#الامام_السجاد_عليه_السلام


الحير الكون بدعاءه      
  فكدته ارضه وسماءه
اه  يا زين العباد       اه يا زين العباد

**.
هذا كون الله بألــــــم ينصب عزيه     
   يواسي بيها الطاهـره امه الزجيه
ينادي وجروحه تهل بهــــــالرزيه
يل مصــابك من جروح الغاضريه
والنجم يهوي ابكاءه    
    فكدته ارضه وسماءه
**.
بالدعاء اصبح نشر دين الرساله
عكب ظلم الطاغيه وجور الجهاله
وبدعاءه يذكر حسين اووصالـــه
وصار ينشر دعوته لرب الجلاله
والدعاء اصبح نداءه      
  فكدته ارضه وسماءه
**.
الصحيفه ام العلم تبجي لمصابه
شافت الام ومحن حسرة عذابه
تذكــــــرت وناته بايام الخرابه
وتسأل وتنطر متى يرجع جوابه
من يواسيني بعزاءه  
  فكدته ارضه وسماءه
**.
الملايك تصتنت لــــــــــمن ينادي
بيا الهي وترتفــــــــع ذيج الايادي
وجانو يكولــــــــون يا زين العبادِ
عرش ربك يستمع صوت الرشادِ
والملك يرجو بقاءه   
  فكدته ارضه وسماءه
**.
كلها ناحت سيدي شرق وغربها
علمك وطيب الاصل هو الجذبها
اخلاقك من المصطفى كلنا نحبها
حك الك يابو الشرف تحني ركبها
وطيبته تجري بدماءه
فكدته ارضه وسماءه
**.

بالدعاء وبالعمـــــل خلص حياته
متنه اسود سيدي وتشهد عبــــاته
يشبع ايتامه كبل ركعــة صــــلاته
مات وجروح اليتم حسره بصفاته
شاهد بفعله رداءه   فكدته ارضه وسماءه
**.
السممه كل ظنه يكطعله سبيلــــــه
ولله صار ابن النبي غايه اووسيله
بالمناجاة ودعاءه بوسط ليلــــــــه
هز عروش الطاغيه واهل الرذيله
وفقط للباري ولاءه   فكدته ارضه وسماءه
**.
ونسألكم الدعاء والتوفيق

لخادم ال محمد(ع)
الشاعر حيدر كاظم الساري

بصوت. مسلم المطيري

محير الكون بدعاءه

كلمات الشاعر
حيدر كاظم الساري

بصوت. مسلم المطيري

نعي مفجع
السيده زينب بعد رجوعها الى كربلاء
اتكلم أبي الفضل العباس ع



يــوم ادخـلـت لـبـن الـدعـيـه
بـيـن الـزلـم مـچـتـوفـه اديـه
بنـضـرت حـقـد يـنضـر عـليـه
ويـنـشـد زمـانـي اســوه بـيـه


اخـتـك يبو الغيـره الهـظـمـهه
سَـبـو عـلــي ونـسـبـت أمـهـه
عنك يـخـويه لـيـش أظـمـهـه
اسياط الشمر وصلت عظمهـه


صعبه وغيبتك كوه احـملتهـه
بـذاك الـقـصـر جيـتك ردتـهـه
ايـام الـمـضـن كلهه أذكـرتـهـه
وهيـبت رايـتـك لـمن شلـتهـه

*----------------------*-------------------*
✍خادم السيده زينب ع
الشاعـر رعـد الـجريخـي

بالعيال   يسير       بالقيود  أسير
سيد الساجدين      سيد الساجدين

*--------------*-------------*------------*

يمشي وبعينه الدمع ينزف جروح
من  أول  ايامه  حزن  واولهه نوح
بروحه  الهموم  الثكيله  وماتروح
اليشوف الطف يضل  بلايه  روح

قد رأى كربلاء    ونزول البلاء
ووداع الحسين    سيد الساجدين
*-------------*-----------*------------*

قصته قصة الم  من البدايه
ترافك وي أحزان ما الها نهايه
شاف كل شي بكربلا وخط الروايه
خطوه خطوه اتعذب بدرب السبايه
               

ذاق طعم العذاب   واحتواه المصاب
 قاد رحلا حزين    سيد  الساجدين
*-------------*-----------*-----------*
                
شلون شاف مصيبته وكطع الوتين
عالخيم من هجم جيش الظالمين
شاف أخوته وهمه صرعى مكطعين
ضامي وبلا  ماي  يا  بويه   الحسين
             
اشعلوما الشموع    ولتراق الدموع
 لبني  الطيبين       سيد الساجدين
*------------*------------*-----------*

شال  طرف  الخيمه ويشوف البلاء
وصاح ياعمه  إلى  الله  العزاء
الإمام  اعله  الأرض  والابتلاء
 انذبح واهتزتله أركان السماء
             
                
غير درب الرحيل   مالنا من  سبيل
للسبى راحلين    سيد الساجدين
*------------*-----------*--------------*
                  
قصة قيود السبي بين  البلاد
عاشت بروحه وبقت زين العباد
أخ ياظلم  الشمر  وأهل  العناد
فعلو ما زاد  عن  أفعال  عاد
                  
كان  أمرا خطير   حين مات الضمير
قاد  رحل الأنين  .  سيد   الساجدين
*----------*----------*--------------*
                     
محمد دعبل النوري
 

بصوت. مسلم المطيري

بالعيال يسير. بالقيود أسير

كلمات الشاعر
محمد دعبل النوري

استشهاد الامام السجاد ع


ما متت لسه عجيب والنفس ما منگطع
يا زمن رد للطفوف عيني خل تشبع دمع
****
ما اگولن مات حزني حزني حاشه ما برد
چم مصيبه عيوني شافت ليش ما ميت بعد
فوگ صدر حسين ابويه شمر شفته من گعد
إنذبح والخيل يركض بلايه رحمه اعليه صعد

شلون يدخل ريتي ريح وحافر امهشِم ضلع
يا زمن رد للطفوف عيني خل تشبع دمع
****
بكربله كل لحظه چانت ينولد بيها جرح
مُحتمل لسه اني عايش لان تلوهني الذبح
بحز وريد حسين عيني غمْضت وما تنفتح
تالي من فكّت رمشها راسه شفته اعله الرمح

الصار ساعتها عظيم شلون راسه يرتفع
يا زمن رد للطفوف عيني خل تشبع دمع
****
تارس الدخان صدري لسه اشعر بالألم
ابعلْتي والخيمه اللي شبّت إنشغل فكري نعم
الكربله رد يا زماني انظر الباقي الخيم
شلون ركضت عمتي زينب او وين هامت بالحرم

ياهي داست عالجمر ارد اشوفنه الوضع
يا زمن رد للطفوف عيني خل تشبع دمع
****
ماتت اختي بالخرابه اگبالي صارت يا زمن
لكن بليلة الوحشه إلتراچي اتشلعن
ركضت اليا صوب مدري والسياط اتحزمن
شويه من عبدالله اطول والمتون اتورمن

ارقيه ادري اشگد بچت السوط لا ما ينجرع
يا زمن رد للطفوف عيني خل تشبع دمع
****
حرورة دموعي چوتني لچن ما يشفه الگلب
ارد اشوف شلون زينب عالهزيله تنضرب
إلتهيت بحبل اديه وبس دمه چفوفي تصب
حال عمتي ما نظرته وآنه اعرفنه صعب

چان يحديها الشمر عمّتي اشگد تنفجع
يا زمن رد للطفوف عيني خل تشبع دمع
****
يا زماني طلب عندي للشريعه خل نمر
مثل ابوي حسين اريدن ظهري عالشط ينكسر
ابو فاضل هذا عمي چفوفه وسفه تنبتر
فوگ صدره جوده نايم بالسهم مرمي ويخر

عينه مصيوبه ابسهم وانفجر بيها نبع
يا زمن رد للطفوف عيني خل تشبع دمع
****
باقي موقف ارد اشوفه وعمري تخلص لهفته
من مشت لحسين ابويه شلون عمتي عرفته
راس ما عنده عجيبه وين زينب باسته
صدره مهشوم بحوافر شلون بالله شمته

الليل تارس ناظري بس ونين الينسمع
يا زمن رد للطفوف عيني خل تشبع دمع
****


الشاعر اياد الديراوي

بصوت. مسلم المطيري

مامتت لسه عجيب

كلمات الشاعر
اياد الديراوي

#قصائد_محرم
للانصار


العشگ عباده       
حيّ عالشهاده          يالانصار
ــــــــــــــــــــــــــــــــــــــ
اصطفو من اجل الصلاة احسين قد قام العزم
وكربله اطلابه چبيره والعرك بس للزلم
بالبيارغ هوسوله وللحرب شدّو حزم
مومهمه الدنيه كلهه احسين بس هوه المهم

ماخلص مداده     
حيّ عالشهاده           يالانصار
ــــــــــــــــــــــــــــــــــــــ
البشر مهما يعمّر يجي يوم الموتته
بس دجيب اليفهملهه ومايثگل خطوته
اكو ماوفقهم الله للحسين ونصرته
وانتم الصنتو الامانه والتحقتو ابثورته

والمنادي ناده        
حيّ عالشهاده          يالانصار
ــــــــــــــــــــــــــــــــــــــ
واحد وسبعين شيبه خضبوهه امن الدمه
الناس فوگ الگاع تمشي والشهيد اعله السمه
هايه جنه امن الكرامه وهايه حّسن الخاتمه
علي الايروي عطشكم والشفيعه فاطمه

والقتل سعاده      
حيّ عالشهاده          يالانصار
ــــــــــــــــــــــــــــــــــــــ
بالحشر لامام ينفع لا ولا تنفع بنين
اله حب حامي الحميه الينفع وحب الحسين
الما نصر هاي العقيده يعتبر ماعنده دين
ياحبيب ابن مظاهر انته شيخ العاشگين

وانته ابو الاراده       
حيّ عالشهاده          يالانصار
ــــــــــــــــــــــــــــــــــــــ
يالله ياعابس اجتك فرصه هاي امن الذهب
گوم شگلهه قميصك والذبح كلش وجب
وينه جون الكله غيره واسلم التركي اووهب
احسين لو باوع عليكم ينمسح منه التعب

گومو للقياده       
حيّ عالشهاده          يالانصار
ــــــــــــــــــــــــــــــــــــــ
هدو السبعين كلكم عاصفه ابنص البحر
الله باعلهم رحمته واشتروهه بالنحر
صفّو الرايه اعله رايه شدو الظهر بظهر
الزاد حبهم للحسين وراحو بأجمل سفر

حققو مراده      
حيّ عالشهاده         يالانصار


كلمات : محمد الجماسي

#اللهم_عجل_لوليك_الفرج

بصوت. مسلم المطيري

العشگ عباده

كلمات الشاعر
محمد الجماسي

حمول زينب شايله..بت علي امعلعله
يازينب يازينب
&&&
شافت انواع المصايب..بت علي وبت حيدره
بعد ماحركو خيمها..شلون ظلت حايره
تعاين الشمر وزمرته..والجره اعليهم جره
نادت اعليهم تحشم..وينه سبع الكنطره
خويه ظلت بالفله.. بت علي امعلعله
يازينب يازينب
&&&
طاحت الدمعه عل خدها..يوم حركوها الخيم
شافت الجربه وجفوفه..بعينه نابت هالسهم
صاحت بحركه وتنادي..كوم شيال العلم
غيرك احنه بلايه والي..كوم كفال الحرم
كوم حامي العايله.. بت علي امعلعله
يازينب يازينب
&&&
زينب الظلت وحيده..وانت يارجواها
كوم ياعباس ليها..كوم انته وياها
الشمر سوطه الضربها..حدوده وتعداها
محد اخلافك كفلها..وبعد من يحماها
الحمل من يكفله.. بت علي امعلعله
يازينب يازينب
&&&
غيره ماعدهم وذمه..الحره من ضربوها
شالت اهموم العقيله..وتعرف اشبجاها
من عله المنبر ينادي..زينب شنادها
وين ابو فاضل عضيدج..كام يحجي وياها
يوم وكفت بالمله.. بت علي امعلعله
يازينب يازينب
&&&
ردت اهموم العليها..جن جبل مهمومه
شامخه وشالت جرحها..بت علي الظلومه
رجعت وشافت وليها..لكربه ومهظومه
تشكي امصاب اللفاها..ردت اعل الحومه
تلها هيه تسئله.. بت علي امعلعله
يازينب يازينب
&&&
فرشت وكعدت تنادي..بالضعن وي النسه
اتذكرت حرك الخيام..وعملته ذاك المسه
هجمت اعليهم اميه..خيول كلها مدعسه
والشمر يخطب عليهم..برجله ياهو يرفسه
ذوله اهل البلبله.. بت علي امعلعله
يازينب يازينب
&&&
خادم اهل البيت
الحاج ابو علي السعيدي

بصوت. مسلم المطيري

حمول زينب شايله

كلمات الشاعر
الحاج ابو علي السعيدي

زينب عباية امن السمة ونزلت عله الگاع
چانت رسوله ابلا وحي والروس الامتاع
صح الكفيل ابلا راس ..بس هي چانت عباس
****
تمشي عله اخشوم الزلم..من كربلة للكوفة
ايسبّونها وتقوه بعد .. والطگها تلوي اچفوفة
شارتها تكتلهم كتل ..بت البخت معروفة
زينب تچتف بالحبل ..بس هي ما مچتوفة

عدها خلگ چانت تغطي اجناح جبريل
عالصبخة لو دگت رجل يطلع الف نيل
للعفه چانت كرّاس..بس هي چانت عباس
*
خزرتها تبرگ عالزلم .. ترعد رعد خزرتها
تقلقهم بدرب السبي ..امن اتسبّح بسبحتها
والما مؤدب من گبل .. يتأدب بشوفتها
عباس بس عنده زند .. تنطي شبه مشيتها

جيش اعله كبرة امن الرعب إنشق سماطين
بخزرة تحطلهم گلب حلفت بالاحسين
بت المضيف الينباس .. بس هي چانت عباس
***
إلطف گضه وصار السبي..بس جاي اشوفنها الطف
العنده عزه يظل منشدهْ..وهي بعقل تتصرف
چانت قيادية ضعن .. والرتبة ما تتوصف
عدها عباية امقدّسة ..ترهم غطه للمصحف

(إنّا فَتَحنا) أعتقد نزلت هالايام
معناها يازينب بعد نظفيلنه الشام
عالظلمة طبت نبراس ..بس هي چانت عباس
**
علوية وبنفس الوقت.. شيخه واجت طلّابه
من عدها مالت كربلة ..وما مالت العصابه
بت واحد امبچي العرب ..مو سيفة بس اگرابه
واخت الي تنفل الرگب.. لمن يفل انگابه

طبت سفيرة اعله القصر بت الصريفة
وچانت رقية القائدة ومامش خليفة
شجاب الصخر عالالماس.. بس هي چانت عباس
*
وصلت مراحل بالستر ..زينب تحجب ظلها
زينب مرة اتعلمة الحچي .. ذاك اليريد يذلها
امن الممكن وكل معجزة .. اتصير ونحير بحلها
الگمرة تطلع بالظهر .. بس ماطلع صوت الها

گد ما عفيفة اعله الهوه امن الگاع تنشال
وبس الها الله من خلق ما خالق اخيال
خاف بشمسهم ينجاس .. بس هي چانت عباس
****
علي هادي الخزعلي

بصوت. مسلم المطيري

زينب عبايه من السمه ونزلت عله الگاع

كلمات الشاعر
علي هادي الخزعلي

بصوت. مسلم المطيري

الوكت هاكثر لاعب يولبيچن
هسه الموش كده يولبيچن
العمچن مشتكاچن يولبيچن
لو تشتكن يم حامي الحميه

هلي من اعداكم اعرف ماتفزعون
واحشم بيك يبني ماتفزعون
يهل زينب لزينب ماتفزعون
گلبي وخيمتي احترگن سويه

وحگ كلمن سجد لله ويامن
من اشوفك يطمئن گلبي ويامن
صحت عباس عايفني ويامن
الشمر يحدي وخولي يگود بيه

الصخر يازينب اتفسر لون چان
ومثل لون العبي صاير لون چان
ابو فاظل عدل يمچ لون چان
الشمر يخسى اذا يوصل رقيه

يلوج حسين اشوفه لوجبينه
الوطنه ايردنه ريته لوجبينه
شداوي اصواب گلبه لوجبينه
شدور خنصره الضايع عليه

زينب من بعد عباس شبگه
عده وشبگت اعله الحرم شبگه
على السجاد صاح الشمر شبگه
وشبگ عمته وياه سويه

اهنا يلي جبتنه گوم ردنه
اخوك حسين بالدم نگع ردنه
اخر شوفه الك عباس ردنه
تجينه برايتك تحظن رقيه

مؤيد الحفاظي

بصوت. مسلم المطيري

نعي للأمام السجاد ع

علي السجاد ماضن مات مسموم لجن مجبور أصدك هاي الاوهام
آنه اللي أعرفه أنكتل مذبــــــوح بسيف الهظم من أنسبوا للشـــام
طلعت روحه منه بيوم عاشور من طلـــــــعّوا زينب من الخيــام
عليل وجان جسمه محّمل جروح وبكد الســــباية محّمل أسهــــــام
بس الحكمة هيّه الرادته يعــيش ربك مايـــــريد يمـــــوت الاسلام
ولو تسألني بالله بيا وضع عاش هم تنــــحسب عيشة أبيــــــّن الالآم
سباية ونار تلهب كلب الاطفال وشبكوهم ســــــوه زينب والايــمام
بس هيّه المصيبة أثنينهن ظيم ياهو الجـــان بيهم يمــــشي كــــدام
كبل زينب تنام بكــــلب عباس شيصبره بخرابه يشـــــوفهه تنام
خلّص عمره بس ماخلّص دموع لأن بعيونه جان مخّلي الايـــــتام

بصوت. مسلم المطيري

أبوذية

يشـايل راس اخـوتي تان ماتان
شيهود الكلب من بجاي  مات أن
ضمي وعيونك  الحلوات ماتان
ومتربه خدودك الجانت ضويه

هادي الصالحي

اللهم عجل لوليك الفرج

/////

دموع زينب

ارد اسولف قصتي للزائرين
من اجيت لكربله باالاربعين.  
دربي حسرات والالم
لامواكب لا خدم
**
انه ياالمشايه.  ضعني مابيه رايه، وماسمعت احچايه.  
                      لوكلمه ترحيب
هذا گلبي وضيمه، لاذره ولا خيمه، دربي هيمه بهيمه
                     مابيه معازيب
محد الحياني، وباالهله تلگاني، گبالي روس اخواني
                  عن عيني متغيب
حايره بأيتامي، چم طفل ضل ضامي،، هيچي جبت ايامي.           ياجرح الي يطيب

باالشمس لوردنه نگعد نستريح
ماكو واحد هلا باالزاير يصيح
ماشفت رفة علم.   لامواكب لا خدم
**
من الهزل تعبانه، مانمت سهرانه، شرد اصيرن انه
                      من هاي الاحزان
دمعتي الحراگه، تچوي ضهر الناگه، وي اخوتي اتلاگه
                      ويلاه عاالخوان
الشمس كل مره، اذا صارت حمره، حسين اذكر نحره
                   واندب يعطشان
دربي يهل الغيره. خلصيته بحيره، گمت احس كل ديره،                مابيها بيبان
اليل اذا چلچل انوم عيلتي
وانه اگعد ابچي يم روس اخوتي
گلبي نصين نجسم.    لامواكب لاخدم
**
ابچي سكته وانعه..ماگعت الدمعه ، راجعه وهاالرجعه
                      ماخلت ارواح
دنيا دارت بيه، وانهظم يوميه،زينب المسبيه
                     والحادي ذباح
موتتني الفرگه، بعد راح الملگه، مدري باالطف شلگه         بس هم و الجراح
لاخدم لاموكب، طلع بينه يرحب، من يصير المغرب
                     باالهيمه نرتاح
ولو هيه الراحه وين واحنه وين
بعد ياراحه وانه مضيعه الحسين
نگعد ونغفه عله هم.   لامواكب لا خدم
**
الخادم الحياكم، بلهفته وناداكم.  علي علي وياكم،
                     ضلت المسافات
لكربله ياالتمشي، واصل وماضل شي، بعد عيني ورمشي.          تصيح الخدم بات
وسفرتي اشگد صعبه، كلها غربه بغربه، يابلد لنطبه
                       تطلعي شمات
العطش أذانه،، وكل يتيمه ويانه، ذابله وعطشانه
                         حال اليتيمات
ماكو واحد جاب ماي اوزعه
شبيدي والعباس يم المشرعه
عينه صوبها السهم.    لامواكب لاخدم
**
من وصلت حسيني، دمع صبت عيني، عشره بينه وبيني.                   حب مااله حدود
جيت ادور گبره، روحي مثل الجمره، گلبي الله يصبره
                            عاالخوه ممرود
صحت من يسمعني، الزمن رجعني، وينه كافل ضعني،
                           ماضن الي عود
كلمه ماحاچاني، بهضمتي خلاني، ادري ماتنساني
                          ياصاحب الجود
گتله كلش خايفه يابن علي
خاف ازورك اخر زياره الي
وصرت اشم اترابه شم.   لامواكب لا خدم

سعد العبودي

بصوت. مسلم المطيري

ارد اسولف قصتي للزائرين

كلمات الشاعر
سعد العبودي

عمه هاي الروس ليش تباوعنه
خايفه يطلعون ياعمه من اهلنه
تبجي لو ضربوني ......يمكن يعرفوني
خايفه يطلعون ياعمه من اهلنه
*
عمه هاي الروس متغير رسمها
ماتبين وجوها غاطيها دمها
مبينه بس عيونها وادري بالمها
من يضربوني احس يزيد همها
عمه طول الدرب همه يراقبوني
عمه شفتي شكد بجو من جتفوني
بلدمع واسوني......يمكن يعرفوني
خايفه يطلعون ياعمه من اهملنه
****
عمه بيهم واحديباوعلي شفته
بلحجرمصيوبه ياعمه جبهته
على حالي بعينه مانشفت دمعته
خاف عنده بكدي طفله ويضن بته
دني يمهم واحجي كل الصاربيه
وكولي بنت حسين هلطفله رقيه
الحالهم بجوني ......يمكن يعرفوني
خايفه يطلعون ياعمه من اهلنه
****
وبعد واحد بلسهم مصيوبه عينه
وراسه يمكن بلعمود مهشمينه
لوصحت ياعمي احس يكثرونينه
عمه من تبجين احسج تجرحينه
راح ادنه عليهم واحجي همي
خاف مايدرون بلعباس عمي
جنهم يجهلوني........يمكن يعرفوني
خايفه يطلعون ياعمه من اهلنه

من اجاني السوط وتقرب عليه
اثنينهم غمضو ياعمه سويه
ومن طحت واحد حجه اسم الله رقيه
ويصرخ الثاني وينادي وين اديه
اعثر ومن عدهم اسمع صوت ونه
روسهم فوك الرمح تهتز محنه
بصوتهم فجعوني......يمكن يعرفوني
خايفه يطلعون ياعمه من اهلنه
*
روسهم تنزف دمه وحيرني همهم
لون مامجتوفه اديه ادنه يمهم
بحضني اخلي الروسهم واكعد اشمهم
عمه اتمنى تصد عيني الرسمهم
ماي ماعدنه نغسلهم يعمه
حتى اغسل وجوهم دمعي المه
واهل دمع عيوني .......يمكن يعرفوني
خايفه يطلعون ياعمه من اهلنه

سيد موفق الموسوي

بصوت. مسلم المطيري

عمه هاي الروس ليش، تباوعنه

كلمات الشاعر
سيد موفق الموسوي