(وداع العليله)

            تدري يذبحني الغياب
          آنته يمي وراسي شاب
لاتخليني وتروح .. .والسفر ضيم وعذاب
…………………………………
بويه صعدني اعله ناگه وخل اروحن بالضعن
آنته بعدك مامسولف وآنه دمعاتي جرن
من اجيت آگبال شخصك حته چلماتي استحن
لانخليني آبغيابك طير ومفارگ وطن
بويه خافن ماتجون … لَمن اتسير الضعون
تبقى دمعاتي تسيل  والحزن يفتحلي باب
      ---------------
بويه من اتروح عني تدري يكتلي  الهجر
ٱگعد آمن المغرب ابچي لَمن يصير الفجر
بالعتب ما ريد اجرحك ادري گلبك ينكسر
انطر ابدربك وتاني ونشد الغيم اليمر
من تسافر وين انام … دنيتي تصبح ضلام
يحرگ ابروحي الحنين
والدمع غطه الثياب
       --------------
انته جمعت الفواطم وانه هدحيلي الآلم
گمت احس من ودعتني عمري ثلثينه انهدم
كلمت الله إوياچ تجرح گلبي نصين انقسم
اطلع اعله الباب اعاين مايساعدني الجدم
من بعدكم حيلي باد ... عيني تربي اعله السواد
گمت احشم ياحسين  محد ايرد الجواب
      ----------------
ساعت الحَدر ضعنكم والحزن فت الچبد
شحت الماي اشكبرها تذبح اغصان الورد
بويه يحسين ابغيابك گمت احب نوم الحد
گاصد ابدرب المنايه چن اشوفك ماترد
مارحت وي البنات  ليلي يصعب وين ابات
عيني غرگت بالدموع  ونظر العج التراب
     ----------------
صارت الدار ابغيابك ضلمه مابيهه ضوا
عله وفراگگ يبويه مايصح الهن دوا
گلت عبدالله ورقيه ارحل اوياهم سوا
ضاگت الدنيه ابجفاهم ما آشم ريح الهوا
تدري مابياش اصيح  نوب اگومن نوب اطيح
خالي كاروك الرضيع من اطب غرفت رباب
         -------------
الشاعر فاخرالشبيبي

بصوت. مسلم المطيري

تدري يذبحني الغياب

كلمات الشاعر
فاخر الشبيبي

ياطلعة الحق ( وزن الميمر)

ياطلعة  الحق والكلام الحاسم
ياثورة المظلوم  تمحي الظالم
حبيبي ياحسين
حبيبي ياحسين
★★★★★
بين الخلگ تنقاس وحدك أمه
اتذوب المعاني بيك يابواليمه
رحمه  ونعيم وزود خير وهمه
ماتاخذك بالله لومة لايم
ياطلعة الحق والكلام الحاسم
حبيبي ياحسين
حبيبي ياحسين
★★★★★
درب الاسلام وجنته المعلومه
وراعي الشعوب الحايره المظلومه
والحق علاماته صفت محسومه
انته السلامه والنعيم الدايم
ياطلعة الحق والكلام الحاسم
حبيبي ياحسين
حبيبي ياحسين
★★★★★
دمك عبارة رفض تلغي الباطل
تنشر الخير وتطوي صوت الجاهل
ماتقبل بهلدنيا حال المايل
الفايز يظن بغير دربك واهم
ياطلعة الحق والكلام الحاسم
حبيبي ياحسين
حبيبي ياحسين
★★★★★
انته الهداية والطريق الواضح
وانت المواقف والكلام الراجح
حكمة بطريق الخلگ دوم وناصح
انته على گلوب الظماير حاكم
ياطلعة الحق والكلام الحاسم
حبيبي ياحسين
حبيبي ياحسين
★★★★★
ينزال كلشي ونهج حبك ثابت
غصبن على كل ناصبي وكل شامت
لسان العداله المايحب الساكت
واكمال نهجك يضل بيد القائم
ياطلعة الحق والكلام الحاسم
حبيبي ياحسين
حبيبي ياحسين

الشاعر حسن لعيبي الحريشاوي

بصوت. مسلم المطيري

ياطلعة الحق والكلام الحاسم

كلمات الشاعر
حسن لعيبي الحريشاوي

٢٥٩- وحشة فاطمة العليلة (ع)


عافوني عافوني
راحو هلي والوحدي عافوني
ـــــــــــــــــــــــــــــــــــــــــــــ
عــــــاشرني ياناس الحـزن
مانــــــام لعيوني جـــــــفن
اشبه الورده ومـــــن غـصن ٠٠ مگطوعه
ابچي اعلى غيّابي واحـــن
وجروحي ماتهـــــده وتچن
والمـــــرض والعلــــه ضمن ٠٠ هـاللوعه

خلـوني خلـوني
طفله عليله وانتظـــر خلوني
ـــــــــــــــــــــــــــــــــــــــــــــ
قصه طويــــــــله قــصتي
مــــــــابين جمــــرة علتي
ومابين لوعة فرگــــــــتي ٠٠ محتاره
اســــــــأل واناشد دمعتي
يمته يعـــــودون اخوتــي
وايرد ابـــــــويه وحشتي ٠٠ بأنواره

يلفوني يلفوني
ماصدّگ بيوم الاهـل يلفوني
ـــــــــــــــــــــــــــــــــــــــــــــ
اگعد واتــــــــاني عالدرب
وعيوني عالغــــالي تصب
بين الجوانـــــــح تلتــهب ٠٠ جمـراتي
متحــــيره وحـالي صعب
وليــاني راحو للحــــــرب
كل ســـاعة تكثر عالگلب ٠٠ حسباتي

بعيوني بعيوني
ظلت صورهم عايشه بعيوني
ـــــــــــــــــــــــــــــــــــــــــــــ
من ســاعة الراحــــــو هلي
موحــــــــش واظلم منزلي
يالوادم بعمــــــــــري شلي ٠٠ وبسنيني
مشتـــــــــــاگه للأكبر علي
بعبدالله همّي ينجـــــــــلي
محتـــــــاجه عباس الولي ٠٠ ايباريني

هضموني هضموني
بروحة رقيه الكربله هضموني
ـــــــــــــــــــــــــــــــــــــــــــــ
وديت مرســـال الأمــــــــل
بيد الأعــــــــرابي للأهــــل
مكتوب بدمـــوع العــــــلل ٠٠ وجروحي
ما ادري مرســــالي وصــل
وابويه عن حالي انشغــل
ياريت يلفيني الأجــــــــــل ٠٠ عد روحي

ماجوني ماجوني
شلي بحياتي والاهل ماجوني
ـــــــــــــــــــــــــــــــــــــــــــــ
غراب اســـود ابابـي وگف    
بمصاب ابــــــو اليمه هتف
يافـــــــــــاطمه دمهم نزف ٠٠ بالحومه
عبـــــــــاس عنوان الشرف
الاكبر علي بدره انـــخسف
جســـــــــام متحني وسف ٠٠ بدمومه

صابوني صابوني
چنهم بنبلة حرمله صابوني
ـــــــــــــــــــــــــــــــــــــــــــــ
فراس المحمداوي

بصوت. مسلم المطيري

عافوني. عافوني
راحوا هلي، والوحدي عافوني

كلمات الشاعر
فراس المحمداوي

٢٦١- الليلة الخامسة (مسلم بن عقيل)
صلوات الله عليه وعلى ابنائه اجمعين


مجتمـــــــع غــدّار بــي مسلم وگع
صاح صوت الحگ لچن محّد سمع
ــــــــــــــــــــــــــــــــــــــــــــــــــــــ
شلون وادم تسعى للـــذل والهوان
ومــا تريد الدنيا يحكـــمهه الامان
تركت الدرب المـــــــــؤدي للجنان
والجهنم مشت ماخـــــذهه الطمع
ــــــــــــــــــــــــــــــــــــــــــــــــــــــ
بشر واحــدهم عله الدنيا حـريص
وصارت اتبدّل الغــــالي بالرخيص
تبقى هاي الناس حـايطهه نصيص
وما تعـــــــــــاين للسمه وللمُــرتفع
ــــــــــــــــــــــــــــــــــــــــــــــــــــــ
حسين رادلـــهم حـياة ابلايـــه ذل
لا دمــــــاء ولا حــــروب ولا قــتل
بَعث مسلـــم ينشر الحـق والعــدل
وبقوانين الشرع صـــــــاح وصدع
ــــــــــــــــــــــــــــــــــــــــــــــــــــــ
حسين هوّه اختاره للكــوفه سفير
حين شــــاهد مـوقف الامّه خطير
راد يحكمهم بوجــــــــدان وضمير
ويقضي عالطغيان والغـي والخدع
ــــــــــــــــــــــــــــــــــــــــــــــــــــــ
امس چـــم واحـــد لبو اليمه كتب
اقبل اقبل كلـــــــــهم انقلبو عجب
غــــــرهم الطاغي بدنانيره الذهب
والاشراف برأيه كل واحـــــد رجع
ــــــــــــــــــــــــــــــــــــــــــــــــــــــ
ابن عم حسين مسلــــــــــم والثقه
ايعــــــاين بظهـــــره ولا واحد بقه
طلعت الناس الاجـــــــاهه امنافقه
والضمير انباع بأســـــــــواق السلع
ــــــــــــــــــــــــــــــــــــــــــــــــــــــ
مسلم بديره الكــــــوفه ظل وحيد
اتطـــــارده الاشـــرار والچتله ترید
العطش ذوّب مهجته والحـر شديد
اتذكـــــر حسين وجفــن عينه دِمَع
ــــــــــــــــــــــــــــــــــــــــــــــــــــــ
اباب طوعه من وگف مکسور حال
گلهه مسلم آنه من بیت الجـــــلال
اطلعت حُرّه وتسوه آلاف الرجــال
وحب علي حيدر بداخـــلهه انزرع
ــــــــــــــــــــــــــــــــــــــــــــــــــــــ
يبن اخو الكــــــــرار صاحت ياهله
انته راعـــــــي الدار وبجيتك حِله
شرب مــاي وعينه ظلت هـــــامله
وعله حسين بداخـــله الهَم اجتمع
ــــــــــــــــــــــــــــــــــــــــــــــــــــــ
وسفه ابن طوعه على مسلم وشه
وابو طاهـــــــــر ابد منهم ماخشه
هذا فگـــــــره البيده من يتناوشه
وسيفه منهم ابد مامــــــــل وشبع
ــــــــــــــــــــــــــــــــــــــــــــــــــــــ
اخذ منه مأخذ الحـــــــــر والضمه
وطاح مابين الاقـــــــزام المجرمه
اسرّوه بصـــــوره كلش مـــــــؤلمه
وين هـــــاشم محّد المسلـــم شفع
ــــــــــــــــــــــــــــــــــــــــــــــــــــــ
صعــدّه السياف عمـــــــداً عالقصر
مچتف الحيد وطبر راســــــه طبر
كتب للثـــــــــوره الحسينيه النصر
ابصحف اهل الثار دمّ نحره انطبع
ــــــــــــــــــــــــــــــــــــــــــــــــــــــ
فراس المحمداوي
٧ ذي الحجة ١٤٤٥

بصوت. مسلم المطيري

مجتمع غدار بي مسلم وگع

كلمات الشاعر
فراس المحمداوي

بصوت. مسلم المطيري

بخت عندي وعشت يحسين هلعام

كلمات الشاعر
علي العبادي

قصيدة رقم ٧
ميمر للهلال

اهلال المواجع شفناه      ويحسين ألك ونينه

***
شفنه محرم هل علينه وصحنه
آه المصابك ياحســـــين اهتفنه
وفقنه نحيــــي امصيبتك وفقنه
حزمنه نخدم هالســــنه حزمنه
نتوسل أحنه و نرجاك      نخدم نظل خلينه
***
يلي تفتت وانمـــــــرد كل جبدك
اتحزمنه وانريد المدد من عندك
ابجاه الزجيه وابو حسين وجدك
احسبنه يابن فاطمــــه من ولدك
أحنه عبيدك مولاي    ولمصيبتك حنينه
***
يابو المحنه وياعـــــــزيز الزهره
انعيش المواجــــع وألام والجمره
وفقنه نسجب على امصابك عبره
وماتطفه بينه تســـــتعر هالجمره
من جمرة العاشر كون    نار الخيم تجوينه

***
يالسابج اعلينــــــــه بمظاهر لطفك
أرزقنه  نسمه من نســــايم عطفك
عيشنه لو لحظة حــــزن من طفك
نومه بالحر عالرمـــــل و ابصفك
خلينه نتكلب كون         وحر الشمس ياذينه

***
جم خاطر المنك مصـــابك كاســر
وجم حافر وحافر ابصدر عـــــاثر
حسسنه يوم امصــــيبتك بالعاشـر
وخلي نضوك الألم لو بس حـــافر
ضوكنه نعطش وياك    وضيم الكدر يولينه
***
ارزقنه لوعه اعله الخــيم والنسوان
وانته صريع اموســـد اعله التربان
لاتكدر اتكوم ودليــــــــــلك حيران
ماضكت كَطره اميه ميت عطشان
فوك الصدر فوك الراس    لمصيبتك دكينه


ابو علي الركابي

بصوت. مسلم المطيري

اهلال المواجع شفناها
ويحسين الك ونينه

كلمات الشاعر
ابو علي الركابي

بصوت. مسلم المطيري

مولاتي زينب تكول لسان حال


وي ميلت الريشه مايل الطف
بس عباس جوده . ماي الطف
تره من كصته جمل ماي للطف
ولحد هسه توزعه الغاضريه

ضل بس راس ويسبح . وره التل
يا تل الاصعده افحط. ورا تل
حسين من السحك صاير وره التل
وقسم من جسمه يم خيمة رقيه


الشلع كلب ابو اليمه. طلعت اخته
ومحد طلع بالطف. طلعت اخته
محمد ما عرفها طلعت اخته
هاي امنين وي اشر عليه

اعيالك توهه يالعطشان. شبت
الخيم بالنار عالنسوان. شبت
وزينب خطوه للعباس. شبت
اذا تمشيلك اتموت رقية



خادم مولاتي زينب المقصر حسين حيدريه المالكي

تعلمنه من اهلنه
خدم لحسين كلنه

جنه ازغار من يمر محرم
ابوي بفطره لحسين يتلثم
ينصب جادره والفرع يلتم

ويصيح فرصه النه
خدم لحسين كلنه
/////
كل البيت يتحول سوادات
وچان يكول هاي من العبادات
نعوف حسين وسفه والف هيهات

يدعي شكد تمنه
خدم لحسين كلنه
/////
يرد انوب للباب ويشيله
ويسمي البيت موكب للعقيله
ما فد يوم غمض نام ليله

يكول العوض الجنه
خدم لحسين كلنه
/////
نعلك  بالفرع  رايات  ودموع
من ابعيد صوت الحمزة مسموع
بضمايرنه يضل حسين مطبوع

سنه وشيعه چنه
خدم لحسين كلنه
/////
اجانه الدور هسه احنه وكبرنه
وعرفنه حسين يستاهل عمرنه
لطمنه هنا وعل ساتر سهرنه

نعمه وماكو منه
خدم لحسين كلنه
/////
نعلم اولادنه تكمل المسيره
خدم لحسين والسبع العشيره
بس حسين عدنه ماكو غيره

خدم وبلايه منه
خدم لحسين كلنه




مهند الشمري
                                                     2024

بصوت. مسلم المطيري

تعلمنه. من اهلنه

كلمات الشاعر
مهند الشمري

بصوت. مسلم المطيري

نعي…
لمولاتي زينب ع .. تخاطب الانصار ع
……………… .
أنه زينب واوصيكم يالانصار
اخوي حسين لتخلونه وحده
عليه مشغول بالي اهواي تدرون
اخاف اعليه من ناس التضده
ثلثت انعام منكم ادري توفون
نعم انصار كال حسين عنده
لجن ما ادري ليش بصدري مقبوض
اخاف ايروح من ايدي اشيرده
اعز من روحي اخوي وماي العيون
يودني اهواي جان وانه اوده

…… .

الحمد الله رب العالمين ..
اللهم صل على محمد وال محمد
موسى الخادم

قصدية
(طبلهه عباس)
نزله

ـــــــــــــــــــــــــــــــــــــــــــــــــــــــــــــــ

طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ

طبهه خيال علم شال عجيبه افعاله
زلمه صايود مله الجود فرات وشاله
بيده فقار  كلف حار جبـال اخيـالـه
زلمه مهيوب الگمر
شلع اعروك النهر
شاله كله عالضهر
سيفه گالو لو سقر
طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ

جَفل الخيـل مثـل سيل عذاب و نـازل
ذَبح الناس گصص داس عظيم الكافل
صـاحو انـذار حشـر صـار دمار انقـاتـل
سيفه سموه الغضب
منجل بنحر الگصب
يشرب بـدم الرگـب
گطع الـوادم حطب
طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ

فَـجـر ابحـور بــلا أنحـور يشمـر بيـده
طَير الجيش مثل ريش عَصفهه البيده
زلـزل الگاع شمر ضـاع يخاف ايصيده
هُمـه والماكو سوه
روه سيفـه وما روه
حاكم وبيده الهوه
هزهم و هـز اللـوه
طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ

حلو العيون والرموش جميل الحاجب
ضيع الشوف رعب خوف يمين الغاضب
فَـگس اعيون عمه الكون ثخين الشارب
هيبة حماي الخيم
مـن دخلهم بـالعلم
حيدره گالو هجـم
عسكر اگباله انهزم
طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ

رَفـرف الـــواه فقـط آه تصيـح الــوادم
قائد الجيش رضه يعيش يكافل  خادم
گلـه شتريـد شنـو ايـزيـد نطيعـك لازم
منهو گادر يوصله
يمطر بگـاع الفلـه
موت سيفه زلزله
فرهه بيده كربله
طبلهه عباس  ...  طبلهه عباس

ـــــــــــــــــــــــــــــــــــــــــــــــــــــــــــــــ
الشاعر حيدر العمار الخزعلي





ليلة ٧/محرم الحرام /١٤٤٦
هجري الاحد 14 \7 \2024
ليلة قمر بني هاشم عليه السلام

بصوت. مسلم المطيري

طبلهه. عباس، طبلهه عباس

كلمات الشاعر
حيدر العمار الخزعلي

بصوت. مسلم المطيري

الشاعر عزيز الفيصلي