كلّ شعور بداخلنا يتمثل بـ خزان أو رصيد باللي يناسبكم مثلوا، المهم هالخزان كلما كان مليان بالحد الطبيعي الّي يكفي ويسد حاجتنا كلما الأمور الّي تخصه تمشي تمام، بينما إذا زاد أو نقص عن الحد الطبيعي راح يصير خلل يسببلك شعور معين خارج الخزان، مثل خزان العاطفة الّي ما مليان للمستوىٰ المطلوب وبالتالي راح نلگه صاحبه علمود يمليه، يا أمّا يلجأ يفكر بنفسه وبنفسه يمليه ويدير باله عليه أو يلجأ لخارج دائرة الأمان ويطلبه من أي جهة تصادفه وبيها الّي فاقده ويحتاجه.

علمود الإنسان يلبي هالأحتياچ، لازم يشوف نفسه أول، يعني يلگه نفسه بداخله ويدور علىٰ الجزء الّي هوَّ فاقده أو متضرر ويعالجه من الداخل.

علمود تلگه نفسك لازم ادور عليها زين وما تبقىٰ بصراع مستمر وياها وتقلل من قيمتها، من تلگاها راح أنت تكون المصدر الّي ينطيها الّي تحتاجه وتسد احتياجها وبالتالي تختفي رغبة الاحتياج وتتحول لرغبة ممكن يتقبلها ويقتنع بيها بالخارج من يشوفها تناسبه.

بدل ما نبخس حق نفسنا والّي يميزنا ونروح نريد نسلط الضوء علينا وندور إهتمام من الخارج، خلي يكون منبع هالضوء والاهتمام ينبع من داخلنا، أني الّي أكون ممتن للي عندي والّي يميزني والّي مسويه وتعبان عليه والّي وصلتله، ما أنتظر شوكت الّي حواليه ينتبهون حتّىٰ يعززولي!

فرق چبير بين ما تكون مقدر نفسك وتعرف قيمتك وبين ما أدورها بين النّاس.

إحنا تعودنا من نريد شي وينرفض معناها أكو شي ما مقبول بالموضوع لذلك من تطلب إهتمام من الخارج وما تحصله راح تحس بعدم أمان، لذلك ضروري تلبي الحاجة من داخلك علمود من تنرفض من الخارج ما راح تتأثر ولا تنطي الموضوع أكبر من حجمه.

چانت النيّة أكمل حچي بس تبليغات الكلية ما تخلي الواحد مرتاح. 👍🏻🫠

شايفة الطفل من يغلط ويخاف؟
التربية الصحيحة والاحتواء من الأهل شلون لازم يكون؟
من يحسسوا بالأمان ويعلموا الخطأ بروية ويهدون منه وينطوا الوقت والطريقة لتصليح غلطه وتحمل مسؤوليته.
وهم إذا طفل غلط بشي يخصچ واجاچ يعتذر شسويله؟ تعلميه الصح وتحضنيه، وأي نفسچ هيچ!.

روحچ مثل الطفل الّي ما جان ذيج الخبرة بالتصرف بالماضي وغلط، بدل ما تلوميها جربي تفهميها وتعلميها، من تتقبلين إنو هيَّ معرضة للغلط وطبيعي الصار، والماضي ماضي، كثرة اللوم وجلد الذات ما راح يغيرلچ نفسچ ولا يعيدلچ الماضي ولا ينطيج حلول، من تغفرين لنفسچ وتسامحيها علىٰ اغلاط الماضي، من تطوين صفحة الصار باللي بيه وما ترجعين تفتحيها لأن الّي صار صار بعد، من تتعلمين الدرس وتعرفين شنو الّي تستحقيه، من ما توكفين علىٰ الكلمة وتخليها تتحكم بيچ، من تتقبلين الصار وتعرفين انچ بني آدم يغلط مو معصوم ولا مثالي، الإنسان يتعلم ولأن يتعلم معرض للغلط، الحل بيدچ وواضح بس يرادلچ الخطوة.

جربي تكعدين وي نفسچ بورقة وقلم وتصلحين وترتبين افكارچ، الگي نفسچ لخاطرچ حتّىٰ تكملين.

قبل ما توفرون الاحتياجات المادية للطفل، خلوا علىٰ رأس القائمة الحاجات العاطفية.
وفرله الحُبّ الّي يخليه مكتفي ومُتزن عاطفيًا، وفرله الأمان الّي يخليه ما يتردد من يضوچ أو تصيرله مشكلة يخاف يصارحك بيها، وفرله مساحة آمنة بعيدة عن منزلة الأب والأم بدور الأمر الناهي، مساحة يگدر يشرح بيها نفسه ويحچي بطبيعة داخله مو لسان الخارج من رسمية ومجاملة بخوف.

إذا مقررين إنجاب طفل فَ ..
تثقف وأهتم بهذا الجانب مثل ما تهتم بمجال شغلك وأناقتك وسيارتك وفريقك المفضل.
وخليچ علىٰ وعي كامل بالمسؤولية الّي عليچ علمود تربين طفل خالي من العقد النفسية، اهتمي بتربيته وسمعي واقري وبحثي عن الطرق السليمة للتربية مثل ما تهتمين وحريصة علىٰ جمالچ وتنسيقاتج وآخر الأصدارت والماركات الجديدة واهتماماتچ الخاصة.

وصراحة محد مجبور يجيب أطفال إذا هوَّ مو حمل هيچ مسؤولية! خليكم علىٰ وعي بهالموضوع وأبتعدوا عن الحچي الروتيني والاهتمام بيه بس علمود تسكتون المقابل، محد راح يشارككم بحياتكم الخاصة غيركم ومحد راح يتعب غيركم فَ لا تخلون أحد يدخل ويقرر عنكم!، كلما كان الوعي والتصرف الصحيح موجود كلما كان الاحتواء وفهم الطفل أوضح.

+ طفلك مو ورقة تشفي بيها غليلك وترجع أطبق تربية أهلك عليه، إذا چنت من الّي أهلهم ما انطوهم المشاعر الكافية ولا وفرولهم الاحتياجات الطبيعية، فَ خليك أنت العوض لنفسك ولطفلك، وفرله الّي ما توفر ألك حتّىٰ لا تعيد الّي صارلك وياه وتخلي الدائرة تستمر بنفس الروتين.

وكلّ شخص راح يفهم الموضوع من منظوره ويفسره علىٰ كيفه، هالشي راجع إله بس رجاءً خليك واعي ومسؤول يلا تفكر، أنت ما راح تسوي عائلة بس ولا راح تضيف حفيد جديد للأهل، أنت راح تكون جزء من مشروع جيل جديد لمجتمع بعد كذا سنة طفلك يكون جزء منه، لخاطر هيچ لحظة ولوقت الّي يكون طفلك شاب، وفرله التربية الّي ما تخليه بيوم يگول "علىٰ شنو جبتوني للدّنيا إذا انتوا مو گد تربيتي ولا موفريلي الشعور المعنوي قبل المادي." لا تخليه بيوم يفكر لو انتوا مو أهله ويتمنىٰ عائلة غيركم، لخاطر هيچ لحظات وكلمات تحز بالگلب، خليكم واعين مُدركين وصيروا النسخة الّي أبنائكم يحمدون الله ويشكروا عليها.

ـ الپوت مُغلق.*

"قَاوِم مَا تَكره لِتَصِل إلىٰ مَا تُحِب."

ـ هوَّ منو يحس! منو يفهمني ويعرف بحالي، منو داري عني أصلًا!.
= الله يدري لو ما يدري!.
ـ يدري الله يدري.
= خلص بعد دراية الله أمان أطمئني.

"Always study well to achieve your future dreams since no one will achieve them for you."

آخر أمتحان فَصلي بالمرحلة الثالثة: ✅.

رب العالمين من ياخذ شي منك، يعوض بشي أحسن منه ومناسب حيل ألك، ومو بس هيچ وإنما ينطي أضعافه مقابل شي واحد ياخذه، فَ الإنسان من يمشي بـ مبدأ *هالشي ما صارلي وما تحقق معناها رب العالمين ما كاتبه إلي وهم ممكن ما بيه صالح إلي، هنا التسليم لتدبير ربّ العزّة راح هواي يفرق بحياتك، حتّىٰ نظرتك الّي چنت تشوف بيها إنو الراح منك معناها رب العالمين ما يحبك وحظك ما گاعد بأي شي نفسك تريده .. راح تتغير وهم تضحك عليها، نظرتك الجاية من تفهم المغزىٰ راح تكون: الّي بيه صالح إلي ومن نصيبي الباري راح يكتبه إلي ويخليه بحياتي وطريقي والّي بيه ضرري راح مثل ما يشيله من طريقي يشيله من گلبي ويطيب خاطري بالأنسب إلي.

كلشي يگول راح توگف وشلون راح تعديها!
أني نفسي ما أعرف شلون راح أكمل بس كلّ الّي أمتلكه لهالفترة هوَّ التّوكّل و"أَمِنَ المُتَوَكِّلُوْنَ" مهما صادفنا من عرقلات وتقلبات وأمور خارج وضد إرادتنا، الّي توكّلنا عليه ما راح يعوفنا بنص الدرب.

من نزل جدول الفاينل
حسيت ع گد ما يخنگ خنگني وياه
والحل؟
رحت أسمع قصيدة حُسينيّة ترتب الوضع الداخلي وتخليني مواصلة.