- الرساله ؛ شنـو الفـرق بيـن المجتهـد والشاطـر ؟

_

لا تعوفون شخص يحبكم وقت المشكلة لافكاره، لا تعوفوه لشيطانه، اني اعرف ان المشكلة من تصير تخلي الاثنين واصلين مرحلة مو قليلة من العصبية بس مهمتك الاولى بنص كل الهوسة اللي التصير انك تكون واضح كدام المقابل وتخلي يطمن، تحسسه ان المشكلة مراح تفرقكم بكد ما هي راح تخليكم تعرفون وين العله حتى تصححوها، حتى لو المقابل ما كان مثلك خليك انت صح وسوي الصح لحد ما هو يحس على نفسه واذا ما حس فيمكن هو مو الشخص اللي يناسبك من الاول!.

تعلمت ان اكون اول اهتمامات الاشخاص اللي اعرفهم، اهلي ربوني على الاهتمام، واصدقائي اصدقائي لان اني مهم بحياتهم، واني نفسي مهم بعين نفسي لذلك الوقت اللي ما راح اكون مهم بحياتك ما راح تلكاني وهذا مو غرور، هذا اسلوب حياتي.

عبد الحليم باغنية يكول

(خايف اجرب، خايف اهرب، خايف اقرب يبعد عني، خايف يقسى الحب عليه خايف منو، اندم لو حبيت وقسيت، واندم لو يوم ما حبيت)

وتقريبا هذه السطرين اللي تخلي الشخص يفكر بالحب وبنفس الوقت يخافه، يخاف يتقرب ويحب بس الحب ميناسبه ممكن يحب شخص غلط او ممكن يحب بوقت غلط او ممكن الحب ميوالمه ويكون هو الغلط! بس هو يريد يحب لان يخاف يندم اذا ما حب!

تجربة الحب بحد ذاتها (كفكرة) هي اكبر محفز للانسان لأقامة العلاقة اكثر من الحب (كشعور)

لا تفقد روحك مهما كان الثمن، لا تخسرها
لا تسمح الها اتيه، نفسك راح تحاول دائماً تخليك تايه فلا تخلي روحك تتيه، حافظ على كلبك، احمي بعقلك لا تكتله بي، صعب تجمع كل هل العبارات سويه بس هي الدنيا مثل هل الجمل، خليك مركز، اذا ضعت حتصير انسان عادي، استنساخ من ناس هواي غيرك، اعرف الدنيا هيج وتحول اغلب الناس لارواح ضايعة بس حاول دائماً تكون انت منفرد، لان اذا ضاعت روحك ومشيت وره نفسك، عقلك حيصير ضعيف وكلبك حيموت.

- الرساله ؛ مو قصة اني ارتبط هواي بس هاي ثاني مرة برمضان هيج اتعلق حيل حيل واجي لقناتك اقرا شون اتخطى واتصفح بالكاتبهن ما تنزله شسوي حتى ابعد روحي عن تفكير

- الرساله ؛ ليش الرجل لهالدرجة ميگدر يغض بصرة؟ بحيث المرأة حتى بأقصى حشمتها متسلم من نظراتهم، وهل أن تجاهلها إلهم يكفي كـ رد؟
هذا الموضوع مسببلي عائق جبير بحياتي العلمية.

وقت التعب، ميصير تفكر هواي
يعني لما تكون تعبان ممكن تفكيرك يكون غلط فتخسر ناس هواي، وعلى فكرة ممكن يكون تفكيرك صح مثلاً تشوف ان وقت تعبك هواي من ناسك المعتبرهم ناسك ناسيك..

بس بالحالتين انت ما راح تستفاد لان راح تخسرهم او يخسروك، باوقات ثانية ممكن الموضوع يكون احسن بالقرار.

يمكن انت مو دائماً صح، بس هذا ميعني ان انت دائماً غلط، لا تبقى تنطي بنفسك حتى كدام نفسك، انت دتحاول، دتتعب، دتفكر، كلنا غلط ولازم نغلط بس هذا ما يعني ان انت تفقد الثقة بنفسك او تفقد نفسك، هواي مرات يمكن انت جنت صح والناس خلوك تفكر انك غلط، وهواي مرات انت جنت صح بس هي الظروف الخذلتك، انت مو معصوم بس انت مو شيطان، من اكثر الافكار اللي تخلي الانسان يسوي بمكان الخطأ اخطاء هواي هو تفكيره المبالغ بالخطأ نفسه، هو عدم المغفرة لنفسه، يرجع يغلط فيكول هو اني هيج ومراح اتغير فيبطل يجاهد نفسه! لا تترك نفسك لشيطانك بس لان انت غلطت سواء مرة او مرات هواي، ابقى حاول لحد ما تثبت لنفسك وللناس ان انت هواي مرات تكون صح، انت مو الشخص الغلط!.

بما ان اني عمري 26 سنة فـ من اباوع لناس جانوا كلش عزيزين عليه وقريبين قبل 6 سنوات مثلاً واكول هم وين؟ لا صدك هم وين! مو بحياتي لا لا… حتى بذاكرتي، صاروا عبارة عن ذكرى منسية، يعني اتذكرهم كل فترة وفترة طويلة وهاي اني كلش وفي لان احتمال اني ما اجي على بالهم ابداً، زين قبل في وقتها يعني قبل 6 سنوات شنو جان الوضع اذا واحد منهم يروح يوم!

اهووو زيد يعني هسه انت شتريد تكول من هل الهوسة؟

اللي ما تكدر تعيش بدونه يوم من ايام السنة حتمر السنين وتصير تذكرة بالسنة يوم، صح العلاقات القوية ممكن تبقى اكثر، اذا كانت اكو مصالح مشتركة مثل الحب او الصداقة او الشغل، بس هواي من المهمين اللي عندك هسه هم مهمين لان اكو شي مرتبط بيهم حاليا، عاطفة، عمل، او شيء ثاني. فكرة الخوف من خسارة الناس راح تقل كل ما تزيد بالعمر..

شوفوا راح احجي باختصار ووبساطة شديدة حتى توصل لاصغر عمر

بكل فتوة بالاسلام اكو اكثر من رأي، خاصة الاراء المهمة مثل الصيام، مثل السنة والشيعة بل حتى السنة والشيعة بداخل كل فئة اكو انقسامات، مثلا السيد الحيدري اليوم من فئة الشيعة اعتمادا على الفلك كال باجر عيد والمرجعية الشيعية المتمثلة بالسيد السستاني كال باجر نحدد

بالسنة كذلك اكو حكمين يمشون بي
١- حكم الامام ابو حنيفة النعمان
٢- حكم الامام الشافعي

الامام ابو حنيفة يكول : استنادا لحديث النبي (صوموا لرؤيته وافطروا لرؤيته) اذا انشاف بأي مدينة (دولة) فكل المنطقة تعتبر عيد عندهم لان تعتبر بنفس المنطقة وعلى هذا المنطق استندوا مشايخ كردستان العراق ودار الافتاء العراقي وغالبا بعض الدول العربية مثل والخليج بعد ما تمت رؤيته بالسعودية وتركيا

الامام الشافعي يكول : ان الرؤية تختص بكل دولة يعني لكل دولة او مدينة رؤيتها وهذا اللي اعتمده هذه السنة الوقف السني ومصر والمغرب وبقية الدول اللي اعلنت يوم الاثنين

زين ليش صار هذا الانقسام هل السنة بالذات؟

صار هذا الانقسام هل السنة بالذات بسبب وقت ولادة الهلال، الهلال انولد فلكياً ظهر اليوم، وهذا الشي خله الهلال ينشاف بدول معينة واستحاله ان ينشاف بدول معينة ثانية

لذلك رجعوا هذه السنة تحديداً لرأي الامام الشافعي وليس لرأي الامام ابو حنيفة.

زين منو الصح ومنو الغلط؟

هذا الموضوع هو مثل كل المواضيع المهمة واللي عليها جدل عبر التاريخ بالاسلام

ليش عليها جدل؟ لان بيها اكثر من رأي
وعبر التاريخ كل الاراء تحتمل من الصحة الشيء الكثير

لذلك عبر التاريخ محد كدر يحدد منو الصح ومنو الغلط لان كل فئة من الناس تمشي وره امام ورأي

والله اعلم، بالنهاية الاثم راح يكون على صاحب الفتوى اذا كانت الفتوى لمصالح سياسية او مصلحة شخصية، والله اعلم