بصوت. مسلم المطيري

ابوذيه

مريض وعلتي ما واحد شفاهه
القاصي وداني عماتي شفاهه
راس حسين من ضربو شفاهه
سمعت الآه من گبر الزچيه

محمد الجماسي

بصوت. مسلم المطيري

ابوذيه

غوالي ودمعة اعيوني بختهم
فقره وعلي وايعثر بختهم
عمت عيني توصيهم بختهم
أو تگلهم عينكم عالهاشميه

لسان حال عزيز الزهراء الحسين ع.

گضيت اوياچ حلوه اسنين ياماه
عله فگدچ لخلي الآه يماه
عليچ المصطفى تحچين يماه
صدگ وياچ هاي آخر مسيه

لسان حال المولى علي ع

إديّه وگلبي والعينين وحشاي
أحس بيهن يمزگ رمح وحشاي
الليله حجرة الزهراء وحشه
وحزينه ابلايه تسبيح الزچيه

عظم الله اجوركم
سيد علي الموسوي

عزائنا    دائم
لوالد    القائم
للعسكري للعسكري

-----------------------------------------

عظم الله  الاجر     يهل      الدموع
الليله لطم الروس  وي لطم  الضلوع

الليله    شايل   يا   أمام  
الليله   چن حرگ الخيام 
الليله    مجلس  ما   ننام
الليله راعي الزود نايم بالوطيه

اليوم    يا شدة  مصاب 
اليوم    نتحمل    عذاب   
اليوم    مو  گد   الغياب
اليوم  كلنه نموت يلمهدي سويه

المجلس  الليله   عجيب
مات    والدنه    الحبيب

دموعنا     تجري
كأنها        النهري
للعسكري  للعسكري


-----------------------------------------


اليوم   ابن  العسكري   يفگد     أبوه
اليوم   دمعات الحزن فوگ  الوجوه

الدنيا   صارت بس  ظلام
الدنيا   چن  ارض الحرام
الدنيا   ما  تحمي  الحمام
الدنيا  للطيبين بس ضيم وأذيه

الهيبه   مسموم  وطريح
الهيبه   ما ظن  يستريح
الهيبه   يا  عالم   جريح
الهيبه  ميت يا بشر هاي المسيه

يا     نحيب    المسلمين
كلشي بالعالم      حزين

امامنا     راحل
مهدينا     قائل
للعسكري  للعسكري

------------------------------------ 

مجلس الاحزان  في  كل   الوجود
يعبر    الاوطان   يتخطى  الحدود

الونه    للعاف    الديار
الونه   نار  وتچوي   نار
الونه    چي مات الخضار
الونه هذا  اليوم  تحلى بهالعزيه

الصحره   معناهه الرحيل
الصحره   ليل مخاوي ليل
الصحره   للگلب     العليل
الصحره  هليله   شعار  الجعفريه


چنهه    لوعة     كربلاء
كل وجه دمعه   وعزاء

يا ساكن   القلبِ
وصانع     الحبٍ
للعسكري  للعسكري

---------------------------------------

ننذر      الارواح     لايام   الظهور
والمجالس قاعده  وفكره وجسور


  المجلس   يخرج    رجال
  المجلس   أيسوي  المحال
  المجلس    احيانآ     قتال
  المجلس الثوره العظيمه الهاشميه

الشيعه      تقرير   المصير
الشيعه      يا روح  الضمير
الشيعه   اول      والأخير
الشيعه   معناهه  الجيوش المهدويه

بيا  علي  يا  فاطمة
الرافضيه    القادمه

للنصرِ    والنصر ٍ
لسورة     الفجرٍ
للعسكري    للعسكري

--------------------------------------

باقي هذا الصوت ما  يسكت  محال
احنه  عند   المهدي  خدام    ورجال


   الفزعه     للشيب  الخضيب
   الفزعه     للجسم    السليب
   الفزعه     للمولى    الغريب
   الفزعه بارض الشام للراحت سبيه

   الحرگه      للكبد    السقيم
   الحرگه      للرأس  العظيم
   الحرگه      للثار      القديم
  الحرگه  للزهراء  يا شيعه قضيه

ثوره   الحق    المبين
كلهه من خير الحسين


زماننا      آتي
نبضآ  لثوراتي
للعسكري   للعسكري

-----------------------------------------

كلمات  الخادم /  رعد الفريجي

بصوت. مسلم المطيري

عزائنا. دائم. لوالد القائم

كلمات الشاعر
رعد الفريجي

لا ماتسوه هاي الدنيا          لا تتعله  
كبلك هارون وأملاكه          ما دامتله  
خلي براسك بس اثنين *** اعبد ربك وانعه حسين 
لا ما متسوه .. هاي الدنيا
** 
بهاي الدنيا .. الكل رايح.. 
حتما" الموت النهايه  وكلها  تمشي 
وانته بعينك .. خل احسينك
خلي الحسين ابحياتك وانسه كلشي 
اتذكر ذنبك .. وادعي الربك 
تدمع العين اعله روحي اتبله رمشي 
انسه جروحك .. وكل الروحك
فرشي ياروحي الحزن يله فرشي 

الكل رايح هذا الواقع         بيه انسلم 
 يا هنياله العنده المنبر       بيه يتعلم 
هذا المنبر هذا الدين *** اعبد ربك وانعه حسين 
لا ماتسوه .. هاي الدنيا 
** 
عندي غايه .. وبيدي رايه 
يالثارات الحسين الما نسيته 
بعيني صوره .. بيها نوره 
وداسن الخيل بضلوعه وما اجيته 
بيها اتذكر .. كلبه امفطر 
تلطم الروح ودمه امخضب لحيته 
بكل جروحه .. اينازع روحه
ايلملم اجروحه وتطشر من ثنيته 

حسين ادخيلك منهو الباجر        يوكف النه 
انت الرحمه الهاي العالم        من تحضرنه  
هنيالك يالهليت العين *** اعبد ربك وانعه حسين 
لا ما تسوه .. هاي الدنيا 
* 
اسمع هايه .. مني احجايه 
انته ماتدري شوكت ساعة مماتك 
شنهو مقدم .. وبيه تتحزم 
حتى من اصلي هم واجب صلاتك 
كل اليفهم .. لازم يعلم 
ينرسم مثل الصور كلشي بحياتك 
ادخيلك ربي .. يكبر ذنبي 
خلني يحسين بأمان الله وعباتك 

غطي اذنوبي يا محبوبي       بهاي الخدمه 
خل العالم تفهم كلها               انته النعمه 
بهاي النعمه متنعمين *** اعبد ربك وانعه حسين 
لا ماتسوه .. هاي الدنيا 
*** 
كون ايامي .. تخلص ضامي 
اذكر العطشان اريد بهذا حالي 
راد الكطره .. وكطعوا نحره 
اشما اشوف الماي اندب اه يغالي 
اشلون اكضيها .. دنيا شبيها 
كون اموت وماتمر بيه الليالي 
لو ما حبه .. وامشي بدربه 
وسفرة المنبر طويله وما ابالي 

خلها ابالك لا مو هينه           دمعة عينك
عيش ايامك كل الامك          ويه احسينك  
لو عايش هم بكلبين *** اعبد ربك وانعه حسين 
لا ما تسوه  .. هاي الدنيا 
** 
دمعه وحسره .. همي شكبره 
خلي الاعيون التسولف عالقضيه 
يا محبوبي .. كون اذنوبي 
ربي يغفرها  بعطش سكنه ورقيه  
منك نضره .. اعليك الزهره 
نضره وحده اتغير احوالي العليه 
انته الرحمه .. الهاي الأمه 
انته نعمه الما ابد الها جزيه 

هذا شكبره لو تدعيلي          هذا شكبره  
كلب الحبك ضل يتمنه          منك نضره  
يالحبيته بالدارين  *** اعبد ربك وانعه حسين 
لا ماتسوه  .. هاي الدنيا  
* 
زيد الحدراوي

بصوت. مسلم المطيري

لا ماتسوه هاي الدنيا لا تتعله

كلمات الشاعر
زيد الحدراوي

ساعد الله قلبك💔 يامولاي
#ياصاحب_الزمان



اذوها اذوها زهرة على أذوها
كسرو ضـلعها
وكـــالو اجلها
.................................................................
شلون اصبر شلون
ماتهده العــــــيون
من كالو أثار سوط اعله المتون
يدرون أكابر
بالكوه صابر
لو ما الوصيه ما أبقه حايـــــــر

سلبوها سلبوها ورث النبي سلبوها
من طـاح ابنها
وكالو اجلها
.............................................................
أذونـــــــــي ياناس
الماعدهم احساس
هاي الوره الباب زهره بغصن ياس
جابو حطبهم
وعلنو حربهم
من شــــــــــعلو النار بين حقدهم

حركوها حركوها دار النبي حركرها
حركــو وطنها
وكالـــو اجلها
.............................................................
معقوله ينسون
ماعدهم عيون
أباب النبي لــيش همه يحركون
ماينفـــع ااااعتاب
هجمو عل حجاب
اهل السقيفه الهجمو عله الباب

اذوها اذوها اهل الحقد اذوها
ضربــــو متنها
وكالــــو اجلها
.............................................................
مايخلص النوح
و عليها مجروح
ابحزني جن طير عالزهره مذبوح
ابصدري اهموم
أبـــــكد النجوم
وبفــركتج صار كل عمري ملجوم

ضربوها ضربوها وصاحت علي ضربوها
مامـل حزنها
كالــــو اجلها

..................................................
أسألكم الدعاء لوالدتي العلويه المغفورِ لها.
المتشرف بخدمة السيده (ع)
سيد سيف الهاشمي

بصوت. مسلم المطيري

أذوها اذوها. زهرة علي أذوها

مثل قوس القزح وادمنة سبع وجوه

مسلم المطيري
السبت 7/9/2024

بصوت. مسلم المطيري

نعي لرقيه ع

عله كيفج يخاله يالتغسلين
خاف جروحها بيدج تلجمين
بهيده وي رقيه من تكلبين
بعدهي زغيره خافنج متدرين
خلي اتغسل وياج النساوين
فوك اجتافه لا لا تمسحين
عليه اثار سوط من الملاعين
وبعدفوك الظهر عدهه نياشين
.....
موعليله يغسالة رقيه موعليله
لجن شافت مصايبنه الثجيله
زغيره ومحنة المرت طويله
تتمنه ابوها يعود ليله
ومن هذا الهظم صارت نحيله
....
الله وياج عمه يارقيه
يالمتي يعمه ابين اديه
شكل لحسين من يعتب عليه
يكلي ليش ماجبتيه اليه
شكله اندفت ابطن الوطيه
........
علي الحاج الصبيحاوي

منهاج محرم الحرام ١٤٤٦ هـ
مولاتي زينب عليها السلام
تخاطب مولاي #ابو_فاضل

بين الخيم ما بينك . گلبي نگطع جا وينك
ماكل سهمهم عينك . يخوووي

كاتلني حافر خيلهم . ذبو بخيتك حيلهم
مضاحك كضوه نص ليلهم . يخوووي

الخوف ابتده
والحاله صعبه
ماي النهر
يحرم اشربه
بين الضحك
تاهت اخيتك
مثل العرف
جتاله گلبه

خوفي عليك من السحك . وبگلبي عله
گبلك تره گلبي انسحك  . بس انه عدله
وعيونك الجانن زهي . فراكگ فله يطيب
ارجع شباب من الكُبر . من ترجع احله

____
بالي عله اخوي وطوله . الحافر لعب بيه جوله
اخر كلام تكوله . امووت

اسم الله المنيه ابعيده . بس كض اخوك من ايده
خل يطمأن يا حيده . اموووت

خويه النظر
ارد اشتكيله
تروي الگلب
شوفة خليله
عينك طفت
والدنيه خلصت
تدري الگلب
نورك دليله

جيبنه ماي من النهر . بس انت اشربه
اختك يراودهه العطش . اندليته دربه
اشفافك اذا تذبل نده وبس تذبل تموت
لا يدنه من يمك عطش . لا تدنه گربه

_
تدريني خويه اجبيره . عمري ع عمرك ديره . شنهي اليكومك غيره . وتكوووم

جفي اخذه بلكي ايعينك . وعيوني خلهن عينك . خل تستراح ايمينك . وتكوووم

چي نستحي
واليمنه هيمه
نركض سوه
ماعدنه خيمه
دك الطبل
تعبنه ضيمه
طحنه مثل
دمعة يتيمه

صاحو غريبه ودنگت جي ما الي احزام
يعثرهه هبهاب الهوى الراحولهه ازلام
وتضل دمعهه مايجف جن عين ناعور
لا تكدر تغمض جفن لا تكدر تنام

_
يسوايتك ماصايره . كوم ع واحد دايره
والخيمه دله وفايره . احييير

يلرايتك ماطايحه . صاحت علينه الصايحه
جا وين اسوي الفاتحه . احييير

حادي الهزل
يتباهه بينه
اگبال الغرب
ومجتف ادينه
من الضرب
ملت عبينه
انتَ برمح
واحنه نسبينه

شد الحبل تعب ادي نازل للاعظام
واليتعب بدرب السبي مو لازم ينام
بس راسك النايم لأن راسك ع الارماح
طبينه صاح الاجنبي طبيتو الشام

__
#تمت
#عباس_القلعاوي
#نسآلكم_الدعـاء

بصوت. مسلم المطيري

بين الخيم مابينك.


كلمات الشاعر
عباس، القلعاوي

قصيده بحق الامام الحسن العسكري (ع)

لجل المسموم                       يالمهدي اليوم
للوالد نجري الدمعه
وانحس اتنوح السبعه
يالمهدي اليوم                 يالمهدي اليوم



على اجروح المصيبه انوح يالمهدي ابدمع حاير
ابوك العسكري سموه وانته ابدمعك اتناظر
تعرف زين شنهو الصار وشايل جرحك وصابر
فرق بينك وبينه اهواي ذاك الحاكم الجاير
والوالد راح                 بس الحق صاح
عالــوالــــد حقك تنعه
وانحس اتنوح السبعه
يالمهدي اليوم           يالمهدي اليوم



رحل هالليله بالدمعات الحسن والمهدي ينظرله
زغير وعمره خمس اسنين وتنظر صحبته واهله
ياهو ايصلي عالمسموم الوادم كلها منذهله
واتقدم صفوف الناس المهدي وعالابو صله
يجري الدمعات                  والوالد مات
بي ضاگت هاي الوسعه
وانحس اتنوح السبعه
يالمهدي اليوم             يالمهدي اليوم



الحزن والنوح والدمعه وجروح الهضم حسره
من مات الحسن مسموم الليله ظلمه سامره
الليله المهدي بدموعه ينحب عالابو بعبره
حايــر بس يدير العين محــد يمه ويصبــره
بهاي الايام                    وين الخدام
هالليله الكل منفجعه
وانحس اتنوح السبعه
يالمهدي اليوم              يالمهدي اليوم



المهدي بدمعته بهل يوم يدفن والده وينحب
ينحب والشماته ايشوف تنظر اله ويتعذب
يشعر بالألم والنوح وگلبه من الحزن يلهب
الموقف مو سهل يشعر خطر والموقف الاصعب
خاف ايعرفوه                     من ايشوفوه
والحاكم يـدري ايتبعه
وانحس اتنوح السبعه
يالمهدي اليوم            يالمهدي اليوم


خل نختم عزانه اليوم وندعي الآخر العتره
كون الباري للمهدي الليله ايعجل الامره
نقسم يا آله الكون عليك بداعت الزهره
تعجل امــر غايبنه وهاي الوادم اتنظره
بداعت عباس                 وتشوفه الناس
واعليك انمشي البضعه
وانحس اتنوح السبعه
يالمهدي اليوم                 يالمهدي اليوم






لاتنسون والدي وابني عباس من الرحمه والغفران
خادمكم رياض الرسل الجابري

بصوت. مسلم المطيري

لجل المسموم. يالمهدي اليوم

كلمات الشاعر
سيد رياض الرسل الجابري

زينب اعداها احرگو صيوانها
يوم طاحو عالوطيه اخوانها
☆☆☆☆
وين هاشم غابت بساعة الضيج
الچانت بسوح الوغه اليوث وتهيج
زينب بصيوانها ايشب الحريج
وبالگلب مثل الخيم نيرانها
☆☆☆☆
حيدر الكرار شنهي العطّلِه
ماطوه البيده وتعنّه الكربله
شنهي ما يدري العقيله بمعضله
زينب ارماد الخيم نيشانها
☆☆☆☆
خاف ما سامع مصايبها الحسن
نار شبّو بالخيم وتوجّرن
هالنوايب حيف وي زينب گصن
چم حمامه ناحت اعله اشجانها
☆☆☆☆
حسين ماهمّه اظن حر السهم
تطرف عيونه بگت صوب الخيم
من دوت نيرانها حيله انهدم
وينظر أخته امّكَسره جنحانها
☆☆☆☆
أبحِيره ظلت من بعد عين الچفيل
ابن ابوها وشايل الحمل الثجيل
عيونه غطاها الدمه وَانوه الرحيل
وفه وي إخته العقيله اوصانها
☆☆☆☆
النار بخيام العقيله تلاهبت
ياهو يِطفيها واهلها توسدت
عالوطيه أو بالسيوف توذرت
وعين زينب من دمه جروانها
☆☆☆☆
الغيّر النار وصفت برد وسلام
اشعجب خلاها توج وسط الخيام
حرگت الايات وحروف الكلام
اظن نمرود الحرگ عمدانها
☆☆☆☆
النجّه موسى وشگ اله موج البحر
الخيم زينب ليش ما دنه النهر
وما روه العطشان محزوز النحر
يابسه يامن عسه نهرانها
☆☆☆☆
تركض اوماتدري لاوين المفر
عالجمر تسحگ ومحنيه الظهر
بت علي ياوسفه خاطرها انكسر
بالطوايف ماكو مثل أحزانها
☆☆☆☆
لملمت تالي الضعن والصار صار
خيمه صارت للأرامل والزغار
چم يتيم الچان بيها يستجار
النايبه هدت عليها اعنانها




☆☆☆☆☆
حيدر بشار الدراجي

بصوت. مسلم المطيري

زينب اعداها احرگوا صيوانها
يوم طاحوا عالوطية اخوانها

كلمات الشاعر
حيدر بشار الدراجي

بصوت. مسلم المطيري

(ابو ذيه) الى زينب الحوراء عليها السلام


حزينه وتضل مثل أمها يسرها
وبعد بالشام مايخلص يسرها
راح الجان بجفوفه يسرها
اجفوفه اتكطعت وامست سبيه
*----------------------*---------------------*
راح الجان من تمشي لواها
الدهر من طيح اخوتها لواها
الجبال الصمم من تنشج لواها
اتحطم من هظم بنت الزجيه
*----------------------*---------------------*
خان الدهر والزهره لها ون
كل الكون من كالو لها ون ( وإن )
لزينب مو وان كالو لها ون ( وين)
غريبه لوحدج بالغاضريه
*--------------------*---------------------*
غريبه بلا أهل ضلت بلا حد
وبلاها البين بهمومه بلا حد
صفت زينب بلا والي بلا حد ( حادي)
حاديها الشمر حادي الرزيه
*--------------------*---------------------*
الشمر حداي يتشمت ولهلاي
ولاني وماكو إخواني ولهلاي
أنه لحسين الي عبره ولهلاي
والعباس الي ونه خفيه
*---------------------*----------------------*


محمد دعبل النوري

((ياموتي گلي أشمنتِظر))


أستعجل ابساع     يـاموتي گـلـي اشمنتِظـر
أستعجل ابساع     تـدرينـي مـاريـد الـعـمـر

       روحـي عـذبـهـه الـزمــن
       وشـتـاگـت الجـنـة عـدن

استعجل ابساع         استعجل ابساع

*-------------------------*--------------------*


عـذاب  سـراب   صـارت احــلامي تـره
حـنـيـن انـيـن    مـثلـي حـمـلـة يـامـره
اشوف واعوف  اهـلي كـلـهـه أمـجـزّره
غـريب  سليب  احسيني گطعوا مـنحره

أحسبلك احساب    ولّحظه احسنهه بشهر
أحسبلك احساب    أتنطـر ومحني الظهـر

استعجل ابساع         استعجل ابساع

*-----------------------*---------------------*

ظـلام  خـيـام    ذكــره ضـلـت كــربـلــه
جـروح انـوح    الـدمـعـة بالـخـد هـامله
اعـيـد  اريـد    ابـموتي تـنـهي الـمسـألـه
تـعـال خـيـال  عـمـري مـالـحـظـه حـلـه

أتئخرت حيل   والروحي اقريت الحمد
اتئخرت حيل   ليامي ولـجـيـتـك اعـد

استعجل ابساع       استعجل ابساع

*----------------------*--------------------*

چـبـير زغـيـر    عـيني شـافـت ذبـّحـتـه
شگول خيول   الـغـالي عَـشـره الداستـه
كـفيـل تـسيل   ادمـوم عـينـه وهـامـتـه
جميـع رضيـع   ابـالـي ضـلـت صـورتــه

ارحمني ياموت    ما احمل افراگ وغرب
ارحمني ياموت    الـفـارگ احبابه صعب

استعجل ابساع         استعجل ابساع

*--------------------------*------------------*

وراي  حـمـاي   عـفـتـه وآنــه أمـسـلـبـه
ألوع  دمـوع   الخامس اصحاب الـعـبـه
خـذاه  دمـاه   والـحـجـر صـك حـاجـبه
رمـاح جـراح    احـسيـن گـلـبـي عـذبـه

ابموته يرتاح    العايش بحسره ودمع
ابموته يرتاح    التشبه اسنينه الشمع

استعجل ابساع      استعجل ابساع

*---------------------*------------------*

يـعـود  يـزود   حـزنـي لـو لـيـلـي بــده
أهيـم  وأقيـم   نـوحي للــضـل وحـدّه
نعيت  بچيت   سـاعـت الـحـادي حـده
ذبيح اصيح   اشبيدي وانـه امـگـيـده

شتفيد الدموع     للشايـل بـگلـبه جرح
شتفيد الدموع    ابليلي يجرن للصبح

استعجل ابساع         استعجل ابساع

*-----------------------*---------------------*

شـعـور  يـدور    خــلــه دمـعـاتـي دمـه
احـوم  واگـوم   انـعــه سلـوت فـاطـمـه
يــدار   مــرار    ليش اشـوفـچ مـظلـمه
ابــوي  اخـوي   چانـو انـجـوم الـسـمـه

بالغربه حسيت      ياموتي والدنيه عدم
بالغربه حسيت     ابساعت العفت الخيم

استعجل ابساع       استعجل ابساع

*-------------------------*------------------*

✍خادم زينب ((ع))
الشاعر رعد الجريخي

بصوت. مسلم المطيري

استعجل بساع


كلمات الشاعر
رعد الجريخي