وجود الأشخاص بحياتي ما أقيسه بس علىٰ حضورهم بحياتي كـ جسد وإنما أقيسه علىٰ رفقتهم ومرافقتهم ألي بتفاصيل أيّامي ولحظات فرحي وحزني، الأغلب ممكن يتواجد كـ جسد بس باله مو يمنا والقليل النادر الّي راح يخضع بجسده وروحه وعقله ويانا ويسندنا ويهمه أمرنا ويداري خاطرنا.

الّي راح يترسخ بذاكرتنا هيَ وگفتهم ويانا، كلماتهم الّي هونت علينا، دعائهم الّي خفف وطأة الحدث علىٰ روحنا .. مستوىٰ الأهتمام والحُبّ أحِسّ بالنسبة ألي ينقاس بهالشكل إنو الشخص شگد تعب علمود يشتري خاطري وچان مهتم لأمري ومداريني، هالنوع من التواجد هوَ الّي يميزه ويعزه بداخلي ويعرفني بقيمة الشخص الحقيقية .. من أوّل خطوة شاركها لهاللحظة.

مو دائِمًا الحياة تنصفنا بحصتنا من العلاقات، مُمكن تلگه نفسك تقدم وتنطي ومنحك للمقابل بصدق ومحبّة بلا مصلحة وغاية بس تلگه الرد مُخيب ويخليك تشك بعطائك ويمكن تسأل نفسك هل أني غلطت بحقه لو الجهة الّي قدمتلها چانت ما تستاهل، يمكن تلگه جواب ويمكن ترجع خطوة تخليك حذر وي الكل بسبب شخص، دائِمًا علىٰ بالي حچاية الشيخ أحمد الوائلي من يگول "سوي زين وعند الله ما يضيع"، هالزين هذا هوَ إحنا بأسلوبنا وشخصيتنا وحقيقتنا الّي ما گدرنا نغيرها حتّىٰ لو حاولنا انو نخليها مثل أسلوب المقابل .. ما راح نگدر لأن هالشي يميزنا، وعلىٰ گولة بابا "إحنا شلون ننعرف موالين لأهل البيت وللإمام عليّ (عليهم السّلام) بهاي الأمور الّي نشوفها صغيرة، شنو الّي راح يميز بعضنا بالتصرفات غير أخلاق منو إحنا متبعين وعلىٰ نهج منو نسير؟، إذا فعلي صار مثل غيري چا وين الإمام عليّ بفعلنا؟ هنا الفرق"، وهالحقيقة من لحظة سماعي ألها لهاللحظة الأيّام چاي تثبتلي صدقها، فَ صدگني شگد ما تقاسي من النّاس وشگد ما تنصدم بعلاقاتك كلّ ذرة جهذ بذلته بيها ما راح تضيع عند الله ولا راح تقلل منك گد ما ترفعك، ثق بيه وخليك أنت ولا تخلي نفسك نسخة من تصرفات المقابل وتصير غريب بعين نفسك.

يمكن مرات تصفن وتطلع منك لا إرادي "أني ما أستاهل الّي صار"، شگد ما توجعك هالحچاية شگد ما تصحيك علىٰ وضعك، وتأكد إنو كلشي يصير فَ أكو من وراه حكمة، الّي عليك تؤمن وتسلم لأمر الله حتّىٰ تگدر توگف من جديد وتكمل، مو لخاطر شي بس لخاطرك أنت لأن تستاهل الأحسن.

يا ربّ
من ادعي وأسألك العطاء أسند دعائي وكلّي كرم إنو يكون عطائك بقدر رحمتِك الّتي وسِعَت كُلّ شيء،
ومن تخلص قوّتي ألتجأ لقوّتِك الّتي قَهرت بِها كُلّ شيء وخَضع وذلَّ لها كُلّ شيء،
وألگاني اسكن واطمئن من بعد ما ينتهي شي بحياتي أو وي كلّ فقد بتر جزء مِن روحي ومهما خسرت فَ بقائك يكفي ووجودك يصبرني .. بوجهِك الباقي بعدَ فناءِ كُلّ شيء،
وياما يا إلٰهي نور وجهِك الّذي أضاءَ لهُ كُلّ شيء نور گلبي وأحيا نور المحاولة من جديد بروحي وخلاني أواصل.

يا ربّ
شگد ما مقصرين، وشگد ما نخطأ ونذنب ونتوب لا تحرمنا ولا تغيّر علينا النِّعم، لا تخلي ذنوبنا حاجز عن وصول دعائنا، لا تفضحنا بِخفي ما أطلعت عليه من سِرّنا ولا تهتِك علينا نعمة الستر من بعد ثناءٍ جميلٍ لسنا أهلًا له نشرته.

يا ربّ
أوزِعني أن أشكرك حقّ شكرك
وأن أشكرك لنعمة قدرتي علىٰ شكري أياك.

يا ربّ
ألهِمني ذِكرِك وولَهًا بِذِكرِك إِلىٰ ذِكرِك
واِذن لي بجريان ذِكرِك وتسبيحك ودعائك وأجعلني مِمّن يُديم ذِكرِك فَ لا تَطمئِنُّ القلوبُ إلاّ بذِكرِك وأستغفِرُك مِن كُلِّ لَذَّةٍ بِغيرِ ذِكرِك.

يا ربّ
أجعلني بقِسمِك راضيًا قانِعًا وفي جميعِ الأحوالِ مُتواضِعًا لأسلم لكَ أمري حقّ التسليم ولأؤُمن بحكمتك قبل وضوحها، اللهمَّ أرضني بقضائك حتّىٰ لا أحبُّ تعجيل شيءٍ أخرته، ولا تأخير شيءٍ عجلته.

إلٰهي يا مَن عليه مُعوَّلي
يا مَن إليهِ شَكوتُ أحوالي
جُد عليَّ بِجودِك واعطِف عليَّ بمجدِك واحفظني برحمتِك، ولا تقطع من فضلِك رجائِي، وافعل بي ما أنتَ أهلهُ.

أتمنىٰ منك من تشاركني حزنك ومشاكلك والّي مأذيك،
ومثل ما شفتني جهة آمنة تطمئن ألها وتأمن بيها،
تخليك تشاركني فرحتك وانجازك وحل مشكلتك وتسهيل أمورك،
مثل ما شلت همك وبالي ظل يمك ودعيتلك بوقت شدّتك .. راح أرتاح وأحمد الله إنو صرت بخير ومرتاح،
ليش تخلي المقابل يهم بيك وباللي تگوله ومن توصل لقضاء الحاجة تخليه يسمع من غيرك؟
ترا صدگ هالشي مو حلو ولا لطيف، قابل ما راح يتمنالك الخير وهوَ الّي يدعيلك بكلّ صلاة إنو ييسر أمرك ويفرج كربك؟.

✨عيدكم مُبارك.✨

"جاور السَّعيد تسعد."
"جاور جميل الرّوح تُصِبّك عدوىٰ جماله."

هواي مارات عليه وعادي أتخطاهن ولا أوگف يمهن لحد ما ورا فترة مو قريبة ولا بعيدة أحِسّ ألتمست تأثير شنو معنىٰ المجاورة الصحيحة.

يمكن أنت هم ماره عليك هالعبارات مو؟
تخيل نفسك مثل الوعاء الّي يستقبل كلشي من أي شي يقابله، وبالمعنىٰ الأدق من عقلك يكون مُستقبل لأي شي يشوفه ويسمعه بالواقع أو بالنت، أو الّي ينتج من التجمعات والعلاقات، هنا أنت إمّا تفلتر كلشي وتمرّر بس الشي الّي يفيدك وصحيح أو تقبل كلشي وتخلي أفكارك هوسة وما تعرف شنو الصح من الغلط وما يصيرلك لا رأي ولا قرار ولا تعرف شنو تحب ما تحب.

هالشي هم ينطبق علىٰ مجاورتك للأشخاص، أنت راح تنطي وقت وطاقة وتسمع وتشارك، بهالحالة أنت راح تتأثر، بس درجة التأثير أنت تحددها حسب الحدود والمبدأ والأساس الّي مخليهم لحياتك وتمشي عليهن.

وتقريبًا علىٰ نفس هالمبدأ
صرت أحِبّ مجاورة الأشخاص الّي يكثرون من الحمد والشكر لله والرضا،
أحِبّ فكرة إنو من بعد كلّ تعب ما يتردد علىٰ لسانهم غير "الحمدلله" والّي تكون برضا، الشعور الّي ينقلوا وهمَّ يحچون عن فضل رب العالمين عليهم وشلون مواصلين بلطف الله بيهم، وشلون راضين رغم النتيجة تكون أقل من الّي قدموا، فكرة إنو أستمد هالشي منهم تخليني أحِبّ هالرفقة.

ما أگول مُبالغة بس ذكر النِّعم الّي عدنا هواي يهوّن علينا الّي ما عدنا، وكلنا نعرف إذا نعمة وحدة بس تنسلب منا راح نضيع، فَ جربوا بنهاية كلّ يوم تستذكرون الّي عدكم وتشكرون الله عليه، صدگوني شعور الشكر غير ويختلف حيل وبيه مشاعر رهيبة.

يروىٰ عن الإمام عليّ الهادي (عليه السّلام)
ألقوا النّعم بحسن مجاورتها والتمسوا الزّيادة فيها بالشّكر عليها.

✨راح يجي يومك✨

بالوقت الّي صبرت بيه وحاولت وي نفسك تتحمل،
ومن رضيت بالوقت الّي چان بيه الرضا مو سهل،
ومن قوّيت نفسك وأنت تريد تنهار وما عاد تگدر تكمل،
ومن كظمت غيظك وسامحت،
من راعيت المقابل بوقت محد راعىٰ خاطرك،
ومن هوّنت علىٰ نفسك وحاولت تشوف الجانب الزين من كلّ جانب سيّئ مر عليك،
ومن حسيت إنو راح يخلص كلّ هذا وما خلص،
ومن سكتت وما بچيت لأن شعورك چان أكبر وأثگل من كلّ مرة،
من حسيت الدنيا صغيرة بعينك،
ومن سألت نفسك 'ليش معقولة بس أني يصير وياي هيچ؟'،
من شكيت بنفسك والّي تستحقه وتستاهله،
من تعبت وتعبت من هالشيلة،
ومن كلّ أزمة مرت عليك خلتك تتكور علىٰ نفسك وتلبد بفراشك،
جاية أگلك راح يجي يومك،
يومك الّي بيه تتعوض وترضىٰ،
‏﴿وَلَسَوْفَ يُعْطِيكَ رَبُّكَ فَتَرْضَىٰ﴾
يومك الّي من شدّة رضاك بيه وعلىٰ نفسك تحس إنو رب العالمين سهل ورتب كلشي بس لخاطرك أنت وكأنك عبده الوحيد وهاليوم مكتوب باسمك.

شايفين من تحچون لشخص فد شي ويگول:
"حاس بيك،
فاهمك،
عايش الّي تگوله،
مار عليه هالشعور."

يمكن تگول راح يعرف الّي أحچيه وما يستهين بيه ويمكن لا يجاملني،
مرات نقابل أشخاص بحياتنا بأختلاف ظروفهم ومشاكلهم وشعورهم بس يعرفون قصدك ويعرفون يرتبون أفكارك ويفهمون حتّىٰ هوستك.

أكو "أحِسّ بيك" لشخص عايشها وأكو للي تأثر بكلامك وأكو للتهوين وأكو للمُجاملة.

أتمنىٰ وأنت تحچي شعورك لشخص بيوم إنو يكون الوجهة الصحيحة الّي ما تندم عليها ولا تُضام، أتمنىٰ تكون حصتك شخص فاهمك ويحاول يفهمك بدون ما تتعب بالشرح وياه.

أكو أيّام تمر علينا تخلينا ما نگدر نوگف حتّىٰ ناخذ نفس، ما نگدر نبين تعبنا ولا شگد محتاجين نرتاح، ما عدنا أختيارات هواي ولا فرص غير إنو نكمل ونستمر لحد ما تخلص هالفترة ونكون راضين علىٰ الّي نبذل بيها.

وي الوقت تدرك إنو مو كلشي يستاهل تصرف عليه جهد ووقت وطاقة وجدال وحرگة دم وأعصاب، تدرك إنو راحة بالك إذا تريد تشتريها لازم تعدي وتجاهل وتمشي ومو علىٰ كلشي توگف، يصير همّك شلون تسعد نفسك وتخليك هادئ ومرتاح، تسوي الّي عليك تجاه دينك وترضي ربك وتأمر بالمعروف علىٰ قدر استطاعتك والّي تسمحه طاقتك، تدرك إنو أنت الأمس مو نفسك اليوم ولا نفسك باچر وتغيرك وي تغير الوقت يخلي الشي الثابت عندك شلون تشتري راحتك وسعادتك بنص كلّ هذا لأن تعرف محد يقدمهن ألك غيرك.

كلي أمل ويقين وثقة بالله ومع هذا أتمنىٰ إنو يعوضك عن شعورك من تكون بوسط زحمة النّاس ومشاغل هالحياة وتذكر الّي خلاك تبهت وكلشي بيك يسكت وبس سؤال "ليش" يتردّد علىٰ لسانك، أتمنىٰ يبدلك عن هذا الشعور الّي خله عيونك تلمع بوسطهم وأيدك بعشوائية تحاول تداري عنك الدمعة الّي ما صمدت ونزلت، أتمنىٰ يقر عيونك بدموع ما أداريهن علمود ما يوگعن، أتمنىٰ حكمة رب العالمين تعرفك المغزىٰ والجواب من الـ "ليش" الّي بقت تاكل بگلبك وتأرق نومك وتنزع البسمة من وجهك، يا ربّ ينزع عنك كلّ هالمشاعر الحزينة ويبدلهن بمشاعر تحمد الله عليهن وتتمنىٰ دوامهن عليك.

كلّ عام وإحنا تحتَ ظلّ ولاية الأمير عليّ (عليه السّلام)، الله يجعلنا من الثابتين علىٰ الصّراط المُستقيم والمتمسكين بولايته قولًا وفعلًا ويقدرنا إنو نكون من الأخذين بقوله والعاملين بأمره ونكون زَينًا لآل البيت (عليهم السّلام) .. آمين يا ربّ. ♥️🌻

عيش فرحة عيد الغدير،
لا تخلي أي شي يطغىٰ علىٰ هالأيّام،
وكّل أمرك لله وأطلب من الإمام عليّ يعينك علىٰ الّي تمر بيه، حبًّا بيه وفخرًا بولايته خليك مكمل بهالطريق تمهيدًا ولأجل دولة إمام زمانك ولأن بعد كلّ هالسعي والتعب عيونك تستاهل تشوف سعيك واقع ملموس. ✨