​​​​#мәўлид

Рoбиъул әўўәл айын қалай өткериўимиз керек?

Бүгин, 2024-жыл сентябрь айының 4-сәнесинде ҳижрий календарының ең әҳмийетли айларынан бири – Робиъул әўўәл айы басланады. Ислам тарийхында бул ай ең әҳмийетли ўақыя – мәўлид, яғный сүйикли Пайғамбарымыз Муҳаммад Мустафа саллаллаҳу алайҳи ўа салламның туўылған күни бар екени себебинен де әҳмийетли. Робиъул әўўәл – Аллаҳ тааланың инсаниятқа ислам динин кәмил көринисте нәзил еткен соңғы Пайғамбары Муҳаммад саллаллаҳу алайҳи ўа салламды жиберген муқаддес ай. Нәбийимиз саллаллаҳу алайҳи ўасаллам 571-жылдың Робиъул әўўәл айы, он бириншисинен он екиншисине өтер түнде, басқа мағлыўматларға қарағанда он екинши күни, дүйшемби таңында дүньяға келген. Буннан басқа да, бул муқаддес айда бир қатар итибарлы ўақыялар болған, солардан Пайғамбарымыз саллаллаҳу алайҳи ўасалламның қызы Руқайя туўылған, биринши мешиттиң қурылысы ҳәм ондағы биринши жума намазының оқылыўы киби ҳәдийселер де усы айда болған. Булардың арасында әлбетте, Нәбий саллаллаҳу алайҳи ўа салламның туўылған күни дүньяның түрли тәреплеринде бәрше мусылманлар тәрепинен белгиленбекте.
Бул байрамды белгиленгенде биз ушын әҳмийетлиси – бул күн Пайғамбарымыз саллаллаҳу алайҳи ўа салламды, оның өмир жолын, тәлиматларын еске алыў ҳәм оннан өрнек алыў болады. Қалаберди, бул күн өз өмиримиз ҳаққында, Пайғамбарымыз саллаллаҳу алайҳи ўа салламға үмметликти дурыс қылып атырман ба, деп ойлаў, ҳәр бир мусылман өзи ҳаққында ойлап көриў мәўрити.
Робиъул әўўәл – дүнья тәшўишлеринен шетке шығып, мәңги өмир ҳаққында пикир жүритиў, жәҳилият ҳүким сүрген ўақытлары әлемди жарықлыққа алып шыққан Пайғамбарымыз саллаллаҳу алайҳи ўа салламды жибергени ушын Жаратқанға шексиз ҳамдлар айтыў пурсаты.
Бул ай – және бир мәрте сүйикли Пайғамбарымыз саллаллаҳу алайҳи ўа салламның мүбәрек дәўири – саадат әсирин еслеў ўақты.
Аллаҳ таала: “(Ҳәй ийман келтиргенлер) Ҳақыйқатында да, сизлер ушын, Аллаҳтан ҳәм ақырет күнинен үмит қылғанлар ушын ҳәм Аллаҳты көп зикир қылғанлар ушын Аллаҳтың пайғамбарында жақсы өрнек бар.”, деген.
Демек, бул ай – және де көбирек зикир етиў ҳәм Аллаҳға ибадат қылыў мәўрити.
Көп ғана ийманлы адамларда “Бул айды қалай өткериў керек?” деген сораў жүзеге келиўи мүмкин. Қандай ҳәм қайсы жыл, ай, ҳәпте, күн болса да, мөмин адам өз ибадатларын, парызлары қатары нәпил ибадатларын да орынлаўында, қадаған етилген нәрселерди тәрк етиўинде, қайырлы ҳәм пайдалы ислерде даўамлы болыўда ҳәрекет етиўи лазым. Итибар берилсе, Муҳаммад саллаллаҳу алайҳи ўа саллам туўылған бул айда – Пайғамбарымыз саллаллаҳу алайҳи ўа салламға салаўат айтыў, Аллаҳты зикир етиўди көбейтиў тийис.
Дереклер тийкарында робиъул әўўәл айын өткериў бойынша бир қатар усыныслар бериў мүмкин. Бул айда өзиңиз ушын әҳмийетли бир неше мақсетлерди алдыға қойың:
- Нәбий саллаллаҳу алайҳи ўа салламның сийратын үйрениўди өзиңизге мақсет етиң, бул әжр-саўапларға еристиреди.
- Нәбий саллаллаҳу алайҳи ўа салламның ҳәдислерин үйрениң.
- Салаўат айтыўды көбейтиң.
- Пайғамбарымыз саллаллаҳу алайҳи ўа салламның сүннетлери өмириңиздиң ҳәр бир ләҳзесин қамтып алсын.

Бизди социаллық тармақларда бақлап барың!

https://www.tg-me.com/paziyletuz