#السيرة_النبوية_للأطفال

🌙الحلقة 40🌙

🌛غزوة حنين🌜

🌻كان ياما كان و ما يحلي الكلام
إلا بذكر النبي عليه الصلاة و السلام ...

🌼ولادي حبايبي ...

🌻أخيراً ...الحمد لله ... رجع سيدنا محمد عليه الصلاة و السلام ... لمكة ...

🌼ورجع المؤمنين الطيبين .. لمكة ... البلد اللي بيحبها سيدنا محمد و بيحبها كل مؤمن ...

🌻وفي مكة ...
ناس كتير لما شافت أخلاق المسلمين الطيبة ...

🌼دخلوا في الإسلام ..... ناس كتييييييير كتير أوي دخلوا الإسلام .

🌻بس فيه بلد جنب مكة ....اسمها

🌼هوازن ...بلد كفار ....

🌻كفار هوازن ...قالوا إيه ده إزاي يحصل كده ؟؟ إزاي أهل مكة يبقوا مسلمين طيبين ؟!

🌼إزاي المسلمين ينتصروا علي الكفار و يدخلوا مكة بالسهولة دي ؟؟!!! و من غير حرب ؟؟

🌻وكمان ينشروا الإسلام و يعلموه للناس كلها؟..

🌼إحنا هنهجم علي المسلمين و نحاربهم ومش هنخليهم يعلموا حد الحق ولا الخير ...!

🌻فضل كفار هوازن يجهزوا جيشهم اللي هيحاربوا بيه المسلمين ...

🌼سيدنا محمد عرف إن كفار هوازن بيجهزوا جيش ..

🌻فعمل إيه ؟

🌼سيدنا محمد بعت واحد من المسلمين ... واحد شجاع و ذكي
وقاله أدخل هوازن وشوف هما بيعملوا إيه ... وبيخططوا لإيه .

🌻المسلم الشجاع اتنكر ... و راح عند الكفار في بلدهم هوازن ..

🌼وفضل عايش وسطهم يومين ..وما حدش عرف إنه مسلم

🌻و شافهم بيعملوا ايه ...

🌼شافهم بيجهزوا جيش كبير وأسلحة يحاربوا بيها المسلمين..

🌻وبعد يومين رجع المسلم الشجاع و معاه كل المعلومات

🌼وقال لسيدنا محمد عليه الصلاة والسلام إن كفار هوازن بينظموا جيش كبير عشان يهجموا علي المسلمين في مكة .

🌻سيدنا محمد جمع جيش المسلمين عشان يتصرفوا بسرعة

🌼وما يستنوش أما الكفار يهجموا عليهم ....

🌻جيش المسلمين كان 10 ألاف واحد .... جيش ضخم جدا

🌼و كمان فيه 2000 واحد كانوا كفار و بقوا مسلمين

🌻و هيحاربوا مع جيش المسلمين ....
يعني الجيش بقي 12 ألف واحد !!

🌼ده عدد ضخم جدا فعلا ...

🌻جيش المسلمين شكله قوي و رهيب و ضخم جدا ...

🌼واحد من المسلمين بص لجيش المسلمين و قال :

🌻لن نغلب اليوم من قلة ....

🌼يعني ما حدش هيقدر يغلبنا أبدا و احنا كتير كده و أقويا كده ...

🌻والكفار حبة صغيرين ..هنكسبهم بسهولة ..

🌼طب ينفع يا ولاد نغتر بقوتنا ؟؟ أو عددنا ؟؟

🌻ينفع ننسي ان ربنا هو اللي بينصرنا ؟

🌼ينفع نفتكر إن احنا بنكسب بس بقوتنا ؟ وقلوبنا ما تبقاش فاكرة ربنا ؟

🌻جيش المسلمين بدأ يتحرك من مكة ...

🌼و في الطريق ... الليل جه ...

🌻فجيش المسلمين وقف عشان يرتاحوا و يجهزوا نفسهم للحرب ...

🌼فدخل الجيش وادي ... اسمه وادي حنين ....

🌻عشان يقعدوا فيه .... و يرتاحوا فيه و ياكلوا ...و ينظموا نفسهم و يخططوا للحرب ..

🌼بس حصلت مفاجأة ...

🌼يا ترى إيه حصل ايه هنعرف بكرة إن شاء الله

🌻وصل اللهم وسلم على سيدنا محمد

🌼 تصبحوا على خير يا حلوين

🌻🌼🌻🌼🌻🌼🌻
https://www.tg-me.com/seerawqass

#سيرة_امهات_المؤمنين

🌙 الحلقة 2 🌙

🌴تابع السيدة عائشة رضي الله عنها

🌻كان ياما كان و مايحلي الكلام
إلا بذكر النبي .... محمد عليه الصلاة و السلام ..

🌼اللهم صل علي سيدنا مُحَمَّد

🌻و كتب النبيﷺ كتابه على السيده عائشة بس سابها في بيت أبوها علشان كانت لسه صغيره وبتحب تلعب وهيبقى صعب عليها أنها تتحمل مسئولية بيت كبير وفيه أولاد وناس تانية كتير

🌻بس هما كل البنات في مكه كانوا بيتجوزوا في السن ده وهي أصلاً كانت هتتجوز من مُطعم بن عدي

🌻النبيﷺ كان بيشوف السيده عائشة وهي بتقعد تلعب مع صحباتها فمكنش عايز يزعلها وقال لأبو بكر هي زوجتي بس خليها عندك دلوقتي لغاية لما أقول لك

🌻وكان النبيﷺ كل يوم بيروح يزورها في بيت أبوها ويلعب معاها وهي كانت بتحبه جدا و تقوله أنا عايزة آجي عندك البيت

🌻بس النبيﷺ كان بيقولها إن شاء الله هتيجي يا عائشة

🌻واما نزل سيدنا جبريل وأمر النبيﷺ بالهجرة واتفق النبيﷺ مع أبو بكر إنهم يهاجروا إلى يثرب وأول ما الرسول وصل فيها بقى اسمها المدينة المنورة يعني نورت بوجود الرسول فيها

🌻وأول لما بنوا بيت في المدينه بعدها بأيام بعتوا يجيبوا أهل النبيﷺ وأهل أبو بكر من مكه وطبعا السيده عائشه كانت معاهم

🌻واما حصلت غزوة بدر اللي اتكلمنا عليها قبل كده في قصة النبيﷺ

🌻مرضت السيده عائشة مرض جامد جدا وفضلت مريضه فتره كبيره وبعد لما خفت سيدنا أبو بكر قال للرسول إنت لازم تاخد عائشة عندك البيت علشان دي زوجتك

🌻وكان عمر السيده عائشة 9 سنوات وتزوج النبيﷺ السيده عائشة و ابتدت حياتها الجديده مع النبيﷺ

🌻 اتجوزت السيده عائشة سيدنا النبيﷺ في حجرة صغيرة كان فيها مرتبه جلد محشيه ليف

🌻و مكنش في حاجه تانيه في الاوضه غيرها

🌻 و في يوم من الايام جت واحده ست من الانصار تزور السيده عائشة

🌻و لما لقت ان مفيش حاجة ممكن حد يقعد عليها بعتت لها هدية مرتبه جواها صوف

🌻و لما جه النبيﷺ سألها ايه ده يا عائشة فراحت عائشة حكتله اللي حصل

🌻فقالها النبيﷺ رجعيها تاني

🌻و قالها انا ممكن اجيب اللي انا عايزه بس انا مش بيهمني المظاهر الفارغة دي

🌻 و في يوم من الايام جه سيدنا عمرو بن العاص يسأل النبيﷺ و يقوله مين اكتر حد انت بتحبه

🌻فرد عليه النبيﷺ و قاله عائشة..فراح قاله انا بسألك عن الرجاله يا رسول الله..راح قاله ابوها

🌻و في مرة امنا عائشه سألت النبيﷺ مين اكتر حد انت بتحبه..فراح قالها بتسألي ليه..فقالتله علشان احب اللي انت بتحبه..فراح قالها عائشة

🌻و في يوم من الايام دخل النبيﷺ لقى امنا عائشة بتعيط و سألها بتعيطي ليه

🌻قالتله بنتك فاطمه اتخانقت معايا و شتمتني فجاب النبيﷺ السيده فاطمه و قالها يا فاطمه انتي مش بتحبي اللي انا بحبه قالتله اه و قالها و بتكرهي اللي انا بكرهه قالتله اه فراح قالها انا بحب عائشة

🌻فراحت فاطمه قاتله انا مش هزعل عائشة تاني يا رسول الله

🌻و في مره النبيﷺ قال لعائشة حبك يا عائشة في قلبي كالعروة الوثقى

🌻يعني زي ما نجيب خيط و نربطه جامد فمش هتعرف تفك الربطه دي ابدا

🌻فبقت السيده عائشه كل لما تشوف النبيﷺ تقوله ايه اخبار العروة يا رسول الله فيقولها لسه زي ما هي متغيرتش

🌻و فضل النبيﷺ يحب السيده عائشة بنفس الطريقه دي لحد ما مات

🌻ساعات كان بيدخل يلقيها بتلعب مع العرايس بتاعتها او مع صحباتها البنات فيسيبها و يخرج تاني علشان تكون براحتها

🌻و في يوم من الأيام جه ناس من الحبشه بيعملوا عرض بالعصايات

🌻فقالت عائشة للرسول انا عايزة اتفرج

🌻فوقف النبيﷺ و هي وقفت وراه و بقت تبص عليهم من فوق كتف النبيﷺ من وراه

🌻و لما سألها الرسول كفايه ؟ قالتله لأ لسه شويه و هي اصلا كانت زهقت بس كانت عايزة تشوف النبيﷺ هيفضل واقف علشان خاطرها ولا لأ

🌻و بعد شويه لما النبيﷺ سألها تاني راحت قالتله خلاص كفايه

🌻و النبيﷺ كان بيساعد السيده عائشة في البيت في أي حاجه في شغل البيت يعني كان بيكنس البيت ويخيط الهدوم لكن اول ما يسمع المؤذن بيأذن يخرج علشان الصلاه

🌼وبكرة إن شاء الله هنعرف باقي القصة لان دلوقتي جه معاد النوم

🌻تصبحوا على خير يا حلوين

🌻وصل اللهم على سيدنا محمد
🌼🌻🌼🌻🌼🌻🌼
https://www.tg-me.com/seerawqass