🔥➖➖

أتعثر اني بمشيتي صعبه عليه

بت حيدر وام الخدر لني سبيه

خواني كلها مطرحه بالغاضريه

والناس تتهامس عليه الخارجيه

يحسين فتنه ... يحسين فتنه
بسوك أنه والحرم يحسين فتنه

➖➖🔥➖🔥➖➖

راجع ضعنه ...... راجع ضعنه
لأرض الطفوف اليوم راجع ضعنه

➖➖🔥➖🔥➖➖

مرونه بسوك وشماته يناشدوني

چاوين اخوتج يالولي وهلت عيوني

وانه الجنت لوسلفت ماتسمعوني

هسه امشي بين اجناب حيف ويحاچوني

يحسين ضعنه ... يحسين ضعنه
ياخويه من يوم الطحت يحسين ضعنه

➖➖🔥➖🔥➖➖

راجع ضعنه.... راجع ضعنه
لأرض الطفوف اليوم راجع ضعنه
➖➖🔥➖🔥➖➖


شحجيلكم ماتخلص مصايب دليلي
رديت من ضيم وهظم مهدوم حيلي
وين الحنين ابن أمي أريده ينتخيلي
لو هو يكعد لو يكعدلي كفيلي

ليهم رجعنه ... ليهم رجعنه
مشتاكه روحي لأخوتي وليهم رجعنه

➖➖🔥➖🔥➖➖

راجع ضعنه.... راجع ضعنه
لأرض الطفوف اليوم راجع ضعنه
➖➖🔥➖🔥➖➖

تمت بفضل الله وعونه بقلم خادمة الحسين العلوية أم ✍️ علي الموسوي
غير مبري الذمه من يحذف الاسم أو ينسبها له

اللهم تقبل مني هذا القليل واجعله مواساة لمولاتي زينب عليها السلام