​​#мағлыўмат

МУҲАРРАМ – ТӘЎБЕ АЙЫ

Әлий разыяллаҳу анҳу деди:
«Бир адам келип, Нәбий саллаллаҳу алайҳи ўа салламнан:
«Рамазаннан кейин қайсы ай оразасын тутыўымды буйырасыз?» – деп сорады.
«Егер Рамазаннан кейин ораза тутыўшы болсаң, Муҳаррамды тут. Себеби, ол Аллаҳтың айы. Онда Аллаҳ бир қәўимниң тәўбесин қабыл қылған ҳәм басқа қәўимлердиң де тәўбесин қабыл қылады», – деди».

Термизий рәўияты ҳәм ҳасан, деген.

Демек, усы ҳәдистен алынатуғын пайдаларымыз:
1. Қайсы ўақытта нәпил ибадат етиў абзал екенлигин билип алыўға қызығыў.
2. Рамазан оразасынан кейинги ең абзал ораза Муҳаррам айы оразасы екенлиги.
3. Муҳаррам айы Аллаҳтың айы атына сазаўар болған ай екени. Барлық айлар да Аллаҳтики. Лекин, Муҳаррам айының сол ат пенен аталыўы бул айдың абырайын көтереди.
4. Аллаҳ таала Муҳаррам айында өткен қәўимлерден бириниң тәўбесин қабыл қылғаны.
5. Муҳаррам айында Аллаҳ таала басқа қәўимлердиң де тәўбесин қабыллаўы.

Муҳаррам айы ҳаққында қандай мағлыўматларға ийемиз ҳәм бул айда қандай ибадатларды орынласақ саўапқа ерисемиз? Қулласы, соған уқсас сораўларға итибар берсек.
«Муҳаррам» сөзи сөзликте «ҳүрметленген», «ҳарам қылынған», «уллыланған» деген мәнилерди береди.
Ҳақыйқаттан да, Муҳаррам айы ҳүрметли ай. Бул ай ҳижрий сәне басланған ай.
Муҳаррам айы Аллаҳ таала урысты ҳарам қылған төрт айдан бири. Буннан артық ҳүрмет болыўы мүмкин бе? Бул ай «Аллаҳтың айы» деп аталады.
Муҳаррам айы Рамазан айынан кейинги орында турады. Бул айда ең уллы күнлерден бири – Ашура күни бар. Бул айдың ҳүрмети, ҳарамлығы ҳәм уллылығын ҳәдислерди үйрениў даўамында тереңлеў билемиз.

Әбиў Ҳурайра разыяллаҳу анҳудан рәўият қылынады:
«Нәбий саллаллаҳу алайҳи ўа салам:
«Рамазаннан кейинги ең абзал ораза Аллаҳтың Муҳаррам айы (оразасы). Парыз намаздан кейинги ең абзал намаз түнги намаз», деди».

Бесеўинен тек Бухарий рәўият қылмаған.

Шолыў: Усы ҳәдистен алынатуғын пайдалар:
1. Рамазан оразасынан кейинги ең абзал ораза Муҳаррам айы оразасы екенлиги.
2. Муҳаррам айы Шаҳруллаҳ – Аллаҳтың айы деп аталыўы.
3. Парыз намазынан кейинги ең абзал намаз түнги намаз (таҳажжуд намазы) екенлиги.
4. Муҳаррам айында көбирек ораза тутыўға ҳәрекет етиўимиз лазымлығы.
5. Түнде таҳажжуд намазларын оқыўға әдетлениўимиз кереклиги.

@paziyletuz | paziylet.uz