لسان حال مولاي علي عندما دفن مولاتي الزهراء

بيدي من گمت انى اهيل اترابهة
كام  يتراولي   منظر بابهة

من دموع ألعين رشيت الگبر
بيدي دافن روحي واسنين العمر
ياكسرتي وفرگتݘ أصعب كسر

ويلي شيطفيهة نار امصابهة

مدري ارد للبيت مدري أبقة انتحب
حاير وكل ساعة جرحي يلتهب
النار جوة اظلوعي بركان ويشب

واليصد بية يشم عطابهة

حاير امشي والتفت فاكد خليل
الليل بالفاكد والمفارك يعيل
على كبرج ما أمر عابر سبيل

بس أكول هنانة روحي شجابهة

شلون ماتت فاطمة وبيا وضع
وعينها المسطورة دم تجري الدمع
أيد عالمعصب والآخرة عالضلع

الزهرة ماتت وأيدهة اعلة احجابهة

ماتت واحمر بقة لون الجفن
ومن بعدها خيم بروحي الحزن
ماتت من العصرة من كلمة وأن

الكلمة هاية خذت روح أحبابهة

راحت ام كلب الحنين أم الوفة
الزهرة من الباري لوحة عاطفة
أثمنطعش عام وضوة الكون أختفة

ألهسة أثر نار وكسر بثيابهة
............................... .
تمت ... الحمدلله
✍خادمكم.. حسين حمدان الدلفي

بصوت. مسلم المطيري

بيدي من گمت اني اهيل اترابهه

كلمات الشاعر
حسين حمدان الدلفي

عشگي زهرائي..طول السنين
أحله أســمائي..خادم حسين
__
و الزهره و بالزهره و لزهره العـــمر
و بگلـــبي و بحــبي عالكون افتخر
حسراتي و دمعاتي ناذرهـــــن نـذر
لـ الخدمه و الخدمه تنفع بالگبــر

منجه ميعادي .. بدمعة العين
أحله أســمائي..خادم حسين
__
من نوحي و جروحي معروف الطبـع
مسـويني و سنـيني لـ الخدمه شمع
مـــحلاهه لـ أم طـه لو ســـال الدمع
و بگــبري و بحشـري ما أنسه الضلع

عبد مـــــولاتي ... و الميـامين
أحله أســمائي ...خادم حسين
__
و بطوري العاشوري يشهـد مــنبري
أحساسي و أنفاسي من الطف جوهري
ايظل دايم حُب فاطم يبقه لمحشري
بمكنوني و بجنوني شيعي حيدري

آخِره و دنــيه ... بـهاي الثنين
أحله أســمائي...خادم حسين
_
من الزهره لـ الحُرّه بـيّه ايظل آلَم
طف ثاني تلـگـاني بي ريحة خيم
بــــأثاره بـسماره صـار هنا سهم
و الرايــه بكل غايه رفعتهه الخـدم

رافــع الرايـه ... اويه المُعزين
أحله أســمائي...خادم حسين
_
ذا وعدي و ذا عهدي منطي لـ النبي
و بدمـهه خــــادمهه بــاقي منصبي
أهـــواهه مَـــرضاهه غاية مَكسَــبي
تـدريني اتسـميني خـــادم زيـنبي

سيـدة دمـعي ... و أم الونين
أحله أســمائي...خادم حسين

الشاعر حاتم صبري الكاظمي

بصوت. مسلم المطيري

عشگي زهرائي. طول السنين

كلمات الشاعر
حاتم صبري الكاظمي

مالي كل واهس بعد بالدنيا هاي
فاطمة چانت هوه وچانتلي ماي
عندي ماظل كل امل
كلشي  وياهه  رحل
فاطمة چانت هوه وچانتلي ماي
              *****
يالتناشد من بعد فاطم شلي
من تموت تموت ناسي وكل هلي
بلا حبيب ايصير حيدركم علي
چانت الزهرة الشمس بالدنيا الي

هسه ماظل كل وطن
سنيني بالغربه ابتدن
منطعن چم طعنه للبظعة بكفاي
فاطمة چانت  هوه  وچانتلي ماي
               *****
الدنيا يم رجلية طاحت مارظيت
ماردتها   ومن  مفاتنها  اكتفيت
انه   منطيها   ولا منها     خذيت
مافرحت بعمري اذكر بس بچيت

من مصاب المصطفى
والحزن  فوگي   صفه
وهاذه كسر ام الحسن زيد بچاي
فاطمة چانت هوه وچانتلي  ماي
               *****
من  تسافر  فاطمة  كلشي   يغيب
يعني راح ابقه  بحسرتي والنحيب
يعني يرحل صبحي ويحل المغيب
بالحياة   اوياها   ماعندي   نصيب

ما بقه   شي   بالعمر
الزهرة صارت بالگبر
ليش حدها اثمنطعش احلامي هاي
فاطمة   چانت   هوه  وچانتلي  ماي
           *******
اليسائل ليش ساكت ماحچيت
وليش ماسليت سيفي وقاتليت
وبتوالي  الليل  فاطم   شيعيت
والله بفعال الصحابه  مارضيت

انه وصاني الرسول
اصبر القتل البتول
گلي   ياحيدر   يغدروك  ابوراي
فاطمةچانت هوه وچانتلي ماي
                ****
گلي  راح  اتشوف   اشد النايبات
ماتشوف  الراحة ابد حد الممات
ومن بعد موتك تصير المعجزات
تنذبح كل عترتي بشاطي  الفرات

بكربلة اتموت الجميع
ينذبح    حته     الرظيع
وزينب تحشم الگمر  وتظنه جاي
فاطمة چانت  هوه  وچانتلي ماي
               *****
الخادم (سيد حسين الحسيني)

بصوت. مسلم المطيري

مالي كل واهس بعد بالدنيا هاي

كلمات الشاعر
سيد حسين الحسيني

لولادة العقيلة زينب بنت
أمير المؤمنين علي عليه السلام

ياهله بميلاد زينب بت علي
ياهله بميلاد زينب بت علي
★★★★★
ياهله بميلاد زينب ياهله
كل مرار الدنيا بلساني حله
زينب الصنعت مفاخر كربله
فوگ عرش المجد صارت تعتلي

ياهله بميلاد زينب بت علي
★★★★★
ياهلا بميلاد زينب والنعم
گلبي المجروح قرر يبتسم
ارعب الاشرار والله هلأسم
قررت دولة امية   تنجلي

ياهله بميلاد زينب بت علي
★★★★★
نور الله كونچ  من الازل
بيچ معنى الحق تعطر واكتمل
حسد صبرچ بالشددحتى الجبل
من علو قدرچ مناي و منهلي

ياهله بميلاد زينب بت علي
★★★★★
لوگلت زينب گلت يعني القمم
والمبادئ والدفاع على القيم
اسم زينب فوگ كل قمه علم
مله الديره أنواره  شع بمنزلي

ياهله بميلاد زينب بت علي
★★★★★
زينب  الخالق قدرها كرمّه
ياقبس انوار من رب السمه
اسيا ومريم خديجة وفاطمه
منزلتها الطاهره من الله العلي

ياهله بميلاد زينب بت علي
★★★★★
الله كَرَّم زينب وزاد الكرم
هيه من بيت النبوة والقيم
ابيت بيه جبريل صار من الخدم
بت علي الكرار يانعم الولي

ياهله بميلاد زينب بت علي

الشاعر حسن لعيبي الحريشاوي

بصوت. مسلم المطيري

ياهله بميلاد زينب بت علي

كلمات الشاعر
حسن لعيبي الحريشاوي

بصوت. مسلم المطيري

هوسات لولادة العقيلة زينب عليها السلام

زهره اتفوح ولدت من شذا الزهره
ومن نور الامامه منهج. وثوره
ومن فكر النبوة مبدء وقدره
(من اثلاثه أَتَكَّوَن معناها )

من اثلاثه عزمها انرسم وأتصور
من جدها الحبيب وفاطمة وحيدر
بمولدها ابتهج بيت الشرف وازهر
( يرباة الزهره ومعدنها )

يانور التجادح نوره من كوكب
شگد ميزات عدها وشأن يم الرب
ال ( طه )أيگول سمي هلبنت زينب
(زينب مأمور ايسميها )

الشاعر حسن لعيبي الحريشاوي

فاطمه. ورقيه

آخر العوالم.   يجمع الفواطم
يلتقن سويه.  فاطمه ورقيه
         ++++++++++
اعمارهن مختلفه بس ماكو چبيره
اثمنطعش ام الحسن ماتت زغيره
اليختلف اسم الكسيره و الاسيره

اثنينهن ياما بچن/ واتالمن/ وتيتمن/
      وسفه بزغرهن
اثنينهن ماتن قهر/ ماتن سهر/ بيهن اثر/
     سطره اعله خدهن

مشابهه المصيبه.  الزهره والحبيبه
شرحن الرزيه.    فاطمه ورقيه
        +++++++++++
فاطمه تجمع فواطمها وتلمها
والرقيه اتنادي وتگعدتها يمها
ياهله اليشبهني بالسطره والمها

بالقيامه يلتقن/يتشابگن/يتحاكمن
والشاهد حسين
ياهي لكثر ساهرت/واتعذبت/وشگد بچت/ والاكثر اونين

هوه سر بچيهن   والشهد عليهن
يحكم القضيه     فاطمه ورقيه
          ++++++++
حسين شاهد انته يم باب الزريه
وانه خلف الباب واركضتو عليه
نار بذيالي واجيت اتطفي بيه

وانه صحتك يمه رد/عني ابتعد/نار الحقد/تچويك ناري
فدوه الچ لمن صحت/وآنه شگلت/من اعدلت/ بيدك خماري

امخيمك لهيبه. . وبنتك الحبيبه
قارنتها بيه.       فاطمه ورقيه
       +++++++++
عن زراگ اعيونچ حسينچ حجالي
اركض بحرگ الخيم  وانتي اعله بالي
گبالي صرتي من شمر بالسوط اجالي

من شگف سوطه اتعبت/مثلج طحت/ وينچ صحت/يمه يزهره
طفله كاتلني الضمه/ومتالمه/يافاطمه/وهم عيني حمره

بكلشي مانسيتچ.  بدمعتي لگيتچ
وبجروح اديه      فاطمه ورقيه
      ++++++++++++++
حسين يسمع هالحچي وتنزل دمعته
فوگ صدره يشبگ الزهره وطفلته
يلحبيبات انـه كـل ونجـن سمعـتـه

امي كل ليل اليجن/ بدار الحزن/ تگعد تون/وابچي اعله ونها

وعالرمح طول الدرب/دمعي يصب/من تنضرب/بنتي اعله اذنها

يا حكم عليچن.  يوفي حگ بچيچن
مطابقه المنيه    فاطمه ورقيه
    
++++++++++++++

ثائر الربيعي

بصوت. مسلم المطيري

آخر العوالم. ىيجمع الفواطم

كلمات الشاعر
ثائر الربيعي

#مولد_السيدة_زينب_ع


🌷🌷🌷🌷🌷🌷🌷🌷🌷🌷
ــــــــــــــــــــــــــــــــــــــــــــــــــــــــ


هيه زينب زينب
*
الدنيه كلها تنورت بعيادها
عمة الساده هله بميلادها
كلشي يصفن لو نعد امجادها
تموت خل اهل الحقد بعنادها

نعلك شموع الفرح والكلب همه نشرح
زينبي العالم صبح وبالارض كلشي وضح
**
هاي زينب والحجي عنها يطول
اليوم بالميلاد فرحان الرسول
كمطتها الحور بكماط البتول
بالعقيله احتارت اصحاب العقول

بالضبط تشبه علي هيه روحي وكل هلي
بيها كل همي ينجلي صوت حبنه يعتلي
****


بزود اخوها تزامط المهيوبه
الله ميزها شكثر محبوبه
من عشكها ما اكول التوبه
والتبعها الباري يمحي اذنوبه

هيه باء البسمله والاميره بكربله
والمسير اتكمله هله بزينب يا هله
**
من جمال عيونها ايغار الكمر
ماكو شاعر شفنه وصفها كدر
وياها تتمنه الشمس تاخذ صور
بليله الميلاد خل يحله السهر

واخت سبع الكنطره هيه ستر الله تره
بيها تحلف كل مره هله بغيرة حيدره
**
علي بيده امن المهد شالاها
والحسين بضحكته ناغاها
والحسن بعيونه يحجي وياها
الله زينب بالسمه سماها

والكواكب هلهلت والنجوم اتزينت
والطيور اتباركت اباب زينب عيدت
*
تمت
تحسين الخفاجي

ــــــــــــــــــــــــــــــــــــــــــــــــــــــــ

بصوت. مسلم المطيري

هي زينب زينب


كلمات الشاعر
تحسين الخفاجي

بصوت. مسلم المطيري

في كرامات العقيلة زينب سلام الله عليها وبمناسبة ولادتها

لويشح ادواك وتزيد العلل
وتنظر ايامك ولا تنظر امل
ولوعسر صارت حياتك والزمان
وصار كل واهس يمر بيها ملل
ولوتقل الحيله واحزانك تزيد
ولاقريب ايفيد لاتنفع اهل
ولوصبر ماظل ولاجرحك يطيب
ولو وصل بيك الجرح حد الاجل
اقصد الزينب واسكب دمعتك
يامقام الجود للحل اونزل
هاي اخت حسين وعيون الكفيل
ارباة امها فاطمه وخير العمل
ماتردك خايب وترجع حزين
ولاعلى حال الامس حالك يظل
هي مثل الماي عنوان الحياة
الكلشي بوجوده صفه حي واكتمل

الشاعر حسن لعيبي الحريشاوي
ابوذيه لولادة العقيلة زينب سلام الله عليها

السعاده التحل بچفوفي محلها
وحگ اسم الجله اهمومي محلها
السعادة اليوم ياشيعه محلها
ولادة زينب ارباة الزجيه

الشاعر حسن لعيبي الحريشاوي

يزهرة عمري فدوه عيوني لعيونچ
لو ما ولدي ماطب داري من دونچ
............
اطب للدار مگدر وانتي مو بالدار
وأصد للباب وسفه وبيه الچ اثار
لو ماعندي ابيتي ولدنه ازغار
چا عفته يمن لوني فده اللونچ
.........
وحشه الدار مظلم من بعد عينچ
اطب شلون واسمع فاطمه وينچ
الحسن مهظوم اشوفه وينحب حسينچ
وزينب صعبه اگلهه ابنيتي اشلونچ
.......
الدار الما اشوفچ بيه ماريده
وعلي حگه المصابچ يفرك بأيده
الابو يشبع قهر لو يسمع اوليده
يريد امه وبنينچ ادري يردونچ
..........
يفاطم يامن اسمچ ساكن ابالي
شيصبّرني امن اصد داري صبح خالي
يجن الليل واجمع يمي اطفالي
ينوحون  ولون يمهم يبچّونچ
......
الدار الما يشع بضواچ ماجيله
ومحّد يمي اگعد ضيمي اشچيله
علي بعدچ يفاطم منهدم حيله
حسافه امن الاحبه خابت ضنونچ
........
الدار البي ضلع مكسور وتهشم
الدار البي سگط محسنّه وتألم
الدار الّي بعتبته ضل أثر للدم
ماريده وحگ كل ورمه بجفونچ
.......
الشاعر محمد حسن ضيغم

بصوت. مسلم المطيري

يزهرة عمري فدوه عيوني لعيونچ

كلمات الشاعر
محمد حسن ضيغم

تعالو ودعوها ماتت امكم
أشبعو شوف بس الليله يمكم
______
بهيده من تدنو عليها لا اتلجمون الكسر
التمو وشتمو عطرها باجر امكم بالكبر
شكبره حض الكاع باجر بيها فاطم تستقر
شبعو شوف وشبعو حسره هاي ساعات العمر

بهده وياها لا تسمع بجيكم
ولا تدنو الضلع ينلجم بيكم
______
كعدو خل نلتم سويه خلو مجلس ينعقد
هاي كعدتنه الاخير بعد فاطم ما ترد
الباقي منكم صوت عنده خلي ينعه اعله البعد
خل يكول آ يالزجيه الماتت ابعمر الورد

صيحو وداعت الله يالحنينه
شلونه النعي عالمسطوره عينه
___
اتراكمن عثره اعله عثره وجدمي عمره ماعثر
من شفت خد الزجيه بي اثر جف العمر
اضلوع من الزهره كاسر وانه كاسرلي ضهر
كشف بيت الستر بيده الماكو شي مثله نستر

دفعها الباب لمن جمع ربعه
هاي الدفعه ماضن منها دفعه
____
كلشي حال امن المصايب هاي ابد ما الها حل
كلبي مايطيني ادفنج واخذ حيلي المغتسل
ابيش اشيلج وينه حلي وداعتج جسمي نحل
تندعي اطفالج وتبجي لسه ماكطعو امل

كل واحد دعائه اختلف شكله
مو سهل الحمل هد حيلي حمله
____
شلون اطر بيج المكابر فاطمه الموقف صعب
وانتي الاتغذين ريتي شلون احطج عالترب
كلبي ماينطيني اعوفج للكبر لمن اطب
كلبي اليحن اعله البشر خلافج اشضل بالكلب

اريد ابقه اعله كبرج حد الغروب
المغرب علته ويه الفكد محبوب

بسام قابل الياسري

بصوت. مسلم المطيري

تعالوا ودعوها ماتت امكم

كلمات الشاعر
بسام قابل الياسري

ترتيل مفجع على لسان السيده زينب //ع


من اسمع صهيل الخيل
              انــــــام الليل مـــا اكدر
اذكـــر طيحتك يحسين 
             وصدرك ذاك المــكسـر

الحوافر من تدوس الكاع
             يحفرلهن حــفــر بــيـهــه
يــخــويـه اشسون بجثتك
            يـــوم الـــداســن اعـليهه

تمنيت اعله جثتي ادوس
             عــشرة خــيل مــو جثتـك
لــيـش مـن الظهر تنداس
             ومـــا ينداس ضهر اختك

انــام شلون يـبن امي 
            يخويه وتخمد انفاسي
وكبل لا ينكطع راسـك
             تــمنيت انكطع راسـي

زحمة الــنـــوم يحلالـي 
            ونومك صــــار عالغبره
صدري بلا ضلع مكسور
            وانـــت اضلوع متكسره

جـروحك كـربت الالفين
              والاصعب جـــرح كـلبـك
كون ابكدهه بيه اجروح
             وكــــون مــوسده بكترك

اعاين بالجسد يحسين
                جسمك هــذا مــا جنة 
مـن داسن عليه الخيل 
                فــــوك الـــكــاع  نثرنه
يريت الموت اخذ عمري
                وعــمري بعمــرك مبدله
عساني مـــوسده التربان
             يـــخويــه ولا اظل عدلـه

اصـدن لــــونــك اتــغــير
                و وجهك غارت ارسومه
ســـونــك وصــل يحسين
                الــخيــل بـساحة الحومه

اعذرني من اخاوي الليل
             يــبن امــي واجيم النـوح
جــسمـك بــالــــعره موذر
            وبذاري الــتـرب مطروح

اتنخه بــعـلـي الـكــرار 
              لــيلــة شـــوم مو ليلـه
بلكي من النجف يحضـر
             يـــجيـك وجسمك يشيله
 
مره اصرخ وصيح حسين
               ومـــره اتــأمـــل اظـنـوني
واكـــولــن حــلـــم ويـعدي
              هـــذا الشافــتــه أعـيـونـي

--------------------------------------------
     ✍ بقلم خادم الحسين ع
          الشاعر رعد الچريخي

بصوت. مسلم المطيري

من اسمع صهيل الخيل
انام الليل ما أگدر

كلمات الشاعر
رعد الچريخي