امودع يانور العين

امودع ياشوف العين هاي المسيه
تشبه لجمـات حسين هاي المسيه
مثله اعله الكَاع اتنام مطروح اتلــــث تيام
هاي المسيه هاي المسيه
***
جيتك يالجـــــــواد وروحي حزنانه
وعيني امن المدامع تجري غركانه
شفت البيت اظلم تبجــــــي حيطانه
تنعه امكدره ومســــــــــدوده بيبانه
وينك يابعــــد الروح هاي المسيه
ميت حيلي المجروح هاي المسيه
متروس ابنك آلام مطروح اتلث تيام
هاي المسيه هاي المسيه
***
اجاك الهادي بويــــه والنفس عالي
ضاك الهوى بريتــي وماتت آمالي
صعدت اعله السطح وانمرد دلالي
شفتك ميت اعله الكــــــــاع يالغالي
مطروح اعلــه التربان هاي المسيه
كلبك ضامي وعطشان هاي المسيه
تنعه وتبجي الايتام مطروح اتلث تيام
هاي المسيه هاي المسيه
***
طحت اعليك اشــمن بيك واتحســـر
شهكَت روحي من الشفته ما اكـــدر
الله ايعين زينـــــــب يم ابو الاكـــبر
من شافت اخوهه اعله الثرى اموذر
جسمك مابي طعنات هاي المسيه
لا سحكَه ولارفسات هاي المسيه
حسين المتروس اسهام مطروح اتلث تيام
هاي المسيه هاي المسيه
***
شك كَلبي الحزن وامصابك الليله
الله ايعين جدي المنهـــــــدم حيله
علي السجاد شـــــــح اللي يتجيله
اخيامه امحركَه ومحـــتار بالعيله
سالفتي اتظـــــل انحيب هاي المسيه
ماظن اجروحي اتطيب هاي المسيه
لافي ظل ولاخيام مطروح اتلث تيام
هاي المسيه هاي المسيه
***
ثلث تيام ميــــــــــت بالشمــــس نايم
لجن جسمك اشوفه امن الطعن سالم
مو مثل الغريب الذبحـــــــته الوادم
واخته اميسره ومجتوفـــــــه للظالم
كَلبي اينشاغ محروك هاي المسيه
آه اعله الطـبت سوك هاي المسيه
انعه وألطم عالهام مطروح اتلث تيام
هاي المسيه هاي المسيه
***


ابو علي الركابي

بصوت. مسلم المطيري

مودع ياشوف العين. .. هاي المسية

كلمات الشاعر
ابو علي الركابي

بصوت. مسلم المطيري

١٠٨٨- سيدي ابا عبدالله

اطوف بكعبة جروحك وناحاي
وعله مصابك اجر ونّي وناحاي
اذا يحسين ماخـــدمك وناحاي
اموتن خـــاسر مصفــرات اديه

✍ فراس المحمداوي

يبو فاضل دخيلك .. يبو فاضل دخيلك
_
طبها عباس.. على الراس… ترف ريشاتة
دبچت الخيل.. والكحيل… حچة حچاياتة
شد الشگور… بالصدور… تطگ خزراتة

هذا ابن بدوية .. شمّر الخاچية
كافل العلوية .. هوّس ابچفيّة

يبو فاضل دخيلك .. يبو فاضل دخيلك
_
گرّم الخيل .. والدخيل .. يموت بخوفة
طب على الگوم .. والهدوم .. دوَت بچفوفة
غثوّا الحيد .. والبعيد .. رجع للكوفة

شد وصلته براسة .. واشتعل نوماسة
حسين جاس احساسة .. ابعينة اجالة وباسة

يبو فاضل دخيلك .. يبو فاضل دخيلك
___
حمرة العيون .. ع المتون .. ركبها المهرة
طبگت الجيش .. عل الكاع .. رجلها الشگرة
بريّد اريول .. والخيول .. تدبّچ حدرة

طب عجيد السادة .... وهوّس اعله القادة
ضيّع المشرادة .. … … تعّب الطرّادة

يبو فاضل دخيلك .. يبو فاضل دخيلك
___
بيرغة وياه .. يملگاه .. يچوّي الهيمة
ريشتة اعگال .. ع الثگال .. يرش بضيمة
عدّة ديوان .. والشيوخ ... تعزّب خيمة

فرفح الخيّالة .. ما يحب اوشالة
يفوح عطر اخيالة .. مثل هيل ادلالة

يبو فاضل دخيلك .. يبو فاضل دخيلك
___
ثغبت الگوم .. يجيدوم ... يعوّر سيفك
ها يعباس .. على الطاس .. تمرجح طيفك
التچفت اعليه .. تخليه .. يموت بكيفك

طبها عم اسكينة… وجدّحت رمشينة
تلمض اعله اجبينة .. من تعوّر عينة

يبو فاضل دخيلك .. يبو فاضل دخيلك
_
بظهر عاشور .. ع الشگور .. تظب چفّيتك
خضّر الماي .. يلهواي .. حدر خاچيتك
يشبع عيون .. يعباس .. التضيفة ابيتك

امعلّم اعله الملگة .. ما خذيت الدرگة
انت رب الحرگة .. املوحة بيها الطگة

يبو فاضل دخيلك .. يبو فاضل دخيلك
___
چوّم الليل .. بلا حيل .. گطف شجعانها
اريولهم فوگ .. تره الروس .. حدر فرسانها
بثگلة عباس .. على الناس.. خسف گيعانها

فرّع وشالاها .. وع النجف ذبّاها
اتمزهد وطباها .. وريّف اللاگاها
_


علي هادي الخزعلي

بصوت. مسلم المطيري

يبو فاضل دخيلك

كلمات الشاعر
علي هادي الخزعلي

يا حســين ابوجهي لتسد بابك
فـــدوه اروحن سيــدي لترابك
ياهو غيـــــــرك ألتجيله
عندي بس انته الوسيله
ابوجهي لتسد بابك...

++++++
جيتك الدارك يبو السجاد ساعي
ونته ابن الما يرد مـن بابه داعي
سيـــدي ابلياك اضيع
اي وحق نحر الرضيع
لاتردني اقبلني الك مولاي ناعي

سيـــدي احمولي ثجيله
عندي بس انته الوسيله
ابوجهي لتسد بابك...
+++++

من تسد بابك ابوجهي اعيوني تعمه
ياهو غيـرك ســــيدي يقبلني اخدمه
ارزقني خـدمة منبرك
سجل اسمي ابدفترك
ماتشمله الطافك الما ســجل اسمه

بابك ابكل شــده اجيله
عندي بس انته الوسيله
ابوجهي لتسد بابك...
+++++

ســـيدي يا بـاب ادگ لو بابك انســـد
ونتــــه تعلم زين غيــــرك مالي احـد
عمري خلص خدمه الك
اعفــي عني اتوســـــلك
ابلا رضاك ايصير سجل اعمالي اسود

اقبلـني احلفلك بالعليله
عندي بس انته الوسيله
ابوجهي لتسد بابك...
+++++

خدمتك فردوس يابوسكينه چنهه
فـــدوه يا مولاي لاتحرمـــني منهه
منهه ماريد انحـــرم
صدري عاود عالطم
والمجالس لحظه مااستقني عنهه

دمعــي لمصــابك اسيله
عندي بس انته الوسيله
ابوجهي لتسد بابك...
++++++

اني مـن دونك اضل ما اسـوه كلشي
انته صــيتي ونور گلبي وانته عشي
انته رفعت هامتي
انته ديني ودنيتي
ابهيبت اسمك آني بين الوادم امشي

روحي مـن دونك ذليله
عندي بس انته الوسيله
ابوجهي لتسد بابك...
++++

         الخادم
✍ كامل السعيدي

بصوت. مسلم المطيري

ياحسين ابوجهي لتسد بابك

كلمات الشاعر
كامل السعيدي

اعتذر الكثره الطلابات ع القصيده اعادت نشر


طلعــــنه بليل خويه ندور عليك
وعثرنه بلجثث من جبنه طاريك

طلعنه بلــيل وحــده دالي الاخره
بشفــــــــــــايف ذابله ورياك مره
وتكــــــــسر بلصدر يحسين عبره
كلنه حــــــسين من نوصل نخبره

نكله المــــــاي هذا وجينه نرويك

حرنه حــسين خويه شلون نلكاك
جثيره الــــموته بطف ظاله وياك
ويا جثه النگــــظهه نكول لا ذاك
گبل مانمــــشي ردنه حصل دواك

عسه دمع الحزن يبن امي يشفيك

اجيناك بدمع والحســــــــره ولاه
وگلنه حســــــين هسه هنا ونلكاه
نعرفه المحبس وماهو عله يمناه
والخنصر بعد مســــــــــلوب وياه

وعلامتنه صفت هاي العرف بيك

يخويه تعــــــــثرت ببني وكلت لا
اعوف حــــــسين زحمه وبقه ويا
اودع حســــــين وبني بردتي الكا
اذا خاله يــــــــــظل ماجيب طروا

وكــــلــتله بردتي يوليدي ارد ليك

هواي الــموته يمك ظلمه  وندوس
بس طــعنات بيها وسلامه الروس
بس جســمك نعرفه سهام متروس
وراس علرمح مــــــــــبيوع بفلوس

وصـــلتك بلدمع يبن امي احاجيك


ابو سلام الجابري

بصوت. مسلم المطيري

طلعنه بليل خويه اندور عليك

كلمات الشاعر
ابو سلام الجابري

من اقره التراث يسيل دمع العين
قصائد كلهاحركَه وخلدت من سنين
اه امن قره زينب لفت يم حسين
ياخذني الدمع وتذوبل عيوني

زينب لفت يم حسين  لاجن جابعه بالهم
تكله ياضوه عيوني  عليمن هل فزع ملتم

واويلاه   ياحسرت كلبي دامي
واويلاه   حسين بكربله ضامي
اويلاه   ياكربله    اويلاه  ياكربله
--------------------
العبدالله جرح بالروح ماينضام
ضامي وماشرب كَطره ثلث تيام
الرباب اتهز مهد خالي وابد متنام
اهز مهدك يعبدالله ويجرحوني

اهز مهك يعبدالله    وعاين عالمهد خالي
يبتي وثمر دلالي    اهز مهدك يعبدالله

واويلاه   عبدالله الفارغ مهده
واويلاه   لحضن امه ياهو يرده
اويلاه   ياكربله    اويلاه  ياكربله
--------------------
للقاسم حزن ماصح حزن نفسه
شاب وماتهنه ابثوبه وبعرسه
صاح الئمه حضري الدمعه من هسه
واذكريني ييمه من يذبحوني

يمه اذكريني   من تمر زفت شباب
من العرس محروم   حنتي دم المصاب
والجفن ذاري المصاب
شمعت شبابي    من يطفوها
والجفن ذاري المصاب

واويلاه   بليلت عرسه يذبحونه
واويلاه   وامن الفرحه يحرمونه
اويلاه   ياكربله    اويلاه  ياكربله
--------------------
زينب للمدينه رجعت ابحسره
وعافت راس اخوها المنكطع نحره
الداست خيل صدره ونكسر صدره
تلكت جابر وصاحت تسمعوني

جابر يجابر مادريت  ابكربله شصار
من شبو النار
والحرم شاطت للمعاره  تريد اهاليها

واويلاه   زينب رجعت مجروحه
واويلاه   وجابر مابطل نوحه
اويلاه   ياكربله    اويلاه  ياكربله
-----------------------
ويلي اعله البقه فوكَ الترب عاري
زينب صاحت اختك ماطفت ناري
وين انطي الوجه يحسين بزغاري
لاتباوع عليه وجرحي بمتوني

يبن امي عالتربان عفتك رميه
عين العمه ولا شوف ذيج المسيه

واويلاه   هاكبر جروح الفركَه
واويلاه  وزينب عاشت بالخنكَه
اويلاه   ياكربله    اويلاه  ياكربله

ابوفايز الرافضي

بصوت. مسلم المطيري

من اقره التراث يسيل دمع العين

كلمات الشاعر
ابو فايز الرافضي

بصوت. مسلم المطيري

السيده زينب تخاطب امير المؤمنين ع

الأرض لـمـن ركـضـنــه  . مايت انه
عشيره ومـوش واحـد . مايت انه
يحـيـدر ويـن بـالـطـف . مايت انه 

خـبـر عـنـدك تـرسـنـه الـغـاضـريـه

*----------------------*------------------*

✍خادم زينب (ع)
الشاعر رعد الجريخي

شاعت اخبار الخطر،،،وحسين ناوي علسفر
   وانه العليله،،،،،،،،، ابداري نحيله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
من راح ابويه الكربله ظليت وحدي
حسبات تاخذ بلفكر ودمعي اعلخدي
ياربي سلمه من الخطروظعن يحدي
بغيابه مجروح الگلب ودنياي ظدي
مابيه احمل فرگته،،،،صعبه عليه غيبته،،
دوم اندعيله،،،،،ابداري نحيله،،1
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
كلما يمر بيه الوگت يشتد مصابي
والعله تكبر بالگلب ابهمي وعذابي
طفله وحزينه بلاابو شينفع عتابي
وسمع جوابه ويلصدى يطول غيابي
اتمني اروح ويلأبو،،،،والناگتي يبره الأخو،،
اهمومي ثگيله،،،،،ابداري نحيله،،2
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
ابكل ساعه ابالي صور اتمر عليه
صورة علي الأكبر تمر بلطف رميه
لوجاسم العاف العرس فوگ الوطيه
خلتني دنياي ابقهر وصفگ بديه
نارين تچوي الگلب،،،،نارالموادع والغرب،،
طول رحيله،،،،،ابداري نحيله،،3
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
محدبقالي من هلي يطول سفرهم
وعبدالله راح ومايرد واني انتظرهم
ياصبري ماينفع بعد ويجرح هجرهم
وليلي يمر دمعه والم ضايع خبرهم
سكينه ورقيه مشن،،،،وللفرگه اعيوني بچن،،
دمعي اسيله،،،،،ابداري نحيله،،4
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
كلشي بفگدهم مابقى حتى الورد مات
وعيوني ذبلت من السهر كل ليلي دمعات
خلاف المشوا ياحسرتي كل ساعه لچمات
ماتشفه اجروحي ابد ياگلبي هيهات
سلمت امري للقدر،،،،ماخله عندي الدهر،،
ياهم اشيله،،،،،ابداري نحيله،،5
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
   الشاعر  قصي  القاسمي

بصوت. مسلم المطيري

شاعت اخبار الخطر

كلمات الشاعر
قصي القاسمي

وليُ النعمه     فداء الأسمه
اللهم ارزقني الخدمه
وحب الحسين
***
عبد وبسـوگ النخـــاسه مــن لگاني
حسين خلف الله عليه من اشتراني
چنت وين وهسه انــي انسـان ثاني
خــاف يـعتــقني وارد انــوب اعاني
 
اشيدور غيره        اليعيش بخيره
يتفايض حنيه ورحمه
 گلبه الحنين
اللهم ارزقني الخدمه وحب الحسين

 
***

گالو حسين اشنطاك اتحـبه هالگد
گلت خير امن الله افضاله ومتنعد
شنو قيمــه لطمتي وثـوبي الأسود
بالمقابل جســمه بالحــافر تـفــرهد
 
درب للحافر        حبيبي صاير
ومحزوز بكل قسوه
منه الوتين
اللهم ارزقني الخدمه وحب الحسين

 
***

عايش بــعالم خدمـــته وصـــافي بالي
وبالـــهمـــوم المـــو بـــحبـــه ما ابـــالي
خادم حــسين البــشـر تنـــظـرله عــالي
اليمشي ويه الغالي يصبح سـومه غالي
 
اليعيش اجروحه        رحمته اتلوحه
 
وكون اتعلم هذا السر
 امن ام البنين
اللهم ارزقني الخدمه وحب الحسين

 
***

ارزقــني يارب عافيــه ما گــول هالعام
ارزقني يارب جمره من جمرات الخيام
بلكي احــس بجروح واحد مـن الايتام
ارد اشــوفن كــربله شگــــد بيـــها الأم
 
الظهر كون احمر      بســياط العسكر
وكون امن ادموعي الهماله
تعميلي عين
اللهم ارزقني الخدمه وحب الحسين

 
***

حسـين احـَن من امي يــالوادم عليه
شلــون ما بردانــــه اكــَـمـش للمــنيه
مـــاردت مــنــه جـــزاء ولا عـــطــيه
ردت بس يرزقني شوغه امن السبيه
 
امن امرن بالتل     اعيــش المـقتل
وعبدالزهره الكعبي براسي
طول السنين
اللهم ارزقني الخدمه وحب الحسين
 
***

حسين اذا هــد ايدي يتقرر ضياعي
عمري من غير أبو اليــمه ماله داعي
ارزقني ياربــي اعيش اويه النواعي
لحد ما من اللــطـم اهــشم اضلاعي
 
ونيــني دائم     الظهور القائم
ديني حسين الغالي وغيره
 ماعندي دين
اللهم ارزقني الخدمه وحب الحسين
*
حيدر تركي الكربلائي

بصوت. مسلم المطيري

ولي النعمه. فداء، الأسمه

كلمات الشاعر
حيدر تركي الكربلائي

وي الاحباب     يحله العتاب   لاجن بعيد الدرب
جابو النوك    وصوتي مخنوك     ودمعتي اعله الخد تصب
***
والله حيرني الوكت     وعالبواجي اتعودت
طول ياليل الحزن خليني اساهر
احلامي تعبها الزمان     وين اروح اليا مكان
الورد يزعل لو جبت طاري المكابر
عيوني غصت بالدمع     وحترك بيدي الشمع
واكفه اباب الامل وكسر الخاطر
اجرع بكاس الصبر    والعمر راح العمر
اتمنه هاي الدنيه اهجرها واسافر
عونه الارتاح     من النياح    انباكت احلامي غصب
جابو النوك     وصوتي مخنوك    ودمعتي اعله الخد تصب
****
انه فراشه ورد    والنده ايطيحه البرد
والورد شم نسمتي  اورد نسيمه
انه حجبت الحجاب     وباس رجليه التراب
الخيمه من شافتني صاحت انتي خيمه
بجفي جم نورس غفه    ومني جم عيسى اختفه
كلبي يعثر كبل لا تعثر يتيمه
تنزف اجروحي وداع    والامل من عندي ضاع
والهضيمه اعليه صاحت يا هضيمه
كمت كل حين    اعطش حسين     ذكره ماي وينشرب
جابو النوك      وصوتي مخنوك     ودمعتي اعله الخد تصب
*


جرح ضل يلجم جرح      امن اذكر الطف انذبح
جفني ما اكدر كمت يخواني اطبكه
من وكع راعي العلم     الخيل هجمت عالخيم
وكمت يا طفل اليطيح اركض اشبكه
هذا اليكلي تعاي      وذاك الينوح بكفاي
حرت ياهو الي اجيبه وياهو الحكه
كوه اجر كمت النفس      اوجهي دخان انترس
والشمر بالصوط خله امتوني زركه
اتنوح الايتام    بين الخيام    والعطش فت الكلب
جابو النوك    وصوتي مخنوك    ودمعتي اعله الخد تصب
***
حسين ضل بلا غسل    وراسه دامي اعله النصل
ورضرضت صدره الخيول الاعوجيه
بسهم المثلث حرت   اشكد اسحبه حاولت
خاف اجر طرفه ويجي ضلعه بديه
اشكثر رامينه بحجر     هذا دمه لو نهر
شفته يزحف كوه ويباوع عليه
تحرك بوجها الشمس      اسهام جسمه منترس
ردت بس شبكه اشبكه وهاي هيه
عفته عطشان   اوجها ذبلان    وضل يلوج اعله الترب
جابو النوك    وصوتي مخنوك    ودمعتي اعله الخد تصب
**





من رحت للمشرعه     الكيت جثه مكطعه
صحت يا عباس وينك يا جفيلي
كوم عدل محملي    يله يا غيرت علي
تدري ياخويه المصايب خذت حيلي
يجري بحساسك نهر     ومنك ايغار الكمر
او لو غبت اضلم يصير اعليه ليلي
يابو فاضل بس تعال     بيه حمل الدنيه مال
وابد يا عباس ما يبرد غليلي
يالاخو كون    تشوف المتون      ورمن من الضرب
جابو النوك    وصوتي مخنوك   ودمعتي اعله الخد تصب
****
الشام ما خلالي حيل     والدرب كلش طويل
جانو اخواني يسموني الاميره
لجن هسه كلشي راح    او روس اخوتي اعله الرماح
وكامو ايسموني يابويه الاسيره
عذبتني النايبات     بالخرابه اشلون ابات
سال دمعي وكمت اجر حسره جبيره
صفنتي كامت تطول     والله ما ادري شكول
حيرتي بالدنيه ابد ما منها حيره
انه زينب    وناري تلهب     اشلون للديوان اطب
جابوك النوك    وصتي مخنوك    ودمعتي اعله الخد تصب
***
تمت

#تحسين_الخفاجي

بصوت. مسلم المطيري

وين الاحباب. يحله الاعتاب

كلمات الشاعر
تحسين الخفاجي

ابوذيات بصوت. مسلم المطيري

الشاعر المرحوم
السيد جاسم الطويرجاوي